ກົມໂຄສະນາການທ່ອງທ່ຽວ ເຜີຍແຜ່ການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຢືນຍົງ.

ໃນວັນທີ 7 ມິຖຸນາ 2022 ນີ້, ກົມໂຄສະນາການທ່ອງທ່ຽວ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຮ່ວມກັບ ຫ້ອງການກອງທຶນປົກປັກຮັກສາສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ໂຮງຮຽນມັກທະຍົມປາຍ ມິດຕະພາບ ວຽງຈັນ-ໂຮ່ຈີ່ມິງ ຈັດກິດຈະກຳເຜີຍແຜ່ການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຢືນຍົງ ເນື່ອງໃນໂອກາດວັນສິ່ງແວດ ລ້ອມໂລກ 5 ມິຖຸນາ ຢູ່ສວນເຈົ້າອານຸວົງ (ແຄມຂອງ) ນະຄອນຫລວງວຽງຈັນ ພາຍໃຕ້ຫົວຂໍ້ “ການສົ່ງເສີມ, ປູກຈິດສຳນຶກ ແລະ ໂຄສະນາເຜີຍແຜ່ກ່ຽວກັບການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຢືນຍົງ” ໂດຍມີ ທ່ານນາງ ແສງໂສດາ ວັນທານຸວົງ ຮອງຫົວໜ້າກົມໂຄສະນາການທ່ອງທ່ຽວ, ທ່ານນາງ ບຸນພາມາ ໂພທິສານ ຮອງຫົວໜ້າຫ້ອງການ ກອງທຶນປົກປັກຮັກສາສິ່ງແວດລ້ອມ, ພ້ອມດ້ວຍ ຄູ-ອາຈານ ຈາກມະຫາວິທະຍາໄລແຫ່ງຊາດ ແລະ ນັກຮຽນຈາກໂຮງຮຽນດັ່ງກ່າວ ເຂົ້າຮ່ວມ.ທ່ານນາງ ແສງໂສດາ ວັນທານຸວົງ ໄດ້ກ່າວວ່າ:

ການຈັດກິດຈະ ໃນຄັ້ງນີ້, ແນໃສ່ຊຸກຍູ້, ສົ່ງເສີມ ໃຫ້ນັກຮຽນ ແລະ ຄູ-ອາຈານ ຮັບຮູ້ ແລະ ເຂົ້າໃຈກ່ຽວກັບຄວາມໝາຍ, ຄວາມສຳຄັນຂອງການປົກປັກຮັກສາສິ່ງແວດລ້ອມ, ທັງເປັນການໂຄສະ ນາ ເຜີຍແຜ່ກ່ຽວກັບການປົກປັກຮັກສາສິ່ງແວດລ້ອມ ເພື່ອການທ່ອງທ່ຽວທີ່ຢືນຍົງ, ໃນນັ້ນ, ໄດ້ຈັດກິດຈະກຳ ຖາມ-ຕອບ ກ່ຽວກັບສິ່ງແວດລ້ອມ ແລະ ກິດຈະກໍາອະນາໄມ ລວມ (ເກັບຂີ້ເຫຍື້ອອ້ອມ ບໍລິເວນສວນເຈົ້າອານຸວົງ) ແນໃສ່ຊຸກຍູ້ສົ່ງເສີມ ເຮັດໃຫ້ຄູ-ອາຈານ ແລະ ນ້ອງນັກຮຽນ ເອົາໃຈໃສ່ປະກອບສ່ວນເຂົ້າໃນການປົກປັກຮັກສາສິ່ງ ແວດລ້ອມທາງທຳມະຊາດ ໃຫ້ຄົງຢູ່ ເພື່ອການທ່ອງທ່ຽວທີ່ຢືນຍົງ, ທັງເປັນການເພີ່ມຄວາມຮູ້ ແລະ ເປັນປະໂຫຍດໃຫ້ແກ່ນັກຮຽນ ເພື່ອນໍາໄປປະຕິບັດໃນໂຮງຮຽນ, ຄອບຄົວ ແລະ ຊຸມຊົນທ້ອງຖິ່ນທີ່ຕົນເອງອາໄສຢູ່ ໃຫ້ແທດເໝາະ ແລະ ສອດຄ່ອງກັບສະພາບຕົວຈິງ.ພ້ອມກັນນີ້, ທ່ານນາງ ບຸນພາມາ ໂພທິສານ ໄດ້ຍົກໃຫ້ເຫັນປະຫວັດຄວາມເປັນມາຂອງວັນສິ່ງແວດລ້ອມໂລກ ເຊິ່ງກອງປະຊຸມສຸດຍອດໂລກ ກ່ຽວກັບສິ່ງແວດລ້ອມຂອງມະນຸດ ທີ່ອົງການສະຫະປະຊາຊາດໄດ້ຈັດຂຶ້ນ ໃນວັນທີ 5 ມິຖຸນາ 1972 ທີ່ເມືອງສະຕັອກໂຮມ ປະເທດຊູແອດ ເຊິ່ງເປັນວັນທີ່ຜູ້ນໍາຮ້ອຍກວ່າປະເທດຈາກທົ່ວໂລກ ໄດ້ປຶກສາຫາລື ກ່ຽວກັບພຶດຕິກໍາຂອງມະນຸດ ທີ່ສ້າງບັນຫາດ້ານສິ່ງແວດລ້ອມ ແລະ ໄດ້ຮັບຮອງເອົາວັນດັ່ງກ່າວ ເປັນວັນສິ່ງແວດລ້ອມໂລກ. ສຳລັບ ສປປ ລາວ ກໍໄດ້ເລັງເຫັນຄວາມສໍາຄັນຂອງການປົກປັກຮັກສາສິ່ງແວດລ້ອມ ຈຶ່ງໄດ້ສ້າງກົດໝາຍວ່າດ້ວຍການປົກປັກຮັກສາສິ່ງແວດລ້ອມ ເປັນສະບັບທໍາອິດຂຶ້ນໃນປີ 1999 ແລະ ໄດ້ກໍານົດເອົາວັນທີ 5 ມິຖຸນາ ເປັນວັນສິ່ງແວດລ້ອມແຫ່ງຊາດ, ຫລັງຈາກນັ້ນ, ກອງທຶນປົກປັກຮັກສາສິ່ງແວດລ້ອມ ກໍໄດ້ສ້າງຂຶ້ນໃນປີ 2005 ເພື່ອເຮັດໜ້າທີ່ລະດົມ, ສະສົມ ແລະ ສະໜອງທຶນ ເພື່ອສ້າງຄວາມເຂັ້ມແຂງໃຫ້ແກ່ວຽກງານຄຸ້ມຄອງຊັບພະຍາກອນທຳມະ ຊາດ ແລະ ປົກປັກຮັກສາສິ່ງແວດລ້ອມ ຕາມທິດສີຂຽວ ແລະ ຍືນຍົງ. ທ່ານນາງ ບຸນພາມາ ໂພທິສານ ຍັງໃຫ້ຮູ້ອີກວ່າ: ອີງຕາມຂໍ້ມູນຂອງອົງການອານາໄມໂລກ ໄດ້ສະແດງໃຫ້ຮູ້ວ່າ ມີຄົນເສຍຊີວິດຫລາຍກວ່າ 10 ລ້ານຄົນ ໃນທົ່ວໂລກໃນແຕ່ລະປີ ຍ້ອນບັນຫາທາງດ້ານສິ່ງແວດລ້ອມ, ໃນນັ້ນປະມານ 7 ລ້ານຄົນໄດ້ເສຍຊີວິດ ຈາກບັນຫາມົນລະພິດທາງອາກາດ.

ສະນັ້ນ, ພວກເຮົາຈົ່ງຮ່ວມແຮງຮ່ວມໃຈກັນຢ່າງຈິງຈັງ ເພື່ອຖະນຸຖະໜອມໂລກ ດ້ວຍການປົກປັກຮັກສາ ແລະ ແກ້ໄຂບັນຫາສິ່ງແວດລ້ອມ ພາຍໃຕ້ຄຳຂວັນ “ໂລກມີພຽງໜຶ່ງດຽວ” (Only One Earth), ພວກເຮົາຕ້ອງສາມາດຢູ່ຮ່ວມກັບທຳມະຊາດຢ່າງກົມກຽວ ແລະ ຍືນຍົງ.

ຂ່າວ-ພາບ: ຂປລ

ກອງປະຊຸມມອບໝາຍໜ້າທີ່ການຝຶກຊ້ອມກອບກູ້ໄພພິບັດຮ່ວມ​ 03 ກອງທັບ ລາວ-ຫວຽດນາມ-ກໍາປູເຈຍ ປະຈໍາປີ 2022

ກອງປະຊຸມເຜີຍແຜ່ແຜນການ, ຂໍ້ຕົກລົງ ແລະ ມອບ​ໝາຍໜ້າທີ່ໃຫ້ແຕ່ລະກົມກອງຈັດຕັ້ງການຝຶກຊ້ອມກອບກູ້ໄພພິບັດຮ່ວມ 03 ກອງທັບ ລາວ-ຫວຽດນາມ-ກໍາປູເຈຍ ປະຈໍາປີ 2022 ຈັດຂຶ້ນໃນຕອນເຊົ້າວັນທີ 6 ມິຖຸນາ 2022, ທີ່ສະໂມສອນຫ້ອງວ່າການກະຊວງປ້ອງກັນປະເທດ, ໂດຍໃຫ້ກຽດເຂົ້າຮ່ວມເປັນປະທານ ຂອງສະຫາຍ ພົນຕີ ຈັນທອງ ສອນຕະອາດ, ຄະນະປະຈໍາພັກກະຊວງປ້ອງກັນປະເທດ, ຮອງລັດຖະມົນຕີກະຊວງປ້ອງກັນປະເທດ, ປະທານຄະນະກໍາມະການຄຸ້ມຄອງໄພພິບັດກະຊວງປ້ອງກັນປະເທດ, ມີບັນດາຄະນະຊີ້ນໍາ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ສະຫາຍ ພັນຕີ ວົງສະຫວັນ ທໍາມະວົງໄຊ ຮອງຫົວໜ້າພະແນກ ຍຸດທະວິທີ ກົມອົບຮົມ ກົມໃຫຍ່ເສນາທິການກອງທັບ, ໄດ້ຜ່ານແຜນການຝຶກຊ້ອມກອບກູ້ໄພພິບັດຮ່ວມລະຫວ່າງ 03 ກອງທັບ, ກອງທັບປະຊາຊົນລາວ-ກອງທັບປະຊາຊົນຫວຽດນາມ, ກອງທັບຣາຊະອະນາຈັກກໍາປູເຈຍ, ສໍາລັບເນື້ອໃນຂອງການຝຶກຊ້ອມປະກອບມີ 03 ເນື້ອໃນຄື: ຊອກຄົ້ນ-ກອບກູ້ ຜູ້ປະສົບໄພທາງນໍ້າ, ຊອກຄົ້ນ-ກອບກູ້ ຜູ້ປະສົບໄພທາງອາກາດ, ຊອກຄົ້ນ-ກອບກູ້ ຜູ້ປະສົບໄພທາງບົກ.

ເຊິ່ງໄດ້ແບ່ງອອກເປັນ 03 ໄລຍະ, ໄລຍະທີ 1 ການຈັດຕັ້ງກະກຽມ, ໄລຍະທີ 2 ປະຕິບັດການຝຶກຊ້ອມ, ໄລຍະທີ 3 ສິ້ນສຸດການຫັດແອບ, ພ້ອມນນັ້ນໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການແຕ່ງຕັ້ງຄະນະຝຶກຊ້ອມກອບກູ້ໄພພິບັດ, ໃນນັ້ນ ແຕ່ງຕັ້ງຄະນະຊີ້ນໍາ 8 ສະຫາຍ:

ພົນຕີ ຈັນທອງ ສອນຕະອາດ ຮອງລັດຖະມົນຕີ ກະຊວງປ້ອງກັນປະເທດ ຫົວໜ້າ, ຊີ້ນໍາລວມ, ພົນຈັດຕະວາ ສົມພອນ ມິດຕະພອນ ຮອງຫົວໜ້າກົມໃຫຍ່ເສນາທິການກອງທັບ ຮອງຫົວໜ້າ, ປະຈໍາການຊີ້ນໍາດ້ານເນື້ອໃນການຝຶກ, ພົນຈັດຕະວາ ພູມີ ດາລາເພັດ ຮອງຫົວໜ້າກົມໃຫຍ່ການເມືອງກອງທັບ ຮອງຫົວໜ້າ, ຊີ້ນໍາວຽກງານການເມືອງ, ພົນຈັດຕະວາ ບົວສິງ ອິນທະວົງ ຮອງຫົວໜ້າກົມໃຫຍ່ພະລາທິການກອງທັບ ຄະນະຊີ້ນໍາດ້ານວຽກງານພະລາທິການ, ພົນຈັດຕະວາ ຈອມເພັດ ໄຊຍະສຸກ ຮອງຫົວໜ້າກົມໃຫຍ່ເຕັກນິກກອງທັບ ຄະນະຊີ້ນໍາດ້ານວຽກງານເຕັກນິກ, ພົນຈັດຕະວາ ບຸນທອນ ສິດສຸວົງ ຮອງຫົວໜ້າຫ້ອງວ່າການກະຊວງປ້ອງກັນປະເທດ ຄະນະຊີ້ນໍາດ້ານການພົວພັນຕ່າງປະເທດ, ພົນຈັດຕະວາ ບຸນຊູ ດວງຄໍາມີ ຫົວໜ້າກົມການເງິນ ກະຊວງປ້ອງກັນປະເທດ ຄະນະຊີ້ນໍາດ້ານງົບປະມານ, ພົນຈັດຕະວາ ບົວເຮືອງ ສົມຟອງບຸດຕາຂັນ ອໍານວຍການວິທະຍາຄານພະລາທິການກອງທັບ ຄະນະຊີ້ນໍາດ້ານສະຖານທີ່ ແລະ ຊີວິດການເປັນຢູ່ຂອງກໍາລັງເພື່ອນ, ພ້ອມນັ້ນກໍໄດ້ແຕ່ງຕັ້ງບາງຕໍາແໜ່ງງານທີ່ກ່ຽວຂ້ອງຕື່ມອີກ. ລວມຈໍານວນພົນເຂົ້າຮ່ວມທັງໝົດ 678 ສະຫາຍ.

ເພື່ອເພີ່ມທະວີການພົວພັນຮ່ວມມືທາງດ້ານການກອບກູ້ໄພພິບັດ ລະຫວ່າງ ສປປ ລາວ- ສສ ຫວຽດນາມ-ຣາຊະອະນາຈັກກໍາປູເຈຍ ໃຫ້ນັບມື້ເຂັ້ມແຂງ ແລະ ຕອບໂຕ້ໄພພິບັດທີ່ເກີດຂຶ້ນໄດ້ຢ່າງທັນການ, ເຊິ່ງການຝຶກຊ້ອມຮ່ວມຄັ້ງນີ້ ຍັງເປັນການແລກປ່ຽນບົດຮຽນ ແລະ ປະສົບການຮ່ວມກັນທາງດ້ານວິຊາສະເພາະ, ຮີດຄອງປະເພນີ ແລະ ວັດທະນະທໍາຂອງແຕ່ລະຊາດ ຕື່ມອີກ.

ແຫຼ່ງຂ່າວ: Lao National Radio

ມູນຄ່າການຄ້າລາວ-ຫວຽດນາມ ເພີ່ມຂຶ້ນຢ່າງຕໍ່ເນື່ອງ, ໃນປີ 2021 ມູນຄ່າການຄ້າລາວ-ຫວຽດນາມ ສາມາດບັນລຸໄດ້ຫຼາຍກວ່າ 1,37 ຕື້ໂດລາ ເພີ່ມຂຶ້ນ 33,32% ທຽບໃສ່ປີ 2020 ຊຶ່ງເປັນມູນຄ່າສູງ ທີ່ສຸດໃນຮອບ 10 ປີ. ຂະນະດຽວກັນຫວຽດນາມເປັນອັນດັບທີ 3 ຂອງການລົງທຶນຂອງຕ່າງປະເທດໃນ ສປປ ລາວ ຊຶ່ງມີ 1.272 ຫົວໜ່ວຍ, ທຶນຈົດທະບຽນທັງໝົດແມ່ນ 23.540.193.251.096 ກີບ

ທ່ານ ຄໍາແພງ ໄຊສົມແພງ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ເປີດເຜີຍເນື່ອງໃນໂອກາດສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022 ຄື: ວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງລາວ-ຫວຽດນາມ ຄົບຮອບ 45 ປີ ໃຫ້ຮູ້ວ່າ: ລັດຖະບານລາວ-ຫວຽດນາມ ກໍຄືສອງກະຊວງອຸດສາຫະກໍາ ແລະ ການຄ້າ ລາວ-ຫວຽດນາມ ໄດ້ສືບຕໍ່ເອົາໃຈໃສ່ຊຸກຍູ້ວຽກງານການຄ້າ ແລະ ການລົງທຶນ ລະຫວ່າງສອງຝ່າຍ ເພື່ອໃຫ້ມີການເຕີບໃຫຍ່ຂະຫຍາຍຕົວ ໄປຕາມຄາດໝາຍທີ່ສອງພັກ-ສອງລັດຖະບານ ວາງອອກ, ກໍຄືອັດຕາການຂະຫຍາຍຕົວ ຂອງມູນຄ່າການຄ້າຢ່າງໜ້ອຍ 10% ຕໍ່ປີ. ເພື່ອໃຫ້ຄາດໝາຍສູ້ຊົນດັ່ງກ່າວ ປະກົດຜົນເປັນຈິງ, ທັງສອງຝ່າຍ ໄດ້ລົງນາມໃນສັນຍາການຄ້າສະບັບໃໝ່ ໃນວັນທີ 3 ມີນາ 2015 ແລະ ສັນຍາການຄ້າຊາຍແດນ ໃນວັນທີ 27 ມິຖຸນາ 2015; ນັບແຕ່ນັ້ນມາ ບັນດາແຂວງທີ່ມີຊາຍແດນ ຂອງລາວ ແລະ ຫວຽດນາມ ໄດ້ນໍາເອົາເນື້ອໃນຈິດໃຈ ຂອງສັນຍາດັ່ງກ່າວໄປຈັດຕັ້ງຜັນຂະຫຍາຍ ຢ່າງມີປະສິດທິຜົນໃນລະດັບດີ ສາມາດສົ່ງເສີມວຽກງານການແລກປ່ຽນຊື້-ຂາຍ ລະຫວ່າງ ປະຊາຊົນ ແລະ ຊາວຄ້າຂາຍ ທີ່ອາໄສຢູ່ຕາມແຂວງທີ່ມີຊາຍແດນຕິດຈອດກັນຂອງທັງສອງປະເທດ. ຜ່ານການຈັດຕັ້ງປະຕິບັດສັນຍາດັ່ງກ່າວ ເຫັນວ່າທັງສອງຝ່າຍ ແມ່ນໄດ້ຮັບຜົນປະໂຫຍດຢ່າງຫຼວງຫຼາຍ ຊຶ່ງສະແດງອອກໃນມູນຄ່າການຄ້າ ລະຫວ່າງ ສອງຝ່າຍ ເພີ່ມຂຶ້ນໃນຫຼາຍປີຜ່ານມາ.

ການຄ້າຊາຍແດນ ແລະ ການຄ້າສອງຝ່າຍ ລາວ-ຫວຽດນາມ ໄດ້ປະກອບສ່ວນສໍາຄັນເຂົ້າໃນການປະຕິບັດເປົ້າໝາຍການຮ່ວມມືຮອບດ້ານ ຂອງສອງຊາດ ໂດຍສະເພາະແມ່ນເປົ້າໝາຍການຮ່ວມມືທາງດ້ານເສດຖະກິດ ທີ່ສອງລັດຖະບານໄດ້ກຳນົດໄວ້ ໃນກອງປະຊຸມ ຂອງຄະນະກໍາມາທິການຮ່ວມມືທະວິພາຄີ ຄັ້ງທີ 44 ທີ່ນະຄອນຫຼວງຮ່າໂນ້ຍ ໃນວັນທີ 10 ມັງກອນ 2022, ເນື້ອໃນສັນຍາການຮ່ວມມື 5 ປີ 2021-2025 ແລະ ຍຸດທະສາດການຮ່ວມມື 10 ປີ 2021-2030 ຂອງສອງລັດຖະບານ.

ສໍາລັບໂຕເລກການແຈ້ງຂຶ້ນທະບຽນວິສາຫະກິດ ຂອງຫົວໜ່ວຍທຸລະກິດຫວຽດນາມ ໃນ ສປປ ລາວ ໄລຍະແຕ່ປີ 2011-2021, ຫວຽດນາມເປັນອັນດັບທີ 3 ຂອງການລົງທຶນຂອງຕ່າງປະເທດ ຊຶ່ງມີ 1.272 ຫົວໜ່ວຍ, ທຶນຈົດທະບຽນທັງໝົດແມ່ນ 23.540.193.251.096 ກີບ, ບັນດາກິດຈະກໍາປິ່ນອ້ອມ ເພື່ອກະກຽມໃຫ້ແກ່ການສະເຫຼີມສະຫຼອງບັນດາກິດຈະກໍາປິ່ນອ້ອມ ທີ່ສອງກະຊວງອຸດສາຫະກໍາ ແລະ ການຄ້າ ລາວ ແລະ ຫວຽດນາມ ໄດ້ຮ່ວມກັນຈັດຕັ້ງປະຕິບັດໃນໄລຍະຜ່ານມາ ແລະ ພວມຈັດຕັ້ງປະຕິບັດ ເພື່ອປະກອບສ່ວນໃຫ້ແກ່ການຈັດຕັ້ງຜັນຂະຫຍາຍສັນຍາການຄ້າຊາຍແດນ ແລະ ສັນຍາການຄ້າສອງຝ່າຍ ລາວ-ຫວຽດນາມ ທັງເປັນການປະກອບສ່ວນຢ່າງຕັ້ງໜ້າ ເຂົ້າໃນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ມີຫຼາຍກິດຈະກໍ ໄດ້ແກ່:

ສໍາເລັດການຈັດກອງປະຊຸມ ການຮ່ວມມືພັດທະນາການຄ້າຊາຍແດນ ລາວ-ຫວຽດນາມ ຄັ້ງທີ XII ໃນວັນທີ 11 ເມສາ 2022 ທີ່ນະຄອນຫຼວງວຽງຈັນ. ກອງປະຊຸມໃນຄັ້ງນີ້ ແມ່ນເປັນເວທີສໍາຄັນ ໃຫ້ແກ່ທັງສອງຂະແໜງການອຸດສາຫະກໍາ ແລະ ການຄ້າ ແລະ ພາກສ່ວນກ່ຽວຂ້ອງ ຂອງທັງສອງປະເທດ ລາວ-ຫວຽດນາມ ໃນການຮ່ວມກັນຕີລາຄາຄືນສະພາບການຮ່ວມມືພັດທະນາການຄ້າຊາຍແດນໃນໄລຍະຜ່ານມາ ແລະ ຮ່ວມກັນປຶກສາຫາລືຊອກຫາແນວທາງໃນການແກ້ໄຂຂໍ້ຫຍຸ້ງຍາກຕ່າງໆທີ່ເກີດຂຶ້ນໃຫ້ຫຼຸດໜ້ອຍຖອຍລົງ ພ້ອມທັງຮ່ວມກັນວາງແຜນການຮ່ວມມືໃນຕໍ່ໜ້າ ເພື່ອເຮັດໃຫ້ວຽກງານການຄ້າ ເວົ້າລວມ, ເວົ້າສະເພາະ ແມ່ນການຄ້າຊາຍແດນ ສາມາດປະກອບສ່ວນເຂົ້າໃນການປະຕິບັດເປົ້າໝາຍການຮ່ວມມືຮອບດ້ານຂອງສອງຊາດ; ການພົບປະ 3 ກະຊວງ (ກະຊວງອຸດສາຫະກໍາ ແລະ ການຄ້າ ແລະ ກະຊວງພະລັງງານ ແລະ ບໍ່ແຮ່ ສປປ ລາວ ແລະ ກະຊວງອຸດສາຫະກໍາ ແລະ ການຄ້າ ສສ ຫວຽດນາມ) ຢູ່ ສສ ຫວຽດນາມ (ຄາດວ່າຈະຈັດຂຶ້ນໃນລະຫວ່າງເດືອນກໍລະກົດ ຫຼື ສິງຫາ 2022) ໃນການພົບປະຄັ້ງນີ້ ຈະໄດ້ປັບປຸງ ແລະ ເຊັນສັນຍາການຄ້າສອງຝ່າຍ ລາວ-ຫວຽດນາມ ສະບັບປັບປຸງ; ງານວາງສະແດງສິນຄ້າປະຈໍາປີ ລາວ-ຫວຽດນາມ (ຄາດວ່າຈະຈັດຂຶ້ນໃນລະຫວ່າງວັນທີ 25-29 ສິງຫາ 2022 ທີ່ນະຄອນຫຼວງວຽງຈັນ); ການຮ່ວມມືໃນການສ້າງຕຶກໃໝ່ ຂອງກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກໍາ ແລະ ການຄ້າ; ຈັດກອງປະຊຸມສໍາມະນາ, ປາຖະກະຖາ, ເຜີຍແຜ່ ແລະ ສ້າງກິດຈະກໍາສົ່ງເສີມມູນເຊື້ອສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ທົ່ວສັງຄົມ ຂອງສອງຊາດໄດ້ຮັບຮູ້ (ຄາດວ່າຈະຈັດຂຶ້ນໃນເດືອນມິຖຸນາ 2022); ກິດຈະກໍາສະແດງຄວາມຮູ້ບຸນຄຸນຕໍ່ພັກ, ລັດຖະບານ ແລະ ປະຊາຊົນບັນດາເຜົ່າ ຂອງສອງປະເທດ ພ້ອມທັງສ້າງຂະບວນການແຂ່ງຂັນຍ້ອງຍໍ ຜູ້ທີ່ມີຜົນງານດີເດັ່ນໃນການຊຸກຍູ້-ສົ່ງເສີມ ການຮ່ວມມືລາວ-ຫວຽດນາມ ໃນຂະແໜງອຸດສາຫະກໍາ ແລະ ການຄ້າ (ຄາດວ່າຈະຈັດຂຶ້ນໃນເດືອນມິຖຸນາ ຫຼື ກໍລະກົດ 2022); ນອກຈາກນັ້ນ, ທັງສອງຝ່າຍ ລາວ-ຫວຽດນາມ ກໍຍັງໄດ້ຮ່ວມມືກັນແກ້ໄຂບັນຫາຕ່າງໆທີ່ຕິດພັນກັບສະພາບຂໍ້ຫຍຸ້ງຍາກດ້ານການຄ້າ ແລະ ການລົງທຶນ ເປັນຕົ້ນແມ່ນການອໍານວຍຄວາມສະດວກໃຫ້ແກ່ຄົນ, ພາຫະນະ ແລະ ສິນຄ້າ ຜ່ານດ່ານຊາຍແດນ.

ແຫຼ່ງຂ່າວ: ປະຊາຊົນ

ອອປສ ສ້າງຄວາມເຂັ້ມແຂງການດຳເນີນຄະດີຄ້າມະນຸດ ແລະ ຟອກເງິນ

ໃນລະຫວ່າງວັນທີ 2-3 ມິຖຸນາ 2022 ທີ່ຫ້ອງປະຊຸມ ອົງການໄອຍະການປະຊາຊົນແຂວງອຸດົມໄຊ, ອົງການໄອຍະການປະຊາຊົນສູງສຸດ (ອອປສ) ໄດ້ເປີດກອງປະຊຸມສ້າງຄວາມເຂັ້ມແຂງໃນການຕິດ ຕາມກວດກາການດຳເນີນຄະດີ ຄ້າມະນຸດ ແລະ ຄະດີຟອກເງິນ ພະນັກງານອົງການໄອຍະການປະຊາ ຊົນເຂດ, ໄອຍະການທະຫານແຂວງ ແລະ ອົງການໄອຍະການປະຊາຊົນ ແຂວງອຸດົມໄຊ, ຫລວງນ້ຳທາ ແລະ ແຂວງບໍ່ແກ້ວ.

ກອງປະຊຸມ ໄດ້ຮັບຟັງການບັນຍາຍ, ຄົ້ນຄວ້າແລກປ່ຽນຄໍາເຫັນ ແລະ ແນະນໍາວິທີຈັດຕັ້ງປະຕິ ບັດໜ້າທີ່ວຽກງານ ໃນການຕິດຕາມກວດກາການດຳເນີນຄະດີຄ້າມະນຸດ ແລະ ຄະດີຟອກເງິນ ເພື່ອສ້າງຄວາມຮັບຮູ້, ເຂົ້າໃຈກ່ຽວກັບການກະທໍາຜິດໃນຂໍ້ຫາຄ້າມະນຸດ, ການຟອກເງິນ, ການຕິດຕາມກວດກາ ແລະ ຄົ້ນຄວ້າຖະແຫລງສັ່ງຟ້ອງຜູ້ຖືກຫາຂຶ້ນສານ; ພ້ອມກັນນີ້ ຍັງໄດ້ເຜີຍແຜ່ຄໍາແນະນໍາຮ່ວມ ລະຫວ່າງ ກະຊວງປ້ອງກັນຄວາມສະຫງົບ, ອົງການໄອຍະການປະຊາຊົນສູງສຸດ, ສານປະຊາຊົນສູງສຸດ ກ່ຽວກັບການດຳເນີນຄະດີຂັ້ນກະກຽມ ແລະ ຂັ້ນພະຍາຍາມກໍ່ການກະທໍາຜິດໃນສະຖານການຄ້າມະນຸດ, ຄໍາສັ່ງແນະນໍາຂອງຄະນະກໍາມະການແຫ່ງຊາດ ເພື່ອຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ເພື່ອເປັນບ່ອນອີງໃນການຈັດຕັ້ງປະຕິບັດ ໜ້າທີ່ວຽກງານຂອງພະນັກງານອົງການໄອຍະການປະຊາຊົນ.

ທ່ານ ອ່ອນຈັນ ມະນີວັນ ຫົວໜ້າກົມຕິດຕາມກວດກາການດໍາເນີນຄະດີອາຍາ, ອົງການໄອຍະການປະຊາຊົນສູງສຸດ ປະທານກອງປະຊຸມ ຍັງໄດ້ມີຄໍາເຫັນຊີ້ນຳໃຫ້ເອົາໃຈໃສ່ຢ່າງຕັ້ງໜ້າໃນການຄົ້ນ ຄວ້າເຊື່ອມຊຶມກໍາແໜ້ນເນື້ອໃນ, ເປັນເຈົ້າການໃນການຍົກບັນຫາຂຶ້ນມາແລກປ່ຽນຄໍາຄິດຄໍາເຫັນຢ່າງກົງໄປກົງມາດ້ວຍບັນຍາກາດຟົດຟື້ນ, ແລກປ່ຽນບົດຮຽນຈາກຄະນະຮັບຜິດຊອບກອງປະຊຸມ ເພື່ອນໍາເອົາບົດ ຮຽນໄປໝູນໃຊ້ເຂົ້າໃນການປະຕິບັດໜ້າທີ່ວຽກງານ ແນໃສ່ຮັບປະກັນໃຫ້ແກ່ການດຳເນີນຄະດີ ຄ້າມະນຸດ ແລະ ຄະດີຟອກເງິນ ໄດ້ດໍາເນີນໄປຢ່າງຖືກຕ້ອງຕາມກົດໝາຍ, ປົກປ້ອງສິດ, ຜົນປະໂຫຍດອັນຊອບທໍາຂອງຜູ້ຖືກເຄາະຮ້າຍ;

ພ້ອມກັນນຳເອົາເນື້ອໃນກອງປະຊຸມ ໄປຈັດຕັ້ງປະຕິບັດໃຫ້ມີຄວາມເປັນເອກະພາບ ແລະ ໄດ້ຮັບຜົນສຳເລັດສູງ, ປະກອບສ່ວນເຮັດໃຫ້ການດໍາເນີນຄະດີອາຍາ ຮອບດ້ານ ຄົບຖ້ວນ ພາວະວິໄສ ນໍາເອົາຜູ້ກະທໍາຜິດມາດໍາເນີນຄະດີ ຕາມກົດໝາຍ ເຮັດໃຫ້ສັງຄົມມີຄວາມສະຫງົບ ມີຄວາມເປັນລະ ບຽບຮຽບຮ້ອຍ ປະເທດຊາດຈະເລີນກ້າວໜ້າຢ່າງບໍ່ຢຸດຢັ້ງ.

ຂ່າວ – ພາບ ອອປສ

ພິທີ ມອບ-ຮັບ ລົດອຳບູນລັງ ( SUV-4WD ) ເພື່ອນຳໃຊ້ເຂົ້າໃນວຽກງານປ້ອງກັນ ແລະ ຕອບໂຕ້ພະຍາດ COVID-19, ໄດ້ຮັບການຊ່ວຍເຫລືອຈາກລັດຖະບານຢີ່ປຸ່ນ ລົດອຳບູລັງ ຢີ່ຫໍ້: NISSN – PATROL ປະເພດ SUV-4WD, ຈຳນວນ 74 ຄັນ ພ້ອມດ້ວຍອຸປະກອນການແພດຊ່ວຍເຫຼືອສຸກເສີນພາຍໃນລົດ, ເພື່ອນຳໃຊ້ເຂົາໃນວຽກງານປ້ອງກັນ ແລະ ຕອບໂຕ້ພະຍາດໂຄວິດ-19 ໃຫ້ທີມແພດໝໍປ້ອມໜ້າດ່ານສຸກເສີນຊ່ວຍຄົນເຈັບນຳສົ່ງໂຮງໝໍທັນເວລາໃນເຂດເມືອງຢູ່ຮ່າງໄກສອກຫຼີກທີ່ມີຫົນທາງໄປມາຫຸ້ຍງຍາກ, ການຊ່ວຍເຫຼືອນີ້ແມ່ນຄັ້ງທີສອງ ຂອງລັດ ຖະບານ ຢີ່ປຸ່ນ,

ມອບໂດຍ ທ່ານ ເຄັນນີຈິ ໂຄບາຢາຊິ ເອກອັກຄະຣັດຖະທູດຢີ່ປຸ່ນ ປະຈຳ ສປປ ລາວ ຮັບໂດຍ ທ່ານ ປອ.ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍຄະນະ, ກົມກອງອ້ອມຂ້າງກະຊວງ ແລະ ຕາງໜ້າກະຊວງການຕ່າງປະເທດກໍ່ໄດ້ເຂົ້າຮ່ວມ.

ຂໍ້ມູນຈາກ: ສູນຂ່າວສານການແພດສຸຂະສຶກສາ

ເຈົ້າໜ້າທີ່ພາສີປະຈຳ ແຂວງບໍລິຄຳໄຊຢຶດໄມ້ເຖື່ອນໄດ້ 2,37 ແມັດກ້ອນ

ອີງຕາມເຈົ້າໜ້າທີ່ພາສີ ປະຈໍາ ແຂວງບໍລິຄໍາໄຊ ໄດ້ເອົາໃຈໃສ່ຈັດຕັ້ງປະຕິບັດວຽກງານວິຊາສະເພາະ ທີ່ຖືກມອບໝາຍຢ່າງເຂັ້ມງວດ ແລະ ສາມາດຢຶດໄດ້ໄມ້ເຖື່ອນຫລາຍປະເພດ (ໄມ້ໜູນ, ໄມ້ຄຳພີ, ໄມ້ດູ່, ໄມ້ແຕ້ຂ່າ) ລວມທັງໝົດ 68 ໂຕ ເທົ່າກັບ 2,37 ແມັດກ້ອນ.ຕາມການໃຫ້ສຳພາດຂອງ ທ່ານ ບຸນຈັນ ຈອມມະນີ ຮອງຫົວໜ້າພາສີປະຈຳແຂວງບໍລິຄຳໄຊ ໃຫ້ຮູ້ວ່າ:

ໃນທ້າຍເດືອນພຶດສະພາ 2022 ຜ່ານມານີ້, ເຈົ້າໜ້າທີ່ພາສີແຂວງບໍລິຄຳໄຊ ໄດ້ຮັບແຈ້ງຈາກພົນລະເມືອງດີ ມີລົດຂົນສົ່ງເຄື່ອນຍ້າຍໄມ້ຜິດກົດໝາຍຢູ່ເຂດເມືອງທ່າພະບາດ, ເຂດປາກກະດິງ ແລະ ຢູ່ເຂດເມືອງຄຳເກີດ, ເຈົ້າໜ້າທີ່ພາສີປະຈຳແຂວງໄດ້ເຄື່ອນໄຫວ, ຕິດຕາມຈຶ່ງພົບລົດເປົ້າໝາຍຢູ່ເຂດບ້ານປາກກະດັນ ເມືອງປາກຊັນ ແຂວງບໍລິຄໍາໄຊ ກຳລັງເດີນທາງລົງໄປຕາມເສັ້ນທາງເລກທີ 13 ໃຕ້, ເຈົ້າໜ້າທີ່ພາສີປະຈຳແຂວງບໍລິຄໍາໄຊ ທີ່ອອກປະຕິບັດໜ້າວຽກງານວິຊາສະເພາະ ໄດ້ຕິດຕາມຢ່າງໃກ້ສິດຈົນຮອດເຂດບ້ານນໍ້າທອນ ເມືອງປາກກະດິງ ແຂວງບໍລິຄໍາໄຊ ແລະ ໄດ້ຂໍອະນຸຍາດຈາກເຈົ້າຂອງພາຫະນະ ກວດກາສິນຄ້າພາຍໃນລົດ ເບື້ອງຕົ້ນບໍ່ພົບເຫັນສິນຄ້າຜິດກົດໝາຍ ແຕ່ດ້ວຍຄວາມສົງໃສຂອງເຈົ້າໜ້າທີ່ພາສີ ຈຶ່ງໄດ້ກວດຄົ້ນຢ່າງລະອຽດຍ້ອນຜູ້ກ່ຽວດັດແປງສະພາບພື້ນລົດ, ຈຶ່ງພົບໄມ້ຈຳນວນຫລາຍລາຍການປະກອບມີ: ໄມ້ໝູນຈໍານວນ 6 ໂຕ ເທົ່າກັບ 0,16 ແມັດກ້ອນ, ໄມ້ຄຳພີ 2 ໂຕເທົ່າກັບ 0,03 ແມັດກ້ອນ, ໄມ້ຄໍາພີ (ໄມ້ເສດ) 237 ກິໂລກຣາມ, ໄມ້ດູ່ 4 ໂຕ ເທົ່າກັບ 0,04 ແມັດກ້ອນ ແລະ ໄມ້ແຕ້ຂ່າ 38 ໂຕ ເທົ່າກັບ 2,13 ແມັດກ້ອນ ລວມທັງໝົດເທົ່າກັບ 2,37 ແມັດກ້ອນ ແລະ 237 ກິໂລກຣາມ.

ສຳລັບການກະທໍາຜິດໃນຄັ້ງນີ້, ຖືວ່າຜິດຕໍ່ກົດໝາຍວ່າດ້ວຍພາສີ, ກົດໝາຍວ່າດ້ວຍປ່າໄມ້ ແລະ ຄຳສັງຂອງນາຍົກລັດຖະມົນຕີ ແຫ່ງສປປລາວ ເລກທີ 15/ນຍ, ປັດຈຸບັນ ຍັງຢູ່ໃນຂັ້ນຕອນຂະບວນການສືບສວນ-ສອບສວນ ຂອງເຈົ້າໜ້າທີ່ ເພື່ອດຳເນີນຄະດີຕໍ່ຜູ້ກະທໍາຜິດຕາມກົດໝາຍໃນຂັ້ນຕໍ່ໄປ.

ແຫຼ່ງຂ່າວ: ຂປລ

ອີງຕາມການລາຍງານ ຂອງ Vientiane-Vangvieng Express way ທາງດ່ວນ ວຽງຈັນ-ວັງວຽງ ໃຫ້ຮູ້ວ່າ: ໃນຕອນສວາຍຂອງ ວັນທີ 5 ມິຖຸນາ 2022 ທາງອອກປາກອຸໂມງມິດຕະພາບ ລາວ-ຈີນ ທິດທາງນະຄອນຫຼວງວຽງຈັນຫາວັງວຽງ, ມີເຫດການຍິງປືນເກີດຂຶ້ນໂດຍທີ່ບໍ່ຊາບສາເຫດ, ສາເຫດ ແລະ ຈຸດປະສົງຂອງເຫດການຄັ້ງນີ້ທາງເຈົ້າໜ້າທີ່ຕຳຫຼວດກຳລັງສຶບສວນ.

ທີມກວດທາງຂອງບໍລິສັດຮ່ວມທຶນພັດທະນາທາງດ່ວນ ລາວ-ຈີນ ຈຳກັດ ເມື່ອໄດ້ຮັບແຈ້ງຊ່ວຍເຫຼືອ ກໍ່ເລີ່ມປະຕິບັດແຜນການກ່ຽວກັບການຮັບມືກັບເຫດສຸກເສີນທັນທີ, ພ້ອມທັງດຳເນີນການແຈ້ງເຫດຫາ ປກສ ໂພນໂຮງ ແລະ ຫີນເຫີບ ໃນເວລາທຳອິດທັນທີ, ປະກອບສ່ວນຊ່ວຍເຫຼືອເຈົ້າໜ້າທີ່ປິດທາງຂາອອກສະຖານີຫີນເຫີບ, ນຳ້ງື່ມ, ວັງວຽງ ສາມບ່ອນ.

ປະຈຸບັນ, ບໍລິສັດ ຮ່ວມທຶນພັດທະນາທາງດ່ວນ ລາວ-ຈີນ ຈຳກັດ ກຳລັງຮ່ວມມືກັບທາງເຈົ້າໜ້າທີ່ຕຳຫຼວດໃນການລົງເລິກສຶບສວນຢ່າງເຕັມສ່ວນ, ຂໍໃຫ້ບັນດາມວນຊົນປະຊາຊົນຍັງຄົງເລືອກໃຊ້ທາງດ່ວນທີ່ເປັນການສັນຈອນທີ່ສະດວກຄືທີ່ເດີມ.

ສິ້ນສຸດເຖິງເວລາ 17:35, ທາງດ່ວນບໍ່ໄດ້ຮັບການກະທົບ, ປອດໄພຕະຫຼອດທາງ ແລະ ດຳເນີນງານຕາມປົກກະຕິ. ຂໍໃຫ້ບັນດາມວນຊົນບໍ່ເຊື່ອຟັງຂ່າວລື, ບໍ່ສົ່ງຕໍ່ຂ່າວລື. ຂໍ້ມູນຕ່າງໆແມ່ນໃຫ້ອີງຕາມແຈ້ງການຈາກແຫຼ່ງຂ່າວທາງການທີ່ຖືກຕ້ອງ. ໜ່ວຍງານ ຫຼື ບຸກຄົນໃດທີ່ລົງຂ່າວສານທີ່ບໍ່ມີມູນຄວາມຈີງ ແລະ ການກະທຳໃສ່ຮ້າຍປ້າຍສີທາງດ່ວນນະຄອນຫຼວງວຽງຈັນ-ວັງວຽງ, ທາງບໍລິສັດ ຮ່ວມທຶນພັດທະນາທາງດ່ວນ ລາວ-ຈີນ ຈຳກັດ ຈະໄດ້ອີງຕາມກົດໝາຍໃນການຕາມຜູ້ກ່ຽວມາຮັບຜິດຊອບ. ບໍລິສັດ ຮ່ວມທຶນພັດທະນາທາງດ່ວນ ລາວ-ຈີນ ຈຳກັດ ວັນທີ 5 ມິຖຸນາ 2022

.

ຄະນະຜູ້ແທນຫ້ອງການຜູ້ຕາງໜ້າກະຊວງປ້ອງກັນປະເທດ ສ.ຣັດເຊຍ ເຄື່ອນໄຫວຢ້ຽມຢາມ ເຮັດວຽກ ຢູ່ກອງພົນທີ2

ໃນອາທິດທີ່ຜ່ານມານີ້, ສະຫາຍ ພັນເອກ ຄຳແປງ ບົວລະບັດ ຫົວໜ້າກົມຄຸ້ມຄອງລົດ ກົມໃຫຍ່ເຕັກນິກກອງທັບ ໄດ້ນໍາພາ ສະຫາຍ ພົນຕີ ກຣາຍເຍັບ ເດມີຕີຣ ວາລາຕີມີໂຣວິຈ ຫົວໜ້າຫ້ອງການ ຜູ້ຕາງໜ້າກະຊວງປ້ອງກັນປະເທດແຫ່ງ ສ ຣັດເຊຍ ປະຈໍາລາວ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູກອງພົນທີ2, ໂດຍການຕ້ອນຮັບຂອງ ສະຫາຍ ພັນເອກ ຄຳດີ ໄຊຍະວົງ ຫົວໜ້າການທະຫານກອງພົນທີ 2 ພ້ອມດ້ວຍຄະນະ.

ໂອກາດດັ່ງກ່າວ, ສະຫາຍ ພັນເອກ ຄຳດີ ໄຊຍະວົງ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ການມາຢ້ຽມຢາມ ແລະ ເຮັດວຽກຢູ່ກອງພົນທີ2 ຂອງຄະນະຜູ້ແທນ ຫ້ອງການຜູ້ຕາງໜ້າກະຊວງປ້ອງກັນປະເທດ ສ.ຣັດເຊຍ ໃນຄັ້ງນີ້ ພ້ອມທັງລາຍງານກ່ຽວກັບສະພາບ ຈຸດພິເສດ, ພາລະບົດບາດ, ການກຳເນີດເຕີບໃຫຍ່ຂອງກົມກອງ ແລະ ເຄື່ອນໄຫວຈັດຕັ້ງປະຕິບັດໜ້າທີ່ວຽກງານໃນໄລຍະຜ່ານມາ, ເຊິ່ງຄະນະພັກ-ຄະນະບັນຊາກອງພົນ ໄດ້ເອົາໃຈໃສ່ເຮັດວຽກງານສຶກສາອົບ ຮົມການເມືອງ-ນໍາພາແນວຄິດ ເຮັດໃຫ້ພະນັກງານ-ນັກຮົບ ຮັກສາໄດ້ທາດແທ້ປະຕິວັດ ແລະ ມູນເຊື້ອອັນດີງາມຊາດ, ຂອງກອງທັບ ແລະ ກົມກອງ ເຊື່ອໝັ້ນຕໍ່ການນໍາພາຂອງພັກ-ລັດ ແລະ ການຈັດຕັ້ງທຸກຂັ້ນ, ມີສະຕິລະກຽມ ພ້ອມສູ້ຮົບ ເພື່ອຕອບຕ້ານທຸກເຫດການທີ່ຈະເກີດຂຶ້ນໃຫ້ທັນເວລາ, ຈາກນັ້ນທັງສອງຝ່າຍກໍໄດ້ແລກປ່ຽນບົດຮຽນ ເຊິ່ງກັນ ແລະ ກັນ ໃນຂົງເຂດການພົວພັນຮ່ວມມືກັນທັງສອງຝ່າຍ.

ໃນໂອກາດທີ່ເຄື່ອນໄຫວຢ້ຽມຢາມ ເຮັດວຽກຢູ່ກອງພົນທີ2 ໃນຄັ້ງນີ້ ຄະນະຜູ້ແທນຫ້ອງການຜູ້ຕາງໜ້າກະຊວງປ້ອງກັນປະເທດ ສ ຣັດເຊຍ ກໍ່ໄດ້ລົງກວດກາພາຫະນະ, ອາວຸດຍຸດໂທ ປະກອນ ເຕັກນິກ ທີ່ໄດ້ຈາກການຊ່ວຍເຫຼືອຂອງສະຫະພາບໂຊວຽດ ເພື່ອພ້ອມກັນປັບປຸງສ້ອມແປງສິ່ງທີ່ເປ່ເພໃຫ້ກັບມານໍາໃຊ້ໄດ້ປົກກະຕິ.

ແຫຼ່ງຂ່າວ: Lao National Radio

ກວດກາເບິ່ງເດີ້! ປໍ້າໃດເປີດແດ່ ປະຈຳວັນທີ 6 ມີຖຸນາ 2022

.

.