ກອງປະຊຸມຄະນະກໍາມະການຄຸ້ມຄອງກອງທຶນປະກັນສຸຂະພາບຂັ້ນແຂວງ ແລະ ເມືອງ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີໄດ້ຈັດຂຶ້ນໃນວັນທີ 6 ຕຸລາ ນີ້ທີ່ຫ້ອງປະຊຸມພະແນກສາທາລະນະສຸກ ແຂວງໄຊຍະບູລີ. ເປັນກຽດເຂົ້າຮ່ວມຂອງ ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ທ່ານ ດຣ ນິກອນ ວົງສະຫວັດ ຮັກສາການຫົວໜ້າຫ້ອງການປະກັນສຸຂະພາບແຫ່ງຊາດ ກະຊວງສາທາລະນະສຸກ, ທ່ານ ດຣ ແກ່ນ ດວງດີ ຮອງຫົວໜ້າພະແນກສາທາລະນະສຸກແຂວງ, ມີຮອງເຈົ້າເມືອງ, ຄະນະກໍາມະການຄຸ້ມຄອງກອງທຶນປະກັນສຸຂະພາບແຫ່ງຊາດຂັ້ນແຂວງ, ຄະນະພະແນກສາທາລະນະສຸກແຂວງ, ຫົວໜ້າຫ້ອງການສາທາລະນະສຸກເມືອງ, ຜູ້ອໍານວຍການໂຮງໝໍແຂວງ, ໂຮງໝໍຊຸມຊົນ ຕະຫຼອດຮອດພະນັກງານວິຊາການຫ້ອງການປະກັນສຸຂະພາບຂັ້ນແຂວງ-ຂັ້ນເມືອງເຂົ້າຮ່ວມ.

ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ໄດ້ໃຫ້ຮູ້ວ່າ: ພັກ ແລະ ລັດຖະບານ ຍາມໃດກໍມີຄວາມເປັນຫ່ວງເປັນໃຍນໍາສຸຂະພາບຂອງປະຊາຊົນລາວບັນດາເຜົ່າ. ຄະນະພັກ, ອົງການປົກຄອງທຸກຂັ້ນພາຍໃນແຂວງ ກໍຄືພະແນກສາທາລະນະສຸກແຂວງ ໃນນາມເປັນຄະນະຮັບຜິດຊອບຈັດຕັ້ງປະຕິບັດກອງທຶນ ກໍ່ໄດ້ສຸມສະຕິປັນຍາ, ຄວາມຮູ້-ຄວາມສາມາດ ເປັນເຈົ້າການໃນການປຸກລະດົມການເຂົ້າຮ່ວມຂອງປະຊາຊົນບັນດາເຜົ່າໃຫ້ມີຄວາມຮັບຮູ້ເຂົ້າໃຈຢ່າງທົ່ວເຖິງ ເພື່ອເຮັດໃຫ້ຊີວິດການເປັນຢູ່ນັບມື້ນັບດີຂຶ້ນ, ສາມາດປະກອບສ່ວນຢ່າງຕັ້ງໜ້າໃນການພັດທະນາປະເທດຊາດຂອງພວກເຮົາ ຫຼຸດພົ້ນອອກຈາກປະເທດດ້ອຍພັດທະນາຕາມຈຸດໝາຍທີ່ພັກ-ລັດວາງໄວ້.

ກອງປະຊຸມຄັ້ງນີ້ໄດ້ຮັບຟັງ ສະຫຼຸບການຈັດຕັ້ງປະຕິບັດວຽກງານກອງທຶນປະກັນສຸຂະພາບແຫ່ງຊາດ ແຂວງໄຊຍະບູລີ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2020. ພ້ອມກັນນັ້ນຜູ້ເຂົ້າຮ່ວມ ໄດ້ປະກອບຄໍາຄິດຄໍາເຫັນ, ຕີລາຄາດ້ານດີ, ດ້ານອ່ອນ ທີ່ຈະໄດ້ພ້ອມກັນແກ້ໄຂເພື່ອເຮັດໃຫ້ວຽກງານກອງທຶນປະກັນສຸຂະພາບແຫ່ງຊາດໃຫ້ເປັນເອກະພາບກັນໃນທົ່ວແຂວງ. ທົ່ວແຂວງມີຜູ້ປະກັນສຸຂະພາບປົກຄຸມ 100% ຂອງປະຊາກອນ 423.498 ຄົນ ໃນນີ້ພາກປະຊາຊົນທົ່ວໄປປົກຄຸມ 89,3%, ພາກວິສາຫະກິດປົກຄຸມ 31%, ປ້ອງກັນຊາດປ້ອງກັນຄວາມສະຫງົບ 0,8%, ລັດຖະກອນ 8,8%.

ໃນ 6 ເດືອນຜ່ານມາມີຜູ້ປະກັນຕົນສົມທົບທັງໝົດມີ 91.670 ຄົນ ເປັນເງິນ 888 ລ້ານກວ່າກີບ, ສັດສ່ວນການປິ່ນປົວເສຍຄ່າ ແລະ ບໍ່ເສຍຄ່າຂອງໂຮງໝໍແຂວງ ແລະ ໂຮງໝໍຊຸມຊົນ ເຄິ່ງປີຜ່ານມາ ບໍ່ເສຍຄ່າ 8 ຕື້ 618 ລ້ານກວ່າກີບ ເທົ່າກັບ 74%, ເສຍຄ່າ 2 ຕື້ 990 ລ້ານກວ່າກີບ ເທົ່າກັບ 2,6%, ມີໂຕເລກປິ່ນປົວຂ້າມເຂດທັງໝົດ 2.232 ຄົນ ແລະ ສົ່ງຕໍ່ 491 ຄົນ.

ຂ່າວ: ບຸນທີ.

ຜົນສໍາເລັດກອງປະຊຸມໃຫຍ່ຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI

ກອງປະຊຸມໃຫ່ຍຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI ໄດ້ອັດລົງດ້ວຍຜົນສໍາເລັດອັນຈົບງາມໃນຕອນບ່າຍວັນທີ 6 ຕຸລາ 2020, ທີ່ສະໂມສອນແຂວງ ພາຍ ຫລັງດຳເນີນມາເປັນເວລາ 2 ວັນ ພາຍໃຕ້ການເປັນປະ ທານຂອງ ສະຫາຍ ບົວຄົງ ນາມມະວົງ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍ່ແກ້ວ

ໂດຍການເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການ ເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ມີຜູ້ແທນສົມບູນຈຳນວນ 223 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງ 9.191 ສະຫາຍ ພ້ອມດ້ວຍແຂກຖືກເຊີນເຂົ້າຮ່ວມ.

ຕະຫລອດໄລຍະ 2 ວັນ ຜູ້ແທນກອງປະຊຸມໄດ້ຮັບຮອງເອົາບົດລາຍງານການເມືອງຂອງຄະນະບໍລິຫານງານພັກແຂວງສະ ໄໝທີ 5 ໃນໄລຍະ 5 ປີຜ່ານມາກໍ່ຄືການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ 5 ອົງຄະນະພັກແຂວງ, ຮັບຮອງເອົາແຜນພັດທະນາເສດຖະກິດສັງຄົມ 5 ປີ ຄັ້ງທີ 9 ນັບແຕ່ 2021 ຫາ 2025 ຊື່ງເປັນບາດລ້ຽວໃໝ່ການຫັນປ່ຽນໂຄງສ້າງເສດຖະກິດຈາກການຜະລິດແບບດັ້ງເດີມໄປສູ່ໂຄງການສ້າງເສດຖະກິດໃໝ່ທີ່ມີຄຸນນະພາບສູງ ໄປຕາມທິດສີຂຽວ ແລະຍືນຍົງ ເພື່ອເປັນພື້ນຖານອັນໜັກແໜ້ນໃຫ້ແກ່ການນໍາພາແຂວງບໍ່ແກ້ວ ແນໃສ່ເຮັດໃຫ້ປະຊາຊົນຫລຸດພົ້ນຈາກຄວາມທຸກຍາກ, ບັນລຸເປົ້າ ໝາຍການພັດທະນາແບບຍືນຍົງໃນປີ 2030.

ກອງປະຊຸມໃຫຍ່ຜູ້ແທນອົງຄະນະພັກແຂວງບໍ່ແກ້ວ ຄັ້ງທີ VI ຍັງໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານພັກແຂວງຊູດທີ VI ຈຳນວນ 31 ສະຫາຍ ຍິງ 4 ສະຫາຍ ໃນຈຳນວນຜູ້ລົງສະໝັກທັງໝົດ 36 ສະຫາຍ, ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກແຂວງບໍ່ແກ້ວ ຄັ້ງທີ VI ໄດ້ເລືອກເອົາຄະນະປະຈໍາພັກແຂວງຈໍານວນ 9 ສະຫາຍ ໂດຍເຫັນດີເປັນເອກະພາບເລືອກເອົາ ສະຫາຍ ບົວຄົງ ນາມມະວົງ ເປັນເລຂາຄະນະບໍລິຫານງານພັກແຂວງ, ສະຫາຍ ຈອມສີ ລັດຕະນະປັນ ແລະ ສະຫາຍ ເພັງສອນ ແກ້ວວິໄລ ເປັນຮອງເລຂາ ເລືອກເອົາສະຫາຍ ສຸກຂະ ຫລຽນທອງຄຳ ເປັນປະທານກວດກາພັກແຂວງ, ສະຫາຍ ເປົາແກ້ວ ພູມສະຫວັນ, ສະຫາຍ ນາງ ສຸ່ງ ແກ້ວໂພໄຊ ແລະ ສະຫາຍ ໜໍ່ຄຳ ນົງສຸວັນ ເປັນຮອງປະທານກວດກາພັກແຂວງ. ນອກຈາກນີ້ກອງປະຊຸມຍັງໄດ້ປ່ອນບັດເລືອກຕັ້ງເອົາຜູ້ ແທນສົມບູນ 14 ສະຫາຍ ຍິງ 2 ສະຫາຍ ແລະ ສຳຮອງ 2 ສະ ຫາຍໄປຮ່ວມກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ.

ກອງປະຊຸມຄັ້ງນີ້ ຍັງໄດ້ຮັບຟັງການໂອ້ລົມຈາກ ສະຫາຍ ບຸນທອງ ຈິດມະນີ ກຳມະການກົມການ ເມືອງສູນກາງພັກ ຄະນະເລຂາທິການສູນກາງພັກ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ເພື່ອເປັນທິດຊີ້ນໍາໃຫ້ຜູ້ແທນກອງປະຊຸມກໍ່ຄືຄະນະບໍລິຫານງານພັກແຂວງຊຸດໃໝ່ ນໍາໄປຈັດຕັ້ງປະຕິບັດ ແລະຜັນຂະຫຍາຍມະຕິກອງປະຊຸມຄັ້ງ ນີ້ໃຫ້ປະກົດຜົນເປັນຈິງ ເພື່ອນໍາເອົາແຂວງບໍ່ແກ້ວກ້າວຂື້ນຢ່າງບໍ່ຢຸດຢັ້ງຕາມອຸດົມ ການ ແລະຈຸດໝາຍຂອງພັກທີ່ໄດ້ກຳນົດໄວ້.

Cr: ຈັນທະສອນ ສີຫານາດ

ນະຄອນຫຼວງວຽງຈັນ: ລາຍງານຈາກພາກສະໜາມ ປະຕິບັດການຄົ້ນຫາ #ພໍ່ຕູ້ພວງຫຼົງປ່າ ຮອດເວລາ 18:30 ວັນທີ່ 6 ຕຸລາ 2020 ເປັນມື້ທີ່ 4 ຂອງຄວາມພະຍາຍາມຂອງລູກຫຼານ, ເຈົ້າໜ້າທີ່ ແລະ ຫຼາຍພາກສ່ວນ ແຕ່ຍັງໄຮ້ວີແວວ ຜູ່ສູນຫາຍ.

ການຄົ້ນຫາມື້ນີ້ແມ່ນໄດ້ໃຊ້ໝາດົມກິ່ນຫຼາຍໂຕ ຍ່າງຄົ້ນຫາຫຼາຍໜ່ວຍພູ ຈາກຈຸດທີ່ພົບເຫັນພໍ່ຕູ້ຫຼ້າສຸດ ກ່ອນສູນຫາຍ.

ນອກຈາກ ບັນດາເຈົ້າໜ້າທີ່ ແລະ ອາສາກູ້ໄພ ທີ່ໄດ້ເຂົ້າມາຊອກຫາພໍ່ຕູ້ພວງ, ນໍ້າໃຈຈາກຫຼາຍກໍ່ໄດ້ແບ່ງເບົາສົ່ງຍື່ນ ອາຫານການກິນ ແກ່ທີມງານຄົ້ນຫາ. ກໍ່ສະແດງຄວາມຊົມເຊີຍທຸກທ່ານທີ່ຮ່ວມຊ່ວຍເຫຼືອໃນຄັ້ງນີ້.

.

ມື້ອື່ນ 7/10/2020 ກໍ່ຈະສືບຕໍ່ຄົ້ນຫາພໍ່ຕູ້ຈົນກວ່າຈະພົບ. ເປັນກໍາລັງໃຈແກ່ທຸກພາກສ່ວນ.

ສະຫຼຸບຫຍໍ້

ຂໍ້ມູນເພີ້ມເຕີມກ່ຽວກັບການສູນຫາຍຂອງພໍ່ຕູ້ພວງ ອາຍຸ 95 ປີ ລາຍລະອຽດດັ່ງນີ້:-

ວັນທີ 03/10/2020 ພໍ່ຕູ້ພວງ ອາຍຸ 95 ປີ, ພ້ອມດ້ວຍຫຼານ 2 ຄົນ ອາຍຸ 32 ປີ ( ເປັນຫຼານສາວ ແລະ ຫຼານເຂີຍ ), ເຫຼນ3 ຄົນ ອາຍຸ 12 ປີ, 9 ປີ ແລະ 5 ປີ ຕາມລຳດັບ ລວມແລ້ວມານຳກັນທັງໝົດ 6 ຄົນ, ໃດ້ມາເຖິງສູນຂໍ້ມູນຂອງສະຖານທີ່ທ່ອງທ່ຽວນໍ້າປຽນຢໍລະປ່າເວລາ 12:15 ( ຂໍ້ມູນຈາກຫຼານເຂີຍ )

– ເວລາ 12:30 ທັງ 6 ຄົນໃດ້ໄປຮອດເຂດຮ້ານອາຫານ ( ເຂດປິກນິກ ແລະ ສວນນໍ້າ ), ແລ້ວໃຫ້ພໍ່ຕູ້ອາຍຸ 95 ປີ ກັບເຫຼນອາຍຸ 12 ປີລໍຖ້າຢູ່ເຂດຮ້ານອາຫານ ສ່ວນທີ່ເຫຼືອແມ່ນໃດ້ໄປຫຼິ່ນກິດຈະກຳ ( ຂໍ້ມູນຈາກຫຼານເຂີຍ )

– ເວລາ 13:12 ນາທີ ເຫັນພໍ່ຕູ້ລົງໄປຢ່າງຂົວອູເພື່ອຂ້າມນໍ້າໄປຫາເຂດຕູບປິກນິກ ເຊິ່ງເຂດດັ່ງກ່າວຈະມີປ່າດົງຕຶບໜາ ແລະ ເຊື່ອມຕໍ່ກັບປ່າສະຫງວນທີ່ກວາງໃຫຍ່ ເຊິ່ງເປັນຄັ່ງສຸດທ້າຍທີ່ເຫັນພໍ່ຕູ້ຢູ່ໃນເຂດສະຖານທີ່ທ່ອງທ່ຽວນໍ້າປຽນຢໍລະປ່າ ( ຂໍ້ມູນຈາກກ້ອງວົງຈອນປິດ ).

– ເວລາ 14:15 ຫຼານ ແລະ ເຫຼນ 4 ຄົນທີ່ໄປຫຼິນກິດຈະກຳໃດ້ກັບມາຮອດຮ້ານອາຫານ ແລ້ວພົບເຫັນແຕ່ເຫຼນອາຍຸ 12 ປີນັ່ງຢູ່ຄົນດຽວບໍ່ເຫັນພໍ່ຕູ້ ຜູ້ເປັນຫຼານເຂີຍຈຶ່ງໃດ້ແຈ້ງພະງານຂອງນໍ້າປຽນຢໍລະປ່າ

– ຫຼັງຈາກນັ້ນຍາດພີ່ນ້ອງ, ພະນັກງານສະຖານທີ່ທ່ອງທ່ຽວ, ເຈົ້າໜ້າທີ່ທະຫານ-ຕຳຫຼວດ ອຳນາດການປົກຄອງຂອງເມືອງປາກງຶ່ມ ແລະ ໜ່ວຍກູ່ໄພ 200 ກວາຄົນໃດ້ລະດົມກັນຊອກຫາທັງເວັນທັງຄືນຕາມປ່າເຂດໄກ່ຄຽງແຕ່ຈົນມາຮອດປະຈຸບັນຍັງບໍ່ພົບເຫັນພໍ່ຕູ້ເທື່ອ

– ຊ່ວງເວລາປະມານ 15:00 ຫາ 16:00 ຂອງວັນທີ 03/10/2020 ມີປະຊາຊົນພົບເຫັນພໍ່ຕູ້ຢູ່ນອກເຂດສະຖານທີ່ທ່ອງທຽວນໍ້າປຽນຢໍລະປ່າ ເຊິ່ງນັງຢູ່ຕູບແຄມທາງໃຫຍ່ ຕິດກັບທາງແຍກທີ່ຈະເຂົ້າໄປຫານໍ້າປຽນຢໍລະປ່າ ( ຂໍ້ມູນຈາກປະຊາຊົນທີ່ພົບເຫັນໃດ້ແຈ້ງບອກລູກຫຼານຂອງພໍ່ຕູ້ໃນມື້ຕໍ່ມາ ແຈ້ງວັນທີ 4/10/2020 )

– ມາຮອດປະຈຸບັນ (5/10/2020) ຍັງບໍ່ທັນພົບເຫັນພໍ່ຕູ້ເທື່ອ ແຕ່ທີມຄົ້ນຫາກໍ່ຍັງສືບຕໍ່ຄົ້ນຫາຢູ່ ຖ້າທ່ານໃດພົບເຫັນພໍ່ຕູ້ເຊິ່ງໃສ່ຊຸດຕາມຮູບທີ່ໂພດລົງນີ້ ຊ່ວຍແຈ້ງລູກຫຼານເພີ່ນແນ່ເບີ: 02054700555.

ຂ່າວກ່ອນໜ້ານີ້

ນະຄອນຫຼວງວຽງຈັນ: ການຄົ້ນຫາ ພໍ່ຕູ້ພວງຫຼົງປ່າ ໃນເຊົ້າວັນທີ 6 ຕຸລາ 2020 ເປັນມື້ທີ 4 ຂອງປະຕິບັດການຄົ້ນຫາ. ເຊິ່ງທາງເຈົ້າໜ້າທີ່ຫຼາຍພາກສ່ວນ ປະກອບມີ ທະຫານ, ຕໍາຫຼວດ, ກູ້ໄພ, ກອງຫຼອນ ແລະ ເຈົ້າໜ້າທີ່ ແຫຼ່ງທ່ອງທ່ຽວ ນໍ້າປຽນຢໍລະປາ. ຕ່າງກໍ່ໄດ້ສຸມທຸກເຮື່ອແຮງ ແລະ ຄວາມພະຍາຍາມຄົ້ນຫາ.

ນອກຈາກ ການໃຊ້ກໍາລັງຄົນພາກພື້ນດິນແລ້ວ ຍັງໄດ້ໃຊ້ ໂດຣນຈັບຄື້ນຄວາມຮ້ອນບິນຄົ້ນຫາ ໃນຕອນຄືນ, ແຕ່ກໍ່ຍັງບໍ່ສາມາດຄົ້ນຫາ ຜູ່ສູນຫາຍ.

ເຊົ້າມື້ນີ້ ການຄົ້ນຫາ ໄດ້ເລີ່ມແຕ່ເຊົ້າ ໂດຍໄດ້ເສີມກໍາລັງພາກພື້ນດິນ, ໝາດົມກິ່ນ ແລະ ພົນທະຫານ ຕໍາຫຼວດ ພິເສດ ຈໍານວນຫຼາຍ. ໂດຍຫວັງຈະໃຫ້ພົບພໍ່ຕູ້ໃຫ້ໄດ້ໃນມື້ນີ້.

ເປັນກໍາລັງໃຈໃຫ້ທຸກພາກສ່ວນ ທີ່ຮ່ວມຄົ້ນຫາ ພໍ່ຕູ້ພວງຫຼົງປ່າ ໃນຄັ້ງນີ້.

.

ຂ່າວກ່ອນໜ້ານີ້

ນະຄອນຫຼວງວຽງຈັນ: ລາຍງານຈາກທີມງານຄົ້ນຫາພໍ່ຕູ້ພວງ ອາຍຸ 95 ປີ ທີ່ຫຼົງປ່າ ຢູ່ແຫ່ງທ່ອງທ່ຽວ ນໍ້າປຽນຢໍລະປາ ແຕ່ບ່າວວັນທີ່ 3 ຕຸລາ 2020. ຫຼ້າສຸດ ເວລາ 16:30 ວັນທີ່ 5 ຕຸລາ 2020 ຍັງບໍ່ພົບພໍ່ຕູ້.

ໜ່ວຍກູ້ໄພ ສົມທົບກັບເຈົ້າໜ້າທີ່ ແລະ ພະນັກງານຂອງ ສະຖານທີ່ທ່ອງທ່ຽວນໍ້າປຽນຢໍລະປ່າ ຍັງສືບຕໍ່ຊອກຄົ້ນຫາພໍ່ຮູ້ພວງ ດ້ວຍຄວາມຫວັງ ແລະ ຂໍພອນສິ່ງສັກສິດຄຸ້ມຄອງ ແລະ ພົບເຫັນພໍ່ຕູ້ໂດຍໄວ.(ໂດຍມາຮອດເວລາ 16:30 ໂມງ ຂອງວັນທີ 5 ຕຸລາ 2020 ຍັງບໍ່ພົບເຫັນເທື່ອ)

ຕາມຂໍ້ມູນຈາກເພຈສະຖານທີ່ທ່ອງທ່ຽວນໍ້າປຽນຢໍລະປາ(Nam Pien Yorla Pa) ໃຫ້ຮູ້ວ່າ: ວັນເສົາທີ 03/10/2020 ເວລາ 14:00ໂມງ ມີພໍ່ຕູ້ອາຍຸ 95 ປີ ລູກຫຼານພາມາທ່ຽວນໍ້າປຽນຢໍລະປ່າ ເມືອງໄຊທານີ ນະຄອນຫຼວງວຽງຈັນ; ລູກຫຼານຈຳນວນໜຶ່ງໃດ້ໄປຫຼິນກິດຈະກຳແລ້ວໃຫ້ພໍ່ຕູ້ລໍຖ້າຢູ່ເຂດຮ້ານອາຫານກັບຫຼານນ້ອຍອາຍຸ 12 ປີ ແຕ່ຍ້ອນຄົນຫຼາຍ ແລະ ພື້ນທີ່ປ່າກວາງຂວາງຈຶ່ງເຮັດໃຫ້ພໍ່ຕູ້ຫຼົງທາງຍ່າງໄປໃສບໍ່ຮູ້ຊອກບໍ່ເຫັນ ພະນັກງານເຮົາໄດ້ພະຍາຍາມຊ່ວຍຊອກເຕັມທີ່ແລ້ວແຕ່ຮອດປະຈຸບັນຍັງບໍ່ເຫັນເທື່ອ ຖ້າທ່ານໃດພົບເຫັນພໍ່ຕູ້ໃນຮູບຊ່ວຍແຈ້ງລູກຫຼານເພີ່ນຕາມເບີ: 02054700555.

.

.

ຂ່າວກ່ອນໜ້ານີ້

ນະຄອນຫຼວງວຽງຈັນ: ຈາກກໍລະນີ ພໍ່ຕູ້ພວງ ອາຍຸ 95 ປີ ໄດ້ຫາຍໄປ ໃນເວລາ 14:00 ວັນທີ່ 3/10/2020 ທີ່ແຫ່ງທ່ອງທ່ຽວ ນໍ້າປ່ຽນຢໍລະປາ ເມືອງໄຊທານີ ນະຄອນຫຼວງວຽງຈັນ.

ທາງພີ່ນ້ອງ ແລະ ເຈົ້າໜ້າທີ່ກ່ຽວຂ້ອງ ຫຼາຍກວ່າ 200 ຄົນ ໄດ້ອອກຄົ້ນຫາ ພໍ່ຕູ້ຕາມປ່າດົງ. ຈົນຮອດແລງ ວັນທີ່ 4/10/2020 ກໍ່ຍັງບໍ່ພົບ.

ມີຂໍ້ມູນເພີ່ມເຕີມຈາກປະຊາຊົນວ່າ ພໍ່ຕູ້ ມານັ່ງລັດຂຶ້ນລົດແຖວປ່າກ້ວຍ ຂ້າງນໍ້າປຽນຢໍລະປາ.

ວອນທຸກຄົນເປັນກະບອກສຽງຊ່ວຍເຫຼືອ ພ້ອມເປັນຫູເປັນຕາຊ່ວຍກັນ ຫາກພົບເບາະແສ ຫຼື ມີຂໍ້ມູນກ່ຽວຂ້ອງກັບພໍ່ຕູ້ ໃຫ້ແຈ້ງ 2 ເບີນີ້ໂດຍໄວ 020 7774 5678;  020 5470 0555.

ຂ່າວກ່ອນໜ້ານີ້

ພໍ່ເຖົ້າຂອງພວກຂ້າພະເຈົ້າຊື່ ພໍ່ຕູ້ພວງ ອາຍຸ 95 ປີ ລູກຫລານພາໄປທ່ຽວນ້ຳປ່ຽນຢໍລະປາ ໄດ້ຫລົງຍ່າງໄປທາງໃດບໍ່ຮູ້,​ບໍ່ເຫັນ ແຕ່ 2 ໂມງແລງຂອງວັນທີ 3/10/2020 ມມາເຖີງດຽວນີ້ຍັງບໍ່ພົບເຫັນ

ຖ້າທ່ານໃດພົບເຫັນ ຂໍຄວາມກະລູຸນາ ຕິດຕໍ່ຫາເບີຂອງຂ້າພະເຈົ້າດ້ວຍ🙏 020 55696948,

.

.

ພິທີມອບ-ຮັບ ທຸງໄຊນໍາໜ້າຂະບວນການແຂ່ງຂັນ 4 ບຸກ ຂອງຄະນະບໍລິຫານງານຊາວໜຸ່ມແຂວງຄໍາມ່ວນ ໄດ້ເປີດຂຶ້ນຢ່າງເປັນທາງການ ໃນວັນທີ 6 ຕຸລາ 2020 ນີ້, ທີ່ສະໂມສອນໃຫຍ່ຂອງແຂວງ ໂດຍພາຍໃຕ້ການເປັນປະທານຂອງ ສະຫາຍ ສາຍຄໍາ ພະໄຊສິດທິເດດ ເລຂາຄະນະບໍລິຫານງານຊາວໜຸ່ມແຂວງຄໍາມ່ວນ ເປັນກຽດເຂົ້າຮ່ວມຂອງ ສະຫາຍ ໂອໄດ ສຸດາພອນ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຄໍາມ່ວນ.

ສະຫາຍ ສາຍຄໍາ ພະໄຊສິດທິເດດ ເລຂາຄະນະບໍລິ ຫານງານຊາວໜຸ່ມແຂວງໄດ້ຂຶ້ນຜ່ານບົດສະຫຼຸບໃນການຈັດຕັ້ງປະຕິບັດຂະບວນການແຂ່ງຂັນໃນໄລະຍະ 1 ປີຜ່ານມາ ສົກປີ 2018-2019 ໃນການຜັນຂະຫຍາຍບົດແນະນຳ 421/ລຂ ໃນການປະຕິບັດຂໍ້ແຂ່ງຂັນ 4 ບຸກ ຕາມ 4 ເນື້ອໃນ 9 ມາດຖານ ໃນການປະກາດຮັບຮອງເປັນແຂວງຄະນະຊາວໜຸ່ມ ປປລ 4 ບຸກ ເຫັນໄດ້ວ່າຕາມການປະເມີນສາມາດປະຕິບັດໄດ້ຕາມເງື່ອນໄຂ ແລະ ມາດຖານທີ່ກຳນົດໄວ້.

ຈາກນັ້ນ, ໄດ້ຜ່ານຂໍ້ຕົກລົງຂອງທ່ານເລຂາຄະນະບໍລິ ຫານງານຊາວໜຸ່ມແຂວງຄໍາມ່ວນ ວ່າດ້ວຍການຮັບຮອງ 10 ຕົວເມືອງທົ່ວແຂວງ ເປັນເມືອງ 3 ດີ 4 ຮູ້ ຂອງເຍົາວະ ຊົນລາວ ເປັນກຽດມອບໃບຢັ້ງຢືນໂດຍ ສະຫາຍ ສາຍຄໍາ ພະໄຊສິດທິເດດ ເລຂາຄະນະບໍລິຫານງານຊາວໜຸ່ມແຂວງ; ພ້ອມກັນນັ້ນ ກໍ່ໄດ້ຜ່ານຂໍ້ຕົກລົງຂອງ ເລຂາຄະນະບໍລິຫານງານສູນກາງ ຊປປລ ວ່າດ້ວຍການມອບໃບຢັ້ງຢືນ 4 ບຸກ ໃຫ້ຄະນະບໍລິຫານງານຊາວໜຸ່ມແຂວງຄໍາມ່ວນ ເປັນແຂວງ 4 ບຸກ ປີທີ III ເຊີ່ງເປັນກຽດນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງ ຊປປລ

ໃນໂອກາດທີ່ທາງຄະນະບໍລິຫານງານສູນກາງຊາວໜຸ່ມ ປປລ ໄດ້ລົງມາປະກາດຮັບຮອງ ຄະນະຊາວໜຸ່ມແຂວງຄໍາມ່ວນ 4 ບຸກ ປີທີ III ໃນຄັ້ງນີ້ ຍັງໄດ້ມອບເຄື່ອງຊ່ວຍເຫຼືອ ໃຫ້ແກ່ ຄະນະບໍລິຫານງານຊາວໜຸ່ມແຂວງຄໍາມ່ວນ ເພື່ອຊຸກຍູ້ຊ່ວຍ ເຫຼືອເຂົ້າໃນຂະບວນການຕ່າງໆໃນທົ່ວແຂວງ ລວມມູນຄ່າ 4.840.000 ກີບ ມອບໂດຍ ນາງ ວິລະວອນ ພັນທະວົງ ຮອງເລຂາຄະນະບໍລິຫານງານສູນກາງ ຊປປລ.

Cr: ສື່ມວນຊົນຊາວຫນຸ່ມລາວ

ທ່ານເອກອັກຄະລັດຖະທູດ ປອ ປີເຕີ ເຮມ໋ອນ ໄດ້ເຂົ້າຮ່ວມສະເຫຼີມສະຫຼອງ ຜົນສໍາເລັດຂອງການບູລະນະປະຕິສັງຂອນວັດວິຊຸນທີ່ຫຼວງພະບາງ ແລະ ໄດ້ມອບໂຄງການບູລະນະທີ່ສໍາເລັດນີ້ໃຫ້ແກ່ລັດຖະບານແລະປະຊາຊົນຫຼວງພະບາງ ເຊິ່ງພິທີດັ່ງກ່າວໄດ້ຈັດຂຶ້ນທີ່ວັດວິຊຸນໃນວັນທີ 6 ຕຸລາ. ສະຖານທີ່ອັນສໍາຄັນທາງດ້ານປະຫວັດສາດແຫ່ງນີ້ແມ່ນໄດ້ຮັບການບູລະນະໂດຍທຶນຂອງ ລັດຖະບານສະຫະລັດອາເມລິກາ ພາຍໃຕ້ກອງທຶນທ່ານທູດເພື່ອການອະນຸລັກວັດທະນະທໍາ (AFCP) ລວມເປັນມູນຄ່າ 347,000 ໂດລ່າ.

ວັດແຫ່ງນີ້ແມ່ນໄດ້ສ້າງຂຶ້ນໃນສັດຕະວັດທີ່ 16 ໃນຍຸກພະເຈົ້າ ວິຊຸນນະລາດ, ເຊິ່ງເປັນໜຶ່ງໃນວັດທີ່ເກົ່າແກ່ທີ່ສຸດຢູ່ໃນຫລວງພະບາງ ແລະ ເປັນຈຸດສູນກາງແຫ່ງການຮຽນຮູ້ທາງດ້ານພຸດທະຊາດສະໜາ ແລະ ເປັນບ່ອນສຳລັບສັກກະລະບູຊາຫລາຍກວ່າ 500 ປີ. ກອງທຶນທ່ານທູດເພື່ອການອະນຸລັກວັດທະນະທໍາ AFCP ໄດ້ສົ່ງເສີມບັນດາເຂົ້າຫນ້າວຽກທີ່ໄດ້ແບ່ງເປັນສາມສ່ວນຂອງໂຄງການບູລະນະວັດຊຸນ ເຊິ່ງປະກອບມີສອງຈຸດໃຫຍ່ຂອງຕົວອາຄານວັດລວມທັງພະທາດໝາກໂມ.

ທ່ານເອກອັກຄະລັດຖະທູດ ເຮມ໋ອນ ກ່າວວ່າ: ນີ້ຖືເປັນກຽດຫຼາຍທີ່ພວກເຮົາໄດ້ສົ່ງເສີມໃນການບູລະນະ ແລະ ປົກປັກຮັກສາໜຶ່ງໃນສະຖານທີ່ອັນສໍາຄັນ ທາງດ້ານປະຫວັດສາດ ໃນທົ່ວ ສປປ ລາວ. ການຮ່ວມມືລະຫວ່າງສະຫະລັດອາເມລິກາ ກັບ ນະຄອນຫຼວງພະບາງ ໃນການບູລະນະວັດວິຊຸນ ຖືເປັນເຄື່ອງໝາຍແຫ່ງສາຍພົວພັນລະຫວ່າງສອງຊາດ ແລະ ຄວາມໝາຍໝັ້ນໃນການຊ່ວຍເຫຼືອປະຊາຊົນລາວ ໃນການປົກປັກຮັກສາຮີດຄອງອັນລໍ້າຄ່າ.

ນັບຕັ້ງແຕ່ ປີ 2001, ລັດຖະບານສະຫະລັດອາເມລິກາ ໄດ້ປະກອບສ່ວນຫຼາຍກວ່າ 1 ລ້ານໂດລາ ເພື່ອເປັນການປົກປັກຮັກສາມໍລະດົກທາງດ້ານວັດທະນະທໍາໃນ ສປປ ລາວ ໂດຍການນຳໃຊ້ກອງທຶນທ່ານທູດເພື່ອການອະນຸລັກວັດທະນະທໍາ. ທຶນດັ່ງກ່າວໄດ້ໃຫ້ການສະໜັບສະໜູນລວມທັງໝົດ 20 ໂຄງການ ເຊິ່ງລວມທັງການປະຕິສັງຂອນວັດວາອາຮາມອັນສັກສິດ, ການປົກປັກຮັກສາມໍລະດົກ ແລະ ວັດຖຸບູຮານພ້ອມທັງການບັນທຶກວັດທະນະທຳຮີດຄອງປະເພນີລວມໄປເຖິງການປົກປັກຮັກສາຫໍສະມຸດ.

ຈົນມາເຖິງປະຈຸບັນການບູລະນະວັດຊຽງທອງ ຢູ່ຫຼວງພະບາງ ຖືເປັນໂຄງການໃຫຍ່ທີ່ສຸດເຊິ່ງໄດ້ດຳເນີນການເປັນເວລາ 3 ປີໂດຍໄດ້ຮັບການຊ່ວຍເຫຼືອຫຼາຍກວ່າ 650,000 ໂດລາ.

ທ່ານເອກອັກຄະລັດຖະທູດ ເຮມ໋ອນ ໄດ້ກ່າວເພີ່ມອິກວ່າ: ໂຄງການນີ້ໄດ້ຊ່ວຍໃຫ້ປະຊາຊົນລາວ ມີສ່ວນຮ່ວມຫຼາຍຂຶ້ນ ທາງດ້ານວັດທະນະທໍາ ແລະ ທາງປະຫວັດສາດ ພ້ອມທັງຊ່ວຍໃຫ້ຄົນທົ່ວໂລກມີຄວາມເພິ່ງພໍໃຈກັບຄວາມງາມ ແລະ ຄວາມເປັນເອກະລັກທາງດ້ານຮີດຄອງປະເພນີ ຂອງ ສປປ ລາວ. ວຽກງານບູລະນະທີ່ພວກເຮົາເຮັດຈະມີສ່ວນຊ່ວຍທີ່ສໍາຄັນເພື່ອຮັບປະກັນວ່າວັດວິຊຸນ ອັນເປັນສະຖານທີ່ສໍາຄັນແຫ່ງນີ້ ຈະຢູ່ຄູ່ວັດທະນະທໍາ ແລະ ຈິດໃຈໃນອີກຫຼາຍປີຕໍ່ໜ້າ.

ນະຄອນຫຼວງລາຍງານ: ໃນວັນທີ 6/10/2020 ໄດ້ມີໂຈນກໍ່ເຫດລັກລົດຈັກຢູ່ໃນວັດສີເມືອງ ນະຄອນຫຼວງວຽງຈັນ

ປະຊາຊົນລາຍງານ: ເບິ່ງເປັນອຸທາຫອນເຕືອນສະຕິ! ໃຫ້ລະວັງກັນແນ່ເດີ້ທຸກຄົນ ຂະໜາດຢູ່ວັດແທ້ໆກໍຍັງກ້າລັກເອົາ ຍັງໂຊກດີທີ່ຈັບໄດ້ທັນຄັນຂ້ອຍ ບໍ່ເຫັນກັບອ້າຍຄົນຢູ່ວັດ ແລະ ຮປພ. ບໍ່ນຳຄືຊິບໍ່ທັນແທ້ໆ ມິດສາຊີບມາໄດ້ທຸກຮູບແບບ(ເຮັດຕິເປັນຄົນອາໄສວັດ)ຫວັງເອົາລົດຄົນອື່ນກໍມີທັງທີ່ ຄົນເຕັມວັດແທ້ໆ ຊ່າງກ້າເນາະ

ແຂວງວຽງຈັນ: ລາຍງານຈາກປະຊາຊົນ ໃຫ້ຮູ້ ໃນຕອນເຊົ້າ ວັນທີ 6 ຕຸລາ 2020 ເກີດເຫດ ສະຫຼົດໃຈ ປະຊາຊົນພົບຄົນກໍ່ເຫດຄາດຕະກໍາເດັກນ້ອຍ ແລະ ກິນອະໄວຍະຂອງເດັກ ທີ່ບ້ານນາເລົາ ເມືອງໂພນໂຮງ, ແຂວງວຽງຈັນ. ຜູ່ເສຍຊີວິດ ເປັນເດັກນ້ອຍ ຊົນເຜົ່າມົ້ງ ອາຍຸ 5 ປີ.

ທີ່ພົບເຫັນສົບ ມີຊາຍ (ສະຫງວນນາມ) ທີ່ເປັນຜູ່ຄາດຕະກໍາເດັກ ແລະ ເຊື້ອງສົບເດັກນ້ອຍໄວ້. ສະພາບສົບແມ່ນຖືກຕັດແຂນ ແລະ ປາດທ້ອງເອົາອະໄວຍະວະ. ພ້ອມທັງພົບເຫັນ ຊິ້ນສ່ວນຂອງເດັກນ້ອຍ ຢູ່ກອງຂີ້ເຖົ້າ ບ່ອນດັງໄຟ.

.

ສາເຫດແລະແຮງຈູງໃຈຂອງການຄາດຕະກໍາເດັກນ້ອຍຄັ້ງນີ້ ຍັງບໍ່ທັນຮູ້.

ປະຈຸບັນ ຄະດີດັ່ງກ່າວ ຢູ່ໃນການກວດສອບຂອງເຈົ້າໜ້າທີ່ກ່ຽວຂ້ອງ, ມີລາຍລະອຽດເພີ່ມຈະແຈ້ງໃຫ້ຊາບຕື່ມພາຍຫຼັງ.

ປະຊາຊົນພາຍໃນບ້ານແສນອຸດົມ, ກຸ່ມຫ້ວຍຈຽມ, ເມືອງໄຊທານີ, ນະຄອນຫລວງວຽງຈັນ ໄດ້ຮັບຟັງການເຜີຍແຜ່ກ່ຽວກັບຜົນຮ້າຍ-ໄພອັນຕະລາຍຂອງຢາເສບຕິດໃນຕອນເຊົ້າວັນທີ 6 ຕຸລາ 2020 ທີ່ວັດບ້ານດັ່ງກ່າວ ໂດຍແມ່ນພະແນກກວດກາ ແລະ ຄວບຄຸມຢາເສບຕິດ, ກອງບັນຊາການປ້ອງກັນຄວາມສະຫງົບນະຄອນຫລວງວຽງຈັນ ໄປເຜີຍແຜ່.

ຈຸດປະສົງຂອງການເຜີຍແຜ່ຄັ້ງນີ້ເພື່ອເຮັດໃຫ້ປະຊາຊົນພາຍໃນບ້ານມີສະຕິເຄົາລົບກົດຫມາຍ, ຮູ້ໄດ້ເຖີງຜົນຮ້າຍ-ໄພອັນຕະລາຍຂອງຢາເສບຕິດ ແລະ ວິທີປ້ອງກັນ, ເຮັດໃຫ້ທຸກຄົນພາຍໃນບ້ານມີສ່ວນຮ່ວມເຂົ້າໃນວຽກງານປ້ອງກັນ ແລະ ແກ້ໄຂຢາເສບຕິດ ເພື່ອແນໃສ່ສ້າງບ້ານແສນອຸດົມ ໃຫ້ເປັນບ້ານປອດຢາເສບຕິດໃນຕໍ່ຫນ້າ, ທັງເປັນການປະກອບສ່ວນເຮັດໃຫ້ບັນຫາຢາເສບຕິດໃນສັງຄົມ ກໍຄື ຢູ່ນະຄອນຫລວງວຽງຈັນ ນັບມື້ຫລຸດລົງ.

ເອກະສານທີ່ນໍາໄປເຜີຍແຜ່ຄັ້ງນີ້ລວມມີ: ເອກະສານກ່ຽວກັບຜົນຮ້າຍ-ໄພອັນຕະລາຍຂອງຢາເສບຕິດ, ກົດຫມາຍວ່າດ້ວຍຢາເສບຕິດ ແລະບາງມາດຕາຂອງກົດຫມາຍອາຍາ ແລະ ສາລະຄະດີກ່ຽວກັບຜົນຮ້າຍ-ໄພອັນຕະລາຍຂອງຢາເສບຕິດ ໂດຍມີ ພັນຕີ ສີຕານ ສີວິໄລ ຫົວຫນ້າຫນ່ວຍງານໂຄສະນາ, ພະແນກກວດກາ ແລະ ຄວບຄຸມຢາເສບຕິດ, ກອງບັນຊາການ ປກສ ນະຄອນຫລວງວຽງຈັນ ແລະ ພັນໂທ ສົມບັດ ລັດຈະເລີນ ຮອງພະແນກໂຄສະນາ, ຫ້ອງການກວດກາ ແລະ ຄວບຄຸມຢາເສບຕິດ, ກົມໃຫຍ່ຕໍາຫລວດ, ກະຊວງປ້ອງກັນຄວາມສະຫງົບ ຜັດປ່ຽນກັນເຜີຍແຜ່.

ສໍາລັບການເຄື່ອນໄຫວເຜີຍແຜ່ຜົນຮ້າຍ-ໄພອັນຕະລາຍຂອງຢາເສບຕິດຂອງພະແນກກວດກາ ແລະ ຄວບ ຄຸມຢາເສບຕິດ, ກອງບັນຊາການ ປກສ ນະຄອນຫລວງວຽງຈັນ ຄັ້ງນີ້ ແມ່ນກິດຈະກຳຫນຶ່ງເພື່ອສະເຫລີມສະຫລອງວັນແຫ່ງຊາດຕ້ານຢາເສບຕິດ ວັນທີ 12 ຕຸລາ ຄົບຮອບ 19 ປີ ທີ່ຈະມາເຖີງນີ້. ນອກຈາກເຜີຍແຜ່ຢູ່ເມືອງໄຊທານີ ໃນຄັ້ງນີ້, ພະແນກດັ່ງກ່າວຍັງຈະໄປເຜີຍແຜ່ກ່ຽວກັບຜົນຮ້າຍ-ໄພອັນຕະລາຍຂອງຢາເສບຕິດຢູ່ເມືອງຫາດຊາຍຟອງ ແລະ ເມືອງຈັນທະບູລີ, ນະຄອນຫລວງວຽງຈັນ ຕື່ມອີກ.

Cr: ບຸນຕຽງ ຈັນທະວົງ

ແຂວງວຽງຈັນ: ລາຍງານຈາກປະຊາຊົນໃຫ້ຮູ້ວ່າ ໃນວັນທີ 6/10/2020 ມີຄວາມຄືບໜ້າຂອງການສ້ອມແປງ, ປະກອບ ແລະ ຕິດຕັ້ງ ຂົວເຫລັກນ້ຳພະນາຍ ຈຸດບ້ານເກີນກາງ, ເມືອງທຸລະຄົມ, ແຂວງວຽງຈັນ. ທີ່ຫັກໃນວັນທີ່ 2/6/2020 ຜ່ານມາ.

ຕາມການລາຍງານຂອງວິຊາການຂອງບໍລິສັດຂົວທາງແຂວງວຽງຈັນ ແມ່ນຈະໃຫ້ສຳເລັດແລະ ນຳໃຊ້ໄດ້ໃນທ້າຍເດືອນຕຸລາ 2020, ເຊິ່ງຂົວດັ່ງກ່າວຈະຂະຫຍາຍກວ້າງອອກກວ່າຂົວເກົ່າ ເບືິ້ອງລະ 50 ຊັງຕີແມັດ ເພື່ອເປັນທາງໃຫ້ຄົນຍ່າງ.

.

.

ກອງປະຊຸມໃຫຍ່ຄັ້ງທີ XI ຂອງຜູ້ແທນອົງຄະນະພັກແຂວງ ຜົ້ງສາລີ ໄຂຂຶ້ນວັນທີ 5 ຕຸລາ 2020 ໂດຍໃຫ້ກຽດເຂົ້າຮ່ວມຂອງສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກລັດຖະມົນຕີກະຊວງປ້ອງກັນປະເທດ, ມີຕາງໜ້າຫ້ອງວ່າການສູນກາງພັກ, ພ້ອມດ້ວຍຜູ້ແທນສົມບູນ 286 ສະຫາຍ, ຍິງ 39 ສະຫາຍທີ່ເປັນຕົວແທນໃຫ້ສະມາຊິກພັກ ໃນທົ່ວແຂວງ 12.566 ສະຫາຍ, ຍິງ3.741 ສະຫາຍ ແລະ ແຂກຖືກເຊີນເຂົ້າຮ່ວມ.

ສະຫາຍ ຄຳຜອຍ ວັນນະສານ ຮັກສາການເລຂາພັກແຂວງ ເຈົ້າແຂວງຜົ້ງສາລີ ໄດ້ກ່າວໄຂກອງປະຊຸມ ພ້ອມທັງຜ່ານບົດລາຍງານການເມືອງເສດຖະກິດ, ວັດທະນາທຳ-ສັງຄົມ 5 ປີຜ່ານມາ ໃນການຍົກສູງຄວາມສາມາດນໍາພາ ແລະ ເປັນແບບຢ່າງນໍາໜ້າຂອງອົງຄະນະພັກ, ໃນການຂຸດຄົ້ນ ແລະ ເສີມຂະຫຍາຍຄວາມອາດສາມາດບົ່ມຊ້ອນ ແລະ ກຳລັງແຮງສັງລວມ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາ ຕາມແນວທາງປ່ຽນແປງໃໝ່ຂອງພັກ, ເຮັດໃຫ້ສະຖຽນລະພາບທາງດ້ານການເມືອງ, ເສດຖະກິດ, ວັດທະນາທຳ-ສັງຄົມຂອງແຂວງນັບມື້ນັບໜັກແໜ້ນ, ເຂັ້ມແຂງ ແລະ ໄດ້ຮັບການພັດທະນາຕໍ່ເນື່ອງ, ມີຄວາມຍືນຍົງ, ຕາມທິດສີຂຽວກ້າວສູ່ທັນສະໄໝ ແລະ ຍຸຕິທຳ”.

ສະຫາຍ ຄໍາຜອຍ ວັນນະສານ ໄດ້ຍົກໃຫ້ເຫັນຜົນສຳ ເລັດຕະຫຼອດໄລຍະ 5 ປີ ແຫ່ງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ, ພາຍໃຕ້ການຊີ້ນຳ-ນຳພາຂອງຄະນະບໍລິຫານງານພັກແຂວງ ແລະ ຄະນະພັກທຸກຂັ້ນບວກກັບຄວາມສາມັກຄີເປັນເອກະພາບ, ຄວາມຕັ້ງໜ້າບຸກບືນ ແລະ ການເຊີດຊູນໍ້າໃຈເປັນເຈົ້າຂອງສະມາ ຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າເຮັດໃຫ້ທົ່ວແຂວງມີສະຖຽນລະພາບທາງດ້ານການເມືອງອັນໜັກແໜ້ນ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດີຂຶ້ນ, ປະກົດການຫຍໍ້ທໍ້ໃນສັງຄົມຫຼຸດລົງເປັນກ້າວໆ, ເຮັດໃຫ້ເສດຖະກິດຂອງແຂວງ ຜົ້ງສາລີສືບຕໍ່ຂະຫຍາຍຕົວຢ່າງຕໍ່ເນື່ອງຕາມທິດທີ່ກໍານົດໄວ້, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປົວແປງນັບມື້ນັນດີຂຶ້ນ, ມາເຖິງປັດຈຸບັນປະຊາຊົນຫຼາຍທ້ອງຖິ່ນ ໄດ້ດຳເນີນການປູກຝັງ-ລ້ຽງສັດຕາມເງື່ອນໄຂທ່າແຮງບົ່ມຊ້ອນ ແລະ ມູນເຊື້ອຂອງແຕ່ລະຄອບຄົວ, ດ້ວຍການນຳໃຊ້ເຕັກນິກວິຊາການໃໝ່, ໃນການປູກຝັງ-ລ້ຽງສັດ ເປັນຕົ້ນແມ່ນການປູກອ້ອຍເປັນສິນຄ້າ, ປູກຊາບູຮານ(ຊາ400ປີ), ການປູກຜັກປອດສານພິດ, ຕົ້ນໄມ້ອຸດສາຫະກໍາ ແລະ ຕົ້ນໄມ້ໃຫ້ໝາກປະເພດຕ່າງໆ, ດ້ານພື້ນຖານໂຄງລ່າງໄດ້ຮັບການປັບປຸງ ແລະ ສ້າງຂຶ້ນໃໝ່ຫຼາຍດ້ານໃນນີ້, ໄດ້ຍົກຍ້າຍສຳນັກງານປົກ ຄອງແຂວງມາຕັ້ງຢູ່ເມືອງບຸນເໜືອ ເຫັນວ່າການພັດທະນາເສດຖະກິດ-ວັດທະນະທຳ-ສັງຄົມ ຂະຫຍາຍຕົວເປັນກ້າວໆ, ຂົງເຂດປ້ອງກັນຊາດ-ປ້ອງກັນຄວາມສະຫງົບ ຕິດພັນກັບການພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ແລະ ການປະຕິບັດວຽການ 3 ສ້າງຂອງພັກໃນເຂດຈຸດສຸມຂອງແຂວງ, ເມືອງສາມາດສ້າງບ້ານປ້ອງກັນຊາດເຂັ້ມແຂງໄດ້ 150 ບ້ານ, ມີ12.757 ຄອບຄົວ, ບ້ານປ້ອງກັນຄວາມສະຫງົບດີ 40 ບ້ານ ມີ 4.896 ຄອບຄົວ, ສາມາດຕອບສະຫນອງໄດ້ຕໍ່ໜ້າທີ່ການເມືອງໄລຍະໃໝ່, ດ້ານການພັດທະນາເສດຖະກິດໄດ້ສຸມໃສ ກໍ່ສ້າງພື້ນຖານໂຄງລ່າງ ແລະ ແກ້ໄຂຄວາມທຸກຍາກຂອງແຂວງຢ່າງຕັ້ງໜ້າເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງໃນລະດັບສະເລ່ຍ 6,6% ຕໍ່ປີ, ລາຍຮັບສະເລ່ຍຕໍ່ຄົນໃນປີ 2020 ບັນລຸ 988 ໂດລາ ທຽບໃສ່ ປີ 2015 ແມ່ນເພີ່ມຂຶ້ນ 190 ໂດລາ ຊຶ່ງຜ່ານການປະເມີນປະຕິບັດວຽກງານ 3 ສ້າງໃນການເຕົ້າໂຮມບ້ານນ້ອຍໃຫ້ເປັນບ້ານໃຫຍ່ ແລະ ເຕົ້າໂຮມບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ແລະ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາຊຶ່ງຜ່ານການປະເມີນຕາມມາດຕະຖານຂອງດຳລັດ 309/ນຍ ເຫັນວ່າຍັງມີບ້ານທຸກຍາກ 329 ບ້ານກວມ 63,03%, ມີຄອບຄົວທຸກຍາກ 9.870 ຄອບຄົວກວມເອົາ 27,02%.

Cr: ຈາກນັກຂ່າວແຂວງຜົ້ງສາລີ