ສາລະວັນ: ຕອນເຊົ້າວັນທີ 24 ຕຸລາ 2020 ທ່ານ ທອງລຸນ ສີສຸລິດ, ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ແຂວງສາລະວັນ, ໂດຍມີທ່ານ ໂພໄຊ ໄຊຍະສອນ, ເຈົ້າແຂວງສາລະວັນ ພ້ອມດ້ວຍຄະນະນຳ ແລະ ພະນັກງານຫລັກແຫລ່ງຂອງແຂວງ ໃຫ້ການຕ້ອນຮັບ ແລະ ເຂົ້າຮ່ວມຮັບຟັງການໂອ້ລົມ.

ໃນໂອກາດດັ່ງກ່າວ, ທ່ານ ເຈົ້າແຂວງສາລະວັນ ໄດ້ການລາຍງານຫຍໍ້ ກ່ຽວກັບ ສະພາບການພັດທະນາເສດຖະກິດ-ສັງຄົມ, ແຜນງົບປະມານ-ເງິນຕາ ໄລຍະ 9 ເດືອນ ປີ 2020 ແລະ ຄວາມຄືບໜ້າການກະກຽມດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ ໃຫ້ຊາບວ່າ: ທົ່ວແຂວງ ສືບຕໍ່ມີຄວາມສະຫງົບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍ ໂດຍພື້ນຖານ, ເສດຖະກິດ ຂະຫຍາຍຕົວ 4,3%, ການເກັບລາຍຮັບເຂົ້າງົບປະມານຂອງລັດ ປະຕິບັດໄດ້ 94,24 ຕື້ກີບ ເທົ່າກັບ 65,28% ຂອງແຜນດັດແກ້, ການປະຕິບັດແຜນລາຍຈ່າຍ ໄດ້ 306,38 ຕື້ກີບ ເທົ່າກັບ 63,75% ຂອງແຜນດັດແກ້; ການແກ້ໄຂຄວາມທຸກຍາກ ໃນປີ 2020 ໄດ້ຈຳນວນ 7 ບ້ານ, 535 ຄອບຄົວ ເຮັດໃຫ້ທົ່ວແຂວງ ຍັງເຫຼືອບ້ານທຸກຍາກ 52 ບ້ານ ກວມ 8,98%, ຄອບຄົວທຸກຍາກ 3.604 ຄອບຄົວ ກວມ 4,99% ແລະ ອື່ນໆ.

ສຳລັບການກະກຽມດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ, ມາຮອດປັດຈຸບັນ ໜ່ວຍພັກຮາກຖານ ແລະ ໜ່ວຍພັກຂຶ້ນກັບຄະນະພັກຮາກຖານ ຈຳນວນ 970 ໜ່ວຍ, ຄະນະຮາກຖານ ຈຳນວນ 36 ຮາກຖານ, 2 ອົງຄະນະພັກກຳລັງປະກອບອາວຸດ ແລະ 8 ອົງຄະນະພັກເມືອງ ແມ່ນໄດ້ສຳເລັດການດຳເນີນກອງປະຊຸມໃຫຍ່ຂັ້ນຂອງຕົນແລ້ວ 100%; ການກະກຽມຮ່າງລາຍງານການເມືອງ, ຮ່າງບົດສຳຫຼວດການນຳພາລວມ ແລະ ແຜນພັດທະນາເສດຖະກິດ-ສັງຄົມ 5 ປີຕໍ່ໜ້າ ແມ່ນໄດ້ທາບທາມ ແລະ ປະກອບຄຳຄິດຄຳເຫັນ ຈາກຫຼາຍພາກສ່ວນ 2 ຮອບແລ້ວ; ສ່ວນດ້ານອື່ນໆ ກໍ່ມີຄວາມພ້ອມແລ້ວ ປະມານ 90%.

ໃນໂອກາດສຳຄັນນີ້, ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ຊີ້ນໍາ ຕໍ່ການນໍາ ແລະ ພະນັກງານຫຼັກແຫຼ່ງຂອງແຂວງ, ກ່ອນອື່ນ ທ່ານໄດ້ກ່າວຍ້ອງຍໍຊົມເຊີຍ ຕໍ່ຜົນສຳເລັດ ທີ່ການນຳ ພັກ-ລັດ, ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ແຂວງສາລະວັນ ສາມາດປະຕິບັດໄດ້ ໃນໄລຍະທີ່ຜ່ານມາ, ພ້ອມທັງ ຍົກໃຫ້ເຫັນຜົນງານອັນພົ້ນເດັ່ນ ແລະ ມູນເຊື້ອອັນດີງາມ ຂອງແຂວງສາລະວັນ ໃນອາດີດ ກໍ່ຄືປະຈຸບັນ, ລວມທັງ ໄດ້ແຈ້ງໃຫ້ຊາບ ກ່ຽວກັບສະພາບການພົ້ນເດັ່ນ ທີ່ເກີດຂຶ້ນຢູ່ພາກພື້ນ, ສາກົນ ແລະ ພາຍໃນປະເທດ, ສະພາບການແຜ່ລະບາດ ຂອງພະຍາດໂຄວິດ-19 ຢູ່ບັນດາປະເທດ ແລະ ອື່ນໆ.

ອັນສຳຄັນ, ທ່ານນາຍົກລັດຖະມົນຕີ ໄດ້ສະເໜີ ແລະ ເນັ້ນໜັກ ໃຫ້ອົງການປົກຄອງແຂວງສາລະວັນທຸກຂັ້ນ ເອົາໃຈໃສ່ບາງບັນຫາຕື່ມ ເປັນຕົ້ນ ເອົາໃຈໃສ່ປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ຕາມຄະນະສະເພາະກິດວາງອອກ ແຕ່ລະໄລຍະ ຢ່າງເຂັ້ມງວດ, ພ້ອມທັງ ປັບປຸງແບບແຜນດຳລົງຊີວິດ ແລະ ວິທີຄິດ ໃຫ້ມີການຫັນປ່ຽນດີຂຶ້ນກວ່າເກົ່າ, ປອດໄພກວ່າເກົ່າ ແລະ ເກີດປະໂຫຍດຫລາຍກວ່າເກົ່າ ໃຫ້ແກ່ຕົນເອງ, ການຈັດຕັ້ງ ແລະ ປະເທດຊາດ ໂດຍສະເພາະ ການເຮັດວຽກຢ່າງມີແຜນການ, ການປະຢັດມັດທະຍັດ, ການຈັດງານຕ່າງໆ ໃຫ້ມີຄວາມເໝາະສົມກັບເງື່ອນໄຂ ແລະ ສະພາບການ; ຊຸກຍູ້ສົ່ງເສີມການຜະລິດຂອງປະຊາຊົນ ແລະ ພາກສ່ວນຕ່າງໆ ໃຫ້ຫລາຍຂຶ້ນ ເພື່ອຮັບປະກັນທາງດ້ານສະບຽງອາຫານ ໃຫ້ພຽງພໍກັບຄວາມຕ້ອງການພາຍໃນ ແລະ ຫລຸດຜ່ອນການນຳເຂົ້າຈາກຕ່າງປະເທດ ເປັນກ້າວໆ ໂດຍສຸມໃສ່ຜະລິດກະສິກຳສະອາດ, ປອດສານພິດ ແລະ ຕາມທ່າແຮງ ທີ່ປະຊາຊົນ ແຕ່ລະທ້ອງຖິ່ນ ມີມູນເຊື້ອ; ສົ່ງເສີມ ແລະ ອຳນວຍຄວາມສະດວກ ໃຫ້ແກ່ວຽກງານການລົງທຶນ ແລະ ການດຳເນີນທຸລະກິດ ເພື່ອຍາດແຍ່ງເອົາການລົງທຶນໃຫ້ຫລາຍ; ການພັດທະນາ ແລະ ກໍ່ສ້າງພື້ນຖານໂຄງລ່າງຈຳນວນໜຶ່ງ ກໍ່ສາມາດຫັນເປັນການລົງທຶນ ໃນຮູບແບບ BOT ຄົ້ນຄວ້າສ້າງທ່າບົກ (Dry Port) ເພື່ອເປັນຈຸດສູນລວມໃນການບໍລິການຂົນສົ່ງສິນຄ້າ; ໃຫ້ນຳເອົາຄຳສະເໜີຂອງປະຊາຊົນສົ່ງຂ່າວ ໄປຄົ້ນຄວ້າ ປຶກສາຫາລືເພື່ອພ້ອມກັນແກ້ໄຂ ຢ່າງມີຄວາມຮັບຜິດຊອບ, ປັບປຸງການບໍລິຫານລັດ ຕາມທິດຫັນສູ່ຄຸນນະພາບ ແນໃສ່ເຮັດໃຫ້ການຈັດຕັ້ງ ມີຄວາມເຂັ້ມແຂງ, ການປະຕິບັດໜ້າທີ່ຂອງພະນັກງານ ມີຄວາມໂປ່ງໃສ ແລະ ຈິງໃຈບໍລິການຮັບໃຊ້ປະຊາຊົນ ຢ່າງແທ້ຈິງ; ສືບຕໍ່ປັບປຸງການຈັດຕັ້ງ ຂອງບາງຂະແໜງການຂັ້ນເມືອງ ໃຫ້ກະທັດຮັດ, ມີຄວາມເຂັ້ມແຂງ, ສອດຄ່ອງກັບສະພາບຄວາມຮຽກຮ້ອງຕ້ອງການ ຂອງວຽກງານຕົວຈິງ. ນອກຈາກນັ້ນ ກໍ່ຍັງໄດ້ເນັ້ນໜັກໃຫ້ສືບຕໍ່ຮັກສາມູນເຊື້ອ ໝາກຜົນຂອງການປະຕິວັດຂອງແຂວງ, ພັດທະນາເສດຖະກິດ ໃຫ້ມີການຂະຫຍາຍຕົວ, ຄຸ້ມຄອງສັງຄົມ ໃຫ້ມີຄວາມເປັນລະບຽບຮຽບຮ້ອຍ, ພັດທະນາ ແລະ ປັບປຸງການສຶກສາ ແລະ ສາທາລະນະສຸກ ໃຫ້ມີຄຸນນະພາບ, ສ້າງພະນັກງານ ໃຫ້ມີຄວາມເປັນແບບຢ່າງ ແກ່ປະຊາຊົນ, ເອົາໃຈໃສ່ ແລະ ມີສະຕິລະວັງຕົວ ໃນການຕ້ານ ແລະ ສະກັດກັ້ນບັນດາປະກົດການຫຍໍ້ທໍ້, ລວມທັງ ກົນອຸບາຍຕ່າງໆ ຂອງກຸ່ມຄົນທີ່ບໍ່ຫວັງດີ.

ສຳລັບການກະກຽມດຳເນີນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງສາລະວັນ, ສຳຄັນ ແມ່ນບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ຂອງແຂວງ 5 ປີ ຕໍ່ໜ້າ ແມ່ນຕ້ອງກົມກຽວ ໄປລວງດຽວກັນ, ເຊິ່ງການກຳນົດ ແຜນ ຕ້ອງໃຫ້ແທດເໝາະກັບທ່າແຮງບົ່ມຊ້ອນຕົວຈິງ, ມີຄວາມອາດສາມາດໃນການຈັດຕັ້ງປະຕິບັດ ແລະ ມີການຈັດລຽງບຸລິມະສິດ ບັນດາວຽກຈຸດສຸມ ແລະ ໂຄງການ ຢ່າງລະອຽດຈະແຈ້ງ, ການກຳນົດໂຄງການ ຕ້ອງຄຳນຶງໃຫ້ທົ່ວສັງຄົມ ໄດ້ມີສ່ວນຮ່ວມ ໃນການຮັບຜົນປະໂຫຍດ. ພ້ອມນີ້, ຮ່າງບົດສຳຫລວດ ຕີລາຄາ ການນຳພາລວມ ຂອງຄະນະບໍລິຫານງານພັກ ແຂວງ ຕ້ອງຊອກໃຫ້ເຫັນ ຜົນງານ-ຈຸດດີ, ທ່າແຮງ, ຈຸດອ່ອນ-ຂໍ້ຄົງຄ້າງ-ຂໍ້ບົກພ່ອງ, ສາຍເຫດ, ບົດຮຽນທີ່ຖອດຖອນໄດ້, ທິດທາງແຜນການພັດທະນາ ແລະ ວິທີປັບປຸງແກ້ໄຂໃນຕໍ່ໜ້າ ຢ່າງຈະແຈ້ງ, ຊັດເຈນ ແລະ ສອດຄ່ອງກັບຕົວຈິງ ໂດຍມີປຶກສາຫາລືກັນ, ຈິງໃຈ ກ້າເວົ້າຄວາມຈິງ, ເຊິ່ງບັນຫາຄົງຄ້າງໃດ ສາມາດແກ້ໄດ້ ກໍ່ໃຫ້ແກ້ໄຂໄວ, ອັນໃດບໍ່ທັນສາມາດແກ້ໄຂໄດ້ ກໍ່ໃຫ້ມີການວາງແຜນແກ້ໄຂ ໃນເວລາທີ່ສົມເຫດສົມຜົນ.

ພາບ-ຂ່າວ: ກົມປະຊາສຳພັນ ຫສນຍ

ທ່ານນາຍົກລັດຖະມົນຕີ ເດີນທາງຢ້ຽມຢາມຜູ້ປະສົບໄພນ້ຳຖ້ວມຢູ່ເຊໂປນ ພ້ອມມອບເງິນສົດ 500,000,000 ກີບ ແລະ ເຄື່ອງບັນເທົາທຸກລວມມູນຄ່າກວ່າ 809,000,500 ກີບ.

ຕອນເຊົ້າວັນທີ່ 23 ຕຸລາ 2020 ຢູ່ເດີ່ນບໍລິສັດຊັນເປເປິໂຮນດິ່ງລາວຈຳກັດບັນດາການນຳຂັ້ນເມືອງເຊໂປນ,ປະທານບໍລິສັດຊັນເປເປິໂຮນດິ່ງລາວຈຳກັດພ້ອມດ້ວຍພະນັກງານພາຍໃນເມືອງ ແລະ ພະນັກງານພາຍໃນບໍລິສັດໄດ້ຕ້ອນຮັບຄະນະທ່ານນາຍົກລັດຖະມົນຕີແຫ່ງສາທາລະນະລັດ ປະຊາທິປະໄຕ ປະຊາຊົນລາວພ້ອມລັດຖະມົນຕີ, ຄະນະລັດຖະມົນຕີກະຊວງຕ່າງໆທີ່ໄດ້ເດີທາງມາຢ້ຽມຢາມເມືອງເຊໂປນ ແລະ ໄດ້ລົງພື້ນທີ່ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມເຊິ່ງທ່ານກໍ່ໄດ້ເດີນທາງໄປພົບປະຢ້ຽມຢາມພໍ່ແມ່ປະຊາຊົນບ້ານແກ້ງຫົວປາ ( ຄຸ້ມວັງຄົດ ) ເຊິ່ງທ່ານກໍ່ໄດ້ຖາມຂ່າວພໍ່ແມ່ປະຊາຊົນ ແລະ ລົງ ເບິ່ງພື້ນທີ່ເສຍຫາຍຂອງບ້ານດັ່ງກ່າວ,ຫຼັງຈາກນັ້ນຂະບວນກໍ່ໄດ້ເດີນທາງມາພົບປະໂອ້ລົມພະນັກງານ ແລະ ພໍ່ແມ່ປະຊາຊົນບ້ານເທດສະບານທີ່ໄດ້ຮັບຜົນກະທົບຈາກໄພນໍ້າຖ້ວມ,

ໃນນັ້ນທ່ານວົງສະຫວັນ ວຽງມະນີ ເຈົ້າເມືອງເຊໂປນກໍ່ໄດ້ ຂື້ນລາຍງານຜົນເສຍຫາຍ ແລະ ວາງທິດທາງໃນການແກ້ໄຂສະພາບຄວາມເປັນຢູ່ຂອງປະຊາຊົນຜູ້ທີ່ໄດ້ຮົນກະທົບຈາກໄພພິບັດໃນຄັ້ງນີ້, ພ້ອມສະເໜີຕໍ່ທີ່ປະຊຸມກ່ຽວກັບງົບປະມານໃນການບູລະນະພື້ນຖານໂຄງລ່າງທີ່ໄດ້ເປ້ເພເສຍຫາຍບໍ່ວ່າຈະເປັນ ເຮືອນທີ່ ເປ່ເພ, ເສັ້ນທາງຄົມມະນາຄົມ, ໄຟຟ້າ, ເຮື່ອທີ່ຈະຕ້ອງໃຊ້ໃນເວລາສຸກເສີນ ແລະ ອື່ນໆ

ຈາກນັ້ນທ່ານນາຍົກລັດທະມົນຕີກໍ່ໄດ້ໃຫ້ກຽດໂອ້ລົມໃນການເປັນຫວ່າງເປັນໄຍພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພພິບັດໃນຄັ້ງນີ້, ທ້າຍພິທີພະນະທ່ານທອງລຸນ ສີສຸລິດ ນາຍົກລັດຖະມົນຕີແຫ່ງ ສປປລາວ ພ້ອມດ້ວຍທ່ານວຽງ ທະວີສອນ ເທບພະຈັນ ກຳມະການປະຈຳພັກແຂວງສະຫວັນນະເຂດກໍ່ໄດ້ມອບເຄື່ອງຊ່ວຍເຫຼືອໃຫ້ 04 ຕົວເມືອງເຊິ່ງມີເມືອງເຊໂປນ, ເມືອງນອງ, ເມືອງວິລະບູລີ ແລະ ເມືອງພີນ ແລະ ເຄື່ອງທີ່ນຳມາມອບຈຳນວນເງິນສົດ 500,000,000 ກີບ, ເຂົ້າສານ 20 ໂຕນໄດ້ແບ່ງໃຫ້ເມືອງເຊໂປນ 18 ໂຕ້ນ, ເມືອງນອງ,ວິລະບູລີ ແລະ ເມືອງພີນເມືອງລະ 14 ໂຕ້ນ, ນໍ້າດື່ມຈໍານວນ 1,116 ແຟັກ ໄດ້ແບ່ງໃຫ້ເມືອງເຊໂປນ 336 ແຟັກ, ເມືອງນອງ, ວິລະບູລີ ແລະ ເມືອງພີນ ເມືອງລະ 250 ແຟັກ, ມີ່ສຳເລັດຮູບແກັດນ້ອຍ 27 ມັດ, ແບ່ງໃຫ້ເມືອງເຊໂປນ 09 ມັດ, ເມືອງນອງ, ວິລະບູລີ ແລະ ເມືອງພີນ ເມືອງລະ 06 ມັດ, ມີ່ສຳເລັດຮູບແກັດໃຫຍ່ 40 ມັດ ແບ່ງໃຫ້ 04 ຕົວເມືອງ, ເມືອງລະ 10 ມັດ, ປາກະປ໋ອງ (ແກັດໃຫຍ່) 20 ແກັດ ໃຫ້ 04 ຕົວເມືອງ, ເມືອງ ລະ 05 ແກັດ ແລະ ເຄື່ອງນຸ່ງຮົ່ມ 60 ແກັດ ແບ່ງໃຫ້ເມືອງເຊໂປນ 18 ແກັດ, ອີກ 03 ເມືອງແມ່ນເມືອງລະ 14 ແກັດ ລວມມູນຄ່າເຄື່ອງທີ່ນຳມາມອບແມ່ນ 809,005,000 ກີບ ( ແປດຮ້ອຍເກົ້າລ້ານ ຫ້າພັນກີບ ) ໂດຍເປັນກຽດມອບຂອງທ່ານທອງລຸນ ສີສຸລິດ ນາຍຍົກລັດຖະມົນຕີ ແຫ່ງ ສປປລາວ ຮັບໂດຍທ່ານວົງສະຫວັນ ວຽງມະນີ ເຈົ້າເມືອງເຊໂປນພ້ອມດ້ວຍການນຳຂອງ 04 ຕົວເມືອງຊ້ອງໜ້າບັນດາພະນັກງານພາພໍ່ແມ່ປະຊາຊົນເປັນສັກຂີພະຍານໃນການມອບເຄື່ອງໃນເທື່ອນີ້.

ພາບແລະຂ່າວຈາກ : ຫ້ອງການ ຖວທ ເມືອງເຊໂປນ

ໃນຕອນແລງຂອງວັນທີ 21 ຕຸລາ 2020, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີຕ່າງປະເທດ ແຫ່ງ ສປປ ລາວ, ໄດ້ນຳພາຄະນະເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາຊຽນ-ສະຫະປະຊາຊາດ (ສປຊ) ປະຈໍາປີ ແບບທາງໄກ (ASEAN-United Nations Ministerial Meeting) ພາຍໃຕ້ການເປັນປະທານຂອງ ທ່ານ ຟາມ ບິງ ມິງ, ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ແຫ່ງ ສສ. ຫວຽດນາມ ໃນນາມປະທານອາຊຽນ. ເຂົ້າຮ່ວມກອງປະຊຸມໃນຄັ້ງນີ້ ຍັງມີບັນດາລັດຖະມົນຕີຕ່າງປະເທດອາຊຽນ, ເລຂາທິການໃຫຍ່ ອົງການສະຫະປະຊາຊາດ, ປະທານກອງປະຊຸມສະມັດຊາໃຫຍ່ ສປຊ ຄັ້ງທີ 75, ເລຂາທິການໃຫຍ່ອາຊຽນ ແລະ ວິຊາການທີ່ກ່ຽວຂ້ອງຈໍານວນໜຶ່ງ.

ກອງປະຊຸມໄດ້ຕີລາຄາສູງ ຕໍ່ຜົນການຈັດຕັ້ງປະຕິບັດ ການຮ່ວມມື ອາຊຽນ-ສປຊ ໃນໄລຍະ 1 ປີ ຜ່ານມາ ໂດຍສະເພາະການຜັນຂະຫຍາຍ ແຜນປະຕິບັດງານການຮ່ວມມື ອາຊຽນ-ສປຊ ໄລຍະ 2016-2020, ເຊິ່ງກວມເອົາ 3 ເສົາຄໍ້າປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ) ແລະ ການຈັດຕັ້ງປະຕິບັດ ບັນດາແຜນງານ/ໂຄງການຮ່ວມມືພາຍໃຕ້ຂອບການເຊື່ອມສານວິໃສທັດປະຊາຄົມອາຊຽນຮອດປີ 2025 ແລະ ບັນດາເປົ້າໝາຍພັດທະນາແບບຍືນຍົງ ສປຊ ຮອດປີ 2030, ເຊິ່ງໄດ້ປະກອບສ່ວນເຂົ້າໃນການສ້າງສັນຕິພາບ, ຄວາມໝັ້ນຄົງ ແລະ ການຊ່ວຍເຫຼືອພັດທະນາຢູ່ພາກພື້ນ ກໍຄືໃນໂລກ.

ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດການຮ່ວມມື ອາຊຽນ-ສປຊ ໃນໄລຍະຕໍ່ໜ້າ, ກອງປະຊຸມ ໄດ້ຮັບຮອງເອົາ ແຜນປະຕິບັດງານການຮ່ວມມື ອາຊຽນ-ສປຊ ສະບັບໃໝ່ ໄລຍະປີ 2021-2025. ພິເສດ, ກອງປະຊຸມຍັງໄດ້ຢໍ້າຄືນເຖິງບົດບາດອັນສໍາຄັນ ຂອງ ສປຊ ໃນຖານະເປັນອົງການຈັດຕັ້ງຫຼາຍຝ່າຍເພື່ອສືບຕໍ່ຮັກສາ ແລະ ສົ່ງເສີມ ສັນຕິພາບ, ສະຖຽນລະພາບ ແລະ ຄວາມໝັ້ນຄົງ ຢູ່ພາກພື້ນ ແລະ ສາກົນ ຕາມກົດບັດ ສປຊ ທີ່ວາງໄວ້.

ສຳລັບທິດທາງໃນຕໍ່ໜ້າ, ທ່ານ ລັດຖະມົນຕີ ສະເຫຼີມໄຊ ກົມມະສິດ ໄດ້ສະເໜີຕໍ່ກອງປະຊຸມ ພິຈາລະນາ: 1. ສືບຕໍ່ຮ່ວມມືກັນໃນຂະແໜງສາທາລະນະສຸກ ໂດຍສະເພາະ ການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ລວມທັງ ການຮ່ວມມືກັນ ໃນການຄົ້ນຄວ້າ-ພັດທະນາ ແລະ ຜະລິດຢາປົວພະຍາດ ກໍ່ຄື ຢາວັກແຊັງຕ້ານໂຄວິດ-19 ແລະ ການຮັບປະກັນ ການເຂົ້າເຖິງ ແລະ ສາມາດຮັບຢາປົວພະຍາດ ແລະ ຢາວັກແຊັງ ໃນເວລາທີ່ມີຢາດັ່ງກ່າວແລ້ວ; 2. ຮັດແໜ້ນການຮ່ວມມື ລະຫວ່າງ ສະຖາບັນສັນຕິພາບ ແລະ ຄວາມປອງດອງອາຊຽນ (AIPR) ແລະ ສປຊ ໃນການສ້າງຂີດຄວາມສາມາດ ແລະ ພັດທະນາບຸກຄະລາກອນ ດ້ານການໄກ່ເກຍ, ການເຈລະຈາ ແລະ ການຮັດແໜ້ນບົດບາດຂອງແມ່ຍິງ ກໍຄືຊາວໜຸ່ມ; ແລະ 3. ການສືບຕໍ່ຈັດຕັ້ງປະຕິບັດບັນດາເປົ້າໝາຍການພັດທະນາແບບຍືນຍົງ ສປຊ ຮອດປີ 2030 ລວມທັງ ການປ້ອງກັນ, ຮັບມື ແລະ ແກ້ໄຂ ຜົນກະທົບຈາກໄພພິບັດທາງທໍາມະຊາດ, ການປ່ຽນແປງຂອງດິນຟ້າອາກາດ ແລະ ການພັດທະນາຕົວເມືອງອັດສະລິຍະ.

ພ້ອມນີ້, ກອງປະຊຸມ ຍັງໄດ້ແລກປ່ຽນຄໍາຄິດຄໍາເຫັນນໍາກັນຕໍ່ບາງບັນຫາເດັ່ນ ຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ ເປັນຕົ້ນ: ບັນຫາການແຜ່ລະບາດຂອງພະຍາດໂຄວິດ-19, ສັນຕິພາບ ແລະ ຄວາມໝັ້ນຄົງ ແລະ ອື່ນໆ. ທ້າຍສຸດ, ລັດຖະມົນຕີຕ່າງປະເທດອາຊຽນ ແລະ ສປຊ ຍັງໄດ້ປຶກສາຫາລື ກ່ຽວກັບ ການກະກຽມ ດ້ານເນື້ອໃນ ແລະ ພະລາທິການ ໃຫ້ແກ່ກອງປະຊຸມສຸດຍອດຜູ້ນໍາ ອາຊຽນ-ສປຊ ທີ່ຈະຈັດຂຶ້ນ ໃນກາງເດືອນ ພະຈິກ 2020 ນີ້.
———————————————–
ແຫລ່ງຂ່າວ: MOFA.gov.la

ສະຫວັນນະເຂດ: ດ້ວຍຄວາມເປັນຫວງເປັນໃຍຕໍ່ກັບຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມທີ່ຜ່ານມາ ທີ່ໄດ້ຮັບຄວາມເສຍຫາຍພໍສົມຄວນ ຕໍ່ຊັບສີນຂອງລັດ ແລະ ປະຊາຊົນ ເປັນຈໍານວນບໍ່ໜ້ອຍ ເປັນຕົ້ນແມ່ນທາງດ້ານ ພື້ນຖານໂຄງລ່າງ, ຜົນຜະລິດເຂົ້ານາປີ, ໜອງປາ ແລະ ຄາດວ່າລະດັບນ້ຳຈະເພີ່ມລະດັບຂື້ນເລື້ອຍໆ ຈຶ່ງຈຳເປັນຕ້ອງເກັບກ່ຽວເຂົ້ານາຢ່າງຮີບດ່ວນ.

ດັ່ງນັ້ນມາໃນວັນທີ 21 ຕຸລາ 2020 ຄະນະນໍາຂອງເມືອງ ກອງບັນຊາການທະຫານເມືອງ ແລະ ກອງບັນຊາການປກສ ເມືອງ ອຳນາດການປົກຄອງບ້ານ ແລະ ອາສາສະມັກນັກຮຽນ ມສ ດອນຂາວຈຳນວນໜື່ງ ພ້ອມພາກສ່ວນກ່ຽວຂ້ອງ ໄດ້ນຳກອ້ນກຳລັງລົງເກັບກ່ຽວເຂົ້ານາປີ ທີ່ຖືກນ້ຳຖ້ວມ ທີ່ກຳລັງຈົມລົງສູ້ພື້ນນ້ຳ ຊ່ວຍພໍ່ແມ່ປະຊົນ ໃນກຸ່ມບ້ານທ່າພີ່ ໂດຍສະເພາະແມ່ນບ້ານດອນຂາວ ເມືອງທ່າປາງທອງ ໄດ້ຮັບຜົນກະທົບ ຈາກອິດທິພົນພະຍຸລະດູຮ້ອນ

ພາຍໃຕ້ການນຳພາຂອງທ່ານ ຄຳປະສົງຂົງຄຳ ເລຂາພັກເມືອງ ເຈົ້າເມືອງທ່າປາງທອງ, ທ່ານ ວົງຄຳ ອິນທະບານ ກຳມະການປະຈຳພັກເມືອງ ຫົວໜ້າກອງບັນຊາການປກສ ເມືອງ, ທ່ານສົມຈິດ ແກ້ວຄູນເພັດ ກຳມະການປະຈຳພັກເມືອງ ຫົວໜ້າ ຄະນະຈັດຕັ້ງເມືອງເມືອງ ຜູ້ຊີ້ນຳກຸ່ມທ່າພີ່, ທ່ານ ໜູເພັດ ແສນດາວເມືອງ ກຳມະການພັກເມືອງ ຫົວໜ້າການເມືອງກອງບັນຊາການທະຫານເມືອງ, ທ່ານຫອນວິໄລ ຄູນລາດສະວັນນະວົງກຳມະການພັກເມືອງ ຫົວໜ້າຫ້ອງການອຸສາຫະກຳ ແລະ ການຄ້າເມືອງ ກຳມະການພັກເມືອງ ຫົວໜ້າຄະນະຊີ້ນຳກຸ່ມທ່າພີ ພ້ອມດ້ວຍຄກຳລັງ ປກຊ -ປກສ ເມືອງ , ກຳລັງປກຊ- ປກສ ບ້ານ, ເຂົ້າຮ່ວມທັງໝົດ 100 ກ່ວານາຍ.

ເຫຼືອຄອບຄົວທີ່ມີກໍາລັງແຮງງານໜ້ອຍ ແລະ ຈຳເປັນທີສຸດ ຍ້ອນລະດັບນ້ຳຂື້ນສູງ ຈິງສາມາດຊ່ວຍໄດ້ພຽນແຕ່ 5 ຄອບຄົວ 5 ທົງ ເທົ່າກັບ 2,8 ເຮັກຕາ ໃນໄລຍະ 7-13 ແລະ 17- 19 ຕຸລາ 2020 ໄດ້ເກີດຜົນຕົກນັກເນື້ອທີ່ການຜະລິດ ແລະ ບ້ານ ຂອງພໍ່ແມ່ນປະຊາຊົນ ໃນ 4 ກຸ່ມບ້ານ ມີ 12 ບ້ານ, 771 ຄອບຄົວ ມີພົນລະເມືອງໄດ້ຮັບພົນກະທົບທັງໝົ 4,0750 ຄົນ, ຍິງ 2,542 ຄົນ,

ເນື້ອທີຖຶກຖ້ວມ 767,69 ເຮັດຕາ ( ເສຍຫາຍ 549,75 ເຮັດຕາ ມູນຄ່າເສຍຫາຍ 4,123,125,00 ກີບ, ໜອງປາ 203 ໜອງ ມູນຄ່າເສຍຫານ 64,050,000 ກີບ, ສວນມັນ 34 ສວນ ມູນຄ່າ 28,5 ເຮັດຕາ ມູນຄ່າເສຍຫາຍ 157,500,000 ກີບ ) ລວມມູນຄ່າເສຍຫາຍທັງໝົດ 4,345,130,000 ກີບ, ຍົກຢ້າຍປະຊາຊົນອອກໄປຢູ່ທີ່ ປອດໄພ 4 ບ້ານ ມີຈຳນວນ 110 ຄອບຄົວ, ຈຳນວນພົນ 559 ຄົນ ,ຍິງ 297 ຄົນ, ໂຮງຮຽນ 1 ຫຼັງ, ເສົາໄຟຟ້າຫັກ 3 ຫຼັກ ແລະ ສາຍໄຟຟ້າຂ້າມເຊບັງຫຽງ 3 ສາຍ, ເຮັດໃຫ້ປະຊາຊົນບໍ່ສາມາດນຳໃຊ້ໄຟຟ້າໄດ້ຕະຫຼອດໄລຍະຜ່ານມາ.

ໂດຍ: Media Laos

ສະຫວັນນະເຂດ: ອີງຕາມຂໍ້ມູນຈາກກອງເລຂາຕ້ານໄພພິບັດຂັ້ນເມືອງ ໃນຄັ້ງວັນທີ 21 ຕຸລາ 2020 ນີ້ ກ່ຽວກັບສະພາບໄພນໍ້າຖ້ວມໃນທົ່ວເມືອງຊົນນະບູລີ ແຂວງສະຫວັນນະເຂດ ໄດ້ລາຍງານວ່າ: ໃນປັດຈຸບັນນີ້ເມືອງຊົນນະບູລີ ກໍາລັງປະສົບກັບໄພນໍ້າຖ້ວມຢ່າງໜັກ ບ້ານທີ່ໄດ້ຮັບຜົນກະທົບມີທັງໝົດ 43 ບ້ານ, ມີ 4.284 ຫຼັງຄາ, ມີພົນລະເມືອງ 29.4493 ຄົນ ຍິງ 14.642 ຄົນ, ເນື້ອທີ່ຖືກຖ້ວມ 7.085 ເຮັກຕາ, ສວນພຶດຜັກຖືກຖ້ວມ 176 ເຮັກຕາ, ໜອງປາ 361 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫງ, ໂຮງຮຽນທີ່ໄດ້ຮັບຜົນກະທົບ ແລະຕ້ອງໂຈະການຮຽນຊົ່ວຄາວມີ: ໂຮງຮຽນປະຖົມ 13 ແຫ່ງ, ໂຮງຮຽນມູນ 6 ແຫ່ງ, ມັດທະຍົມຕົ້ນ 2 ແຫ່ງ ລວມທັງໝົດ 21 ແຫ່ງ,

ບ້ານທີ່ຕ້ອງລະງັບການໃຊ້ໄຟຟ້າຊົ່ວຄາວເພື່ອຄວາມປອດໄພມີ 13 ບ້ານຄື ບ້ານບຶງຊ້າງ, ກອງປະທຸມວັນ, ບ້ານທ່າຄໍາເຫຼື້ອມ, ບ້ານດອນຍາໂນງ, ບ້ານໜອງສອງຫ້ອງ, ບ້ານເມືອງໂຮງ, ບ້ານດົງໜອງແຄນ ແລະບ້ານຕັ່ງຫວາຍນໍ້າ,ໂຄກຫົວຊ້າງ,ນາຈານໃຫຍ່,ນາລະແອນ ແລະນາໂຊກໃຊ,ວັດຖືກນໍ້າຖ້ວມ 13 ວັດ,ບໍ່ນໍ້າບາດານ 233 ບໍ່,ວິດຖ່າຍຖືກຖ້ວມ 1.142 ໜ່ວຍ,ເສັ້ນທາງຖືກຖ້ວມ ແລະ ຕັດຂາດການສັນຈອນມີ:

ເສັ້ນທາງບ້ານນາໜອງຜໍາຫາດົງບູນ, ເສັ້ນທາງບຶງຊ້າງຫາບ້ານໂຄກຫົວຊ້າງ ຫາບ້ານທ່າຄໍາເຫຼື້ອມ, ຫາບ້ານດອນຍາໂນງ, ເສັ້ນທາງບ້ານຕັ່ງຫວາຍນໍ້າຫາບ້ານກະລືມວັງແຂ້, ເສັ້ນທາງຈຸດສຸມຕັ່ງຫວາຍຫາກະທອງເຊ ຫາບ້ານນາຈານໃຫຍ່, ເສັ້ນທາງບ້ານກອງປະທຸມວັນຫາເມືອງຊົນນະບູລີ, ເສັ້ນທາງໂພໄຊຄູນຫາບ້ານດົງຫວາຍ, ເສັ້ນທາງບ້ານດົງຫວາຍຫາບ້ານໜອງຜື, ເສັ້ນທາງບ້ານກະຫຼາງຫາບ້ານຕະປອງ, ເສັ້ນທາງບ້ານຕັ່ງຫວາຍໂຄກຫາບ້ານໂພໄຊຄູນ, ເສັ້ນທາງແຕ່ຂົວຫ້ວຍນ້ໍາດີ້ງຫາບ້ານໄຊສົມບູນ, ເສັ້ນທາງແຕ່ຂົ້ວຫ້ວຍເຊວັນຫາບ້ານໜອງເບັນ, ເສັ້ນທາງແຕ່ຂົ້ວຫ້ວຍຕະຫຼຶງຫາບ້ານນາບົງ ແລະ ເສັ້ນທາງແຕ່ຂົ້ວຫ້ວຍເປາະຫາບ້ານອາຫໍ.

ໃນປັດຈຸບັນທາງການນໍາຂອງເມືອງພ້ອມດ້ວຍຄະນະຕ້ານໄພພິບັດຂັ້ນເມືອງ ອົງການຈັດຕັ້ງມະຫາຊົນກໍາລັງ ປກຊ-ປກສ ສົມທົບກັບກໍາລັງກອງຮ້ອຍ ຄໍ 35 ໄດ້ລົງໃຫ້ການຊ່ວຍເຫຼືອອົບພະຍົບປະຊາຊົນຂົນວັດຖຸເຄື່ອງຂອງຕ່າງໆອອກຈາກພື້ນທີ່ສ່ຽງ ເພື່ອຄວາມປອດໄພໄປພັກທີ່ຈຸດພັກຊົ່ວຄາວ ມີ 6 ຈຸດ ທີ່ໄດ້ເມືອງຈັດສັນ,ນອກນີ້ກໍ່ພັກເຊົາຕາມເຮືອນຍາດຕິພີ່ນ້ອງ,ມາໃນປະຈຸບັນນີ້ລະດັບນໍ້າແມ່ນຍັງເພີ່ມຂື້ນຢ່າງຕໍ່ເນື່ອງ ແລະໄຫຼເຂົ້າຖ້ວມເນື້ອທີ່ນາຮົ້ວສວນ ແລະອາດຈະໄຫຼເຂົ້າຖ້ວມບ້ານເຮືອນຂອງປະຊາຊົນຕື່ມອີກ.

ສ່ວນຄວາມເສຍຫາຍແມ່ນຈະໄດ້ລາຍງານຕື່ມອີກພາຍຫຼັງ ແລະ ສິ່ງທີ່ຈຳເປັນໃນປັດຈຸບັນທີ່ທາງເມືອງຕ້ອງການຄວາມຊ່ວຍເຫຼືອຈາກສັງຄົມຢ່າງຮີບດ່ວນທີ່ສຸດແມ່ນ ອາຫານການກິນ,ນ້ຳດື່ມ,ເຂົ້າສານ,ອາຫານແຫ້ງ,ຢາປົວພະຍາດ,ນ້ຳມັນເຊື້ອໄຟ ແລະ ເຮືອເພື່ອຊ່ວຍເຫຼືອສະເພາະໜ້າໃຫ້ກັບປະຊາຊົນຜູ້ໄດ້ຮັບຜົນກະທົບຈາກໄພນ້ຳຖ້ວມ.

ພາບ – ຂ່າວ: ອັກສອນສິນ ພົມມະຈັນ

ໃນວັນທີ 21-22 ຕຸລາ 2020 ສະຫາຍ ທອງລຸນ ສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ກອງປະຊຸມດຳເນີນຊີວິດການເມືອງ ພາຍໃນຄະນະບໍລິຫານງານພັກແຂວງສະຫວັນນະເຂດ ທ້າຍສະໄໝທີ  VIII; ໂດຍມີສະຫາຍ ສັນຕິພາບ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆສະຫວັນນະເຂດ; ບັນດາສະຫາຍ ຄະນະບໍລິຫານງານພັກແຂວງ; ຜູ້ຕາງໜ້າຈາກ ຄະນະຈັດຕັ້ງສູນກາງພັກ, ຄະນະກວດກາສູນກາງພັກ ເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການຕີລາຄາ ແລະ ປະກອບຄຳເຫັນ ໃສ່ຮ່າງບົດສຳຫຼວດການນຳພາລວມ ຂອງຄະ ນະບໍລິຫານງານພັກແຂວງສະຫວັນນະເຂດ ສະໄໝທີ VIII ຕະຫຼອດໄລຍະ 5 ປີຜ່ານມາ ແລະ ບົດສຳຫຼວດບຸກຄົນ ພາຍໃນຄະນະບໍລິຫານງານພັກແຂວງ. ໃນໂອກາດນີ້, ສະຫາຍ ທອງລຸນ ສີສຸລິດ ໄດ້ມີຄຳເຫັນໂອ້ລົມ ແລະ ຊີ້ນຳຕໍ່ກອງປະ  ຊຸມ, ກ່ອນອື່ນ ສະຫາຍ ໄດ້ກ່າວຍ້ອງຍໍຊົມເຊີຍ ຕໍ່ຜົນສຳເລັດອັນພົ້ນເດັ່ນ ຈາກການນຳພາ-ຊີ້ນຳ ຂອງຄະນະບໍລິຫານງານພັກແຂວງ ໂດຍສະເພາະ ການເຕົ້າໂຮມຄວາມສາມັກຄີ, ການປະຕິບັດວຽກງານປ້ອງກັນຊາດ, ປ້ອງກັນຄວາມສະ ຫງົບ, ການພັດທະນາເສດຖະກິດ-ສັງຄົມ, ການພັດທະນາຊົນນະບົດ, ການແກ້ໄຂໄພພິບັດນໍ້າຖ້ວມ, ການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ແລະ ອື່ນໆ; ອັນສຳຄັນ ສະຫາຍ ທອງລຸນ ສີສຸລິດ ໄດ້ມີຄຳເຫັນຊີ້ນຳ ເພື່ອໃຫ້ບັນດາສະຫາຍ ໃນຄະນະບໍລິຫານງານພັກແຂວງ ນຳໄປຄົ້ນຄວ້າ ແລະ ພ້ອມກັນຈັດຕັ້ງປະຕິບັດ ເປັນຕົ້ນ ພ້ອມກັນກຳແໜ້ນ ກ່ຽວກັບ ຈຸດປະສົງ ແລະ ເປົ້າໝາຍ ໃນການດຳເນີນຊີວິດການເມືອງ ຄັ້ງນີ້, ລວມທັງ ການກະກຽມບຸກຄະລະກອນ ເພື່ອສືບຕໍ່ລົງສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກແຂວງຊຸດໃໝ່ ໃຫ້ຮັບປະກັນ ສາມລຸ້ນ (ລຸ້ນອາວຸໂສ, ລຸ້ນກາງ, ລຸ້ນໜຸ່ມ), ເພດ ແລະ ເຜົ່າ;

ຄົ້ນຄວ້າຢ່າງເລິກເຊິ່ງ ແລະ ປະກອບຄຳຄິດເຫັນ ຢ່າງພາວະວິໄສ ຕໍ່ຮ່າງບົດສຳຫຼວດການນຳພາລວມ ຂອງຄະນະບໍລິຫານງານພັກແຂວງ ໂດຍສະເພາະ ໄຈ້ແຍກໃຫ້ເຫັນຜົນສຳເລັດ, ຈຸດດີ-ຈຸດອ່ອນ-ຂໍ້ຄົງຄ້າງ, ສາຍເຫດ, ບົດຮຽນທີ່ຖອດຖອນໄດ້ ແລະ ທິດທາງປັບປຸງແກ້ໄຂໃນຕໍ່ໜ້າ; ການສຳຫຼວດບຸກຄົນ ໃຫ້ບັນດາສະຫາຍ ຄະນະບໍລິຫານງານພັກແຂວງ ສຸມໃສ່ລົງເລິກຕີລາຄາຕົນເອງ ທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ຄວາມຮັບຜິດຊອບຕໍ່ໜ້າທີ່ການເມືອງ, ຄວາມຮູ້ຄວາມສາມາດ, ສະຕິຕໍ່ການຈັດຕັ້ງ, ຄວາມເປັນແບບຢ່າງນຳໜ້າ, ແບບແຜນວິທີເຮັດວຽກ, ແບບແຜນການດຳລົງຊີວິດ ແລະ ອື່ນໆ. ພ້ອມກັນນັ້ນ, ກໍ່ໃຫ້ໝູ່ຄະນະ ມີຄຳເຫັນຕຳນິສົ່ງຂ່າວ ເພື່ອກໍ່ສ້າງ ເຊິ່ງກັນ ແລະ ກັນ ດ້ວຍຄວາມຈິງໃຈ, ກົງໄປກົງມາ, ຖືກຕ້ອງກັບຄວາມເປັນຈິງ…; ໃຫ້ພ້ອມກັນຄົ້ນຄວ້າ ແລະ ກວດກາຄືນ ບັນດາຄຳເຫັນ ໃນການສຳຫຼວດກວດກາກັນ ໃນໄລຍະຜ່ານມາ, ອັນໃດຖືກຕ້ອງກັບຄວາມເປັນຈິງ ກໍ່ສືບຕໍ່ນຳໄປປັບປຸງແກ້ໄຂ ໃຫ້ມີການຫັນປ່ຽນທີ່ດີຂຶ້ນ, ອັນໃດ ບໍ່ມີມູນຄວາມຈິງ ກໍ່ໃຫ້ນຳໄປເປັນຄະຕິເຕືອນ ແລະ ບົດຮຽນ ເພື່ອປ້ອງກັນ ໃນອະນາຄົດ ບໍ່ໃຫ້ເກີດມີເຫດການ ຄືຫາງສຽງດັ່ງກ່າວ. ຊຶ່ງທັງໝົດນັ້ນ, ກໍ່ເພື່ອແນໃສ່ເຮັດອົງຄະນະພັກແຂວງສະຫວັນນະເຂດ ມີຄວາມປອດໃສ, ໜັກແໜ້ນ, ເຂັ້ມແຂງ ເວົ້າລວມ, ເວົ້າສະເພາະ ເຮັດໃຫ້ການດຳເນີນກອງປະຊຸມຄັ້ງນີ້ ໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ຢ່າງຈົບງາມ.

ພາບ-ຂ່າວ: ກົມປະຊາສຳພັນ ຫສນຍ.

ໄຊສົມບູນ: ກອງປະຊຸມໃຫຍ່ຂອງອົງຄະນະພັກ ແຂວງໄຊສົມບູນ ຄັ້ງທີ I ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 22 ຕຸລາ 2020 ພາຍໃຕ້ການເປັນປະທານຂອງ ສະຫາຍ ພົຕ ຄຳລຽງ ອຸທະໄກສອນ ເລຂາຄະນະບໍລິຫານງານພັກແຂວງ, ເຈົ້າແຂວງໄຊສົມບູນ.

ໂດຍເປັນກຽດເຂົ້າຮ່ວມຂອງ ສະຫາຍ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ມີຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ອະດີດການນຳແຂວງ, ພະນັກງານປະຕິວັດອາວຸໂສ, ຜູ້ຊົງຄຸນວຸດທິ, ນັກທຸລະກິດຜູ້ປະກອບການ ແລະ ຜູ້ແທນສົມບູນຈຳນວນ 123 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງຈໍານວນທັງໝົດ 3.914 ສະຫາຍ ເຂົ້າຮ່ວມ.
ສະຫາຍ ພົນຕີ ຄໍາລຽງ ອຸທະໄກສອນ ເລຂາພັກແຂວງ ເຈົ້າແຂວງໄຊສົມບູນ ໃນນາມປະທານກອງປະຊຸມ ໄດ້ກ່າວວ່າ:

“ກອງປະຊຸມໃຫຍ່ໃນຄັ້ງນີ້, ຈະໄດ້ພ້ອມກັນຕີລາຄາ ກ່ຽວກັບຜົນສໍາເລັດການຈັດຕັ້ງປະຕິບັດແນວທາງຂອງພັກ, ມະຕິກອງປະຊຸມຕົວແທນສະມາຊິກພັກຂອງແຂວງ ໃນໄລຍະ 5 ປີ ຜ່ານມາ, ຍົກໃຫ້ເຫັນຈຸດດີຜົນສໍາເລັດ, ຈຸດອ່ອນ-ຄົງຄ້າງ, ສາເຫດທີ່ພາໃຫ້ມີຈຸດອ່ອນ ແລະ ບາງບົດ ຮຽນທີ່ຖອດຖອນໄດ້ ແລະ ຈະໄດ້ພ້ອມກັນຄົ້ນຄວ້າ, ຕົກລົງເປັນເອກະພາບຮັບຮອງເອົາທິດທາງແຜນການ ໃນ 5 ປີ ຕໍ່ໜ້າ (2021-2025)

ນອກຈາກນີ້, ກອງປະຊຸມໃຫຍ່ ຈະໄດ້ດໍາເນີນການປ່ອນບັດເລືອກຕັ້ງເອົາຄະນະບໍລິຫານງານພັກຊຸດໃໝ່ ເພື່ອສືບຕໍ່ຊີ້ນໍາ-ນໍາພາວຽກງານຮອບດ້ານຕາມແນວທາງນະໂຍບາຍຂອງພັກ; ປ່ອນບັດຄັດເລືອກເອົາຜູ້ແທນສົມບູນ, ສໍາຮອງ ໄປຮ່ວມກອງປະຊຸມໃຫຍ່ ຄັ້ງທີ XI ຂອງພັກ ທີ່ຈະໄຂຂຶ້ນໃນຕໍ່ໜ້າ ແລະ ຮັບຟັງການໂອ້ລົມຂອງ ສະຫາຍ ນາງ ປານີ ຢ່າທໍ່ຕູ້ ເພື່ອເປັນເຂັມຊີ້ທິດເຍືອງທາງ ໃຫ້ແກ່ຄະນະພັກແຂວງຊຸດໃໝ່, ສະມາຊິກພັກ, ພະນັກງານ, ທະຫານ, ຕໍາຫລວດ ແລະ ປະຊາຊົນບັນດາເຜົ່າ ສືບຕໍ່ຈັດຕັ້ງປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດ ທະນາແຂວງໄຊສົມບູນ ໃຫ້ກ້າວຂຶ້ນເທື່ອລະກ້າວ.”

ໄລຍະ 5 ປີຜ່ານມາ ຄະນະພັກແຕ່ລະຂັ້ນ ໄດ້ເອົາໃຈໃສ່ຢ່າງຕັ້ງໜ້າ ໃນການສຶກສາອົບຮົມນຳພາການເມືອງ-ແນວຄິດ ຈັດຕັ້ງເຊື່ອມຊຶມແນວທາງນະໂຍບາຍ ບັນດາມະຕິ, ຄຳສັ່ງຂອງພັກ, ລະບຽບກົດ ໝາຍຂອງລັດ ພ້ອມທັງເສີມຂະຫຍາຍມູນເຊື້ອທີເປັນເອກະລັກ, ເຕົ້າໂຮມຄວາມສາມັກຄີເປັນປຶກແຜ່ນ, ເຊີດຊູນໍ້າໃຈຮັກຊາດ, ຮັກລະບອບໃໝ່, ປະຕິບັດແນວທາງປ່ຽນແປງໃໝ່ ທີມີຫລັກການຂອງພັກ ໂດຍສຸມໃສ່ຫັນພະນັກງານລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ເພື່ອແກ້ໄຂຄວາມທຸກຍາກຂອງປະຊາຊົນ, ຄຽງຄູ່ກັນນັ້ນ ກໍໄດ້ສຸມໃສ່ການຈັດຕັ້ງປະຕິບັດແຜນພັດທະນາເຂດຈຸດສຸມໃຈກາງ ແລະ ແກ້ໄຂຄວາມບໍ່ສະຫງົບ ເຮັດໃຫ້ແຂວງໄຊສົມບູນ ມີສະຖຽນລະພາບທາງດ້ານການເມືອງຢ່າງໜັກ ແໜ້ນ, ສັງຄົມມີຄວາມສະຫງົບປອດໄພ ຕິດພັນກັບການແກ້ໄຂຄວາມທຸກຍາກຂອງປະຊາຊົນ ໂດຍການປຸກລະດົມຂົນຂວາຍດຶງດູດເອົານັກລົງທຶນທັງພາຍໃນ ແລະ ຕ່າງປະເທດ ເຂົ້າມາມາລົງທຶນປະກອບສ່ວນພັດທະນາແຂວງນັບມື້ນັບຫລາຍຂຶ້ນ.

ຈາກໝາກຜົນດັ່ງກ່າວ, ໄດ້ປະກອບສ່ວນສຳຄັນເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ ດ້ວຍອັດຕາສະເລ່ຍ 6,99% ຕໍ່ປີ, ລວມຍອດຜະລິດຕະພັນພາຍໃນ (GDP) ລາຍຮັບສະເລ່ຍໃສ່ຫົວຄົນບັນລຸໄດ້ 11 ລ້ານກວ່າກີບຕໍ່ຄົນຕໍ່ປີ, ໂຄງການລົງທຶນຂອງລັດມີທັງໝົດ 202 ໂຄງການ, ທົ່ວແຂວງມີເນື້ອທີ່ປູກເຂົ້າທັງໝົດ 11.000 ເຮັກຕາ, ສະເລຍສະມັດຕະພາບໄດ້ 2,48 ໂຕນຕໍ່ເຮັກຕາ,

ນອກຈາກນັ້ນ, ຍັງໄດ້ເອົາໃຈໃສ່ລົງຊຸກຍູ້ສົ່ງເສີມຜະລິດກະສິກຳເປັນສິນຄ້າຂອງປະຊາຊົນ ອັນພົນເດັ່ນແມ່ນການປູກຢ່າງພາລາ, ມັນຕົ້ນ ແລະ ໝາກກ້ຽງ. ປັດຈຸບັນທົ່ວແຂວງມີຄອບຄົວພົ້ນທຸກ 6.526 ຄອບຄົວ ເທົ່າກັບ 42,31%, ແກ້ໄຂຄອບຄົວທຸກຢາກໄດ້ 711 ຄອບຄົວ, ຄອບຄົວທຸກຍາກຍັງເຫລືອ 1.098 ຄອບຄົວ ເທົ່າກັບ 7,12%, ປັດຈຸບັນຍັງເຫລືອບ້ານທຸກຍາກ 10 ບ້ານ, ເມືອງທຸກຍາກຍັງ 4 ເມືອງ, ມີຄອບຄົວພັດທະນາ 7.799 ຄອບຄົວ ເທົ່າກັບ 50,57%, ສ້າງບ້ານພັດທະນາໄດ້ 4 ບ້ານ ລວມທັງໝົດທົວແຂວງ ມີບ້ານພັດທະນາທັງໝົດ 19 ບ້ານ ເທົ່າກັບ 21,35%.

ຂ່າວ: ພຸດທະສອນ ເວດສະວົງ

ນະຄອນຫຼວງວຽງຈັນ: ໃນວັນທີ 19 ຕຸລາ 2020. ບໍລິສັດ ພຣູເດັນໂຊລ໌ ປະກັນໄພຊີວິດລາວ ຈຳກັດ ໄດ້ມີການເປິດໂຕ ເພົ້າສ໌ ແອັບພິເຄເຊິນ ຢ່າງເປັນທາງການ ເຊິ່ງຈະເປັນ ແອັບພິເຄເຊິນໃນລາວທີ່ຊ່ວຍຜູ້ໃຊ້ ໃນການຈັດການດ້ານສຸຂະພາບໂດຍບໍ່ມີການເສຍຄ່າໃຊ້ຈ່າຍໃດໆ. ເພົ້າສ໌ ເປັນແອັບພິເຄເຊີນທີ່ນຳໃຊ້ລະບົບ ປັນຍາປະດິດ ຫຼື AI ເປັນເຄື່ອງມືໃນການ ໃຫ້ຂໍ້ມູນຢ່າງຖືກຕ້ອງຊັດເຈນໃຫ້ກັບຜູ້ໃຊ້ຕະຫຼອດເວລາ. ຜູ້ໃຊ້ສາມາດເຂົ້າເຖິ່ງຂໍ້ມູນດ້ານສຸຂະພາບ ແລະ ສາມາດຊອກຫາຂໍ້ມູນ ໂຮງໝໍ ແລະ ຄິລນິກ ທີ່ໃກ້ຄຽງໃນຍາມສຸກເສີນ.

ງານເປິດໂຕແມ່ນໄດ້ຈັດຂຶ້ນຢູ່ທີ່ໂຮງແຮມ ຄຣາວ ພລາຊາ ພາຍໃຕ້ການນຳພາໂດຍ ທ່ານ ວິເຈ ມັດດາວັນ, ຜູ້ອຳນວຍການໃຫຍ່ຂອງ ພຣູເດັນໂຊລ໌ ລາວ ແລະ ໄດ້ຮັບກຽດ ຈາກ ທ່ານ H.E. Jonh Pearson ເອກອັກຄະລັດຖະທູດ ຣາດສະອານາຈັກອັງກິດປະຈຳປະເທດລາວ, ທ່ານ ດຣ. ເນົາ ບຸດຕາ ຕາງໜ້າ ກະຊວງສາທາລະນະສຸກ, ຕາງໜ້າກະຊວງການເງິນ, ຕາງຫນ້າກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ແລະ ຕາງຫນ້າ ກະຊວງ ແຜນການ ແລະ ການລົງທຶນ.

ໃນການເປິດງານ, ທ່ານ ວິເຈ ມັດດາວັນໄດ້ກ່າວວ່າ “ຕັ້ງແຕ່ປີ 2016 ທີ່ບໍລິສັດຂອງພວກເຮົາໄດ້ເລີ່ມດຳເນີນທຸລະກິດໃນລາວ, ພຣູເດັນໂຊລ໌ ລາວ ບໍ່ພຽງແຕ່ທີ່ຈະຮັກສາຄຳໜັ້ນສັນຍາ ທີ່ຈະຊ່ວຍດູແລຮັກສາດ້ານ ການເງິນ ແຕ່ກໍ່ຈະຊ່ວຍຄົນລາວ ຮັກສາສຸຂະພາບ ແລະ ການດຳລົງຊີວີດທີ່ດີເຊັ່ນກັນ. ພວກເຮົາເຊື່ອໝັ້ນວ່າ “ການປ້ອງກັນແມ່ນດີກວ່າການຮັກສາ”, ແລະ ນັ້ນເປັນສາເຫດທີ່ ພຣູເດັນໂຊລ໌ ລາວ ໄດ້ພັດທະນາ ເພົ້າສ໌ ແອັບພິເຄເຊິນ ເພື່ອເຮັດໃຫ້ການດູແລສຸຂະພາບເປັນສິ່ງທີ່ສາມາດເຂົ້າເຖິງໄດ້ງ່າຍສຳລັບທຸກໆຄົນໃນອາຊີ ລວມທັງຄົນລາວທຸກຄົນ”.

ທ່ານ ດຣ. ເນົາ ບຸດຕາ ຜູ້ຕາງໜ້າ ກະຊວງ ສາທາລະນະສຸກ ຍັງໄດ້ກ່າວວ່າ “ພຣູເດັນໂຊລ໌ ລາວ ໄດ້ນຳໃຊ້ ເຄື່ອງມືແບບດິຈິຕ້ອນໃນການ ເປັນທີ່ປຶກສາທາງດ້ານສຸຂະພາບ ເພຶ່ອຕອບສະຫນອງຄວາມຕ້ອງການ ຂອງຄົນລາວ. ເພົ້າສ໌ ແອັບພິເຄເຊິນ ເຮັດໃຫ້ຄົນລາວເຂົ້າເຖິງຂໍ້ມູນດ້ານສຸຂະພາບທີ່ໜ້າເຊື່ອຖື ແລະ ຄົບຖ້ວນໄດ້ງ່າຍຂຶ້ນ. ເພົ້າສ໌ ເປັນແອັບໜື່ງດຽວໃນລາວ ທີ່ໃຫ້ຜູ້ໃຊ້ໄດ້ມີການຈັດການສຸຂະພາບໂດຍໂຕເອງໄດ້ໃນເບື້ອງຕົ້ນ ແລະ ບໍ່ເສຍຄ່າໃຊ້ຈ່າຍ. ຂ້າພະເຈົ້າ ເຊື່ອວ່າ ເພົ້າສ໌ແອັບພິເຄເຊິນ ຈະເປັນບາດກ້າວໜື່ງທີ່ຈະສົ່ງເສີມຄົນລາວໃຫ້ມີການດຳລົງຊີວີດທີ່ດີ ແລະ ສຸຂະພາບທີ່ດີ ຜ່ານ ເພົ້າສ໌ແອັບປິເຄເຊິນ.

ສຳລັບຄຸນລັກສະນະທີ່ມາພ້ອມກັບການເປີດໂຕໃນຄັ້ງນີ້ມີ:
ການປະເມີນສຸຂະພາບ* (ໂດຍບໍລິສັດ ບາບີໂລນ, ເຊິ່ງເປັນ ບໍລິສັດສາທາລະນະສຸກລະດັບສາກົນທີ່ມີຢູ່) ເປັນເຄື່ອງມືໃນການປະເມີນຜົນໃນຊີວິດປະຈຳວັນ ແລະ ການຄາດເດົາຄວາມສ່ຽງທາງດ້ານພະຍາດ ໂດຍການຕອບຄຳຖາມ ໃນເວລາ 15 ນາທີ, ຜູ້ຊົມໃຊ້ສາມາດຮັບຮູ້ຜົນໂດຍທັນທີ ກ່ຽວກັບສະພາບຮ່າງກາຍໂດຍລວມ ແລະ ຄວາມສ່ຽງຂອງ ພະຍາດທີ່ຈະເກີດຂຶ້ນໃນໄລຍະຍາວ ອີງຕາມພຶດຕິກຳການໃຊ້ຊີວິດປະຈຳວັນຂອງທ່ານ, ປະຫວັດທາງການແພດ ຂອງທ່ານ ແລະ ຄອບຄົວ, ການກິນອາຫານ ແລະ ສຸຂະພາບຈິດ. ຜົນຈະຖືກລາຍງານໂດຍສ້າງມຸມມອງກາຍະວິ​ພາກ 3 ມິຕິຂອງຮ່າງກາຍ ທີ່ມີຊື່ວ່າ “Digital Twin” ລວມທັງຄຳແນະນຳທາງດ້ານສຸຂະພາບ ເພື່ອຊ່ວຍໃນການຫຼຸດຜ່ອນຄວາມສ່ຽງທາງພະຍາດ ແລະ ເສີມສ້າງສຸຂະພາບໂດຍລວມໃຫ້ດີຂຶ້ນ

ກວດສອບອາການ (ຂັບເຄື່ອນດ້ວຍ Babylon), ເປັນບໍລິສັດດ້ານການດູແລຮັກສາສຸຂະພາບລະດັບໂລກຢູ່ໃນເອເຊຍ – ຜູ້ໃຊ້ສາມາດຂຽນຂໍ້ມູນອາການ​ແລ້ວ​ສົ່ງ​ໃຫ້ຫຸ່ນຍົນສົນທະນາ (chatbot) ທີ່ຂັບເຄື່ອນດ້ວຍລະບົບ AI ເພື່ອຮັບຂໍ້ມູນຢ່າງວ່ອງໄວ, ​ແທດ​ເໝາະ, ເປັ​ນ​ຂໍ້ມູນດ້ານການແພດທີ່ຫນ້າເຊື່ອຖື,​ ພ້ອມທັງໃຫ້ຄໍາແນະນໍາໃນ​ຂັ້ນ​ຕອນຕໍ່ໄປທີ່ຄວນປະຕິບັດໄດ້ໃນໂທລະສັບມືຖືຂອງ​ທ່ານເອງ. ເພາະລະ​ບົບ​ນີ້​ເຮັດ​ໜ້າ​ທີ່​ເປັນ​ຜູ້​ຊ່ວຍ​ຜູ້​ທຳ​ອິດ ສໍາລັບຜູ້ໃຊ້ໃນເວລາທີ່ຕ້ອງການການດູແລອາ​ການ, ​ລະບົບສາມາດເຮັດໃຫ້​ຜູ້​ໃຊ້ເຂົ້າໃຈອາການໄດ້ຫລາຍຂຶ້ນ ແລະ ສາ​ມາດ​ແນະນໍາວ່າຈະຊອກຫາຄໍາແນະນໍາເພີ່ມເຕີມຈາກຜູ້ຊ່ຽວຊານດ້ານສຸຂະພາບຈາກໃສຈິ່ງເຫມາະສົມທີ່ສຸດ.​ໃນຕອນທ້າຍຂອງການສົນທະນານໍາຫຸ່ນຍົນສົນທະນາ, ຜູ້ໃຊ້ຈະຖືກແນະນໍາ ຜົນ ທີ່ເຫມາະສົມ (ຕົວຢ່າງ: “ການດູແລສຸຂະພາບ”, “​ຮ້ານຂາຍຢາ”, “ໂຮງຫມໍ”, ແລະ ອື່ນໆ) ແລະ ໃຫ້ຂໍ້ມູນເພີ່ມເຕີມກ່ຽວກັບສາເຫດທີ່ອາດພາໃຫ້ເກີດອາການດັ່ງ​ກ່າວ.

• ການກວດອາການ ແລະ ການປະເມີນສຸຂະພາບ ບໍ່ໄດ້ມີຈຸດປະສົງໃນການກວດຫາ ຫຼື ບົ່ງມະຕິພະຍາດ. ນອກ​ຈາກນີ້, ການກວດອາການ ແລະ ການປະເມີນສຸຂະພາບ ບໍ່ເໝາະສົມກັບຜູ້ຍິງຖືພາ ແລະ ເດັກນ້ອຍທີ່ມີ ອາຍຸ 18 ປີລົງມາ, ຜູ້ໃຊ້ທີ່ມີອາ​ການທາງດ້ານສຸຂະພາບໄລຍະຍາວ ຫຼື ຜູ້ພິການທີ່ມີຄວາມຕ້ອງການ ແລະ ມີຄວາມສ່ຽງ ທີ່ຫຼາກຫຼາຍ. ການກວດອາການບໍ່ເໝາະສົມໃນການໃຊ້ແບບສຸກເສີນທາງການແພດ ແລະ ຜູ້ໃຊ້ຄວນຕິດຕໍ່ການບໍລິການສຸກເສີນທ້ອງຖິ່ນແທນ.

ຊອກ​ຫາ​ໂຮງ​ໝໍ – ແມ່ນແຜນ​ທີ່​ສຳ​ລັບ​ຜູ້​ໃຊ້​ໃນ​ການ​ຊອກ​ຫາໂຮງໝໍ ແລະ ຄລີນິກທີ່ໃກ້ໂຕທ່ານທີ່ສຸດ, ຜູ້ໃຊ້ສາມາດເບິ່ງຂໍ້ມູນ ຕ່າງໆ ບໍວ່າຈະເປັນ ໂມງໃນການໃຫ້ບໍລິການ ລວມໄປເຖິງຂໍ້ມູນໃນການຕິດຕໍ່ ແລະ ສາມາດໂທຫາໂດຍກົງ ຫຼື ນຳໃຊ້ແຜນທີ່ໃນການນຳທາງໄປສູູ່ໂຮງໝໍ ແລະ ຄລີນິກທີ່ທ່ານເລືອກ.

ຕົວບັນທຶກດັດສະນີວັດມວນກາຍ ແລະ ກະຈົກແຍງຮ່ອງຮອຍ – ຄຸນລັກສະນະທາງ ປັນຍາປະດິດ (A.I) ທີ່ຊ່ວຍຜູ້ນຳໃຊ້ ເຂົ້າໃຈໄຂມັນໃນຮ່າງກາຍ ແລະ ການເພີ່ມຂຶ້ນຂອງອາຍຸ ຂອງໂຕທ່ານເອງຕາມລຳດັບ, ພ້ອມກັບການວັດແທກກ່ຽວກັບສຸຂະພາບ ແລະ ການໃຊ້ຊີວິດຕ່າງໆ ຜ່ານການຖ່າຍຮູບດ້ວຍໂຕທ່ານເອງ

ເນື້ອຫາກ່ຽວກັບສຸຂະພາບ – ໃຫ້ຂໍ້ມູນແກ່ຜູ້ນຳໃຊ້ໃນການມີສ່ວນຮ່ວມ ກັບ ເນື້ອຫາກ່ຽວກັບສຸຂະພາບຢູ່ ຈາກບົດຄວາມ, ວິດີໂອ ແລະ ຂໍ້ມຸນເຊີງກຣາບຟິກ.

ຊຸມ​ຊົນຂອງ​ຂ້ອຍ – ແມ່ນ​ພື້ນ​ທີ່​ສຳ​ລັບຜູ້​ໃຊ້ໃນ​ການ​ສື່​ສານ​ກັບ​ບຸກ​ຄົນ​ອື່ນໆ​ໃນ​ການ​ແລກ​ປ່ຽນ​ຄວາມ​ຮູ້ ແລະ ເຄັດ​ລັບທີ່​ກ່ຽວ​ຂ້ອງ​ກັບ​ສຸ​ຂະ​ພາບ ແລະ ອາ​ຫານ

ເພົ້າສ໌ແອັບພິເຄເຊິນ ນຳໃຊ້ແລ້ວໃນ 11 ປະເທດ ທົ່ວອາຊີ ທີ່ຢູ່ໃນເຄືອ Prudential Corporate Asia ເຊັ່ນ: ກຳປູເຈຍ, ຮົງກົງ, ອິນໂດເນເຊຍ, ລາວ, ມາເລເຊຍ, ມຽນມາ, ຟິລິບປີນ, ສິງກະໂປ, ໄຕ້ຫວັນ, ໄທ ແລະ ຫວຽດນາມ. ຕັ້ງແຕ່ເປີດໂຕຫາປະຈຸບັນ ເພົ້າສ໌ແອັບພິເຄເຊິນ ຖືກດາວໂຫຼດຫຼາຍກວ່າ 9 ລ້ານເທື່ອໃນຂົງເຂດອາຊີ. ເພົ້າສ໌ແອັບພິເຄເຊິນ ສາມາດດາວໂຫຼດໄດ້ໃນ Apple/Google Play stores ຂອງປະເທດລາວ