ເນື່ອງຈາກສະພາບຝົນທີ່ຕົກລົງມາຢ່າງຕໍ່ເນື່ອງເຮັດ ໃຫ້ເກີດນ້ຳຖ້ວມໃນຫຼາຍເມືອງ ຂອງແຂວງສະຫວັນນະເຂດ ແລະເມືອງພີນກໍ່ເປັນເມືອງຫນຶ່ງທີ່ໄດ້ຮັບຜົນກະທົບໜັກ ພໍສົມຄວນ ຕໍ່ກັບສະພາບການດັ່ງ ກ່າວ, ດ້ວຍຄວາມເປັນຫ່ວງເປັນໃຍຕໍ່ການດຳລົງຊີວິດຂອງປະຊາຊົນດັ່ງນັ້ນ

.

ມາວັນທີ 12 ຕຸລາ 2020 ຜ່ານມານີ້ ທ່ານ ວຽງທະວີສອນ ເທບພະຈັນ ຄະນະປະຈຳພັກ ແຂວງສະຫວັນນະເຂດຜູ້ຊີ້ນຳວຽກງານຂົງເຂດວັດທະນະທຳ-ສັງຄົມພ້ອມດ້ວຍຄະນະຕ້ານໄພພິບັດຂັ້ນແຂວງໄດ້ເດີນທາງລົງມາຕິດຕາມເບິ່ງສະພາບການນ້ຳຖ້ວມຢ່າງເລັ່ງດ່ວນພ້ອມທັງນໍາເຄື່ອງບໍລິໂພກ-ອຸປະໂພກຈໍານວນໜຶ່ງມອບໃຫ້ອໍານາດການປົກຄອງເມືອງເພື່ອລົງແຈກຢາຍຕໍ່ໃຫ້ປະຊາຊົນທີ່ຖືກຜົນກະທົບໃນແຕ່ລະເຂດ ເຊິ່ງເຄື່ອງດັ່ງກ່າວແມ່ນໄດ້ຈາກການລະດົມຈາກຫຼາຍພາກສ່ວນ ລວມມູນຄ່າ 8 ລ້ານກວ່າກີບ.

.

ກ່າວຮັບເຄື່ອງໂດຍຮັບທ່ານ ສາລີ ວິນລາວັນ ເຈົ້າ ເມືອງໆພີນ ພ້ອມຄະນະໂອກາດນີ້, ທ່ານ ວຽງທະວີສອນ ເທບພະຈັນ, ເຈົ້າເມືອງໆພີນ ພ້ອມຄະນະກໍ່ ໄດ້ລົງສຳຫຼວດເບິ່ງພື້ນທີ່, ທີ່ຖືກນ້ຳຖ້ວມ ພ້ອມທັງນຳ ເອົາເຄື່ອງບໍລິໂພກ-ອຸປະໂພກທີ່ຈຳ ເປັນ ໄປມອບຊ່ວຍເຫຼືອແກ່ປະ ຊາຊົນບ້ານຕາດໄຮເຊ ທີ່ໄດ້ຮັບຜົນກະທົບຈາກນ້ຳຖ້ວມໃນຄັ້ງນີ້.

ໂດຍຕອບສະໜອງຕາມການເຊື້ອເຊີນຂອງ ສະຫາຍ ສະເຫຼີມໄຊ ກົມມະສິດ,ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ເພື່ອເປັນການສືບຕໍ່ຜັນຂະຫຍາຍສາຍພົວພັນຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ກໍຄືການເປັນຄູ່ຮ່ວມຊະຕາກຳລາວ-ຈີນ,ຈີນ-ລາວ ໃຫ້ແໜ້ນແຟ້ນ ແລະ ເຂົ້າສູ່ລວງເລິກຍິ່ງໆຂຶ້ນ, ສະຫາຍ ຫວັງ ອີ້, ທີ່ປຶກສາແຫ່ງລັດ, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາຊົນຈີນ, ພ້ອມດ້ວຍຄະນະໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ, ໃນລະຫວ່າງວັນທີ 13-14 ຕຸລາ2020.

ໃນວັນທີ 14 ຕຸລາ 2020, ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ສະຫາຍ ສະເຫຼີມໄຊ ກົມມະສິດ,ລັດຖະມົນຕີກະຊວງການຕ່າງປະເທດ ແຫ່ງສປປ ລາວ, ໄດ້ມີການພົບປະສອງຝ່າຍກັບ ສະຫາຍ ຫວັງ ອີ້,ທີ່ປຶກສາແຫ່ງລັດ,ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ.

ໃນໂອກາດນີ້,ສະຫາຍລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະຕີລາຄາສູງ ຕໍ່ການຢ້ຽມຢາມ ສປປ ລາວ ຄັ້ງທີ 2 ຂອງ ສະຫາຍ ລັດຖະມົນຕີ ຫວັງ ອີ້ ໃນປີ 2020 ນີ້, ໂດຍຄັ້ງທີ 1 ໄດ້ມີການການພົບປະສອງຝ່າຍ ໃນເດືອນກຸມພາທີ່ຜ່ານມາ ໃນໂອກາດເຂົ້າຮ່ວມກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5, ລວມທັງກອງປະຊຸມສະໄໝພິເສດ ອາຊຽນ-ຈີນ ວ່າດ້ວຍການລະບາດຂອງພະຍາດ ໂຄວິດ-19 ທີ່ ນະຄອນຫຼວງວຽງຈັນ.

ໃນການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4ດີ ແລະ ການເປັນຄູ່ຮ່ວມຊະຕາກຳ ລາວ-ຈີນ ແລະ ຈີນ-ລາວ ລະຫວ່າງ ສອງພັກ ແລະ ສອງລັດຖະບານ ກໍຄືປະຊາຊົນສອງຊາດ,ຊຶ່ງນັບມື້ນັບໄດ້ຮັບການເສີມຂະຫຍາຍດ້ວຍຄຸນນະພາບໃໝ່ຢ່າງບໍ່ຢຸດຢັ້ງ,ໂດຍໄດ້ສະແດງອອກໃນການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຂອງສອງປະເທດ ຢ່າງເປັນປົກກະຕິ.

ສປປ ລາວ ໄດ້ສະແດງຄວາມຊົມເຊີຍ ແລະສະໜັບສະໜູນຕໍ່ຂໍ້ລິເລີ່ມທີ່ ສະຫາຍ ລັດຖະມົນຕີ ຫວັງ ອີ້ ໄດ້ສະເໜີຢູ່ໃນກອງປະຊຸມສາກົນຜ່ານລະບົບທາງໄກ ກ່ຽວກັບ ຄວາມໝັ້ນຄົງທາງດ້ານຂໍ້ມູນຂ່າວສານສາກົນ (Global Initiative on Data Security), ໃນວັນທີ 08 ກັນຍາ 2020 , ຊຶ່ງເປັນຂໍ້ລິເລີ່ມທີ່ມີຄວາມໝາຍຄວາມສໍາຄັນ ແລະ ເປັນປະໂຫຍດຕໍ່ຫຼາຍປະເທດ ໃນພາກພື້ນ ແລະ ສາກົນ ໃນການພັດທະນາເສດຖະກິດ-ສັງຄົມ ເພື່ອຄວາມກ້າວໜ້າທາງເຕັກໂນໂລຊີ, ຄວາມປອດໄພທາງດ້ານຂໍ້ມູນຂ່າວສານ, ລວມທັງຄວາມໝັ້ນຄົງຂອງຊາດ ແລະ ຜົນປະໂຫຍດສ່ວນລວມ.

ພ້ອມກັນນີ້, ສປປ ລາວ ຍັງໄດ້ສະແດງການສະໜັບສະໜູນຢ່າງເຕັມປ່ຽມ ຕໍ່ເນື້ອໃນບົດປາໄສຂອງ ສະຫາຍ ປະທານປະເທດ ສີ ຈິ້ນຜິງ ທີ່ໄດ້ກ່າວຜ່ານກອງປະຊຸມທາງໄກ ໃນໂອກາດວັນສ້າງຕັ້ງ ສປຊ ຄົບຮອບ 75 ປີ ໂດຍສະເພາະແມ່ນ ຄຳເຫັນທີ່ສຳຄັນໃນ 6 ຈຸດໃຫຍ່ ຄື: 1.) ການເປັນຄູ່ຮ່ວມຊະຕາກໍາຂອງມວນມະນຸດ; 2.) ການຮ່ວມມືຕ່າງຝ່າຍຕ່າງມີຜົນປະໂຫຍດ; 3.) ການສົ່ງເສີມການຄ້າຫຼາຍຝ່າຍ; 4.) ແນວຄິດການພັດທະນາແບບໃໝ່; 5.) ການຮ່ວມມືໃນຂອບຫຼາຍຝ່າຍ; ແລະ 6.) ການສະໜັບສະໜູນຄວາມເປັນແກນກາງຂອງສະຫະປະຊາຊາດ ແລະ ອື່ນໆ.

ພ້ອມກັນນັ້ນ, ສອງຝ່າຍ ຍັງໄດ້ເຫັນດີເປັນເອກະພາບ ຕໍ່ການຕີລາຄາການຮ່ວມມືສອງຝ່າຍ ກໍຄື ລະຫວ່າງສອງກະຊວງການຕ່າງປະເທດໃນໄລຍະຜ່ານມາພາຍໃຕ້ສະຖານະການໃໝ່ຂອງການແຜ່ລະບາດຂອງເຊື້ອພະຍາດ ໂຄວິດ-19 ແລະ ສະພາບການສາກົນໃນປັດຈຸບັນໃນດ້ານຕ່າງໆເຊັ່ນ: ດ້ານການເມືອງຄວາມໝັ້ນຄົງ, ສອງຝ່າຍ ໄດ້ມີການຮ່ວມມືກັນຢ່າງໃກ້ຊິດ ແລະ ແລກປ່ຽນຂໍ້ມູນ ຊຶ່ງກັນ ແລະ ກັນ ຢ່າງເປັນປະຈຳ ເຮັດໃຫ້ຊາຍແດນ ລາວ-ຈີນ ເປັນຊາຍແດນມິດຕະພາບ, ບ້ານໄກ້ເຮືອນຄຽງ ຕາມທິດ 4 ດີ ແລະ ຄູ່ຮ່ວມຊະຕາກຳອັນແທ້ຈິງ; ດ້ານເສດຖະກິດ ແລະ ການຄ້າ, ສອງຝ່າຍ ໄດ້ສະແດງການສະໜັບສະໜູນນະໂຍບາຍ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ຊຶ່ງຈະນໍາຜົນປະໂຫຍດອັນໃຫຍ່ຫຼວງ ມາໃຫ້ແກ່ບັນດາປະເທດຕ່າງໆທີ່ເຂົ້າຮ່ວມ ໂດຍສະເພາະ ສຳລັບ ສປປ ລາວ ແມ່ນໄດ້ໃຫ້ຄວາມສຳຄັນ ແລະ ເຂົ້າຮ່ວມຢ່າງຕັ້ງໜ້າ ໂດຍໄດ້ເຊື່ອມໂຍງ ລະຫວ່າງ ຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລ ເປັນປະເທດເຊື່ອມໂຍງເຊື່ອມຈອດ” ຂອງ ສປປ ລາວ ເຂົ້າກັບຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ, ໂດຍຖືເອົາການກໍ່ສ້າງທາງລົດໄຟ ລາວ-ຈີນ ແລະ ທາງດ່ວນ ວຽງຈັນ-ວັງວຽງ, ວັງວຽງ-ຫຼວງພະບາງ, ຫຼວງພະບາງ-ອຸດົມໄຊ ໄປຈົນຮອດຊາຍແດນ ລາວ-ຈີນ ດ່ານບໍ່ເຕັນ-ບໍ່ຫານເປັນໜຶ່ງໃນການເຊື່ອມໂຍງຍຸດທະສາດອັນສຳຄັນຂອງສອງປະເທດ ແລະ ຖືເປັນສອງເສັ້ນທາງທີ່ສຳຄັນໃນການປະຕິບັດແລວເສດຖະກິດ ລາວ-ຈີນ, ຈີນ-ລາວ, ຊຶ່ງໂຄງການກໍ່ສ້າງທາງລົດໄຟ ລາວ-ຈີນ ໃນປັດຈຸບັນແມ່ນມີຄວາມຄືບໜ້າຫຼາຍກວ່າ 90,7% ແລະ ໂຄງການທາງດ່ວນ ວຽງຈັນ-ວັງວຽງ ແມ່ນມີຄວາມຄືບໜ້າຫຼາຍກວ່າ 90% ແລະ ຄາດວ່າ ຈະເປີດນຳໃຊ້ ໃນວັນທີ 2 ທັນວາ 2020 ນີ້.

ນອກຈາກນີ້, ຍັງມີໂຄງການຮ່ວມມືອື່ນໆທີ່ສຳຄັນເຊັ່ນ: ໂຄງການກໍ່ສ້າງໂຮງໝໍມະໂຫສົດຫຼັງໃໝ່ ທີ່ໄດ້ກໍ່ສ້າງສຳເລັດແລ້ວ 60% ແລະ ຄາດວ່າ ຈະສໍາເລັດການກໍ່ສ້າງ ໃນປີ 2021, ໂຄງການແລວທາງເສດຖະກິດ ລາວ-ຈີນ ແລະ ໂຄງການສ້າງສູນກວດພະຍາດ ໂຄວິດ-19 ໃຫ້ແກ່ກະຊວງສາທາລະນະສຸກ; ດ້ານການຄ້າ ແລະ ການລົງທຶນ, ສອງຝ່າຍ ໄດ້ສະແດງຄວາມຍິນດີທີ່ເຫັນວ່າໄດ້ມີການຂະຫຍາຍຕົວສູງໃນຊຸມປີຜ່ານມາ, ໃນປີ 2019 ສປ ຈີນ ເປັນປະເທດລົງທຶນອັນດັບ 1 ຢູ່ ສປປ ລາວ ມີຈຳນວນເຖິງ 785 ໂຄງການ, ລວມມູນຄ່າ 12 ຕື້ ໂດລາ ສະຫະລັດ ແລະ ປະເທດຄູ່ຄ້າລາຍໃຫຍ່ ອັນດັບ 2 ຂອງ ສປປ ລາວ, ມີມູນຄ່າການຄ້າ ບັນລຸໄດ້ 3,540 ລ້ານໂດລາ ສະຫະລັດ, ເພີ່ມຂຶ້ນ 17,4%, ມູນຄ່າການນໍາເຂົ້າມີ 1,600 ລ້ານໂດລາ ສະຫະລັດ, ເພີ່ມຂຶ້ນ 29,6% ແລະ ມູນຄ່າສົ່ງອອກມີ 1,940 ລ້ານໂດລາ ສະຫະລັດ, ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີຜ່ານມາ.

ສອງຝ່າຍ ຍັງຕົກລົງເຫັນດີ ໃນການຈັດຕັ້ງປະຕິບັດຊ່ອງທາງໄວຮ່ວມກັນ (Fast-Track Lane) ໃນໄລຍະການແຜ່ລະບາດຂອງພະຍາດ ໂຄວິດ-19 ເພື່ອສົ່ງເສີມການໄປມາຫາສູ່ກັນ ລະຫວ່າງ ພະນັກງານ, ເຈົ້າໜ້າທີ່ກ່ຽວຂ້ອງ ກໍຄື ແຮງງານ ແລະ ຊ່ຽວຊານ ສຳລັບໂຄງການໃຫຍ່ໆທີ່ສຳຄັນ ລະຫວ່າງສອງປະເທດ, ຊຶ່ງຊ່ອງທາງດັ່ງກ່າວ ຈະເປັນການປະກອບສ່ວນເຂົ້າໃນການສົ່ງເສີມການຮ່ວມມື ເພື່ອຊ່ວຍຟື້ນຟູເສດຖະກິດຂອງ ສປປ ລາວ ກໍຄື ເຮັດໃຫ້ການປະຕິບັດໂຄງການຕ່າງໆຂອງ ສປ ຈີນ ຢູ່ ສປປ ລາວ ສຳເລັດຕາມຄາດໝາຍ.

ພ້ອມນັ້ນ, ສອງຝ່າຍ ຍັງເຫັນດີໃນດ້ານຫຼັກການ ໃຫ້ເປີດນຳໃຊ້ຊ່ອງທາງສີຂຽວ ເພື່ອອຳນວຍຄວາມສະດວກໃຫ້ແກ່ລົດບັນທຸກສິນຄ້າຜ່ານແດນ ລາວ-ຈີນ, ຈີນ-ລາວ ຢູ່ດ່ານສາກົນບໍ່ເຕັນ-ບໍ່ຫານ, ແຂວງຫຼວງນໍ້າທາ ໃຫ້ມີຄວາມວ່ອງໄວຂຶ້ນ. ນອກຈາກນີ້, ສອງຝ່າຍ ຍັງໄດ້ປຶກສາຫາລື ກ່ຽວກັບ ທິດທາງແຜນການຮ່ວມມືໃນຕໍ່ໜ້າ ໂດຍສະເພາະແມ່ນ ການສະເໜີແຜນການສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຈີນ, ຈີນລາວ ຄົບຮອບ 60 ປີ ແລະ ປີມິດຕະພາບ ລາວ-ຈີນ ໃນປີ 2021, ພ້ອມທັງປຶກສາຫາລື ກ່ຽວກັບ ການສືບຕໍ່ຮ່ວມມືກັນຢ່າງໃກ້ຊິດ ແລະ ຊ່ວຍເຫຼືອຊຶ່ງກັນ ແລະ ກັນ ໃນການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ເພື່ອປ້ອງກັນບໍ່ໃຫ້ກັບມາລະບາດອີກຮອບໃໝ່.

ໃນໂອກາດນີ້, ສະຫາຍ ລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ຕໍ່ຜົນສຳເລັດທີ່ ພັກ ແລະ ລັດຖະບານ ແຫ່ງ ສປ ຈີນ ຍາດມາໄດ້ໃນການຄວບຄຸມ ແລະ ສະກັດກັ້ນ ການແຜ່ລະບາດຂອງເຊື້ອພະຍາດ ໂຄວິດ-19, ພ້ອມທັງສະແດງຄວາມຂອບໃຈ ແລະ ຮູ້ບຸນຄຸນຕໍ່ ສປ ຈີນ ທີ່ໄດ້ບິແບ່ງການຊ່ວຍເຫຼືອອັນມີຄຸນຄ່າ ໃຫ້ແກ່ ສປປ ລາວ ໃນການປ້ອງກັນ ແລະ ຕໍ່ສູ້ກັບພະຍາດ ໂຄວິດ-19 ນັບແຕ່ຕົ້ນຈົນເຖິງປັດຈຸບັນ, ຊຶ່ງເປັນການປະກອບສ່ວນອັນສຳຄັນ ເຮັດໃຫ້ ສປປ ລາວ ປະສົບຜົນສຳເລັດຢ່າງສູງ ໃນການປ້ອງກັນ ແລະ ຄວບຄຸມພະຍາດດັ່ງກ່າວ ໃນປັດຈຸບັນ ແລະ ສະແດງຄວາມເຊື່ອໝັ້ນຢ່າງໜັກແໜ້ນວ່າ ດ້ວຍບົດຮຽນອັນອຸດົມສົມບູນ ແລະ ມາດຕະການທີ່ມີປະສິດທິຜົນສູງ, ສປຈີນ ຈະສາມາດຄວບຄຸມພະຍາດດັ່ງກ່າວ ໄດ້ຢ່າງສິ້ນເຊີງ ແລະ ປະສົບຜົນສຳເລັດໃນການຜະລິດວັກແຊັງ ອອກມາຮັບໃຊ້ສັງຄົມໃນໄວໆນີ້.

ໃນຂະນະດຽວກັນ,ສະຫາຍ ລັດຖະມົນຕີ ຫວັງ ອີ້ ກໍໄດ້ສະແດງຄວາມຂອບໃຈມາຍັງ ພັກ,ລັດຖະບານ ແຫ່ງ ສປປ ລາວ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນການມາຢ້ຽມຢາມທາງການ ສປປ ລາວ ຂອງຕົນໃນຄັ້ງນີ້ ແລະ ສະແດງຄວາມຍິນດີຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ,ການພົວພັນແບບຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4ດີ ແລະ ເປັນຄູ່ຮ່ວມຊະຕາກຳ ລາວ-ຈີນ, ຈີນລາວ ລະຫວ່າງ ສອງພັກ-ສອງລັດຖະບານ ກໍຄື ປະຊາຊົນສອງຊາດ ລາວ ແລະ ຈີນ ໃຫ້ນັບມື້ນັບໄດ້ຮັບການເສີມຂະຫຍາຍ ທັງລວງກວ້າງ,ລວງເລິກ ແລະ ໃຫ້ມີປະສິດທິຜົນ,ນໍາເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ ລາວ ແລະ ຈີນ.

ພາຍຫຼັງສຳເລັດການພົບປະສອງຝ່າຍໄດ້ມີການແລກປ່ຽນຈົດໝາຍແລກປ່ຽນໂຄງການຊ່ວຍເຫຼືອລ້າ 3 ສະບັບ ຄື: 1.) ໂຄງການຊ່ວຍເຫຼືອລ້າ ກ່ຽວກັບ ອຸປະກອນຕ້ານໄຂ້ເລືອດອອກ; 2.) ໂຄງການພື້ນຖານໂຄງລ່າງ ການພັດທະນາຊົນນະບົດ ໄລຍະ 2; ແລະ 3.) ໂຄງການແລກປ່ຽນ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສປ ຈີນ ກ່ຽວກັບ ການຮັບເອົາສິດພິເສດທາງດ້ານພາສີ 0% ໃຫ້ແກ່ 97% ຂອງລາຍການສິນຄ້າທັງໝົດ (GSP 97%).

ໃນໂອກາດຢ້ຽມຢາມທາງການ ສປປ ລາວ ໃນຄັ້ງນີ້,ສະຫາຍ ລັດຖະມົນຕີ ຫວັງ ອີ້ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ທີ່ ທຳນຽບປະທານປະເທດ ແລະ ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ທີ່ ສຳນັກງານນາຍົກລັດຖະມົນຕີ.

ການປັບປຸງຂະຫຍາຍເສັ້ນທາງແຕ່ສີເກີດ – ໂພນໂຮງ ຍາວ 58 ກິໂລແມັດ, ໃນນັ້ນແຕ່ສີເກີດຫາສົງເປືອຍ ເປັນທາງ 4 ເລນ ແລະ ແຕ່ສົງເປືອຍຫາໂພນໂຮງ ເປັນທາງ 2 ເລນ  ໃຫຍ່ ກຳລັງຂຸ້ນຂ້ຽວເພື່ອໃຫ້ສຳເລັດຕາມແຜນການ. ຢ່າງໃດກໍຕາມ, ໃນໄລຍະການກໍ່ສ້າງການສັນຈອນຈະມີຄວາມຫຍຸ້ງຍາກ, ຂະນະທີ່ລັດຖະມົນຕີກະຊວງ ຍທຂ ໄດ້ລົງຕິດຕາມເພື່ອຊຸກຍູ້ການກໍ່ສ້າງໂດຍເນັ້ນໃຫ້ເອົາໃຈໃສ່ລະບົບບໍລິການລະບາຍການສັນຈອນໃນໄລຍະທີ່ກຳລັງດຳເນີນການກໍ່ສ້າງ ເພື່ອໃຫ້ພາຫະນະຜ່ານໄປ – ມາໄດ້ສະດວກ.

ໂຄງການປັບປຸງ ແລະ ສ້ອມແປງທາງເລກ 13 ເໜືອ ແຕ່ສາມແຍກສີເກີດ ນະຄອນຫຼວງວຽງຈັນ ຫາ ໂພນໂຮງ ແຂວງວຽງຈັນ ມີຄວາມຍາວທັງໝົດ 58 ກິໂລແມັດ ໃນມູນຄ່າກໍ່ສ້າງ 128 ລ້ານໂດລາ ເຊິ່ງມີກໍານົດກໍ່ສ້າງໃຫ້ສໍາເລັດພາຍໃນ 3 ປີ. ເປັນໂຄງການສຳຄັນຂອງລັດຖະບານ ເພື່ອເຮັດໃຫ້ການເດີນທາງຈາກໂພນໂຮງ ຫາ ນະຄອນຫຼວງວຽງຈັນ ທີ່ມີການສັນຈອນແອອັດນັ້ນໃຫ້ມີຄວາມສະດວກຂຶ້ນ.

ໂຄງການປັບປຸງ ແລະ ສ້ອມແປງທາງເລກ 13 ເໜືອ ແຕ່ສາມແຍກສີເກີດ ນະຄອນຫຼວງວຽງຈັນ ຫາ ໂພນໂຮງ ແຂວງວຽງຈັນ ໄດ້ຮັບການສະໜັບສະໜູນເງິນກູ້ດອກເບ້ຍຕ່ຳ ຈາກສາມສະຖາບັນການເງິນ ຄື: ທະນາຄານໂລກ ( World Bank ) ໃນມູນຄ່າ 40 ລ້ານໂດລາສະຫະລັດ, ທະນາຄານການລົງທຶນໂຄງລ່າງພື້ນຖານອາຊີ ( AIIB ) ມູນຄ່າ 40 ລ້ານໂດລາສະຫະລັດ, ກອງທຶນນໍດິກ ເພື່ອການພັດທະນາ ( NDF ) ມູນຄ່າ 9,5 ລ້ານໂດລາສະຫະລັດ ແລະ ລັດຖະບານລາວສົມທົບທັງໝົດ ມູນຄ່າ 38,5 ລ້ານໂດລາສະຫະລັດ ລວມມູນຄ່າໂຄງການກໍ່ສ້າງທັງໝົດ 128 ລ້ານໂດລາສະຫະລັດ ໃນມູນຄ່າລວມໂຄງການນີ້ປະກອບມີ: ຄ່າກໍ່ສ້າງ ແລະ ບູລະນະຮັກສາທາງ, ຄ່າເວນຄືນທີ່ດິນ ແລະ ສິ່ງກີດຂວາງ, ຄ່າທີ່ປຶກສາ ແລະ ອື່ນໆ.

ສຳລັບໂຄງສ້າງທາງໄດ້ອອກແບບເປັນໜ້າທາງເບຕົງເສີມເຫຼັກແບ່ງອອກເປັນ 2 ສັນຍາ, ສັນຍາທີ 1 ແຕ່ສາມແຍກສີເກີດ ( ກິໂລແມັດທີ 12 ) ຫາ ບ້ານສົງເປືອຍ ( ກິໂລແມັດທີ 31 ) ແມ່ນປັບປຸງ ແລະ ຂະຫຍາຍໜ້າທາງຈາກ 2 ເລນ ເປັນ 4 ເລນໃຫຍ່, ມີເລນສຳລັບລົດຈັກສອງເບື້ອງເພີ່ມຕື່ມ, ມີທາງຍ່າງສອງເບື້ອງສຳລັບຊຸມຊົນ ແລະ ມີດອນກາງທາງ ເຊິ່ງຄວາມກວ້າງຂອງໜ້າທາງທັງໝົດແມ່ນ 23 ແມັດ.

ສັນຍາທີ 2 ແຕ່ບ້ານສົງເປືອຍ ( ກິໂລແມັດທີ 31 ) ຫາ ໂພນໂຮງ ( ກິໂລແມັດທີ 70 ) ປັບປຸງເປັນທາງສອງເລນໃຫຍ່, ມີສອງເລນນ້ອຍ ສຳລັບລົດຈັກສອງເບື້ອງເພີ່ມຕື່ມບໍ່ມີດອນກາງທາງ ແຕ່ມີໄລຍະຫ່າງໃນການແລ່ນສວນກັນ ແລະ ທາງຄົນຍ່າງສຳລັບຊຸມຊົນ ສຳລັບເຂດບໍ່ມີຊຸມຊົນຈະເປັນບ່າທາງທຳມະດາບໍ່ມີທາງຄົນຍ່າງ ເຊິ່ງ ຄວາມກວ້າງໜ້າທາງທັງໝົດແມ່ນແຕກຕ່າງກັນຈາກ 13 ແມັດ ຫາ 16 ແມັດ ເປັນໄລຍະໆໄປ.

ພິທີເປີດການກໍ່ສ້າງໂຄງການປັບປຸງ ແລະ ສ້ອມແປງເສັ້ນທາງເລກທີ 13 ເໜືອ ສີເກີດ – ໂພນໂຮງ ມີຂຶ້ນເມື່ອວັນທີ  24 ກຸມພາ 2020 ເຊິ່ງ ທ່ານ ລັດສະໝີ ອະລິຍະວົງສິງ ຫົວໜ້າໂຄງການກໍ່ສ້າງ ໂຄງການປັບປຸງ ແລະ ສ້ອມແປງທາງເລກທີ 13 ເໜືອ ແຕ່ສີເກີດ – ໂພນໂຮງ ກ່າວໃນພິທີດັ່ງກ່າວວ່າ: ໂຄງການນີ້ເລີ່ມຈາກບ້ານສີເກີດ ຫາ ໂພນໂຮງ ໄລຍະທາງ 58 ກິໂລແມັດ. ສຳລັບພິທີເປີດການກໍ່ສ້າງໂຄງການດັ່ງກ່າວນີ້ ແມ່ນເປັນການເປີດສະໜາມກໍ່ສ້າງໂຄງການໄລຍະທີ 2   ( ແຕ່ສົງເປືອຍ – ໂພນໂຮງ ) ເຊິ່ງໃນການກໍ່ສ້າງໃຊ້ຮູບແບບເບຕົງເສີມເຫຼັກ ເພື່ອຮັບນໍ້າໜັກການສັນຈອນຕາມມາດຕະຖານຂອງອາຊຽນ ຄື 11 ໂຕນຕໍ່ເພົາ. ດັ່ງນັ້ນ, ຈຶ່ງຮຽກຮ້ອງມາຍັງປະຊາຊົນທີ່ຢູ່ສອງຟາກທາງ ແລະ ຜູ້ໃຊ້ລົດໃຊ້ຖະໜົນໃຫ້ ຄວາມຮ່ວມມື ພ້ອມອໍານວຍຄວາມສະດວກແກ່ການກໍ່ສ້າງດ້ວຍ.

ຫຼ້າສຸດໃນວັນທີ 6 ຕຸລາ 2020 ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ( ຍທຂ ) ພ້ອມດ້ວຍຄະນະໄດ້ລົງເຄື່ອນໄຫວຕິດຕາມສະພາບການສ້ອມແປງທາງ 13 ເໜືອ ໂດຍສະເພາະແມ່ນໄລຍະແຕ່ ສີເກີດ – ໂພນໂຮງ ທີ່ມີຫາງສຽງຈົ່ມວ່າຂອງປະຊາຊົນ ກ່ຽວກັບສະພາບຄວາມຫຍຸ້ງຍາກໃນການສັນຈອນໄປ – ມາ ແລະ ການເປ່ເພຂອງເສັ້ນທາງດັ່ງກ່າວ.

ໃນໂອກາດການລົງເຄື່ອນໄຫວຄັ້ງນີ້ ທ່ານລັດຖະມົນຕີ ແລະ ຄະນະ ໄດ້ເຂົ້າຮ່ວມປະຊຸມຢູ່ແຄັມຂອງບໍລິສັດ ຫູເປີຍ ຊາງຈຽງ ຂົວທາງ ຈຳກັດ ກິໂລແມັດທີ 47 ທາງ 13 ເໜືອ ພ້ອມທັງໄດ້ຮັບຟັງລາຍງານຄວາມຄືບໜ້າຂອງໜ້າວຽກ ແລະ ສະເໜີແຜນການກໍ່ສ້າງ ໄລຍະ 1, ໄລຍະ 2 ແລະ ໄລຍະ 3 ( 10/2020 ຫາ ) ພ້ອມທັງຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີຈາກ ທ່ານ Yoon ISWS Team Leader ຕາງໜ້າ ບໍລິສັດ ຫູເປີຍ ຊາງຈຽງ ຂົວທາງ ຈຳກັດ. ຈາກນັ້ນ, ກໍໄດ້ຮັບຟັງການລາຍງານກ່ຽວກັບສະພາບເສັ້ນທາງ ແລະ ມາດຕະການໃນການສ້ອມແປງໃນຕອນທາງທີ່ກຳລັງກໍ່ສ້າງ ແລະ ຕອນທາງທີ່ຍັງນອນໃນແຜນທີ່ຈະກໍ່ສ້າງໃນໄລຍະເວລາຂອງສັນຍາທີ່ຍັງເຫຼືອຈາກ ທ່ານ ລັດສະໝີ ອາລິຍະວົງສິງ ຫົວໜ້າໂຄງການປັບປຸງ ແລະ ສ້ອມແປງທາງເລກ 13 ເໜືອຕື່ມອີກ.

ໃນໂອກາດດຽວກັນນີ້, ທ່ານລັດຖະມົນຕີ ກໍໄດ້ມີຄວາມເຫັນ ແລະ ໃຫ້ທິດຊີ້ນຳຕໍ່ໂຄງການ ເຊິ່ງໄດ້ເນັ້ນໃຫ້ໂຄງການສືບຕໍ່ແກ້ໄຂການສ້ອມແປງທາງໃນລະດູແລ້ງຕາມແຜນການສ້ອມແປງທາງປີ 2020 – 2021 ໂດຍໃຫ້ແບ່ງເສັ້ນທາງອອກເປັນ 3 ໄລຍະເພື່ອແກ້ໄຂ ຄື: ໄລຍະທີ 1 ແຕ່ສີ  ໄຄ – ສີເກີດ, ໄລຍະທີ 2 ແຕ່ສີເກີດ – ໂພນໂຮງ ແລະ ໄລຍະທີ 3 ແຕ່ໂພນໂຮງ – ວັງວຽງ. ພ້ອມນັ້ນ, ກໍໃຫ້ມີລະບົບບໍລິການລະບາຍການສັນຈອນໃນໄລຍະທີ່ກຳລັງດຳເນີນການກໍ່ສ້າງ ເພື່ອໃຫ້ພາຫະນະຜ່ານ ໄປ – ມາໄດ້ສະດວກຂຶ້ນ.

ຕາມການລົງຕິດຕາມຂອງທີມຂ່າວເສດຖະກິດ – ການຄ້າ ໃນຕົ້ນອາທິດນີ້ເຫັນວ່າການກໍ່ສ້າງພວມຂຸ້ນຂ້ຽວທັງການວຽກທໍ່ລະບາຍນໍ້າ, ການປັບໜ້າທາງ ບາງຈຸດໄດ້ມີການເທເບຕົງໜ້າທາງແລ້ວ, ດັ່ງນັ້ນຜູ້ນໍາໃຊ້ເສັ້ນທາງໃນໄລຍະນີ້ຈະພົບຄວາມຫຍຸ້ງຍາກ ຈຶ່ງຕ້ອງໄດ້ອົດທົນໄປນຳກັນ.

ຂ່າວຈາກ: ເສດຖະກິດ-ການຄ້າ

ສະຫາຍ ພົນຈັດຕະວາ ສົມໃຈ ເພັດທະວົງສີ ກໍາມະການຄະ ນະພັກກົມໃຫຍ່ພະລາທິການ, ຫົວໜ້າກົມນໍ້າມັນເຊື້ອໄຟກອງທັບ ໄດ້ໃຫ້ສໍາພາດຕໍ່ນັກຂ່າວໜັງສືພິມກອງທັບວ່າ: ກົມນໍ້າມັນເຊື້ອໄຟ ແມ່ນຫົວໜ່ວຍການຈັດຕັ້ງໜຶ່ງພາຍໃຕ້ການຊີ້ນໍາ-ນໍາພາໂດຍກົງຂອງກົມໃຫຍ່ພະລາທິການກອງທັບໂດຍມີພາລະບົດບາດໃນການເປັນເສນາທິການໃຫ້ແກ່ກົມໃຫຍ່ພະລາທິການ ແລະ ກະຊວງປ້ອງກັນເທດກ່ຽວກັບວຽກງານນໍ້າມັນເຊື້ອໄຟ.

ໃນຊຸມປີຜ່ານມາພາຍໃຕ້ການຊີ້ນໍາຂອງກະຊວງປ້ອງກັນປະເທດ, ກໍຄືກົມໃຫຍ່ພະລາທິການກອງທັບ, ດັ່ງນັ້ນກົມນໍ້າມັນເຊື້ອ ໄຟໄດ້ເປັນເຈົ້າການເຄື່ອນໄຫວປະຕິບັດໜ້າທີ່ຕາມພາລະບົດບາດຂອງຕົນຢ່າງຕັ້ງໜ້າ ແລະ ມີຜົນສໍາເລັດຢ່າງເພິ່ງພໍໃຈ, ໂດຍ ຖືເອົາ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກມາຈັດຕັ້ງຜັນຂະຫຍາຍໃຫ້ແທດເໝາະກັບໜ້າທີ່ການເມືອງຂອງຕົນໃນນີ້ຂົງເຂດວຽກງານພັກ-ວຽກງານການເມືອງກໍໄດ້ຖືສໍາຄັນ, ໃນການສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກພັກເພື່ອແນໃສ່ສ້າງຄວາມເຊື່ອໝັ້ນອັນໜັກແໜ້ນຕໍ່ການນໍາພາຂອງພັກແຕ່ລະໄລຍະ, ດ້ວຍການຈັດຕັ້ງເຊື່ອມຊຶມບັນດາມະຕິຂອງຄະນະພັກຂັ້ນເທິງ, ປາຖະກະຖາມູນເຊື້ອຂອງຊາດ, ຂອງພັກ ແລະ ຂອງກອງທັບ ອັນໄດ້ເຮັດໃຫ້ພະນັກງານ, ສະມາຊິກພັກພາຍໃນກົມມີຄວາມຮັບຮູ້, ເຂົ້າໃຈ, ເຊື່ອມຊຶມຕໍ່ແນວທາງຂອງພັກ, ມີຄວາມຫ້າວຫັນປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ.

ຄະນະພັກ-ຄະນະກົມ ໄດ້ສຸມໃສ່ການປັບປຸງ-ກໍ່ສ້າງໜ່ວຍພັກຂອງຕົນຕາມທິດສ້າງໜ່ວຍພັກໃຫ້ກາຍເປັນໜ່ວຍພັກປອດໄສ, ເຂັ້ມແຂງ, ໜັກແໜ້ນ, ເພີ່ມທະວີຄວາມສາມັກຄີໃຫ້ເປັນປຶກແຜນພາຍໃນພັກ, ເອົາໃຈໃສ່ປັບປຸງແບບແຜນວິທີເຮັດວຽກ, ວິທີນໍາພາຕາມຫຼັກການລວມສູນປະຊາທິປະໄຕຂອງພັກຢ່າງເຂັ້ມງວດຈົນສາມາດນໍາພາກົມກອງ, ຂະແໜງການເຮັດສໍາເລັດໜ້າ ທີ່ການເມືອງຂອງຕົນເປັນຢ່າງດີ.

ປັດຈຸບັນໜ່ວຍພັກກົມນ້ໍາມັນເຊື້ອໄຟມີສະມາຊິກພັກທັງໝົດ 17 ສະຫາຍ, ເປັນສະມາຊິກພັກສົມບູນທັງໝົດຕະຫຼອດໄລຍະຜ່ານມາໜ່ວຍພັກໄດ້ຮັກສາ ແລະ ເສີມຂະຫຍາຍມູນເຊື້ອກອງຮາກຖານເຂັ້ມແຂງ, ໜ່ວຍພັກຮູ້ນໍາພາຮອບດ້ານ ແລະ ໄດ້ ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ, ແລະ ສະມາຊິກແຕ່ລະສະຫາຍໄດ້ເປັນສະມາຊິກພັກແຂງ, ໄດ້ຮັບນາມມະຍົດເປັນກອງ 3 ປອດ 2 ສະໄໝຕິດຕໍ່ກັນ, ຜ່ານມາກໍໄດ້ສັບຊ້ອນ-ປັບປຸງການຈັດຕັ້ງ ຫຼື ອົງການກົມ, ບັນດາສາງຍຸດທະສາດ ແລະ ກົມກອງຈໍານວນໜຶ່ງເພື່ອໃຫ້ແທດເໝາະກັບຄວາມຕ້ອງການຂອງວຽກງານ ແລະ ຄວາມຮູ້, ຄວາມສາມາດຂອງພະນັກງານທັງນີ້ກໍເພື່ອແນໃສ່ສ້າງພະນັກງານໃຫ້ມີຄວາມຮູ້-ຄວາມສາມາດໃນວຽກງານຕົວຈິງເພື່ອຮັບປະກັນໃຫ້ມີພະນັກງານສືບທອດ, ປ່ຽນແທນຕາມທິດຫັນເປັນໜຸ່ມໄດ້ຢ່າງຕໍ່ເນື່ອງ.

ສໍາລັບວຽກງານປ້ອງກັນ-ກວດກາຄະນະໜ່ວຍພັກໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານຮູ້ເຝິກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດໃຫ້ມີຄວາມເຂັ້ມແຂງໜັກແໜ້ນພ້ອມທັງຕິດຕາມກວດກາ, ປ້ອງກັນສະພາບແນວຄິດ ແລະ ການກະທໍາເພື່ອສະກັດກັ້ນບັນດາປະກົດການຫຍໍ້ທໍ້ທີ່ຈະເກີດຂຶ້ນແນໃສ່ເຮັດໃຫ້ກົມກອງ ກໍຄືໃນທົ່ວຂະແໜງການມີຄວາມສະຫງົບເປັນຢ່າງດີ.

ໃນນາມເປັນເສນາທິການໃຫ້ແກ່ຄະນະພັກອົງການກົມໃຫຍ່ພະລາທິການກອງທັບກໍຄືອົງຄະນະພັກກະຊວງປອງກັນປະເທດ, ຄະນະພັກກົມນໍ້າມັນເຊື້ອໄຟກໍໄດ້ວາງທິດທາງໃນການປັບປຸງ – ກໍ່ສ້າງຂະແໜງການເຊິ່ງໄດ້ກໍານົດເອົາ 7 ວຽກງານໃຫຍ່ເປັນຄາດໝາຍສູ້ຊົນແນ່ໃສ່ຫັນຂະແໜງການໃຫ້ມີຄວາມເຂັ້ມແຂງ, ໜັກແໜ້ນ ແລະ ທັນສະໄໝແຕ່ສິ່ງສໍາຄັນແມ່ນການດໍາເນີນການກໍ່ສ້າງ ແລະ ປັບປຸງບັນດານິຕິກໍາຂອງວິຊາສະເພາະໃຫ້ສອດຄ່ອງກັບສະພາບການໃໝ່ຂອງກອງທັບ, ເປັນຕົ້ນແມ່ນໄດ້ປັບປຸງຂໍ້ກໍານົດກຽວກັບການແບ່ງຂັ້ນຄຸ້ມຄອງຄືນໃໝ່ເຊິ່ງໄດ້ແບ່ງຄວາມຮັບຜິດຊອບໃຫ້ອົງການນໍ້າມັນເຊື້ອໄຟຂັ້ນລຸ່ມຫຼາຍຂຶ້ນ.

ກົມນໍ້າມັນເຊື້ອໄຟເຮັດໜ້າທີ່ເປັນອົງການມະຫາພາກ, ມີໜ້າທີ່ຮັບປະກັນ ແລະ ຕິດຕາມກວດກາການຄຸ້ມຄອງ-ນໍາໃຊ້ຂອງອົງ ການນໍ້ມັນເຊື້ອໄຟຂັ້ນລຸ່ມ, ໄປຄຽງຄູ່ກັນນັ້ນກໍໄດ້ຫັນວຽກງານວິຊາສະເພາະໃຫ້ທັນສະໄໝເທື່ອລະກ້າວໂດຍການນໍາໃຊ້ເຄື່ອງມືທີ່ທັນສະໄໝເຂົ້າໃນວຽກງານດັ່ງກ່າວ, ຜ່ານການດໍາເນີນວຽກງານຕົວຈິງເຫັນວ່າມີປະສິດທິຜົນສູງເຮັດໃຫ້ການຮັບປະກັນນໍ້າມັນເຊື້ອໄຟໄດ້ເຂົ້າສູ່ລວງເລິກ, ສາມາດຕ້ານ ແລະ ສະກັດກັ້ນປະກົດການຫຍໍ້ທໍ້ໃນຂະແໜງການ, ພ້ອມນັ້ນກໍໄດ້ຈັດຕັ້ງຄຸ້ມຄອງ-ນໍາໃຊ້ງົບປະມານທີ່ຂັ້ນເທິງອະນຸມັດຕາມຫຼັກການ-ການເງິນຢ່າງເຂັ້ມງວດ, ທຸກການຈັດຊື້-ຈັດຈ້າງລ້ວນແຕ່ໄດ້ຜ່ານຄະນະກວດກາການຈັດຊື້ຈັດຈ້າງຂອງກະຊວງ, ການຈັດຊື້-ນໍາເຂົ້ານໍ້າມັນເຊື້ອໄຟ, ອຸປະກອນເຕັກນິກນໍ້າມັນເຊື້ອໄຟແມ່ນຈັດຊື້ຕາມຄວາມ ຕ້ອງການນໍາໃຊ້ຕົວຈິງຂອງພາຫະນະເຕັກນິກໃນກອງທັບເຊິ່ງ ໃນຊຸມປີຜ່ານມາໄດ້ຈັດຊື້ ແລະ ນໍາເຂົ້ານໍ້າມັນທຸກຊະນິດໄດ້ 46.870.204 ລິດ, ຈັດຕັ້ງສະໜອງເບີກຈ່າຍຮັບປະກັນໃຫ້ ແຜນການວຽກງານຕ່າງໆຈຳນວນ 45.727.785 ລິດ

ພ້ອມນີ້ ກໍໄດ້ນໍາໃຊ້ງົບປະມານເຂົ້າໃນ ການກໍ່ສ້າງ, ບົວລະບັດ, ສ້ອມແປງພື້ນຖານ ໂຄງ ລ່າງ ໃນນີ້ໄດ້ກໍ່ສ້າງສາງນ້ໍາມັນຂັ້ນຍຸດທະສາດ 1 ແຫ່ງ, ກໍ່ສ້າງປໍ້າເບີກຈ່າຍນໍ້າ ມັນທີ່ທັນສະໄໝໃຫ້ 26 ກົມກອງ, ບົວລະບັດ-ສ້ອມແປງປະກອບ-ຕິດຕັ້ງລະບົບຮັບ-ຈ່າຍທີ່ທັນສະໄໝໃຫ້ສາງນໍ້າມັນຂັ້ນຍຸດທະສາດໄດ້ 9 ສາງ, ຟື້ນຟູ, ສ້ອມແປງພາຫະນະເຕັກນິກເບີກຈ່າຍນໍ້າມັນເຄື່ອນທີ່ ແລະ ຂົນສົ່ງໄດ້ 8 ຄັນ, ດັດແປງປະກອບຊີ ແຕັກໃສ່ພາຫະນະສໍາລັບຂົນສົ່ງນໍ້າມັນໄດ້ 2 ຄັນ, ປະກອບອຸປະກອນເບີກຈ່າຍຍ່ອຍໃຫ້ບັນດາ ກົມກອງໄດ້ 300 ຊຸດ.

ສ່ວນວຽກງານການຮ່ວມມືກັບຕ່າງປະເທດ ກໍໄດ້ເຄື່ອນໄຫວຢ້ຽມຢາມແລກປ່ຽນບົດຮຽນຢູ່ ສ.ສ ຫວຽດນາມ, ຣັດເຊຍ, ພົວ ພັນຈັດຊື້ນໍ້າມັນຈູດ, ນໍ້າມັນຫຼໍ່ລື້ນພິເສດ ຈາກ ສສ ຫຽດນາມ ແລະ ຣັດເຊຍ. ສໍາລັບວຽກງານປັບປຸງກໍ່ສ້າງກໍາລັງໄດ້ກໍ່ສ້າງພະນັກງານວິຊາສະເພາະລະບົບຊັ້ນກາງໄດ້ 3 ຊຸດ ຈໍານວນ 60 ສະຫາຍ, ຊັ້ນຕົ້ນວິໄຈນໍ້າມັນ 1 ຊຸດ ຈໍາ ນວນ 20 ສະຫາຍ, ຊັ້ນຕົ້ນຄຸ້ມຄອງນໍ້າມັນເຊື້ອໄຟ 3 ຊຸດ ຈໍານວນ 130 ສະຫາຍໃນນີ້ມີກໍາລັງກະຊວງ ປກສ 30 ສະຫາຍ, ສົ່ງໄປຮຽນວິຊາສະເພາະນໍ້າມັນເຊື້ອໄຟ ລະດັບປະລິຍາຕີ ຢູ່ ສສ ຫວຽດ ນາມ 6 ສະຫາຍ, ສະຫະພັນ ຣັດເຊຍ 10 ສະຫາຍ, ໄປບໍາລຸງໄລຍະສັ້ນຢູ່ ສສ ຫວຽດນາມ 20 ສະຫາຍ, ໄດ້ຄົ້ນຄ້ວາແປ ແລະ ຮຽບຮຽງເອກະສານວຽກງານນໍ້າມັນເຊື້ອໄຟຂອງກອງທັບປະເທດເພື່ອນບ້ານໄດ້ 800 ໜ້າ, ຂຶ້ນຫ້ອງສິດສອນຊ່ວຍຄະນະວິຊາຄູນໍ້າມັນເຊື້ອໄຟຢູ່ວິທະນາຄານພະລາທິການໄດ້ຫຼາຍຮ້ອຍຊົ່ວໂມງ.

ນອກຈາກວຽກງານວິຊາສະເພາະແລ້ວ ໃນຊຸມປີຜ່ານມາກົມນໍ້າມັນເຊື້ອໄຟຍັງໄດ້ ເອົາໃຈໃສ່ຊີ້ນໍາ-ນໍາພາກົມກອງ, ອົງການ, ກົມ ແລະ ບັນດາສາງນໍ້າມັນທີ່ຂຶ້ນກັບໃຫ້ມີຄວາມສະ ຫງົບ, ປອດໄພ ແລະມີຄວາມໜັກ ແໜ້ນ, ຈັດຕັ້ງຮັບປະກັນ ແລະ ຄຸ້ມ ຄອງນໍ້າມັນເຊື້ອໄຟໃຫ້ທຸກວຽກງານໄດ້ຄົບຖ້ວນ, ທັນເວລາ ແລະ ຍັງມີສ່ວນແຮໄວ້ສາມາດຮັບປະກັນໃຫ້ທຸກການເຄື່ອນໄຫວຂອງ ກອງທັບໄດ້ເຮັດສໍາເລັດໜ້າທີ່, ທົ່ວຂະແໜງການໄດ້ຮັບການປັບປຸງ ແລະ ຫັນເປັນທັນສະໄໝເທື່ອລະກ້າວ, ສາມາດຕ້ານ ແລະ ສະກັດກັ້ນປະກົດການຫຍໍ້ທໍ້ໃນຂະແໜງການໃຫ້ໝົດໄປຢ່າງສິ້ນເຊີ້ງ ແລະ ເພື່ອສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດທີ່ຈະໄຂຂຶ້ນໃນມໍ່ໆນີ້ ໃຫ້ມີຄວາມໝາຍຄວາມສໍາຄັນຢ່າງເລິກເຊິ່ງ ກົມນໍ້າມັນເຊື້ອໄຟ ກໍຄືບັນດາສາງນໍ້າມັນທີ່ຂຶ້ນກັບ ກໍໄດ້ຖືເອົາວຽກງານດ້ານວິຊາສະເພາະຂອງຕົນເປັນຈຸດສຸມຕິດພັນກັບ 4 ໜ້າທີ່ໃຫຍ່ 26 ແຜນງານຂອງຄະນະພັກກະ ຊວງປ້ອງກັນປະເທດວາງອອກໂດຍສະເພາະແມ່ນການຈັດຕັ້ງ ຮັບປະກັນ ແລະ ຄຸ້ມຄອງນໍ້າມັນ ເຊື້ອໄຟ ເວລາໃດກໍຮັບປະກັນໃຫ້ທຸກແຜນການວຽກງານຂອງກອງທັບໃຫ້ຄົບຖ້ວນ, ທັນເວລາ, ຮັບປະກັນໃຫ້ກົມກອງມີຄວາມສະຫງົບປອດໄພ, ເອົາໃຈໃສ່ການປະຕິບັດ 7 ລະບອບ 18 ວຽກໃຫ້ເຂັ້ມງວດ, ເອົາໃຈໃສ່ສຶກສາອົບຮົມໃຫ້ພະນັກງານ-ນັກຮົບເຂົ້າໃຈ, ເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກກໍຄືຄວາມຮັບຜິດ ຊອບຕໍ່ໜ້າທີ່ການເມືອງຂອງຕົນ, ຕັ້ງໜ້າປັບປຸງຄ້າຍຄູໃຫ້ເປັນລະບຽບຮຽບຮ້ອຍ, ສະອາດ ແລະ ສວຍງາມ ແລະ ເຂົ້າຮ່ວມທຸກຂະບວນການແຂ່ງຂັນທີ່ຂັ້ນເທິງຈັດຂຶ້ນ, ພ້ອມກັນນັ້ນກໍໄດ້ຕັ້ງໜ້າສ້າງວຽກງານພະລາທິການກັບທີ່ ເພື່ອປັບປຸງຊີວິດການເປັນຢູ່ຂອງ ພະນັກງານ-ນັກຮົບພາຍໃນກົມ ກອງໃຫ້ດີຂຶ້ນເລື້ອຍໆ.

ໂດຍ: ແສງເດືອນ

ພິທີມອບ-ຮັບເຮືອບິນ IL-103 ຈໍານວນ 2 ລໍາລະຫວ່າງ ບໍລິສັດ ໄຊລຽນກຣຸບ ແລະ ກອງບັນຊາການທະຫານອາ ກາດ ກອງທັບປະຊາຊົນລາວໄດ້ຈັດຂຶ້ນຢູ່ສະໜາມບິນທົ່ງໄຫຫີນແຂວງຊຽງຂວາງ , ໃນວັນທີ 8 ຕຸລາ 2020 ນີ້, ໂດຍການເຂົ້າຮ່ວມເປັນປະທານຂອງ ທ່ານ ພົນຈັດຕະວາ ບຸນມາ ຈັນທະວົງສາ ຮອງຫົວໜ້າກອງບັນຊາການທະຫານອາກາດ, ມີຄະນະຫ້ອງເຕັກນິກ (ກທອ), ຄະນະພັກ-ຄະນະບັນຊາກອງພັນໃຫຍ່ 702 ແລະ ບໍລິສັດໄຊລຽນກຣຸບພ້ອມດ້ວຍພະນັກງານວິຊາການທັງສອງຝ່າຍເຂົ້າຮ່ວມ.

ທ່ານ ນາງ ຫອມມະລີ ເພັດທະນູ ຜູ້ຈັດການບໍລິສັດໄຊລຽນກຣຸບ ຕາງໜ້າໃຫ້ບໍລິສັດໄຊລຽນ ກຣຸບ ຂຶ້ນກ່າວມອບເຮືອບິນ IL-103 ຈໍານວນ 2 ລໍາ ຄື: ເບີ 735 ແລະ 732 ໃຫ້ກອງບັນຊາການທະຫານອາກາດອີງຕາມຄວາມຮຽກຮ້ອງຕ້ອງການຂອງວຽກງານ ການບິນເພື່ອຮັບໃຊ້ໜ້າທີ່ການເມືອງຂອງພັກ-ລັດ ເຮັດໃຫ້ເຮືອບິນສາມາດນຳໃຊ້ເຂົ້າໃນວຽກງານການບິນອົບຮົມ-ຫັດແອບ ໄດ້ຢ່າງຕໍ່ເນື່ອງໃຫ້ນັກບິນມີ ຄວາມຊຳນິຊຳນານໃນການຂັບ ຂີ່ຂັ້ນພື້ນຖານ ແລະ ຜົນສຳເລັດ ຂອງການສ້ອມແປງໃຫຍ່, ການປະກອບ ແລະ ກວດກາເຕັກນິກທົດລອງຕົວຈິງໃນການແປງເປັນໄລຍະເວລາ 5 ເດືອນ ນັບແຕ່ມື້ເຊັນສັນຍາເປັນຕົ້ນມາ ບໍລິສັດ ໄດ້ປະຕິບັດການສ້ອມແປງແຕ່ ວັນທີ 25/9/2020 ແລະ ສໍາເລັດ ການສ້ອມແປງ ວັນທີ 3/10/ 2020.

ໂອກາດນີ້, ທ່ານ ພັນເອກ ສອນທອງ ແກ້ວຈັນດາ ຫົວໜ້າ ຫ້ອງເຕັກນິກ ກອງບັນຊາການ ທະຫານອາກາດ ຕາງໜ້າໃຫ້ຄະ ນະພັກ-ຄະນະບັນຊາ ກອງບັນຊາ ການທະຫານອາກາດຂຶ້ນກ່າວ ຮັບເອົາເຮືອບິນ IL-103 ຈຳ ນວນ 2 ລໍາ, ນໍ້າ ເບີ 735 ແລະ 732 ເປັນທາງການ.

ພ້ອມນີ້, ຍັງ ໄດ້ເຊັນສັນຍາລະຫ່ວາງບໍລິສັດ ໄຊລຽນກຣຸບ ແລະ ກອງບັນຊາ ການທະຫານອາກາດ, ຈາກນັ້ນ, ກໍມອບເຮືອບິນ IL- 103 ຈໍານວນ 2 ລໍາ, ນໍ້າເບີ 735 ແລະ 732 ໃຫ້ກອງພັນໃຫຍ່ 702 ເປັນຜູ້ນຳ ໃຊ້ເຂົ້າໃນການເຝິກແອບຮໍ່າຮຽນ ແລະ ກຽມພ້ອມສູ້ຮົບຕາມໜ້າທີ່ການເມືອງທີ່ຂັ້ນເທິງມອບໃຫ້ ດ້ວຍຄວາມຮັບຜິດຊອບສູງ.

ລັດຖະບານ ໃຫ້ຄວາມສໍາຄັນຕໍ່ກັບວຽກງານຄຸ້ມຄອງໄພພິບັດ ຄຽງຄູ່ກັບວຽກງານອື່ນໆ ຢ່າງແຂງແຮງເນື່ອງຈາກເປັນວຽກງານຫນື່ງທີ່ນອນຢູ່ໃນແນວທາງນະໂຍບາຍ ຂອງພັກແຜນພັດທະນາເສດຖະກິດ-ສັງຄົມຂອງລັດຖະບານທີ່ກໍານົດນະໂຍບາຍຊ່ວຍເຫລືອດ້ານມະນຸດສະທໍາຕໍ່ປະຊາຊົນລາວບັນດາເຜົ່າແລະຜູ້ປະສົບເຄາະຮ້າຍຈາກໄພພິບັດ, ຍາດແຍ່ງເອົາການຊ່ວຍເຫລືອ ຈາກພາກສ່ວນຕ່າງໆໃນສັງຄົມສະຫມັກໃຈເຂົ້າມາມີສ່ວນຮ່ວມໃນວຽກງານຄຸ້ມຄອງໄພພິບັດເຮັດໃຫ້ຜູ້ ຖືກເຄາະຮ້າຍຈາກໄພທໍາມະຊາດໄດ້ຮັບການຊ່ວຍເຫລືອຢ່າງເຫມາະສົມແລະສາມາດກັບມາດໍາລົງຊີວິດຢ່າງເປັນປົກກະຕິ.

ໃນໂອກາດໃຫ້ສໍາພາດຕໍ່ສື່ມວນຊົນໃນວັນທີ13 ຕຸລາ 2020, ເນື່ອໃນໂອກາດວັດຄຸ້ມຄອງໄພ ພິບັດແຫ່ງຊາດ,ອາຊຽນ ແລະວັນຫຼຸດຜ່ອນໄພພິບັດສາກົນວັນທີ12 ຕຸລາ ຢູ່ກະຊວງແຮງງານແລະສະຫວັດດີການສັງຄົມ ທ່ານ ຄໍາແພງໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ:ວຽກງານ ຄຸ້ມຄອງໄພພິບັດຍັງມີບົດບາດສໍາຄັນທາງດ້ານການແກ້ໄຂບັນຫາຍຸດທະສາດການພັດທະນາເສດຖະກິດສັງຄົມ, ການຂະຫຍາຍກໍາລັງການຜະລິດ, ການຜະລິດກະສິກໍາເພື່ອຄໍ້າປະກັນສະບຽງອາຫານ, ການຫັນເປັນອຸດສະຫະກໍາທີ່ທັນສະໄຫມລວມເຖີງການປັບປຸງຊີວິດການເປັນຢູ່ຂອງປະຊາຊົນບັນເຜົ່າເນື່ອງຈາກບັນຫາໄພພິບັດທາງທໍາມະຊາດທີ່ເກີດຂື້ນແຕ່ລະຄັ້ງລ້ວນແຕ່ສ້າງຄວາມເສຍຫາຍໃນດ້ານຕ່າງໆເປັນຈໍານວນບໍ່ຫນ້ອຍເຊີ່ງລັດຖະບານໄດ້ມີແຜນການຕອບໂຕ້ຢ່າງທັນການໂດຍການຮ່ວມມືກັບບັນດາປະເທດເພື່ອນມິດສາກົນແລະພາກສ່ວນຕ່າງໆ ໃນສັງຄົມເພື່ອຟື້ນຟູພື້ນຖານໂຄງລ່າງດ້ານຕ່າງໆທີ່ໄດ້ຮັບຄວາມເສຍຫາຍຈາກໄພພິບັດໃຫ້ກັບຄືນສູ່ສະພາບປົກກະຕິ

ວຽກງານຄຸ້ມຄອງໄພພິບັດຍັງແມ່ນປັດໄຈສໍາຄັນທີ່ສົ່ງເສີມເຮັດໃຫ້ປະຊາຊົນລາວບັນດາເຜົ່າສາມາດໍາລົງຊີວິດຢ່າງມີຄວາມສຸກ,ມີຄວາມເຂັ້ມແຂງທາງດ້ານຮ່າງກາຍ, ມີພາລະນາໄມສົມບູນ,ສະນັ້ນລັດຖະບານກໍ່ຄືກະຊວງແຮງງານແລະສະຫວັດດີການສັງຄົມຕ້ອງສືບຕໍ່ປະຕິບັດນະໂຍບາຍການຊ່ວຍເຫລືອບັນເທົາທຸກແລະສົງເຄາະໃຫ້ປະຊາຊົນທີ່ໄດ້ຮັບຜົນກະທົບຈາກໄພພິບັດເພື່ອໃຫ້ປະສົບໄພພິບັດແລະຜູ້ດ້ອຍໂອກາດສາມາດເຂົ້າເຖິງແລະໄດ້ຮັບການຊ່ວຍເຫລືອຢ່າງທັນການເປັນຕົ້ນ:ການຄໍ້າປະກັນສະບຽງອາຫານ, ໂພສະນາການ, ການສຶກສາ, ທີ່ຢູ່ອາໃສ ແລະ ການບໍລິການອື່ນໆ.

ທ່ານ ຄໍາແພງ ໄຊສົມແພງ ໃຫ້ຮູ້ຕື່ມວ່າ:ປະຈຸບັນລາວໄດ້ມີກົດໝາຍວ່າດ້ວຍການຄຸ້ມຄອງໄພພິບັດຊື່ງໄດ້ຖືກຮັບຮອງແລະປະກາດໃຊ້ເປັນທາງການໃນເດືອນສິງຫາປີ2019ທີ່ຜ່ານມາ.ຈຸດປະສົງຂອງກົໝາຍສະບັບນີ້ ໄດ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງໄພພິບັດ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດຢ່າງມີປະສິດທິພາບ, ປະສິດທິຜົນແລະທັນສະໄໝຮັບປະກັນການສະໜອງຂໍ້ມູນຂ່າວສານວ່ອງໄວ, ຊັດເຈນແນໃສ່ເຝົ້າລະວັງ,ຫຼຸດຜ່ອນຜົນກະທົບທີ່ເກີດຈາກໄພພິບັດຕໍ່ສູຂະພາບ, ຊີວິດ, ຊັບສິນຂອງລັດ, ລວມໝູ່, ປະຊາຊົນ, ສິ່ງແວດລ້ອມ ແລະ ໂຄງລ່າງພື້ນຖານພ້ອມທັງຟື້ນຟູ, ບູລະນະແລະກໍ່ສ້າງຄືນໃໝ່ຫຼັງໄພພິບັດ, ສາມາດເຊື່ອມໂຍງກັບພາກພື້ນ ແລະ ສາກົນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຕາມທິດສີຂຽວ, ຍືນຍົງ ແລະ ຄວາມໝັ້ນຄົງຂອງຊາດ, ສໍາລັບຄວາມສຳຄັນ ແລະ ພັນທະຂອງລາວຕໍ່ການປະກອບສ່ວນເຂົ້າໃນວຽກງານຄຸ້ມຄອງໄພພິບັດຂອງອາຊຽນ ແລະ ສາກົນໄດ້ສະຫນັບສະຫນູນການຮັບຮອງເອົາບັນດານິຕິກຳກ່ຽວກັບການຫຼຸດຜ່ອນຄວາມສ່ຽງໄພພິບັດຂອງບັນດາຜູ້ນຳໂລກເຊັ່ນ: ສັນຍາປາຣີ ວ່າດ້ວຍການປ່ຽນແປງທາງດິນຟ້າອາ ກາດ, ເຊິ່ງຖືກຮັບຮອງເອົາໃນກອງປະ ຊຸມສະມັດຊາໃຫຍ່ອົງການ ສະຫະປະຊາດຄັ້ງທີ 70 ທີ່ ນິວຢອກ ແລະ ການ ຮັບຮອງເອົາຂອບແຜນງານເຊັນໄດວ່າດ້ວຍ ການຫຼຸດຜ່ອນຄວາມສ່ຽງໄພພິບັດ ໃນກອງປະຊຸມໂລກວ່າດ້ວຍການຫຼຸດຜ່ອນຄວາມສ່ຽງໄພພິບັດຄັ້ງທີ 3 ໃນປີ 2015 ທີ່ ປະເທດຍີ່ປຸ່ນ, ເຊິ່ງຂອບແຜນວຽກດັ່ງກ່າວ ໄດ້ເປັນທິດທາງ ແລະ ບ່ອນອີງອັນສຳຄັນໃນການປະສານງານແລະຈັດຕັ້ງປະຕິບັດຮ່ວມກັນເພື່ອຫຼຸດຜ່ອນ ຄວາມສ່ຽງໄພພິບັດໄປຄຽງຄູ່ກັບຍຸດທະສາດການພັດທະນາແບບຍືນຍົງ (SDG) ຈົນຮອດປີ 2030 ແລະ ອື່ນໆ.

ໂດຍ: ເດດອາລຸນ ແກ້ວວິໄລວົງ

​ໃນ​ວັນ​ທີ 10 ຕຸລາ 2020 ທີ່​ຜ່ານ​ມາ​ນີ້​ຢູ່ທີ່​ໂຮງຮຽນປະຖົມ​ບ້ານ​ໂຄກ​ສະຫວ່າງ​ເມືອງ​ຍົມ​ມະລາ​ດ​ແຂວງ​ຄຳ​ມ່ວນ ສະມາຄົມ​ອ໋ອບ​ໂຣດນະຄອນຫຼວງວຽງຈັນ ມອບ​ອຸປະ​ກອນ​ການ​ຮຽນ​ໃຫ້​ແກ່​​ ​ນ້ອງ​ນັກຮຽນທີ່ໂຮງຮຽນປະຖົມ​ບ້ານ​ໂຄກ​ສະຫວ່າງ ​ໃຫ້ກຽດ​ເປັນ​ປະທານ​​ໂດຍ​ທ່ານ ປາລີ ປັນຍາ​ຮັກ ຫົວໜ້າຫ້ອງການ​ສຶກສາ​ທິການ ​ແລະ ກິລາ​ເມືອງ ​ເຊິ່ງມີ​ບັນດາ​ທ່ານ ສະມາຄົມ​ອ໋ອບ​ໂຣດນະຄອນຫຼວງວຽງຈັນ, ອຳນາດ​ການ​ປົກຄອງ​ບ້ານ, ພໍ່​ແມ່​ປະຊາຊົນ ​ແລະ ນ້ອງ​ນັກຮຽນປະຖົມ​ບ້ານ​ໂຄກ​ສະຫວ່າງ​ເຂົ້າ​ຮ່ວມ​ຢ່າງ​ພ້ອມພຽງ.​

.

.

.

ເພື່ອ​ເປັນ​ການ​ສົ່ງ​ເສີມ​ທາງ​ດ້ານການ​ສຶກສາ​ ​ແລະ ​ເພື່ອ​ໃຫ້​ນ້ອງ​ນັກຮຽນ​ໄດ້​ມີ​ອຸປະກອນ​ການ​ຮຽນທີ່​ຄົບ​ຖ້ວນ ສະ​ນັ້ນ, ທາງ​ສະມາຄົມ​ອ໋ອບ​ໂຣດນະຄອນຫຼວງວຽງຈັນຈຶ່ງ​ໄດ້ລະດົມ​ນຳ​ເອົາ​​ເຄື່ອງ ​ແລະ ອຸ​ປະກອນ​ດັ່ງກ່າວ​ມາ​ມອບ​ໃຫ້ນອກຈາກ​ນີ້​ທາງສະມາຄົມ​ອ໋ອບ​ໂຣດນະຄອນຫຼວງວຽງຈັນຍັງ​ໄດ້​ຊ່ວຍ​ເຫຼືອ​ໂຕະ​ນັກຮຽນຈຳນວນ 10 ຊຸດລວມມູນ​ຄ່າ 2,000,000 ກີບ ​

.

ໂດຍ​ໃຫ້ກຽດຕາງໜ້າຮັບ​ໂດຍ​ທ່ານ ປາລີ ປັນຍາ​ຮັກ ຫົວໜ້າຫ້ອງການ​ສຶກສາ​ທິການ ​ແລະ ກິລາ​ເມືອງ ຫຼັງຈາກ​ນັ້ນ​ທາງສະມາຄົມ​ອ໋ອບ​ໂຣດນະຄອນຫຼວງ ​ແລະ ອຳນາດ​ການ​ປົກ​ຄອງ​ບ້ານ ກໍ່​ໄດ້​ຮ່ວມ​ກັນ​ແຈກ​ຢາຍ​ເຄື່ອງ ​ແລະ ອຸປະກອນ​ການ​ຮຽນ​ໃຫ້​ແກ່​ນ້ອງ​ນັກຮຽນ ​ເຊິ່ງປະກອບ​ມີ 2 ​ໂຮງຮຽນຄື: ​ໂຮງຮຽນປະຖົມສົມບູນ​ບ້ານ​ໂຄກ​ສະຫວ່າງ ​ແລະ ​ໂຮງຮຽນປະຖົມ​ສົມບູນ​ບ້ານ​ໂພນ​ສັງ.

.

ຫຼັງຈາກ​ນັ້ນ​ທ່ານ ປາລີ ປັນຍາ​ຮັກ ຫົວໜ້າຫ້ອງການ​ສຶກສາ​ທິການ ​ແລະ ກິລາ​ເມືອງ ຍັງ​ໄດ້​ຂື້ນ​ໂອ້​ລົມ ​ແລະ ສະ​ແດງ​ຄວາມ​ຂອບ​ໃຈ​ມາ​ຍັງສະມາຄົມ​ອ໋ອບ​ໂຣດນະຄອນຫຼວງວຽງຈັນ ທີ່​ໃຫ້ການ​ຊ່ວຍ​ເຫຼືອທາງ​ດ້ານ​ອຸປະກອນ​ການ​ຮຽນ​ໃຫ້​ແກ່​ນ້ອງ​ນັກຮຽນ ​ແລະ ທ່ານ​ກໍ່​ຍັງ​​ໄດ້​ມອບ​ໃບ​ຍ້ອງຍໍ​ຊົມ​ເຊີຍ​ໃຫ້​ທາງສະມາຄົມ​ອ໋ອບ​ໂຣດນະຄອນຫຼວງວຽງຈັນອີກ​ດ້ວຍ.

.

ເກັບພາບບັນຍາກາດງານປັນນ້ຳໃຈຊ່ວຍເຫຼືອສັງຄົມ

ພາບ – ຂ່າວໂດຍ: ຄຳພູວາ ໄຊຍະອ່ອນຕາ

ຖ້າເວົ້າເຖິງນ້ອງ  ມິນລີ້ ທຸກຄົນຄົງຈະຮູ້ຈັກກັນດີນ້ອງໄດ້ຮັບລາງວັນຊະນະເລີດປະກວດຮ້ອງເພງຢູ່ທີ່ສູນການຄ້າທົ່ງຂັນຄຳໃນຕົ້ນເດືອນຜ່ານມາ

ແລະ ສາວຄູຜູ້ໃຈດີ ທີ່ຊອກແຫລ່ງທຶນມາໃຫ້ ທາງໂຮງຮຽນພ້ອມດ້ວຍ ການໃຫ້ຕຸກຊຸກຍູ້ຕໍ່ນ້ອງນ້ອຍນັກຮຽນ. ຂໍໃຫ້ທາງທາງຜູ້ໃຫຍ່ ແລະ ຂັ້ນເທິງເບິ່ງແຍງຍ້ອງຍໍ

ໂຮງຮຽນຂອງນ້ອງມິນລີ້ແມ່ນໂຮງຮຽນປະຖົມ ໂຄກສະຫວ່າງ ຢູ່ ບ້ານໂຄກ ເມືອງ ຍົມມະລາດ ແຂວງ ຄຳມ່ວນ ຊຶ່ງໄດ້ມີຜູໃຫຍ່ໃຈດີນຳເຄື່ອງອຸປະກອນການຮຽນບໍ່ວ່າຈະເປັນບິກ, ສໍ, ປຶ້ມແບບຮຽນ, ຖົງປື້ມ ແລະ ເຄື່ອງກິລາ ແຕ່ລະຊັ້ນມີຄົບໂຕະຕັ່ງໃຫມ່ ແລະ ອີກຫລາຍໆຢ່າງ.

.

.

ຂໍຂອບໃຈທາງສະຫະພັນກິລາອ໊ອບໂຣດ ນະຄອນຫຼວງວຽງຈັນ ພ້ອມດ້ວຍທີມງານ ສິ່ງຂອງທີ່ທ່ານມອບໃຫ້ ແມ່ນເປັນເທື່ອທຳອິດຂອງນ້ອງໆທີ່ໄດ້ຮັບເຄື່ອງເຫຼົ່ານີ້ຈາກຜູ້ໃຈບຸນ ນ້ອງໆທັງດີໃຈ ທັງພໍໃຈ ແລະ ສ່ອງແຍງເຄື່ອງໃຫມ່ ເພາະບໍ່ເຄີຍໄດ້ມາກ່ອນ

.

.

.

ໂຮງຮຽນຂອງເຮົາຮູ້ສຶກໂຊກດີຫລາຍ ແລະ ຂໍຂວຍພອນໃຫ້ທຸກທ່ານທີ່ຮ່ວມສົມທົບທຶນໃນຄັ້ງນີ້ຈົ່ງມີແຕ່ຄວາມຈະເລີນກ້າວຫນ້າຕະຫຼອດໄປ…

ຟັງຄຣິບຄໍາຂອບໃຈຈາກນ້ອງມິນລີ້

ຟັງຄຣິບຄໍາຂອບໃຈຈາກນ້ອງໆ

ໃນວັນທີ​ 9​ ຕຸລາ​ 2020​ ປະທານສະຫະພັນແມ່ຍິງແຂວງຫຼວງນໍ້າທາພ້ອມດ້ວຍທິມງານສົບທົບກັບໜ່ວຍ​ສະຫະ​ພັນແມ່ຍິງ​ພາສີ ແຂວງ​ໄດ້ນຳເອົາເຄື່ອງນຸ່ງຫົ່ມຕ່າງໆເຊັ່ນ: ຜ້າຫົ່ມ​ 115 ຜືນ,​ ມຸ້ງ​ 115​ ຜືນ,​ ໝອນ​ 108 ໜ່ວຍ,​ ເຂົ້າສານ​ 120​ ກິໂລ​ ລວມມູນຄ່າ 20​ ລ້ານກີບ ໄປມອບໃຫ້ປະຊາຊົນຄອບຄົວທຸກຍາກ ແລະ​ ຄອບຄົວທີ່ໄດ້ຮັບຜົນກະທົບຈາກໄພນໍ້າຖ້ວມ ທີ່ບ້ານນໍ້າແອ່ງ ເມືອງວຽງພູຄາ​

.

ໃຫ້ກຽດກ່າວມອບໂດຍທ່ານ ນາງ​ ບົວວັນ​ ພົມມະລິດ​ ກຳມະການພັກແຂວງ​ ປະທານສະຫະພັນແມ່ຍິງແຂວງ, ໃຫ້ກຽດກ່າວມອບໂດຍທ່ານ​ ພັນວົງໄຊ ວິໄລພອນ ຄະນະປະຈໍາພັກເມືອງ ຫົວໜ້າຄະນະຈັດຕັ້ງເມືອງວຽງພູຄາ,​ ມີ ທ່ານນາງ​ ແສງທອງ​ ຊຽນປັນຍາ ກຳມະການພັກເມືອງ ປະທານສະຫະພັນແມ່ຍິງເມືອງວຽງພູຄາ,​ ທ່ານນາງ​ ອຸ່ນຈັນ ອ່ອນລືໄຊ​ ຫົວໜ້າໜ່ວຍສະຫະພັນພັນແມ່ຍິງພາສີແຂວງພ້ອມດ້ວຍສະມາຊິກຕະຫຼອດຮອດອົງການຈັດຕັ້ງບ້ານ​ ແລະ​ ປະຊາຊົນພາຍໃນບ້ານນໍ້າແອ່ງເຂົ້າຮ່ວມເປັນສັກຂີພິຍານ.

.

.

ຊົມເຊີຍ! ນໍາໃຈຂອງຄົນລາວຊວ່ຍເຫຼືອເຊິ່ງກັນ ແລະ ກັນ

ຂ່າວຕ່າງປະເທດ: ລາຍງານຈາກຂ່າວຕ່າງປະເທດຫຼາຍສໍານັກ ໃນຄໍ່າວັນທີ 13 ຕຸລາ 2020 (ເວລາປະເທດລາວ) ນີ້ວ່າ ນັກເຕະບານຊື່ດັງ ຄຣິສຕີໂນ ໂຣນັນໂດ ກວດພົບເຊື້ອ ໂຄວິດ-19.

ເຖິງຢ່າງໃດກໍ່ດີ, ຍັງບໍ່ທັນມີການເປີດເຜີຍວ່າ, ໂຣນາໂດ ກວດພົບເຊື້ອແຕ່ມື້ໃດ ແລະ ຕິດໄດ້ແນວໃດ? ເຊິ່ງປະຈຸບັນ ແມ່ນໄດ້ເຂົ້າຮັບການປິ່ນປົວ ແບບກັກບໍລິເວນ ຕາມມາດຕະຖານສາກົນແລ້ວ.

ເມື່ອກວດສອບ ເພຈທາງການຂອງ ໂຣນັ່ນໂດ ກໍ່ມີການໂພດຊຸມແຊວກັບ ນັກເຕະຄົນອື່ນໆ ໃນຮ້ານອາຫານແຫ່ງໜື່ງ. ໃນວັນດຽວກັນ. ຫາກວ່າ ໂຣນັນໂດ ກວດພົບເຊື້ອ ໂຄວິດ-19, ນັກເຕະຫຼາຍຄົນຄົງຕ້ອງໄດ້ ຖືກກັກບໍລິເວນ ແລະ ກວດຫາເຊື້ອ ເພາະຕົກໃນກໍລະນີໃກ້ຊິດ ຜູ່ຕິດເຊື້ອ ໂຄວິດ-19

ກໍ່ຂໍໃຫ້ນັກເຕະຂວັນໃຈຊາວໂລກ ໂຣນັນໂດ ຫາຍດີຈາກໂຄວິດ-19 ໄວໆ

ປະຈຸບັນທົ່ວໂລກມີຄົນຕິດເຊື້ອໂຄວິດ-19 ຈໍານວນ 38,191,325 ຄົນ, ເສຍຊີວິດ ຈໍານວນ 1,087,371 ຄົນ

ຂ່າວ

ກົດອ່ານຂ່າວເພີ່ມເຕີມ