ສະຫວັນນະເຂດ: ລາຍງານຈາກ ຊ່ອງຂ່າວເມືອງສອງຄອນ ໃຫ້ຮູ້ວ່າ ສະຖານະການນ້ຳຖ້ວມຢູ່ເມືອງສອງຄອນ ໃນເຊົ້າມື້ນີ້ ທີ 22 ຕຸລາ 2020 ລະດັບນ້ຳເຊບັງຫຽງ ຢູ່ສະຖານີລະຫານ້ຳ ເວລາ 6:00 ນາທີ ວັດແທກໄດ້ 18,88ແມັດ ຢູ່ໃນລັກສະນະຊົງຕົວ.

ເຮືອນຊານ,ເນື້ອທີ່ນາເຂົ້າ ບ້ານທີ່ຢູ່ລຽບເຊບັງຫຽງ ຈຳນວນ 21 ບ້ານ ມີ 4 ກຸ່ມບ້ານ ຖືກນ້ຳຖ້ວມເປັນບໍລິເວນກ້ວາງ

ທາງເມືອງສອງຄອນ ໄດ້ຈັດສົ່ງ ກຳລັງທະຫານເມືອງ,ເຈົ້າຫນ້າທີ່ຕຳຫລວດ ປກສ ເມືອງສອງຄອນ ແລະ ກຳລັງກອງພັນທະຫານຮາບທີ5 ເຂົ້າຊ່ວຍເຫລືອປະຊາຊົນ.

ພາບລ່າສຸດ: ຈາກທິມງານຊ່ອງຂ່າວເມືອງສອງຄອນ.

.

ກົດຊົມພາບເພີ່ມເຕີມ

ບໍ່ແກ້ວ: ພິທີ ຮັບຮອງຄອບຄົວ ແລະ ບ້ານພັດທະນາດ້ານແຮງງານ ແລະ ສະຫວັດດີການສັງຄົມ ຂອງບ້ານໃຫ່ຍປາກທາ, ບ້ານໂພນທອງ ແລະ ບ້ານຫ້ວຍທອງ ເມືອງປາກທາ ແຂວງບໍ່ແກ້ວ ໄດ້ມີຂື້ນ ໃນວັນທີ 21 ຕຸລານີ້ ທີ່ຫ້ອງປະຊຸມບ້ານໃຫ່ຍປາກທາ ເຂົ້າຮວມມີທ່ານ ສຸໄລ ດວງຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງປາກທາ ທ່ານ ໂພເພັດ ບຸນທອງ ຮອງຫົວໜ້າພະແນກແຮງງານ ແລະ ສະຫວັດດີການ-ສັງຄົມ ແຂວງບໍ່ແກ້ວ ມີອຳນາດການປົກຄອງບ້ານທັງ 3 ບ້ານ ພ້ອມດ້ວຍພໍ່ແມ່ປະຊາຊົນ ແລະ ແຂກເຊີນຂອງເມືອງ ເຂົ້າຮວມ.

ທ່ານ ສູນທອນ ອຸດທະຍາ ຕ່າງໜ້າໃຫ້ອຳນາດການປົກຄອງບ້ານທັງ 3 ບ້ານໄດ້ກ່າວວ່າ: ຜ່ານການປະເມີນຄອບຄົວຕາມ 3 ມາດຖານການປະເມີນການພັດທະນາດ້ານແຮງງານ ແລະ ສະຫວັດດີການສັງຄົມ ມີຄອບຄົວທີໄດ້ຮັບຮອງເປັນຄອບຄົວພັດທະນາດ້ານແຮງງານ ແລະ ສະຫວັດດີການສັງຄົມ ໄດ້ທັງໝົດ 684 ຄອບຄົວ ໃນນີ້ການປະເມີນບ້ານພັດທະນາຕາມ 6 ມາດຖານແມ່ນໄດ້ປະຕິບັດເຊັນວ່າ:

ມາດຖານທີ1 ສະມາຊິກພາຍໃນບ້ານຜູ້ທີມີອາຍຸແຕ່14-60ປີ ໄດ້ຮັບການສຶກສາອົບຮົມ ຮຽນຮູ້ລະບຽບກົດໝາຍຕ່າງໆກວມເອົາ 85%,

ມາດຖານທີ2 ມີຜູ້ຮັບຜິດຊອບວຽກງານແຮງງານ ແລະ ສະຫວັດດີການສັງຄົມປະຈຳບ້ານ ກວມເອົາ 100%,

ມາດຖານທີ3 ມີປື້ມບັນທຶກຂໍ້ມູນສະຖິຕິດ້ານແຮງງານ ແລະ ສະຫວັດດີການສັງຄົມທີເປັນລະບົບກວມເອົາ 100%,

ມາດຖານທີ4 ກຳລັງແຮງພາຍໃນຄອບຄົວມີອາຍຸແຕ່ 14-60ປີ ມີວຽກເຮັດງານທຳຕາມຄວາມຮູ້ຄວາມສາມາດ ກວມເອົາ 92%,

ມາດຖານທີ5 ການຄຸ້ມຄອງແຮງງານລາວ ແລະ ແຮງງານຕ່າງປະເທດພາຍໃນບ້ານທີ່ຖືກຕ້ອງຕາມລະບຽບກົດໝາຍປະຕິບັດໄດ້ 100% ແລະ

ມາດຖານທີ6 ປະຊາຊົນພາຍໃນບ້ານມີຊີວິດການເປັນຢູ່ທີດີ ແລະ ມີກອງທືນຊ່ວຍເຫຼືອເຊິງກັນ ແລະ ກັນປະຕິບັດໄດ້ 100%

ຈາກນັ້ນກໍ່ໄດ້ຜ່ານຂໍ້ຕົກລົງ ທ່ານ ເຈົ້າເມືອງປາກທາ ວ່າດ້ວຍການມອບໃບຢັ້ງຢືນຄອບຄົວ ແລະ ໃບຢັ້ງຢືນບ້ານພັດທະນາດ້ານແຮງງານ ແລະ ສະຫວັດດີການສັງຄົມ ເປັນກຽດມອບໃບຢັ້ງຢືນຄອບຄົວພັດທະນາດ້ານແຮງງານ ແລະ ສະຫວັດດີການສັງຄົມ ໂດຍແມ່ນ ທ່ານ ໂພເພັດ ບຸນທອງ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ມອບໃບຢັ້ງຢືນບ້ານພັດທະນາດ້ານແຮງງານ ແລະ ສະຫວັດດີການສັງຄົມ ໂດຍແມ່ນທ່ານ ສຸໄລ ດວງຜາຄຳ ກຳມະການພັກແຂວງ ເລຂາພັກເມືອງ ເຈົ້າເມືອງປາກທາ ພ້ອມທັງມີຄຳເຫັນໂອ້ລົມຮຽກຮ້ອງໃຫ້ອຳນາດການປົກຄອງບ້ານຕະຫຼອດຮອດພໍ່ແມ່ປະຊາຊົນ ຈົງເປັນເຈົ້າການໃນການສືບຕໍ່ກໍ່ສ້າງແລະເສີມຂະຫຍາຍໃຫ້ເສດຖະກິດແກ້ໄຂຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂື້ນເລືື້ອຍໆ ແລະ ພ້ອມກັນຮັກສາບ້ານພັດທະນາດ້ານແຮງງານ ແລະ ສະຫວັດດີການສັງຄົມ ພ້ອມດ້ວຍບ້ານແບບຢ່າງອື່ນໆ ໄວ້ໃຫ້ຢືນຍົງຍາວນານຕະຫຼອດໄປ ໂອກາດດຽວກັນນີ້ ຄະນະນຳຂອງແຂວງ ຂອງເມືອງ ພ້ອມດ້ວຍແຂກເຊີນແລະ ພໍ່ແມ່ປະຊາຊົນ ກໍ່ໄດ້ພ້ອມກັນເປີດປ້າຍ ແລະ ລັນຄ້ອງ 9 ບາດ ເພື່ອເປັນສັນຍາລັກຂອງການປະກາດຮັບຮອງຄອບຄົວ ແລະ ບ້ານພັດທະນາດ້ານແຮງງານ ແລະ ສະຫວັດດີການສັງຄົມ ໃນຄັ້ງນີ້ຢ່າງເປັນທາງການ.

ພາບ-ຂ່າວ: ພອນສະຫວັນ ມະນີສີ.

ລັດຖະບານ: ໃນວັນທີ 20 ຕຸລາ 2020 ຢູ່ກະຊວງແຜນການ ແລະ ການລົງທຶນ ໄດ້ມີກອງປະຊຸມສຸກເສີນຂອງຄະນະກຳມະການຄຸ້ມຄອງໄພພິບັດຂັ້ນສູນກາງ ເພື່ອຕອບໂຕ້ໄພພິບັດນ້ຳຖ້ວມ ທີ່ກຳລັງເກີດຂຶ້ນຢູ່ບັນດາແຂວງພາກກາງ ແລະ ພາກໃຕ້ຂອງ ສປປ ລາວ, ໂດຍການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ປະທານຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ມີຮອງລັດຖະມົນຕີ, ຮອງປະທານ ແລະ ຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ້ອງຖິ່ນເຂົ້າຮ່ວມ.

ກອງປະຊຸມໄດ້ຮັບຟັງລາຍງານສະພາບໄພພິບັດທີ່ເກີດຂຶ້ນ ໂດຍລວມຢູ່ບັນດາແຂວງໃນທົ່ວປະເທດ ໂດຍສະເພາະແມ່ນໄພນ້ຳຖ້ວມທີ່ກຳລັງເກີດຂຶ້ນ ຢູ່ແຂວງສະຫວັນນະເຂດ, ສະພາບການແຈ້ງຂ່າວເຕືອນໄພ ແລະ ການປ່ອຍນ້ຳຢູ່ບັນດາເຂື່ອນ, ພ້ອມທັງຮັບຟັງຄວາມຄືບໜ້າການແກ້ໄຂຟື້ນຟູຫລັງໄພພິບັດຢູ່ເມືອງສະໜາມໄຊ ແຂວງອັດຕະປື ແລະ ການປະກອບຄຳຄິດຄຳເຫັນ ຕໍ່ມາດຕະການ ແລະ ວິທີການແກ້ໄຂຟື້ນຟູຄວາມເສຍຫາຍ ຈາກໄພພິບັດທຳມະຊາດທີ່ເກີດຂຶ້ນ.

ໂອກາດນີ້, ທ່ານ ສອນໄຊ ສີພັນດອນ ໄດ້ມີຄຳເຫັນວ່າ: ຊ່ວງໄລຍະທ້າຍປີ 2019 ຫາຕົ້ນປີ 2020 ສປປ ລາວ ພວກເຮົາໄດ້ຮັບຜົນກະທົບຢ່າງໜັກ ຈາກການລະບາດຂອງພະຍາດ COVID-19 ແລະ ກໍຍັງໄດ້ຮັບຜົນກະທົບຈາກໄພພິບັດທາງທຳມະຊາດຕື່ມອີກ ເປັນຕົ້ນໄພນ້ຳຖ້ວມ, ແຫ້ງແລ້ງ, ດິນເຈື່ອນ, ລົມພາຍຸ, ແຜ່ນດິນໄຫວ ລວມເຖິງສັດຕູພືດທໍາລາຍຜົນຜະລິດຂອງປະຊາຊົນ, ເຊິ່ງທັງໝົດນີ້ ແມ່ນໄດ້ສ້າງຄວາມເສຍຫາຍຕໍ່ສຸຂະພາບ, ຊີວິດ ແລະ ຊັບສິນຂອງປະຊາຊົນ, ສ້າງຄວາມເສຍຫາຍຕໍ່ພື້ນຖານໂຄງລ່າງ ແລະ ເສດຖະກິດຂອງປະເທດ.

ດັ່ງເຫດການໄພນ້ຳຖ້ວມ ທີ່ກຳລັງເກີດຂຶ້ນຢູ່ແຂວງສະຫວັນນະເຂດ ຢູ່ 8 ເມືອງ ຄື: ເມືອງພີນ, ເຊໂປນ, ເມືອງນອງ, ທ່າປາງທອງ, ສອງຄອນ, ຈຳພອນ, ຊົນນະບູລີ ແລະ ເມືອງວິລະບູລີ ສົ່ງຜົນກະທົບໂດຍກົງຕໍ່ປະຊາຊົນ 90 ບ້ານ, 2.874 ຄອບຄົວ, 15 ພັນກວ່າຄົນ, ມີເຮືອນເສຍຫາຍຈຳນວນ 35 ຫລັງ.

ນອກນີ້, ພື້ນທີ່ຜົນຜະລິດ, ສັດລ້ຽງ, ຊົນລະປະທານ, ເສັ້ນທາງ, ຂົວ, ໂຮງຮຽນ, ສຸກສາລາ ແລະ ຊັບສີນອື່ນໆເປ່ເພເສຍຫາຍ. ຕໍ່ສະພາບດັ່ງກ່າວ, ຄະນະກຳມະການຄຸ້ມຄອງໄພພິບັດພວກເຮົາ ຕ້ອງເອົາໃຈໃສ່ຊອກຫາວິທີການ ແລະ ມາດຕະການຟື້ນຟູຊ່ວຍເຫລືອໃຫ້ທັນການ ແລະ ມີປະສິດທິຜົນ.

ຂ່າວ: ສຸພາສະຫວັນ ສີຊະນະມຸງຄຸນ

ສະຫວັນນະເຂດ: ລາຍງານຈາກຂ່າວເມືອງສອງຄອນໃຫ້ຮູ້ ສະພາບນ້ຳຖ້ວມເຮືອນຊານຂອງປະຊາຊົນ ຢູ່ບ້ານລະຫານ້ຳ ແລະ ບ້ານນາທັງ ເມືອງສອງຄອນ ແຂວງສະຫວັນນະເຂດ ເວລາ 12:00 ວັນທີ 21 ຕຸລາ 2020.

ນໍ້າແມ່ນໄດ້ຖ້ວມຂຶ້ນສູງຢ່າງໜ້າວິຕົກ. ເຮືອນຊັ້ນດຽວແມ່ນຈົມນໍ້າເກືອບໝົດແລ້ວ. ປະຊາຊົນແມ່ນພາກັນອົບພະຍົບໄປບ່ອນປອດໄພ.

ທາງພາກສ່ວນກ່ຽວຂ້ອງ ໂດຍສະເພາະ ທາງການນໍາເມືອງສອງຄອນ ແມ່ນໄດ້ລົງຕິດຕາມສະຖານະການ ແລະ ໃຫ້ການຊ່ວຍເຫຼືອປະຊາຊົນຢ່າງເລັ່ງດ່ວນ.

ຂໍໃຫ້ທຸກຄົນປອດໄພ 🙏🙏🙏

.

.

.

.

.

.

.

.

.

.

ເມືອງສອງຄອນ: ລາຍງານຈາກ ນັກຂ່າວເມືອງສອງຄອນ ໃຫ້ຮູ້ວ່າ: ສະຖານະການນ້ຳຖ້ວມລ່າສຸດ ໃນຕອນເຊົ້າມື້ນີ້ ວັນທີ 21 ຕຸລາ 2020 ລະດັບນ້ຳເຊບັງຫຽງຍັງຄົງເພີ່ມຂື້ນຢ່າງຕໍ່ເນື່ອງ ເວລາ 5:30 ນາທີ ຢູ່ສະຖານີລະຫານ້ຳ ວັດແທກ ໄດ້ 18,50ແມັດ ສູງກາຍເຂດອັນຕະຫລາຍ ເຖິງ 3,50ແມັດ ເພາະ ເຂດອັນຕະລາຍແມ່ນ 15 ແມັດ.

ຫລາຍພື້ນທີ່ຂອງເມືອງ ລຽບສາຍເຊບັງຫຽງ ມີ 21 ບ້ານ ລວມມີ 4 ກຸ່ມບ້ານທີ່ໄດ້ຮັບຜົນກະທົບໃນຂະນະນີ້ ຄື ກຸ່ມບ້ານທີ 6, 10,11 ແລະ ກຸ່ມບ້ານທີ12.ລະດັບນ້ຳເລີ່ມໄຫຼເຂົ້າຖ້ວມເຮືອນຊານຂອງປະຊາຊົນ ເປັນບໍລິເວນກວ້າງ, ສະຖານະການໜ້າເປັນຫວ່ງ.

ແຂວງສະຫວັນນະເຂດ ໄດຈັດສົ່ງກຳລັງທະຫານເມືອງ, ເຈົ້າໜ້າທີ່ຕຳຫລວດຈາກກອງບັນຊາການ ປກສເມືອງ ແລະ ຂໍກຳລັງຈາກກອງພັນທະຫານຮາບທີ4ແລະທີ5, ເຂົ້າຊ່ວຍເຫຼືອປະຊາຊົນອົບພະຍົບໄປເຂດປອດໄພ.

.

.

.

.

.

.

.

ຕອນບ່າຍວັນທີ  20 ຕຸລາ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ  ຫຼັກ 6 ນະຄອນຫລວງວຽງຈັນ ທ່ານ ນາງ ສວນສະຫວັນ ວິຍະເກດ, ກໍາມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ ຖະແຫລງຕໍ່ສື່ມວນຊົນ ກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ ຊຸດທີ VIII ວ່າ:

ປະຕິບັດຕາມມາດຕາ 57 ຂອງລັດຖະທຳມະນູນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະມາດຕາ 60 ຂອງກົດໝາຍວ່າດ້ວຍສະພາແຫ່ງຊາດ ສະບັບປັບປຸງປີ 2020 ກ່ຽວກັບກອງປະຊຸມທ້າຍສະໄໝ ຂອງສະພາແຫ່ງຊາດ ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ;

ປະຕິບັດຕາມມະຕິຂອງຄະນະປະຈໍາສະພາແຫ່ງຊາດ ສະບັບ ເລກທີ 57/ຄປຈ, ລົງວັນທີ 07 ຕຸລາ 2020 ວ່າດ້ວຍການດໍາເນີນກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII.

ບັນດາກໍາມາທິການ, ຄະນະເລຂາທິການສະພາແຫ່ງຊາດ ແລະກົງຈັກທີ່ຄະນະປະຈໍາສະພາແຫ່ງຊາດ ສ້າງຕັ້ງ ໄດ້ປະສານສົມທົບກັບລັດຖະບານ, ກະຊວງ, ອົງການ, ສູນກາງແນວລາວສ້າງຊາດ ແລະອົງການຈັດຕັ້ງມະຫາຊົນຂັ້ນສູນກາງ ໃນການກະກຽມເນື້ອໃນຂອງແຕ່ລະພາກສ່ວນທີ່ຈະນໍາສະເໜີຕໍ່ກອງປະຊຸມໃນຄັ້ງນີ້, ມາເຖິງປັດຈຸບັນນີ້ເຫັນວ່າຄົບຖ້ວນ ແລະສອດຄ່ອງກັບລະບຽບການ.

ຂ້າພະເຈົ້າ ຕາງໜ້າຄະນະປະຈຳສະພາແຫ່ງຊາດ, ຄະນະເລຂາທິການສະພາແຫ່ງຊາດ ມີຄວາມຍິນດີແລະຖື ເປັນກຽດແຈ້ງມາຍັງບັນດາທ່ານ ພະນັກງານ-ລັດຖະກອນ, ທະຫານ, ຕຳຫຼວດ ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວ ບັນດາເຜົ່າໃນທົ່ວປະເທດ ແລະພີ່ນ້ອງຊາວລາວທີ່ອາໄສຢູ່ຕ່າງປະເທດຮັບຊາບ ກ່ຽວກັບການດຳ ເນີນກອງປະຊຸມສະ  ໄໝສາມັນ ເທື່ອທີ 10 ຂອງສະພາແຫ່ງຊາດຊຸດທີ VIII ດັ່ງນີ້:

– ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ຈະໄດ້ໄຂຂຶ້ນ ໃນຕອນເຊົ້າຂອງວັນອັງຄານ, ວັນທີ 27 ຕຸລາ ແລະ ຈະດໍາເນີນໄປເຖິງວັນອັງຄານ, ວັນທີ 17 ພະຈິກ 2020 ທີ່ຫ້ອງປະຊຸມສະພາແຫ່ງຊາດ (ຫລັກ 6), ນະຄອນຫລວງວຽງຈັນ ຊຶ່ງຈະໃຊ້ເວລາ ດໍາເນີນ ກອງປະຊຸມທັງໝົດ 16 ວັນ (ບໍ່ລວມວັນພັກລັດຖະການ). 

– ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ຈະໄດ້ຮັບຟັງ ການລາຍງານ, ພິຈາລະນາ ແລະຕົກລົງບັນຫາສຳຄັນຕ່າງໆ ດັ່ງນີ້:

1. ພາກລາຍງານຂອງລັດຖະບານ:

1.1.  ພິຈາລະນາ, ຮັບຮອງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ປະຈໍາປີ 2020 ແລະແຜນການ ປະຈໍາປີ 2021;

1.2. ພິຈາລະນາ, ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດ ປະຈໍາປີ 2020 ແລະແຜນການປະຈຳປີ 2021;

1.3. ທາບທາມຮ່າງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII, ແຜນງົບປະມານແຫ່ງລັດ 5 ປີ (2016-2020); ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ແລະແຜນງົບປະ ມານແຫ່ງລັດ 5 ປີ (2021-2025);

1.4. ພິຈາລະນາ, ຮັບຮອງບົດລາຍງານຂອງລັດຖະບານ ກ່ຽວກັບແຜນຜັງລວມຕົວເມືອງນະ ຄອນຫຼວງວຽງຈັນ.
   

2. ພາກລາຍງານຂອງອົງການກວດສອບແຫ່ງລັດ:

2.1. ພິຈາລະນາ, ຮັບຮອງບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງ ປະຕິບັດແຜນການເຄື່ອນໄຫວວຽກງານ 5 ປີ (2016-2020), ການຈັດຕັ້ງປະຕິບັດແຜນການ ປະຈໍາປີ 2020 ແລະທິດທາງແຜນການເຄື່ອນໄຫວວຽກງານ 5 ປີ (2021-2025), ແຜນການປະ ຈໍາປີ 2021;

2.2. ພິຈາລະນາ, ຮັບຮອງບົດລາຍງານຜົນການກວດສອບບົດສະຫຼຸບຂາດຕົວ ການຈັດຕັ້ງປະ ຕິບັດແຜນງົບປະມານແຫ່ງລັດ ປະຈໍາປີ 2019.

3. ພາກລາຍງານຂອງອົງການກວດກາລັດຖະບານ:
ພິຈາລະນາ, ຮັບຮອງບົດລາຍງານການກວດກາຕາມຜົນການກວດສອບ ບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ຂອງອົງການກວດກາລັດຖະບານ.

4. ພາກລາຍງານຂອງອົງການໄອຍະການປະຊາຊົນສູງສຸດ ແລະສານປະຊາຊົນສູງສຸດ:

4.1. ພິຈາລະນາ, ຮັບຮອງບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ໄລຍະ 5 ປີ (2016-2020), ການຈັດຕັ້ງປະຕິບັດ ແຜນການ ປະຈໍາປີ 2020 ແລະທິດທາງແຜນການເຄືີ່ອນໄຫວວຽກງານ 5 ປີ (2021-2025), ແຜນການ ປະຈໍາປີ 2021;

4.2. ພິຈາລະນາ, ຮັບຮອງບົດລາຍງານຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິ ບັດແຜນການເຄື່ອນໄຫວວຽກງານ ໄລຍະ 5 ປີ (2016-2020), ການຈັດຕັ້ງປະຕິບັດແຜນການ ປະຈໍາປີ 2020 ແລະທິດທາງແຜນການເຄືີ່ອນໄຫວວຽກງານ 5 ປີ (2021-2025), ແຜນການ ປະຈໍາປີ 2021.

5. ພາກລາຍງານຂອງສະພາແຫ່ງຊາດ:

5.1. ພິຈາລະນາ, ຮັບຮອງບົດລາຍງານຂອງສະພາແຫ່ງຊາດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກງານ ໄລຍະ 5 ປີ (2016-2020), ການຈັດຕັ້ງປະຕິບັດແຜນການ ປະຈໍາປີ 2020 ແລະແຜນການ ປະຈໍາປີ 2021; 

5.2. ທາບທາມຮ່າງທິດທາງແຜນການເຄື່ອນໄຫວວຽກງານ 5 ປີ (2021-2025) ຂອງສະພາ ແຫ່ງຊາດ ຊຸດທີ IX;

6. ພາກລາຍງານການຕິດຕາມກວດກາຂອງຄະນະປະຈໍາສະພາແຫ່ງຊາດ:

6.1. ພິຈາລະນາ, ຮັບຮອງບົດລາຍງານຜົນການຕິດຕາມກວດກາຂອງຄະນະປະຈໍາສະພາ ແຫ່ງຊາດ ກ່ຽວກັບການຈັດຕັ້ງປະຕິບັດກົດໝາຍ ທີ່ຕິດພັນກັບການແກ້ໄຂຜົນການກວດສອບ ແລະ ຜົນການກວດກາ ໃນຂົງເຂດການກໍ່ສ້າງພື້ນຖານໂຄງລ່າງ ແລະການຈັດເກັບລາຍຮັບ;

6.2. ພິຈາລະນາ, ຮັບຮອງບົດລາຍງານຜົນການຕິດຕາມກວດກາ ຂອງຄະນະປະຈໍາສະພາ ແຫ່ງຊາດ  ກ່ຽວກັບການຈັດຕັ້ງປະຕິບັດກົດໝາຍທີ່ຕິດພັນກັບການຄຸ້ມຄອງ, ການບໍລິການໃນຮ້ານ ບັນເທິງ ແລະ ຮ້ານກິນດື່ມ.

7. ພິຈາລະນາ, ຮັບຮອງເອົາການສ້າງ ແລະປັບປຸງກົດໝາຍ ຈໍານວນ 5 ສະບັບ ໃນນີ້ມີ
ກົດໝາຍສ້າງໃໝ່ 4 ສະບັບ ຄື:

7.1. ຮ່າງກົດໝາຍວ່າດ້ວຍຊັ້ນນັກການທູດ;

7.2. ຮ່າງກົດໝາຍວ່າດ້ວຍຊາວໜຸ່ມລາວ;

7.3. ຮ່າງກົດໝາຍວ່າດ້ວຍການຮ່ວມມືລະຫວ່າງປະເທດທາງອາຍາ;

7.4. ຮ່າງກົດໝາຍວ່າດ້ວຍການສຶກສາຊັ້ນສູງ;
  ກົດໝາຍປັບປຸງ 1 ສະບັບ ຄື: ຮ່າງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍການກວດສອບແຫ່ງລັດ.

ອີກເທື່ອໜຶ່ງ, ໃນນາມຄະນະປະຈຳສະພາແຫ່ງຊາດ, ຄະນະເລຂາທິການສະພາແຫ່ງຊາດ ຂ້າພະເຈົ້າຂໍເຊີນບັນດາທ່ານ ພະນັກງານ, ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນ ທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ຈົ່ງຕິດຕາມການດຳເນີນກອງປະຊຸມສະ ໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ຄັ້ງນີ້.

ໃນໄລຍະດຳເນີນກອງປະຊຸມສະ ພາແຫ່ງຊາດ ຄະນະເລຂາທິການສະພາແຫ່ງຊາດ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ; ບັນດາທ່ານສາມາດສົ່ງຄຳຄິດຄຳເຫັນ ແລະຄຳສະເໜີໄປຍັງກອງປະຊຸມໄດ້ຕາມວິທີລຸ່ມນີ້:

• ໂທລະສັບບໍ່ເສຍຄ່າ ໝາຍເລກ: 156
• ໂທລະສານ       ໝາຍເລກ: 021 413528
• ສົ່ງເປັນຈົດໝາຍທາງໄປສະນີ ຕູ້ ປນ. 662
• ສົ່ງອີເມວ: [email protected]

ອັດຕະປື: ໃນວັນທີ 18 ຕຸລາ 2020 ນີ້ເມືອງຊານໄຊ ແຂວງອັດຕະປື ໄດ້ຈັດພິທີຈູດທຳລາຍອາວຸດລ່າເນື້ອທີ່ຜິດກົດໝາຍ ປະເພດປືນແກັບຈຳນວນ 42 ກະບອກ ທີ່ທ້ອນໂຮມໄດ້ຈາກປະຊາຊົນ 6 ບ້ານທີ່ຂື້ນກັບກຸ່ມບ້ານວັງຕັດ.ພິທີໄດ້ຈັດຂື້ນທີ່ສະໂມສອນຫ້ອງການກຸ່ມບ້ານວັງຕັດ,ໂດຍໃຫ້ກຽດເຂົ້າຮ່ວມຂອງທ່ານ ສຸວັນສີ ແກ້ວວີເສີດ ເຈົ້າເມືອງ ເມືອງຊານໄຊ,ມີທ່ານ ພັອ ສີເວີນ ແກ້ວສີວົງສາ ຫົວໜ້າກອງບັນຊາການ ປກສ ແຂວງອັດຕະປື,ມີ ປກສ ກຸ່ມບ້ານ,ປກສບ້ານ,ມີອຳນາດການປົກຄອງບ້ານ 6 ບ້ານ ທີ່ຂື້ນກັບກຸ່ມບ້ານວັງຕັດເຂົ້າຮ່ວມ.

ທ່ານ ຮອ ຄຳພີນ ໄຊຍະພຽນ ຫົວໜ້າ ປກສ ກຸ່ມບ້ານວັງຕັດ ໄດ້ກ່າວວ່າ: ອາວຸດລ່າເນື້ອປະເພດປືນແກັບ ທີ່ນຳມາທຳລາຍໃນຄັ້ງນີ້ ມີທັງໝົດ 42 ກະບອກ, ໃນນັ້ນ ໄດ້ທ້ອນໂຮມມາຈາກບ້ານດາກບ໊ອກ 26 ກະບອກ ແລະ ບ້ານໜອງທົ່ງໄກ່ໂອກ 16 ກະບອກ.ສ່ວນອີກ 4 ບ້ານທີ່ຍັງເຫຼືອ ແມ່ນຈະໄດ້ສືບຕໍ່ທ້ອນໂຮມ ແລະ ນຳມາທຳລາຍໃນຄັ້ງຕໍ່ໄປ.

ໃນພິທີຄະນະປະທານກໍໄດ້ຜັດປ່ຽນກັນມີຄໍາເຫັນໂອ້ລົມ ໂດຍໄດ້ເນັ້ນໜັກໃຫ້ອຳນາດການປົກຄອງບ້ານ,ກຳລັງ ປກສ ກຸ່ມບ້ານ,ປກສ ບ້ານ ພ້ອມກັນສືບຕໍ່ຈັດຕັ້ງປະຕິບັດ ວຽກງານທ້ອນໂຮມອາວຸດລ່າເນື້ອ,ອາວຸດເສິກ,ທາດແຕກ,ທາດລະເບີດ ແລະ ອຸປະກອນອື່ນໆທີ່ບໍ່ຖືກຕ້ອງຕາມລະບຽບກົດ ໝາຍ ແນໃສ່ເຮັດໃຫ້ ແຂວງອັດຕະປື ເວົ້າລວມ,ເວົ້າສະເພາະ ແມ່ນເມືອງຊານໄຊ ມີສະຖຽນລະພາບທາງດ້ານການເມືອງ,ມີຄວາມສະຫງົບ ແລະ ເປັນລະບຽບຮຽບຮ້ອຍ ກ້າວໄປເຖິງເຮັດໃຫ້ຄວາມອຸດົມສົມບູນຂອງສັດປ່າ ກັບຄືນມາສູ້ທໍາມະຊາດ ເທື່ອລະກ້າວ.

ໂອກາດດັ່ງກ່າວໃນພິທີ ບັນດາຜູ້ເຂົ້າຮ່ວມທັງໝົດ ກໍໄດ້ພ້ອມກັນຈູດທຳລາຍອາວຸດລ່າເນື້ອປະເພດປືນແກັບຈຳນວນດັ່ງກ່າວຖີ້ມຢ່າງເປັນທາງການ.

ປກສ ແຂວງອັດຕະປື
ຂ່າວ:ເສົາດາລົງ ເພັດສົງຄາມ

ສະຫວັນນະເຂດ: ເມືອງນອງແມ່ນໜຶ່ງໃນ 8 ເມືອງຂອງແຂວງສະຫວັນນະເຂດ ທີ່ໄດ້ຮັບຜົນກະທົບຈາກໄພນ້ຳຖ້ວມ ແລະ ຄັ້ງນີ້ເຫັນວ່າໄດ້ຮັບຜົນກະທົບຢ່າງໜັກໜ່ວງກວ່າຄັ້ງທີ່ຜ່ານມາ ເຊິ່ງມັນໄດ້ສ້າງຄວາມເສຍຫາຍຕໍ່ຊັບສິນຂອງລັດ ແລະ ຂອງປະຊາຊົນເປັນຈຳນວນບໍ່ໜ້ອຍ ເປັນຕົ້ນແມ່ນທາງດ້ານພື້ນຖານໂຄງລ່າງ,ຜົນຜະລິດ ແລະ ອື່ນໆ ທີ່ຍັງບໍ່ສາມາດປະເມີນຄວາມເສຍຫາຍໄດ້ໃນປັດຈຸບັນ.

ຕໍ່ສະພາບການດັ່ງກ່າວນີ້ ທາງການນຳເມືອງນອງພ້ອມດ້ວຍຄະນະ ກໍ່ໄດ້ລົງຕິດຕາມສະພາບຜົນກະທົບຈາກໄພນ້ຳຖ້ວມ ເຊິ່ງນຳພາໂດຍ ທ່ານ ລຳແກ້ວ ແສງໜູທອງ ເຈົ້າເມືອງໆນອງ ໃນການລົງຕິດຕາມຄັ້ງນີ້ແມ່ນໄດ້ໃຊ້ເຮືອຂີ່ເລາະເບິ່ງຜົນເສຍຫາຍລຽບຕາມແຄມເຊລະນອງ ແລະເຊລູເຂດປູນຍາງ ເພາະທຸກເຂດຂອງເມືອງນອງແມ່ນບໍ່ສາມາດໄປທາງລົດໄດ້.

ນາປີຂອງປະຊາຊົນທີ່ສຸກ ແລະພວມຈະເກັບກ່ຽວດ້ວຍກະແສນ້ຳທີ່ໄຫຼແຮງໄດ້ພັດເອົາກໍເຂົ້າລົ້ມເປັນຮາບພຽງ,ສວນກ້ວຍ,ສວຍຫວາຍ,ມັນຕົ້ນຖືກນ້ຳຖ້ວມຂັງ ຈົມຢູ່ພື້ນນ້ຳ,ຂົວເຊລູທາງໄປຈຸດສຸມຕັງອາໄລ ບໍລິເວນຫົວຂົວຖືກນ້ຳກັດເຊາະ ແລະຍຸບຕົວລົງເລິກ ແລະເປັນວົງກວ້າງ ,ເລິກ 3ແມັດ,ຍາວ 25ແມັດ,ກວ້າງ 15ແມັດດ້ວຍຄວາມແຮງຂອງນ້ຳໄຫລຜ່ານເສັ້ນທາງເຮັດໃຫພື້ນໜ້າ້ທາງລອກອອກ,ຂົວຫ້ວຍລະຜຽກແຕ່ເທດສະບານເມືອງໄປຫາ ບ້ານ ອາລັອງຖືກຕັດຂາດເປ້ເພ ຍາວ 15ແມັດ,ກວ້າງ3ແມັດປະຈຸບັນທາງຫ້ອງການ ຍທຂ ພ້ອມປະຊາຊົນກຳລັງສ້ອມແປງເພື່ອນຳໃຊ້ໄດ້ໃນເບື້ອງຕົ້ນ ແລະລົດຈັກສາມາດທຽວໄດ້,ເສົາໄຟຢູເຂດບ້ານາລົງເກົ່າຖືກນ້ຳເໍຊາະເຮັດໃຫ້ເສົາໄຟກົ່ນ ໄຟດັບແຕ່ວັນທີ 17-19 ແລະກຳລັງໄດ້ຮັບການສ້ອມແປງຢູ່ໃນປະຈຸບັນ.

ເມືອງຈໍາພອນ: ລາຍງານຈາກປະຊາຊົນໃຫ້ຮູ້ເວລາ 7:00 ວັນທີ່ 20 ຕຸລາ 2020 ນີ້ວ່າ ເຂດບ້ານແກ້ງກອກ ເມືອງຈໍາພອນ ແຂວງສະຫວັນນະເຂດ ແມ່ນພວມລະວັງ ນໍ້າຖ້ວມ.

ປະຈຸບັນນໍ້າໄດ້ຍຶ່ງສູງຂຶ້ນຢ່າງໄວ ຖ້ວມຫຼາຍຈຸດ, ຂົວເຊຈໍາພອນກໍ່ຖ້ວມຮອດໜ້າຂົວແລ້ວ.

ຂໍໃຫ້ທຸກຄົນລະມັດລະວັງ.

ລາຍງານໂດຍ: Jom Sontisurn

.

.

.

.

.

ລາຍງານຈາກ ຊ່ອງຂ່າວເມືອງສອງຄອນ ແຂວງສະຫວັນນະເຂດ ລາຍງານວ່າ, ສະຖານະການລ່າສຸດ ສະພາບນ້ຳຖ້ວມຢູ່ເມືອງສອງຄອນ ໃນຕອນເຊົ້າວັນທີ 20 ຕຸລາ 2020 ເວລາ 5:30 ໂມງ, ລະດັບເຊບັງຫຽງ ສູງເຖິງ 17,80 ແມັດ ແລະຍັງຄົງຈະເພີ່ມຢ່າງຕ່ໍເນື່ອງ, ເພາະມວນນ້ຳທາງຕອນເໜືອ ຍັງໄຫລລົງສົມທົບກັບມວນນ້ຳເຊບັງຫຽງ.

ໃນຂະນະນີ້ ຫລາຍພື້ນທີ່ຂອງເມືອງສອງຄອນ ລຽບເຊບັງຫຽງ ພວມໄດ້ຮັບຜົນກະທົບໜັກຂຶ້ນຕ່ໍເນື່ອງ ເຮືອນຊານຂອງປະຊາຊົນ ຫລາຍບ້ານ ຖືກນ້ຳຖ້ວມຂັງ.

ບ້ານທີ່ຖືກຕັດກະແສໄຟຟ້າມີ ບ້ານລະຫານ້ຳ, ທ່າຂາມລຽນ, ຫົວຫາດ, ແກ້ງໂດນ, ສີງທ່າ, ຫ້ວຍຄໍ້, ດອນຂຽວ, ນາກະຫລຶງ, ນາສະໂນ, ຫ້ວຍໄຂ່ ແລະ ບ້ານນາທັງ.

ພາບນ້ຳຖ້ວມເຮືອນຊານຂອງປະຊາຊົນ ເຂດບ້ານເເກ້ງໂດນ ເມືອງສອງຄອນ ແຂວງສະຫວັນນະເຂດ.