ໃນຕອນເຊົ້າຂອງວັນທີ 14 ຕຸລາ 2020, ທີ່ຫ້ອງປະຊຸມ ສະຖາບັນການຄຸ້ມຄອງວິທະຍາສາດ ແລະ ເຕັກໂນໂລຊີ (ກວຕ). ກົມມາດຕະຖານ ແລະ ວັດແທກ, (ກວຕ) ໄດ້ຈັດກອງປະຊຸມສຳມະນາຂຶ້ນ ໃນຫົວຂໍ້ ຄວາມສຳຄັນຂອງວຽກງານມາດຕະຖານ ແລະ ວັດແທກ ຕໍ່ຜູ້ປະກອບການ SME ຂອງ ສປປ ລາວ ເນື່ອງໃນໂອກາດການສະເຫຼີມສະຫຼອງ ວັນມາດຕະຖານໂລກ ຄົບຮອບ 73 ປີ, ໃຫ້ກຽດເປັນປະທານກ່າວເປີດກອງປະຊຸມຂອງ ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ກວຕ.

.

.

ຈຸດປະສົງ ແມ່ນເພື່ອເຜີຍແຜ່ວຽກງານມາດຕະຖານ ແລະ ວັດແທກ ໃຫ້ບັນດາຜູ້ປະກອບການພາຍໃນ ມີຄວາມຮູ້ຄວາມເຂົ້າໃຈຕໍ່ກັບວຽກງານມາດຕະຖານ, ວຽກງານການຢັ້ງຢືນຄຸນນະພາບຂອງຜະລິດຕະພັນສິນຄ້າລວມໄປເຖິງວຽກງານການໃຫ້ການບໍລິການຂອງໜ່ວຍງານວັດແທກ ເພື່ອໃຫ້ມີຄວາມສອດຄ່ອງ ແລະ ເຊື່ອມໂຍງກັບວຽກງານມາດຕະຖານ ແລະ ວັດແທກ ຂອງພາກພື້ນ ແລະ ສາກົນ.

.

.

ໃນໂອກາດນີ້ ທ່ານ ວຽງທອງ ວົງທະວິໄລ, ຫົວໜ້າກົມມາດຕະຖານ ແລະ ວັດແທກ, ກວຕ ໄດ້ໃຫ້ກຽດກ່າວເປີດກອງປະຊຸມ ຊຶ່ງທ່ານໄດ້ກ່າວວ່າ: ການຈັດກອງປະຊຸມສຳມະນາໃນຄັ້ງນິ້ ແມ່ນເພື່ອສ້າງຈິດສຳນຶກໃຫ້ແກ່ ຜູ້ປະກອບການລົງທຶນ, ນັກທຸລະກິດ, ຜູ້ຜະລິດ ແລະ ຜູ້ຊົມໃຊ້ເຂົ້າໃຈຢ່າງເລິກເຊິ່ງ ກ່ຽວກັບບົດບາດ ແລະ ຄວາມສຳຄັນຂອງວຽກງານມາດຕະຖານ ຕໍ່ການພັດທະນາເສດຖະກິດ-ສັງຄົມ ໃນລະດັບຊາດ, ພາກພື້ນ ແລະ ສາກົນ. ພ້ອມກັນນັ້ນ ກໍ່ເພື່ອພັດທະນາວຽກງານມາດຕະຖານເພື່ອອໍານວຍຄວາມສະດວກຊຸກຍູ້ສົ່ງເສີມດ້ານການຄ້າ, ການຜະລິດ ແລະ ການຖ່າຍທອດເຕັກໂນໂລຊີ ທີ່ກ້າວໜ້າຂອງໂລກ. ການນຳໃຊ້ມາດຕະຖານເພື່ອຄຸ້ມຄອງ ແລະ ຊຸກຍູ້ສົ່ງເສີມການຜະລິດ ແລະ ການບໍລິການ ມີບົດບາດສຳຄັນ ໃນການພັດທະນາແບບຍືນຍົງ. ການຢັ້ງຢືນຮັບຮອງເອົາມາດຕະຖານຂອງຜະລິດຕະພັນ, ລະບົບການກວດສອບ, ການຢັ້ງຢືນຄຸນນະພາບຂອງຜະລິດຕະພັນ ແລະ ສິນຄ້າ, ນອກນັ້ນ ຍັງຊ່ວຍຍົກສູງສະມັດຕະພາບການຜະລິດ ແລະ ສ້າງຄວາມເຊື່ອໝັ້ນໃຫ້ແກ່ຜູ້ຊົມໃຊ້ອີກດ້ວຍ.

.

.

ທ່ານ ກ່າວຕື່ມວ່າ: ວັນທີ 14 ຕຸລາ ແມ່ນວັນມາດຕະຖານໂລກ ໄດ້ໜູນວຽນມາບັນຈົບຄົບຮອບ 73 ປີ. ໃນປີ 2020 ນີ້ ສປປ ລາລ ກໍ່ໄດ້ເຂົ້້າເປັນສະມາຊິກອົງການມາດຕະຖານສາກົນ ເປັນປີທີ 13 ແລະ ໄດ້ພ້ອມກັບບັນດາປະເທດສະມາຊິກອົງການມາດຕະ ຖານສາກົນ (ISO) ໄດ້ຈັັດການສະເຫຼີມສະຫຼອງວັນດັ່ງກ່າວ ໃນທົ່ວໂລກ ພາຍໃຕ້ ຄຳຂວັນທີ່ອົງການມາດຕະຖານສາກົນວາງອອກວ່າ: ການປົກປ້ອງໂລກດ້ວຍມາດຕະຖານ (Protecting the planet with standards), ການປົກປ້ອງໂລກດ້ວຍມາດຕະຖານ ໝາຍເຖິງ ການນໍາໃຊ້ມາດຕະຖານ ເຂົ້າຊ່ວຍໃນຂະບວນການຜະລິດ ເພື່ອຫຼຸດຜ່ອນການກະທໍາຂອງມວນມະນຸດທີ່ສົ່ງຜົນກະທົບຕໍ່ໂລກຂອງເຮົາ, ການປະຕິບັດຕາມມາດຕະຖານແມ່ນມີ ການຂະຫຍາຍຕົວສູງ ແລະ ນໍາໃຊ້ອຸປະກອນເຄື່ອງມືເຕັກໂນໂລຊີທີ່ທັນສະໄໝ ເຂົ້າໃນການຈັດຕັ້ງປະຕິບັດວຽກງານ ເພື່ອໃຫ້ສອດຄ່ອງກັບລະບຽບການຂອງບັນດາປະເທດສະມາຊິກອົງການມາດຕະຖານສາກົນ.

.

.

ທ່ານ ຍັງໄດ້ກ່າວຕື່ມອີກວ່າ: ມາດຕະຖານສາກົນແມ່ນເປັນແມ່ແບບທາງດ້ານເອກະສານອັນໜຶ່ງທີ່ມີຄວາມສຳຄັນ ແລະ ຖືກພັດທະນາຂຶ້ນໂດຍອົງການສາກົນເຊັ່ນ: IEC, ISO ແລະ ITU ແລະ ຍັງໄດ້ກວມເອົາ ທຸກໆຂົງເຂດເຊັ່ນ: ການປະຢັດພະລັງງານ, ນໍ່້າ ແລະ ຄຸນນະພາບຂອງອາກາດໂດຍມີຮູບແບບ ແລະ ວິທີການວັດແທກທີ່ ເປັນໄປຕາມມາດຕະຖານ, ການນໍາໃຊ້ມາດຕະຖານຈະຊ່ວຍຫຼຸດຜ່ອນຜົນກະທົບຕໍ່ສິ່ງແວດລ້ອມຈາກຂະບວນການຜະລິດທາງດ້ານອຸດສາຫະກຳ ແລະ ສາມາດອຳນວຍຄວາມສະດວກໃນການນຳໃຊ້ຊັບພະຍາກອນທໍາມະຊາດທີ່ມີຢູ່ຢ່າງຈຳກັດ ແລະ ເຮັດໃຫ້ສາມາດນຳກັບມາໃຊ້ຄືນໃໝ່ໄດ້. ດັ່ງນັ້ນ, ຈຶ່ງເຮັດໃຫ້ມີບົດບາດ ແລະ ຄວາມຕ້ອງການດ້ານມາດຕະຖານນັບມື້ນັບຂະຫຍາຍຕົວຂຶ້ນໃນທົ່ວໂລກ ເຊິ່ງໄດ້ສະແດງໃຫ້ເຫັນເຖິງຄວາມສຳຄັນຂອງມາດຕະຖານ ຕໍ່ກັບການພັດທະນາເສດ ຖະກິດ-ສັງຄົມ ແລະ ເປັນສິ່ງຢັ້ງຢືນເຖິງຄຸນນະພາບໃຫ້ຜູ້ຊົມໃຊ້ສາມາດເຊື່ອຖືໄດ້.

.

.

ນອກນັ້ນ, ຍັງໄດ້ເນັ້ນໃຫ້ ເຫັນເຖິງບົດບາດຄວາມສຳຄັນຂອງການເຄື່ອນໄຫວວຽກງານມາດຕະຖານ ໃນການເຊື່ອມໂຍງເຂົ້າກັບບັນດາສະມາຊິກ ຂອງປະຊາຄົມເສດຖະກິດອາຊຽນ, ອົງການການຄ້າໂລກ ແລະ ການຮ່ວມມືໃນເວທີສາກົນອື່ນໆ, ທ່ານ ເຊື່ອໝັ້ນວ່າພາຍຫຼັງສຳເລັດການຈັດກອງປະຊຸມສຳມະນາຄັ້ງນີ້ແລ້ວ ບັນດາຜູ້ປະກອບການຫົວໜ່ວຍທຸລະກິດຂະໜາດນ້ອຍ ແລະ ກາງ, ນັກທຸລະກິດຍິງ ແລະ ພ້ອມດ້ວຍພາກສ່ວນທີ່ກ່ຽວຂ້ອງ ຈະໄດ້ມີຄວາມຮູ້, ຄວາມເຂົ້າໃຈ ແລະ ບົດຮຽນອັນໃໝ່ໆ ທີ່ຈະນຳໄປໃຊ້ເພື່ອຄົ້ນຄວ້າໃນຂະບວນການຜະລິດ, ການບໍລິການ ຈົນລວມໄປເຖິງການຍົກສູງດ້ານຄຸນນະພາບຂອງຜະ ລິດຕະພັນພາຍໃນ ໃຫ້ທຽບເທົ່າກັບພາກພື້ນ ແລະ ສາກົນ.

.

.

ໃນກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງການນຳສະເໜີ ພາລະບົດບາດຂອງກົມມາດຕະຖານ ແລະ ວັດແທກ, ຄວາມສໍາຄັນຂອງວຽກງານມາດຕະຖານຕໍ່ SME, ເຄື່ອງມີ ແລະ ອຸປະກອນວັດແທກ, ການສົມທຽບໃຫ້ເຫັນຜະລິດາຕະພັນທີ່ໄດ້ມາດຕະຖານ, ວຽກງານປົກປ້ອງຜູ້ຊົມໃຊ້ ແລະ ວຽກງານຮັບຮອງລະບົບ, ພ້ອມນັ້ນ ຜູ້ເຂົ້າຮ່ວມກອງປະຊຸມ ໄດ້ປະກອບຄຳຄິດຄຳເຫັນ ຕໍ່ກັບວຽກງານມາດຕະຖານ ແລະ ວັດແທກ ອີກດ້ວຍ.

ກອງປະຊຸມໃນຄັ້ງນີ້, ມີບັນດາທ່ານຮອງຫົວໜ້າ ກົມມາດຕະຖານ ແລະ ວັດແທກ, ຫົວໜ້າພະແນກ, ຮອງພະແນກ, ບັນດາຜູ້ປະກອບການຫົວໜ່ວຍທຸລະກິດຂະໜາດນ້ອຍ ແລະ ກາງ, ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ເຊີ່ງໃນຕອນບ່າຍຂອງວັນດຽວກັນນີ້ ກໍ່ຍັງໄດ້ມີການຈັດກິດຈະກຳໃນການລົງເຜີຍແຜ່ກ່ຽວກັບຄວາມຮູ້ຄວາມສຳຄັນຂອງວຽກງານມາດຕະຖານ ແລະ ວັດແທກ ໃຫ້ແກ່ຄູອາຈານ ແລະ ນ້ອງນັກຮຽນ ຢູ່ທີ່ ໂຮງຮຽນ ມັດທະຍົມສົມບູນ ເພຍວັດ ໂດຍການເປັນປະທານຮ່ວມກ່າວຈຸດປະສົງຂອງງານດັ່ງກ່າວຂອງທ່ານ ນາງ ນິສິດ ຄຳມູນເຮືອງ ຮອງຫົວໜ້າກົມມາດຕະຖານ ແລະ ວັດແທກ ແລະ ການກ່າວຕ້ອນຮັບຂອງ ທ່ານ ຄຳວອນ ສໍຫຼວງໂຄດ ຜູ້ອຳນວຍການ ໂຮງຮຽນ ມັດທະຍົມສົມບູນ ເພຍວັດ ໂດຍມີພະນັກງານຈາກກົມມາດຕະຖານເຂົ້າຮ່ວມ ພ້ອມທັງບັນດາຄູອາຈານ ແລະ ນ້ອງນັກຮຽນຈາກໂຮງຮຽນດັ່ງກ່າວເຂົ້າຮ່ວມຢ່າງພ້ອມພຽງ.

ພາຍໃນງານດັ່ງກ່າວແມ່ນໄດ້ມີການບັນລະຍາຍໃຫ້ຄວາມຮູ້ກ່ຽວກັບຄວາມສຳຄັນຂອງມາດຕະຖານພ້ອມທັງມີການຫຼີ້ນກິດຈະກຳຖາມ-ຕອບເອົາຂອງລາງວັນຕ່າງໆ ເຊີ່ງບັນດາຄູອາຈານ ແລະ ນ້ອງນັກຮຽນລ້ວນແລ້ວແຕ່ໃຫ້ຄວາມສົນໃຈ ແລະ ມີສ່ວນຮ່ວມ ໃນກິດຈະກຳດັ່ງກ່າວ ຫຼັງຈາກນັ້ນທາງກົມມາດຕະຖານ ແລະ ວັດແທກ ໄດ້ມີການມອບອຸປະກອນກິລາປະເພດໝາກບານເຕະ, ກະຕໍ້, ບານຕີ, ບານບ້ວງ ຈຳນວນໜື່ງ ແລະ ເສື້ອວັນມາດຕະຖານຈຳນວນ 14 ຜືນ ໃຫ້ແກ່ໂຮງຮຽນເພື່ອສົ່ງເສີມດ້ານກິລາໃຫ້ແກ່ນ້ອງນັກຮຽນ ເຊີ່ງມອບໂດຍທ່ານ ນາງ ນິສິດ ຄຳມູນເຮືອງ ຮອງຫົວໜ້າກົມມາດຕະຖານ ແລະ ວັດແທກ ແລະ ຕາງໜ້າຮັບໂດຍທ່ານ ຜູ້ອຳນວຍການ ໂຮງຮຽນ ມັດທະຍົມສົມບູນ ເພຍວັດ.

ບົດຂ່າວ: ທ ພຸດທະຈັນ ຊັບທະວີ

ຮູບພາບ: ທ ອໍລະຊຸນ ມະນີ

ເພື່ອເປັນການໃຫ້ກໍາລັງໃຈ ແລະ ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນອາທິດທີ່ຜ່ານມາ ໂດຍສະເພາະກໍ່ແມ່ນເພື່ອເປັນການຂຸ້ນຂ້ຽວກອບກູ້ເອົາເຂົ້ານາ, ເຂົ້າໄຮ່ທີ່ສຸກແລ້ວທີ່ໄດ້ຮັບຜົນກະທົບຈາກໄພນໍ້າຖ້ວມເປັນຕົ້ນກໍ່ແມ່ນເຂົ້ານາທີ່ເກັບກູ້ບໍ່ທັນທີ່ກໍາລັງລົ້ມຈົມຢູ່ໃຕ້ນໍ້າ.

ດັ່ງນັ້ນ, ໃນວັນທີ 14 ຕຸລາ 2020 ນີ້ ໂດຍໄດ້ຮັບທິດຊີ້ນໍາຈາກການນໍາຂອງເມືອງ ທາງອົງການຈັດຕັ້ງມະຫາຊົນຂອງເມືອງປະກອບມີ : ອົງການຈັດຕັ້ງຊາວໜຸ່ມ, ກໍາມະບານ, ແມ່ຍິງ ພ້ອມນີ້ກໍ່ຍັງມີກໍາລັງຂອງກອງບັນຊາການປ້ອງກັນຄວາມສະຫງົບ, ກອງບັນຊາການທະຫານເມືອງວິລະບູລີ ລວມທັງໝົດຈໍານວນ 50 ກວ່າສະຫາຍ ໄດ້ພ້ອມກັນລົງໄປໃຫ້ການຊ່ວຍເຫຼືອປະຊາຊົນເຂດກຸ່ມບ້ານທີ 5 ຄືບ້ານນາເມືອງແສນ ແລະ ບ້ານນາຊຽງແລ ໃນການກອບກູ້ເອົາເຂົ້ານາ, ເຂົາໄຮ່ທີ່ສຸກແລ້ວ ທີ່ໄດ້ຮັບຜົນຈາກພາຍຸຝົນຕົກໜັກ ແລະ ໄພນໍ້າຖ້ວມໃນອາທິດທີ່ຜ່ານມາ

.

ໃນການລົງໄປຊ່ວຍເຫຼືອໃນຄັ້ງນີ້ ກໍ່ແມ່ນໄດ້ໃຫ້ການຊ່ວຍເຫຼືອຄອບຄົວທີ່ມີກໍາລັງແຮງງານໜ້ອຍ, ໄດ້ຮັບຜົນກະທົບຫຼາຍກວ່າໝູ່ເຊິ່ງໃນການໄປຊ່ວຍເຫຼືອປະຊາຊົນໃນຄັ້ງນີ້ແມ່ນນໍາໂດຍ ທ່ານ ຄໍາຜຸຍ ສີບຸນເຮືອງ ກໍາມະການພັກແຂວງ ເລຂາພັກເມືອງ ເຈົ້າເມືອງ ວິລະບູລີ, ທ່ານນາງ ບຸນລັບ ທໍາມະຈັກ ຄະນະປະຈໍາພັກເມືອງ ປະທານແນວລາວສ້າງຊາດເມືອງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ທ່ານນາງ ບຸນຄໍ້າ ອິນທິສານ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງ, ທ່ານນາງ ມົນຄໍາ ຫຼວງພົມມາ ກໍາມະການພັກເມືອງ ປະທານສະຫະພັນເມືອງຍິງເມືອງ ພ້ອມດ້ວຍຜູ້ຊີ້ນໍາກຸ່ມບ້ານທີ 5 ພ້ອມດ້ວຍທີມງານ.

ກະຊວງອຸດສາຫະກໍາ ແລະ ການຄ້າ ໄດ້ອອກແຈ້ງການເລກທີ0933/ອຄ.ກຄພນລົງວັນທີ15ຕຸລາ 2020, ເຖິງ ສະມາຄົມນ້ໍາມັນເຊື້ອໄຟ ແລະ ອາຍແກ໊ສ, ບັນດາບໍລິສັດນ້ໍາມັນເຊື້ອໄຟ ແລະ ນໍ້າຂາຍຍ່ອຍນ້ໍາມັນເຊື້ອໄຟ,ເລື່ອງ ແຈ້ງປັບຂຶ້ນລາຄາຂາຍຍ່ອຍນ້ໍາມັນເຊື້ອໄຟ ໃນຂອບເຂດທົ່ວປະເທດ.

ລາຄາໃຫມ່ນີ້ ໃຫ້ເລີ່ມປະຕິບັດ ວັນທີ 16 ຕຸລາ 2020 ເວລາ 06:00 ໂມງ ໃນຂອບເຂດທົ່ວປະເທດ. ການປັບລາຄາຄັ້ງນີ້ ແອັດຊັງພິເສດ ປັບຂຶ້ນ 80 ກີບ/ລິດ, ແອັດຊັງທໍາມະດາ ປັບຂຶ້ນ 60 ກີບ/ລິດ ແລະ ກາຊວນ ປັບຂຶ້ນ 40 ກີບ/ລິດ. ການຄິດໄລ່ເສຍພັນທະ ແລະ ຄ່າທໍານຽມຕ່າງໆ ແມ່ນໃຫ້ພາກສ່ວນກ່ຽວຂ້ອງ ຄິດໄລ່ເກັບຕາມທີ່ໄດ້ກໍານົດໄວ້ ໃນໂຄງສ້າງລາຄານໍ້າມັນເຊື້ອໄຟ
ສະບັບເລກທີ 0837 /ກຄພນ.ຄສລ, ລົງວັນທີ 15 ຕຸລາ 2020 ຈົນກວ່າຈະມີການປ່ຽນແປງ.

ໃຫ້ບັນດາບໍລິສັດນ້ໍາມັນເຊື້ອໄຟ ປະຕິບັດຕາມເນື້ອໃນຂ້າງເທິງນີ້ຢ່າງເຂັ້ມງວດ ແລະ ຄຸ້ມຄອງນໍ້າຂາຍຍ່ອຍຂອງຕົນ ໃຫ້ບໍລິການຢ່າງເປັນປົກກະຕິ.

ແຈ້ງການສະບັບນີ້ ປ່ຽນແທນແຈ້ງການ ສະບັບເລກທີ 0883/ອຄ.ກຄພນ, ລົງວັນທີ 01 ຕຸລາ 2020

.

ໃນວັນທີ 13 ຕຸລາ 2020 ຜ່ານມານີ້ ທ່ານ ວົງສະຫວັນ ວຽງມະນີ ເຈົ້າເມືອງໆເຊໂປນ, ພ້ອມດ້ວຍຄະນະກຳມະການຕ້ານໄພພິບັດຂັ້ນເມືອງ ໄດ້ສືບຕ່ໍລົງພື້ນທີ່ມອບເຄື່ອງຊ່ວຍເຫຼືອໃຫ້ບ້ານປະຊາຊົນຢູ່ລຽບຕາມສາຍນໍ້າຕ່າງໆ

.

ພ້ອມທັງຢ້ຽມຢາມອໍານາດການປົກຄອງບ້ານ ແລະ ປະຊາຊົນ ຄື: ບ້ານ ເມືອງຈັນ, ບ້ານ ດົງນ້ອຍ,ບ້ານແກ້ງຄໍາ, ບ້ານ ດົງໃຫຍ່, ບ້ານສ່າງ, ບ້ານກາດັບ,ບ້ານແກ້ງຢາງ, ບ້ານ ແກ້ງກົກ ແລະ ບ້ານຫ້ວຍສານ, ເຊິ່ງເປັນເຂດພື້ນທີ່ສ່ຽງຖືກນ້ຳຖ້ວມ, ສໍາລັບເຄື່ອງທີ່ນໍາໄປມອບໃນຄັ້ງນີ້ປະກອບມີເຄື່ອງບໍລິໂພກຈໍານວນໜຶ່ງເຊັ່ນ: ເຂົ້າສານ ນໍ້າດື່ມ, ໝີ່ສໍາເລັດຮູບ ແລະ ປາກະປ໋ອງ ເພື່ອຊ່ວຍເຫຼືອບັນເທົາທຸກເບື້ອງຕົ້ນໃຫ້ກັບ ປະຊາຊົນ.

ໃນວັນທີ 14 ຕຸລາ 2020 ນີ້, ສະຫາຍ ພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍຄະນະໄດ້ລົງກວດກາເບິ່ງຄວາມຄືບໜ້າຂອງການກໍ່ສ້າງໂຄງການອະນຸສາວະລີນັກບິນທະຫານ ອະດີດ ສະຫະພາບໂຊວຽດທີ່ຈຸດກໍ່ສ້າງ ບ້ານອາກາດ, ເມືອງສີໂຄດຕະ ບອງ, ນະຄອນຫຼວງວຽງຈັນ, ໃຫ້ການຕ້ອນຮັບໂດຍມີ ສະຫາຍພົນຈັດຕະວາ ພູຫຼວງ ບົວພະຈັນ ຫົວໜ້າການເມືອງກອງບັນຊາການທະຫານອາກາດ, ມີສະຫາຍ ສົມພັດ ສຸພັດທອນ ປະທານບໍລິສັດ ສຸພັດທອນ ທີ່ປຶກສາ ແລະ ບໍລິການຄົບວົງຈອນ ຈຳກັດ (SCS) ແລະ ພາກສ່ວນທີ່ກ່ຽວຂ້ອງໃຫ້ການຕ້ອນຮັບ.

ສະຫາຍ ສົມພັດ ສຸພັດທອນ ໄດ້ໃຫ້ຮູ້ວ່າ: ໂຄງການກໍ່ສ້າງອະນຸສາວະລີ ນັກບິນທະຫານອະດີດ ສະຫະພາບໂຊວຽດໄດ້ຮັບອະນຸ ມັດໃຫ້ກໍ່ສ້າງຂຶ້ນ ໂດຍແມ່ນກະຊວງປ້ອງກັນປະເທດເປັນເຈົ້າຂອງໂຄງການ ແລະ ມອບໝາຍໃຫ້ບໍລິສັດຂອງຂ້າພະເຈົ້າເປັນ ຜູ້ຮັບເໝົາກໍ່ສ້າງເຊິ່ງທັງສອງ ຝ່າຍໄດ້ເຊັນສັນຍາຮ່ວມກັນໃນຕົ້ນເດືອນພຶດສະພາຜ່ານມາ ແລະ ລົງມືກໍ່ສ້າງໃນເດືອນມິຖຸນາ 2020 ນີ້, ມາຮອດປັດຈຸບັນການກໍ່ສ້າງແມ່ນສຳເລັດ 100% ຖືວ່າສຳເລັດກ່ອນແຜນການທີ່ກຳນົດໄວ້.

ໂຄງການກໍ່ສ້າງດັ່ງກ່າວເປັນ ການຮ່ວມມືກັນຂອງທັງສອງລັດຖະບານລາວ ແລະ ຣັດເຊຍກໍຄື ສອງກະຊວງປ້ອງກັນປະເທດ ລາວ-ຣັດເຊຍ, ທັງນີ້ເພື່ອເປັນການສະແດງຄວາມກະຕັນຍູຮູ້ບຸນຄຸນ ແລະ ຈາລຶກຜົນງານຄຸນງາມຄວາມດີຂອງອະດີດນັກບິນ ທະຫານຣັດເຊຍທີ່ເສຍຊີວິດຢູ່ ລາວ ພວກເຮົາໃນໄລຍະທີ່ຜ່ານມາ ແລະ ເປັນສະຖານທີ່ສຶກສາຮຽນຮູ້ຂອງອະນຸຊົນໃນອະນາຄົດ, ໂດຍສະເພາະແມ່ນໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ- ຣັດເຊຍ ຄົບຮອບ 60 ປີໃນປີ 2020 ນີ້.

ໂຄງການດັ່ງກ່າວມີເນື້ອທີ 400 ກວ່າຕາເມັດ, ກໍ່ສ້າງໂດຍ ເປຕົງເສີມເຫຼັກທີ່ແໜ້ນໜາ, ພ້ອມດ້ວຍສິ່ງຕົບແຕ່ງປະດັບປະດາ ເປັນຕົ້ນແມ່ນປູກຫຍ້າມີຮົ້ວ ແລະ ດອກໄມ້ອ້ອມຮອບຕັ້ງຢູ່ແຄມຖະໜົນຢ່າງສະຫງ່າອົງອາດຈະກາຍເປັນສັນຍາລັກອັນໃໝ່ຂອງການຮ່ວມມືຂອງທັງສອງປະເທດ ລາວ-ຣັດເຊຍ ພວກເຮົາ, ເຊິ່ງຈະເປີດນຳໃຊ້ຢ່າງເປັນທາງການໃນມໍ່ໆນີ້.

ໂດຍ: ຈັນທະວົງ ອຸ່ນວິໄລຫົງ