ກອງປະຊຸມທາງໄກ ຄະນະກໍາມະການອໍານວຍຄວາມສະດວກທາງດ້ານການຄ້າ ທົ່ວປະເທດ ຄັ້ງທີ 3 ຈັດຂຶ້ນຕອນເຊົ້າວັນທີ 17 ທັນວາ 2020 ທີ່ກະຊວງອຸດສາຫະກໍາ ແລະ ການຄ້າ ພາຍໃຕ້ການເປັນປະທານ ຂອງທ່ານສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ຫົວໜ້າຄະນະກໍາມະການຊີ້ນໍາລວມອໍານວຍຄວາມສະດວກດ້ານການຄ້າຂັ້ນສູນກາງ , ມີທ່ານນາງເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ຮອງຫົວໜ້າຄະນະກໍາມະການຊີ້ນໍາລວມອໍານວຍຄວາມສະດວກດ້ານການຄ້າຂັ້ນສູນກາງ, ພ້ອມຮອງເຈົ້າແຂວງ, ຮອງເຈົ້າຄອງນະຄອນຫລວງວຽງຈັນ ຜູ້ຊີ້ນໍາວຽກເສດຖະກິດ ແລະພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ລາຍງານຄວາມຄືບໜ້າຂອງການຈັດຕັ້ງປະຕິບັດວຽກງານອຳນວຍຄວາມສະດວກທາງດ້ານການຄ້າ ກໍຄືການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 05 ປີຄັ້ງທີ 8 ວ່າ: ໂດຍລວມແລ້ວ, ແຜນດໍາເນີນງານວຽກງານອໍານວຍຄວາມສະດວກທາງດ້ານການຄ້າ ປີ 2017-2022 ແມ່ນສ້າງຂຶ້ນເພື່ອຈັດຕັ້ງປະຕິບັດຕາມສັນຍາການອໍານວຍຄວາມສະດວກທາງດ້ານການຄ້າໃນຂອບອົງການການຄ້າໂລກ (WTO-TFA) ທີ່ ສປປ ລາວ ເປັນພາຄີຊຶ່ງປະກອບມີ 03 ໝວດ ຄື: ໝວດ A ແມ່ນບັນດາມາດຕະການທີ່ ສປປ ລາວ ສາມາດປະຕິບັດໄດ້ທັນທີ, ໝວດ B ແມ່ນບັນດາມາດຕະການທີ່ ສປປ ລາວ ຕ້ອງການເວລາໃນການຈັດຕັ້ງປະຕິບັດ, ໝວດ C ແມ່ນບັນດາມາດຕະການທີ່ ສປປ ລາວ ຕ້ອງການຄວາມຊ່ວຍເຫຼືອໃນການຈັດຕັ້ງປະຕິບັດ. ໃນນີ້, ມີຈໍານວນ 36 ມາດຕະການຍ່ອຍທີ່ບັນດາປະເທດສະມາຊິກມີພັນທະຕ້ອງໄດ້ຈັດຕັ້ງປະຕິບັດ.

ສໍາລັບ ສປປ ລາວ ໄດ້ສໍາເລັດການຈັດຕັ້ງປະຕິບັດຈໍານວນ 18 ມາດຕະການ ຫຼື ບັນລຸໄດ້ 50% ຊຶ່ງມາດຕະການສ່ວນໃຫຍ່ແມ່ນນອນໃນໝວດ A ແລະ B. ວຽກງານພົ້ນເດັ່ນກວ່າໝູ່ ແມ່ນການສ້າງຕັ້ງຄະນະກໍາມະການອໍານວຍຄວາມສະດວກທາງດ້ານການຄ້າແຫ່ງຊາດ ຢູ່ຂັ້ນສູນກາງ ໂດຍແມ່ນທ່ານຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ ເປັນຫົວໜ້າຄະນະ ແລະ ຂັ້ນແຂວງ ໂດຍແມ່ນທ່ານ ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ ເປັນຫົວໜ້າຄະນະ.

ຜ່ານມາ ກະຊວງອຸດສາຫະກໍາ ແລະ ການຄ້າ ໃນນາມເປັນຜູ້ປະຈໍາການຄະນະກໍາມະການອໍານວຍຄວາມສະດວກທາງດ້ານການຄ້າ ຂັ້ນສູນກາງ ໄດ້ສືບຕໍ່ສົມທົບກັບຂະແໜງການທີ່ກ່ຽວຂ້ອງ ເພື່ອຫຼຸດຜ່ອນຂັ້ນຕອນ, ເວລາ ແລະເອກະສານ ໃນການອອກອະນຸຍາດນໍາເຂົ້າ ແລະສົ່ງອອກສິນຄ້າ ໃຫ້ໄດ້ຢ່າງໜ້ອຍ 50% ຕາມເນື້ອໃນຈິດໃຈຂອງສອງຄໍາສັ່ງ. ພົ້ນເດັ່ນກວ່າໝູ່ແມ່ນການຍົກເລີກການອອກໃບອະນຸຍາດຫຼື ຢັ້ງຢືນການນໍາເຂົ້າສິນຄ້າ ທີ່ຄຸ້ມຄອງໂດຍຂະແໜງອຸດສາຫະກໍາ ແລະ ການຄ້າ ຄື: ໃບອະນຸຍາດນໍາເຂົ້າຊິ້ນສ່ວນ ຍານພາຫະນະ ຂອງກົມການນໍາເຂົ້າ ແລະ ສົ່ງອອກ (ປີ 2017)ໃບຢັ້ງຢືນນໍາເຂົ້າຊິ້ນສ່ວນຍານພາຫະນະ ເພື່ອມາຜະລິດ ແລະ ປະກອບຢູ່ໂຮງງານ (ປີ 2020) ແລະ  ໃບອະນຸຍາດນໍາເຂົ້າລົດແທຣັກເຕີ (ປີ 2020).ກະຊວງອຸດສາຫະກໍາ ແລະ ການຄ້າ ຄາດວ່າການຍົກເລີກໃບອະນຸຍາດ ຫຼື ຢັ້ງຢືນການນໍາເຂົ້າສິນຄ້າເຫຼົ່ານີ້ຈະເຮັດໃຫ້ຕົວຊີ້ວັດທີ 8 “ການຄ້າລະຫວ່າງປະເທດ” ຂອງ ສປປ ລາວ ຢູ່ໃນອັນດັບທີ່ດີຂຶ້ນໃນປີ 2021 ຈາກອັນດັບທີ 78 ໃນປີ 2020.

ມາຮອດປະຈຸບັນ, ພວກເຮົາໄດ້ຮັບແຈ້ງຈາກທະນາຄານໂລກວ່າ: ການເຜີຍແຜ່ບົດລາຍງານການຈັດອັນດັບຄວາມສະດວກໃນການດໍາເນີນທຸລະກິດ (Ease of Doing Business: EDB) ຂອງທະນາຄານໂລກປີ 2021 ຈະຖືກເລື່ອນອອກໄປ (ປົກກະຕິ,ແມ່ນເຜີຍແຜ່ໃນເດືອນ ຕຸລາ ຂອງແຕ່ລະປີ) ເນື່ອງຈາກທະນາຄານໂລກກໍາລັງທົບທວນ ແລະ ປະເມີນຜົນ ຄວາມຖືກຕ້ອງຂອງຂໍ້ມູນບາງປະເທດ.

ທ່ານນາງເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະການຄ້າ ໃຫ້ຮູ້ເຖິງວຽກງານສ້າງ ແລະ ປັບປຸງລະບຽບການ ແລະ ຂັ້ນຕອນ ທີ່ຕິດພັນກັບການອໍານວຍຄວາມສະດວກທາງດ້ານການຄ້າ ວ່າ: ສໍາເລັດການອອກຂໍ້ຕົກລົງ ເລກທີ002/ຄອຄສ, ລົງວັນທີ 02 ກໍລະກົດ 2020 ວ່າດ້ວຍການຮັບຮອງເອົານິຕິກໍາແລະ ແຜນການສ້າງ,ປັບປຸງນິຕິກໍາກ່ຽວກັບການອອກອະນຸຍາດ, ຢັ້ງຢືນນໍາເຂົ້າ-ສົ່ງອອກ ແລະ ການເຄື່ອນຍ້າຍ ສິນຄ້າ ຊຶ່ງເປັນເອກະສານຊ້ອນທ້າຍ 01 ຂອງຄໍາສັ່ງເລກທີ 12/ນຍ. ໃນເອກະສານຊ້ອນທ້າຍດັ່ງກ່າວ ປະກອບມີ 51 ມາດຕະການທີ່ 17 ກົມ ຈາກ 11 ກະຊວງທີ່ກ່ຽວຂ້ອງຕ້ອງໄດ້ສ້າງ ແລະ ປັບປຸງ. ປະຈຸບັນ, ໄດ້ສໍາເລັດ 7 ມາດຕະການ, ກໍາລັງສ້າງ ແລະ ປັບປຸງ 40 ມາດຕະການ ແລະ ລ່າຊ້າ 4 ມາດຕະການ ຊຶ່ງກະຊວງອຸດສາຫະກໍາ ແລະ ການຄ້າ ຈະສືບຕໍ່ຕິດຕາມ ແລະ ສົມທົບກັບຂະແໜງການທີ່ກ່ຽວຂ້ອງ ກ່ຽວກັບການສ້າງ ແລະ ປັບປຸງມາດຕະການດັ່ງກ່າວ .

ຜ່ານມາ, ກະຊວງອຸດສາຫະກໍາ ແລະ ການຄ້າ ໂດຍສົມທົບກັບກະຊວງການເງິນໄດ້ສໍາເລັດຈັດຝຶກອົບຮົມ ກ່ຽວກັບວິທີການເຮັດບົດສຶກສາ TRS ໃຫ້ເຈົ້າໜ້າທີ່ຜູ້ອອກອະນຸຍາດນໍາເຂົ້າ ແລະ ສົ່ງອອກ ແລະ ເຈົ້າໜ້າທີ່ກ່ຽວຂ້ອງປະຈໍາດ່ານຢູ່ບາງແຂວງ ພາກເໜືອ, ກາງ ແລະ ໃຕ້ ທີ່ເປັນເປົ້າໝາຍ ແລ້ວ. ຄາດວ່າຈະສາມາດສໍາເລັດ ແລະ ເຜີຍແຜ່ບົດສຶກສາດັ່ງກ່າວ ໃຫ້ແກ່ສັງຄົມຊາບຢ່າງທົ່ວເຖິງພາຍໃນງວດ 1 ປີ 2021 ນີ້.

ໄດ້ຄົ້ນຄວ້າປັບປຸງ ສອງ ນິຕິກໍາທີ່ຕິດພັນການນໍາເຂົ້າຊົ່ວຄາວ ແລະ ຜ່ານແດນສິນຄ້າ ຄື: ຂໍ້ຕົກລົງ ວ່າດ້ວຍການນໍາເຂົ້າເພື່ອສົ່ງອອກຕໍ່ ແລະ ການສົ່ງອອກຊົ່ວຄາວສິນຄ້າຄຸ້ມຄອງ; ແລະຂໍ້ຕົກລົງ ວ່າດ້ວຍການເຄື່ອນຍ້າຍສິນຄ້າຄຸ້ມຄອງຜ່ານແດນ ສປປ ລາວ. ຮ່າງສະບັບປັບປຸງຂອງ ສອງ ນິຕິກໍາ ໄດ້ກໍານົດແຈ້ງ ກ່ຽວກັບຂັ້ນຕອນ, ເວລາ ແລະ ເອກະສານປະກອບສໍາລັບການອອກອະນຸຍາດຜ່ານແດນ, ນໍາເຂົ້າ-ສົ່ງອອກ ຊົ່ວຄາວ ແລະ ນໍາເຂົ້າເພື່ອສົ່ງອອກຕໍ່ ສິນຄ້າຄວບຄຸມ ຊຶ່ງໄດ້ຜ່ານປຶກສາຫາລື ກັບ ຂະແໜງການລັດ ແລະ ທຸລະກິດທີ່ກ່ຽວຂ້ອງຫຼາຍຄັ້ງ. ຄາດວ່າຈະສໍາເລັດ ແລະ ຮັບຮອງ ພາຍໃນງວດ 1 ປີ 2021 ນີ້.

ໄດ້ລິເລີ່ມນໍາໃຊ້ລະບົບແຈ້ງພາສີແບບປະຕູດຽວແຫ່ງຊາດ(LNSW) ສໍາລັບການອອກໃບອະນຸຍາດນໍາເຂົ້າຍານພາຫະນະ ຂອງກົມການນໍາເຂົ້າ ແລະສົ່ງອອກ ແລະ ໃບອະນຸຍາດເຕັກນິກຍານພາຫະນະນໍາເຂົ້າ ຂອງກົມຂົນສົ່ງ ລວມທັງການຊໍາລະຄ່າພາສີ, ອາກອນ, ຄ່າທໍານຽມ ແລະ ບໍລິການຕ່າງໆຜ່ານທະນາຄານຊຶ່ງຈັດຕັ້ງປະຕິບັດຢູ່ດ່ານຂົວມິດຕະພາບ 1 ນັບແຕ່ວັນທີ 24 ພຶດສະພາ 2019 ເປັນຕົ້ນມາ. ລ່າສຸດ, ໄດ້ຂະຫຍາຍການນໍາໃຊ້ລະບົບ LNSW ເຂົ້າໃນການອອກໃບອະນຸຍາດນໍາເຂົ້ານໍ້າມັນເຊື້ອໄຟ ຂອງກົມການນໍາເຂົ້າ ແລະ ສົ່ງອອກ ຊຶ່ງໄດ້ເລີ່ມຈັດຕັ້ງປະຕິບັດແຕ່ວັນທີ 30 ຕຸລາ 2020, ການອອກອະນຸຍາດຜ່ານລະບົບ LNSW ຊ່ວຍອໍານວຍຄວາມສະດວກໃຫ້ແກ່ພາກທຸລະກິດຫຼາຍສົມຄວນ ໂດຍສາມາດຍື່ນຄໍາຮ້ອງຂໍອະນຸຍາດ ແລະ ໄດ້ຮັບອະນຸຍາດຜ່ານລະບົບອອນໄລ໌ໄດ້ເລີຍ (ບໍ່ຈໍາເປັນຕ້ອງເດີນທາງກັບໄປກັບມາ). ຫຼັງຈາກນັ້ນ, ລະບົບຈະແຈ້ງຂໍ້ມູນຕ່າງໆ ຫາ ເຈົ້າໜ້າທີ່ພາສີ ປະຈໍາດ່ານ ເພື່ອດໍາເນີນການກວດປ່ອຍສິນຄ້າຕົວຈິງ.

ຂັ້ນຕອນ ແລະ ເວລາ ໃນການອະນຸມັດຮັບຮອງແຜນນໍາເຂົ້າປະຈໍາປີ (Master List) ໄດ້ຮັບການປັບປຸງດີຂຶ້ນຫຼາຍ ໂດຍໃຫ້ມີການຈັດກອງປະຊຸມຜ່ານແຜນນໍາເຂົ້າໃນທຸກໆວັນພະຫັດເພື່ອຕົກລົງເປັນເອກະພາບກັນກັບຂະແໜງການທີ່ກ່ຽວຂ້ອງໃນກອງປະຊຸມເລີຍ ຊຶ່ງວິທີການນີ້ແມ່ນປ່ຽນແທນການເຮັດໜັງສືສະເໜີປະກອບຄໍາເຫັນເປັນລາຍລັກອັກສອນຂອງຂະແໜງການທີ່ມີຄວາມຊັກຊ້າຫຼາຍ ໃນເມື່ອກ່ອນ. ເຖິງຢ່າງໃດກໍ່ຕາມ, ກະຊວງອຸດສາຫະກໍາ ແລະ ການຄ້າ ຈະສືບຕໍ່ສົມທົບກັບກະຊວງແຜນການ ແລະ ການລົງທຶນແລະ ຂະແໜງການທີ່ກ່ຽວຂ້ອງ ເພື່ອປຶກສາຫາລືວິທີການປັບປຸງຂັ້ນຂອດ ແລະ ເວລາໃນການອະນຸມັດແຜນນໍາເຂົ້າ ໃຫ້ວ່ອງໄວ ແລະ ມີປະສິດທິພາບ ຂຶ້ນກວ່າເກົ່າ.

ນອກຈາກນີ້, ກະຊວງອຸດສາຫະກໍາ ແລະ ການຄ້າໃນນາມເປັນເຈົ້າການຈັດຕັ້ງປະຕິບັດວຽກອໍານວຍຄວາມສະດວກທາງດ້ານການຄ້າ ກໍ່ໄດ້ຮ່ວມເຮັດວຽກ ແລະ ສົມທົບກັບກະຊວງທີ່ກ່ຽວຂ້ອງ ຢ່າງເປັນປົກກະຕິ ຊຶ່ງສາມາດສະຫຼຸບຜົນການຈັດຕັ້ງປະຕິບັດ ໄດ້ຄື:

1) ກະຊວງການເງິນ (ກົມພາສີ) ໄດ້ອອກແຈ້ງການແນະນໍາ ເລກທີ 10036/ກພສ, ລົງວັນທີ 11 ທັນວາ 2019 ເພື່ອອໍານວຍຄວາມສະດວກໃຫ້ແກ່ການກວດປ່ອຍສິນຄ້າ ຢູ່ດ່ານ ໂດຍສະເພາະສິນຄ້າສົ່ງອອກປະເພດ ຜະລິດຕະພັນໄມ້, ແຮ່ທາດ, ຜະລິດຕະພັນກະສິກໍາ ແລະ ສິນຄ້າທົ່ວໄປ ໂດຍປັບປຸງການກວດກາ ດ້ວຍການບໍລິຫານຄວາມສ່ຽງ ຫຼື ນໍາໃຊ້ເຕັກນິກວິຊາການ, ເຄື່ອງມືອຸປະກອນທັນສະໄໝ (ເຊັ່ນ ລະບົບ Scanner)ຊຶ່ງປ່ຽນແທນການກວດກາສິນຄ້າຕົວຈິງທຸກໆຄັ້ງ ເພື່ອຫຼຸດຜ່ອນຂັ້ນຕອນ ແລະ ເວລາໃນການດໍາເນີນການຢູ່ດ່ານລົງ.

2) ກະຊວງອຸດສາຫະກໍາ ແລະ ການຄ້າ (ກົມການນໍາເຂົ້າ ແລະ ສົ່ງອອກ) ໄດ້ຮ່ວມເຮັດວຽກ ແລະ ປຶກສາຫາລືກັບ ບັນດາຂະແໜງການທີ່ມີໜ່ວຍງານປະຈໍາດ່ານ(ກົມພາສີ, ກົມອາຫານ ແລະ ຢາ, ກົມປູກຝັງ, ກົມລ້ຽງສັດ ແລະ ການປະມົງ) ກ່ຽວກັບຮ່າງຄໍາແນະນໍາ ການຈັດຕັ້ງປະຕິບັດວຽກງານບໍລິຫານຄວາມສ່ຽງ ເພື່ອຫຼຸດຜ່ອນຂັ້ນຕອນ, ເວລາ ແລະ ຄ່າໃຊ້ຈ່າຍໃນການກວດປ່ອຍສິນຄ້າຢູ່ດ່ານລົງ ໂດຍການໝູນໃຊ້ລະບົບແຈ້ງພາສີແບບອັດຕະໂນມັດ (ASYCUDA) ຂອງຂະແໜງພາສີ ເພື່ອເປັນມາດຖານໃນການຄັດເລືອກວ່າສິນຄ້າໃດຈະນອນໃນກຸ່ມທີ່ມີຄວາມສ່ຽງສູງ, ກາງ ຫຼື ຕໍ່າ. ຮ່າງຄໍາແນະນໍາດັ່ງກ່າວ ໄດ້ຜ່ານການຕົກລົງເຫັນດີທາງດ້ານວິຊາການ ໃນລະດັບຂັ້ນກົມແລ້ວ. ສະນັ້ນ, ເພື່ອຄວາມເປັນເອກະພາບໃນການຈັດຕັ້ງປະຕິບັດໃນຕໍ່ໜ້າ, ຈຶ່ງສະເໜີໃຫ້ກອງປະຊຸມ ໄດ້ປຶກສາຫາລືກັນ ຫຼືຕົກລົງຮັບຮອງ. ຫຼັງຈາກນັ້ນ, ກະຊວງອຸດສາຫະກໍາ ແລະ ການຄ້າ ໃນນາມຜູ້ປະຈໍາການຄະນະກໍາມະການຊີ້ນໍາລວມອໍານວຍຄວາມສະດວກທາງດ້ານການຄ້າ ຂັ້ນສູນກາງ ຈະອອກຂໍ້ຕົກລົງຮັບຮອງ ແລະ ປະກາດໃຊ້ ຢ່າງເປັນທາງການ

3) ນອກຈາກນີ້, ກະຊວງອຸດສາຫະກໍາ ແລະ ການຄ້າ (ກົມການນໍາເຂົ້າ ແລະ ສົ່ງອອກ) ໄດ້ກະກຽມພັດທະນາລະບົບສະຖິຕິນໍາເຂົ້າ ແລະ ສົ່ງອອກສິນຄ້າ ແບບເອເລັກໂຕຼນິກ (E-statistics:E-stat) ເພື່ອໃຫ້ທຸກພາກສ່ວນ ສາມາດເຂົ້າເຖິງຂໍ້ມູນດັ່ງກ່າວ ຜ່ານລະບົບອອນໄລ໌ໄດ້. ຂໍ້ມູນຂອງລະບົບ E-stat ແມ່ນໄດ້ຈາກການເຊື່ອມຕໍ່ກັບລະບົບ ASYCUDA ຂອງກົມພາສີ ຊຶ່ງກົມການນໍາເຂົ້າ ແລະ ສົ່ງອອກ ໄດ້ນໍາໃຊ້ເຂົ້າການວິເຄາະ ແລະ ກໍານົດນະໂຍບາຍທາງດ້ານການຄ້າ. ໃນອານາຄົດ, ຖ້າລະບົບ E-stat ສາມາດນໍາໃຊ້ໄດ້ຢ່າງມີປະສິດທິພາບ ແລະ ປະສິດທິຜົນ ຈະຊ່ວຍຊຸກຍູ້ຂະແໜງການທີ່ເປັນຜູ້ອອກອະນຸຍາດນໍາເຂົ້າ ແລະ ສົ່ງອອກ ສິນຄ້າ ນໍາໃຊ້ລະບົບດັ່ງກ່າວຫຼາຍຂຶ້ນ ເພື່ອປ່ຽນແທນການອອກໃບອະນຸຍາດນໍາເຂົ້າ ແລະ ສົ່ງອອກ ທີ່ຂະແໜງການຕົນຍັງນໍາໃຊ້ຢູ່ ໂດຍສະເພາະໃບອະນຸຍາດທີ່ມີເຫດຜົນພຽງເພື່ອເກັບກໍາສະຖິຕິິ. ປະຈຸບັນແມ່ນຢູ່ໃນຂັ້ນຕອນການຄົ້ນຄວ້າຮ່າງບົດບັນທຶກຄວາມເຂົ້າໃຈ (MOU) ລະຫວ່າງກົມການນໍາເຂົ້າ ແລະ ສົ່ງອອກ ແລະ ກົມພາສີ ຊຶ່ງຄາດວ່າຈະສໍາເລັດໃນໄວໆນີ້.

ມີທ່ານນາງເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະການຄ້າ ລາຍງານໃຫ້ຮູ້ເຖິງການເຄື່ອນຍ້າຍສິນຄ້າພາຍໃນປະເທດທີ່ມີບາງຂອດຈະຕ້ອງປັບປຸງແກ້ໄຂວ່າ: ການອອກເອກະສານເຄື່ອນຍ້າຍສິນຄ້າພາຍໃນປະເທດ ແລະ ການຕັ້ງຈຸດກວດກາຕາມເສັ້ນທາງຂອງຂະແໜງການທີ່ກ່ຽວຂ້ອງ ເຊັ່ນ: ຂະແໜງກະສິກໍາ ແລະ ປ່າໄມ້, ຂະແໜງອຸດສາຫະກໍາ ແລະ ການຄ້າ, ຂະແໜງປ້ອງກັນຄວາມສະຫງົບ, ຂະແໜງໂຍທາທິການ ແລະ ຂົນສົ່ງ ແລະ ຂະແໜງການເງິນ ແມ່ນມີຄວາມຊໍ້າຊ້ອນກັນ ແລະ ບໍ່ສອດຄ່ອງກັບພາລະບົດບາດຂອງຕົນເອງ ຊຶ່ງສ້າງອຸປະສັກທາງດ້ານເວລາແລະຄ່າໃຊ້ຈ່າຍທີ່ບໍ່ຈໍາເປັນໃຫ້ແກ່ພາກທຸລະກິດກໍຄືປະຊາຊົນໃນເວລາເຄື່ອນຍ້າຍສິນຄ້າ ຈາກເມືອງ ຫາ ເມືອງ, ແຂວງ ຫາ ແຂວງເປັນຕົ້ນສິນຄ້າກະສິກໍາ, ເຄື່ອງປ່າຂອງດົງ, ສັດແລະຜະລິດຕະພັນສັດ, ຜະລິດຕະພັນໄມ້, ສິນຄ້າອຸປະໂພກ-ບໍລິໂພກແລະອື່ນໆ ບັນຫາດັ່ງກ່າວ ແມ່ນເກີດຂຶ້ນມາດົນແລ້ວ, ແຕ່ຍັງບໍ່ໄດ້ຮັບການປັບປຸງແກ້ໄຂໄດ້ດີເທົ່າທີ່ຄວນ

ໃນໄລຍະຜ່ານມາ, ກະຊວງອຸດສາຫະກໍາ ແລະ ການຄ້າ ໄດ້ຮັບການສະເໜີບັນຫາຂອງພາກທຸລະກິດ ທີ່ຕິດພັນກັບວຽກອໍານວຍຄວາມສະດວກທາງດ້ານການຄ້າ ຫຼາຍສົມຄວນໂດຍຜ່ານຫຼາຍຊ່ອງທາງ ເປັນຕົ້ນ ບັນຫາທີ່ຍົກຂຶ້ນໃນກອງປະຊຸມຕ່າງໆ; ການເຮັດໜັງສືທາງການ; ການປະສານສົມທົບ ແລະ ລົງເຮັດວຽກຕົວຈິງ ກັບ ພາກສ່ວນທີ່ກ່ຽວຂ້ອງຢູ່ຂັ້ນສູນກາງ ແລະ ທ້ອງຖິ່ນ ແລະ ຊ່ອງທາງອື່ນໆ.

ຜ່ານການຈັດຕັ້ງປະຕິບັດບັນດານິຕິກໍາທີ່ກ່ຽວຂ້ອງກັບວຽກອໍານວຍຄວາມສະດວກທາງດ້ານການຄ້າ ໂດຍສະເພາະຄໍາສັ່ງ ເລກທີ 12/ນຍ ຍັງບໍ່ຖືກຈັດຕັ້ງຜັນຂະຫຍາຍ ແລະ ບໍ່ມີຄວາມເປັນເອກະພາບກັນ ໃນຂອບເຂດທົ່ວປະເທດ ຄື: ມີບາງແຂວງ, ເມືອງ ທີ່ມີຫຼາຍຂະແໜງການ ຫຼື ໜ່ວຍງານທີ່ກ່ຽວຂ້ອງ ໄປປະຈໍາຢູ່ດ່ານສາກົນ, ທ້ອງຖິ່ນ ແລະ ປະເພນີ ເປັນຕົ້ນແມ່ນ: ຂະແໜງສ່ວຍສາອາກອນ ເພື່ອເກັບຄ່າພັນທະອາກອນ;ຂະແໜງຄຸ້ມຄອງຊັບສິນຂອງລັດ ເພື່ອເກັບຄ່າຈົດທະບຽນເອກະສານສັນຍານໍາເຂົ້າ-ສ່ົງອອກສິນຄ້າ;ຂະແໜງກວດກາປ່າໄມ້ ເພື່ອກວດກາການສົ່ງອອກຜະລິດຕະພັນໄມ້;ຂະແໜງໂຍທາທິການ ແລະ ຂົນສົ່ງ ເພື່ອອອກໜັງສືຂັບຂີ່ ແລະ ຍານພາຫະນະ ຜ່ານແດນ;ຂະແໜງວິທະຍາສາດ ແລະ ເຕັກໂນໂລຊີ ເພື່ອກວດສອບຄຸນນະພາບນໍ້າມັນເຊື້ອໄຟ ແລະ ຂະແໜງການອື່ນໆ. ການປະຈໍາຢູ່ດ່ານຂອງບັນດາຂະແໜງການ ຫຼື ໜ່ວຍງານ ເຫຼົ່ານີ້ ເຫັນວ່າບໍ່ສອດຄ່ອງກັບເນື້ອໃນຂອງດໍາລັດ ເລກທີ558/ລບ, ລົງວັນທີ 31 ທັນວາ 2018 ວ່າດ້ວຍດ່ານຊາຍແດນ ແລະ ສະໜາມບິນສາກົນ ທີ່ກໍານົດໃຫ້ມີ 03 ພາກສ່ວນຕົ້ນຕໍ (CIQ) ຄື: ຕໍາຫຼວດກວດຄົນເຂົ້າ-ອອກເມືອງ, ພາສີ, ກັກກັນພືດ, ອາຫານ ແລະ ຢາ.

ການແຕ່ງຕັ້ງຄະນະລົງກວດກາ, ໜີບກົ່ວ ແລະ ເຊັນບົດບັນທຶກການສົ່ງອອກຜະລິດຕະພັນໄມ້ ທີ່ຕາງໜ້າຂະແໜງການທີ່ກ່ຽວຂ້ອງ ມີຫຼາຍກວ່າ 03 ພາກສ່ວນ (ຕາມທີ່ໄດ້ກໍານົດໄວ້ໃນລະບຽບການ ແມ່ນມີ ຂະແໜງການຄ້າ, ປ່າໄມ້ ແລະ ຊັບສິນ) ແລະ ມີການແຕ່ງຕັ້ງຄະນະກໍາມະການລົງກວດກາຂອງແຕ່ລະພາກສ່ວນຫຼາຍກວ່າ 01 ທ່ານ. ພ້ອມດຽວກັນ, ສໍາລັບຂັ້ນຕອນການກວດກາຜະລິດຕະພັນໄມ້ສົ່ງອອກ ເຫັນວ່າ: ຜ່ານມາມີການສະເໜີຂອງອົງການກວດກາລັດຖະບານ ເພື່ອປັບປຸງບາງເນື້ອໃນຂອງຄໍາສັ່ງເລກທີ 12/ນຍ (ຂໍ້ 1 ຂອງຂໍ້ 2.2) ຈາກຄໍາວ່າ: “ຜະລິດຕະພັນໄມ້ ທີ່ໄດ້ຮັບການລົງກວດກາ, ໜີບກົ່ວຕູ້ສິນຄ້າ, ເຊັນບົດບັນທຶກແລະອະນຸຍາດຫຼືຢັ້ງຢືນການສົ່ງອອກໂດຍຄະນະກໍາມະການທີ່ຖືກແຕ່ງຕັ້ງຈາກຂະແໜງການທີ່ກ່ຽວຂ້ອງແລ້ວ, ເວລາມາຮອດດ່ານບໍ່ໃຫ້ເຈົ້າໜ້າທີ່ທີ່ກ່ຽວຂ້ອງແກະກົ່ວທີ່ໜີບແລ້ວອອກຍົກເວັ້ນກໍລະນີມີຄວາມສົງໃສຫຼືແຫຼ່ງຂ່າວທີ່ໜ້າເຊື່ອຖືໄດ້ເທົ່ານັ້ນ” ມາເປັນ “ໃນເວລາຜະລິດຕະພັນໄມ້ໄປຮອດດ່ານສົ່ງອອກ, ເຈົ້າໜ້າທີ່ທີ່ກ່ຽວຂ້ອງປະຈໍາດ່ານ ສາມາດດໍາເນີນການກວດກາຕູ້ສິນຄ້າຄືນໄດ້”. ຕໍ່ກັບບັນຫານີ້,ກະຊວງອຸດສາຫະກໍາ ແລະ ການຄ້າ ໄດ້ເຮັດໜັງລາຍງານ ຫາ ທ່ານຫົວໜ້າຄະນະກໍາມະການຊີ້ນໍາລວມອໍານວຍຄວາມສະດວກທາງດ້ານການຄ້າ ຂັ້ນສູນກາງແລ້ວ ແລະ ເຫັນວ່າກອງປະຊຸມຄັ້ງນີ້ ຈະເປັນເວທີທີ່ເໝາະສົມໃນການປຶກສາຫາລື ເພາະມີຕາງໜ້າຈາກອົງການກວດກາລັດຖະບານ (ຄະນະ 40/ນຍ), ກະຊວງທີ່ກ່ຽວຂ້ອງ, ບັນດາແຂວງ ແລະ ສະພາການຄ້າ ແລະ ອຸດສາຫະກໍາ ແຫ່ງຊາດລາວ ເພື່ອຄວາມເປັນເອກະພາບກັນວ່າ: ມາດຕະການໃນການກວດກາຜະລິດຕະພັນໄມ້ສົ່ງອອກ ຈະໄປໃນລວງໃດ.

ການອອກເອກະສານເຄື່ອນຍ້າຍສິນຄ້າພາຍໃນປະເທດ ມີຄວາມຊ້ໍາຊ້ອນກັນ ລະຫວ່າງຂັ້ນແຂວງ ແລະ ຂັ້ນເມືອງ ແລະ ບໍ່ສອດຄ່ອງກັບລະບຽບການທີ່ວາງອອກ ຄື: ຂະແໜງສ່ວຍສາອາກອນ ເກັບອາກອນມູນຄ່າເພີ່ມຈາກການຂົນສົ່ງ; ຂະແໜງປ່າໄມ້ ອອກໃບອະນຸຍາດເຄື່ອນຍ້າຍໄມ້ (ຈາກປ່າທໍາມະຊາດ ແລະ ສວນປູກ), ເຄື່ອງປ່າຂອງດົງ ແລະ ຖ່ານຂາວ; ຂະແໜງອຸດສາຫະກໍາ ແລະ ການຄ້າ ຍັງອອກໃບອະນຸຍາດເຄື່ອນຍ້າຍສິນຄ້າບາງປະເພດຢູ່ (ເນື່ອງຈາກມີແຈ້ງການລົບລ້າງ ໃບອະນຸຍາດເຄື່ອນຍ້າຍສິນຄ້າ ຂອງຂະແໜງການອຸດສາຫະກໍາ ແລະ ການຄ້າ ເລກທີ 2215/ອຄ, ລົງວັນທີ 21 ພະຈິກ 2011). ນອກຈາກນີ້, ຍັງມີຫຼາຍຂະແໜງການທີ່ອອກໃບອະນຸຍາດເຄື່ອນຍ້າຍຜົນລະປູກ (ເຂົ້າ, ກາເຟ, ມັນຕົ້ນ, ສາລີ, ຢາງພາລາ, ໝາກໄມ້,ພືດຜັກ ແລະ ອື່ນໆ) ເພາະຕາມລະບຽບການແລ້ວ ສິນຄ້າເຫຼົ່ານີ້ ແມ່ນສາມາດເຄື່ອນຍ້າຍໄດ້ເລີຍ ໂດຍບໍ່ຈໍາເປັນຕ້ອງຂໍອະນຸຍາດເຄື່ອນຍ້າຍ.

ການກວດກາການເຄື່ອນຍ້າຍສິນຄ້າພາຍໃນປະເທດ ມີຂັ້ນຂອດ ແລະ ຄ່າໃຊ້ຈ່າຍຫຼາຍ ເນື່ອງຈາກມີການຕັ້ງຈຸດກວດກາຕາມເສັ້ນທາງຂອງຂະແໜງການທີ່ກ່ຽວຂ້ອງ ຢູ່ບາງແຂວງ, ບາງເມືອງທີ່ຊໍ້າຊ້ອນກັນ ແລະ ບໍ່ສອດຄ່ອງກັບຄໍາສັ່ງເລກທີ 12/ນຍຄື: ຂະແໜງສ່ວຍສາກອນ ເພື່ອເກັບລາຍຮັບອາກອນມູນຄ່າເພີ່ມຈາກການຂົນສົ່ງ; ຂະແໜງປ່າໄມ້ ເພື່ອກວດກາຜະລິດຕະພັນໄມ້; ຂະແໜງການຄ້າ (ເຈົ້າໜ້າທີ່ກວດກາການຄ້າ) ເພື່ອກວດກາສິນຄ້າ ແລະ ຂະແໜງການອື່ນໆ. ອີງຕາມຄໍາສັ່ງ ເລກທີ 12/ນຍ ກໍານົດໃຫ້ມີແຕ່ 03 ພາກສ່ວນທີ່ສາມາດຕັ້ງຈຸດກວດກາຕາມເສັ້ນທາງ ຄື: ຕໍາຫຼວດຈະລາຈອນ ເພື່ອກວດກາເອກະສານກ່ຽວກັບລົດ ແລະ ການຂັບຂີ່, ສະຖານີຕິດຊັ່ງນໍ້າໜັກ ເພື່ອກວດການໍ້າໜັກ ແລະ ຂະໜາດຂອງລົດບັນທຸກ ແລະ ຂະແໜງພາສີເປັນຂະແໜງການທີ່ບໍ່ໄດ້ປະຈໍາການຕາມເສັ້ນທາງ ເພື່ອເຄື່ອນໄຫວວຽກງານປາບປາມການລັກລອບໜີພາສີ. ຂະແໜງການທັງໝົດເຫຼົ່ານີ້, ມີບາງຂະແໜງການໄດ້ປະຕິບັດໜ້າທີ່ເກີນພາລະບົດບາດຂອງຕົນ. ສິ່ງເຫຼົ່ານີ້, ເຮັດໃຫ້ເກີດປະກົດການຫຍໍ້ທໍ້ໃຫ້ແກ່ການປະຕິບັດວຽກງານຂອງຂະແໜງການລັດ ແລະ ເພີ່ມຂັ້ນຕອນ ແລະ ຕົ້ນທຶນທີ່ບໍ່ຈໍາເປັນໃຫ້ແກ່ປະຊາຊົນ ແລະ ພາກທຸລະກິດ.

ຍັງມີຫຼາຍຂະແໜງການ ຢູ່ສູນກາງ ແລະ ທ້ອງຖິ່ນ ບໍ່ທັນຄົ້ນຄວ້າ ແລະ ປັບປຸງ ບັນດາລະບຽບການ, ຂັ້ນຕອນ, ເວລາ ແລະ ເອກະສານ ສໍາລັບການອອກອະນຸຍາດ, ການຢັ້ງຢືນການນໍາເຂົ້າ-ສົ່ງອອກ ແລະ ການເຄື່ອນຍ້າຍສິນຄ້າ ທີ່ຕົນຄຸ້ມຄອງ ຢ່າງເປັນຮູບປະທໍາ. ພ້ອມດຽວກັນ, ກໍຍັງບໍ່ທັນສ້າງ ແລະ ເຜີຍແຜ່ມາດຕະຖານການບໍລິການຂອງຕົນໃຫ້ມີຄວາມໂປ່ງໃສ ເພື່ອອໍານວຍຄວາມສະດວກ ໃຫ້ແກ່ພາກທຸລະກິດ.

ການນໍາໃຊ້ລະບົບເອເລັກໂຕຼນິກ ເຂົ້າໃນການຊໍາລະຄ່າພັນທະ, ຄ່າທໍານຽມ ແລະ ຄ່າບໍລິການ ຍັງບໍ່ທັນຖືກຂະຫຍາຍ ແລະ ກວມເອົາທຸກຂະແໜງການ ແລະ ທຸກດ່ານ ໃນຂອບເຂດທົ່ວປະເທດ ຊຶ່ງເປັນຊ່ອງຫວ່າງເຮັດໃຫ້ເກີດມີການເກັບຄ່າທໍານຽມທີ່ບໍ່ເປັນທາງການ (ແບບບໍ່ມີໃບບິນ) ທີ່ບໍ່ສອດຄ່ອງກັບ ລັດຖະບັນຍັດ ວ່າດ້ວຍຄ່າທໍານຽມ ແລະ ບໍໍລິການ. ສິ່ງເຫຼົ່ານີ້, ເຮັດໃຫ້ຄ່າໃຊ້ຈ່າຍຂອງສິນຄ້າ ເພີ່ມຂຶ້ນ ແລະ ສົ່ງຜົນກະທົບຕໍ່ລາຄາຂາຍສິນຄ້າຢູ່ທ້ອງຕະຫຼາດ.

ກອງປະຊຸມທາງໄກ ຄະນະກໍາມະການອໍານວຍຄວາມສະດວກທາງດ້ານານຄ້າ ທົ່ວປະເທດ ຄັ້ງທີ 3 ຈັດຂຶ້ນເປັນເວລາເຄິ່ງວັນ.

ສື່ມວນຊົນລາວທີ່ເປັນປາກກະບອກສຽງຂອງພັກ ແລະ ລັດຖະບານ ຕ້ອງສືບຕໍ່ປັບປຸງດ້ານເນື້ອໃນໃຫ້ດີຂຶ້ນກວ່າເກົ່າ ເພື່ອສາມາດແຂ່ງຂັນກັບສື່ອອນລາຍທີ່ໄດ້ຮັບນິຍົມສູງຈາກສັງຄົມ ເພື່ອເຮັດໃຫ້ການໂຄສະນາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດຖະບານ ກໍຄື ການກະຈາຍຂໍ້ມູນຂ່າວສານຕ່າງຯ ໃຫ້ເຂົ້າເຖີງປະຊາຊົນລາວບັນດາເຜົ່າຢ່າງທົ່ວເຖີງກວ່າເກົ່າ.

ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ມີຄໍາເຫັນໂອ້ລົມຕໍ່ກອງປະຊຸມໃຫຍ່ອົງຄະນະພັກກະຊວງ ຖວທ ຄັ້ງທີ V ຈັດຂຶ້ນເມື່ອບໍ່ດົນມານີ້ ວ່າ: ປັດຈຸບັນ ການອ່ານ, ຟັງ ຫລື ຊົມຂ່າວຂອງຄົນໃນສັງຄົມຜ່ານສື່ຕ່າງຯ ທີ່ເປັນສື່ດັ້ງເດີມຂອງລາວຫລຸດລົງ, ກົງກັນຂ້າມການບໍລິໂພກຂ່າວຜ່ານສື່ສັງຄົມອອນລາຍໄດ້ຮັບຄວາມນິຍົມສູງ ຍ້ອນສາມາດເຜີຍແຜ່ຂໍ້ມູນຂ່າວສານໄດ້ໄວ.

ນີ້ຖືເປັນຄວາມທ້າທາຍສໍາຄັນທີ່ສື່ຂອງລັດຕ້ອງແກ້ໄຂໃຫ້ໄດ້ ເພື່ອແນໃສ່ເຮັດໃຫ້ຂໍ້ມູນຂ່າວສານຕ່າງຯ ສາມາດເຂົ້າເຖີງປະຊາຊົນຢູ່ຮາກຖານ ເພາະປັດ ຈຸບັນ ມີວິທະຍຸກະຈາຍສຽງເທົ່ານັ້ນທີ່ສາມາດເຂົ້າເຖີງປະ ຊາຊົນໄດ້ກວ້າງຂວາງກວ່າໝູ່, ໃນນີ້ ພາກພາສາຊົນເຜົ່າແມ່ນໄດ້ຮັບຄວາມນິຍົມຫລາຍ.

ຢ່າງໃດກໍຕາມ ລາຍການຕ່າງຯ ທີ່ອອກອາກາດຜ່ານທາງວິທະຍຸ ແລະ ໂທລະພາບ ຫລື ຜ່ານສື່ອື່ນຯ ຂອງລັດ ຕ້ອງໄດ້ປັບປຸງເນື້ອໃນໃຫ້ມີສາ ລະທີ່ດີຂຶ້ນກວ່າເກົ່າ ເພາະເນື້ອຫາສາລະຍັງບໍ່ທັນຮັບໃຊ້ປະຊາຊົນຢ່າງໜັກແໜ້ນ, ບາງລາຍການວິທະຍຸ ແລະ ໂທ ລະພາບອອກອາກາດ 30 ນາທີ ແຕ່ເປີດເພັງເປັນສ່ວນ ໃຫຍ່, ເນື້ອໃນຂອງເພັງບໍ່ທັນເຊີດຊູຈິດໃຈຊາດ ເທົ່າທີ່ຄວນ ແລະ ການເອົາວຽກດີຄົນເດັ່ນ-ວຽກຈິງຄົນແທ້ເຂົ້າໃນລາຍການຍັງມີໜ້ອຍ.

ທ່ານ ນາງ ປານີ ຢາທໍ່ຕູ້ ກ່າວຢໍ້າວ່າ: ບັນຫາທີ່ເກີດຂຶ້ນທັງໝົດນີ້ ຖືເປັນສິ່ງທ້າທາຍສໍາຄັນທີ່ຂະແໜງການທີ່ກ່ຽວ ຂ້ອງຂອງກະຊວງ ຖວທ ຕ້ອງຊອກຫາວິທີແກ້ໄຂໃຫ້ໄດ້ ເພື່ອເຮັດໃຫ້ການນໍາສະເໜີຂ່າວຂອງສື່ມວນຊົນລາວທີ່ເປັນຂອງລັດມີຄວາມຫລາກຫລາຍ, ວ່ອງໄວ, ສອດຄ່ອງ, ມີເນື້ອໃນທີ່ກວ້າງຂວາງເລິກເຊີ່ງຕາມແນວທາງນະໂຍບາຍຂອງພັກ ແລະ ຕອບສະ ໜອງໄດ້ກັບຄວາມຮຽກຮ້ອງຕ້ອງ ການຂອງປະຊາຊົນຢ່າງແທ້ຈິງ.

ໂດຍ: ມົດແດງນ້ອຍ
ພາບ: ອ່າຍຄໍາ ຄໍາລາສີ
Lao National Radio

ມື້ພັກໃກ້ຈະມາຮອດແລ້ວ! ຫຼາຍຄົນກໍ່ມີການເລິ່ມທີ່ປະດັບປະດາຕົ້ນໄມ້ ແລະ ດອກໄຟສຳລັບວັນຄຣິດສະມາດແລ້ວ. ທາງຄະນະສະພານັກຮຽນຊັ້ນມັດທະຍົມຂອງໂຮງຮຽນປັນຍາທິບ ໄດ້ຮັບການສະໜັບສະໜູນຈາກໂຮງຮຽນ ໃນການຈັດກິດຈະກຳ ງານ Christmas Wonderland ປະຈຳປີ 2020 ເປັນຄັ້ງທີສອງ ໃນວັນທີ 5 ທັນວາ 2020 ທີ່ຜ່ານມາ ສະຖານທີ່ຈັດງານແມ່ນ ໂຮງຮຽນ ນານາຊາດ ປັນຍາທິບ ວິທະຍາເຂດຊັ້ນມັດທະຍົມ, ບ້ານ ສະພານທອງເໜືອ.

ທ່ານ ນາງ ປາດຖະໜາ ປັນຍາທິບ, ຜູ້ກໍ່ຕັ້ງ ແລະ ຜູ້ອຳນວຍການ, ໄດ້ເປີດພິທີຢ່າງເປັນທາງການໂດຍພິທີການເປີດດອກໄຟຕົ້ນຄຣິດສະມາດທີ່ສູງ 10 ແມັດ. ພ້ອມດ້ວຍແຂກພິເສດທີ່ໃຫ້ກຽດເຂົ້າຮ່ວມງານຂອງໂຮງຮຽນ ນານາຊາດ ປັນຍາທິບຄັ້ງນີ້. ມາຈາກຫຼາຍໆພາກສວ່ນເຊັ່ນ : ສະຖານທູດອັງກິດ, ສະຖານທູດສິງກະໂປ, ສະຖານທູດຟີລິບປິນ ແລະ ທະນາຄານ ມາຣູຮານ ເຈແປນລາວ, ທ່ານເອກອັກຄະລັດຖະທູດປະເທດອັງກິດປະຈຳລາວ John Pearson, ຍັງໄດ້ຂື້ນກ່າວເຖິງຄວາມສໍາຄັນຂອງການສຶກສາ ພ້ອມທັງແຊຣປະສົບການ ແລະ ຄວາມຮູ້ທີ່ນ້ອງໆນັກຮຽນຈະໄດ້ຮັບໃນການຈັດງານດີໆແບບນີ້.

ທາງຜູ້ບໍລິຫານ T.Chris ໄດ້ຂຶ້ນກ່າວຄຳຄິດເຫັນວ່າ “ສຳລັບຜູ້ໃດທີ່ສະເຫຼີມສະຫຼອງວັນຄຣິດສະມາດ ຫຼື ບໍ່ໄດ້ສະເຫຼີມສະຫຼອງກໍ່ຕາມ – ພວກເຮົາມີຄ່ຳຄືນທີ່ຈະພາຄອບຄົວຂອງທ່ານເພີດເພີນໄປກັບອາຫານທີ່ແຊບໆ ແລະ ມ່ວນຊື່ນກັບບັນຍາກາດ ຂອງງານຄຣິສມາສທີ່ເຮົາຈັດຂື້ນຢ່າງແນ່ນອນ. ເຮົາຍັງຈະຂໍຫຍັງຫຼາຍໄປກວ່ານີ້ອີກ? ພວກເຮົາມີ ລຸງຊານຕາຄອດສ ໂຕຈິງມາຢ້ຽມຢາມພາຍໃນງານເຮົາພ້ອມ! ”

ຫຼາຍກວ່າ 1600 ບັດຮ່ວມງານທີ່ໄດ້ຖືກຕອບຮັບຢ່າງຫຼວງຫຼາຍ ແລະ ຜູ້ເຂົ້າຮ່ວມຫຼາຍກວ່າ 2100 ຄົນ, ງານດັ່ງກ່າວແມ່ນເຕັມໄປດ້ວຍຄວາມຕື່ນເຕັ້ນ ແລະ ບັນຍາກາດຂອງວັນຄຣິດສະມາດສຳລັບທຸກເພດທຸກໄວ. ມີຮ້ານຄ້າເຈົ້າຮ່ວມງານຫລາຍກວ່າ 40 ຮ້ານ ໄດ້ເຂົ້າຮ່ວມເປັນສ່ວນໜຶ່ງຂອງຕະຫລາດນັດເຮົາ, ຕັ້ງແຕ່ຮ້ານຂາຍເຄື່ອງຫັດຖະກຳສຳລັບເຄື່ອງວັນຄຣິດສະມາດຈົນເຖີງຮ້ານຂາຍອາຫານທີ່ມີຄວາມຫຼາກຫຼາຍ. ນອກຈາກນີ້, ຍັງມີເວທີການແຂ່ງຂັນເຕັ້ນ ແລະ ວົງດົນຕີທີ່ປະກອບໄປດ້ວຍການສະແດງທີ່ໜ້າປະທັບໃຈ ແລະ ການສະແດງຈາກແຂກຮັບເຊີນສຸດພິເສດ ວົງ Black Eyes ແລະ Flower Boi ເຊິ່ງບັນດາ Elves (ເອວສ) ຂອງພວກເຮົາ ກໍ່ໄດ້ພາຜູ້ປົກຄອງ, ເດັກນ້ອຍ ແລະ ແຂກທຸກຄົນມ່ວນໄປກັບເກມຕ່າງໆທີ່ທາງເຮົາຈັດບູທໄວ້ໃຫ້ແຂກທຸກທ່ານໄດ້ເຈົ້າຮ່ວມ ແລະ ກິດຈະກຳຂອງພວກເຮົາຕະຫຼອດຄືນ.

ໃນປີນີ້, ພວກເຮົາມີສະປອນເຊີ້ ແລະ ຜູ້ຮ່ວມມືທັງ 17 ທີ່ໃຫ້ການສະໜັບສະໜູນງານ Christmas Wonderland 2020 ຂອງປັນຍາທິບ ເຊິ່ງຄະນະສະພານັກຮຽນຊັ້ນມັດທະຍົມ ແລະ ທຸກຄົນກໍ່ໄດ້ຕັ້ງໃຈເຮັດວຽກໃຫ້ງານອອກມາປະສົບຜົນສຳເລັດແບບນີ້. ພວກເຮົາຂໍຂອບໃຈເປັນພິເສດສໍາລັບບັນດາສະປອນເຊີ້ເຫຼົ່ານີ້: ທະນາຄານ ມາຣູຮານ ເຈແປນລາວ, Maruhan Japan Bank, Osound, RDK Group, Land Rover, Go Teddy, PAS Project, Tigerhead, AAS Catering, Skynet, Sona Water, #SnapMe Photo, KhaoLao (ເຂົ້າລາວ), Laoderm (ລາວເດີມ), LT and Panyathip Ad.

ໃນຖານະທີ່ເປັນງານກິດຈະກຳທີ່ຖືກຈັດຂື້ນໂດຍນັກຮຽນ, ຜົນໄດ້ຮັບທັງໝົດຈະຖືກນຳໄປສະໜັບສະໜູນຊຸມຊົນທີ່ຄະນະສະພານັກຮຽນຊັ້ນມັດທະຍົມໄດ້ມີການວາງແຜນໄວ້ໃນພາກຮຽນທີ 2 ຂອງສົກຮຽນ.

ໃນວັນທີ 09 ທັນວາ 2020, ທີ່ຫໍປະຊຸມຂອງສໍານັກງານໃຫ່ຍ ບໍລິສັດ ສະຕາ ໂທລະຄົມ ຈໍາກັດ, ໄດ້ຈັດ ພິທີ ສະເຫຼີມສະຫຼອງ ຄົບຮອບ 2 ປີ ທີ່ສະໜອງການບໍລິການ ກະເປົາເງິນເອເຣັກໂທຣນິກ ຫຼື ຢູມັນນີ “u-money” ຂອງບໍລິສັດ ສະຕາ ຟິນເທັກ ຈໍາກັດຜູ້ດຽວ ເຊິ່ງເປັນບໍລິສັດລູກຂອງ ບໍລິສັດ ສະຕາ ໂທລະຄົມ ຈໍາກັດ.

ກຽດເຂົ້າຮ່ວມໂດຍ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ , ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ , ທ່ານ ນາງ ຈີ້ງທິເຕີມ ອັກຄະລັດຖະທູດ ສສ ຫວຽນນາມ ປະຈຳລາວ ,ທ່ານບຸນສະເຫຼີມໄຊ ເຄນນາວົງ ຮອງລັດຖະມົນຕີວ່າການ ກະຊວງ ໄປສະນີໂທລະຄົມມະນາຄົມ,ທ່ານ ພົນຕີ ວົງຄຳ ພົມມະກອນ ຫົວໜ້າ ກົມໃຫ່ຍ ພາລາທິການ ກະຊວງປ້ອງກັນປະເທດ ທ່ານ ພົນຈັດຕະວາ ອຸລະຫາ ທອງວັນທາ ຜູ້ອຳນວຍການໃຫ່ຍ ລັດວິສາຫະກິດ ລາວ – ເອເຊຍໂທລະຄົມ , ທ່ານ ລີວ ແມ້ງ ຮ່າ ຜູ້ອໍານວຍການໃຫ່ຍ ບໍລິສັດ ສະຕາໂທລະຄົມ ແລະທັງເປັນ ຜູ້ອຳນວຍການໃຫ່ຍ ບໍລິສັດ ສະຕາ ຟີນເທັກ ຈຳກັດຜູ້ດຽວ ພ້ອມດ້ວຍແຂກການນໍາ ຕະຫຼອດຮອດບັນດາບໍລິສັດວິສາກິດ ໄດ້ເຂົ້າຮ່ວມຢ່າງພ້ອມພຽງ.

ທ່ານ ລິວ ແມ່ງ ຮ່າ ຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ ຈໍາກັດ ພ້ອມທັງເປັນ ຜູ້ອຳນວຍການ ບໍລິສັດ ສະຕາ ຟີນເທັກ ຈຳກັດ ຜູ້ດຽວ, ໄດ້ໃຫ້ຮູ້ວ່າ: ດ້ວຍຈູດປະສົງເປົ້າໝາຍ ບ່ອນໃດທີ່ມີສັນຍານ ຂອງຢູນີເທວ ບ່ອນນັ້ນມີການເຂົ້າເຖີງບໍລິການ ດ້ານ ດີຈີຕອນ. ກ່ອນໜ້ານັ້ນ ຢູນີເທວໄດ້ ສຳເລັດການປະຕິບັດ ດ້ານພາລະກິດ ສະໜອງບໍລິການດ້ານໂທລະຄົມມະນາຄົມໃຫ້ກັບ ພໍ່ແມ່ປະຊາຊົນຢ່າງທົ່ວເຖິງ ,ເຊີ່ງຕໍ່ໄປ ສະໜອງບໍລິການດ້ານການເງິນ ເອເລັກໂທນິກ , ການຊຳລະເອເລັກໂທນິກ ຢ່າງທົ່ວເຖີງນັບແຕ່ ເທດສະບານ ຫາເຂດຫ່າງໄຫກສອກຫຼີກ ໂດຍຜ່ານບໍລິການ u-money .

ທ່ານ ລີວ ແມ້ງ ຮ່າ ຍັງໃຫ້ຮູ້ເພີ່ມເຕີມ ເປົ້າໝາຍເຖີງປີ 2025 ,80% ຂອງລູກຄ້າ ທີ່ນຳໃຊ້ໂທລະສັບມືຖື ຢູ່ລາວແມ່ນໃຫ້ມີບັນຊີ Mobile Money , ຂະຫຍາຍຮ້ານຕົວແທນບໍລິການ 1 ບ້ານໃຫ້ໄດ້ 1 – 3 ຮ້ານຕົວແທນບໍລິການ, ເພື່ອສ້າງເງື່ອນໄຂ ເຊື່ອມຕໍ່ ປະຊາຊົນນຳໃຊ້ການບໍລິການ ໂອນເງິນ , ດານຊຳລະທີ່ສະດວກຍີ່ງຂື້ນ, ເປີດກ້ວາງການເຂົ້າເຖີງ ແຫຼ່ງທືນຂອງປະຊາຊົນ ິເສດແມ່ນປະຊາຊົນໃນເຂດຫ່າງໄກສອກຫຼີກ ທັງໝົດເຫຼົ່ານັ້ນ ເປັນພື້ນຖານໃນການກເສີມສ້າງ ພັດທະນາເສດຖະກິດ – ສັງຄົມ ຍົກລະດັບຊີວິດການເປັນຢູ່ຂອງປະຊາຊົນດີຂື້ນເທື່ອລະກ້າວ.

ນັບແຕ່ປີ 2014 ບໍລິສັດ ສະຕາ ໂທລະຄົມ ເປັນບໍລິສັດທໍາອິດທີ່ໄດ້ຖືກຄັດເລືອກ ແລະ ຮ່ວມມືກັບ ກອງທຶນເພື່ອການພັດທະນາຂອງສະຫະປະຊາຊາດ (UNCDF) ເພື່ອອະນຸຍາດໃຫ້ທົດລອງການສະໜອງການບໍລິການທາງດ້ານການເງິນຜ່ານເທິງໂທລະສັບມືຖື ໂດຍຜ່ານໄລຍະການເຮັດວຽກນັບຕັ້ງແຕ່ຄົ້ນຄ້ວາ, ອອກແບບ ແລະ ຈັດຕັ້ງປະຕິບັດຕົວຈິງຢູ່ບາງສາຂາແຂວງ ພາຍໃຕ້ການຊີ້ນໍາ, ຄຸ້ມຄອງ ແລະ ຕິດຕາມຢ່າງໃກ້ຊິດຕິດແທດ ຈາກ ທະນາຄານ ແຫ່ງ ສ.ປ.ປ ລາວ ເຊັ່ນວ່າ: ການປະຕິດບັດຂໍ້ກໍານົດຕ່າງໆທີ່ກ່ຽວຂ້ອງ, ການວາງລະບຽບການຕ່າງໆ ເພື່ອຮັບປະກັນຜົນປະໂຫຍດໃຫ້ແກ່ລູກຄ້າທີ່ນໍາໃຊ້ຜະລິດຕະພັນ.

ນອກຈາກນີ້, ກໍໄດ້ທົດລອງໃຫ້ບໍລິການ ເພື່ອເປັນການຕິດຕາມ ແລະ ປັບປຸງການບໍລິການຕ່າງໆໃຫ້ເໝາະສົມຕາມສະພາບຕົວຈິງຂອງປະຊາຊົນໃນທຸກຂອບເຂດທົ່ວປະເທດເວົ້າລວມ ເວົ້າສະເພາະກໍແແມ່ນເຂດຫ່າງໄກສອກຫຼີກ. ດັ່ງນັ້ນ, ຜ່ານໄລຍະເວລາ 2 ປີ ແຫ່ງການສະໜອງບໍລິການ u-money ໄດ້ປາກົດເຫັນວ່າ ມີຜົນງານອັນໂດດເດັ່ນຫຼາກຫຼາຍຢ່າງເກີດຂຶ້ນ ເຊັ່ນ: ໄດ້ມີຮ້ານຕົວແທນ ບໍລິການໃນທົ່ວປະເທດ ຫຼາຍກ່ວາ 10,000 ຮ້ານ, ມີລູກຄ້າ ຫຼາຍກ່ວາ 500,000 ຄົນ ແລະ ຮ້ານຄ້າຮັບຊໍາລະ QR code ຫຼາຍກ່ວາ 6000 ຮ້ານໃນທົ່ວປະເທດ. ນອກຈາກນີ້, ຍັງໄດ້ຮັບຄວາມໄວ້ເນື້ອເຊື່ອໃຈຈາກລັດຖະບານ ກໍຄືຄັງເງິນແຫ່ງຊາດ ໄດ້ປະຕິບັດການເບີກຈ່າຍເງິນເດືອນ ໃຫ້ແກ່ພະນັກງານ-ລັດຖະກອນ ຢູ່ບັນດາເມືອງຫ່າງໄກສອກຫຼີກ.

ພ້ອມດຽວກັນນີ້, ບັນດາເມືອງຕ່າງໆຍັງໄດ້ໃຊ້ຜະລິດຕະພັນດັ່ງກ່າວນີ້ເຂົ້າໃນການເບີກຈ່າຍເງິນເດືອນ ແລະ ເງິນອຸດໜູນໃຫ້ກັບນາຍບ້ານອີກດ້ວຍ.
ພາຍໃນພິທີສະເຫຼີມສະຫຼອງ, ຕາງໜ້າໃຫ້ແກ່ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ທະນາຄານ ແຫ່ງ ສ.ປ.ປ ລາວ ໃນຖານະເປັນຜູ້ ຄຸ້ມຄອງໂດຍກົງ, ທ່ານ ສອນໄຊ ສິດພະໄຊ ຜູ້ວ່າການ ທະນາຄານ ແຫ່ງ ສ.ປ.ປ ລາວ ໄດ້ກ່າວ ຍ້ອງຍໍຊົມເຊີຍຕໍ່ກັບຜົນງານ ຕະຫຼອດ ໄລຍະເວລາ 2 ປີ ຜ່ານມາຂອງບໍລິສັດ ສະຕາ ຟີນເທັກ ປະສົບຜົນສຳເລັດ ໃນການໃຫ້ບໍລິການ ເງິນເລັກໂທນິກ ຢ່າງກ້າວກະໂດດຂັ້ນ ສາມາດເຂົ້າສູ່ ຕະຫຼາດໄດ້ຢ່າງທົ່ວເຖີງ ແລະ ມີປະສິດທິພາບ …..

ເຖີງຢ່າງໃດກໍ່ກຕາມ ບໍລິສັດ ສະຕາ ຟີນເທັກໃຫ້ເອົາໃຈໃສ່ຕໍ່ການຂະຫຍາຍເຄືອຂ່າຍໃຫ້ກ້ວາງຂວາງ ຂະຫຍາຍຊ່ອງທາງໃຫ້ບໍລິການ ຮ່ວມກັບ ຜູ້ໃຫ້ບໍລິການຊຳລະອື່ນ ເພື່ອໃຫ້ລະບົບນິເວດ ການຊຳລະທົ່ວເຖີງ ທັງເປັນການສົ່ງເສີມໃຫ້ສັງຄົມກ້າວໄປສູ່ສັງຄົມໄຮ້ເງິນສົດ ,ເອົາໃຈໃສ່ ການບໍລິການລູກຄ້າ , ການໃຫ້ຄວາມຮູ້ທາງດ້ານ Fintech ລວມທັງການຄຸ້ມຄອງຕົວແທນ ເພື່ອໃຫ້ບໍລິການດັ່ງກ່າວມີຄວາມປອດໄພ ,ມີປະສິດທິພາບ ໃນນາມຜູ້ຄຸ້ມຄອງ ກໍ່ຂະໃຫ້ການສະໜັບສະໜູນ , ຕິດຕາມການບໍລິການ ແລະ ການພັດທະນາຜະລິດຕະພັນໃໝ່ໆ.

ດ້ວຍຜົນງານທີ່ຍາດມາໄດ້ປະກອບກັບຄວາມໄວ້ເນື້ອເຊື່ອໃຈຂອງລູກຄ້າໃນຖານະເປັນຜູ້ຊົມໃຊ້ຜະລິດຕະພັນດັ່ງກ່າວນີ້ ຈຶ່ງເຮັດໃຫ້ u-money ໄດ້ຮັບລາງວັນ Silver Stevie® ໃນຫົວຂໍ້: “ນະວັດຕະກຳໃໝ່ ດ້ານຜະລິດຕະພັນ ແລະ ການບໍລິການສຳລັບຜູ້ບໍລິໂພກ” (Award for Innovation in Consumer Products & Services) ຈາກງານປະກາດລາງວັນ Asia- Pacific Stevie Awards ປະຈໍາປີ 2020 ແລະ ລາງວັນ Silver winner ໃນຫົວຂໍ້: “ຜະລິດຕະພັນ ແລະ ບໍລິການດ້ານເທັກໂນໂລຢີຂົງເຂດການເງິນ, ການທະນາຄານ ແລະ ປະກັນໄພ” (IT Products & Services for Finance, Banking and Insurance) ຈາກງານປະກວດ IT world Awards 2020 ຈັດໂດຍ Network Product Guide.

ໃນອະນາຄົດ ທີ່ໃກ້ຈະມາເຖິງນີ້ ຢູມັນນີ ຈະຫັນເຂົ້າສູ່ ວຽກງານ ສັງຄົມຊຳລະແບບດີຈີຕອນ, ສັງຄົມແບບປາສະຈາກເງິນສົດ, ການຄ້າແບບເອເລັກໂທຣນິກ, ເປີດກ້ວາງການເຊື່ອມໂຍງກັບບັນດາທະນາຄານໃນ ສ.ປ.ປ ລາວ ແລະ ບັນດາກຸ່ມທຸລະກິດອື່ນ ເພື່ອເປີດກວ້າງການເຂົ້າເຖິງແຫຼ່ງທຶນຂອງພໍ່ແມ່ປະຊາຊົນ ພິເສດແມ່ນພໍ່ແມ່ປະຊາຊົນໃນເຂດຫ່າງໄກສອກຫຼີກ. ທັງໝົດນີ້ເປັນພື້ນຖານຫຼັກໃນການພັດທະນາເສດຖະກິດສັງຄົມ ຍົກສູງການດຳລົງຊີວິດຂອງປະຊາຊົນໃຫ້ນັບມື້ນັບດີຍິ່ງຂຶ້ນ ເພື່ອຫຼຸດຜ່ອນຄວາມທຸກຍາກໃຫ້ແກ່ພໍ່ແມ່ປະຊາຊົນລາວ.

foodpanda ຫຼື ທີ່ຮູ້ຈັກກັນດີໃນນາມ ແພນດ້າບົວ ຜູ້ສ້າງພຶດຕິກຳການກິນແບບໃໝ່ໃຫ້ກັບຜູ້ບໍລິໂພກໃນລາວ ທັງເປັນຜູ້ພິກວົງການຈ້າງງານພະນັກງານອິດສະລະ ເບີກທາງການເຮັດວຽກຮູບແບບໃຫມ່ໃຫ້ນັກຂັບຂີ່ ບ້ານເຮົາ ແລະ ທີ່ສໍາຄັນເປັນຜູ້ພັດທະນາຊ່ອງທາງການຂາຍໃຫ້ຮ້ານອາຫານ ຈົນກາຍເປັນຜູ້ນຳທາງດ້ານການຈັດສົ່ງອາຫານອັນດັບໜຶ່ງໃນປະເທດລາວ. ຟູດແພນດ້າລາວ ເລີ່ມເຂົ້່າມາ ມີບົດບາດໃນລາວຕັ້ງແຕ່ປີ 2019 ແລະ ເປີດໃຫ້ບໍລິການຢ່າງເປັນທາງການໃນ ວັນທີ 4 ພະຈິກ 2019ເປັນຕົ້ນມາ ເຊິ່ງນັບວ່າເປັນຄວາມທ້າທາຍຢ່າງຍິ່ງ ທີ່ບໍລິສັດເດລິເວີຣີ່ລະດັບສາກົນ ຕັດສິນໃຈເຂົ້າມາລົງທຶນໃນລາວ 

ໃນການເຂົ້າມາຂອງ ຟູດແພນດ້າ ນອກຈາກມີຄວາມຕັ້ງໃຈເຂົ້າມາເປັນຜູ້ໃຫ້ບໍລິການດ້ານການຈັດສົ່ງອາຫານແລ້ວ ທາງຄະນະຜູ້ບໍລິຫານຍັງມີຄວາມມຸ້ງໝັ້ນຕັ້ງໃຈໃຫ້ ຟູດແພນດ້າລາວ ເປັນອົງກອນໜຶ່ງໃນການສ້າງບຸກຄະລາກອນທີ່ມີຄຸນນະພາບໃຫ້ກັບປະເທດລາວ ໂດຍການນຳໃຊ້ຫຼັກວິຊາການ, ມາຕະຖານຂອງການບໍລິການອັນດຽວກັບບໍລິສັດແມ່ ແລະ ຟູດແພນດ້າຕາມປະເທດຕ່າງ ທັງນີ້ກໍເພື່ອຄົງໄວ້ເຊິ່ງຄວາມເພິ່ງພໍໃຈຂອງຄູ່ຮ່ວມທຸລະກິດນັ້ນເອງ ເຊິ່ງຕັ້ງແຕ່ມື້ເລີ່ມໃຫ້ບໍລິການຈົນມາເຖິງປັດຈຸບັນ ຟູດແພນດ້າລາວ ໄດ້ສ້າງບຸກຄະລາກອນທີ່ມີຄຸນນະພາບແລ້ວ ກວ່າຮ້ອຍຄົນ ແລະ ມີ ໄຣ່ເດີ ເຊີ່ງເປັນພະນັງງານຂົນສົ່ງ ອິດສະຫຼະ ອີກ ຫຼາຍກວ່າພັນ ຄົນໃນທົ່ວປະເທດ.

ດ້ວຍເຫດນີ້ດ້ວຍໄລຍະພຽງ 1ປີ ຟູດແພນດ້າລາວ ຈື່ງສາມາດຂະຫຍາຍ ຮ້ານຄ້າເຂົ້າໃນລະບົບໄດ້ຢ່າງຫຼວງຫຼາຍ  ໃນຂອບເຂດທົ່ວປະເທດ, ອັນຖືວ່າເປັນການຂະຫຍາຍຕົວຢ່າງກ້າວກະໂດດຢ່າງຍິ່ງສຳລັບຕະຫຼາດໃໝ່ຄືປະເທດລາວ ແລະ ມີທ່າທີວ່າ ຟູດແພນດ້າ ຍັງມີອັດຕາການເຕີບໂຕໄດ້ຢ່າງຕໍ່ເນື່ອງອີກໃນປີ 2021 ເຊິ່ງເຫັນໄດ້ຈາກຍອດການສັ່ງອາຫານແບບອອນລາຍໃນແຕ່ລະເດືອນ ແລະ ຍອດຜູ້ຊົມໃຊ້ແອັບພຣິເຄຊັ້ນເພີ່ມຂຶ້ນ. ດ້ວຍເຫດນັ້ນ, ການເຕີບໂຕຂອງຮ້ານຄ້າ ກໍໝາຍເຖິງການເຕີບໃຫຍ່ຂະຫຍາຍຕົວທາງດ້ານບຸກຄະລາກອນຈັດສົ່ງອາຫານ ເຊິ່ງມາຮອດປັດຈຸບັນນີ້ມີໄຣເດີ ທີ່ພ້ອມແລ່ນຈັດສົ່ງອາຫານມີຫຼາຍກວ່າພັນຊີວິດໃນຂອບເຂດທົ່ວປະເທດ ກວມເອົາທັງໝົດມີ 10 ແຂວງ ແລະ ຍັງມີແຜນຂະຫຍາຍການບໍລິການ ໄປໃນຂອບເຂດທົ່ວປະເທດ ພາຍໃນ ປີ 2021.

ສິ່ງທີ່ເປັນຕົວກາລັນຕີໃຫ້ກັບ ຟູດແພນດ້າລາວ ໃນການຕັດສິນໃຈຂອງບັນດາຮ້ານອາຫານ ຮ້ານຄ້າ ໃຫ້ເຂົ້າມາຮ່ວມເປັນຄູ່ຄ້າທຸລະກິດ ກໍຄົງໜີບໍ່ພົ້ນຈຸດແຂງຂອງຟູດແພນດ້າທີ່ຍຶດຖືມາໂດຍຕະຫຼອດກໍຄື ລາຄາທີ່ຖືກກວ່າ ແລະ ການຈັດສົ່ງທີ່ວ່ອງໄວທັນໃຈ. ການໃສ່ໃຈເຖິງການສານສຳພັນກັບລູກຄ້າ ເອົາໃຈໃສ່ພັດທະນາສົ່ງເສີມການຂາຍທີ່ມີຄວາມຫຼາກຫຼາຍ.

ພວກເຮົາສັນຍາວ່າ ເຮົາຈະຄົງຄວາມເປັນມາຕະຖານໄວ້ ແລະ ພ້ອມທີ່ຈະພັດທະນາການບໍລິການຕ່າງໆໃຫ້ກ້າວທັນຕາມຍຸກສະໄຫມ ແລະ ເຂົ້າເຖິງທຸກພື້ນທີ່ທົ່ວປະເທດ ເພື່ອຊີວິດ ແລະ ການເປັນຢູ່ຂອງພີ່ນ້ອງຊາວລາວໃຫ້ດີຂຶ້ນໃນອານາຄົດກໍຄືໃນປີຕໍ່ໆໄປຂອງ ຟູດແພນດ້າ.

ກອງປະຊຸມໃຫຍ່ອົງຄະນະພັກກະຊວງ ຖະແຫລງຂ່າວ, ວັດທະນະທໍາ ແລະ ທ່ອງ ທ່ຽວ (ຖວທ) ຄັ້ງທີ V ໄຂຂຶ້ນຢ່າງເປັນທາງການ ໃນວັນຕອນເຊົ້າຂອງວັນທີ 10 ທັນ ວາ 2020 ທີ່ນະຄອນຫລວງວຽງຈັນ ພາຍໃຕ້ຄໍາຂວັນ “ການນໍາພາ ເຂັ້ມແຂງ, ການຄຸ້ມຄອງ ສັກສິດ, ຂ່າວສານ ທັນສະໄໝ, ວັດທະນະທໍາ ສີວິໄລ, ທ່ອງທ່ຽວຍືນຍົງ” ໂດຍການເປັນປະທານຂອງ ສະຫາຍ ກິແກ້ວ ໄຂຄໍາພິທູນ ເລຂາທິການສູນກາງພັກ, ເລຂາຄະນະພັກ, ລັດຖະມົນຕີກະຊວງ ຖວທ,

ໂດຍເປັນກຽດເຂົ້າຮ່ວມຂອງ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ພ້ອມດ້ວຍຮອງເລຂາ ແລະ ກໍາມະການໃນຄະນະພັກກະຊວງ ຖວທ, ພະນັກງານອາວຸໂສບຳນານ ແລະ ຜູ້ແທນສົມບູນ ຈຳນວນ 204 ສະຫາຍ, ຍິງ 63 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທົ່ວກະຊວງ ຖວທ ຈຳນວນ 849 ສະຫາຍ, ຍິງ 307 ສະຫາຍ ແລະ ແຂກຮັບເຊີນເຂົ້າຮ່ວມ. ກອງປະຊຸມໃຫຍ່ຄັ້ງນີ້ ຈະໄດ້ພິຈາລະນາຮັບຮອງເອົາບົດລາຍງານການເມືອງ, ບົດສໍາຫລວດການນໍາພາ ລວມຂອງຄະນະບໍລິຫານງານພັກກະຊວງ ຖວທ ສະໄໝທີ IV, ປ່ນບັດເລືອກຕັ້ງເອົາຄະນະພັກກະຊວງ ຖວທ ຊຸດໃໝ່ສະໄໝທີ V ເພື່ອເປັນຫລັກແຫລ່ງແກ່ນສານ ໃນການສືບຕໍ່ຊີ້ນໍາ-ນໍາພາວຽກງານ ຖວທ ໃນຊຸມປີຕໍ່ໜ້າ. ພ້ອມນີ້ ກອງປະຊຸມຍັງຈະໄດ້ເລືອກຕັັ້ງຜູ້ແທນສົມບູນ ແລະ ສຳຮອງ ເພື່ອເຂົ້າຮ່ວມກອງປະຊຸມໃຫຍ່ ຄັັ້ງທີ XI ຂອງພັກໃນຈະໄຂຂຶ້ນໃນຕໍ່ໜ້າ.

ນອກຈາກນີ້ ກອງປະຊຸມ ຈະໄດ້ຮັບຟັງການໂອ້ລົມຂອງ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ເພື່ອເປັນທິດທາງໃນການເຄື່ອນໄຫວວຽກ ງານຂອງ ຄະນະພັກຊຸດໃໝ່ ກໍຄື ບັນດາສະມາຊິກພັກທົ່ວກະຊວງ ຖວທ ຕື່ມອີກ.

ສະຫາຍ ກິແກ້ວ ໄຂຄໍາພິທູນ ກ່າວເປີດກອງປະຊຸມໃຫຍ່ ບາງຕອນວ່າ: ກອງປະຊຸມໃຫຍ່ຄັ້ງນີ້ ແມ່ນຂີດໝາຍສໍາຄັນທາງດ້ານການເມືອງຂອງທົ່ວກະຊວງ ຖວທ. ເປັນກອງປະຊຸມທີ່ມີເປົ້າໝາຍເພີ່ມທະວີຄຸນນະພາບການນໍາພາຂອງອົງຄະນະພັກ, ເຮັດໃຫ້ອົງຄະນະພັກມີຄວາມປອດໃສ, ເຂັ້ມແຂງ, ໜັກແໜ້ນ, ມີແບບແຜນວິທີເຮັດວຽກທີ່ດີ ແນໃສ່ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່.

ສະນັ້ນ, ຈຶ່ງ ຮຽກຮ້ອງໃຫ້ຜູ້ແທນກອງປະຊຸມໃຫຍ່ຈົ່ງໄດ້ເຊີດຊູຄວາມຮັບຜິດຊອບ, ເສີມຂະຫຍາຍປະຊາທິປະໄຕ, ສຸມຈິດໃຈ ແລະ ສະຕິປັນຍາເຂົ້າໃນການຄົ້ນຄວ້າປະກອບຄໍາຄິດຄໍາເຫັນຢ່າງເລິກເຊິ່ງ ແລະ ສ້າງສັນ, ມີວິທີວິທະຍາ ສາດໃນການຕຶກຕອງ ແລະ ຕົກລົງບັນຫາຢ່າງຖີ່ຖ້ວນ ບົນພື້ນຖານຫລັກໝັ້ນ, ທັດສະນະຊົນຊັ້ນ ແລະ ທັດສະນະພື້ນຖານຂອງພັກ ເພື່ອເຮັດໃຫ້ກອງປະຊຸມປະສົບຜົນສໍາເລັດຕາມຈຸດປະສົງລະດັບຄາດໝາຍທຸກປະການ.ຫລັງຈາກນັ້ນ, ສະຫາຍ ກິແກ້ວ ໄຂຄໍາພິທູນ ໄດ້ສະເໜີບົດລາຍງານທັງສອງພາກຕໍ່ກອງປະຊຸມ ໂດຍໄດ້ຍົກໃຫ້ເຫັນໄລຍະ 5 ປີຜ່ານມາ, ຄະນະພັກກະຊວງ ຖວທ ໄດ້ສຸມທຸກຄວາມສາມາດນໍາພາ-ຊີ້ນໍາວຽກງານຖະແຫລງຂ່າວ, ວັດທະນະທໍາ ແລະ ທ່ອງທ່ຽວໃຫ້ດໍາເນີນໄປຕາມແຜນ ແລະ ພັດທະນາຢ່າງຕໍ່ເນື່ອງ.ຄະນະພັກໄດ້ຖືວຽກງານແນວຄິດເປັນບູລິມະສິດ ໂດຍເອົາວຽກງານດັ່ງກ່າວ ຕິດພັນ ແລະ ເຊື່ອມສານເຂົ້າກັບການເຄື່ອນໄຫວໃນທຸກຂົງເຂດວຽກງານທົ່ວຂະແໜງ ຖວທ, ສ້າງເປັນແຜນ ການການເຄື່ອນໄຫວຊີ້ນໍາໃຫ້ທຸກໜ່ວຍພັກ ສຸມໃສ່ສຶກສາອົບຮົມການເມືອງ-ແນວຄິດ ຮັບປະກັນໃຫ້ສະມາຊິກພັກ-ພະນັກງານທົ່ວຄະນະພັກ ຮັກສາໄດ້ຄຸນທາດການເມືອງໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ການສຶກສາອົບຮົມການເມືອງ-ແນວຄິດໄດ້ຕິດພັນກັບການດໍາເນີນຊີວິດການເມືອງຂອງພັກຢ່າງເປັນປົກກະຕິຕໍ່ເນື່ອງ, ທັງເປັນການຊຸກຍູ້ສົ່ງເສີມດ້ານດີແກ້ໄຂຈຸດອ່ອນ-ຂໍ້ຄົງຄ້າງ ໃຫ້ເປັນຮູບປະທໍາຕົວຈິງ;

ການຈັດຕັ້ງພັກໄດ້ເຕີບໃຫຍ່ຂະຫຍາຍຕົວ ແລະ ໄດ້ຮັບການປັບປຸງທາງດ້ານປະລິມານ ແລະ ຄຸນນະພາບເທື່ອລະກ້າວ; ໄດ້ສຸມໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ໄດ້ຍົກສູງຄຸນນະພາບຂອງສະມາຊິກພັກ- ການຈັດຕັ້ງຮາກຖານພັກ ແລະ ໄດ້ປັບປຸງບູລະນະການຈັດຕັ້ງຮາກຖານພັກ-ສະມາຊິກພັກຕາມກົດລະບຽບຂອງພັກ. ມາຮອດປະຈຸບັນຍັງຮັກສາຈຳນວນ 2 ຮາກຖານພັກ ແລະ ມີ 42 ໜ່ວຍພັກ, ມີສະມາຊິກພັກທັງໝົດ 849 ສະຫາຍ, ໃນນັ້ນສະມາຊິກພັກປະຈໍາການ 718 ສະຫາຍ ກວມ 48,5% ຂອງຈໍານວນລັດຖະກອນ, ປີ 2019, ຜົນການກວດກາຕີລາຄາໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ມີ 27 ໜ່ວຍ ເທົ່າກັບ 60%; ໂຄງປະກອບຂອງຄະນະໜ່ວຍພັກ ແມ່ນຖືກຕາມທິດທີ່ກຳນົດໄວ້ ໃນການປະຕິບັດລະບອບຄວບຕຳແໜ່ງ, ຜູ້ເປັນເລຂາລ້ວນແຕ່ຄວບຕຳແໜ່ງຫົວໜ້າເບື້ອງລັດເປັນສ່ວນຫລາຍ, ດ້ານແບບແຜນວິທີເຮັດວຽກ, ວິທີນຳພາໄດ້ຮັບການປັບປຸງ ແລະ ມີການຫັນປ່ຽນໄປໃນທາງທີ່ດີຂຶ້ນ. ຄຽງຄູ່ກັນນັ້ນໄດ້ສຸມໃສ່ປັບປຸງກົງຈັກການຈັດຕັ້ງເບື້ອງລັດ ເພື່ອບໍ່ໃຫ້ມີການຊໍ້າຊ້ອນ ແລະ ກ້າວກ່າຍກັນ.

ສະຫາຍ ກິແກ້ວ ໄຂຄໍາພິທູນ ຍົກໃຫ້ເຫັນຕື່ມວ່າ: ຜ່ານການຊີ້ນຳນຳພາ ການຈັດຕັ້ງປະຕິບັດໃນໄລຍະຜ່ານ ເຫັນວ່າມີຜົນສຳເລັດພົ້ນເດັ່ນຫລາຍດ້ານ ເປັນຕົ້ນ ວຽກງານຖະແຫລງຂ່າວ-ສື່ມວນຊົນ ໄດ້ມີການເຕີບໃຫຍ່ຂະຫຍາຍຕົວ ນັບມື້ນັບມີຄຸນນະພາບສູງຂຶ້ນ, ສາມາດເຊື່ອມໂຍງພາກພື້ນ ແລະ ສາກົນນັບມື້ກວ້າງຂວາງ, ມີພື້ນຖານວັດຖຸເຕັກນິກທີ່ທັນສະໄໝ, ຂະຫຍາຍຕາໜ່າງຂ່າວສານກວມທົ່ວປະເທດຜ່ານລະບົບອິນເຕີເນັດ, ຫັນເປັນດີຈີຕອນ ແລະ ໄດ້ນໍາໃຊ້ດາວທຽມລາວ; ວຽກງານວັດທະນະທໍາ ໄດ້ສຸມໃສ່ການສ້າງຄອບຄົວ ແລະ ບ້ານວັດທະນະທໍາຢ່າງເປັນຂະບວນຟົດຟື້ນໃນຂອບເຂດທົ່ວປະເທດ, ມາຮອດປີ 2020 ສາມາດສ້າງຄອບຄົວວັດທະນະທໍາ ກວມເອົາ 77,1%, ສ້າງບ້ານວັດທະນະທໍາ ກວມເອົາ 77,5% ຂອງຈໍານວນຄອບຄົວ ແລະ ບ້ານທັງໝົດໃນທົ່ວປະເທດ;

ສຳລັບວຽກງານທ່ອງທ່ຽວ ໄດ້ມີນັກທ່ອງທ່ຽວສາກົນເຂົ້າມາປະເທດເຮົາ ຈໍານວນ 21.769.811 ເທື່ອຄົນ, ໃນໄລຍະການແຜ່ລະບາດພະຍາດໂຄວິດ-19, ນັບແຕ່ເດືອນ 1-9 ປີ 2020 ໄດ້ມີນັກທ່ອງທ່ຽວເຂົ້າມາຢ້ຽມຢາມ ສປປ ລາວ ທັງໜົດມີພຽງ 18% ຂອງຕົວເລກຄາດຄະເນໝົດປີ ແລະ ຄ່ອຍໆໜ້ອຍລົງ ໂດຍສະເລ່ຍຫລຸດລົງ -15,61% ແລະ ທຽບໃສ່ກັບ 9 ເດືອນ ປີ 2019 ໄລຍະດຽວກັນ ມີອັດຕາຫລຸດລົງ -74%. ເພື່ອເຮັດໃຫ້ຂົງເຂດວຽກງານງານ ຖວທ ມີຄວາມເຂັ້ມແຂງ ແລະ ໄດ້ຮັບການພັດທະນາດ້ວຍຜົນສໍາເລັດ ໃນຊຸມປີຕໍ່ໜ້າ ຄະນະພັກກະຊວງ ຖວທ ໄດ້ວາງຄາດ ໝາຍສູ້ຊົນ ດ້ານຕ່າງໆ ດັ່ງນີ້: ວຽກງານພັກ-ພະນັກງານ: ການປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ເພື່ອນໍາພາ-ຊີ້ນໍາການພັດທະນາ ແລະ ຄຸ້ມຄອງວຽກງານ ຖວທ ໃຫ້ໄປຕາມທິດທາງລວມທີ່ກໍານົດໄວ້; ວຽກງານຖະ ແຫລງຂ່າວ-ສື່ມວນຊົນ: ສ້າງລະບົບສື່ ທີ່ຢູ່ໃນການຄຸ້ມຄອງຂອງລັດໃຫ້ມີຄວາມເຂັ້ມແຂງ, ສາມາດປະຕິບັດບົດບາດນຳສະເໜີ ການຕົກລົງບັນຫາສຳຄັນຕ່າງໆຂອງລັດ ໄດ້ຮັບການສື່ສານຢ່າງເປັນລະບົບຕໍ່ເນື່ອງ, ວ່ອງໄວທັນການ, ຊັດເຈນ ໄປເຖິງທຸກເປົ້າໝາຍໃນສັງຄົມ; ວຽກງານວັດທະນະທໍາ:

ຜັນຂະຫຍາຍຍຸດທະສາດການພັດທະ ນາ ວັດທະນະທຳ ຮອດປີ 2030 ໂດຍປະຕິບັດໃຫ້ໄດ້ການອະນຸລັກຮັກສາ ແລະ ຟື້ນຟູມໍລະດົກດ້ານວັດຖຸລວມ ພ້ອມທັງຮ່ອງຮອຍປະຫວັດສາດຂອງຊາດ ໂດຍຕິດພັນກັບການເສີມຂະຫຍາຍຮີດຄອງປະເພນີອັນດີງາມຂອງຊາດ ແລະ ເຜົ່າ, ຕ້ານ ແລະ ແກ້ໄຂສິ່ງຫຍໍ້ທໍ້ຫລ້າຫລັງ. ສຳລັບວຽກງານທ່ອງທ່ຽວ: ຫັນການທ່ອງທ່ຽວເປັນອຸດ ສາຫະກຳ ແລະ ເພີ່ມທະວີການຄຸ້ມຄອງທ່ອງທ່ຽວຕາມລະບຽບກົດໝາຍໃຫ້ເຂັ້ມງວດ, ສ້າງແຫລ່ງທ່ອງທ່ຽວ ແລະ ຜະລິດຕະພັນການທ່ອງທ່ຽວໃຫ້ມີຄຸນນະພາບ, ມີຄວາມຫລາກຫລາຍໄດ້ມາດຕະຖານ, ມີເອກະລັກ ແລະ ມີຈຸດສຸມ ຕາມທ່າແຮງເງື່ອນໄຂຕົວຈິງ ແລະ ຕາມທິດສີຂຽວຍືນຍົງ, ສົ່ງເສີມໃຫ້ຄົນລາວຫັນມາສູ່ “ລາວທ່ຽວລາວ”, ໃຊ້ຈ່າຍພາຍໃນລາວ, ກະຈາຍລາຍໄດ້ສູ່ທ້ອງຖິ່ນຫລາຍຂຶ້ນໄປຄຽງຄູ່ກັບການໂຄສະນາລາວ ເພື່ອດຶງດູດນັກທ່ອງທ່ຽວຈາກຕ່າງປະເທດໃຫ້ຫລາຍຂຶ້ນ, ຍົກລະດັບສີມື ແລະ ຄຸນນະພາບ ການບໍລິການດ້ານການທ່ອງທ່ຽວໃຫ້ສູງຂຶ້ນ.

ໃນຕອນເຊົ້າຂອງວັນທີ 8 ທັນວາ 2020 ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມໃຫຍ່ສະມາຊິກພັກ ເພື່ອເລືອກເອົາຜູ້ແທນເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ, ໂດຍການເປັນປະທານຂອງ ສະຫາຍ ຄໍາເຈນ ວົງໂພສີ, ກຳມະການສູນກາງພັກ, ເລຂາຄະນະພັກ ຫ້ອງວ່າການສໍານັກງານນາຍົກລັດຖະມົນຕີ; ມີບັນດາສະຫາຍຄະນະພັກ ຫສນຍ, ຄະນະພັກຮາກຖານ, ຄະນະໜ່ວຍພັກ, ສະມາຊິກພັກສົມບູນ ແລະ ສະມາຊິກພັກອາວຸໂສບຳນານ ທົ່ວຫ້ອງວ່າການສໍານັກງານນາຍົກລັດຖະມົນຕີ ເຂົ້າຮ່ວມ 215 ສະຫາຍ.

ວາລະທໍາອິດ ຂອງກອງປະຊຸມ ໄດ້ຮັບຟັງການຜ່ານຮ່າງບົດສະຫຼຸບການນຳພາ-ຊີ້ນຳວຽກງານຜ່ານມາ (ນັບແຕ່ປີ 2017 ຫາ ກາງປີ 2020) ແລະ ທິດແຜນການໃນຕໍ່ໜ້າ ຂອງຄະນະບໍລິຫານງານພັກ ຫສນຍ ທີ່ສະເໜີໂດຍສະຫາຍ ຄໍາລາວັນ ຈັນທະລາວັນ, ຮອງເລຂາຄະນະພັກ ຫສນຍ, ຊຶ່ງເຫັນໄດ້ ຜົນສໍາເລັດທີ່ພົ້ນເດັ່ນຫຼາຍດ້ານ ເປັນຕົ້ນ ວຽກງານການເມືອງ-ແນວຄິດ; ວຽກງານຈັດຕັ້ງພັກ ແລະ ພະນັກງານ; ວຽກງານກໍ່ສ້າງພັກ, ຂະຫຍາຍພັກ; ວຽກງານກຽມກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫສນຍ; ວຽກງານວິຊາສະເພາະ ໂດຍສະເພາະໄດ້ເອົາໃຈໃສ່ວຽກງານການເປັນເສນາທິການ, ວຽກງານປະສານງານ, ວຽກງານບໍລິການຮັບໃຊ້ ການນຳເປັນຢ່າງດີ ລວມທັງ ວຽກງານຮ່ວມມືກັບຕ່າງປະເທດ, ວຽກງານກວດກາ.

ພ້ອມກັນນີ້, ວຽກອົງການຈັດຕັ້ງມະຫາຊົນ, ວຽກງານປ້ອງກັນຄວາມສະຫງົບ, ວຽກງານນະໂຍບາຍ ແລະ ອື່ນໆ ກໍ່ໄດ້ຮັບການຈັດຕັ້ງປະຕິບັດມີຜົນສຳເລັດ ຕາມແຜນທີ່ໄດ້ກຳນົດໄວ້. ຄຽງຄູ່ກັບດ້ານດີ, ຜົນສຳເລັດ ທີ່ຍາດມາໄດ້ ກໍ່ປາສະຈາກບໍ່ໄດ້ ຂໍ້ຄົງຄ້າງ ຊຶ່ງສະຫາຍ ຄໍາລາວັນ ຈັນທະລາວັນ ຍັງໄດ້ຍົກໃຫ້ເຫັນສາຍເຫດທີ່ພາໃຫ້ມີດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໃນການນໍາພາຊີ້ນໍາວຽກງານຂອງ ຫສນຍ ໃນໄລຍະຜ່ານ, ພ້ອມທັງ ສະ ເໜີທິດທາງແຜນການໃນທ້າຍສະໄໝ ທີ IV ຂອງຄະນະບໍລິຫານງານພັກ ຫສນຍ ຕື່ມອີກ. ຈາກນັ້ນ ກອງປະຊຸມ ໄດ້ພ້ອມກັນປ່ອນບັດຄັດເລືອກເອົາຜູ້ແທນ ທີ່ເປັນຕົວແທນຂອງອົງຄະນະພັກຫ້ອງວ່າການສໍານັກງານນາຍົກລັດຖະມົນຕີ ເພື່ອເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງພັກ, ຊຶ່ງມີຜູ້ສະໝັກທັງໝົດ 10 ສະຫາຍ, ໃນນັ້ນ ເລືອກເອົາຜູ້ແທນສົມບູນ 6 ສະຫາຍ ແລະ ຜູ້ແທນສໍາຮອງ 2 ສະຫາຍ.

ຜ່ານການປ່ອນບັດຄັດເລືອກ ໄດ້ຜູ້ແທນສົມບູນ ປະກອບມີ: ສະຫາຍ ຄໍາລາວັນ ຈັນທະລາວັນ, ສະຫາຍ ຄົມສັນ ໄຊຍະສານ, ສະຫາຍ ສະຖິດ ເພັດສິງເລືັອງ, ສະຫາຍ ປະເສີດສັກ ອຸເທນທະປັນຍາ,ສະຫາຍ ແສງທອງ ມະນີຈັນ ແລະ ສະຫາຍ ນາງ ບຸນໜັກ ຫຼວງລາດ; ສຳລັບຜູ້ແທນສໍາຮອງ ປະກອບມີ: ສະຫາຍ ຮສ. ປອ ສົມກຽດ ພະສີ ແລະ ສະຫາຍ ຈັນທະພອນ ແກ້ວມາລາວົງ.

ກອງປະຊຸມໄດ້ດຳເນີນໄປ ຖືກຕ້ອງຕາມກົດລະບຽບຂອງພັກ ແລະ ຄຳແນະນຳຂອງຄະນະເລຂາທິການສູນກາງພັກ, ພ້ອມທັງໄດ້ນຳໃຊ້ໄດ້ນຳໃຊ້ສິດປະຊາທິປະໄຕຂອງສະມາຊິກພັກ ດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມໄດ້ຮັບຜົນສຳເລັດອັນຈົບງາມ. ໃນຕອນທ້າຍຂອງກອງປະຊຸມ, ສະຫາຍ ຄໍາເຈນ ວົງໂພສີ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ອົງຄະນະພັກຫ້ອງວ່າການສໍານັກງານນາຍົກລັດຖະມົນຕີ ສາມາດຍາດມາໄດ້ໃນໄລຍະຜ່ານ ແລະ ຜົນຂອງການຄັດເລືອກເອົາຜູ້ແທນ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກ, ພ້ອມນັ້ນ ສະຫາຍ ຍັງໄດ້ເນັ້ນໜັກໃຫ້ເອົາໃຈໃສ່ບາງບັນຫາສຳຄັນຕື່ມ ເປັນຕົ້ນ ໃຫ້ບັນດາສະຫາຍ ຜູ້ແທນສົມບູນ ແລະ ສຳຮອງ ກຽມຄວາມພ້ອມທາງດ້ານເນື້ອໃນ ກໍ່ຄືນຳເອົາຄວາມຄິດເຫັນຂອງອົງຄະນະພັກ ຫສນຍ ເພື່ອນໍາສະເໜີຕໍ່ກອງປະຊຸມໃຫຍ່ຄັ້ງທີ XI ຂອງພັກ, ພ້ອມທັງຮັກສາສຸຂະພາບຂອງຕົນ ໃຫ້ສາມາດເຂົ້າຮ່ວມຕະຫຼອດໄລຍະດຳເນີນກອງປະຊຸມ; ໃຫ້ບັນດາອານຸກໍາມະການກະກຽມດໍາເນີນກອງປະຊຸມໃຫຍ່ ຄັ້ງທີ V ອົງຄະນະພັກ ຫສນຍ ສືບຕໍ່ກະກຽມ ແລະ ກວດກາຄືນ ບັນດາວຽກງານຂອງຕົນ ໃຫ້ມີຄວາມພ້ອມຮອບດ້ານ ເພື່ອເຮັດໃຫ້ກອງປະຊຸມໃຫຍ່ ຄັ້ງທີ V ຂອງອົງຄະນະພັກ ຫສນຍ ສາມາດດໍາເນີນໄປໄດ້ຕາມກຳນົດເວລາ, ບັນລຸຕາມຈຸດປະສົງ ແລະ ຄາດໝາຍ ທີ່ວາງໄວ້ຢ່າງຈົບງາມ,

ອັນສຳຄັນ ແມ່ນຕ້ອງປັບປຸງຮ່າງບົດລາຍງານການເມືອງ ແລະ ຮ່າງແຜນພັດທະນາວຽກງານວິຊາສະເພາະຂອງ ຫສນຍ, ຊຶ່ງສອງເອກະສານດັ່ງກ່າວ ຕ້ອງໃຫ້ກົມກຽວ ໄປລວງດຽວກັນ ແລະ ຕິດພັນກັນຢ່າງສະໜິດແໜ້ນ; ແຕ່ລະອານຸກຳມະການ ສືບຕໍ່ປຶກສາຫາລືກັນ ໂດຍມີການແບ່ງຄວາມຮັບຜິດຊອບ ຢ່າງລະອຽດ, ຈະແຈ້ງ, ຮັບປະກັນຄວາມພ້ອມ, ປະສິດທິພາບ ແລະ ປະສິດທິຜົນ ຂອງວຽກງານ; ສຳລັບ ວຽກງານຂະບວນການ ແມ່ນໃຫ້ເຄື່ອນໄຫວ ຕິດພັນກັບ ໜ້າທີ່ການເມືອງ, ວຽກງານວິຊາສະເພາະ ກໍ່ຄືເນື້ອໃນຂໍ້ແຂ່ງຂັນ 3 ດີ ຂອງ ຫສນຍ, ຄຳຂວັນຂອງອົງການຈັດຕັ້ງມະຫາຊົນ ແລະ ຂໍ້ແຂ່ງຂັນຮັກຊາດ ແລະ ພັດທະນາ. ພ້ອມກັນນີ້ ໃຫ້ສະມາຊິກພັກ ຂອງ ຫສນຍ ທຸກສະຫາຍ ສືບຕໍ່ມູນເຊື້ອອັນດີງາມ, ຝຶກຝົນຫຼໍ່ຫຼອມຕົນເອງ ທາງດ້ານການເມືອງແນວຄິດ, ຄຸນສົມບັດ-ສິນທຳປະຕິວັດ, ທາງດ້ານວິຊາສະເພາະ, ມີຄວາມສາມັກຄີປອງດອງ ເພື່ອເຮັດສຳເລັດໃນໜ້າທີ່ການເມືອງ ທີ່ຖືກມອບໝາຍ.

ພາບ ແລະ ຂ່າວ: ກົມປະຊາສຳພັນ ຫສນຍ

ວັນທີ 4 ທັນວາ 2020 ຜ່ານມາ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ເປັນກຽດຕ້ອນຮັບ ທ່ານ ສົມດີ ດວງດີ #ຮອງນາຍົກລັດຖະມົນຕີ, ລັດຖະ ມົນຕີກະຊວງການເງິນ, ພ້ອມດ້ວຍຄະນະ ໃນໂອກາດລົງເຄື່ອນໄຫວຢ້ຽມຢາມ ແລະ ຊີ້ນຳວຽກງານ ຢູ່ #ແຂວງຈຳປາສັກ.

ທ່ານເຈົ້າແຂວງຈຳປາສັກ, ໄດ້ລາຍງານໃຫ້ຮູ້ເຖິງ ຜົນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ໄລຍະ 9 ເດືອນ ປີ 2020, ດ້ານເສດຖະກິດມະຫາພາກ ເຫັນວ່າໃນ 9 ເດືອນປີ 2020 ລວມຍອດຜະລິດຕະພັນພາຍໃນ ຫລື GDP ປະຕິບັດໄດ້ 12.620,76 ຕື້ກີບ (ແຜນ 20.101,07 ຕື້ກີບ) ທຽບໃສ່ແຜນປີປະຕິບັດໄດ້ 62,78%, ສະເລັ່ຍຕໍ່ຫົວຄົນໄດ້ 1.889 ໂດລາສະຫະລັດຕໍ່ຄົນ ຫລື ເທົ່າກັບ 16,96 ລ້ານກີບຕໍ່ຄົນ; ການເກັບລາຍຮັບງົບປະມານ ປະຕິບັດໄດ້ 1.034,71 ຕື້ກີບ, ທຽບໃສ່ແຜນປີດັດແກ້ປະຕິບັດໄດ້ 71,05%,

ໃນນັ້ນ: ລາຍຮັບຂອງສູນກາງ 623,35 ຕື້ກີບ ທຽບໃສ່ແຜນ ປີດັດແກ້ ປະຕິບັດໄດ້ 75,48% ແລະ ລາຍຮັບຂອງແຂວງ 411,36 ຕື້ກີບທຽບໃສ່ແຜນປີດັດແກ້ປະຕິບັດໄດ້ 65,27%. ສໍາລັບການ ຄຸ້ມຄອງ ລາຍຈ່າຍງົບປະມານ ປະຕິບັດໄດ້ 575,19 ຕື້ກີບ, ທຽບໃສ່ແຜນປີດັດແກ້ ປະຕິບັດໄດ້ 76,08% ແລະ ຮັບຮອງເອົາ ບົດລາຍງານ ການເມືອງແຂວງ ໂດຍສຸມໃສ່ກຳນົດເອົາວຽກງານ ພັດທະນາຊົນນະບົດ ລຶບລ້າງຄວາມທຸກຍາກ ລົງເລິກສ້າງ ບ້ານພັດທະນາ ປະຊາຊົນຢູ່ດີ ກິນດີ ເປັນວຽກຈຸດສຸມ ແລະ ຈະໄດ້ທົດສອບ ຢູ່ບັນດາເມືອງທີ່ມີເງື່ອນໄຂ.

ໂອກາດນີ້, ທ່ານ ສົມດີ ດວງດີ ກໍໄດ້ສະແດງຄວາມຍ້ອງຍໍ ຊົມເຊີຍ ຕໍ່ຜົນສຳເລັດ ອັນຈົບງານ ຂອງກອງປະຊຸມໃຫຍ່ ຄັ້ງທີ VIII ອົງຄະນະພັກ ແຂວງຈຳປາສັກ ແລະ ໃຫ້ພ້ອມກັນສືບຕໍ່ ຜັນຂະຫຍາຍມະຕິກອງປະຊຸມ, ນຳພາຈັດຕັ້ງປະຕິບັດ ແຜນພັດທະນາ ເສດ ຖະກິດ-ສັງຄົມ ຢູ່ແຂວງຈຳປາສັກ ໃຫ້ດີຍິ່ງໆຂຶ້ນ. ພ້ອມນີ້, ທ່ານຍັງໃຫ້ຮູ້ອີກວ່າ ການມາເຄື່ອນໄຫວ ຄັ້ງນີ້ ກໍເພື່ອຊຸກຍູ້ການສຳຫລວດ ສະຖິຕິກະສິກຳທົ່ວປະເທດ ໂດຍສະເພາະ ຢູ່ແຂວງຈຳປາສັກ, ລົງຕິດຕາມຊຸກຍູ້, ໃຫ້ທິດຊີ້ນຳ ຄະນະຊີ້ນຳ ລະດັບແຂວງ, ຫ້ອງການສຳຫລວດຂັ້ນແຂວງ ແລະ ອຳນາດການປົກຄອງແຕ່ລະຂັ້ນ ເພື່ອອຳນວຍຄວາມສະດວກ ໃນການລົງ ສຳຫລວດພາກສະໜາມ ໃຫ້ສາມາດປະຕິບັດ ໄດ້ຕາມແຜນທີ່ກຳນົດ ແລະ ຮັບຟັງການລາຍງານ ບັນຫາຕ່າງໆ ຂອງແຂວງ ແລະໃຫ້ທິດຊີ້ນຳ ຊຸກຍູ້ໃຫ້ ແຂວງໃນການ ແກ້ໄຂບັນຫາຕ່າງໆ ເພື່ອໃຫ້ການສຳຫວດ ໄດ້ຖືກຈັດຕັ້ງປະຕິບັດ ສະເລັດຕາມ ຈຸດປະສົງຄາດ ໝາຍ ແລະ ຊຸກຍູ້ວຽກງານ ການຈັດເກັບລາຍຮັບ ຢູ່ແຂວງຈຳປາສັກ ແລະ ໄດ້ມາ ເຜີຍແຜ່ ກົດໝາຍ ວ່າດ້ວຍ ພາສີ ສະບັບປັບປຸງ ໃຫ້ແກ່ການນໍາແຂວງ ແລະ ເຈົ້າໜ້າທີ່ກ່ຽວຂ້ອງ ໃນ 6 ແຂວງພາກກາງ-ພາກໃຕ້ ທີ່ຈັດຂຶ້ນຢູ່ແຂວງຈຳປາສັກ.

ຂ່າວ: ທັດຊະນະ
ພາບ:ເກດສະໜາ

ພັນໂທ ກອງມະນີ ຊົມມີໄຊ ຫົວໜ້າຄະນະຄຸ້ມຄອງດ່ານສາກົນແດນສະຫວັນໄດ້ຖະແຫຼງຂ່າວຊີ້ແຈງ ໃນວັນທີ 4 ທັນວາ 2020 ນີ້ ກ່ຽວກັບເຫດການຂອງລົດຫີນກາວ ທີ່ເກີດອັກຄີໄພໄໝ້ ຢູ່ຈຸດກວດກາສິນຄ້າຂອງເຈົ້າໜ້າທີ່ພາສີດ່ານສາກົນແດນສະຫວັນ ໃນເວລາ 8 ໂມງ 20 ນາທີ ຂອງວັນທີ 3 ທັນວາ 2020 ໄດ້ມີລົດຂົນສົ່ງຫີນກາວຈໍານວນ 3 ຄັນ, ເດີນທາງມາຈາກບໍ່ຫີນກາວ ໂຄກຫີນແກ້ວ ເມືອງຈຳພອນ ແຂວງສະຫວັນນະເຂດ ເພື່ອຂົນສົ່ງຫີນກາວໄປຍັງ ສສ ຫວຽດນາມ ຜ່ານດ່ານສາກົນແດນສະຫວັນ

ເມື່ອລົດມາຮອດສະຖານທີກວດກາສິນຄ້າຂອງເຈົ້າໜ້າທີ່ພາສີປະຈຳດ່ານ ລົດທັງສາມຄັນກໍ່ໄດ້ແລ່ນເຂົ້າມາຈອດຢູ່ຈຸດກວດກາ ເພື່ອໃຫ້ເຈົ້າໜ້າທີ່ພາສີປະຈຳສາງກວດກາສິນຄ້າ ເພື່ອສົ່ງອອກຕ່າງປະເທດຕາມລະບຽບການ, ໃນເວລານັ້ນ ເຈົ້າໜ້າທີ່ພາສີໄດ້ໃຫ້ກຳມະກອນ ຈຳນວນ 8 ຄົນ ຊ່ວຍກວດຄົ້ນຫີນກາວຢູ່ເທິງລົດ ໂດຍພາຍໃຕ້ການຊີ້ນຳທາງດ້ານວິຊາສະເພາະຂອງເຈົ້າໜ້າທີ່ພາສີ,

ຈຸດປະສົງຂອງການກວດຄົ້ນແມ່ນກວດຄົ້ນຫາສິນຄ້າທີ່ຜິດກົດໝາຍ ທີ່ອາດມີການລັກລອບຊຸກເຊືອງມານຳພາຫະນະຈຳນວນດັ່ງກ່າວ, ໃນຂະນະທີ່ກວດກາຢູ່ນັ້ນກຳມະກອນກໍ່ໄດ້ພົບເຫັນຄວັນໄຟເກີດຂື້ນຈາກທ້ອງພື້ນລົດ ພ້ອມດ້ວຍປະກາຍໄຟລຸກຂື້ນຢ່າງຮຸນແຮງ ແລະ ພາໃຫ້ເກີດມີສຽງແຕກຂື້ນ ຄ້າຍຄືສຽງລະເບີດ ພາໃຫ້ເກີດມີໄຟໄໝ້ລຸກລາມເປັນບໍລິເວນກວ້າງ ພ້ອມດ້ວຍມີພຸໄຟແຕກອອກຈາກຖັງກະບະລົດຫີນກາວເປັນຈຳນວນຫຼາຍ ແລະ ຝົງປີວໄປໃສຖັງນ້ຳມັນທີ່ເຈົ້າໜ້າທີ່ພາສີຢືດໃນສາງ, ບໍລິເວນໃກ້ຄຽງກໍ່ໃຫ້ເກີດມີສຽງແຕກດັງຂື້ນຄ້າຍຄືສຽງລະເບີດ ແລະ ເປັນປະກາຍຢ່າງຮຸນແຮງ, ເປັນສາເຫດໃຫ້ເກີດມີຜູ້ບາດເຈັບຈຳນວນ 8 ຄົນ, ໃນນັ້ນເປັນຄົນລາວ 3 ຄົນ, ຍິງ 1 ຄົນ, ຄົນຫວຽດນາມ 5 ຄົນ ແລະ ເສຍຊີວິດກັບທີ 3 ຄົນ, ຍິງ 1 ຄົນ, ໃນນັ້ນ ມີຄົນລາວ 2 ຄົນເພດຊາຍ, ຄົນຫວຽດນາມ 1 ຄົນເພດຍິງ.

ສ່ວນຜົນເສຍຫາຍທາງດ້ານຊັບສິນໃນເບື້ອງຕົ້ນທີ່ເກີດຂື້ນຈາກເຫດໄຟລຸກໄໝ້ຢູ່ລົດຫີນກາວຄັ້ງນີ້ ມີສາງກາງແຈ້ງຈຳນວນ 2 ຫຼັງ, ສາງສຳລັບໄວ້ລົດເອັກສະເລ 1 ຫຼັງ, ຫ້ອງການບ່ອນເຮັດວຽກກວດກາຂອງເຈົ້າໜ້າທີ່ພາສີ 1 ຫຼັງ, ພາຫະນະຂົນສົ່ງສິນຄ້າ 4 ຄັນ, ພາຫະນະປະເພດລົດກະບະຂອງລັດ 1 ຄັນ ແລະ ລົດກະບະສ່ວນບຸກຄົນ 1 ຄັນ.

ຕໍ່ກັບເຫດການທີ່ເກີດຂື້ນໃນຄັ້ງນີ້ ເຈົ້າໜ້າທີ່ອົງການສຶບສວນ-ສອບສວນ ກອງບັນຊາການ ປກສ ແຂວງ, ເຈົ້າໜ້າທີ່ກອງບັນຊາການ ປກສ ເມືອງເຊໂປນ ແລະ ພາກສ່ວນກ່ຽວຂ້ອງຂອງດ່ານສາກົນແດນສະຫວັນ ກຳລັງດຳເນີນການເກັບກຳຂໍ້ມູນ ແລະ ດຳເນີນການສຶບສວນ-ສອບສວນ, ສ່ວນລາຍລະອຽດມີຄວາມຄືບໜ້າແນວໃດແມ່ນຈະລາຍງານໃຫ້ຮັບຊາບຕື່ມ. ຕໍ່ກັບສະພາບເຫດການທີ່ເກີດຂື້ນຄັ້ງນີ້ແມ່ນເກີດຂື້ນຍ້ອນອຸບັດຕິເຫດ, ບໍ່ແມ່ນການວາງລະເບີດແຕ່ຢ່າງໃດ.

ດັ່ງນັ້ນ ທາງຄະນະຄຸ້ມຄອງດ່ານສາກົນແດນສະຫວັນ ຈຶ່ງຂໍຊີ້ແຈ້ງຄວາມເປັນຈິງໃນເຫດການທີ່ເກີດຂື້ນໃນຄັ້ງນີ້ ເພື່ອໃຫ້ສັງຄົມໄດ້ຮັບຮູ້ ແລະ ເຂົ້າໃຈ ເພື່ອບໍ່ຢາກໃຫ້ສັງຄົມຮັບຮູ້ຂໍ້ມູນຂ່າວສານທີ່ບໍ່ຖືກຕ້ອງ ແລະ ບໍ່ມີມູນຄວາມຈິງທີ່ໄດ້ສົ່ງອອກໄປກ່ອນໜ້ານີ້ ທາງສື່ອອນລາຍນັ້ນ.

ສ່ວນລາຍລະອຽດມີຄວາມຄືບໜ້າເປັນແນວໃດ ທາງຄະນະຄຸ້ມຄອງດ່ານຂອງພວກເຮົາຈະຖະແຫຼງການໃຫ້ສັງຄົມຮັບຮູ້ຕື່ມອີກພາຍຫຼັງ.