ສະຫວັນນະເຂດ: ຮີໂຣຕົວຈິງ! ທ່ານຫຍຸຍ ທີ່ຊ່ວຍປະຊາຊົນຫຼາຍຮ້ອຍຄົນ ໜີນໍ້າຖ້ວມ. ວັນທີ່ 18/10/2020 ທີ່ບ້ານນາຈານ ເມືອງພີນ ແຂວງສະຫວັນນະເຂດ. ໂດຍນໍາໃຊ້ເຮືອເຈັສກີ ທະຍອຍລໍາລຽງພໍ່ແມ່ປະຊາຊົນ ຂ້າມມາບ່ອນທີ່ປອດໄພ.

ຊົມເຊີຍ ແລະ ອວຍພອນໃຫ້ທ່ານ ມີແຕ່ຄວາມຜາສຸກ ຮັ່ງມີລໍ້າລວຍ ສຸຂະພາບແຂງແຮງເດີ 🙏🙏🙏👏👏👏

.

.

.

.

.

ຄລິບຕອນປະຕິບັດພາລະກິດ

.

.

ຄໍາມ່ວນ: ລາຍງານຈາກ ປະຊາຊົນໃຫ້ຮູ້ ໃນວັນທີ່ 19/10/2020 ນີ້ວ່າ ນ້ຳເຊບັ້ງໄຟ ໄດ້ເຊາະເຈື່ອນຕາຝັ່ງ ເຂດວັດວັດພະທາຕຸຕຸມພຣະວັງ ບ້ານນາວາງ ເມືອງຫນອງບົກ ແຂວງຄໍາມ່ວນ.

ອີກບໍ່ຈັກແມັດກໍ່ຈະຮອດສິມແລ້ວ ຫມົດຫນ້າຝົນປີນີ້ ພຸດທະສາສະນິກກະຊົນຄວນຮີບຮ້ອນໃຈຮ່ວມແຮງພາກັນສ້າງຕ້ານເຈື່ອນ ເພາະປົກປັກຮັກສາ ບູຮານສະຖານ ວັດວາແຫ່ງນີ້ແຫ່ງຫມັ້ນຄົງຖາວອນຕໍ່ໄປແດ່.

ຂອບໃຈຂ່າວຈາກ ຕຸ່ນ ໄຊຍະວົງ

.

.

ກົມອຸຕຸນິຍົມ ແລະ ອຸທົກກະສາດ ຄາດຄະເນສະພາບອາກາດ ໃນໄລຍະວັນທີ 19 ຫາ 25 ຕຸລາ 2020 ວ່າ: ໃນໄລຍະວັນທີ 19 ຫາ 21 ຕຸລານີ້ ຄວາມກົດດັນອາກາດສູງຂອງອາກາດເຢັນທີ່ປະເທດຈີນ ຈະແຜ່ລົງມາປົກຄຸມຢູ່ແຂວງພາກເໜືອ ແລະ ພາກກາງຂອງປະເທດລາວ, ພ້ອມດຽວກັນລົມຕາເວັນອອກ- ຕາເວັນອອກສ່ຽງເໜືອພັດປົກຄຸມເປັນສ່ວນໃຫຍ່,

ສ່ວນພາກໃຕ້ຮ່ອງຄວາມກົດດັນຈະພາດຜ່ານດ້ວຍກຳລັງປານກາງ ຊຶ່ງຈະເຮັດໃຫ້ອາກາດເຢັນລົງຢູ່ທົ່ວໄປໃນຕອນເຊົ້າແຂວງພາກເໜືອ ແລະ ຈະມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຢູ່ເກືອບທົ່ວໄປໃນແຕ່ລະພາກ ແລະ ຕົກປານກາງ ຫາ ຕົກໜັກ ພ້ອມມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກກາງ ແລະ ພາກໃຕ້.

ຈາກນັ້ນ ວັນທີ 22 ຫາ 25 ຕຸລາ 2020 ມວນອາກາດເຢັນຈາກປະເທດຈີນຈະເພີ່ມກຳລັງແຮງຂຶ້ນແຜ່ລົງມາປົກຄຸມຢູ່ທຸກພາກຂອງລາວ, ສົມທົບກັບລົມຕາເວັນອອກສ່ຽງເໝືອພັດປົກຄຸມດ້ວຍກຳລັງປານກາງ ຫາ ແຮງ ຈະເຮັດໃຫ້ອາກາດເຢັນລົງໃນຕອນກາງຄືນ ຫາ ຕອນເຊົ້າຕື່ມອີກ ແລະ ຈະມີຝົນຕົກໃນລະດັບຄ່ອຍຢູ່ບາງທ້ອງຖິ່ນໃນແຕ່ລະພາກ.

.

.

ສະຫວັນນະເຂດ: ປັດຈຸບັນນີ້, 8 ເມືອງຢູ່ແຂວງສະຫວັນນະເຂດ ຄື: ເມືອງ ສອງຄອນ, ຈໍາພອນ, ຊົນນະບູລີ, ທ່າປາງທອງ, ວິລະບູລີ, ເຊໂປນ, ພີນ ແລະ ເມືອງນອງຍັງຖືກນໍ້າຖ້ວມຂັງເປັນວົງກວ້າງຍ້ອນຝົນຍັງສືບຕໍ່ຕົກ ຊຶ່ງໄດ້ເຮັດໃຫ້ແມ່ນໍ້າຫຼາຍສາຍ, ລວມທັງຫ້ວຍຮ່ອງຕ່າງໆນໍ້າຍັງຍຶ່ງຂຶ້ນ, ໄຫຼເຂົ້າ ຖ້ວມ ເຮືອນຊານ, ຮົ້ວສວນ ແລະ ເນື້ອທີ່ນາຂອງປະຊາຊົນຢູ່.

ໃນຈຳນວນ 8 ເມືອງທີ່ກ່າວມາມີ 4 ເມືອງທີ່ຖືກກະທົບໜັກຈາກນໍ້າຖ້ວມໃນຄັ້ງນີ້ ຄື: ເມືອງວິລະບູລີ, ເມືອງເຊໂປນ, ເມືອງພີນ ແລະ ເມືອງນອງ ຊຶ່ງໃນໄລຍະທີ່ຜ່ານມາສະພາບນໍ້າຖ້ວມໄດ້ຫຼຸດລົງ ເກືອບຈະປົກກະຕິແລ້ວ ແຕ່ພະຍຸ ນັງກາໄດ້ເຂົ້າມາປົກຄຸມນັບແຕ່ວັນທີ 15 ຕຸລາ ຮອດປັດຈຸບັນ, ຈຶ່ງເຮັດໃຫ້ຝົນຍັງສືບຕໍ່ຕົກ ແລະ ເຮັດໃຫ້ນໍ້າຍຶ່ງຂຶ້ນຖ້ວມຕື່ມອີກເປັນຮອບທີ 3.

ຜົນເສຍຫາຍເບື້ອງຕົ້ນຢູ່ 3 ເມືອງດັ່ງກ່າວກໍຄືເຮືອນປະຊາຊົນທີ່ເປັນຊັ້ນດຽວ ແລະ ຊັ້ນທີໜຶ່ງຂອງເຮືອນ ສອງຊັ້ນ, ເລົ້າເຂົ້າຖືກນໍ້າຖ້ວມ ແລະ ເປ່ເພຈໍານວນໜຶ່ງ. ນອກນັ້ນຍັງມີເນື້ອທີ່ນາທີ່ກໍາລັງຈະເກັບກ່ຽວ ແລະ ເກັບກ່ຽວມາໄດ້ໄລຍະໜຶ່ງແລ້ວກໍຖືກນໍ້າຖ້ວມ, ເສັ້ນທາງຫຼາຍບ່ອນ, ໜອງປາ, ຊົນລະປະທານກໍ່ໄດ້ຮັບຜົນເສຍຫາຍເຊັ່ນກັນ.

ໄຊຍະບູລີ: ຊາວກະສິກອນທົ່ວແຂວງໄຊຍະບູລີ ພວມຂຸ້ນຂ້ຽວເກັບກ່ຽວມ້ຽນມັດພືດລະດູຝົນຢ່າງເປັນຂະບວນ ເລີ່ມແຕ່ຕົ້ນເດືອນຕຸລາເປັນຕົ້ນມາ ແລະ ບາງຈຸດທີ່ມີເງື່ອນໄຂ ກໍ່ມີການກະກຽມປູກພືດລະດູແລ້ງ, ຄາດວ່າການເກັບກູ້ພືດລະດູຝົນທົ່ວແຂວງໄຊຍະບູລີ ແມ່ນຈະໃຫ້ສໍາເລັດໃນທ້າຍເດືອນພະຈິກນີ້.

ທ່ານ ແສງອາທິດ ລາວເບຼຍຢາທໍ່ ຫົວໜ້າຂະແໜງປູກຝັງ ພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໄດ້ເປີດດຜີຍຕໍ່ທີມຂ່າວແຂວງໄຊຍະບູລີວ່າ: ການຜະລິດລະດູຝົນຂອງຊາວກະສິກອນທົ່ວແຂວງໄຊຍະບູລີ ມີເນື້ອທີ່ແຜນການທັງໝົດ 158.041 ເຮັກຕາ ໃນນີ້ປູກເຂົ້ານາປີໃຫ້ໄດ້ 34.287 ເຮັກຕາ, ປະຕິບັດໄດ້ 35.910 ເຮັກຕາ ເທົ່າກັບ 104,73% ຂອງແຜນການ ແລະ ມາຮອດປະຈຸບັນເກັບກູ້ສໍາເລັດແລ້ວ 5.966,8 ເຮັກຕາ ເທົ່າກັບ 17%, ເຂົ້າໄຮ່ ໃນເນື້ອທີ່ 10.200 ເຮັກຕາ, ປະຕິບັດຕົວຈິງໄດ້ 12.316,54 ເຮັກຕາ ເທົ່າກັບ 120,75% ປະຈຸບັນເກັບກູ້ແລ້ວ 5.516,94 ເຮັກຕາ ເທົ່າກັບ 44,79%.

ສ່ວນການປູກພືດໃນເນື້ອທີ່ຕາມແຜນແມ່ນ 113.554 ເຮັກຕາ ປະຕິບັດຕົວຈິງໄດ້ 113.275,13 ເຮັກຕາ ເທົ່າກັບ 99,75%. ມາຮອດປະຈຸບັນແມ່ນເກັບກູ້ແລ້ວ 31.979,06 ເຮັກຕາ ເທົ່າກັບ 28%. ທ່ານ ແສງອາທິດ ລາວເບຼຍຢາທໍ່ ຍັງໃຫ້ຮູ້ຕື່ມວ່າ: ເພື່ອຮັບປະກັນໃຫ້ການຜະລິດລະດູແລ້ງທີ່ຈະມາເຖິງ ທາງພະແນກກະສິກໍາ ແລະ ປ່າໄມ້ແຂວງ ເວົ້າລວມເວົ້າສະເພາະກໍ່ຄືຂະແໜງປູກຝັງ ຈະໄດ້ລົງຕິດຕາມກວດກາບ່ອນທີ່ມີເງື່ອນໄຂປູກພືດລະດູແລ້ງ, ອານາໄມສ້ອມແປງຊົນລະປະທານຮ່ວມກັບກຸ່ມຊາວນາທີ່ໄດ້ຮັບຜົນປະໂຫຍດນໍ້າຈາກຊົນລະປະທານ ພ້ອມທັງວາງແຜນກຽມແນວພັນໃຫ້ຊາວກະສິກອນ ຄາດວ່າແຜນປູກເຂົ້ານາແຊງທົ່ວແຂວງ 2.300 ເຮັກຕາ, ຄາດຄະເນຜົນຜະລິດ 9.660 ໂຕນ. ການຜະລິດເຂົ້າເປັນສິນຄ້າສົ່ງອອກມີ 2 ບໍລິສັດ ຢູ່ເມືອງພຽງມີ 450 ເຮັກຕາ, ເມືອງໄຊຍະບູລີມີ 38 ເຮັກຕາ ແລະ ເມືອງຊຽງຮ່ອນ 100 ເຮັກຕາ.

ພ້ອມທັງຜະລິດເຂົ້າແນວພັນຈໍານວນ 34 ເຮັກຕາ; ໃນນີ້ເມືອງພຽງມີ 28 ເຮັກຕາ ແລະ ເມືອງໄຊຍະບູລີ 6 ເຮັກຕາ. ນອກນີ້ຍັງໄດ້ປູກພືດລະດູແລ້ງທົ່ວໄປ ເນື້ອທີ່ທັງໝົດ 17.279 ເຮັກຕາ, ຄາດຄະເນຜົນຜະລິດໄດ້ທັງໝົດ 174.934 ໂຕນ; ໃນນີ້ຄາດຄະເນປູກໝາກຖົ່ວເຫຼືອງຟັກສົດເພື່ອສົ່ງອອກຢູ່ 3 ເມືອງ ຄື: ເມືອງໄຊຍະບູລີ, ເມືອງພຽງ ແລະ ເມືອງຊຽງຮ່ອນ ມີເນື້ອທີ່ 1.283 ເຮັກຕາ ແລະ ປູກໝາກໂມເປັນສິນຄ້າຢູ່ 6 ເມືອງຄື: ເມືອງໄຊຍະບູລີ, ເມືອງຫົງສາ, ເມືອງເງິນ, ເມືອງຊຽງຮ່ອນ, ເມືອງພຽງ ແລະ ເມືອງປາກລາຍ ມີເນື້ອທີ່ທັງໝົດ 1.250 ເຮັກຕາ.
ຂ່າວ: ບຸນທີ.

“ລະດັບນຳ້ເຊແຕ່ລະສາຍ-ປະລິມານນຳ້ຝົນແຕ່ລະເມືອງ”+ ຕອນເຊົ້າວັນທີ 18 ຕຸລາ 2020.

l. ລະດັບນຳ້ເຊ:

1. ເຊບັງຫຽງ (ສົບນຳ້): ນຳ້ຖ້ວມຫລ້າ (ວັດແທກບໍ່ໄດ້) ສະແດງນຳ້ຂື້ນໄວກາຍເຂດອັນຕະລາຍ.

2. ເຊບັງຫຽງ (ລະຫານຳ້): 15.95 ມ (+0.75 ມ) ກາຍເຂດອັນຕະລາຍ 0.95 ມ. 3. ເຊຈຳພອນ: 7.97 ມ (+0.41 ມ) ກາຍເຂດລະວັງໄພ.

3. ເຊຊັງຊອຍ (ຊຽງຮົ່ມ): 10.14 ມ (+0.28 ມ) ກາຍເຂດລະວັງໄພ.

II. ປະລິມານນຳ້ຝົນ:

1. ເມືອງນອງ ຫນັກສຸດ

2. ເມືອງເຊໂປນ ຫນັກຫລາຍ

3. ເມືອງພີນ ຫນັກ

+ ລະດັບນຳ້ເຊບັງຫຽງທາງໃຕ້ຈະເພີ່ມຂື້ນໄວ ລວມທັງສາຂາ, ນຳ້ຖ້ວມເນື້ອທີ່ນາ ແລະ ບ້ານຈະສູງຂື້ນຕາມຢ່າງແນ່ນອນ.

ລາຍງານໂດຍ: ຄໍາມອນ ທິລະວົງ

ພະຍາກອນອາກາດປະຈຳວັນທີ 17 /10/2020. ຮ່ອງຄວາມກົດດັນອາກາດຕໍ່າໄດ້ພາດຜ່ານຢູ່ແຂວງພາກໃຕ້ຂອງປະເທດລາວ, ສົມທົບກັບກະແສລົມຕາເວັນອອກ – ຕາເວັນອອກສ່ຽງເໜືອ ມີກໍາລັງແຮງພັດປົກຄຸມເປັນສ່ວນໃຫ່ຍ, ສ່ວນພາກເໜືອ ຫາ ພາກກາງຂອງປະເທດລາວ ຄວາມກົດດັນອາກາດສູງຈາກປະເທດຈີນໄດ້ແຜ່ລົງມາປົກຄຸມດ້ວຍກໍາລັງອ່ອນ ຫາ ປານກາງ,

ຊຶ່ງຈະເຮັດໃຫ້ອາກາດເຢັນຢູ່ທົ່ວໄປ ໃນຕອນເຊົ້າ ແລະ ຍັງຈະມີຝົນຕົກໃນລະດັບຄ່ອຍຢູ່ໃນແຕ່ລະພາກ ແລະ ຕົກໃນລະດັບປານກາງ ພ້ອມຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນແຂວງພາກກາງ ແລະ ພາກໃຕ້.

ແຈ້ງເຕືອນລະດັບແມ່ນໍ້າສາຂາ ແກ້ງກອກ (ເຊຈໍາພອນ), ແມ່ນໄດ້ສູງກ່ວາເຂດລະວັງໄພ, ແກ້ງໂດນ (ເຊບັ້ງຫຽງ) , ເຊໂປນ (ເຊບັ້ງຫຽງ) ແລະ ລະຫານໍ້າ (ເຊບັ້ງຫຽງ) ແຂວງ ສະຫວັນນະເຂດ ແມ່ນຍັງສູງກ່ວາເຂດອັນຕະລາຍ.

ດັ່ງນັ້ນ, ຈຶ່ງຂໍແຈ້ງເຕືອນເຖິງປະຊາຊົນບັນດາເຜົ່າ ແລະ ອົງການປົກຄອງທຸກພາກສ່ວນທີ່ອາໃສຢູ່ເຂດແຂວງດັ່ງກ່ວາ. ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ ທີ່ຈະເຮັດໃຫ້ມີ ນໍ້າຖ້ວມຊຸ, ດິນເຈື່ອນ ແລະ ນໍ້າຖ້ວມອັ່ງ. ພ້ອມໃຫ້ຍົກຍ້າຍວັດຖຸສິ່ງຂອງ ແລະ ສັດລ້ຽງໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ ຢ່າງເປັນປະຈໍາ.

ໃນຕອນເຊົ້າວັນທີ 15 ຕຸລາ 2020 ຢູ່ #ຫ້ອງການສາທາລະນະສຸກເມືອງປາກກະດິງ #ແຂວງບໍລິຄຳໄຊ ໄດ້ຈັດພິທີທຳລາຍສິນຄ້າເສື່ອມຄຸນນະພາບ ໃຫ້ກຽດເຂົ້າຮ່ວມໂດຍທ່ານ ບຸນຍັງ ອຸ່ນຊຽງໃໝ່ ຮອງເຈົ້າເມືອງປາກກະດິງ, ທ່ານ ດຣ ຂັນທອງ ວົງໂກສີ ຮັກສາການຫົວໜ້າຫ້ອງການສາທາລະນະສຸກເມືອງ, ມີຄະນະກຳມະການຄຸ້ມຄອງອາຫານ ແລະ ຢາ ເຂົ້າຮ່ວມ.ຜ່ານມາຫ້ອງການສາທາລະນະສຸກ, ອຸດສາຫະກຳ ແລະ ການຄ້າ, ກະສິກຳ ແລະ ປ່າໄມ້, ປກສ, ເຕັກໂນໂລຊີ, ຖວທ, ການເງິນ ແລະ ຫ້ອງການແຜນການ ແລະ ການລົງທຶນ ໄດ້ລົງຕິດຕາມ-ກວດກາ ບັນດາຮ້ານຂາຍເຄື່ອງທີ່ີເປັນເປົ້າໝາຍ ຢູ່ພາຍໃນເມືອງ ເພື່ອກວດກາຄຸນນະພາບອາຫານສຳເລັດຮູບ, ຮັບປະກັນໃຫ້ຜູ້ບໍລິໂພກມີຄວາມປອດໄພ,

ການຈັດຕັ້ງປະຕິບັດປະຈຳໄຕມາດ III ໄດ້ເຄື່ອນໄຫວໃນລະຫວ່າງວັນທີ 14 ຫາ 23 ກັນຍາ 2020 ຜ່ານມາ ໂດຍໄດ້ກວດຮ້ານຂາຍເຄື່ອງຍ່ອຍ ແລະ ຂາຍເຄື່ອງສົ່ງ 180 ຮ້ານ ພົບອາຫານໝົດອາຍຸ-ເສື່ອມຄຸນນະພາບຢູ່ 94 ຮ້ານ, ມີ 50 ລາຍການ, ເຄື່ອງບໍລິໂພກເສື່ອມຄຸນທີ່ກວດພົບ ສ່ວນຫລາຍແມ່ນ ເຂົ້າໜົມ, ເຄື່ອງດື່ມ, ນ້ຳອັດລົມ, ໝີ່ສຳເລັດຮູບ, ເຄື່ອງປຸງແຕ່ງອາຫານໃນຄົວເຮືອນ ແລະ ເຄື່ອງສຳອາງຈຳນວນໜຶ່ງ.ນອກນີ້ ຍັງພົບຢາປົວພະຍາດທີ່ວາງຂາຍຕາມຮ້ານຂາຍເຄື່ອງຍ່ອຍ ທີ່ບໍ່ແມ່ນຮ້ານຂາຍຢາ ຈຳວນ 3 ຮ້ານ, ມີ 18 ລາຍການ ລວມມູນຄ່າທັງໝົດ 23.497.500ກີບ.

ຄະນະກຳມະການຄຸ້ມຄອງອາຫານ ແລະ ຢາ ຂັ້ນເມືອງປາກກະດີງ ຈຶ່ງໄດ້ອາຍັດໄວ້ ແລະ ມາຮອດຕອນເຊົ້າວັນທີ 15 ຕຸລາ 2020 ຈຶ່ງໄດ້ຈັດພິທີທຳລາຍຢ່າງເປັນທາງການ ດ້ວຍການຈູດຖີ້ມ.

ກອງປະຊຸມຄົບຄະນະ ຄັ້ງທີ 11 ສະໄໝທີ X ຂອງຄະນະບໍລິຫານງານສູນກາງພັກ ໄດ້ດຳເນີນຢ່າງເປັນທາງການ ແຕ່ວັນທີ 12 ແລະ ປິດລົງ ໃນວັັນ 16 ຕຸລາ 2020 ນີ້ ທີ່ສຳນັກງານສູນກາງພັກ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ ໃນກອງປະຊຸມຄັ້ງນີ້ ມີບັນດາສະຫາຍກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ທີ່ປືກສາຄະນະບໍລິຫານງານສູນກາງພັກ, ບັນດາສະຫາຍກຳມະການສູນກາງພັກ ສົມບູນ ແລະ ສຳຮອງ ພ້ອມທັງເລຂາຄະນະພັກກະຊວງ-ອົງການ ແລະ ເລຂາພັກແຂວງ ເຂົ້າຮ່ວມ

ກອງປະຊຸມໄດ້ຄົ້ນຄວ້າຕີລາຄາສູງ ຕໍ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ທີ່ມີຜົນສໍາເລັດເປັນຢ່າງດີ, ເຮັດໃຫ້ປະເທດຊາດ ສືບຕໍ່ຮັກສາໄດ້ສະຖຽນລະພາບທາງດ້ານການເມືອງ ຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ, ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ, ຮັກສາໄດ້ຄວາມເປັນເອກະລາດ, ອຳນາດອະທິປະໄຕ ແລະ ລະບອບປະຊາທິປະໄຕ ປະຊາຊົນ ໄວ້ໄດ້ຢ່າງໝັ້ນຄົງ ແລະ ໜັກແໜ້ນ; ເສດຖະກິດ ເຖິງວ່າບໍ່ບັນລຸໄດ້ຕາມຄາດໝາຍແຜນການທີ່ວາງໄວ້ ແຕ່ກໍຍັງສືບຕໍ່ຂະຫຍາຍຕົວຢ່າງຕໍ່ເນື່ອງ; ບັນດາໂຄງການລົງທຶນໃຫຍ່ໆເຊັ່ນ: ໂຄງການສ້າງເສັ້ນທາງລົດໄຟລາວ-ຈີນ, ໂຄງການທາງດ່ວນ, ໂຄງການພັດທະນາ ແລະ ຂຸດຄົ້ນພະລັງງານ-ບໍ່ແຮ່, ໂຄງການກໍ່ສ້າງເຂດເສດຖະກິດພິເສດ ຕິດພັນກັບການຈັດສັນຕົວເມືອງຊົນນະບົດ, ໂຄງການສົ່ງເສີມດ້ານການທ່ອງທ່ຽວ ແລະ ໂຄງການສຳຄັນອື່ນໆ ກໍໄດ້ສືບຕໍ່ຈັດຕັ້ງປະຕິບັດໄປຕາມແຜນທີ່ກໍານົດໄວ້; ການພັດທະນາທາງດ້ານພື້ນຖານວັດຖຸເຕັກນິກ, ທາງດ້ານວັດທະນະທຳ-ສັງຄົມ, ການແກ້ໄຂຄວາມທຸກຍາກຂອງປະຊາຊົນ ໄດ້ຮັບການພັດທະນາ ແລະ ເອົາໃຈໃສ່ແກ້ໄຂຢ່າງຕັ້ງໜ້າ ແລະ ມີຜົນສຳເລັດເປັນກ້າວໆ; ການປະຕິບັດມາດຕະການຕ້ານ-ປ້ອງກັນພະຍາດໂຄວິດ-19 ໄດ້ກໍ່ໃຫ້ເກີດຜົນສໍາເລັດໃນລະດັບດີສົມຄວນ.

ກອງປະຊຸມ ໄດ້ພ້ອມກັນປຶກສາຫາລື ແລະ ລົງເລິກຄົ້ນຄວ້າ ເອກະສານທີ່ມີຄວາມສຳຄັນຍຸດທະສາດ ຈໍານວນໜຶ່ງ ດັ່ງນີ້:

(1). ຜົນການຈັດຕັ້ງຜັນຂະຫຍາຍ ມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກ ສະໄໝທີ X ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາປະຈຳປີ 2020 ແລະ ທິດທາງແຜນການວຽກງານປະຈໍາປີ 2021. ກອງປະຊຸມເປັນເອກະພາບຕໍ່ບັນດາທິດທາງມາດຕະການກະຕຸ້ນ ແລະ ຍູ້ແຮງການເຕີບໂຕຂອງເສດຖະກິດ-ສັງຄົມ, ໂດຍສະເພາະໃນໄລຍະທີ່ເສດຖະກິດ ຖືກຜົນກະທົບຈາກພະຍາດປອດອັກເສບສາຍພັນໃໝ່ໂຄວິດ-19 ໄດ້ພະຍາຍາມປັບປຸງສະພາບແວດລ້ອມຂອງການລົງທຶນໃຫ້ມີຄວາມສອດຄ່ອງ ແລະ ສືບຕໍ່ຍູ້ແຮງການຜະລິດເປັນສິນຄ້າຕາມທ່າແຮງຂອງແຕ່ລະຂະແໜງການ ແລະ ແຕ່ລະທ້ອງຖິ່ນ, ມີການປັບປຸງການຄຸ້ມຄອງ ແລະ ສົ່ງເສີມການຜະລິດສິນຄ້າເພື່ອຊົມໃຊ້ພາຍໃນ ແລະ ສົ່ງອອກເພື່ອສ້າງລາຍຮັບແຫ່ງຊາດໃຫ້ເພີ່ມຂຶ້ນ, ເອົາໃຈໃສ່ແກ້ໄຂການເຄື່ອນໄຫວທຸລະກິດ, ການບໍລິການ, ການແບ່ງຂັ້ນຄຸ້ມຄ່ອງ ແລະ ການປະສານງານ ລະຫວ່າງສູນກາງພັກ ທ້ອງຖິ່ນໃຫ້ມີຄວາມກົມກຽວຫຼາຍຂຶ້ນ, ກົນໄກການບໍລິຫານທີ່ມີຫຼາຍຂອດຫຼາຍຂັ້ນເລີ່ມມີການປັບປຸງແກ້ໄຂ; ສຸມໃສ່ແກ້ໄຂໜີ້ສິນສາທາລະນະ, ເລັ່ງປັບປຸງລັດວິສາຫະກິດຈຳນວນໜຶ່ງ ເຮັດໃຫ້ການດໍາເນີນທຸລະກິດມີປະສິດທິຜົນດີຂຶ້ນ, ລວມທັງເອົາໃຈໃສ່ສະກັດກັ້ນ ແລະ ແກ້ໄຂການຮົ່ວໄຫຼຂອງງົບປະມານຢ່າງເຂັ້ມງວດ; ຄຸ້ມຄອງການປະຕິບັດລະບຽບລາຍຈ່າຍບໍລິຫານ ກໍຄືການລົງທຶນຂອງລັດຢ່າງມີຈຸດສຸມ ແນໃສ່ສ້າງການຫັນປ່ຽນທີ່ແທ້ຈິງໃນຊຸມປີຕໍ່ໜ້າ.

(2). ການກະກຽມກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII ແລະ ການກະກຽມດໍາເນີນການເລືອກຕັ້ງສະມາຊິກສະພາແຫ່ງຊາດ ຊຸດທີ IX; ສະພາປະຊາຊົນແຂວງ ຊຸດທີ II. ກອງປະຊຸມເປັນເອກະພາບສູງ ທີ່ຖືເອົາບັ້ນເລືອກຕັ້ງໃນຄັ້ງນີ້ ເປັນເຫດການການເມືອງສໍາຄັນຂອງປະເທດຊາດ ໃນການສືບຕໍ່ສ້າງ ແລະ ບູລະນະລະບອບປະຊາທິປະໄຕປະຊາຊົນ ໃຫ້ໜັກແໜ້ນ, ເຂັ້ມແຂງ ແລະ ບັນລຸອຸດົມການ ກໍຄືທາດແທ້ ຂອງລັດ ທີ່ມາຈາກປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນ ຢ່າງແທ້ຈິງ.ທັງນັ້ນກໍເພື່ອແນໃສ່ສ້າງການຫັນປ່ຽນທີ່ແຂງແຮງ ແລະ ເລິກເຊິ່ງໃນການຍົກສູງປະສິດທິພາບການເຄື່ອນໄຫວ ປະຕິບັດພາລະບົດບາດ, ໜ້າທີ່ ຂອງສະພາແຫ່ງຊາດ ແລະ ສະພາປະຊາຊົນແຂວງ ໃນເງື່ອນໄຂໃໝ່ ໃຫ້ພົ້ນເດັ່ນຂຶ້ນຕື່ມ.

(3). ກອງປະຊຸມໄດ້ປະກອບຄໍາເຫັນໃສ່ຮ່າງລາຍງານການເມືອງ ທີ່ຈະສະເໜີຕໍ່ກອງປະຊຸມໃຫຍ່ ຄັ້ງທີ XI ຂອງພັກ. ໂດຍເນັ້ນໜັກໃສ່ບັນຫາທີ່ເປັນທັດສະນະພື້ນຖານ, ລັກສະນະນໍາໜ້າຂອງພັກ, ການເຕົ້າໂຮມຄວາມສາມັກຄີເປັນປຶກແຜ່ນ, ບັນຫາການຢຶດໝັ້ນ ແລະ ຜັນຂະຫຍາຍແນວທາງປ່ຽນແປງໃໝ່, ບັນຫາການປົກປັກຮັກສາໝາກຜົນຂອງການປະຕິວັດ, ສ້າງການຫັນປ່ຽນໃໝ່ໃນການພັດທະນາ, ການຍົກສູງຄຸນນະພາບຊີວິດຂອງປະຊາຊົນ, ການນຳເອົາປະເທດຊາດຫຼຸດພົ້ນອອກຈາກຄວາມດ້ອຍພັດທະນາ ແລະ ກ້າວຂຶ້ນສູ່ຈຸດໝາຍສັງຄົມນິຍົມ.

ພ້ອມນັ້ນກອງປະຊຸມຍັງໄດ້ປະກອບຄຳເຫັນໃສ່ ຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍສຸມໃສ່ປຶກສາຫາລື ການປັບປຸງໂຄງປະກອບເສດຖະກິດ, ການກຳນົດໂຕເລກການເຕີບໂຕ GDP ແລະ ບັນຫາທີ່ເປັນພື້ນຖານ ໃນຂົງເຂດສັງຄົມ ເປັນຕົ້ນແມ່ນ ຂະແໜງທີ່ພົວພັນເຖິງການສ້າງຊັບພະຍາກອນມະນຸດ ກໍຄືສ້າງສັກກາຍະພາບໃຫ້ແກ່ຄົນລາວ, ການສົ່ງເສີມການສຶກສາ, ການເຂົ້າເຖິງແຫຼ່ງສາທາລະນະສຸກ ແລະ ການສົ່ງເສີມຄວາມສາມາດຂອງແຮງງານລາວ, ການພັດທະນາຊົນນະບົດແກ້ໄຂຄວາມທຸກຍາກຕາມທິດສ້າງຊົນນະບົດໃໝ່.

(4). ກອງປະຊຸມຍັງໄດ້ສຸມໃສ່ຄົ້ນຄວ້າ, ປຶກສາຫາຫຼື ແລະ ໃຫ້ທິດຊີ້ນຳຕໍ່ການປັບປຸງຮ່າງກົດລະບຽບຂອງພັກປະຊາຊົນປະຕິວັດລາວ ສະໄໝທີ XI, ຂໍ້ຕົກລົງວ່າດ້ວຍລະບອບ ແລະ ແບບແຜນວິທີເຮັດວຽກຂອງຄະນະບໍລິຫານງານສູນກາງພັກ, ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ໃຫ້ສອດຄ່ອງ ແລະ ຮັບປະກັນຫຼັກການນຳພາຂອງພັກໃນສະພາບການໃໝ່, ຕີລາຄາ ແລະ ໃຫ້ການຊີ້ນຳ ການສືບຕໍ່ກະກຽມ, ດໍາເນີນກອງປະຊຸມໃຫຍ່ ອົງຄະນະພັກຂັ້ນຕ່າງໆ ແລະ ກອງປະຊຸມໃຫຍ່ ຄັ້ງທີ XI ຂອງພັກ ຮັບປະກັນເຮັດໃຫ້ພັກມີຄວາມປອດໃສ-ເຂັ້ມແຂງ ແລະ ໜັກແໜ້ນ.

ໃນຕອນທ້າຍຂອງກອງປະຊຸມ ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ໄດ້ເນັ້ນໜັກໃຫ້ທົ່ວພັກ ຈົ່ງສືບຕໍ່ເສີມຂະຫຍາຍມູນເຊື້ອຄວາມສາມັກຄີເປັນເອກະພາບ, ເພີ່ມທະວີຄວາມເອົາໃຈໃສ່, ນໍາພາ-ຊີ້ນໍາ ປະຕິບັດໜ້າທີ່ການເມືອງ ທີ່ໄດ້ຮັບມອບໝາຍ ໃຫ້ສູງຂຶ້ນຕື່ມອີກ. ພ້ອມກັນສືບຕໍ່ກະກຽມຄວາມພ້ອມດ້ານຕ່າງໆ ໃຫ້ແກ່ການດຳເນີນກອງປະຊຸມໃຫຍ່ຂອງອົງຄະນະພັກແຂວງ, ກະຊວງ-ອົງການຢ່າງເປັນຂະບວນຟົດຟື້ນ, ສ້າງພື້ນຖານອັນໜັກແໜ້ນ ໃຫ້ແກ່ການດຳເນີນກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວໃຫ້ ມີຜົນສໍາເລັດຢ່າງຈົບງາມ.

ຂ່າວ: ຫ້ອງວ່າການສູນກາງພັກ.ພາບ:ພູວຽງຄຳ