ມາຮອດປັດຈຸບັນ, ແຂວງຫລວງພະບາງ ຍັງບໍ່ສາມາດຜະລິດເຂົ້າກຸ້ມກິນໝົດປີເທື່ອ, ສະເລ່ຍເຂົ້າທີ່ຜະລິດໄດ້ໃສ່ຫົວຄົນພາຍໃນແຂວງໄດ້ຜູ້ລະ 200 ກ່ວາກິໂລເຂົ້າເປືອກຕໍ່ຄົນຕໍ່ປີ ເຮັດໃຫ້ເຂົ້າທີ່ຜະລິດໄດ້ເອງກຸ້ມກິນພຽງແຕ່ 9 ເດືອນໃນແຕ່ລະປີ ຈິ່ງຈໍາເປັນຕ້ອງນໍາເອົາເຂົ້າຈາກບັນດາແຂວງໃກ້ຄຽງເຂົ້າມາເພື່ອໃຫ້ພຽງພໍກັບຄວາມຕ້ອງການບໍລິໂພກພາຍໃນແຂວງ.

ທ່ານ ສີວອນ ວົງຄໍາຈັນ, ຫົວໜ້າພະແນກກະສິກໍາ ແລະ ປ່າໄມ້ແຂວງຫລວງພະບາງ ໃຫ້ສຳພາດວ່າ: ສາເຫດທີ່ເຮັດໃຫ້ບໍ່ສາມາດຜະລິດເຂົ້າກຸ້ມກິນ ຍ້ອນຫລວງພະບາງເປັນແຂວງພູດອຍທີ່ມີເນື້ອທີ່ທໍາການຜະລິດເຂົ້າບໍ່ຫລາຍ ແລະ ປະສົບກັບໄພ ພິບັດທາງທໍາມະຊາດ, ລວມເຖີງສັດຕີພືດທໍາລາຍໃນແຕ່ລະປີ. ພ້ອມນີ້ ຍ້ອນເປັນແຂວງທີ່ມີນັກທ່ອງທ່ຽວທັງພາຍໃນ ແລະ ຕ່າງປະເທດ ເດີນທາງເຂົ້າມາທ່ອງທ່ຽວເປັນຈໍານວນຫລາຍ ເຮັດໃຫ້ຄວາມຕ້ອງການໃນການບໍລິໂພກເຂົ້າ ກໍຄື ສະບຽງອາ ຫານດ້ານອື່ນຯ ເພີ່ມຂຶ້ນ. ຢ່າງໃດກໍຕາມ ນອກຈາກເຂົ້າແລ້ວ ໝາກໄມ້ຫລາຍຊະ ນິດຕ້ອງໄດ້ນຳເຂົ້າຈາກທັງພາຍໃນ ແລະ ຕ່າງປະເທດ ເຊັ່ນດຽວກັນເນື່ອງຈາກພາຍ ໃນແຂວງບໍ່ສາມາດປູກໄດ້. ສ່ວນການຜະລິດຊີ້ນ, ປາ, ໄຂ່, ພືດຜັກ ແລະ ອື່ນຯ ແມ່ນສາມາດຄໍ້າປະກັນໄດ້ກັບຄວາມຕ້ອງການບໍລິໂພກພາຍໃນແຂວງ.

.

ທ່ານ ສີວອນ ວົງຄໍາຈັນ ໃຫ້ຮູ້ຕື່ມວ່າ: ເພື່ອເຮັດໃຫ້ການຜະລິດເຂົ້ານັບມື້ກຸ້ມກິນ, ພະແນກກະສິກໍາ ແລະ ປ່າໄມ້ແຂວງ ຈະເພີ່ມຄວາມເອົາໃຈໃສ່ຊຸກຍູ້ປະຊາຊົນແຕ່ລະທ້ອງຖິ່ນປູກເຂົ້າໃນເຂດທີ່ຕົນເອງມີເງື່ອນໄຂທັງນາປີ ແລະ ນາແຊງໃຫ້ຫລາຍເທົ່າທີ່ຫລາຍໄດ້, ພ້ອມນີ້ ຈະເອົາໃຈໃສ່ປັບປຸງສິ່ງອຳນວຍຄວາມສະດວກດ້ານການຜະລິດໃຫ້ດີຂຶ້ນ ຕິດພັນກັບການສົ່ງພະນັກງານວິຊາການລົງໄປແນະນໍາປະຊາ ຊົນທຳການຜະລິດຢ່າງຕໍ່ເນື່ອງ ແລະ ທົ່ວເຖີງແຕ່ລະທ້ອງຖິ່ນ ເພື່ອໃຫ້ເຂົາເຈົ້າຮູ້ນໍາໃຊ້ເຕັກນິກການຜະລິດແບບໃໝ່ທີ່ໃຫ້ຜົນຜະລິດສູງຂຶ້ນກ່ວາເກົ່າ.

ໂດຍ: ບຸນຕຽງ ຈັນທະວົງ

ລາຍງານຈາກແຂວງວຽງຈັນ: ໃນວັນທີ 13/10/2020 ໄດ້ເກີດເຫດລົດໃຫ່ຍຢາງແຕກແລ້ວເສຍຫລັກປີ້ນ ຢູ່ເຂດບ້ານນາໂພໃຕ້ ເມືອງໂພນໂຮງ ແຂວງວຽງຈັນ .

ລົດທີ່ເກີດເຫດແມ່ນກະບະ ກໍາແພງນະຄອນ ກນ 3435 ສະພາບຕີນຫຼັງແຕກທັງສອງເບື້ອງ, ປີ້ນຫຼັງຄາລົດຍຸບ.

ຈາກເຫດການຄັ້ງນີ້ເຮັດໃຫ້ມີຜູ້ໄດ້ຮັບບາດເຈັບຕິດຄາໃນລົດເປັນເພດຍິິງ ແລະ ມີເດັກຊາຍ 1 ຄົນໄດ້ຮັບບາດເຈັບນໍາອີກ.

ຂໍ້ມູນຈາກ 1625 ແຂວງວຽງຈັນໃຫ້ຮູ້ວ່າ ຜູ້ບາດເຈັບ 01ຄົນ, ເປັນເພດຍິງ ,ອາຍຸ 21 ປີ ອາການເບື້ອງຕົ້ນແມ່ນ: ຫົວເບື້ອງຊ້າຍບວມຊໍ້າ, ມີບາດແຜເປີດເລັກນ້ອຍທີ່ ແກ້ມ-ຕີນ ເບື້ອງຊ້າຍ ແລະ ຫົວເຂົ່າ-ກົກຂາ ເບື້ອງຂວາ (ຫມົດສະຕິແຕ່ຍັງຫາຍໃຈ)

ດັ່ງນັ້ນ, ໜ່ວຍ​ກູ້​ຊີບ​ອົງການ​ກາ​ແດງ​ແຂວງວຽງຈັນ​ຈື່ງໄດ້ປະຖົມພະຍາບານເບື້ອງຕົ້ນແລ້ວນຳສົ່ງມາໂຮງໝໍແຂວງວຽງຈັນ

.

.

ເຕືອນບັນດາທ່ານ ຈົ່ງມີສະຕິລະວັງ ເວລາຂັບລົດໃຫ້ຄ່ອຍໄປຄ່ອຍມາ ແລະ ເພື່ອຫລີກລ່ຽງບໍ່ໃຫ້ເກີດອຸບັດຕິເຫດ.

.

ຄຣິບ

ເພື່ອສືບຕໍ່ເຝົ້າລະວັງ, ປ້ອງກັນ, ຄວບຄຸມ ແລະແກ້ໄຂການລະບາດຂອງ ພະຍາດໂຄວິດ-19 ໃນເດືອນຕຸລາ (10) ປີ 2020 ຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ແຂວງເຊກອງໄດ້ກຳ­ນົດ 8 ວຽກ ເພື່ອສືບຕໍ່ປະຕິບັດໃຫ້ໄດ້ຮັບຜົນສໍາເລັດ.

ໃນວັນທີ 13 ຕຸລາ 2020 ທີ່ພະແນກສາທາລະນະສຸກແຂວງ ໄດ້ຈັດກອງປະຊຸມຕີລາຄາການເຄື່ອນໄຫວວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ໂດຍມີທ່ານ ຄໍາສອນ ກອນເຍີ ຮອງເຈົ້າແຂວງເຊກອງ, ປະທານຄະນະສະເພາະກິດປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຂັ້ນແຂວງ, ທ່ານ ດຣ. ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງ, ບັນດາຂະແໜງການກ່ຽວຂ້ອງອ້ອມຂ້າງແຂວງ ແລະ 4 ຕົວເມືອງເຂົ້າຮ່ວມ.

ທ່ານ ດຣ. ພູຂັນ ຈັນທະວົງ ຮອງຫົວໜ້າພະແນກສາທາລະນະສຸກແຂວງໄດ້ລາຍງານການເຄື່ອນໄຫວວຽກງານຂອງຄະນະສະເພາະຂັ້ນແຂວງ ກໍຄືບັນດາຂະແໜງການຂັ້ນແຂວງໃນເດືອນກັນຍາຜ່ານມາ, ພ້ອມທັງກໍານົດແຜນເຄື່ອນໄຫວໃນເດືອນຕຸລາ ໂດຍລວມມີ 8 ໜ້າວຽກຄື: 1). ແມ່ນສືບຕໍ່ຜັນຂະຫຍາຍແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1049 ລົງວັນທີ 30 ກັນຍາ 2020; 2). ຕິດຕາມເຝົ້າລະວັງ, ຮັບລາຍງານຈາກ 4 ຕົວເມືອງ ໂດຍສະເພາະແມ່ນກຸ່ມສ່ຽງຜູ້ທີ່ເດີນທາງມາຈາກປະເທດທີ່ມີການລະບາດຂອງພະຍາດໂຄວິດ-19; 3). ເກັບຕົວຢ່າງພາຍໃນ 24-48 ຊົ່ວໂມງຂອງຜູ້ທີ່ມີຄວາມສ່ຽງໃຫ້ມີຄວາມວ່ອງໄວລະຫວ່າງເມືອງ-ແຂວງ.

4). ຕິດຕາມ ແລະສັງລວມຂໍ້ມູນຄົນຕ່າງປະເທດ, ຂໍ້ມູນຄວາມຄືບໜ້າການລະບາດຂອງພະຍາດໂຄວິດ-19; 5). ເຮັດໂຄສະນາສຸຂະສຶກສາໃຫ້ຮູ້ວິທີປ້ອງກັນ ແລະຮູ້ຜົນຮ້າຍຂອງພະຍາດໂຄວິດ-19 ຢ່າງທົ່ວເຖິງ ໂດຍສະເພາະເຂດຊາຍແດນເມືອງກະລຶມ ແລະເມືອງດາກຈຶງ; 6). ປະຕິບັດມາດຕະການຄວບຄຸມໃຫ້ເຂັ້ມງວດ ແລະເຄັ່ງຄັດຕາມສູນກັກກັນ; 7). ກະກຽມແຜນຮອງຮັບການນໍາເຂົ້າແຮງງານ, ກໍາມະກອນຂອງບໍລິສັດ ເພື່ອດໍາເນີນການຕາມຂັ້ນຕອນ ແລະ 8 ແມ່ນກຽມແຜນຮັບ-ສົ່ງນັກສຶກສາຈາກ ສສ ຫວຽດນາມເຂົ້າມາແຂວງເຊກອງ ແລະຈາກແຂວງເຊກອງໄປ ສສ ຫວຽດ ນາມ.

ໃນກອງປະຊຸມຄັ້ງນີ້ ຍັງຜ່ານແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ, ແຈ້ງການຂອງຫ້ອງວ່າການແຂວງ, ຂໍ້ຕົກລົງແຕ່ງຕັ້ງຄະນະສະເພາະກິດ ແລະກອງເລຂາຂັ້ນແຂວງ, ການປະກອບຄໍາຄິດຄໍາເຫັນຂອງຄະນະສະເພາະກິດຂັ້ນແຂວງ, ຂັ້ນເມືອງ ແລະຕອນທ້າຍກໍໄດ້ຮັບຟັງການມີຄໍາເຫັນຊີ້ນໍາຂອງທ່ານຮອງເຈົ້າແຂວງ ທັງນີ້ ກໍເພື່ອເຮັດໃຫ້ການເຄື່ອນໄຫວວຽກງານປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ໃນເດືອນຕຸລາມີປະສິດທິຜົນດີຂຶ້ນ ແລະບໍ່ໃຫ້ພະຍາດດັ່ງກ່າວ ເກີດຂຶ້ນຢູ່ແຂວງເຊກອງພວກເຮົາ.

ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ກອງເລຂາຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດ COVID-19 ໃຫ້ສໍາພາດຕໍ່ສື່ມວນຊົນ

ຕອນເຊົ້າວັນທີ 13 ຕຸລາ 2020 ທີ່ກະຊວງສາທາລະນະສຸກ ເຖິງວຽກງານເຝົ້າລະວັງ COVID-19ຢູ່ ສປປ ລາວວ່າ: ໃນວັນທີ 12 ຕຸລາ 2020, ໄດ້ເກັບຕົວຢ່າງມາກວດວິເຄາະທັງໝົດ 607 ຄົນ,ໃນນັ້ນມີ ແຮງງານລາວມາແຕ່ໄທ 211ຕົວຢ່າງ,ແຮງງານຈີນ 382ຕົວຢ່າງ, ແຮງງານຫວຽດນາມ 10 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 3 ຕົວຢ່າງ ແລະ ບຸກຄົນທົ່ວໄປທີ່ມີອາການ 1 ຕົວຢ່າງ; ຜົນກວດວິເຄາະທັງໝົດແມ່ນບໍ່ພົບເຊື້ອ, ແຕ່ເດືອນມັງກອນ ຮອດ ວັນທີ 12ຕຸລາ2020 ໄດ້ເກັບຕົວຢ່າງມາກວດທັງໝົດ 58,685ຕົວຢ່າງ ,ກວດພົບເຊື້ອສະສົມ23ຄົນ.

ປິ່ນປົວດີແລ້ວ 22ຄົນ, ຍັງເຫລືອແຕ່ ຄົນເຈັບຕິດເຊື້ອພະຍາດ ກໍລະນີທີ 23 ທີ່ພວມສືບຕໍ່ປີ່ນປົວຢູ່ໂຮງໝໍມິດຕະພາບ ແລະບໍ່ມີອາການຮ້າຍແຮງ.

ດຣ. ລັດສະໝີ ວົງຄຳຊາວ ໃຫ້ຮູ້ເຖິງສະພາບການລະບາດຂອງພະຍາດCOVID-19 ຂອງບັນດາປະເທດໃກ້ຄຽງແລະ ໃນໂລກວ່າ: ມາຮອດວັນທີ 13 ຕຸລາ 2020, ທົ່ວໂລກມີການລາຍງານການລະບາດ ທັງໝົດ 214 ປະເທດ/ເຂດແຄ້ວນ; ມີຜູ້ຕິດເຊື້ອພະຍາດ COVID-19 ທັງໝົດ 38,049,049ຄົນ; -ເສຍຊິວິດ 1,084,707ຄົນ ກວມເອົາ 2.85 % ຂອງຜູ້ຕິດເຊື້ອທັງໝົດ; ປີ່ນປົວດີ 28,557,839ຄົນ ເຊິ່ງກວມເອົາ 75.1% ຂອງຜູ້ຕິດເຊື້ອທັງໝົດ; ປະເທດທີ່ມີການລາຍງານການຕິດເຊື້ອແລະເສຍຊີວິດຫຼາຍກວ່າໝູ່ ແມ່ນສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 8,037,789ຄົນ, ເສຍຊີວິດສະສົມ 220,011ຄົນ. ຂົງເຂດອາຊີ ແມ່ນປະເທດອິນເດຍ ທີ່ມີທ່າອ່ຽງໃນການຕິດເຊື້ອ COVID-19 ເພິ່ມຂຶ້ນ, ມີຜູ້ຕິດເຊື້ອສະສົມ 7,175,880ຄົນ ແລະຜູ້ຕິດເຊື້ອມື້ດຽວສູງເຖິງ 54,045ຄົນ; ໃນບັນດາປະເທດສະມາຊິກອາຊຽນ ມາຮອດວັນທີ 13 ຕຸລາ 2020 ມີຜູ້ຕິດເຊື້ອພະຍາດ COVID-19 ທັງໝົດ 788,149 ຄົນ ແລະເສຍຊີວິດ19,214ຄົນ.

ຍ້ອນວ່າ ຈຳນວນຜູ້ຕິດເຊື້ອແລະຜູ້ເສຍຊີວິດຈາກທົ່ວໂລກຍັງມີທ່າອ່ຽງເພິ່ມສູງຂຶ້ນຢ່າງຕໍ່ເນື່ອງ; ອີງໃສ່ສະພາບການດັ່ງກ່າວເພື່ອຫຼຸດຜ່ອນ ແລະ ຢັບຢັ້ງ ການລະບາດແຜ່ລາມຂອງພະຍາດ, ຈຶ່ງຮຽກຮ້ອງມາຍັງທຸກພາກສ່ວນໃນສັງຄົມຈົ່ງໄດ້ເອົາໃຈໃສ່ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ໃຫ້ກາຍເປັນຄວາມຊິນເຄີຍເປັນຕົ້ນແມ່ນ: ອອກຈາກບ້ານເມື່ອມີຄວາມຈຳເປັນ ໃສ່ຜ້າປິດປາກ-ດັງ ເວລາອອກຈາກບ້ານຫຼືໄປສະຖານທີ່ທີ່ມີຄວາມສ່ຽງຕໍ່ການຕິດເຊື້ອ ລ້າງມືເລື້ອຍໆດ້ວຍນໍ້າສະອາດໃສ່ສະບູ ຫຼື ເຈວລ້າງມືຂ້າເຊື້ອ ປະຕິບັດຮັກສາໄລຍະຫ່າງ 1-2 ແມັດຂຶ້ນໄປ ກິນອາຫານທີ່ປຸງແຕ່ງສຸກໃໝ່ໆ ແຍກຂອງໃຊ້ສ່ວນຕົວບໍ່ໃຊ້ຮ່ວມກັບຜູ້ອື່ນ ເມື່ອກັບຮອດບ້ານຄວນອາບນ້ຳແລະປ່ຽນເສື້ອຜ້າທັນທີ ການປະຕິບັດທັງໝົດນີ້ກໍ່ແມ່ນເພື່ອຫຼຸດຜ່ອນແລະສະກັດກັ້ນການລະບາດບໍ່ໃຫ້ຂະຫຍາຍເປັນວົງກວ້າງ.

ໃນວັນທີ 13/10/2020 ເວລາ 04:06 ນາທີໄດ້ຮັບແຈ້ງເຫດເຂົ້າໝາຍເລກສຸກເສີນ 1624 ວ່າ ມີເຫດ ລົດໃຫ່ຍຕຳແລ້ວຫນີ ເຂດ ບ້ານ ທາດຫຼວງ ເມືອງ ໄຊເສດຖາ ນະຄອນຫລວງ.

.

ທີມກູ້ຊີບ-ກູ້ໄພນະຄອນຫຼວງ (ສູນສັ່ງການ) ຈຶ່ງໄດ້ອອກກວດສອບເຫດພົບຜູ້ບາດເຈັບ ເພດ ຍິງ 1 ຄົນ

.

ອາການເບື້ອງຕົ້ນແມ່ນ: ກະທົບຫົວ ແລະ ຫາຍໃຈບໍ່ສະດວກ.

.

ຫຼັງຈາກນັ້ນຈຶ່ງໄດ້ປະຖົມພະຍາບານຂັ້ນເບື້ອງຕົ້ນແລ້ວນຳສົ່ງໂຮງໝໍ ມິດຕະພາບ 150 ຕຽງເພື່ອໄປປິ່ນປົວໃຫ້ຊ່ວງເຊົາ.

ມາໃນລະຫວ່າງ 7 – 10 ຕຸລາ 2020 ເມືອງທ່າປາງທອງ ໄດ້ເກີດມີສະພາບຝົນຕົກໜັກຕິດຕໍ່ກັນເປັນເວລາຫຼາຍວັນ ເຮັດໃຫ້ປະລິມານນ້ຳຕາມລຳຫ້ວຍ, ລຳເຊສາຍຕ່າງໆໄດ້ເພີ່ມຂື້ນຢ່າງໄວວາ ໄຫຼລົ້ນເຂົ້າເນື້ອທີການຜະລິດ ແລະ ໜອງປາຂອງປະຊາຊົນໃນບາງພື້ນທີ່ພາຍໃນເມືອງ ເຮັດໃຫ້ເຂົ້ານາປີທີ່ກຳລັງຈະເກັບກ່ຽວໄດ້ຮັບພົນເສຍຫາຍ ແລະ ເສັ້ນທາງບາງບ້ານເຮັດໃຫ້ການສັນຈອນລະຫວ່າງບ້ານຕໍ່ບ້ານບໍ່ສາມາດໄປມາໄດ້ ຍ້ອນເສັນທາງຫຼາຍຈຸດຖຶກຕັດຂາດ ເມື່ອເຫັນໄດ້ຄືແນວນັ້ນ ການນຳຂອງເມືອງກໍ່ໄດ້ຮີບຮ້ອນລົງຕິດຕາມເບີ່ງສະພາບການດັ່ງກ່າວຢ່າງຮີບດ່ວນ

ໃນລະຫວ່າງວັນທີ 7 ຫາ 11 ຕຸລາ 2020 ເຊິ່ງນຳໂດຍທ່ານ ຄຳປະສົງຂົງຄຳເລຂາ ພັກເມືອງ ເຈົ້າທ່າປາງທອງ, ທ່ານ ອິນຕອງ ລືຄຳຫານ ຮອງເລຂາພັກເມືອງ ປະທານກວດກາພັກ-ລັດ, ພ້ອມດ້ວຍຫ້ອງວ່າການເມືອງ, ຫ້ອງການກະສີກຳ ແລະ ປ່າໄມ້ເມືອງ , ຫ້ອງການ ແຮງງານສະຫວັດດີການ ແລະ ສັງຄົມເມືອງ , ຫ້ອງການສາທາລະນະສຸກ ເມືອງ,ຫ້ອງການ ສຶກສາທິການ ແລະ ກິລາເມືອງ ແລະ ຫ້ອງການທີກ່ຽວຂ້ອງ ກໍ່ໄດ້ພ້ອມພາກັນລົງເບີງສະພາບນ້ຳຖ້ວມໃນເບື້ອງຕົ້ນ 4 ຈຸດ ໂດຍສະເພາະຢູ່ຈຸດສຸມກະທອງເໜືອ ( ບ້ານ ໂນສີວິໄລ ,ຄຸ້ມປະໂຕ້ຍ), ຈຸດສຸມເຊປ໋ອງ ,ກຸ່ມກະທອງໃຕ້ ( ບ້ານແກ້ງສັງກູ) ແລະ ກຸ່ມທ່າພີ້ ( ບ້ານ ທ່າພີ່ ຄຸ້ມນາແຊງ) ເພື່ອປະເມີນເບີ່ງລະດັບນ້ຳໃນແຕ່ລະຈຸດ ທີມີຄວາມສຽງ ແລະ ກະກຽມຄວາມພ້ອມດ້ານຕ່າງໆ ເພື່ອໃຫ້ຄວາມຊ່ວຍເຫຼືອ ພໍ່ແມ່ປະຊາຊົນທີຢູ່ໃນພື້ນທີ່ສຽງ ໃຫ້ຢູ່ໃນຈຸດທີ່ປອດໄພ ແລະ ສຳລັບເມືອທ່າປາງທອງກໍ່ແມ່ນເປັນພື້ນທີ່ໜຶ່ງທີ່ໄດ້ຮັບອິນທິພົນຈາກພາຍຸ ເຮັດໃຫ້ມີຝົນຕົກໜັກມາແຕ່ຕອນເຊົ້າຂອງວັນທີ 7 ຕຸລາ 2020 ຈົນຮອດປະຈຸບັນນີ້ ກໍ່ບໍທັນໄດ້ເຊົ້າເຮັດໃຫ້ລະດັບນ້ຳໃນແຕ່ລະສາຍຕ່າງໆເພີ້ມຂື້ນສູງເປັນຕົ້ນແມ່ນ ເຊບັ້ງຫຽງ, ເຊປະເອມ ແລະ ເຊປ໋ອງ ແລະ ສາຍຫ້ວຍອື່ນໆ ກໍ່ໄດ້ເພີມຂື້ນໄວວາ ເຮັດນ້ຳໄຫຼເຂົ້າທົ່ງໄຮທົງນາ ຮົ້ວສ່ວນພື້ນທີ່ທຳການຜະລິດຂອງພໍ່ແມ່ປະຊົນເຮັດໃຫ້ມີພົນເສຍຫາຍຫຼາຍພໍສົມຄວນໂດຍສະເພາະເຂົ້ານາປີຢູ່ໃນໄລຍະການເກັບກ່ຽວ ບາງພື້ນທີ່ຈົມຢູ່ພື້ນນ້ຳ ແລະ ບາງພື່ນທີບໍ່ສາມາດໄປມາໄດ້

ຈາກນັ້ນໃນຕອນບ່າຍຂອງ ວັນທີ 11 ຕຸລາ 2020ນີ້ ທ່ານ ຄຳປະສົງ ຂົງຄຳ ເລຂາພັກເມືອງ ເຈົ້າເມືອງທ່າປາງ ພ້ອມດ້ວຍຄະນະນຳຂັ້ນເມືອງ ແລະ ຄະນະຄະນະຫ້ອງການ ທີ່ກ່ຽວຂ້ອງ ໄດ້ລົງພົບປະອຳນາດການປົກຄອງ ແລະ ພໍ່ແມ່ນປະຊາຊົນ ບ້ານທ່າພີ່ ( ຄຸ້ມນາແຊງ) ແລະ ບ້ານດອນຂາວ ທີ່ໄດ້ຍົກຍ້າຍຄອບຄົວທີ່ໄດ້ອອກມາຢູ່ສູນອົບພະຍົບທີ່ເມືອງກຳນົດໄວ້ ພ້ອມທັງໄດ້ມອບ ນ້ຳດື່ມຕຸກໃຫຍ່ຈຳນວນ 60 ຕຸກ, ນ້ຳດື່ມຕຸກນ້ອຍຈຳນວນ 178 ແຟັກ, ໝີ່ໄວໄວ 5 ແກັດ ແລະ ຜ້າບັດ 8 ພືນ ເຊີງລວມມູນຄ່າທັງໝົດ 3,140,000 ກີບ ( ສາມລ້ານໜຶ່ງແສນສີ່ສີບພັບກີບ). ໃຫ້ກັບອຳນາດການປົກຄອງ ແລະ ພໍ່ແມ່ປະຊາຊົນບ້ານດັ່ງກ່າວ ສໍາລັບພົນເສຍຫາຍຕ່າງໆ ແມ່ນຈະໄດ້ແຈ້ງໃຫ້ຊາບໃນພາຍຫຼັງ.

ພາບ-ຂາວ; ຈັນທະຈອນ ເນືອງອຸທອນ

ອັບເດດລ່າສຸດໃນຕອນເຊົ້າມື້ນີ້ ເວລາ 5:46 ນາທີ ຂອງວັນທີ 13 ຕຸລາ 2020 ລະດັບນ້ຳເຊບັງຫຽງ ວັດແທກໄດ້ 15,50 ຊັງຕີແມັດ.

.

ນ້ຳໄດ້ລັດຂ້າມທາງລະຫວ່າງຂົວຂ້າມບ້ານລະຫານ້ຳແລ້ວ.

.

ເສັ້ນທາງໄປເຂດກຸ່ມບ້ານ 11 ສອງຄອນຖືກຕັດຂາດ.

ໂຮງຮຽນເຂດລະຫານ້ຳ, ສອງຄອນ, ຊະແຍກ, ດອນມວ່ງ, ແກ້ງໂດນ, ຫົວຫາດໄດ້ສັ່ງປິດຊົ່ວຄາວ.

ເສັ້ນທາງໄປບ້ານຫົວຫາດ ຖືກນ້ຳຖວ້ມ.

ເນື້ອທີ່ນາເກືອບ 3 ພັນເຮັກຕາ ນ້ຳໄດ້ໄຫຼເຂົ້າຖວ້ມ.

ເຮືອນຊານ ຂອງປະຊາຊົນ ຫຼາຍຫຼັງລະດັບນ້ຳ ເລີ່ມໄຫຼເຂົ້າຖວ້ມກ້ອງຕະລ່າງເຮືອນແລ້ວ.

ເຂດທີ່ມີພື້ນທີ່ສ່ຽງ ກຸ່ມບ້ານທີ 6, 7,8, 9,10, 11,12 ໃຫ້ເກັບມ້ຽນສິ່ງຂອງ ແລະ ສັດລ້ຽງໄປເຂດປອດໄພ ຄາດວ່າ ມວນນ້ຳ ຍັງຈະເພີ່ມລະດັບຢ່າງຕ່ໍເນື່ອງໂດຍສະເພາະ ໃນມື້ນີ້ ແລະມື້ອື່ນ.

ກຳລັງເຈົ້າໜ້າທີ່ຕຳຫລວດ ຈາກກອງບັນຊາການ ປກສ ເມືອງ ໄດ້ລົງຊ່ວຍເຫຼືອພໍ່ແມ່ປະຊາຊົນ ເລັ່ງເກັບກູ້ຜົນຜະລິດ, ເຄື່ອນຍ້າຍສິ່ງຂອງທີ່ຈຳເປັນໄປເຂດປອດໄພ, ຢູ່ທີ່ບ້ານລະຫານ້ຳ, ທ່າຂາມລຽນແລະບ້ານຫົວຫາດ.

ພາບຈາກ: ກອງບັນຊາການ ປກສ ເມືອງສອງຄອນ

ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 12 ຫາ 18 ຕຸລາ 2020 ວ່າ: ໃນວັນທີ 12 ຕຸລາ 2020 ພາຍຸດີເປຼຊັນ ທີ່ກໍ່ຕົວຢູ່ດ້ານຕາເວັນຕົກຂອງປະເທດຟິລິປິນ ພວມເຄື່ອນທີ່ມາທາງທິດຕາເວັນຕົກ ດ້ວຍຄວາມໄວ 15 ກິໂລແມັດຕໍ່ຊົ່ວໂມງ ແລະ ຈະເພີ່ມກໍາລັງແຮງຂື້ນກາຍເປັນພາຍຸໝຸນເຂດຮ້ອນ ນັງກາ (Nangka) ຫົວທີ 16 ປະຈຳປີ 2020 ຄາດວ່າພາຍຸຫົວນີ້ ຈະສືບຕໍ່ເຄື່ອນທີ່ຜ່ານເກາະໃຕ້ໜ້າ ແລະ ເຄື່ອນທີ່ຂຶ້ນຝັ່ງທາງພາກເໜືອຂອງ ສສ ຫວຽດນາມ ໃນວັນທີ 15 ຕຸລາ 2020 ນີ້,

​ອຸຕຸເຕືອນອີກ! ກຽມຮັບມືກັບພາຍຸນັງກາ ວັນທີ 15 ຕຸລານີ້ ຈະເຮັດໃຫ້ຝົນຕົກໃນແຕ່ລະພາກ ແລະ ຕົກປານກາງ ຫາ ໜັກ ຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກ ລົງຫາ ພາກກາງ ແລະ ພາກໃຕ້.​

ຊຶ່ງວົງລັດສະໝີຂອງພາຍຸຫົວນີ້ຈະກວມເອົາເຂດພາກເໜືອດ້ານຕາເວັນອອກຂອງປະເທດລາວ ແລະ ຈະເຮັດໃຫ້ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ປານກາງ ຫາ ໜັກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກ ລົງຫາ ພາກກາງ ແລະ ພາກໃຕ້,​ ແຈ້ງເຕືອນເຖິງ ປະຊາຊົນບັນດາເຜົ່າໃນເຂດດັ່ງກ່າວ ໃຫ້ມີສະຕິຕໍ່ສະພາບຝົນຕົກໜັກ, ນໍ້າຖ້ວມຊູ ແລະ ນ້ຳຖ້ວມອັ່ງ.

ໃນໄລຍະວັນທີ 16 ຫາ 18 ຕຸລາ 2020. ມວນອາກາດເຢັນຈະປົກຄຸມເຂດພາກເໜືອ ລົງຫາ ພາກກາງ ຊຶ່ງ ຈະເຮັດໃຫ້ມີອາກາດເຢັນລົງຕື່ມອີກ ພ້ອມມີຝົນຕົກໃນລະດັບຄ່ອຍໃນແຕ່ລະພາກ ແລະ ຕົກປານກາງ ຫາ ໜັກ ຢູ່ບາງທ້ອງຖິ່ນແຂວງພາກກາງ ແລະ ພາກໃຕ້. ຄາດຄະເນສະພາບອາກາດໃນແຕ່ລະພາກດັ່ງລຸ່ມນີ້.

.

.

ຂ່າວຕ່າງປະເທດ: ລາຍງານຈາກ laodong.vn ໃຫ້ຮູ້ ໃນວັນທີ 12 ຕຸລາ 2020 ນີ້ວ່າເກີດເຫດ ສະຫຼົດໃຈ ນໍ້າຖ້ວມທີ່ເມືອງເຮວ້ ເກີດມີອຸບັດຕິເຫດ ຍິງຕັ້ງຄັນ ຕົກເຮືອເສຍຊີວິດ.

ຈາກຂໍ້ມູນໃຫ້ຮູ້ວ່າ, ມີແມ່ມານ ແລະ ຜົວໄດ້ພາກັນຈ້າງເຮືອ ເພື່ອຈະໄປເກີດລູກ ເຊິ່ງຂະນະນັ້ນ ນໍ້າຖ້ວມແລະມີກະແສແຮງ. ເຮັດໃຫ້ເກີດອຸບັດຕິເຫດ ແມ່ມານ ໄດ້ຕົກເຮືອ ແລະ ຈົມສູນຫາຍ ໃນຕອນເຊົ້າ ວັນທີ 12 ຕຸລາ 2020. ເນື່ອງຈາກນໍາເລີກ ເຮັດໃຫ້ບໍ່ສາມາດຊ່ວຍເອົາຊີວິດ ແມ່ມານໄດ້.

ຈົນມາຮອດຕອນບ່າຍຂອງວັນດຽວກັນ ຈິ່ງສາມາດພົບເຫັນ ສົບຂອງແມ່ມານຄົນດັ່ງກ່າວ. ຜູ່ເປັນສາມີໄດ້ແຕ່ຮ້ອງໄຫ້ ຂໍໃຫ້ຟ້າດິນ ຄືນຊີວິດເມຍແລະລູກຂອງລາວກັບຄືນມາ.ເຊິ່ງເຫັນແລ້ວກໍ່ສຸດສະຫຼົດໃຈກັບເຫດການຄັ້ງນີ້.

ສະແດງຄວາມເສຍໃຈກັບເຫດການຄັ້ງນີ້.

ທີ່ມາ

https://laodong.vn/xa-hoi/tim-thay-thi-the-san-phu-bi-lu-cuon-tren-duong-di-sinh-con-844228.ldo

.

ໃນໂອກາດທີ່ ພັກກອມມູນິດຈີນ ເປັນເຈົ້າພາບຈັດກອງປະຊຸມສໍາມະນາສາກົນທາງໄກພາຍໃຕ້ຫົວຂໍ້: “ການຫຼຸດພົ້ນຈາກຄວາມທຸກຍາກ ແລະ ພາລະໜ້າທີ່ຂອງພັກການເມືອງ”ຢູ່ ແຂວງຟູຈ້ຽນ, ສປ ຈີນ ແຕ່ວັນທີ 12-13 ຕຸລາ 2020, ໂດຍມີຜູ້ຕາງໜ້າພັກການເມືອງຈຳນວນ 400 ກວ່າທ່ານ ຈາກ 100 ກວ່າປະເທດໃນໂລກ, ນອກນັ້ນ ຍັງມີສະຖານທູດຕ່າງປະເທດປະຈຳ ສປ ຈີນ, ຜູ້ຕາງໜ້າຂອງອົງການຈັດຕັ້ງສາກົນ ປະຈຳ ສປ ຈີນ, ສື່ມວນຊົນບັນດາປະເທດກໍາລັງພັດທະນາ ແລະ ຜູ້ຊ່ຽວຊານຕ່າງໆ ໄດ້ເຂົ້າຮ່ວມກອງປະຊຸມແບບທາງໄກ ແລະ ເຂົ້າຮ່ວມຢູ່ສະຖານທີ່ຕົວຈິງ.

ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ເຂົ້າຮ່ວມ ແລະ ກ່າວຄຳປາໄສຜ່ານວິດີໂອທາງໄກ ໃນພິທີເປີດກອງປະຊຸມດັ່ງກ່າວ, ໂດຍໄດ້ຕີລາຄາເຖິງຄວາມໝາຍຄວາມສຳຄັນຂອງກອງປະຊຸມວ່າ: ຫົວຂໍ້ຂອງກອງປະຊຸມຄັ້ງນີ້ ມີຄວາມໝາຍສໍາຄັນດ້ານຍຸດທະສາດ ທັງມີລັກສະນະສາກົນ, ເພາະການລົບລ້າງຄວາມທຸກຍາກໃຫ້ແກ່ປະຊາຊົນ ແມ່ນໜຶ່ງໃນພາລະກໍາປະຫວັດສາດ, ທັງແມ່ນຄວາມຮັບຜິດຊອບ, ພັນທະ ແລະ ໜ້າທີ່ຂອງບັນດາພັກການເມືອງ ເພື່ອນໍາເອົາຄວາມຮັ່ງມີຜາສຸກໃຫ້ແກ່ປະຊາຊົນ. ກອງປະຊຸມ ເປັນໂອກາດທີ່ດີໃຫ້ແກ່ບັນດາພັກການເມືອງໃນໂລກ ໄດ້ຮັບຊາບເຖິງຜົນສໍາເລັດ, ຄວາມຫຍຸ້ງຍາກໃນການແກ້ໄຂຄວາມທຸກຍາກຂອງບັນດາປະເທດ, ທັງເປັນໂອກາດດີໃນການເພີ່ມທະວີການແລກປ່ຽນບົດຮຽນຮ່ວມກັນ ໃນການແກ້ໄຂຄວາມທຸກຍາກ ແລະ ສ້າງຄວາມຮັ່ງມີຜາສຸກໃຫ້ແກ່ປະຊາຊົນ.

ສະຫາຍເລຂາທິການໃຫຍ່ ຍັງໄດ້ຊົມເຊີຍ ແລະ ຕີລາຄາສູງ ຕໍ່ຜົນສໍາເລັດໃນການພັດທະນາເສດຖະກິດ-ສັງຄົມ ຂອງ ສປ ຈີນ ໃນຕະຫຼອດໄລຍະ 71 ປີທີ່ຜ່ານມາ ພາຍໃຕ້ການນໍາພາອັນຖືກຕ້ອງ, ປະດິດສ້າງ ແລະ ຮອບດ້ານຂອງ ພັກກອມມູນິດຈີນ, ຈາກທີ່ເປັນປະເທດທຸກຍາກຫຼ້າຫຼັງ, ປະເທດຈີນ ໄດ້ກາຍເປັນປະເທດຮັ່ງມີ, ເຂັ້ມແຂງ ແລະ ທັນສະໄໝ, ກໍາລັງການຜະລິດໄດ້ຮັບການປົດປ່ອຍ, ປະຊາຊົນຈີນຫຼາຍຮ້ອຍລ້ານຄົນ ໄດ້ຫຼຸດພົ້ນອອກຈາກຄວາມທຸກຍາກຂາດເຂີນທາງດ້ານວັດຖຸສິ່ງຂອງທີ່ເປັນປັດໃຈພື້ນຖານຂອງການດໍາລົງຊີວິດ ແລະ ກ້າວໄປເຖິງລະດັບທີ່ມີຄວາມອີ່ມໜໍາສໍາລານໂດຍພື້ນຖານ ພຽງໃນໄລຍະເວລາສັ້ນໆ, ເຊິ່ງເປັນປະກົດການທີ່ບໍ່ເຄີຍມີມາກ່ອນໃນປະຫວັດສາດຂອງມວນມະນຸດ ແລະ ສະແດງຄວາມເຊື່ອໝັ້ນວ່າ,

ພາຍໃຕ້ການນໍາພາຂອງ ພັກກອມມູນິດຈີນ ທີ່ມີ ສະຫາຍເລຂາທິການໃຫຍ່ ສີຈິ້ນຜິງ ເປັນແກນກາງ, ດ້ວຍບົດຮຽນ, ປະສົບການທີ່ອຸດົມສົມບູນ ແລະ ຜົນສໍາເລັດອັນໂດດເດັ່ນໃນການແກ້ໄຂຄວາມທຸກຍາກໃຫ້ແກ່ປະຊາຊົນຂອງພັກກອມມູນິດຈີນ, ປະຊາຊົນຈີນຈະບັນລຸຜົນສໍາເລັດໃນການສ້າງສັງຄົມທີ່ອີ່ມໜໍາສໍາລານຢ່າງຮອບດ້ານ ຕາມທີ່ຄາດໝາຍໄວ້.ໃນໂອກາດດັ່ງກ່າວ, ສະຫາຍ ບຸນຍັງ ວໍລະຈິດ ຍັງໄດ້ຍົກໃຫ້ເຫັນບົດຮຽນໃນການແກ້ໄຂຄວາມທຸກຍາກຂອງປະຊາຊົນຢູ່ ສປປ ລາວ, ເຊິ່ງຍາມໃດ ພັກປະຊາຊົນປະຕິວັດລາວ ກໍ່ຖືເອົາວຽກງານການລຶບລ້າງຄວາມທຸກຍາກ ແລະ ສ້າງຄວາມຜາສຸກໃຫ້ແກ່ປະຊາຊົນລາວບັນດາເຜົ່າ ເປັນວຽກບູລິມະສິດອັນໜຶ່ງ ໃນການພັດທະນາເສດຖະກິດ-ສັງຄົມແຫ່ງຊາດແລະ ວຽກງານດັ່ງກ່າວ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ປະສົບຜົນສໍາເລັດເປັນກ້າວໆມາ.

ພ້ອມນັ້ນ, ສະຫາຍເລຂາທິການໃຫຍ່ ໄດ້ຕີລາຄາສູງຕໍ່ແນວຄວາມຄິດໃນການສ້າງປະຊາຄົມຮ່ວມຊາຕາກໍາຂອງມວນມະນຸດທີ່ສະເໜີໂດຍສະຫາຍເລຂາທິການໃຫຍ່ສີຈິ້ນຜິງ, ເຊິ່ງສອດຄ່ອງກັບທ່າອ່ຽງຂອງຍຸກສະໄໝ ແລະ ຮຽກຮ້ອງໃຫ້ບັນດາພັກການມືອງໃນໂລກ ຈົ່ງເພີ່ມທະວີການປະສານສົມທົບເຊິ່ງກັນແລະກັນ ແລະ ຮ່ວມມືກັນຢ່າງແໜ້ນແຟ້ນ ເພື່ອເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກ ແລະ ກ້າວໄປສູ່ຄວາມຮັ່ງມີຜາສຸກ, ປະກອບສ່ວນສູ້ຊົນເຮັດໃຫ້ບັນດາເປົ້າໝາຍສະຫະສະວັດແຫ່ງການພັດທະນາ ຂອງ ອົງການສະຫະປະຊາຊາດ ວາງໄວ້ ບັນລຸຕາມຄາດໝາຍ.