ໂດຍຕອບສະໜອງຕາມການເຊື້ອເຊີນຈາກ ສະຫາຍ ສະເຫຼີມໄຊ ກົມມະສິດ, ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ, ສະຫາຍ ຟ້າມ ບິ່ງ ມິງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ, ໄດ້ນໍາພາຄະນະຜູ້ແທນກະຊວງ ການຕ່າງປະເທດຫວຽດນາມ ຢ້ຽມຢາມ ສປປ ລາວ ແລະ ເປັນປະທານຮ່ວມກອງປະຊຸມປຶກສາຫາ ລືດ້ານການເມືອງຂັ້ນລັດຖະມົນຕີຄັ້ງທີ 7 ລະຫວ່າງ ສອງກະຊວງການຕ່າງປະເທດ ລາວ ແລະ ຫວຽດນາມ ໃນລະຫວ່າງວັນທີ 29-30 ພະຈິກ 2020 ທີ່ ນະຄອນຫຼວງວຽງຈັນ.

ກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີຄັ້ງທີ 7 ໄດ້ຈັດຂຶ້ນໃນຕອນບ່າຍ ວັນທີ 29 ພະຈິກ 2020 ທີ່ສູນຮ່ວມມືສາກົນ ICTC, ໂດຍການເປັນປະທານຮ່ວມ ຂອງ ສະຫາຍ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດລາວ ແລະ ສະຫາຍ ຟ້າມ ບິ່ງ ມິງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ແລະ ມີຜູ້ເຂົ້າຮ່ວມຈາກ ບັນດາ ກົມກ່ຽວຂ້ອງຂອງສອງປະເທດ ຢ່າງພ້ອມພຽງ. ກອງປະຊຸມຄັ້ງນີ້ໄດ້ດໍາເນີນໄປ ດ້ວຍບັນຍາກາດ ອັນສະໜິດສະໜົມຖານສະຫາຍອ້າຍນ້ອງ ໂດຍທັງສອງຝ່າຍໄດ້ທົບທວນຕີລາຄາຄືນ ການຮ່ວມມື ສອງຝ່າຍໃນໄລຍະຜ່ານມາ ກໍ່ຄື ລະຫວ່າງສອງກະຊວງການຕ່າງປະເທດ ແລະ ວາງແຜນການຮ່ວມມື ໃນຕໍ່ໜ້າ. ນອກນີ້, ຍັງໄດ້ແລກປ່ຽນ ກ່ຽວກັບສະພາບການພາກພື້ນ ແລະ ສາກົນ ທີ່ສອງຝ່າຍ ມີຄວາມສົນໃຈ.

ສອງຝ່າຍ ຍັງໄດ້ສະແດງຄວາມປິຕິຍິນດີ ທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ໄດ້ຮັບການເພີ່ມພູນຄູນສ້າງໃຫ້ຂະຫຍາຍຕົວ ເປັນຢ່າງດີ ໃນໄລຍະຜ່ານມາ. ນອກນີ້, ຍັງໄດ້ຕີລາຄາສູງບົດບາດ ແລະ ການປະກອບສ່ວນ ຂອງສອງຂະແໜງ ການຕ່າງປະເທດ ທີ່ເປັນຂົວຕໍ່ ລະຫວ່າງ ການພົວພັນສອງປະເທດ, ເປັນເສນາທິການໃຫ້ຂັ້ນເທິງ ໃນວຽກງານການຕ່າງປະເທດ ແລະ ເປັນຜູ້ຊຸກຍູ້ຕິດຕາມການຮ່ວມມືສອງຝ່າຍ ໃນທຸກຂົງເຂດວຽກງານ ບໍ່ວ່າຈະເປັນທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ແລະ ດ້ານອື່ນໆ. ສອງຝ່າຍ ຍັງເຫັນດີ ສືບຕໍ່ເພີ່ມທະວີການແລກປ່ຽນການຢ້ຽມຢາມ ແລະ ການພົບປະຂອງການນໍາຂັ້ນສູງ ຂອງສອງ ປະເທດ ດ້ວຍຫລາຍຮູບແບບ ແລະ ປະຕິບັດກົນໄກການຮ່ວມມືທີ່ມີຢູ່ແລ້ວ ລະຫວ່າງສອງປະເທດ ກໍ່ຄືສອງກະຊວງໃຫ້ມີປະສິດທິຜົນຍິ່ງໆຂຶ້ນ.

ໃນໂອກາດນີ້, ຝ່າຍລາວ ໄດ້ສະແດງຄວາມຊົມເຊີຍ ສສ ຫວຽດນາມ ທີ່ສໍາເລັດການເປັນ ປະທານອາຊຽນ ດ້ວຍຜົນສໍາເລັດຢ່າງຈົບງາມ. ພ້ອມທັງ,ໄດ້ສະແດງຄວາມຂອບໃຈຝ່າຍຫວຽດນາມ ທີ່ໄດ້ໃຫ້ສະໜັບສະໜູນຊ່ວຍເຫຼືອ ສປປ ລາວ ຕະຫຼອດມາ ບໍ່ວ່າຈະເປັນໄລຍະທີ່ມີການລະບາດ ຂອງພະຍາດໂຄວິດ-19 ຢູ່ລາວ ກໍ່ຄືໃນໄລຍະເວລາ ສປປ ລາວ ປະສົບກັບເຫດໄພພິບັດທາງ ທໍາມະຊາດ ໂດຍສະເພາະ ໄດ້ຂອບໃຈຕໍ່ການມອບເຂົ້າສານ ຈໍານວນ 1000 ໂຕນ ເພື່ອຊ່ວຍເຫຼືອ ປະຊາຊົນແຂວງສະຫວັນນະເຂດ ທີ່ປະສົບກັບອຸທົກກະໄພ ຮ້າຍແຮງ ໃນກາງເດືອນພະຈິກຜ່ານມາ, ເຖິງວ່າ ສະຫາຍ ຫວຽດນາມເອງ ກໍ່ປະເຊີນໜ້າກັບໄພທຳມະຊາດຮ້າຍແຮງເຊັ່ນກັນ ແຕ່ກໍ່ໄດ້ບິແບ່ງ ການຊ່ວຍເຫຼືອໃຫ້ແກ່ ສປປ ລາວ. ພ້ອມນີ້, ຝ່າຍຫວຽດນາມ ກໍ່ໄດ້ຂອບໃຈຝ່າຍລາວທີ່ໄດ້ສົ່ງຄວາມ ເຫັນໃຈ ແກ່ ສສ ຫວຽດນາມ ຕໍ່ເຫດລົມພະຍຸຈໍານວນຫຼາຍລູກ ພັດເຂົ້າພາກາງຂອງຫວຽດນາມ ໃນໄລຍະເດືອນສິງຫາ-ເດືອນພະຈິກ ຜ່ານມານີ້, ທີ່ໄດ້ສົ່ງຜົນກະທົບຕໍ່ຊີວິດ ແລະ ຊັບສິນຂອງປະຊາ ຊົນ ຫວຽດນາມຢ່າງຫຼວງຫຼາຍ ແລະ ຍັງໄດ້ຂອບໃຈຝ່າຍລາວ ທີ່ໄດ້ໃຫ້ການສະໜັບສະໜູນ ສສ ຫວຽດນາມ ໃນການເປັນປະທານອາຊຽນປີ 2020 ແລະ ເປັນສະມາຊິກບໍ່ຖາວອນຂອງ ສະພາ ຄວາມໝັ້ນຄົງ ສົກປີ 2020-2021 ເປັນຢ່າງດີ.

ໃນຕອນທ້າຍຂອງກອງປະຊຸມດັ່ງກ່າວ, ສອງລັດຖະມົນຕີກະຊວງການຕ່າງປະເທດ ໄດ້ຮ່ວມກັນລົງນາມຂໍ້ຕົກລົງວ່າດ້ວຍການຮ່ວມມື ລະຫວ່າງສອງກະຊວງການຕ່າງປະເທດ ລາວ ແລະ ຫວຽດນາມ ໄລຍະ 2021-2025 ແທນສະບັບເກົ່າ ທີ່ໄດ້ໝົດອາຍຸລົງໃນປີ 2020 ນີ້ ເພື່ອເສີມ ຂະຫຍາຍ ການຮ່ວມມື ລະຫວ່າງສອງກະຊວງໃຫ້ຂະຫຍາຍຕົວ ແລະ ສອດຄ່ອງກັບສະພາບການ ໃນໄລຍະໃໝ່.

ຄະນະສື່ມວນຊົນລາວນໍາໂດຍທ່ານ ໂພສີ ແກ້ວມະນີວົງ, ຜູ້ອຳນວຍການໃຫ່ຍວິທະຍຸກະຈາຍສຽງແຫ່ງຊາດລາວ ໄດ້ເຂົ້າຮ່ວມກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳລ້ານຊ້າງ-ແມ່ນໍ້າຂອງ 2020 ພາຍໃຕ້ຫົວຂໍ້ ເພີ່ມທະວີການຮ່ວມມື ເພື່ອຕໍ່ສູ້ກັບພະຍາດໂຄວິດ19 ແລະການຟື້ນຟູເສດຖະກິດ ຜ່ານລະບົບວີດີໂອທາງໄກ ໃນວັນທີ 24 ພະຈິກນີ້ ຢູ່ສຳນັກງານໜັງສືພິມພາສາຕ່າງປະເທດ, ນະຄອນຫລວງວຽງຈັນ

ໂດຍມີຄະນະຜູ້ແທນຈາກຈີນ, ກຳປູເຈຍ, ມຽນມາ, ໄທ ແລະ ຫວຽດນາມ ຊື່ງເປັນປະເທດສະມາຊິກຂອບຮ່ວມມືແມ່ນ້ຳຂອງ-ແມ່ນ້ຳລ້ານຊ້າງເຂົ້າຮ່ວມ ຊື່ງຈັດໂດຍການໜັງສືພິມປະຊາຊົນຈີນ ຫລື People’s Daily ຮ່ວມກັບກະຊວງຖະຫຼງຂ່າວມຽນມາ ແນໃສ່ເພື່ອແລກ ປ່ຽນບົດຮຽນ ແລະປະສົບການຮ່ວມກັນກ່ຽວກັບການໂຄສະນາເຜີຍແຜ່ຂໍ້ມູນຂ່າວສານໃນການປ້ອງກັນ ຄວບຄຸມ ແລະແກ້ໄຂບັນຫາການລະບາດຂອງພະຍາດໂຄວິດ19.

ໃນກອງປະຊຸມຄັ້ງນີ້ ທ່ານ ໂພສີ ແກ້ວມະນີວົງ, ຜູ້ອຳນວຍການໃຫ່ຍວິທະຍຸກະຈາຍສຽງແຫ່ງຊາດລາວ ໄດ້ຍົກໃຫ້ເຫັນເຖິງສະພາບ ລວມເຖິງມາດຕະການປ້ອງກັນ, ຄວບຄຸມ ແລະແກ້ໄຂການລະບາດຂອງພະຍາດໂຄວິດ19ຢູ່ລາວ ຊື່ງສື່ມວນຊົນລາວ ທັງສື່ຂອງລັດ ແລະເອກະຊົນໄດ້ກາຍເປັນກຳລັງແຮງຂັບເຄື່ອນທີ່ສຳຄັນ ເພື່ອນໍາເອົາແນວທາງນະໂຍບາຍ ແລະບັນດາມາດຕະການຂອງລັດຖະບານ ລວມທັງບົດຮຽນຈາກຕ່າງປະເທດໃນການຮັບມືກັບພະຍາດໂຄວິດ19 ເຜີຍແຜ່ໃຫ້ສັງຄົມໄດ້ຮັບຮູ້ຢ່າງກ້ວາງຂວາງ ແລະທັນການ ພ້ອມນີ້ສື່ມວນຊົນໄດ້ເປັນເຈົ້າການແກ້ໄຂຂໍ້ຂ້ອງໃຈ ແລະແກ້ຂ່າວບິດເບືອນຂໍ້ມູນ ຫລືຂ່າວປອມກ່ຽວກັບພະຍາດໂຄວິດ19ຢູ່ລາວໃຫ້ສັງຄົມຮັບຮູ້ຂໍ້ມູນທີ່ຖືກຕ້ອງກັບຄວາມເປັນຈິງ.

ໃນກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳລ້ານຊ້າງ-ແມ່ນໍ້າຂອງ 2020 ພາຍໃຕ້ຫົວຂໍ້ ເພີ່ມທະວີການຮ່ວມມື ເພື່ອຕໍ່ສູ້ກັບພະຍາດໂຄວິດ19 ແລະການຟື້ນຟູເສດຖະກິດຄັ້ງນີ້ ສື່ມວນຊົນລາວ ສະເໜີໃຫ້ 6 ປະເທດສະມາຊິກຂອບການຮ່ວມມືແມ່ນ້ຳລ້ານຊ້າງ-ແມ່ນໍ້າຂອງ ສືບຕໍ່ແລກ ປ່ຽນຂໍ້ມູນຂ່າວສານ, ບົດຮຽນ ແລະປະສົບການຕ່າງໆຮ່ວມກັນໃຫ້ຫລາຍຂື້ນກວ່າເກົ່າ ເພື່ອປະກອບ ສ່ວນສໍາຄັນ ເຮັດໃຫ້ 6 ປະເທດສາມາດຜ່ານຜ່າວິກິດທີ່ເກີດຂື້ນຈາກການລະບາດຂອງພະຍາດໂຄວິດ19ໃນຄັ້ງນີ້ໄປໄດ້ດ້ວຍດີ.

ນະຄອນຫຼວງວຽງຈັນ: ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແມ່ ແລະ ເດັກຮ່ວມກັບອົງການຢູນິເຊັບປະຈໍາລາວ ຈັດກອງປະຊຸມຄວາມໝາຍໝັ້ນຂອງບັນດາຮອງເຈົ້າແຂວງຕໍ່ການຈັດຕັ້ງປະຕິບັດສົນທິສັນຍາ ວ່າດ້ວຍສິດທິເດັກ ໃນຕອນເຊົ້າ ວັນທີ 23 ພະຈິກ 2020 ທີ່ຫໍປະຊຸມແຫ່ງຊາດ ຫຼັກ6 ນະຄອນຫຼວງວຽງຈັນ.

ໂດຍການເປັນປະທານຂອງທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈໍາສຳນັກງານນາຍົກລັດຖະມົນຕີ, ຮອງປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແມ່ ແລະເດັກ, ທ່ານ ນາງ ເພຍ ເຣເບລໂລ ບຣິດໂຕ ຜູ້ຕາງໜ້າອົງການຢູນິເຊັບປະຈໍາລາວ ມີບັນດາທ່ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຜູ້ຕາງໜ້າສະຫະພັນແມ່ຍິງແຂວງທັງເປັນຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແມ່ ແລະເດັກຂັ້ນແຂວງ ແລະ ນະຄອນຫຼວງວຽງຈັນ ພ້ອມດ້ວຍແຂກຮັບເຊີນເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ເພື່ອປຶກສາຫາລືການຈັດຕັ້ງປະຕິບັດຄວາມໝາຍໝັ້ນເພື່ອພັດທະນາເດັກນ້ອຍລາວບັນດາເຜົ່ານັບແຕ່ນີ້ຮອດປີ 2030 ແລະ ການບັນລຸເປົ້າໝາຍການພັດທະນາແບບຍືນຍົງ.

ໂອກາດນີ້, ທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈໍາສຳນັກງານນາຍົກລັດຖະມົນຕີ, ຮອງປະທານຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ ໄດ້ກ່າວເຖິງຂະບວນການສະເຫຼີມສະຫຼອງວັນສົນທິສັນຍາວ່າດ້ວຍສິດທິເດັກຄົບຮອບ 30 ປີໃນປີຜ່ານມາ ເຊິ່ງເປັນຂະບວນການໜຶ່ງທີ່ມີຄວາມສໍາຄັນ ໂດຍສະເພາະ ການນໍາຂັ້ນສູງຂອງລາວ, ຄະນະນໍາຂັ້ນກະຊວງ, ຂັ້ນແຂວງ, ຜູ້ວາງນະໂຍບາຍ, ພາກສ່ວນທຸລະກິດເອກະຊົນ, ຄູ່ຮ່ວມພັດທະນາ, ອົງການຈັດຕັ້ງສາກົນ, ອົງການຈັດຕັ້ງທາງສັງຄົມ ໄດ້ເຂົ້າຮ່ວມປະກອບສ່ວນ ແລະ ສະແດງຄວາມຮັບຜິດຊອບປົກປ້ອງສິດ, ຜົນປະໂຫຍດຂອງເດັກ ແລະ ກໍານົດທິດທາງການພັດທະນາເດັກລາວບັນດາເຜົ່າ ກໍຄື ການຫຼຸດຜ່ອນຄວາມທຸກຍາກຂອງເດັກໃນມິຕິຕ່າງໆໃຫ້ລຸດລົງໃນຂອບເຂດທົ່ວປະເທດ ດ້ວຍການໃຫ້ຄວາມໝາຍໝັ້ນ ແລະ ສ້າງເປັນແຜນດຳເນີນງານແຫ່ງຊາດ ເພື່ອແມ່ ແລະເດັກ ແລະ ການຈັດຕັ້ງປະຕິບັດບັນດາຄວາມໝາຍໝັ້ນຂອງສົນທິສັນຍາວ່າດ້ວຍສິດທິເດັກ ໂດຍການນຳໃຊ້ກາລະໂອກາດພັດທະນາທ່າແຮງເດັກນ້ອຍລາວບັນດາເຜົ່າ ຮອດປີ 2030 ແລະ ການບັນລຸເປົ້າໝາຍການພັດທະນາແບບຍືນຍົງ 1.2 ໃຫ້ປະກົດຜົນເປັນຈິງ.

ກອງປະຊຸມຄັ້ງນີ້, ຜູ້ເຂົ້າຮ່ວມຍັງໄດ້ພ້ອມກັນສົນທະນາ ແລກປ່ຽນບົດຮຽນເຊິ່ງກັນ ແລະ ກັນ ພ້ອມທັງໄດ້ທົບທວນ ແລະ ປະເມີນຜົນຮ່ວມກັນກັບບັນດາແຂວງໃນຂອບເຂດທົ່ວປະເທດ ພ້ອມກັນນັ້ນຍັງໄດ້ປຶກສາຫາລືກັນຈັດຕັ້ງຜັນຂະຫຍາຍເນື້ອໃນຄວາມໝາຍໝັ້ນຂອງບັນດາຮອງເຈົ້າແຂວງໃນການຈັດຕັ້ງປະຕິບັດສົນທິສັນຍາວ່າດ້ວຍສິດທິເດັກ ເພື່ອນຳໃຊ້ກາລະໂອກາດພັດທະນາທ່າແຮງຂອງເດັກນ້ອຍລາວບັນດາເຜົ່າ ຮອດປີ 2030 ການບັນລຸເປົ້າຫມາຍການພັດທະນາແບບຍືນຍົງ 1.2 ທີ່ໄດ້ລົງນາມ ແລະ ຮັບຮອງເອົາໃນປີຜ່ານມາ, ທົບທວນຜົນການວິໄຈຄວາມຂາດເຂີນແບບທັບຊ້ອນຫຼາຍມິຕິ ສໍາລັບເດັກຢູ່ ສປປ ລາວ ໂດຍສະເພາະ ບັນດາຕົວຊີ້ວັດ, ຄາດໝາຍ ແລະ ແຜນວຽກຈຸດສຸມ ເພື່ອແກ້ໄຂຄວາມທຸກຍາກຂອງເດັກໃນຫຼາຍມິຕິຢູ່ ໃນລາວ ຕິດພັນກັບການສ້າງແຜນດຳເນີນງານແຫ່ງຊາດ ເພື່ອແມ່ ແລະ ເດັກ ໄລຍະ 2021 ຫາ 2025 ໂດຍສະເພາະ ແຜນງານແກ້ໄຂສະພາບຄວາມທຸກຍາກຂອງເດັກນ້ອຍລາວ ທີ່ກ່ຽວຂ້ອງກັບດ້ານໂພຊະນາການ, ສຸຂະພາບ, ການປົກປ້ອງເດັກ, ນໍ້າສະອາດ, ສຸຂະອານາໄມ, ການສຶກສາ, ການພັດທະນາເດັກກ່ອນໄວຮຽນ, ຂໍ້ມູນຂ່າວສານ ແລະ ທີ່ຢູ່ອາໃສ.

ວັນທີ 19 ພະຈິກນີ້ ຢູ່ທີ່ສະໂມສອນແຂວງອຸດົມໄຊ 6ແຂວງພາກເຫນືອ ປະຊຸມທາບທາມເນື້ອໃນ ກອງປະຊຸມໃຫຍ່ ຄັ້ງທີ XI ຂອງພັກ ໂດຍການເປັນປະທານຂອງ ສະຫາຍ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວຫນ້າອົງການ ຕ້ານການ ສໍ້ລາດບັງຫລວງຂັ້ນສູນກາງ. ມີບັນດາສະຫາຍກຳມະການສູນກາງພັກ, ເລຂາ, ຮອງເລຂາພັກແຂວງ, ຄະນະພັກ ແລະ ພະນັກງານຫຼັກແຫຼ່ງ 6ແຂວງ ພາກເໜືອຄື: ແຂວງ ຜົ້ງສາລີ, ບໍ່ແກ້ວ, ຫລວງນ້ຳທາ, ໄຊຍະບູລີ, ຫລວງພະບາງ ແລະ ແຂວງອຸດົມໄຊ ເຂົ້າຮ່ວມ.

ສະຫາຍ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຄະນະເລຂາທິການ ສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ ກ່າວໃນກອງປະຊຸມວ່າ: ຈຸດປະສົງ ໃນການທາບທາມເນື້ອໃນກອງປະຊຸມໃຫຍ່ ຄັ້ງທີ XI ຂອງພັກ ຄັ້ງນີ້ ດ້ານຫນຶ່ງແມ່ນເຜີຍແຜ່, ເຊື່ອມຊຶມ ແລະ ສ້າງຄວາມເປັນເອກະພາບກັບທາງດ້ານທັດສະນະ, ທິດນໍາ, ແຜນນະໂຍບາຍໃຫຍ່ ທີ່ຈະກໍານົດອອກ ໃນແນວທາງການເມືອງ ແລະ ແນວທາງການຈັດຕັ້ງຂອງພັກເຮົາໃນຊຸມປີຕໍ່ໜ້າ ເຊິ່ງຈິດໃຈກວມລວມ ແມ່ນສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ເພື່ອນໍາພາຊີ້ນໍາແກ້ໄຂບັນຫາຕ່າງໆ ໃຫ້ມີ ປະສິດທິພາບ ແລະ ປະສິດທິຜົນ. ສ່ວນອີກດ້ານໜຶ່ງ ແມ່ນເພື່ອຮັບຟັງຄໍາຄິດຄໍາເຫັນຂອງບັນດາ, ພະນັກງານ ຫຼັກແຫຼ່ງຂອງກະຊວງແລະອົງການ ໄປຄຽງຄູ່ກັບບັນດາຄະນະພັກ ທ້ອງຖິ່ນເພື່ອເປັນພື້ນຖານສໍາຄັນໃຫ້ແກ່ ການສືບຕໍ່ປັບປຸງຮ່າງເອກະສານຂອງກອງປະຊຸມໃຫ້ມີເນື້ອໃນ ເລິກເຊິ່ງ, ຄົບຖ້ວນ, ແທດເຫມາະກັບຕົວຈິງ ແລະ ມີຄວາມອາດສາມາດຈັດຕັ້ງປະຕິບັດໃຫ້ເປັນຈິງ.

ກອງປະຊຸມ ຜູ້ແທນເຂົ້າຮ່ວມໄດ້ຮັບຟັງຮ່າງລາຍງານການເມືອງ, ແຜນພັດທະນາເສດຖະກິດ- ສັງຄົມ, ກົດລະບຽບພັກແລະອື່ນໆ. ຈາກນັ້ນ ຈະໄດ້ພ້ອມກັນຄົ້ນຄ້ວາ, ປະກອບຄຳຄິດຄຳເຫັນຕໍ່ເນື້ອໃນ ຮ່າງເອກະສານດັ່ງກ່າວ ກໍ່ຄືບັນດາບັນຫາທີ່ຕັ້ງຂຶ້ນ ແນໃສ່ປະກອບສ່ວນສໍາຄັນເຮັດໃຫ້ກອງປະຊຸມ ໃຫຍ່ຄັ້ງທີ XI ຂອງພັກທີ່ຈະດໍາເນີນໃນຕໍ່ໜ້າ ໃຫ້ກາຍເປັນກອງປະຊຸມແຫ່ງການສັງລວມໝາກຜົນ ດ້ານທິດສະດີ ແລະ ພຶດຕິກໍາຂອງພັກເຮົາແລະໄດ້ຮັບຜົນສໍາເລັດຢ່າງຈົບງາມ ກອງປະຊຸມຈະດຳເນີນເປັນເວລາ 2ວັນ ຈິ່ງສຳເລັດ.

ຂ່າວ:ໄມພອນ, ກວດແກ້ໂດຍ: ອ່ຽງຄຳ ວິລະສັກ

ສະພາບການຈັດຕັ້ງປະຕິບັດແຜນງົບປະມານແຫ່ງລັດຢູ່ແຂວງເຊກອງໃນໄລຍະ 10 ເດືອນຜ່ານມາ ເຫັນວ່າຍັງມີຫຼາຍດ້ານພົບຄວາມຫຍຸ້ງຍາກ ແລະທ້າທາຍສູງເປັນຕົ້ນແມ່ນບັນຫາສະພາບຟືດເຄືອງທາງດ້ານການເງິນງົບປະມານ, ໄພພິບັດຈາກທໍາມະຊາດ ແລະບັນຫາການລະບາດຂອງພະຍາດໂຄວິດ-19.

ຕໍ່ກັບສະພາບດັ່ງກ່າວ ຄະນະພັກ-ການນໍາຂອງແຂວງ ກໍຄື #ພະແນກການເງິນແຂວງເຊກອງໄດ້ເອົາໃຈໃສ່ຊຸກຍູ້ຢ່າງໃກ້ຊິດຕິດແທດ,ຈັດຕັ້ງຜັນຂະຫຍາຍບັນດານິຕິກໍາ, ຂໍ້ກໍານົດ ແລະລະບຽບການຕ່າງໆ, ພ້ອມທັງ ກໍານົດລະບຽບຫຼັກການ, ມາດຕະການກ່ຽວກັບການຕິດຕາມກວດກາການຈັດເກັບລາຍຮັບ ແລະຄຸ້ມຄອງລາຍຈ່າຍໃຫ້ມີຄວາມໜັກແໜ້ນ, ເຂັ້ມແຂງ, ຮັດກຸ່ມ, ມີປະສິດທິພາບ ແລະປະສິດທິຜົນ ເພື່ອແນໃສ່ຮັບປະກັນຄວາມໝັ້ນທ່ຽງທາງດ້ານການເງິນງົບປະມານໄດ້ຢ່າງຖ່ວງທັນ ແລະທົ່ວເຖິງ.

ທ່ານ ວົງມະນີ ແກ້ວນະຄອນ ຮອງຫົວໜ້າພະແນກການເງິນແຂວງເຊກອງໃຫ້ຮູ້ວ່າ:ຜ່ານໄປ 10 ເດືອນປີ 2020 ການຈັດຕັ້ງປະຕິບັດແຜນງົບປະມານແຫ່ງລັດ ໂດຍສະເພາະການຈັດເກັບລາຍຮັບ (ພູດຂອງແຂວງ) ປະຕິບັດໄດ້ພຽງ 36,47 ຕື້ກີບເທົ່າກັບ 54% ຂອງແຜນດັດແກ້, ທຽບໃສ່ໄລຍະດຽວຂອງປີຜ່ານມາຫຼຸດລົງ 30% ໃນນັ້ນມີລາຍຮັບຈາກສ່ວຍສາອາກອນ 31,25 ຕື້ກີບເທົ່າກັບ 53% ແລະລາຍຮັບຈາກຊັບສິນ 5,21 ຕື້ກີບເທົ່າກັບ 64% ຂອງແຜນດັດແກ້.

ຂະນະທີ່ດ້ານລາຍຈ່າຍ 10 ເດືອນປະຕິບັດໄດ້ 231,62 ຕື້ກີບເທົ່າກັບ 75% ຂອງແຜນດັດແກ້ ໃນນີ້ຂັ້ນແຂວງປະຕິບັດໄດ້ 141,29 ຕື້ກີບເທົ່າກັບ 72% ແລະເມືອງ 4 ຕົວເມືອງ 90,06 ຕື້ກີບເທົ່າກັບ 70% ປະກອບມີການຈ່າຍເງິນເດືອນ-ເງິນອຸດໜູນ, ເງິນນະໂຍບາຍ, ເງິນບໍລິຫານ-ວິຊາການ, ເງິນດັດສົມ,ເງິນແຮແຂວງ ແລະຈ່າຍເງິນຊື້ຊັບສົມບັດຄົງທີ່ຮັບໃຊ້ບໍລິຫານ.

ໂດຍລວມ ຄາດຄະເນການເກັບລາຍຮັບເຂົ້າງົບປະມານຢູ່ແຂວງເຊກອງໃນປີ 2020 ຈະປະຕິບັດໄດ້ພຽງແຕ່ 90% ຂອງແຜນດັດແກ້, ທັງນີ້ ກໍເນື່ອງຈາກຜ່ານມາສະພາບການເງິນງົບປະມານຂອງປະເທດເຮົາບໍ່ຄ່ອຍ້ອື້ອຍອໍານວຍເທົ່າທີ່ຄວນ,ສະເພາະພາຍໃນແຂວງເຊກອງ ຍັງພົບຂໍ້ຫຍຸ້ງຍາກຫຼາຍປະການເປັນຕົ້ນສະພາບໄພພິບັດຈາກທໍາມະຊາດ ແລະການລະບາດຂອງພະຍາດໂຄວິດ-19 ທີ່ມີຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນ ກໍຄືຜູ້ປະກອບການທຸລະກິດ ເຮັດໃຫ້ການເກັບພາສີ-ອາກອນ ແລະລາຍຮັບອື່ນໆພົບຄວາມຫຍຸ້ງຍາກ. ທ່ານ ວົງມະນີ ແກ້ວນະຄອນ ກ່າວ.

ຂ່າວ : ສັນຍາ Medialaos ຂ່າວເຊກອງ

ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໄດ້ອັດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນມາເປັນເວລາ 16 ວັນ, ແຕ່ວັນທີ 27 ຕຸລາ – 17 ພະຈິກ 2020, ໂດຍການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ເຊິ່ງໃຫ້ກຽດເຂົ້າຮ່ວມຂອງ ທ່ານ ບຸນຍັງ ວໍລະຈິດ ປະທານປະເທດ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ພ້ອມດ້ວຍການນຳຂັ້ນສູງຂອງພັກ-ລັດ, ຄະນະລັດຖະບານ, ອົງການຈັດຕັ້ງພັກ-ລັດ ແລະ ແຂກຖືກເຊີນເຂົ້າຮ່ວມ ຢ່າງພ້ອມພຽງ.

ກອງປະຊຸມຄັ້ງນີ້, ໄດ້ພິຈາລະນາຮັບຮອງເອົາບັນຫາສຳຄັນພື້ນຖານຂອງປະເທດຊາດ ໂດຍໄດ້ອອກເປັນມະຕິກອງປະຊຸມ ຈຳນວນ 9 ສະບັບ ຄື: ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາການແຕ່ງຕັ້ງ ທ່ານ ຄໍາເຈນ ວົງໂພສີ ເປັນລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ; ການຮັບຮອງເອົາການແຕ່ງຕັ້ງ ທ່ານ ທອງຈັນ ມະນີໄຊ ເປັນລັດຖະມົນຕີ ກະຊວງພາຍໃນ; ການຮັບຮອງເອົາແຜນຜັງລວມຕົວເມືອງນະຄອນຫລວງວຽງຈັນ ສະບັບທີ III; ການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2020, ທິດທາງແຜນການ ປະຈໍາປີ 2021; ການຮັບຮອງເອົາບົດລາຍງານ ຂອງລັດຖະບານກ່ຽວກັບການສະຫລຸບ ການຈັດຕັ້ງປະຕິບັດແຜນງົບປະມານແຫ່ງລັດ 9 ເດືອນ, ຄາດຄະເນປະຕິບັດໝົດປີ 2020 ແລະ ແຜນການ ປະຈໍາປີ 2021; ການຮັບຮອງເອົາບົດລາຍງານຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2019 ແລະ ບົດລາຍງານຜົນການກວດກາຕາມຜົນການກວດສອບປີ 2018, ສົກປີ 2013-2014 ແລະ 2015-2016; ການຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນ ການເຄື່ອນໄຫວວຽກງານ ປະຈໍາປີ 2020 ແລະ ທິດທາງແຜນການ ປະຈໍາປີ 2021; ການຮັບຮອງເອົາບົດສະຫລຸບການເຄື່ອນໄຫວວຽກງານ ຂອງອົງການກວດສອບແຫ່ງລັດ ປະຈໍາປີ 2020 ແລະ ທິດທາງແຜນການເຄື່ອນໄຫວປະຈໍາປີ 2021 ແລະ ການຮັບຮອງເອົາບົດລາຍງານການຈັດຕັ້ງປະຕິບັດແຜນ ການເຄື່ອນໄຫວວຽກງານ 5 ປີ (2016-2020) ແລະ ປີ 2020 ຂອງສະພາແຫ່ງຊາດ ຊຸດທີ VIII ແລະ ຄາດຄະເນແຜນການ ປະຈໍາປີ 2021.

ກອງປະຊຸມຄັ້ງນີ້, ຍັງໄດ້ພິຈາລະນາຮັບຮອງເອົາກົດໝາຍ ຈຳນວນ 5 ສະບັບ, ໃນນັ້ນກົດໝາຍສ້າງໃໝ່ 4 ສະບັບ ແລະ ປັບປຸງ 1 ສະບັບ ຄື: ກົດໝາຍວ່າດ້ວຍຊັ້ນນັກການທູດ, ກົດໝາຍວ່າດ້ວຍຊາວໜຸ່ມລາວ, ກົດໝາຍວ່າດ້ວຍການສຶກສາຊັ້ນສູງ, ກົດໝາຍວ່າດ້ວຍການຮ່ວມມື ລະຫວ່າງປະເທດທາງອາຍາ ແລະ ກົດໝາຍວ່າດ້ວຍການກວດສອບແຫ່ງລັດ ສະບັບປັບປຸງ.

ຢູ່ໃນການດຳເນີນກອງປະຊຸມຄັ້ງນີ້, ສະພາແຫ່ງຊາດໄດ້ສະເໜີ ໃຫ້ 4 ພາກສ່ວນຂຶ້ນຊີ້ແຈງຕໍ່ຄຳຊັກຖາມກ່ຽວກັບບັນຫາທີ່ພົ້ນເດັ່ນຂອງສັງຄົມ, ຊຶ່ງສະພາແຫ່ງຊາດ ແລະ ສະມາຊິກສະພາແຫ່ງຊາດໄດ້ຍົກຂຶ້ນຢູ່ໃນກອງປະຊຸມປະກອບ ມີ: ກະຊວງການເງິນ, ກະຊວງແຜນການ ແລະ ການລົງທຶນ, ອົງການກວດສອບແຫ່ງລັດ ແລະ ອົງການກວດກາລັດຖະບານ.

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ໃນໄລຍະດຳເນີນກອງປະຊຸມ ໄດ້ມີປະຊາຊົນບັນດາເຜົ່າ ສົ່ງຄຳຄິດຄຳເຫັນຜ່ານໂທລະສັນສາຍດ່ວນ (156) ຫລາຍກວ່າ 536 ສາຍ, ເຊິ່ງພົວພັນເຖິງການຄຸ້ມຄອງບໍລິຫານລັດ, ການພັດທະນາເສດຖະກິດ-ສັງຄົມ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ. ຕໍ່ກັບຄໍາຄິດເຫັນຂອງປະຊາຊົນທີ່ສົ່ງມາທາງໂທ ລະສັບສາຍດ່ວນດັ່ງກ່າວ ກອງເລຂາກອງປະຊຸມ ຈະໄດ້ສັງລວມ ແລະ ມອບໃຫ້ກຳມາທິການທີ່ກ່ຽວຂ້ອງ ເພື່ອປະສານສົມທົບພາກສ່ວນກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງສອດຄ່ອງຕາມກົດໝາຍ ແລະ ລະ ບຽບການ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດ ປິດກອງປະຊຸມ, ເຊິ່ງຍົກໃຫ້ເຫັນບາງຕອນສຳຄັນ ວ່າ: ກອງປະຊຸມ ຕີລາຄາສູງຕໍ່ຄວາມພະຍາຍາມຂອງລັດຖະບານ ທີ່ໄດ້ສູ້ຊົນຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ໃນສະພາບແວດລ້ອມສາກົນ ແລະ ພາກພື້ນມີຄວາມຫຍຸ້ງຍາກ ແລະ ມີສິ່ງທ້າຍທາຍຫລາຍປະການ ເຮັດໃຫ້ການຈັດຕັ້ງປະຕິບັດຫລາຍຄາດໝາຍບັນລຸຕາມແຜນທີ່ກຳນົດໄວ້.

ໃນກອງປະຊຸມຄັ້ງນີ້, ນອກຈາກຈະພິຈາລະນາຮັບຮອງເອົາບັນຫາພື້ນຖານທີ່ສຳຄັນຂອງຊາດ ຍັງໄດ້ຮັບຟັງ ແລະ ປະກອບຄຳເຫັນເບື້ອງຕົ້ນໃສ່ຮ່າງແຜນພັດທະນາເສດ ຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ຮ່າງແຜນການເຄື່ອນໄຫວວຽກງານຂອງສະພາແຫ່ງຊາດ 5 ປີ (2021-2025).

ພ້ອມກັນນັ້ນ, ກໍໄດ້ສະເໜີມາຍັງລັດຖະບານ ແລະ ຄະນະປະຈຳສະພາແຫ່ງຊາດ ຈົ່ງໄດ້ຊີ້ນຳກະຊວງ ແລະ ກຳມາ ທິການກ່ຽວຂ້ອງ ນຳເອົາຄວາມຄິດເຫັນຂອງສະມາຊິກສະພາແຫ່ງຊາດ ໄປປັບປຸງເຂົ້າແຜນດັ່ງກ່າວ ແລະ ສືບຕໍ່ຄົ້ນຄວ້າໃຫ້ເລິກເຊິ່ງຕໍ່ແຕ່ລະບັນຫາ ເພື່ອກຳນົດບັນດາຄາດໝາຍ, ທິດທາງ, ວຽກງານຈຸດສຸມໃນແຕ່ລະດ້ານໃຫ້ມີຄວາມຊັດເຈນ ແລະ ສອດຄ່ອງກັບຄວາມຮຽກຮ້ອງຕ້ອງ ການໃນການພັດທະນາເສດຖະກິດ-ສັງຄົມ, ຄວາມອາດສາມາດຕົວຈິງທາງດ້ານທຶນຮອນ ໃນໄລຍະ 5 ປີຕໍ່ໜ້າ ເພື່ອສາມາດນຳໄປພິຈາລະນາ ແລະ ຮັບຮອງເອົາຢູ່ໃນກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ທີ່ຈະມາເຖິງນີ້.

ທ່ານ ນາງ ປານີ ຢາທໍ່ຕູ້ ໂດຍຕາງໜ້າໃຫ້ຄະນະປະຈຳສະພາແຫ່ງຊາດ, ເນື່ອງຈາກວ່າສະພາແຫ່ງຊາດຊຸດທີ VIII ໃກ້ຈະໝົດວາລະໄປອີກບໍ່ເທົ່າໃດເດືອນຂ້າງໜ້ານີ້, ສະແດງຄວາມຂອບໃຈ ແລະ ຍ້ອງຍໍສັນລະເສີນ ບັນດາທ່ານສະມາຊິກສະພາແຫ່ງຊາດ ທີ່ໄດ້ສຳເລັດໜ້າທີ່ອັນມີກຽດສະຫງ່າຂອງຕົນ ແລະ ຫວັງຢ່າງຍິ່ງວ່າ ສະມາຊິກສະພາແຫ່ງຊາດແຕ່ລະທ່ານ ຈະມີຄວາມຊົງຈຳທີ່ດີຕະຫລອດໄລຍະການຮ່ວມເຄື່ອນໄຫວວຽກງານໃນສະພາແຫ່ງຊາດຊຸດນີ້ ແລະ ຈະສືບຕໍ່ປະກອບສ່ວນຄວາມຮູ້ຄວາມສາມາດຂອງຕົນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຄວາມສົມບູນພູນສຸກຂອງປະຊາຊົນລາວບັນດາເຜົ່າ ແລະ ຄວາມຈະເລີນຮຸ່ງເຮືອງວັດທະນາຂອງປະເທດຊາດລາວເຮົາ. ພ້ອມກັນນັ້ນ, ກໍໄດ້ຮຽກຮ້ອງມາຍັງພະນັກງານ, ສະມາຊິກພັກ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າ ແລະ ທຸກພາກສ່ວນເສດຖະກິດ ທັງພາຍໃນ ແລະ ຕ່າງປະເທດ ຈົ່ງໄດ້ເຊື່ອມຊຶມ ແລະ ຈັດຕັ້ງຜັນຂະຫຍາຍ ບັນດາມະຕິ ແລະ ກົດໝາຍ ທີ່ໄດ້ຮັບຮອງໃນກອງປະຊຸມຄັ້ງນີ້ ໃຫ້ເປັນແຜນວຽກອັນລະອຽດຂອງຕົນ, ພ້ອມທັງ ອອກແຮງແຂ່ງຂັນສ້າງຜົນງານ ເພື່ອຂ່ຳນັບຮັບຕ້ອນວັນບຸນສຳຄັນຂອງຊາດ ກໍຄື ສ້າງຂະບວນການຕ້ອນຮັບກອງປະຊຸມໃຫຍ່ ຜູ້ແທນທົ່ວປະເທດຂອງພັກ ຄັ້ງທີ XI ທີ່ຈະໄຂຂຶ້ນໃນ ມໍ່ໆນີ້.

Lao National Radio

ກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງແບບທາງໄກ ອັດລົງດ້ວຍຜົນສຳເລັດອັນຈົບງາມໃນຕອນບ່າຍ ວັນທີ 15 ພະຈິກ 2020 ນີ້ ພາຍຫລັງດຳເນີນມາເປັນເວລາ 4 ວັນ ໂດຍການເປັນປະທານຂອງທ່ານ ຫງວຽນ ຊວນ ຟຸກ, ນາຍົກລັດຖະມົນຕີຫວຽດນາມ ໃນຖານະປະທານອາຊຽນ 2020 ຊື່ງທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ນໍາພາຄະນະຜູ້ແທນລາວເຂົ້າຮ່ວມ.

ຜູ້ນໍາປະເທດສະມາຊິກອາຊຽນກໍ່ຄືຄູ່ເຈລະຈາໄດ້ຮັບຮອງເອົາເອກະສານສໍາຄັນຫລາຍກວ່າ 80 ສະບັບ ຖືເປັນການຮັບຮອງເອົາເອກະສານຫລາຍທີ່ສຸດນັບແຕ່ມີກອງປະຊຸມສຸດຍອດອາຊຽນເປັນຕົ້ນມາ ໂດຍມີ 16 ກອງປະຊຸມລະດັບສຸດຍອດ ໃນນັ້ນມີກອງປະຊຸມລະດັບສຸດຍອດໃນຂອບອາຊຽນ 14 ກອງປະຊຸມ ແລະ ໃນຂອບແມ່ນ້ຳຂອງ 2 ກອງປະຊຸມ.

ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຈ້ງໃຫ້ຮູ້ໃນໂອກາດຖະແຫລງຂ່າວກ່ຽວກັບຜົນສຳເລັດຂອງກອງປະຊຸມຄັ້ງນີ້ວ່າ:

“ຕະຫລອດໄລຍະການດຳເນີນກອງປະຊຸມຜູ້ນໍາປະເທດ ສະມາຊິກອາຊຽນ ໄດ້ປຶກສາຫາລືຫລາຍບັນຫາສຳຄັນ ເປັນຕົ້ນການຈັດຕັ້ງປະຕິບັດແຜນແມ່ບົດການສ້າງປະຊາຄົມອາຊຽນ ໂດຍສະເພາະຄວາມຄືບໜ້າການຈັດຕັ້ງປະຕິບັດໄລຍະ 1 ປີຜ່ານມາ ພາຍໃຕ້ການເປັນປະທານອາຊຽນຂອງຫວຽດນາມ ນອກນີ້ຜູ້ນໍາອາຊຽນ ແລະປະເທດຄູ່ເຈລະຈາຍັງໄດ້ທົບທວນຄືນການພົວພັນຮ່ວມມືໃນໄລຍະຜ່ານມາ, ລວມເຖິງທິດທາງການເຄື່ອນໄຫວວຽກງານໃນຕໍ່ໜ້າ ໂດຍລວມແລ້ວບັນຫາທີ່ພົ້ນເດັ່ນແລະຍົກຂຶ້ນມາປຶກສາຫາລືແມ່ນ: ການຮັບມືກັບພະຍາດໂຄວິດ19 ,ການຟື້ນຟູເສດຖະກິດຫຼັງຈາກໂຄວິດ19 ຊື່ງອາຊຽນໄດ້ສ້າງຕັ້ງກອງທຶນອາຊຽນ ເພື່ອຮັບມືກັບການແຜ່ລະບາດຂອງພະ ຍາດໂຄວິດ19, ຜູ້ນໍາອາຊຽນໄດ້ຕົກລົງ ແລະເປັນເອກະພາບກັນສ້າງຕັ້ງຄັງແຮຢາປົວພະຍາດ ແລະອຸປະກອນການແພດຕ່າງໆ, ສ້າງຕັ້ງສູນສາທາລະນະສຸກ ສຸກເສີນ ແລະຕ້ານພະຍາດລະບາດຂອງພາກພື້ນອາຊຽນ.”

ມາຮອດປະຈຸບັນມີປະເທດຄູ່ຮ່ວມເຈລະຈາໄດ້ສະໜອງທືນຈໍານວນໜື່ງ ເພື່ອເຮັດໃຫ້ສູນດັ່ງກ່າວສາມາດຈັດຕັ້ງປະຕິບັດວຽກງານໄດ້ ນອກຈາກນີ້ຍັງໄດ້ຕົກລົງ ແລະຮັບຮອງເອົາຫລາຍບັນຫາສຳຄັນຕື່ມອີກ.

ລັດຖະມົນຕີກະຊວງການຕ່າງປະເທດ ຊີ້ໃຫ້ເຫັນຕື່ມວ່າ: ໃນກອງປະຊຸມຄັ້ງນີ້ຜູ້ນໍາ 10 ປະເທດສະມາຊິກອາຊຽນ ແລະ 5 ປະເທດຄູ່ຮ່ວມມືຄື: ຈີນ, ຍີ່ປຸ່ນ, ສ.ເກົາຫລີ, ອົດສຕາລີ ແລະນູແວນເຊລັງ ໄດ້ລົງນາມໃນສັນຍາການຮ່ວມມືເສດຖະກິດພາກພື້ນແບບຮອບດ້ານຫຼືອາເຊັບ ຊື່ງເປັນຂອບສັນຍາເສດຖະກິດທີ່ໃຫຍ່ທີ່ສຸດໃນໂລກກວມເອົາເກືອບ 1ສ່ວນ3 ຂອງຍອດຜະລິກຕະພັນພາຍໃນຫລື GDP ໂລກ, ສັນຍາອາເຊັບຈະມີຜົນສັກ ສິດເມື່ອ 6 ປະເທດສະມາຊິກອາຊຽນ ແລະ 3 ປະເທດຄູ່ເຈ ລະຈາ ໄດ້ໃຫ້ສັດຕະຍາບັນແກ່ສັນຍາດັ່ງກ່າວ.

ໃນພິທີອັດກອງປະຊຸມສຸດຍອດອາຊຽນຄັ້ງທີ 37 ຢ່າງເປັນທາງການຍັງໄດ້ມີພິທີມອບ-ຮັບການເປັນປະທານອາຊຽນໃຫ້ບຣູໄນດາລູຊາລຳສຳລັບປີ 2021 ພາຍໃຕ້ຄຳຂັວນ ພວກເຮົາຫວ່ງໄຍ ພວກເຮົາກຽມ ພ້ອມ ພວກເຮົາພ້ອມກັນຈະເລີນ.

ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະການຄ້່າ ໃຫ້ສໍາພາດຕໍ່ສື່ມວນຊົນ ພາຍຫລັງເຂົ້າຮ່ວມກອງປະຊຸມວ່າ:

“ຈາກການລົງນາມເອກສານຮ່ວມກັນ ໃນຄັ້ງນີ້ ຈະເຮັດໃຫ້ເສດຖະກິດຂອງລາວ ກໍຄືຂອງປະເທດໃນພາກພື້ນ ແລະໃນໂລກທີ່ຖືກຜົນກະທົບຢ່າງຮ້າຍແຮງຈາກການລະບາດຂອງພະຍາດໂຄວິດ19, ຈະໄດ້ຮ່ວມກັນສືບຕໍ່ການຄ້າ ແລະການລົງທຶນ ້ ເຊິ່ງຈະເຮັດໃຫ້ພວກເຮົາສາມາດຊຸກຍູ້ການຄ້າ ແລະການລົງທຶນເພີ່ມຂຶ້ນ ທັງຮ່ວມກັນແກ້ໄຂ ຜົນສະທ້ອນຂອງພະຍາດໂຄວິດ19, ໂດຍສຸມໃສ່ການອໍານວຍຄວາມສະດວກດ້ານການຄ້າ ໂດຍສະເພາະ ການສົ່ງອອກ ແລະການນໍາເຂົ້າຕາມດ່ານຕ່າງໆ ບໍ່ເກືອດຫ້າມການເຄື່ອນຍ້າຍສິນຄ້າທີ່ມີຄວາມຈໍາເປັນຕໍ່ການດໍາລົງຊີວິດຂອງປະຊາຊົນ ໃນໄລຍະທີ່ມີຄວາມຫຍຸ້ງຍາກຍ້ອນພະຍາດໂຄວິດ19.”

Lao National Radio

ອາຄານຮຽນ ປະຖົມສົມບູນຫຼັງໃໝ່ ບ້ານແຊລະບຳ ເມືອງຊະນະສົມບູນ ແຂວງຈຳປາສັກ ທີ່ໄດ້ຮັບທຶນກໍ ສ້າງຈາກບໍລິສັດໄຟຟ້າລາວມະຫາຊົນ 1 ຕື້ກ່ວາກີບເຊິ່ງໄດ້ລົງມືກໍ່ສ້າງ 5 ເດືອນ ປັດຈຸບັນນີ້ສ້າງສຳເລັດແລ້ວ100%

ວັນນທີ 11 ພະຈິກ 2020 ຢູ່ທີ່ ໂຮງຮຽນ ປະຖົມສົມບູນຫຼັງໃໝ່ #ບ້ານແຊລະບຳ #ເມືອງຊະນະສົມບູນ #ແຂວງຈຳປາສັກ ໄດ້ຈັດພິທີມອບ-ຮັບອາຄານຮຽນປະຖົມສົມບູນຫຼັງໃໝ່ ບ້ານແຊລະບຳ ເມືອງຊະນະສົມບູນ ໂດຍເປັນກຽດກ່າວມອບຂອງທ່ານ ທອງເພັດ ດ້ວງເງິນ ຮອງຜູ້ອຳນວຍການໃຫຍ່ບໍລິສັດຜະລິດໄຟຟ້າລາວມະຫາຊົນ ກ່າວຮັບ ໂດຍ ທ່ານ ພູວົງ ອະໄພ ຮອງຫົວໜ້າພະແນກສຶກສາທິການ ແລະ ກິລາແຂວງຈຳປາສັກ ມອບຕໍ່ໃຫ້ໄປຍັງຫ້ອງການສຶກສາທິການ ແລະ ກິລາເມືອງຊະນະສົມບູນ ແລະ ຜູ້ອຳນວຍການໂຮງຮຽນ,ບ້ານເປັນຜູ້ນຳໃຊ້ ຄຸ້ມຄອງ,ປົກປັກຮັກສາ ນຳໃຊ້ໃຫ້ໄດ້ດົນ ສ້າງໃຫ້ເກີດປະໂຫຍດແກ່ລູກຫຼານ ໂດຍໃຫ້ກຽດ ເຂົ້າຮ່ວມຂອງທ່ານ ຂາວພອນ ສີຍາທະຈັນ ຮອງເລຂາພັກເມືອງຊະນະສົມບູນ ແຂວງຈຳປາສັກ ທ່ານ ເສີມສິດທິ ສຸມົນທາ ຮອງຫົວໜ້າກົມທຸລະກິດພະລັງງານ ກະຊວງພະລັງງານບໍແຮ່ ມີອຳນາດການປົກຄອງບ້ານເຖົ້າແກ່ແນວໂຮມພະນັກງານຄູ-ອາຈານ ແລະ ແຂກຖືກເຊີນ ເຂົ້າຮ່ວມເປັນສັກຂີພິຍານ.

ອາຄານຮຽນດັ່ງກ່າວມີຂະໜາດ 7×8 ເປັນອາຄານຮຽນຊັ້ນດຽວມີທັງໝົດ 05 ຫ້ອງຮຽນ 1 ຫ້ອງການຄູ ອາຄານມີລະບຽງບ່ອນນັ່ງຫຼີ້ນ, ປູພື້ນເບຕົງເສີມເຫຼັກ,ຝາກໍ່ດ້ວຍດິນຈີ່ ໂຄງຫຼັງຄາເຮັດດ້ວຍເຫຼັກ,ມຸ້ງດ້ວຍກະເບື້ອງ ສີແດງ,ຕົວອາຄານທາສີງາຊ້າງ,ອ້ອມຮອບອາຄານຮຽນເທເບຕົງກັນເປື້ອນ ພາຍໃນໂຮງຮຽນໄດ້ປະກອບເຄື່ອງເຝີນີເຈີ ແລະ ເຄື່ອງໄຟຟ້າເຊັ່ນ: ໂຕະ,ຕັ່ງ,ກະດານດຳຄົບຊຸດ,ພັດລົມ,ດອກໄຟ ແລະ ດືງໄຟຟ້າເຂົ້າໂຮງຮຽນ ແລະ ສ້າງຫ້ອງນ້ຳ(ຊາຍ-ຍິງ)ໜຶ່ງຫຼັງ 3 ຫ້ອງ,ໄດ້ສ້າງແທ່ນຕິດຕັ້ງເສົາທຸງ,ພ້ອມຕິດທຸງຊາດ,ເຈາະນໍ້າບາດານປະກອບແທ້ງໃສ່ນໍ້າ ເຊິ່ງເລີ່ມຕົ້ນກໍ່ສ້າງແຕ່ ວັນທີ 26 ພືດສະພາ 2020 ແລະ ສຳເລັດ ວັນທີ 20 ຕຸລາ 2020 ລວມມູນຄ່າການກໍ່ສ້າງ 1.129 717 997 ກີບ (ໜຶ່ງຕື້ຮ້ອຍຊາວເກົ້າລ້ານກ່ວາກີບ) ໂດຍບໍລິສັດເຮັ່ງພູວັນກໍ່ສ້າງຈຳກັດເປັນຜູ້ຮັບເໝົາ.

ໃນໂອກາດດັ່ງກ່າວທ່ານຮອງເລຂາພັກເມືອງຊະນະສົມບູນ ກໍ່ໄດ້ມອບໃບກຽດຕິຄຸນ ໃຫ້ແກ່ບໍລິສັດຜະລິດໄຟຟ້າລາວມະຫາຊົນ ເພື່ອເປັນການຍ້ອງຍໍຊົມເຊີຍໃນການປະກອບສ່ວນຊ່ວຍສ້າງອາຄານຮຽນຫຼັງໃໝ່ໃຫ້ແກ່ລູກຫຼານ ໄດ້ມີອາຄານຮຽນທີ່ຖາວອນ ແລະ ສວຍງາມ.

ສື່ມວນຊົນແຂວງຈຳປາສັກ: ພອນ ມ້າວຄຳຜິວ