ຕາມການລາຍງານຈາກ ທ່ານ ນາງ ກິນນາລີ ທໍາມະວົງ ຮອງຫົວໜ້າດ່ານພາສີສາກົນ ຂົວມິດຕະພາບ 3 ໃຫ້ຮູ້ເມື່ອບໍ່ດົນນີ້ວ່າ: ດ່ານພາສີສາກົນ ຂົວມິດຕະ ພາບ 3 ໄດ້ຮັບມອບໝາຍຈາກກະຊວງການເງິນ ກໍຄື ລັດຖະບານໃນການຈັດເກັບລາຍຮັບປີ 2022 ຈໍານວນ 412,7 ຕື້ກີບ.

ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ ສາມາດປະຕິບັດໄດ້ 175 ຕື້ກວ່າກີບ, ເທົ່າກັບ 42,43% ຂອງແຜນກາງປີ, ຖ້າທຽບໃສ່ໄລຍະດຽວກັນຂອງປີ 2021 ແມ່ນເທົ່າກັບ 118,22%. ສ່ວນລາຍຮັບທີ່ເກັບໄດ້ສ່ວນໃຫຍ່ ແມ່ນໄດ້ມາຈາກສິນຄ້ານໍາເຂົ້າເພື່ອສົ່ງອອກຕໍ່ ເຊິ່ງກວມເອົາ 47,41% ຂອງລາຍຮັບທີ່ເກັບໄດ້, ສິນຄ້ານໍາເຂົ້າເສຍພາສີເພື່ອຊົມໃຊ້ພາຍໃນກວມເອົາ 45,75%, ຄ່າທໍານຽມຕ່າງໆກວມເອົາ 6,84% .

ທ່ານ ນາງ ກິນນາລີ ທໍາມະວົງ ຍັງໃຫ້ຮູ້ອີກວ່າ: ສໍາລັບຂໍ້ສະດວກໃນການຈັດ ຕັ້ງປະຕິບັດ ຍ້ອນມີການຊີ້ນໍາຈາກພາສີປະຈໍາແຂວງຄໍາມ່ວນ, ດ້ານວິຊາສະເພາະມີລະບຽບ, ກົດໝາຍ, ນິຕິກໍາຈາກກົມພາສີ, ກະຊວງການເງິນເປັນບ່ອນອີງ, ມີລະບົບການຈັດຕັ້ງຂອງດ່ານສາກົນ ທີ່ອໍານວຍຄວາມສະດວກໃນການບໍລິຫານ ເຮັດໃຫ້ຜູ້ປະ ກອບການຫັນມາໃຊ້ບໍລິການດ່ານພວກເຮົາ, ມີເຄື່ອງມືທັນສະໄໝໃນການຈັດເກັບ. ສ່ວນດ້ານຂໍ້ຫຍຸ້ງຍາກ ເຖິງວ່າເຮົາຈະມີລະບົບສາງ ເພື່ອບໍລິການສິນຄ້າເຂົ້າ-ອອກ ແຕ່ການ ນໍາໃຊ້ຕົວຈິງຍັງບໍ່ທັນໄດ້ສະດວກເຊັ່ນ: ສະຖານທີ່ກວດກາສິນຄ້າ, ສາງໃນຮົ່ມທີ່ຮັບປະ ກັນໃນການເກັບຮັກສາສິນຄ້າ, ການນໍາໃຊ້ລະບົບທັນສະໄໝສັນຍານບໍ່ແຮງພໍ, ເຄື່ອງມືສ່ວນຫລາຍແມ່ນນໍາໃຊ້ມາໄດ້ຫລາຍປີແລ້ວ.

ສໍາລັບທິດທາງແຜນການ 6 ເດືອນທ້າຍປີ 2022 ນີ້, ຕ້ອງໄດ້ເຮັດວຽກງານແນວຄິດກັບອ້າຍນ້ອງເຈົ້າໜ້າທີ່ຕື່ມ ເປັນຕົ້ນ ການເຜີບແຜ່ບັນດານິຕິກໍາຕ່າງໆທີ່ສໍາຄັນ ແລະ ຕິດພັນກັບການຈັດເກັບລາຍຮັບໃນໄລຍະປັດຈຸບັນ ເປັນຕົ້ນ ຄໍາສັ່ງແນະນໍາ 4490/ກງ ແລະ ແຈ້ງການ 4491/ກງ ວ່າດ້ວຍການອໍານວຍຄວາມສະດວກໃຫ້ແກ່ບໍລິ ສັດ ທີ່ໄດ້ມາດຕະຖານ AEO ໃຫ້ມີຄວາມສະດວກ, ວ່ອງໄວກວ່າບໍລິສັດທົ່ວໄປ, ປະ ສານກັບພາກສ່ວນກ່ຽວຂ້ອງ ເພື່ອອໍານວຍຄວາມສະດວກໃຫ້ຜູ້ປະກອບການ ໄດ້ມານໍາໃຊ້ດ່ານພວກເຮົາຫລາຍຂຶ້ນ.ປັດຈຸບັນ, ການໄປມາຜ່ານດ່ານສາກົນຂົວມິດຕະພາບ 3 ແມ່ນນໍາໃຊ້ເຄື່ອງມືທີ່ທັນສະໄໝ, ການບໍລິການຂອງເຈົ້າໜ້າທີ່ກໍໄດ້ມີຄວາມສະດວກ, ວ່ອງໄວ ເປັນຕົ້ນ ການຈ່າຍຄ່າທໍານຽມ ແລະ ການບໍລິການຜ່ານເຂົ້າ-ອອກດ່ານ ແມ່ນຈ່າຍເຂົ້າໃນລະບົບທີ່ທັນສະໄໝ, ສ່ວນສິນຄ້າ, ເຄື່ອງຂອງທີ່ຜູ້ໂດຍສານຊື້ຕິດຕົວເຂົ້າມາ ຖ້າມູນຄ້າບໍ່ເກີນທີ່ກົດໝາຍກໍານົດໄວ້ ກໍຈະໄດ້ຮັບນະໂຍບາຍດ້ານພາສີ.

ແຫຼ່ງຂ່າວຈາກ: ຂປລ

ພິທີ ເປີດນໍາໃຊ້ເສັ້ນທາງເບຕົງທາງເຂົ້າວັດນາຄານິມິດໂພນສັນ ໄດ້ຈັດຂຶ້ນໃນວັນທີ 23 ສິງຫາ 2022 ນີ້ ຢູ່ບ້ານທ່າໂພນສັນ ເມືອງທ່າພະບາດ, ແຂວງບໍລິຄໍາໄຊ

ໃຫ້ກຽດເຂົ້າຮ່ວມເປີດພິທີໃນຄັ້ງນີ້ ໂດຍທ່ານ ຄໍາແຫວນ ປັນຍານຸວົງ ຮອງເຈົ້າແຂວງບໍລິຄໍາໄຊ, ທ່ານ ສົມສົດ ແສງອາພອນ ເຈົ້າເມືອງທ່າພະບາດ ມີບັນດາທ່ານ ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຕ່າງໜ້າຈາກພາກສ່ວນອົງການຈັດຕັ້ງພັກ-ລັດ, ແຂກທີ່ມີກຽດ, ນັກທຸລະກິດ ຕະຫຼອດຮອດ ປະຊາຊົນ ເຂົ້າຮ່ວມ.

.

.

ເຈົ້າໜ້າທີ່ພາສີ ຮ່ວມກັບເຈົ້າຫນ້າທີ່ກັກກັນພືດ ປະຈໍາດ່ານຂົວມິດຕະພາບລາວ-ໄທ ແຫ່ງທີ 1 ຈັດພິທີທໍາລາຍພືດຜັກນໍາເຂົ້າຜິດລະບຽບ ຈໍານວນ 3.914 ກິໂລກຣາມ ຂຶ້ນວັນທີ 22 ສິງຫາ 2022 ຢູ່ສະຖານີກັກກັນພືດດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ໂດຍມີ ທ່ານ ພັນໂທ ກິດອນ ກິວົງໄຊ ຮອງຫົວຫນ້າຄະນະຄຸ້ມຄອງດ່ານ ຫົວຫນ້າດ່ານຕໍາຫຼວດກວດຄົນເຂົ້າເມືອງດ່ານສາກົນຂົວມິດພາບລາວ-ໄທ ແຫ່ງທີ 1 ວຽງຈັນ-ຫນອງຄາຍ ທ່ານ ຫນຽວຄໍາ ຄໍາມີນາທີ ຫົວຫນ້າຂະແຫນງປູກຝັງ ພະແນກກະສິກໍາ ແລະ ປ່າໄມ້ ນະຄອນຫຼວງວຽງຈັນ ພ້ອມດ້ວຍຕາງຫນ້າຈາກພາກສ່ວນກ່ຽວຂ້ອງເຂົ້າຮ່ວມ.

ທ່ານ ວັນນາ ຄໍາໂພໄຊ ຫົວຫນ້າຫນ່ວຍງານປ້ອງກັນພືດປະຈໍາດ່ານຂົວມິດພາບລາວ-ໄທ ແຫ່ງທີ 1 ລາຍງານວ່າ: ໃນວັນທີ 18 ສິງຫາ 2022 ເຈົ້າຫນ້າທີ່ກັກກັນພືດສາກົນຂົວມິດຕະພາບລາວ-ໄທແຫ່ງທີ 1 ໄດ້ເຮັດບົດບັນທຶກມອບ-ຮັບສິນຄ້າກະສິກໍາທີ່ສາມາດຄວບຄຸມໄດ້ຈາກການ ນໍາເຂົ້າຜິດລະບຽບ ເຊິ່ງເຈົ້າຫນ້າທີ່ກັກກັນພືດໄດ້ປະສານສົມທົບກັບເຈົ້າຫນ້າພາສີສາກົນຂົວມິດຕະພາບລາວ-ໄທແຫ່ງທີ 1 ສາມາດກວດກາ ແລະ ກັກສິນຄ້າປະເພດຜັກນໍາເຂົ້າ ໂດຍລັກລອບເຂົ້າມານໍາດ້ວຍລົດໂດຍສານລະຫວ່າງປະເທດ ສາຍອຸດອນ-ວຽງຈັນ ສາມາດປູກພືດຜັກໄດ້ ເຊັ່ນ: ຜັກບົ່ວ ຫມາກເລັ່ນ ຫມາກບວບ ຫອມປ້ອມ ຫມາກແຕງ ຜັກກາດ ແລະ ພືດຜັກອື່ນໆ ລວມທັງຫມົດ 3.914 ກິໂລກຣາມ ມູນຄ່າ 1.274 ໂດລາສະຫະລັດ ຫຼືປະມານ 19 ລ້ານກີບ ໃນນີ້ ແມ່ນປະເພດພືດຜັກນໍ ເຂົ້າມາຜິດລະບຽບ ບໍ່ມີເອກະສານກ່ຽວຂ້ອງທາງດ້ານກັກກັນພືດ ເປັນຕົ້ນ ບໍ່ມີໃບອະນຸຍາດນໍາເຂົ້າ ແລະ ໃບຢັ້ງຢືນສຸຂະນາໄມພືດຈາກປະເທດຕົ້ນທາງ ເປັນການລະເມີດຕໍ່ກົດຫມາຍປ້ອງກັນພືດ ແລະ ກັກ. ກັນພືດ ຫມວດທີ 1 ວ່າດ້ວຍການນໍາເຂົ້າ ໃນມາດຕາ 33 ຫາ 84 ວ່າດ້ວຍເອກະສານທີ່ຕ້ອງແຈ້ງ ແລະ ກວດກາກ່ອນການນໍາເຂົ້າ ແລະ ຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຊ່ວຍວຽກງານຄະນະສະເພາະກິດສົ່ງເສີມການຜະລິດ ແລະ ຊົມໃຊ້ຜະລິດຕະພັນທີ່ຜະລິດຢູ່ ພາຍໃນປະເທດ ແລະ ຄຸ້ມຄອງນໍາເຂົ້າສິນຄ້າອຸປະໂພກ-ບໍລິໂພກ ສະບັບເລກທີ 4360/ກປ.ນວ

ດັ່ງນັ້ນ ເຈົ້າຫນ້າທີ່ກ່ຽວຂ້ອງຈຶ່ງໄດ້ປະຕິບັດ ຕາມລະບຽບການທຸກຂັ້ນຕອນໃຫ້ຖືກຕ້ອງ ສອດຄ່ອງ ແລະ ໂປ່ງໄສ.

ໃນປີ 2022 ດ່ານກັກກັນພືດສາກົນຂົວມິດຕະພາບລາວ-ໄທແຫ່ງທີ 1 ກໍຄືເຈົ້າຫນ້າທີ່ກັກກັນພືດ ສາມາດທໍາລາຍພືດຜັກທີ່ລັກລອບນໍາເຂົ້າ ຜິດລະບຽບໄດ້ 2 ຄັ້ງ ໂດຍຄັ້ງທີ 1 ລະຫວ່າງເດືອນມີນາ 2022 ໄດ້ຢືດທໍາລາຍພືດພັກ 1.578 ກິໂລກຣາມ ມູນຄ່າ 848 ໂດລາສະຫະລັດ ແລະ ຄັ້ງຫຼ້າສຸດໃນເດືອນສິງຫາ 2022 ນີ້.

ຂໍ້ມູນ ແລະ ຮູບພາບ: ວຽງຈັນໃໝ່

ວັນທີ 23 ສິງຫາ 2022 ນີ້, ຢູ່ສະພາແຫ່ງຊາດ ໄດ້ມີພິທີເຊັນບົດບັນທຶກ ວ່າດ້ວຍການຮ່ວມມື ແລະ ການປະສານງານ ລະຫ່ວາງ ກໍາມາທິການການຕ່າງປະ ເທດ ສະພາແຫ່ງຊາດ ແລະ ກະຊວງການຕ່າງປະເທດ ໂດຍການຮ່ວມລົງນາມ ລະຫວ່າງ ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ ສະພາແຫ່ງຊາດ ແລະ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະ ເທດ ໂດຍມີ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ພ້ອມດ້ວຍ ພາກສ່ວນກ່ຽວຂ້ອງທັງສອງຝ່າຍ ເຂົ້າຮ່ວມ.

ການເຊັນບົດບັນທຶກດັ່ງກ່າວ, ເພື່ອຮັບປະກັນໃຫ້ແກ່ການຮ່ວມມື ແລະ ການປະສານງານຮ່ວມກັນ ລະຫ່ວາງກໍາມາທິການການຕ່າງປະເທດ ກັບກະຊວງການຕ່າງປະເທດ ໃຫ້ມີປະສິດທິພາບ ແລະ ປະສິດທິຜົນສູງ, ຮັບປະກັນໃຫ້ໄດ້ທາງດ້ານເນື້ອໃນສໍາຄັນ, ພ້ອມທັງສືບ ຕໍ່ປະສານສົມທົບກັນໃນການຄົ້ນຄວ້າຮ່າງກົດໝາຍ ໃນຂົງເຂດການຕ່າງປະເທດເປັນຕົ້ນ ການສ້າງຮ່າງກົດໝາຍວ່າດ້ວຍໜັງສືຜ່ານແດນ, ການສ້າງສັນຍາສາກົນໃນລະດັບຂອງສະພາແຫ່ງຊາດ, ລະບຽບການວ່າດ້ວຍການໃຫ້ສັດຕະຍາບັນ ໃຫ້ມີເນື້ອໃນຄົບຖ້ວນ, ຈະແຈ້ງ ແລະ ຮັດກຸມ, ຮັບປະກັນຄວາມຖືກຕ້ອງ, ສອດຄ່ອງກັບແນວທາງຂອງພັກ, ຮັບໃຊ້ຜົນປະໂຫຍດລວມຂອງຊາດ ແລະ ປະຊາຊົນ; ສະໜອງບົດລາຍງານກ່ຽວກັບຜົນສຳເລັດ ຂອງການເຄື່ອນໄຫວວຽກງານການຕ່າງປະເທດ ຂອງການນຳຂັ້ນສູງຂອງສະພາແຫ່ງຊາດ ທັງໃນຂອບສອງຝ່າຍ ແລະ ຫລາຍຝ່າຍແຕ່ລະໄລຍະ ແລະ ແຜນການ ເຄື່ອນໄຫວໃນຕໍ່ໜ້າ, ຂໍ້ມູນການພົວພັນ ແລະ ຮ່ວມມື ລະຫວ່າງສະພາແຫ່ງຊາດລາວ ແລະ ລັດຖະສະພາຕ່າງປະເທດ ໃຫ້ກະຊວງການຕ່າງປະເທດ;

ສະໜອງບົດສະຫລຸບລາຍງານສະພາບການທີ່ພົ້ນເດັ່ນ ໃນຂົງເຂດພາກພື້ນ ແລະ ສາກົນ, ບົດລາຍງານ ກ່ຽວກັບ ການຈັດຕັັ້ງປະຕິບັດສົນທິສັນຍາສາກົນທີ່ ສປປ ລາວ ລົງນາມ ແລະ ເປັນພາຄີ ໃນຂອບ ສອງຝ່າຍ ແລະ ຫລາຍຝ່າຍ, ສະພາບການຄຸ້ມຄອງອົງການຈັດຕັ້ງສາກົນ, ອົງການລະຫວ່າງລັດຖະບານ ແລະ ອົງການຈັດຕັ້ງສາກົນທີ່ບໍ່ສັງກັດລັດຖະບານ ທີ່ມາເຄື່ອນໄຫວຢູ່ ສປປ ລາວ, ວຽກງານການພົວພັນຄົນເຊື້ອຊາດລາວ ແລະ ວຽກງານກ່ຽວຂ້ອງອື່ນໆ ໃຫ້ກໍາມະທິການການຕ່າງປະເທດ ເປັນແຕ່ລະໄລຍະ; ສະໜັບສະໜູນ ແລະ ຊ່ວຍເຫລືອ ເຊິ່ງກັນ ແລະ ກັນ ໃນການພັດທະນາຊັບພະຍາກອນມະນຸດ ເພື່ອຍົກລະດັບຄວາມຮູ້ຄວາມສາມາດທາງດ້ານວິຊາການ, ພິທີການ, ພາສາຕ່າງປະເທດ ແລະ ການສ້າງພະນັກ ງານແປພາສາ ແນໃສ່ຮັບໃຊ້ໃຫ້ແກ່ການເຄື່ອນ ໄຫວວຽກງານການຕ່າງປະເທດ ໃນໄລຍະໃໝ່ ຕາມຄວາມສາມາດຕົວຈິງຂອງແຕ່ລະພາກສ່ວນ; ສະໜອງຂໍ້ມູນ ແລະ ໃຫ້ທັດສະນະຕໍ່ບັນຫາຕ່າງໆທີ່ຈໍາເປັນ ໃຫ້ແກ່ກັນ ແລະ ກັນ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານວິຊາສະເພາະຂອງຕົນ ຕາມການສະເໜີຂອງແຕ່ລະຝ່າຍ.

ພ້ອມນີ້, ຂໍ້ຕົກລົງດັ່ງກ່າວ ຍັງຈະເປັນເຄື່ອງມືໜຶ່ງ ທີ່ປະກອບສ່ວນຊ່ວຍໃນການສ້າງຄວາມເຂັ້ມແຂງທາງດ້ານວິຊາການ ໃຫ້ແກ່ພະນັກງານ-ລັດຖະກອນ ຂອງກໍາມາທິການ ແລະ ກະຊວງການຕ່າງປະເທດ ໃຫ້ມີຄວາມໃກ້ຊິດສະໜິດສະໜົມ ແລະ ເພີ່ມຄວາມສາມັກຄີຮັກແພງ ລະຫວ່າງສອງພາກສ່ວນ ໃຫ້ຫລາຍຂຶ້ນກວ່າເກົ່າ.

ຂ່າວ-ພາບ: ສະພາແຫ່ງຊາດ

ວັນທີ 18 ສິງຫາ 2022 ທີ່ສະຫນາມບິນສາກົນວັດໄຕ ນະຄອນຫຼວງວຽງຈັນ ໄດ້ປະກາດການແຕ່ງຕັ້ງ ຄະນະປະຕິຮູບ ລັດວິສາຫະກິດການບິນລາວ ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ບຸນໂຈມ ອຸບົນປະເສີດ ກໍາມະການ ່ ສູນກາງພັກ, ລັດຖະມົນຕີກະຊວງການເງິນ, ມີຮອງລັດຖະມົນຕີກະຊວງການເງິນ, ກະຊວງໂຍທາທິການ ແລະ ຂົນສົ່ງ, ຜູ້ອໍານວຍການໃຫຍ່ ລັດວິສາຫະກິດ ການບິນລາວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ກົງຄໍາ ສິດທິມໍລະດາ ຫົວຫນ້າກົມຈັດຕັ້ງ ແລະ ພະນັກງານ ກະຊວງການເງິນ ໄດ້ຜ່ານຂໍ້ຕົກລົງ ວ່າດ້ວຍ ແຕ່ງຕັ້ງ ຄະນະປະຕິຮູບ ລັດວິສາຫະກິດ ການບິນລາວ ສະບັບເລກທີ 56/ນຍ, ລົງວັນທີ 13 ກໍລະກົດ 2022, ເຊິ່ງປະກອບມີ: ທ່ານ ປອ. ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ເປັນຫົວຫນ້າຄະນະ, ທ່ານ ງາມປະສົງ ເມືອງມະນີ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ເປັນຮອງຫົວຫນ້າຄະນະ, ທ່ານ ຄໍາຫຼ້າ ພົມມະວັນ, ຜູ້ອໍານວຍການໃຫຍ່ ລັດວິສາຫະກິດ ການບິນລາວ ເປັນຄະນະ, ທ່ານ ປອ. ນາງ ແສງອາລຸນ ອິນມີໄຊ ຮອງຫົວຫນ້າກົມປະຕິຮູບລັດວິສາຫະກິດ ແລະ ການປະກັນໄພ ກະຊວງການເງິນ, ທ່ານ ອາລຸນຈັນໃສ ບຸນໄຊທິບ ຮອງຫົວຫນ້າກົມ ກະຊວງໂຍທາທິການ ແລະ ຂົນສົ່ງ, ທ່ານ ບຸນແຕ່ງ ສີມູນ ຮອງຫົວຫນ້າກົມ ກະຊວງໂຍທາທິການ ແລະ ຂົນສົ່ງ, ທ່ານ ວັນໄຊ ທອງສີທາວົງ ຮອງຫົວຫນ້າ ກົມຄຸ້ມຄອງການບັນຊີ ກະຊວງການເງິນ, ທ່ານ ຮສ. ທອງເພັດ ຈັນທະນິວົງ ຮອງຄະນະບໍດີຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ, ກໍາມະການອິດສະຫຼະ ແລະ ທ່ານ ນາງ ພອນສະຫວັນ ສິດທິເດດ ຮອງຫົວຫນ້າສູນຄົ້ນຄວ້ານະໂຍບາຍພັດທະນາວິສາຫະກິດ ແລະ ການເຊື່ອມໂຍງສາກົນ, ສະຖາບັນຄົ້ນຄວ້າເສດຖະກິດ-ສັງຄົມ ແຫ່ງຊາດ, ກໍາມະການອິດສະຫຼະ ເປັນຄະນະ.

ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ຊົມເຊີຍຄະນະປະຮູບ ລັດວິສາຫະກິດ ການບິນລາວ ທີ່ໄດ້ຮັບການ ແຕ່ງຕັ້ງໃນຄັ້ງນີ້, ພ້ອມທັງໃຫ້ຮູ້ວ່າ: ຄະນະປະຕິຮູບ ຈະເຮັດວຽກທັງເປັນຄະນະປະຕິຮູບ ແລະ ສະພາບໍລິຫານ ເພື່ອຄົ້ນຄວ້າກໍານົດທິດທາງ ແລະ ແຜນການປະຕິຮູບຮອບດ້ານລັດວິສາຫະກິດການບິນລາວ ແລະ ຮັບປະກັນໃຫ້ແຜນການດັ່ງກ່າວຖືກຈັດຕັ້ງປະຕິບັດສໍາເລັດຕາມແຜນການ, ກໍານົດພາລະບົດບາດ, ສິດ ແລະ ຫນ້າທີ່ຂອງບໍລິສັດທີ່ປຶກສາ ເພື່ອຄົ້ນຄວ້າແຜນການ ປັບໂຄງສ້າງລັດວິສາຫະກິດຮອບດ້ານ ຄື: ໂຄງສ້າງດ້ານການເງິນ-ການບັນຊີ, ການດໍາເນີນທຸລະກິດ, ປັບປຸງກົງຈັກ-ບຸກຄະລາກອນ ແລະ ອື່ນໆ, ກໍານົດຂັ້ນຕອນ, ວິທີການ, ດໍາເນີນການຄັດເລືອກ ແລະ ຈັດຈ້າງບໍລິສັດທີ່ປຶກສາ ແຕ່ລະດ້ານ, ຄົ້ນ ຄວ້າສ້າງກົນໄກການປະຕິຮູບ, ແຜນດໍາເນີນງານ, ແຜນງົບປະມານ ແລະ ລາຍງານຕໍ່ຄະນະນໍາກະຊວງການເງີນ ແລະ ລັດຖະບານ ເພື່ອຂໍການພິຈາລະນາຮັບຮອງ, ພ້ອມນັ້ນ, ທ່ານ ລັດຖະມົນຕີ ຍັງໄດ້ໃຫ້ທິດຊີ້ນໍາຕໍ່ຄະນະປະຕິຮູບ ໃຫ້ເອົາໃຈ ໃສ່ໃນການປັບປຸງລັດວິສາຫະກິດຫັນເຂົ້າສູ່ລະບົບກຸ້ມຕົນເອງ ຊຶ່ງຈໍາເປັນຕ້ອງໄດ້ຈ້າງແຮງງານທີ່ເປັນມືອາຊີບມາຊ່ວຍໃນ ການບໍລິຫານ ເພື່ອຈະໄດ້ຈັດຕັ້ງປະຕິບັດແຜນການ ແລະ ມາດຕະການປະຕິຮູບ ໃຫ້ສໍາເລັດຕາມລະດັບຄາດຫມາຍ.

ຂ່າວ ແລະ ຮູບພາບ: ກະຊວງການເງິນ