ພິທີ ມອບ-ຮັບ ໃບທະບຽນແນວພັນເຂົ້າຊະນິດໃໝ່ “ຫອມດອກຄຳ 8, ຫອມທ່າດອກຄຳ 15 ແລະ ຫອມເຊບັ້ງໄຟ 4” ການປ່ຽນແປງຂອງສະພາບແວດລ້ອມໃນປະຈຸບັນ ໄດ້ສົ່ງຜົນກະທົບໂດຍກົງຕໍ່ກັບການຜະລິດເຂົ້າ ຢູ່ ສປປລາວ ກໍ່ຄືຢູ່ບັນດາປະເທດອາຊີ ທີ່ຜະລິດເຂົ້າເພື່ອຄໍ້າປະກັນທາງດ້ານສະບຽງ ແລະ ຜະລິດເປັນສິນຄ້າ. ໂດຍສະເພາະໄພນໍ້າຖ້ວມ ແລະ ໄພແຫ້ງແລ້ງ ໄດ້ກາຍເປັນຂໍ້ຈໍາກັດໃນການຜະລິດເຂົ້າ ແລະ ທໍາລາຍຜົນຜະລິດເຂົ້າ ຢູ່ ສປປ 10-20%. ນອກຈາກນີ້, ການລະບາດຂອງພະຍາດເຂົ້າ ໂດຍສະເພາະພະ ຍາດຂອບໃບແຫ້ງ, ພະຍາດໃບ ໄໝ້ ແລະ ພະຍາດຄໍຮວງເນົ່າ ແລະ ການລະບາດຂອງແມງໄມ້ສັດຕູພືດ ເຊັ່ນ: ເພ້ຍຈັກຈັ່ນສີນ້ຳຕານ, ເພ້ຍຈັກຈັກຈັ່ນສີຂຽວ, ເພ້ຍໄຟ ກໍ່ມີທ່າອ່ຽງເພີ້ມຂຶ້ນໃນແຕ່ລະປີ, ບັນຫາໂລກຮ້ອນ (ເຊິ່ງໃນ 10 ປີໃດ ອຸນນະພູມໂລກຈະສູງຂຶ້ນ 1 ອົງສາ ແລະ ມີການຄາດຄະເນວ່າ ໃນອີກ 80 ປີຂ້າງໜ້າ ຄື: ປີ 3000 ອຸນນະພູມໂລກຈະສູງຂຶ້ນນ 8 ອົງສາ ເຊິ່ງຈະເຮັດໃຫ້ຜົນຜະລິດເຂົ້າຢູອາຊີ ກໍ່ຄື ສປປ ລາວ ຫຼຸດລົງ 50% ໃນຂະນະທີ່ປະຊາກອນຈະເພີ່ມຂຶ້ນ.

ການຜະລິດເຂົ້າໃນອານາຄົດ ແມ່ນການຄົ້ນຄວ້າ ແລະ ພັດທະນາແນວພັນເຂົ້າຊະນິດໃໝ່ ເພື່ອໃຫ້ທົນທານຕໍ່ກັບໄພນໍ້າຖ້ວມ, ໄພແຫ້ງແລ້ງ, ທົນຕໍ່ກັບການລະບາດຂອງພະຍາດ ແລະ ແມງໄມ້ສັດຕູພືດ ເຫັນວ່າມີຄວາມສໍາຄັນຫຼາຍ ເພື່ອໃຫ້ຊາວນາໄດ້ນໍາໃຊ້ເຂົ້າໃນການຜະລິດ, ເຮັດໃຫ້ການຜະລິດເຂົ້າຢູ່ພາຍໃນປະເທດມີສະຖຽນລະພາບ ແລະ ຮັບປະກັນໄດ້ຄວມໝັ້ນຄົງທາງດ້ານສະບຽງອາຫານທີ່ມີຄວາມປອດໄພ, ພ້ອມທັງເປັນການຫຼຸດດຜ່ອນການນໍາໃຊ້ສານເຄມີ ໃນການປ້ອງກັນ ແລະ ກໍາຈັດແມງໄມ້ສັດຕູພືດ, ຫຼຸດຜ່ອນການຕົກຄ້າງຂອງສານພິດ ແລະ ປົກປັກຮັກສາສະພາບແວດລ້ອມ, ຮັກສາໄດ້ສຸຂະພາບຂອງຊາວນາ ແລະ ຜູ້ບໍລິໂພກເຂົ້າ.

ສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດ ໄດ້ຮ່ວມມືກັບ ສະຖາບັນວິທະຍາສາດ ເທັກໂນໂລຢີ ແຫ່ງຊາດ ປະເທດໄທ ພັດທະນາໂຄງການຄົ້ນຄວ້າແນວພັນເຂົ້າ ທົນທານຕໍ່ກັບການປ່ຽນແປງຂອງສະພາບແວດລ້ອມ ນັບແຕ່ປີ 2009-2022 (ໄລຍະເວລາການຮ່ວມມື 13 ປີ) ແລະ ໄດ້ຄົ້ນຄວ້າພັດທະນາແນວພັນໃໝ່ ແລະ ໄດ້ຈົດທະບຽນ ຢູ່ກົມປູກຝັງ ໃນປີ 2018 ຈໍານວນ 2 ແນວພັນ ຄື:

ເຊບັ້ງໄຟ 2 ແລະ ເຊບັ້ງໄຟ3. ເຊິ່ງທັງໝົດ ເປັນແນວພັນເຂົ້າຈ້າວຫອມທົນນໍ້າຖ້ວມ ແລະ ໃນປີ 2022 ໄດ້ສະເໜີຈົດທະບຽນຕື່ມ 3 ແນວພັນ ດັ່ງລຸ່ມນີ້:

1. ຫອມເຊບັ້ງໄຟ 4: ເປັນແນວພັນທີ່ພັດທະນາຂຶ້ນມາໃໝ່ ໂດຍໄດ້ປັບປຸງໃຫ້ມີຄວາມຫອມ, ທົນທານຕໍ່ກັບນໍ້າຖ້ວມ, ທົນທານຕໍ່ຄວາມແຫ້ງແລ້ງ, ເໝາະສໍາລັບການເຮັດນາຢອດແຫ້ງ ແລະ ນາຫວ່ານແຫ້ງ, ທົນທານຕໍ່ກັບພະຍາດໃບໄໝ້, ພະຍາດຄໍຮວງເນົ່າ ແຕ່ບໍ່ທົນຕໍ່ກັບພະຍາດຂອບໃບແຫ້ງ, ແນະນໍາໃຫ້ປູກສະເພາະນາປີ.

2. ຫອມທ່າດອກຄໍາ 8: ເປັນແນວພັນທີ່ພັດທະນາມາຈາກ ແນວພັນເຂົ້າໜຽວທ່າດອກຄໍາ 8 ເຊິ່ງເປັນແນວພັນສິນຄ້າ ທີ່ສົ່ງໄປຂາຍຢູ່ ສປ ຈີນ ຢ່າງເປັນທາງການ ໂດຍໄດ້ປັບປຸງໃຫ້ແນວພັນດັ່ງກ່າວ ມີຄວາມຫອມ, ທົນທານຕໍ່ກັບພະຍາດໃບໄໝ້, ພະຍາດຄໍຮວງເນົ່າ ແລະ ພະຍາດຂອບໃບແຫ້ງ ແຕ່ຍັງຮັກສາລັກສະນະພັນເດີມ ຄື:ລັກສະນະສີເມັດ, ຊົງພຸ່ມ, ຜົນຜະລິດດີກອ່ນພັນເດີມ, ອາຍຸຍາວກອ່ນ 5 ມື້ (135 ມື້), ສາມາດປູກໄດ້ 2 ລະດູ ທັງນາປີ ແລະ ນາແຊງ.

3. ຫອມທ່າດອກຄໍາ 15: ເປັນແນວພັນທີ່ພັດທະນາຂື້ນມາໃໝ່ ໂດຍໄດ້ປັບປຸງໃຫ້ມີຄວາມຫອມ, ທົນທານຕໍ່ກັບນໍ້າຖ້ວມ, ທົນທານຕໍ່ກັບພະຍາດໃບໄໝ້, ພະຍາດຄໍຮວງເນົ່າ ແລະ ພະຍາດຂອບໃບແຫ້ງ, ອາຍຸ 130 ມື້, ສາມາດປູກໄດ້ 2 ລະດູ ທັງນາປີ ແລະ ນາແຊງ.ໃນວັນທີ 22 ກໍລະກົດ 2022, ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ ໄດ້ຈັດພິທີ ມອບ-ຮັບ ໃບທະບຽນແນວພັນເຂົ້າຊະນິດໃໝ່ “ຫອມດອກຄຳ 8, ຫອມທ່າດອກຄຳ 15 ແລະ ຫອມເຊບັ້ງໄຟ 4” ລະຫວ່າງ ກົມປູກຝັງ ແລະ ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ ຂຶ້ນ, ທີ່ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ. ໃຫ້ກຽດມອບໃບຢັ້ງຢືນ ໂດຍ ທ່ານ ປອ ບຸນຈັນ ກົມບຸນຍະສິດ ຫົວໜ້າກົມປູກຝັງ; ໃຫ້ກຽດຮັບໃບຢັ້ງຢືນ ໂດຍທ່ານ ນາງ ປອ ໃຈ ບຸນພະນຸໄຊ ຫົວໜ້າສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ. ເຊິ່ງມີ ທ່ານ ນາງ ປອ ເພັດມະນີແສງ ຊ້າງໄຊຍະສານ ຫົວໜ້າຄົ້ນຄວ້າເຂົ້າ, ພາກສ່ວນທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມເປັນສັກຂີພະຍານ.ສຳລັບແຜນພັດທະນາແນວພັນເຂົ້າໃນອານາຄົດ 2022 – 2030 ຄື:

• ໄດ້ພັດທະນາແນວພັນທົນທານຕໍ່ກັບ ເພ້ຍຈັກຈັ່ນສີນໍາຕານ ແຕ່ຍັງຮັກສາຄວາມຫອມ, ທົນທານຕໍ່ກັບນໍ້າຖ້ວມ, ທົນທານຕໍ່ກັບພະຍາດໃບໄໝ້, ພະຍາດຄໍຮວງເນົ່າ ແລະ ພະຍາດຂອບໃບແຫ້ງ, ປະຈຸບັນໄດ້ສາຍພັນດີເດັ່ນແລ້ວ ແລະ ຍັງຢູ່ໃນແປງສຶກສາຜົນຜະລິດ ແລະ ຄາດຄະເນວ່າ ຈະເອົາລົງທົດສອບການປັບໂຕຢູ່ທ້ອງຖິ່ນ ໃນປີ 2023 ແລະ ຈະສະເໜີຈົດທະບຽນ ໃນປີ 2025;
• ໄດ້ພັດທະນາແນວພັນເຊບັ້ງໄຟ 4 ໃຫ້ທົນທານຕໍ່ກັບ ພະຍາດຂອບໃບແຫ້ງ ແຕ່ຍັງຮັກສາຄວາມຫອມ, ທົນທານຕໍ່ກັບນໍ້າຖ້ວມ, ທົນທານຕໍ່ກັບຄວາມແຫ້ງແລ້ງ, ທົນທານຕໍ່ກັບພະຍາດໃບໄໝ້ ແລະ ພະ ຍາດຄໍຮວງເນົ່າ ປະຈຸບັນຍັງຢູ່ໃນແປງຄັດເລືອກ, ຄາດຄະເນວ່າຈະໄດ້ສາຍພັນດີເດັ່ນ ໃນປີ 2024, ຈະສຶກສາຜົນຜະລິດ ໃນປີ 2025, ເອົາລົງທົດສອບການປັບໂຕຢູ້ທ້ອງຖີ່ນ ໃນປີ 2026 ແລະ ຈະສະເໜີ ຈົດທະບຽນ ໃນປີ 2027.
• ໄດ້ພັດທະນາແນວພັນໃຫ້ທົນທານຕໍ່ກັບ ຄວາມຮ້ອນ ແຕ່ຍັງຮັກສາຄວາມຫອມ, ທົນທານຕໍ່ກັບນໍ້າຖ້ວມ, ທົນທານຕໍ່ກັບພະຍາດໃບໄໝ້, ພະຍາດຄໍຮວງເນົ່າ, ພະຍາດຂອບໃບແຫ້ງ ປະຈຸບັນຍັງຢູ່ໃນແປງຄັດເລືອກ, ຄາດຄະເນວ່າຈະໄດ້ສາຍພັນດີເດັນໃນປີ 2025, ຈະສຶກສາຜົນຜະລິດ ໃນປີ 2026, ເອົາລົງທົດສອບການປັບໂຕຢູ້ທ້ອງຖິ່ນ ໃນປີ 2027 ແລະ ສະເໜີຈົດທະບຽນ ໃນປີ 2028.

ແຫຼ່ງຂ່າວ: ຂ່າວສານກະສິກຳ,ປ່າໄມ້ ແລະ ພັດທະນາ ຊົນນະບົດ

ພະແນະຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງຫຼວງພະບາງ, ຂໍຖືເປັນກຽດແຈ້ງມາຍັງບັນດາ ທ່ານ ຜູ້ປະກອບການທຸລະກິດ ໂຮງແຮມ, ເຮືອນພັກ, ຮ້ານອາຫານ-ກິນດື່ມ, ບັນເທີງ-ຄາຣາໂອເກະ, ຮ້ານນວດ-ສະປາ ພາຍໃນ ແຂວງຫຼວງພະບາງ ຊາບວ່າ: ເນື່ອງໃນໂອກາດບຸນຫໍ່ເຂົ້າປະດັບດິນຊ່ວງເຮືອເດືອນເກົ້າ ທີ່ຈະຫນູນວຽນມາປະ ຈົບຄົບຮອບອີກວາລະຫນຶ່ງນັ້ນ, ໃຫ້ບັນດາທ່ານຜູ້ປະກອບການທຸລະກິດ ຈົ່ງພ້ອມກັນເພີ່ມຄວາມເອົາໃຈໃສ່ໃນການປະ ຕິບັດລະບຽບການ ຢ່າງເຂັ້ມງວດ, ໂດຍສະເພາະແມ່ນ ຄວາມເປັນລະບຽບຮຽບຮ້ອຍ ແລະການປະຕິບັດໂມງເວລາ ເປີດ-ປິດ, ຫ້າມມົ້ວສຸມສິ່ງເສບຕິດທຸກປະເພດ ໃນສະຖານທີ່ບັນເທີງ-ຄາຣາໂອເກະ, ຮ້ານອາຫານ-ກິນດື່ມ, ຫ້າມນຸ່ງຖື ບໍ່ສຸພາບໂປ້ເປື່ອຍ ແລະອື່ນໆ.

ໃນກໍລະນີຜູ້ປະກອບການທຸລະກິດຫາກບໍ່ປະຕິບັດຕາມເນື້ອໃນແຈ້ງການສະບັບນີ້ ຈະ ໄດ້ປະຕິບັດມາດຕະການ ດັ່ງນີ້:

• ລະເມີດ ຄັ້ງທີ 1: ຈະຖືກສຶກສາອົບຮົມ, ເຮັດບົດບັນທຶກ ພ້ອມທັງ ປັບໃຫມ 1,000,000 ກີບ(ຫນື່ງລ້ານກີບ).
• ລະເມີດ ຄັ້ງທີ 2: ຈະຖືກສຶກສາອົບຮົມ, ເຮັດບົດບັນທຶກ, ຈະຖືກໂຈະການດໍາເນີນທຸລະກິດເປັນເວລາ 05 ເດືອນ.ພ້ອມທັງປັບໃຫມ 5,000,000 ກີບ ( ຫ້າລ້ານກີບ).
• ລະເມີດ ຄັ້ງທີ 3: ຈະຖືກຍົກເລີກການດໍາເນີນທຸລະກິດຖາວອນ, ພ້ອມທັງ ປັບໃຫມ 10,000,000 ກີບ (ສິບ – ລ້ານກີບ).

ດັ່ງນັ້ນ, ຈຶ່ງຂໍຖືເປັນກຽດ ແຈ້ງມາຍັງບັນດາທ່ານເພື່ອຊາບ ແລະພ້ອມຈັດຕັ້ງປະຕິບັດຕາມເນື້ອໃນແຈ້ງການສະ ບັບນີ້ຢ່າງເຂັ້ມງວດ.

ການເຝິກຊ້ອມກອບກູ້ໄພພິບັດ ຮ່ວມລະຫວ່າງ ກອງທັບ ລາວ-ຈີນ ແມ່ນຂີດໝາຍແຫ່ງການຊ່ວຍເຫຼືອເພື່ອນສະຫາຍດ້ວຍກັນ ການຫັດແອບ, ເຝິກຊ້ອມກອບກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການດ້ານການແພດ ( ຂະບວນລົດໄຟສັນຕິພາບ 2022 ) ລະຫວ່າງກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ແມ່ນຂີດໝາຍໃໝ່ ທີ່ເປັນສັນຍາລັກຂອງມິດຕະພາບແຫ່ງການພົວພັນຮ່ວມມື ຊ່ວຍເຫຼືອເຊິ່ງກັນ ແລະ ກັນ ຕ່າງຝ່າຍຕ່າງມີຜົນປະໂຫຍດ, ເພື່ອບັນລຸຄາດໝາຍຂອງການພັດທະນາ, ບົນຈິດໃຈປະດິດສ້າງອະນາຄົດອັນດີງາມຮ່ວມກັນ ແນໃສ່ປົກປັກຮັກສາ ແລະ ເສີມຂະຫຍາຍມູນເຊື້ອ ມິດຕະພາບອັນດີງາມຂອງລາວ – ຈີນ ທີ່ມີມາແຕ່ບູຮານນະການໃຫ້ຈະເລີນງອກງາມຍິ່ງໆ ຂຶ້ນ ສາມາດຍົກສູງຄຸນະພາບໃນການບໍລິການທາງດ້ານວຽກງານການແພດຂອງເຫຼົ່າຮົບເສນາຮັກ ສອງກອງທັບລາວ – ຈີນໃຫ້ ນັບມື້ນັບສູງເດັ່ນຂຶ້ນເລື່ອຍໆ.

ສະຫາຍ ພັນເອກພິເສດ ສີ ເຕີກວາງ ຫົວໜ້າການທະຫານທີມງານເສນາຮັກຂະບວນລົດໄຟສັນຕິພາບ 2022 ລາວ – ຈີນ ກອງທັບປົດປ່ອຍປະຊາຊົນຈີນໄດ້ໃຫ້ຮູ້ວ່າ: ການຫັດແອບ, ເຝິກຊ້ອມກອບຊ້ອມກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການດ້ານການແພດ ຮ່ວມກັນ ຂອງເຫຼົ່າເສນາຮັກກອງທັບປະຊາຊົນລາວ ກັບ ເຫຼົ່າຮົບເສນາຮັກກອງທັບປົດປ່ອຍປະຊາຊົນຈີນໃນຄັ້ງນີ້ ມີຄວາມໝາຍຄວາມສໍາຄັນເປັນຢ່າງຍິ່ງ ເປັນການຊຸກຍູ້ສົ່ງເສີມ, ປຶກສາຫາລື, ແລກປ່ຽນບົດຮຽນທາງດ້ານວຽກງານການແພດເຊິ່ງກັນ ແລະ ກັນ ແນ່ໃສ່ເຮັດໃຫ້ວຽກງານດັ່ງກ່າວໄດ້ຮັບການພັດທະນາຢ່າງມີຄຸນນະພາບ ເຊິ່ງຂະບວນລົດໄຟສັນຕິພາບມີ 3 ຈຸດພິເສດຄື: ໃນເບື້ອງຕົ້ນແມ່ນລົດໄຟພົນລະເຮືອນ ແຕ່ກອງທັບໄດ້ພັດທະນາປັບປຸງໃຫ້ກາຍເປັນລົດໄຟເສນາຮັກຂອງກອງທັບ, ເພື່ອປະຕິບັດໜ້າທີ່ວຽກງານດ້ານການແພດໄດ້ຢ່າງວ່ອງໄວທັນເວລາ ສາມາດຮັບຄົນເຈັບໄດ້ 456 ຄົນໃນນີ້ສາມາດຮອງຮັບຄົນເຈັບທໍາມະດາ, ບາດເຈັບສາຫັດ, ຮັບປະກັນອຸປະກອນເຕັກນິກທາງດ້ານການແພດໃນການຜ່າຕັດທີ່ທັນສະໄໜ, ບັນລຸມາດຖານຂອງໂຮງໝໍຂັ້ນ 3 ຂອງປະເທດ ສປ ຈີນ, ມີເງື່ອນໄຂທັງປິ່ນປົວ ແລະ ນໍາສົ່ງຄົນເຈັບໄປໂຮງໝໍແນວຫຼັງດ້ວຍຄວາມໄວ 120 -160 ກິໂລແມັດ ຕໍ່ຊົ່ວໂມງ, ນອກຈາກນີ້ໃນຕໍ່ໜ້າກອງທັບປົດປ່ອຍປະຊາຊົນຈີນມີແຜນກໍ່ສ້າງລົດໄຟຮັບປະກັນວຽກງານເສນາຮັກຂອງທັບ ທີ່ມີຄວາມໄວສູງ 200 – 300 ກິໂລແມັດ ຕໍ່ຊົ່ວໂມງ.

ສະຫາຍ ພັນເອກ ຟູ ແຫຼ ຮອງຫົວໜ້າຄະນະບັນຊາລວມ ຂະບວນລົດໄຟສັນຕິພາບ ລາວ – ຈີນ ໃຫ້ຮູ້ຕື່ມອີກວ່າ: ເພື່ອຮັບປະກັນໃຫ້ການຫັດແອບ, ເຝິກຊ້ອມກອບກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດ ແລະ ກິດຈະກໍາບໍລິການດ້ານການແພດ ( ຂະບວນລົດໄຟສັນຕິພາບ 2022 ) ລະຫວ່າງກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ພາກສ່ວນກ່ຽວຂ້ອງຝ່າຍຈີນ ໄດ້ມີການປຶກສາຫາລື, ແລກປ່ຽນບົດຮຽນ ແລະ ເອກະພາບບັນດາເນື້ອໃນ, ຂັ້ນຕອນບາດກ້າວການຫັດແອບ, ເຝິກຊ້ອມຮ່ວມກັບ ຝ່າຍລາວ ຢ່າງລະອຽດ ພ້ອມທັງແບ່ງປັນຄວາມຮັບຜິດຊອບ, ມອບໝາຍໜ້າທີ່ ໃຫ້ພາກສ່ວນທີ່ກ່ຽວຂ້ອງ ເພື່ອພ້ອມກັນຈັດຕັ້ງປະຕິບັດຕາມແຜນການຫັດແອບ, ເຝິກຊ້ອມ ທີ່ທັງສອງຝ່າຍໄດ້ເປັນເອກະພາບກັນຢ່າງເຂັ້ມງວດ, ເຝິກຊ້ອມນໍາສົ່ງຄົນເຈັບສົ່ງໂຮງໝໍແນວຫຼັງ, ການປິ່ນປົວ ແລະ ການບັນຊາການເຝິກຊ້ອມຮ່ວມກັນ, ຈຸດປະສົງກໍ່ເພື່ອແລກປ່ຽນວິທີການກອບກູ້ໄພພິບັດທາງທໍາມະຊາດສຸກເສີນເຊິ່ງກັນ ແລະ ກັນໃຫ້ເຂົ້າສູ່ລວງເລິກ, ການນໍາໃຊ້ເຕັກນິກວິຊາການທາງດ້ານການແພດທີ່ທັນສະໄໜ ໂດຍສະເພາະແມ່ນ ຫ້ອງວິເຄາະ PCR ຊອກຫາເຊື້ອໂຄວິດ ແລະ ຍົນບໍມີຄົນຂັບຂ້າເຊື້ອພະຍາໂຄວິດ -19 ທັງນີ້ກໍເພື່ອຍົກລະດັບຄວາມຮູ້ຄວາມສາມາດ ຂອງວຽກງານການແພດຂອງສອງກອງທັບລາວຈີນໃຫ້ສູງເດັ່ນຂຶ້ນຢ່າງບໍຢຸດຢັ້ງ .

ໃນປີ 2017, 2018, 2019 ກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນໄດ້ຈັດກິດຈະກໍາຂະບວນລົດໄຟສັນຕິພາບ ຮ່ວມກັນ 3 ຄັ້ງ, ປີ 2020 ຫາ 2021 ບໍ່ໄດ້ຈັດກິດຈະກໍາຮ່ວມກັນ ຍ້ອນການແຜ່ລະບາດຂອງພະຍາດໂຄວິດ 19 ສະນັ້ນໃນປີນີ້ຂະບວນລົດໄຟສັນຕິພາບລາວ – ຈີນ ຈະກາຍເປັນກົນໄກການຮ່ວມມື ຂອງສອງກອງທັບຕະຫຼອດໄປ ຜ່ານການເຂົ້າຮ່ວມການຫັດແອບ, ເຝິກຊ້ອມຮ່ວມກັນເຫັນໄດ້ວ່າ ເຫຼົ່າຮົບເສນາຮັກກອງທັບປະຊາດຊາຊົນລາວມີຄວາມຊໍານິຊໍານານ ແລະ ຄ່ອງແຄ້ວ ໃນການກອບກູ້ຊ່ວຍເຫຼືອ ແລະ ປິ່ວປົວຄົນເຈັບໄດ້ເປັນຢ່າງດີ, ມີຄວາມສາມັກຄີຮັກແພງ, ໃຫ້ການຊ່ວຍເຫຼືອ, ອໍານວຍຄວາມສະດວກໃນການເຄື່ອນໄຫວໜ້າທີ່ວຽກງານຢ່າງເຕັມສ່ວນ ເຖິງວ່າທີມງານທີມແພດກອງທັບປົດປ່ອຍປະຊາຊົນຈີນຈະເດີນທາງອອກຈາກປະເທດມາໄກ ແຕ່ກໍ່ໄດ້ຮັບການຕ້ອນຮັບຢ່າງອົບອຸ່ນຈາກຝ່າຍທີມແພດກອງທັບປະຊາຊົນລາວ ຄືດັ່ງຢູ່ບ້ານຕົນເອງ ເຮັດໃຫ້ການຈັດຕັ້ງປະຕິບັດຕາມແຜນການຫັດແອບ, ເຝິກຊ້ອມ ສອງຝ່າຍ ມີປະສິດທິຜົນສູງ ເຊິ່ງເປັນການສືບຕໍ່ເສີມສ້າງສາຍພົວພັນອັນດີງາມ ລະຫວ່າງ ກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ໃຫ້ມີຄວາມແໜ້ນແຟ້ນຍິ່ງໆຂຶ້ນ.

ໂດຍ: ອານຸສອນ ສິມວົງສາ

ແຈ້ງປັບຂຶ້ນ, ຄ່າແຮງງານຂັ້ນຕໍ່າຄັ້ງທີ 1 ເລີ່ມ 1 ສິງຫາ 2022

.

.

ຮັບປະກັນການເຄື່ອນໄຫວວຽກງານການເມືອງໃນບັ້ນຫັດແອບ, ຝຶກຊ້ອມ ກອບກູ້ໄພພິບັດ ຮ່ວມສອງ ກອງທັບລາວ – ຈີນ.

ຕາມການລາຍງານຂອງ ວິທະຍຸກະຈາຍສຽງກອງທັບປະຊາຊົນລາວ FM 99,7 MHz ໃນວັນທີ 23 ທີ່ຜ່ານມາ ໃຫ້ຮູ້ວ່າ: ສະຫາຍພັນໂທ ແສງອາລຸນ ແກ້ວສະຫວ່າງ ຮອງຫົວໜ້າກົມໂຄສະນາອົບຮົມ ກົມໃຫຍ່ການເມືອງກອງທັບ ຫົວໜ້າອະນຸກໍາມະການໂຄສະນາ – ປະດັບປະດາ ການຫັດແອບ, ຝຶກຊ້ອມກູ້ໄພພິບັດ ເພື່ອຊ່ວຍເຫຼືອມະນຸດສະທໍາດ້ານການແພດສຸກເສີນ ແລະ ກິດຈະກໍາບໍລິການດ້ານການແພດ ( ຂະບວນລົດໄຟສັນຕິພາບ ປີ 2022 ) ລະຫວ່າງກອງທັບປະຊາຊົນລາວ ແລະ ກອງທັບປົດປ່ອຍປະຊາຊົນຈີນ ໄດ້ໃຫ້ສຳພາດວ່າ:

ຄະນະຊີ້ນໍາວຽກງານການເມືອງໄດ້ສ້າງເນື້ອໃນແຜນການເຄື່ອນໄຫວວຽກງານການເມືອງເປັນອັນລະອຽດ. ໃນນີ້, ໄດ້ມີການປຶກສາຫາລື ຮ່າງເອກະສານວຽກງານການເມືອງໃຫ້ພາກສ່ວນຕ່າງໆ ພ້ອມທັງເຜີຍແຜ່ຊື່ອມຊຶມແຜນການເຄື່ອນໄຫວວຽກງານດັ່ງກ່າວ, ພ້ອມທັງມອບໝາຍໜ້າທີ່ໃຫ້ບັນດາ​ອະນຸກໍາມະການທີ່ກ່ຽວຂ້ອງແຕ່ລະພາກສ່ວນຢ່າງທົ່ວເຖິງ,​ກະກຽມເອກະສານ, ວັດຖຸຍ້ອງຍໍປະເພດຕ່າງໆ ເພື່ອຍ້ອງຍ້ອງສັນລະເສີນບຸກຄົນ ແລະ ກົມກອງລວມໝູ່ທີ່ມີຜົນງານດີເດັ່ນ, ຈັດຕັ້ງສາຍຮູບເງົາ, ປະດັບປະດາພິທີເປີດ – ປິດການຫັດແອບ ຢູ່ສະໝາມຝຶກຊ້ອມດ້ວຍຄໍາຂວັນ, ທຸງປິວ, ຜ້າສາກ, ເຄື່ອງສຽງ, ໂທລະໂຄ່ງ ແລະ ອຶ່ນໆ ໃຫ້ມີເນື້ອໃນຄົບຖ້ວນ, ເປັນລະບຽບຈົບງາມ.

ສະຫາຍພັນໂທ ແສງອາລຸນ ແກ້ວສະຫວ່າງ ໃຫ້ຮູ້ຕື່ມອີກວ່າ: ຜ່ານການເຄື່ອນໄຫວຈັດຕັ້ງປະຕິບັດວຽກງານໃນແຕ່ລະດ້ານ ຄະນະຮັບຜິດຊອບ, ອະນຸກໍາມະການ, ພະນັກງານວິຊາການວຽກງານການເມືອງ ໄດ້ພົວພັນປະສານສົມທົບກັນຢ່າງກົມກຽວ ເປັນເຈົ້າການເຮັດໜ້າທີ່ວຽກງານຂອງຕົນ ຕາມແຜນການທີ່ໄດ້ຮັບມອບໝາຍ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດ​ເປັນຢ່າງດີ,​ ມາຮອດປະຈຸບັນກໍາລັງ ແລະ ອຸປະກອນຮັບໃຊ້ວຽກງານການເມືອງແມ່ນມີຄວາມພ້ອມທຸກດ້ານ ທັງນີ້ກໍ່ເພື່ອເປັນການໂຄສະນາສຶກສາອົບການເມືອງ – ນໍາພາແນວຄິດ ໃຫ້ພະນັກງານ – ນັກຮົບ ທີ່ເຂົ້າຮ່ວມການຫັດແອບໃນຄັ້ງນີ້ໃຫ້ຮັບຮູ້ເຂົ້າໃຈຢ່າງເລິກເຊິ່ງ, ກໍາໄດ້ຄວາມໝາຍ, ຄວາມສໍາຄັນ, ຈຸດປະສົງ – ລະດັບຄາດໝາຍ, ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ເຂົ້າໃນການຈັດຕັ້ງປະຕິບັດແຜນການຫັດແອບ,ຝຶກຊ້ອມໃນຄັ້ງນີ້ ໃຫ້ມີຜົນສໍາເລັດ ແລະ ຮັບປະກັນຄວາມສະຫງົບປອດໄພ 100%.

ຂ່າວ-ພາບ: ຄໍາໃໜ່ ສັງທອງເພັດ