ໃນຄັ້ງວັນທີ່ 08-09 ມີຖຸນາ 2022 ກອງຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ ໄດ້ມີຄວາມຍິນດີ ທີ່ໄດ້ຕ້ອນຮັບ ທີມງານຜູ້ແທນຈາກທະນາຄານໂລກ, ກົມປ່າໄມ້ ກະຊວງກະສິກໍາ ແລະ ປ່າໄມ້ ແລະ ພະແນກກະສິກໍາ ແລະ ປ່າໄມ້ ແຂວງຫົວພັນ.ໃນລະຫວ່າງການປະຊຸມຊ່ວງເຊົ້າ ຢູ່ທີ່ ເມືອງຮ້ຽມ ໄດ້ມີການປຶກສາຫາລືກ່ຽວກັບວຽກງານການຄຸ້ມ​ຄອງ, ບັນຫາສິ່ງທ້າທາຍຂອງອຸທິຍານແຫ່ງຊາດນໍ້າແອດ-ພູເລີຍ ແລະ ຄວາມຄືບໜ້າໂຄງການພູມີທັດ ແລະ ຊີວິດການເປັນຢູ່ຂອງ ສປປ ລາວ (LLL).

ພາຍຫຼັງສໍາເລັດກອງປະຊຸມ ຜູ້ເຂົ້າຮ່ວໄດ້ເດີນທາງໄປທີ່ບ້ານສົ້ນຂົວ ເມືອງຫົວເມືອງ ເພື່ອທ່ຽວຊົມແຫຼ່ງທ່ອງທ່ຽວລ່ອງເຮືອເບີ່ງສັດປ່າໃນຢາມກາງຄືນ ຢູ່ແມ່ນໍ້າເນີນ, ຢ້ຽມຢາມທີມງານລາດຕະເວນທີ່ປະຈໍາຢູ່ປ້ອມຍາມປ່າ ແລະ ເພື່ອປຶກສາຫາລືເພີ່ມກ່ຽວກັບວຽກງານການຄຸ້ມຄອງອຸທິຍານແຫ່ງຊາດນໍ້າແອດ-ພູເລີຍ ແລະ ໂຄງການ LLL.ໃນລະຫວ່າງການລົງຢ້ຽມຢາມແຫຼ່ງທ່ອງທ່ຽວລ່ອງເຮືອເບີ່ງສັດປ່າໃນຢາມກາງຄືນ ຢູ່ແມ່ນໍ້າເນີນ ໃນຄັ້ງນີ້ ໄດ້ພົບເຫັນສັດປ່າຫຼາຍປະເພດຄື: ລີງລົມ(ສັດປ່າປະເພດໄກ້ຈະສູນພັນ), ກວາງ, ເຫງັນ, ຟານ, ແລນ ແລະ ນົກປະເພດຕ່າງໆ ເຊັ່ນ: ນົກເຕັ້ນຊີວ… ພວກເຮົາຂໍສະແດງຄວາມຂອບໃຈຢ່າງຊຸດຊື້ງມາຍັງຜູ້ເຂົ້າຮ່ວມທຸກໆທ່ານທີ່ໄດ້ມາຢ້ຽມຢາມ ແລະ ໃຫ້ການສະໜັບສະໜູນອຸທິຍານແຫ່ງຊາດນໍ້າແອດ-ພູເລີຍ ຂອງພວກເຮົາ

ອົງການການເງິນສາກົນ ສະໜອງທຶນພັດທະນາ ທ່າບົກ-ທ່ານາແລ້ງ

ໃນວັນທີ 7 ມິຖຸນາ 2022 ທີ່ນະຄອນຫລວງວຽງຈັນ, ບໍລິສັດ ທ່າບົກທ່ານາແລ້ງ ຈຳກັດຜູ້ດຽວ ໄດ້ເຊັນສັນຍາຮັບການສະໜອງເງິນກູ້ ຈຳນວນ 67 ລ້ານໂດລາສະຫະລັດ ກັບອົງການການເງິນສາກົນ (IFC) ເພື່ອນຳໃຊ້ເຂົ້າໃນການພັດທະນາ, ການກໍ່ສ້າງ ແລະ ຈັດຊື້ອຸປະກອນທີ່ຈຳເປັນ ສຳລັບໂຄງການທ່າບົກທີ່ໄດ້ລະດັບມາດຕະຖານສາກົນ ແຫ່ງທຳອິດຂອງ ສປປ ລາວ ຫລື ເອີ້ນວ່າໂຄງການທ່າບົກ-ທ່ານາແລ້ງ ທີ່ນອນຢູ່ໃນສ່ວນໜຶ່ງຂອງເຂດວຽງຈັນໂລຈິສຕິກ ນະຄອນຫລວງວຽງຈັນ.

ຕາງໜ້າລົງນາມຄັ້ງນີ້ໂດຍ ທ່ານ ຈັນທອນ ສິດທິໄຊ ປະທານ ບໍລິສັດ ວຽງຈັນໂລຈິສຕິກ ພາກ ຈຳກັດ ທັງເປັນປະທານ ບໍລິສັດ ທ່າບົກ-ທ່ານາແລ້ງ ແລະ ທ່ານ ວິເກຣມ ກຸມາ ຜູ້ຈັດການພັດທະນາຝ່າຍທຸລະກິດໃໝ່ ໃນຂົງເຂດອາຊີ ແລະ ປາຊີຟິກ ຂອງອົງການ IFC. ໃຫ້ກຽດເຂົ້າຮ່ວມເປັນສັກຂີພິ ຍານໂດຍ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ, ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ, ພ້ອມດ້ວຍພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມ. ທ່ານ ຈັນທອນ ສິດທິໄຊ ໄດ້ກ່າວວ່າ: ການເຊັນສັນຍາຄັ້ງນີ້ ແມ່ນເປັນການເຊັນສັນຍາເງິນກູ້ 3 ສະບັບ ວົງເງິນ 67 ລ້ານໂດລາສະຫະລັດ ເປັນບາດກ້າວທຳອິດໃນການສະໜອງເງິນທຶນຂອງ IFC ແລະ ຈະສູ່ບາດກ້າວຕໍ່ໄປ ເພື່ອສະໜັບສະໜູນໂຄງການທ່າບົກ-ທ່ານາແລ້ງ ໃຫ້ສຳເລັດດ້ານພື້ນຖານໂຄງລ່າງ ເພື່ອອຳນວຍຄວາມສະດວກໃຫ້ແກ່ສິນຄ້າຜ່ານແດນ.

ໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ ນະຄອນຫລວງວຽງຈັນ ເປັນໂຄງການໜຶ່ງທີ່ນອນຢູ່ໃນຍຸດທະສາດ ວ່າດ້ວຍການຂົນສົ່ງ ແລະ ເຊື່ອມໂຍງດ້ານໂລຈິສຕິກແຫ່ງຊາດ ເປັນໂຄງການຍຸດສາດສຳຄັນຂອງລັດຖະບານ ເຊິ່ງເປັນໜຶ່ງໃນທ່າບົກ 9 ທ່າຂອງ ສປປ ລາວ ທີ່ໄດ້ມີຍຸດທະສາດ ວ່າດ້ວຍການເຊື່ອມໂຍງ. ໂຄງການທ່າບົກ ທ່ານາແລ້ງ ແລະ ເຂດໂລຈິສຕິກ ນະຄອນຫລວງວຽງຈັນ ໄດ້ເຊັນສັນຍາສໍາປະທານຈາກລັດຖະບານ ໃນກາງປີ 2020 ແລະ ໄດ້ເລີ່ມການກໍ່ສ້າງໂຄງການໃນທ້າຍປີດຽວກັນ ລວມໄລຍະເວລາການກໍ່ສ້າງ 11 ເດືອນ ດ້ວຍມູນຄ່າໂຄງການຈາກການສຶກສາສຳຫລວດເບື້ອງຕົ້ນ 727 ລ້ານໂດລາສະຫະລັດ, ແຕ່ໃນໄລຍະທຳອິດ ໄດ້ກໍ່ສ້າງສຳເລັດເຂດທ່າບົກ-ທ່ານາແລ້ງ ແລະ ໄລຍະ 2 ແມ່ນເຂດໂລຈິສຕິກ ນະຄອນຫລວງວຽງຈັນ. ສຳລັບທ່າບົກທ່ານາແລ້ງ ພາຍຫລັງເປີດໃຫ້ບໍລິການໄດ້ 6 ເດືອນຜ່ານມາ ກໍເປັນທີ່ຕອບຮັບຈາກສາກົນ ກໍຄືການຂົນສົ່ງສິນຄ້າຜ່ານແດນຈາກ ສປ ຈີນ ຜ່ານ ສປປ ລາວ ໄປປະເທດໄທ ແລະ ໄປນາໆປະເທດໃນພາກພື້ນ ແລະ ສິນຄ້າຈາກໄທ ຜ່ານ ສປປ ລາວ ໄປ ສປ ຈີນ ລວມມີຈຳນວນ 10 ພັນກວ່າຕູ້ຄອນເທນເນີ. ທ່ານ ຈັນທອນ ສິດທິໄຊ ໃຫ້ຮູ້ຕື່ມວ່າ:

ການກູ້ຢືມ ຫລື ຮ່ວມມືກັບ IFC ຍ້ອນພວກເຮົາເປັນຄູ່ຮ່ວມຍຸດທະສາດ ວ່າດ້ວຍການຮ່ວມກັນພັດທະນາ ເພາະວ່າ IFC ນອກຈາກການໃຫ້ທຶນແລ້ວຍັງໃຫ້ຄຳປຶກສາໃນຫລາຍໆດ້ານ ເຊັ່ນ: ດ້ານສິ່ງແວດລ້ອມ, ເຕັກນິກ, ຮູບແບບການບໍລິການຈັດການ ເຊິ່ງພວກເຮົາກໍໄດ້ຮັບການສະໜັບສະໜູນໃຫ້ຄວາມຮູ້ ແລະ ຍົກລະດັບການບໍລິຫານ ຈາກ IFC.

ແຫຼ່ງຂ່າວ ແລະ ຂ່າວ: ເສດຖະກິດການຄ້າ

ເຈົ້າໜ້າທີ່ ຈັບແກ້ງຄ້າຢາເສບຕິດ ພ້ອມຂອງກາງ 21.446 ເມັດ

ໃນວັນທີ 8 ມີຖຸນາ 2022, ເຈົ້າໜ້າທີ່ກອງບັນຊາການ ປ້ອງກັນຄວາມສະຫງົບ ນະຄອນໄກສອນພົມວິຫານ ແຂວງສະຫວັນນະເຂດ ໄດ້ລາຍງານຕໍ່ຜູ້ສື່ຂ່າວຂອງພວກເຮົາວ່າ: ໃນວັນທີ 1ມິຖຸນາ 2022 ເຈົ້າໜ້າທີ່ໜ່ວຍງານສະກັດກັ້ນ-ຕ້ານຢາເສບຕິດ ປກສ ນະຄອນໄກສອນ ໄດ້ອອກເຄື່ອນໄຫວປະຕິ ບັດໜ້າທີ່ວິຊາສະເພາະຕິດຕາມເປົ້າໝາຍຄ້າ-ຂາຍຢາເສບຕິດ ໃນຂອບ ເຂດນະຄອນໄກສອນພົມວິຫານ ໄດ້ກັກຕົວເປົ້າໜາຍຄ້າຂາຍຢາເສບຕິດ (ຢາບ້າ) ຈຳນວນ 2 ຄົນ ຄື:

1. ທ້າວ ຜ່ານ ອາຍຸ 60 ປີ ອາຊີບ ເຮັດນາ ບ້ານ ຍາງໂພສີ ນະຄອນ ໄກສອນ ພົມວິຫານ ພ້ອມຂອງກາງຢາບ້າ ຈຳນວນ 313 ເມັດ

2. ທ້າວ ຊານໄຊ ຫຼື ຊານ ອາຍຸ 34 ປີ ອາຊີບ ເຮັດນາ ບ້ານ ຍາງໂພສີ ນະ ຄອນ ໄກສອນ ພົມວິຫານ ພ້ອມຂອງກາງຢາບ້າ ຈຳນວນ 184 ເມັດ , ເຊິ່ງທັງສອງຄົນແມ່ນເປັນພໍ່ລູກກັນ. ຜ່ານການສອບສວນ, ທ້າວ ຊານໄຊ ຫຼື ຊານ ໄດ້ຮັບສາລະພາບວ່າ: ຢາບ້າທີ່ນຳມາຈຳໜ່າຍຂາຍ ແມ່ນໄດ້ຊື້ມາຈາກທ້າວ ລຸ້ງໂລດ ຫຼື ລຸ້ງ ບ້ານ ເລົ່າງາມ ນະຄອນ ໄກສອນ ພົມວິຫານ.ຮອດເວລາ 14 ໂມງຂອງວັນດຽວກັນ, ເຈົ້າໜ້າທີ່ຈຶ່ງກັກຕົວ ທ້າວ ລຸ້ງໂລດ ຫຼື ລຸ້ງ ອາຍຸ 18 ປີ ອາຊີບເຮັດນາ ບ້ານເລົ່າງາມ ນະຄອນໄກສອນພົມວິຫານ ແຂວງສະຫວັນນະເຂດ ຢູ່ເສັ້ນທາງຂອບເຂດ ບ້ານເລົ່າງາມ ພ້ອມຂອງກາງຢາບ້າ 2 ຖົງ ມີຈຳນວນ 290 ເມັດ.

ຜ່ານການສອບສວນ, ທ້າວ ລຸ້ງໂລດ ຫຼື ລຸ້ງ ໄດ້ຮັບສາລະພາບວ່າ: ຢາບ້າ ທີ່ເອົາມາຈຳໜ່າຍ-ຂາຍແມ່ນຊື້ນຳ ທ້າວ ພິດທະນູໄຊ ຫຼື ຕ່າຍ ບ້ານ ໂພນສະຫວ່າງໃຕ້ ນະຄອນ ໄກສອນ ພົມວິຫານ ແຂວງສະຫວັນນະເຂດ,ທ້າວ ອະນຸສອນ ຫຼື ຄິງ ບ້ານໃໜ່ໜອງຫວ້າ ເມືອງສອງຄອນ ແຂວງສະຫວັນນະເຂດ.ມາຮອດວັນທີ 2 ມິຖຸນາ 2022, ເວລາ 14 ໂມງ ທາງເຈົ້າໜ້າທີ່ໜ່ວຍງານວິຊາສະເພາະຈຶ່ງໄດ້ກັກຕົວ ທ້າວ ອະນຸສອນ ຫຼື ຄິງ ອາຍຸ 23 ປີ ອາຊີບ ເຮັດນາ ບ້ານໃໜ່ໜອງຫວ້າ ເມືອງສອງຄອນ ແຂວງສະຫວັນະເຂດ ໄດ້ຢູ່ຂອບເຂດ ບ້ານເລົ່າງາມ ນະຄອນ ໄກສອນ ພົມວິຫານ ພ້ອມຂອງກາງຢາບ້າຈຳນວນ 3 ມັດ ເທົ່າກັບ 6.000 ເມັດ.

ເວລາ 16:30 ໂມງຂອງວັນດຽວກັນ, ເຈົ້າໜ້າທີ່ ໄດ້ເຂົ້າກັກຕົວ ທ້າວ ພິດທະນູໄຊ ຫຼື ຕ່າຍ ອາຍຸ 36 ປີ ບ້ານໂພນສະຫວ່າງໃຕ້ ນະຄອນໄກສອນພົມ ວິຫານ ພ້ອມຂອງກາງຢາບ້າ ຈຳນວນ 3 ມັດ ເທົ່າກັບ 6.000 ເມັດ, ທ້າວ ສົມສະໜຸກ ຫຼື ນຸດ ອາຊີບ ກຳມະກອນ ອາຍຸ 32 ປີ ບ້ານ ດົງດໍາດວນ ນະ ຄອນ ໄກສອນ ພົມວິຫານ ແຂວງສະຫວັນະເຂດ ພ້ອມຂອງກາງຢາບ້າ 1 ຖົງເທົ່າກັບ 200 ເມັດ,ລົດກະບະຍີຫໍ້ ນິສັນ ນາວາລາສີຂາວ ເລກທະບຽບ ກສ 3657 ສະຫວັນະເຂດ,ຜ່ານການສອບສວນ ທ້າວ ສົມສະນຸກ ຫຼື ນຸດ ໄດ້ຮັບສາລະພາບວ່າ:ຢາບ້າ ທີ່ນຳມາຈຳໜ່າຍ-ຂາຍ ແມ່ນຊື້ມາຈາກທ້າວ ຈອນນີ້ ຫຼື ຈອນ ບ້ານ ເຄືອເຂົາກາດ ນະຄອນ ໄກສອນ ພົມວິຫານ ແຂວງສະຫວັນະເຂດ.

ມາຮອດວັນທີ 3 ມິຖຸນາ 2022, ເຈົ້າໜ້າທີ່ວິຊາສະເພາະ ໄດ້ສືບຕໍ່ຂະຫຍາຍຜົນແລ້ວ ໄດ້ກັກຕົວ ທ້າວ ຄຳເພັດ ໄຊສົມບັດ ຫຼື ເຕ້ ອາຍຸ 28 ປີ ບ້ານ ນາທາດ ເມືອງອຸທຸມພອນ ແຂວງສະຫວັນະເຂດ ພ້ອມຂອງກາງຢາບ້າຈຳ ນວນ 3 ມັດ ເທົ່າກັບ 6.000 ເມັດ, ຢູ່ຂອບເຂດບ້ານໜອງໂກ່ມ ນະຄອນ ໄກສອນ ພົມວິຫານ ແລະ ສ່ວນທ້າວ ຈອນນີ້ ຫຼື ຈອນ ແມ່ນ ໄດ້ຂັບລົດກະບະລີໂວ້ ສີຂາວ ເລກທະບຽນ 9699 ກຳແພງນະຄອນໄດ້ເອົາຕົວຫຼົບໜີ. ແລະຕົກມາຮອດເວລາ 11 ໂມງ ຂອງວັນດຽວກັນ ໄດ້ກັກຕົວ ທ້າວ ອານັນ ຫຼື ເທ້ ອາຍຸ 22 ປີ ອາຊີບ ເຮັດນາ ບ້ານເຄືອເຂົາກາດ ນະຄອນ ໄກສອນ ພົມວິຫານ ແຂວງສະຫວັນະເຂດ ພ້ອມຂອງກາງຢາບ້າ ຈຳນວນ 10 ຖົງເທົ່າກັບ 2.459 ເມັດ,ຢາໄອສ໌ຈຳນວນ 1 ຖົງນ້ອຍ, ເງິນ 6 ລ້ານກີບແລະ ລົດຈັກ 1 ຄັນ ຢູ່ເຮືອນ ທ້າວ ຈອນນີ້ ຫຼື ຈອນ ບ້ານເຄືອເຂົາກາດ ນະຄອນ ໄກສອນ ພົມວິຫານ ແລະ ລວມເຄື່ອງຂອງກາງທັງໜົດມີ:

ຢາບ້າ ຈຳນວນ 9 ມັດ ກັບ 11 ຖົງ ເທົ່າກັບ 21.446 ເມັດ,ຢາໄອສ 1 ຖົງນ້ອຍ, ລົດໃຫຍ່ກະບະຢີຫໍ້ນິດສັນ ນາວາລ້າສີຂາວ ເລກທະບຽນ 3657 ສະຫວັນະເຂດ, ລົດຈັກຈຳນວນ 4 ຄັນ, ເງິນ 6 ລ້ານກີບ ແລະ ໂທລະສັບ 10 ໜ່ວຍ ແລະ ສໍາລັບຜູ້ກະທໍາຜິດແມ່ນຈະໄດ້ດໍາເນີນຄະດີຕາມລະບຽບກົດໝາຍ.

ກະຊວງ ຮສສ ໄດ້ອອກແຈ້ງການ ເຖິງ ບັນດາອົງການຈັດຕັ້ງ ພາກລັດ ແລະ ເອກະຊົນ, ອົງການຈັດຕັ້ງສາກົນ, ອົງການຈັດຄັ້ງທາງສັງຄົມ ແລະ ອ ສຳນັກງານຜູ້ຕາງໝ້າ ບັນດາປະເທດ ປະຈຳ ສປປລ ລາວ.

ເລື່ອງ: ການຍົກບ້ານສຳນັກງານ ຂອງກະຊວງແຮງງານ ແລະສະຫວັດດີການສັງຄົມ ໄປປະຈຳການຢູ່ ຕຶກຫຼັງໃໝ່ ທີ່ບ້ານໂນນສະອາດ (ດົງໝາກຄາຍ), ເມືອງໄຊທານີ, ນະຄອນຫຼວງວຽງຈັນ.

ເລີ່ມວັນທີ 10 – 29 ມິຖຸນາ ແມ່ນເປີດເຮັດວຽກປົກກະຕິ ແລະ ລວມທັງການບໍລິຫານຕ່າງໆ ຢູ່ຕຶກກະຊວງຫລັງໃໝ່.

.

ເຈົ້າໜ້າທີ່ຖະແຫຼງຈັບຄົນຮ້າຍບຸກໄລ່ຍິງເຈົ້າໜີ້ ເມື່ອປີ 2021

ຫຼາຍຄົນອາດຍັງຈື່ໄດ້ ເຫດການທີ່ມືປືນຂີ່ລົດຈັກຄຣີກໄອ ໄລ່ຍິງຊາວຈີນ ຂີ່ກໍາລັງຂີ່ລົດຈັກຟີໂນ ໄປຕາມເສັ້ນທາງປະຕູໄຊ ຫາ ໄຟແດງສີດຳດວນ ບ້ານ ສີບຸນເຮືອງ ເມືອງ ຈັນທະບູລີ ນະຄອນຫຼວງວຽງຈັນ ໃນຄໍ່າຄືນ ຂອງວັນທີ 1 ກັນຍາ 2021 ເຮັດໃຫ້ຜູ້ຖືກເຄາະຮ້າຍບາດເຈັບສາຫັດ ແລະ ຜູ້ກໍ່ເຫດເອົາຕົວຫຼົບໜີ

ພັອ ແກ່ນຈັນ ພົມມະຈັກ ຮອງຫົວໜ້າກົມໃຫຍ່ຕໍາຫຼວດ ຫົວໜ້າກົມຕໍາຫຼວດສືບສວນ-ສອບສວນ ຖະແຫຼງຂ່າວກ່ຽວກັບເຫດການດັ່ງກ່າວໃນວັນທີ 8 ມິຖຸນາ 2022 ວ່າ: ໃນວັນທີ 1 ກັນຍາ 2021 ປີຜ່ານມາ ເວລາ 20:40 ໂມງ ໄດ້ມີຄົນຮ້າຍຈຳນວນຫນຶ່ງ ໄດ້ຂີ່ລົດຈັກຄຼີກໄອ ປະຄົບລົດຈັກຟີໂນ ແລະ ໃຊ້ປືນຍິງ ທ້າວ ຫຼິວລີ້ຊວນ ສັນຊາດຈີນຢູ່ເສັ້ນທາງປະຕູໄຊ ຫາໄຟແດງສີດຳດວນ ເມືອງຈັນທະບູລີ ເຮັດໃຫ້ໄດ້ຮັບບາດເຈັບສາຫັດ; ຈາກນັ້ນ ຖືກນຳຕົວສົ່ງໂຮງຫມໍ ໄດ້ຮັບການປິ່ນປົວຈົນປອດໄພໃນເວລາຕໍ່ມາ.

ຜ່ານການສືບສວນ-ສອບສວນ ຈຶ່ງຮູ້ວ່າ ແຮງຈູງໃຈໃນການຄາດຕະກໍາ ທ້າວ ຫຼິວລີ້ຊວນ ໃນຄັ້ງນັ້ນແມ່ນເພື່ອຫວັງປິດໜີ້ໃຫ້ແກ່ທ້າວ ຕີ່ຕີ່ ( ລູກຫນີ້ ) ເພາະໃນໄລຍະຜ່ານມາຜູ້ກ່ຽວໄດ້ຢືມເງິນນຳທ້າວ ຫຼິວລີ້ຊວນ ຈຳນວນເງິນຫຼາຍແສນໂດລາສະຫະລັດອາເມລິກາ.

ມາຮອດປັດຈຸບັນ, ເຈົ້າໜ້າທີ່ໄດ້ສະຫຼຸບສຳນວນຄະດີ ສົ່ງໃຫ້ອົງການໄອຍະການ ປະຊາຊົນ ນະຄອນຫຼວງວຽງຈັນ ຟ້ອງສານຕັດສິນຕາມລະບຽບກົດໝາຍ.

ຫຼັງຈາກເກີດເຫດ ເຈົ້າໜ້າທີ່ໄດ້ລົງຊັນນະສູດສະຖານທີ່ເກີດເຫດ, ເອົາຄໍາໃຫ້ການພະຍານ, ຜູ້ເຫັນເຫດການ ແລະ ສາມາດຂຶ້ນເປົ້າໝາຍກະທຳຜິດໄດ້ຈຳນວນໜຶ່ງ.

ມາຮອດວັນທີ 9 ກັນຍາ 2021, ເຈົ້າໜ້າທີ່ສາມາດຈັບຕົວ ຜູ້ວ່າຈ້າງ ຫຼື ຫົວໂປ່ໂຕການ ແມ່ນ ທ້າວ ຕີ່ຕີ່ ຢູ່ນະຄອນຫຼວງວຽງຈັນ ເຊິ່ງຜູ້ກ່ຽວໄດ້ຈ້າງມືປືນ 3 ຄົນ ໃຫ້ໄປຄາດຕະກຳ ທ້າວ ຫຼິວລີ້ຊວນ ແລະ ຕໍ່ມາເຈົ້າໜ້າທີ່ສາມາດຕິດຕາມຈັບຕົວຜູ້ກໍ່ເຫດໄດ້ 2 ຄົນ, ສ່ວນຜູ້ລົງມືກໍ່ເຫດຍິງແມ່ນເອົາຕົວລົບໜີ ເຈົ້າໜ້າທີ່ກໍາລັງເລັ່ງຕິດຕາມຈັບຕົວ, ປັດຈຸບັນ ຈົ້າໜ້າທີ່ຈັບຕົວຜູ້ກ່ຽວຂ້ອງໄດ້ແລ້ວລວມ 3 ຄົນ.

ແຫຼ່ງຂ່າວ: ປ້ອງກັນຄວາມສະຫງົບນະຄອນຫຼວງວຽງຈັນ

ການກໍ່ສ້າງສວນສາທາລະນະເພື່ອການຮຽນຮູ້ ຂອງມະຫາວິທະຍາໄລແຫ່ງຊາດ ຄາດວ່າຈະສຳເລັດ ໃນປີ 2025 ເພື່ອສາມາດຕອບສະໜອງຕໍ່ກິດຈະກໍາການສຶກສາໃຫ້ຄົບຖ້ວນຕາມ 5 ຫຼັກມູນທີ່ກະຊວງສຶກສາທິການ ແລະ ກິລາວາງອອກ ແລະ ເພື່ອຕອບສະໜອງຕາມວິໄສທັດການພັດທະນາຮອດປີ 2030 ແລະ ແຜນຍຸດທະສາດການພັດທະນາປີ 2016 ຫາ 2025 ຂອງມະຫາວິທະຍາໄລແຫ່ງຊາດ ເພື່ອສ້າງເງື່ອນໄຂໃຫ້ແກ່ການຫັນການຮຽນການສອນລົງສູ່ພາກປະຕິບັດຕົວຈິງ ເຮັດໃຫ້ນັກສືກສາມີໂອກາດຮຽນຮູ້ຈາກພາກສະໜາມຫຼາຍຂື້ນ ແລະ ເພື່ອປະຕິບັດຕາມຄໍາຂວັນ 6 ສ ເວົ້າລວມ, ເວົ້າສະເພາະ ແມ່ນປະຕິບັດຕາມ ສ ສີຂຽວໃຫ້ປະກົດຜົນເປັນຈິງເທື່ອລະກ້າວ.ທ່ານ ສິນທະວອນ ດາລາວົງ ຄະນະບໍດີຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ ໃຫ້ສໍາພາດວ່າ:

ຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ ໄດ້ມີການສຶກສາຄວາມເປັນໄປໄດ້ໃນການອອກແບບ, ວາງແຜນ ແລະ ສ້າງໃຫ້ເຂດສວນປ່າສັກທີ່ຢູ່ໃນພື້ນທີ່ບໍລິເວນຄະນະສະຖາປັດຕະຍະກໍາສາດ ເພື່ອສ້າງໃຫ້ເປັນສວນສາທາລະນະເພື່ອການຮຽນຮູ້ ຫຼື ເອີ້ນວ່າ LEARNING PARK ໂດຍມີເນື້ອທີ່ທັງໝົດ 4 ເຮັກຕ້າກວ່າ.

ທ່ານ ສິນທະວອນ ດາລາວົງ ຄະນະບໍດີຄະນະສະຖາປັດຕະຍະກໍາສາດ ມະຫາວິທະຍາໄລແຫ່ງຊາດ ຍັງໃຫ້ຮູ້ຕື່ມວ່າ: ສວນສາທາລະນະເພື່ອການຮຽນຮູ້ແຫ່ງນີ້, ຈະປະກອບມີ ເຮືອນຊົນເຜົ່າທ້ອງຖິ່ນຕ່າງໆຂອງທຸກພາກໃນ ສປປລາວ, ປະດັບປະດາເອ້ຍ້ອງດ້ວຍສວນຕົ້ນໄມ້ ແລະ ດອກໄມ້ສາຍພັນຕ່າງໆ, ຈັດວາງທາງຍ່າງເຊື່ອມຕໍ່ກັບຈຸດຕ່າງໆພາຍໃນສວນທັງເປັນພື້ນທີ່ແລ່ນອອກກໍາລັງກາຍ ແລະ ເປັນບ່ອນໃຫ້ນັກສຶກສາຮຽນຮູ້ການອອກແບບ, ການນໍາໃຊ້ວັດສະດຸ ແລະ ການຈັດວາງທີ່ເໝາະສົມໃນແຕ່ລະພື້ນທີ່, ມີສາລາໃນຮົ່ມ ແລະ ຫໍມູນເຊື້ອຂອງມະຫາວິທະຍາໄລແຫ່ງຊາດທີ່ອອກແບບໃຫ້ມີລັກສະນະສະເພາະເປັນບ່ອນວາງສະແດງການກໍາເນີດ ແລະ ການຂະຫຍາຍຕົວຂອງມະຫາວິທະຍາໄລແຫ່ງຊາດຕັ້ງແຕ່ເລີ່ມຕົ້ນຈົນເຖິງປັດຈຸບັນ.

ສໍາລັບໂຄງການກໍ່ສ້າງສວນສາທາລະນະແຫ່ງນີ້ ແມ່ນເລີ່ມຈັດຕັ້ງປະຕິບັດມາແຕ່ປີ 2021 ຫາ 2022 ຄາດວ່າປີ 2024 ຫາ 2025 ຈະໃຫ້ສໍາເລັດ ເຊິ່ງມີມູນຄ່າການກໍ່ສ້າງໃນເບື້ອງຕົ້ນແມ່ນປະມານ 6 ຕື້ກີບ.

ແຫຼ່ງຂ່າວ: Lao National Radio

ພະຍາຍາມລັກຊັບພົນລະເມືອງ ຖືກເຈົ້າໜ້າທີ່ຈັບຄາເຮືອນ ພ້ອມທັງຂະຫຍາຍຜົນຈັບຜູ້ຮ່ວມຂະບວນການ

ປກສ ກຸ່ມສີສັງວອນ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ເວລາ 7:30 ໂມງ ຂອງວັນທີ 2 ມິຖຸນາ 2022 ໄດ້ຮັບແຈ້ງວ່າ:

ມີຄົນຮ້າຍກໍາລັງລັກຊັບດ້ວຍຮູບການງັດແງະ ຢູ່ເຮືອນເຊົ່າແຫ່ງໜື່ງ ຢູ່ບ້ານສີສັງວອນ, ພາຍຫຼັງໄດ້ຮັບແຈ້ງຄວາມ ປກສ ກຸ່ມສີສັງວອນ ຈິ່ງໄດ້ສົມທົບກັບ ປກສ ບ້ານ ເຂົ້າປິດລ້ອມເຮືອນຫຼັງດັ່ງກ່າວ ພ້ອມທັງຈັບຕົວ ທ້າວ ກໍລະກັນ ອາຍຸ 40 ປີ ຫວ່າງງານ ຢູ່ບ້ານໂພນປ່າເປົ້າ ເມືອງສີສັດຕະນາກ ມາສອບສວນຂະຫຍາຍຜົນ ໃນວັນດຽວກັນ ສາມາດຈັບຜູ້ຮ່ວມຂະບວນການໄດ້ອິກ 1 ຄົນ ຊື່ທ້າວ ພຸດທະສິນ ອາຍຸ 31 ປີ ກໍາມະກອນ ຢູ່ບ້ານຮ່ອງແກ ເມືອງໄຊເສດຖາ ມາດຳເນີນຄະດີຕາມກົດໝາຍ. ຜ່ານການສອບສວນເບື້ອງຕົ້ນຂອງເຈົ້າໜ້າທີ່ ປກສ ກຸ່ມ ຮູ້ວ່າ:

ຜ່ານມາ ທ້າວ ກໍລະກັນ ແລະ ທ້າວ ພຸດທະສິນ ເຄີຍຮ່ວມກັບໝູ່ອີກ 1 ຄົນ ລັກຊັບພົນລະເມືອງ ຢູ່ເຮືອນເຊົ່າແຫ່ງໜື່ງ ຢູ່ບ້ານສີສັງວອນ ໄດ້ແອ 1 ໜ່ວຍ ແລະ ເຫຼັກຈໍານວນໜື່ງ ແລ້ວເອົາໄປຂາຍຕາມຮ້ານຮັບຊື້ເຫຼັກເສດ ພາຍຫຼັງໄດ້ເງິນມາແລ້ວ ກໍ່ເອົາໄປຊື້ຢາບ້າມາເສບ, ຕົກມາຮອດວັນທີ 2 ມິຖຸນາ 2022, ຈິ່ງຖືກເຈົ້າໜ້າທີ່ຈັບຕົວ. ປັດຈຸບັນ, ປກສ ກຸ່ມສີສັງວອນ ໄດ້ສົ່ງຕົວຜູ້ຖືກສົງໄສທັງສອງ ໃຫ້ ປກສ ເມືອງໄຊເສດຖາ ສືບຕໍ່ສອບສວນຂະຫຍາຍຜົນຫາຜູ້ຮ່ວມຂະບວນການ ມາດໍາເນີນຄະດີຕາມກົດໝາຍ.

ຂໍ້ມູນຈາກ: ປ້ອງກັນຄວາມສະຫງົບນະຄອນຫຼວງວຽງຈັນ