ໃນວັນທີ 11 ມັງກອນ 2021 ທີ່ສໍານັກງານໃຫຍ່ລັດວິສາຫະກິດໄຟຟ້າລາວ ໄດ້ຈັດພິທີເປີດ ນໍາໃຊ້ສາຍດ່ວນລັດວິສາຫະກິດໄຟຟ້າລາວ ( CALL Center 1199) ແລະ EDL mobile Application  ໂດຍການເປັນປະທານຂອງ ທ່ານ ປະລິນຍາເອກ ຄໍາມະນີ ອິນທິລາດ ກໍາມະການສູນກາງ ພັກ ເລຂາຄະນະພັກກະຊວງ ລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດໄຟຟ້າ, ​ແຂກທີ່ຖືກເຊີນຈາກ ພາກສ່ວນທີ່ກ່ຽວຂ້ອງເຂົ້າ ຮ່ວມ​ພ້ອມດ້ວຍບໍລິສັດຜູ້ພັດທະນາ ກໍຄືບໍລິສັດ ສີສເມຕິກ ໄອທີ ໂຊລູຊັ່ນ ຈໍາກັດ (Sysmatik IT Solution Co.,Ltd).

ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວລັດວິສາຫະກິດໄຟຟ້າລາວ ກ່າວວ່າ:  ໃນ​ຖານະ​ເປັນ​ວິ​ສາ​ຫະກິດຂອງ​ລັດ, ລັດວິສາຫະກິດໄຟຟ້ລາວຍາ​ມ​ໃດ​ກໍ່​ໄດ້​ສຸມ​ທຸກ​ຄວາມອາດ​ສາມາດ ​ເພື່ອ​ສູ້​ຊົນ​ເຮັດ​ຫຼ້ອນ 2 ໜ້າທີ່ຫຼັກ ທີ່​ພັກ-ລັດ ກໍ່ຄືປະຊາຊົນ ​ແລະ ປະ​ເທດ​ຊາດ​ມອບ​ໝາຍ​ໃຫ້ ດ້ວຍການສະໜອງໄຟຟ້າໃຫ້ພຽງພໍ ແລະທົ່ວເຖິງໃນຂອບເຂດທົ່ວປະເທດ, ພ້ອມດຽວກັນນັ້ນກໍ່ຕ້ອງ ດໍາເນີນທຸລະກິດໃຫ້ມີຜົນກໍາໄລ ດ້ວຍລາຄາໄຟທີ່ສົມເຫດສົມຜົນ​ແລະຕໍ່າກວ່າປະເທດອ້ອມຂ້າງ ເຖິງແມ່ນ ຟຟລ​ ບໍ່ມີເຂື່ອນໄຟຟ້າເປັນຂອງຕົນເອງ ແລະຕ້ອງມີຕົ້ນທືນສູງໃນການຊື້ໄຟ​ ແຕ່ ​ຟຟລ ​ມີແຜນຮັດກຸມລາຍຈ່າຍ,​ ຫາລາຍຮັບເພີ່ມຈາກຊັບສິນ ແລະ ທ່າແຮງຂອງບໍລິສັດທີ່ເຂົ້າເຖິງ 95% ຂອງຄົວເຮືອນໃນທົ່ວປະເທດ ເຊີ່ງບາງການປ່ຽນແປງໃໝ່ຈະປະກົດຂື້ນໃນອານາຄົດອັນໃກ້, ຄຽງຄູ່ກັບການໃຫ້ຄວາມສໍາຄັນວຽກ ງານການບໍລິກາານລູກຄ້າ-ບໍລິການປະຊາຊົນ, ການຂະຫຍາຍ​ຕາຂ່າຍໄຟຟ້າ​, ແຫຼ່ງຜະລິດ ແລະ ສະຖານີ-ສາຍສົ່ງໄຟຟ້າ ໃຫ້​ທົ່ວ​ເຖິງ​ໃນ​ທົ່ວ​ປະ​ເທດ ເພື່ອຮັບປະກັນການ​ສະໜອງ​ໄຟຟ້າ​ຮັບ​ໃຊ້ເຂົ້າໃນ​ການ​ຜະລິດ, ສຳ​ນັກ​ງານ​ອົງການ ​ແລະ ການດໍາລົງຊີວິດຂອງປະຊາຊົນ​ບັນດາ​ເຜົ່າ​ ໃຫ້​ພຽງພໍ​ຕໍ່​ເນື່ອງ ​ແລະ ມີຄວາມສະຖຽນລະພາບ. ສະນັ້ນ ສູນບໍລິການສາຍດ່ວນ ລັດວິສາຫະກິດໄຟຟ້າລາວ 1199 ແລະ EDL mobile Application ຈຶ່ງເປັນໂຄງການທີ່ລັດວິສາຫະກິດໄຟຟ້າລາວ ເອົາໃຈໃສ່ໃນການພັດທະນາ ເພື່ອຫັນວຽກ ງານການບໍລິການໃຫ້ກ້າວສູ່ທັນ ສະໄໝ ແລະ ມາດຕະຖານລະດັບສາກົນ.

ທ່ານຍັງໄດ້ກ່າວອີກວ່າສາຍດ່ວນລັດວິສາຫະກິດໄຟຟ້າລາວ 1199 ( CALL Center 1199 ) ເປັນໂຄງການຮ່ວມມື ກັນລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ ສີສເມຕິກ ໄອທີ ໂຊລູຊັນ ຈໍາກັດ ເພື່ອພັດທະນາ ແລະ ປັບປຸງລະບົບCALL Center ແລະ EDL mobile Application ຂອງ ຟຟລ ໃຫ້ທຽບເທົ່າ ກັບລະບົບທີ່ທັນສະໄໝທຽບເທົ່າກັບສາກົນ, ສາຍດ່ວນລັດວິສາຫະກິດໄຟຟ້າລາວ 1199   ມີສູນກາງຕັ້ງຢູ່ ສໍານັກງານໃຫຍ່ລັດວິສາຫະກິດໄຟຟ້າລາວ  (ຊັ້ນ10)ເພື່ອພັດທະນາລະບົບ ສາຍດ່ວນທີ່ມີຢູ່ໃນປະຈຸບັນຈາກ 10 ຄູ່ສາຍ ມາເປັນ 30 ຄູ່ສາຍ ເພື່ອຮອງຮັບການແຈ້ງເຫດກ່ຽວກັບໄຟຟ້າ ຕະຫຼອດ 24 ຊົ່ວໂມງ ແລະ ການສົ່ງວຽກ, ລາຍງານວຽກ ເພື່ອແກ້ໄຂວຽກງານພາກສະໜາມແບບອອນລາຍ ນອກນັ້ນຍັງໄດ້ພັດທະນາລະບົບ EDL mobile Application ໄປຄຽງຄູ່ກັນເພື່ອຕອບສະໜອງເຊື່ອມຕໍ່ກັບລະບົບ Call Center Server ຂອງ ຟຟລ ເພື່ອໃຫ້ບໍລິການແກ່ລູກຄ້າຂອງ ຟຟລ ໂດຍສະເພາະແມ່ນຂໍ້ມູນການຊົມໃຊ້ໄຟຟ້າແບບ Automatic ເຊັ່ນ: ການກວດເບິ່ງປະຫວັດການຊົມໃຊ້ໄຟຟ້າ,ການຊໍາລະເງິນຄ່າກະແສໄຟຟ້າ, ການແຈ້ງເຫດໄຟຟ້າຂັດຂ້ອງ, ແຈ້ງການມອດໄຟ, ຂໍ້ມູນຂ່າວສານກ່ຽວກັບໄຟຟ້າ, ການຂໍຊົມໃຊ້ໄຟຟ້າໃໝ່ ແລະ ຂໍ້ມູນອື່ນໆທີ່ກ່ຽວຂ້ອງ. ແລະ ໃນອານາຄົດ ແມ່ນຈະໄດ້ສືບຕໍ່ພັດທະນາລະບົບ ໃຫ້ກວມເອົາທຸກສາຂາໃນທົ່ວປະເທດ​ ແລະສາມາດຈ່າຍເງິນໄດ້ໂດຍກົງຜ່ານ EDL​ mobile App. 

ທ່ານ ປະລິນຍາເອກ ຄໍາມະນີ ອິນທິລາດ ກ່າວວ່າ: ຜົນສໍາເລັດຂອງການພັດທະນາ ສູນບໍລິການສາຍດ່ວນ 1199 ແລະ EDL mobile Application ເປັນຄວາມພະຍາຍາມຂອງ ລັດວິສະຫະກິດໄຟຟ້າລາວ ການສະໜອງນະໂຍບາຍຂອງລັດຖະບານ ເພື່ອຍົກລະດັບການບໍລິການ ທີ່ມີຄວາມທັນສະໄໝ ທັງເປັນການສ້າງຄວາມໝັ້ນໃຈໃຫ້ກັບຜູ້ຊົມໄຊ້ໄຟຟ້າ.

ທ່ານ ປະລິນຍາເອກ ຄໍາມະນີ ອິນທິລາດ ກ່າວວ່າ: ຜົນສໍາເລັດຂອງການພັດທະນາ ສູນບໍລິການສາຍດ່ວນ 1199 ແລະ EDL mobile Application ເປັນຄວາມພະຍາຍາມຂອງ ລັດວິສະຫະກິດໄຟຟ້າລາວ ການສະໜອງນະໂຍບາຍຂອງລັດຖະບານ ເພື່ອຍົກລະດັບການບໍລິການ ທີ່ມີຄວາມທັນສະໄໝ ທັງເປັນການສ້າງຄວາມໝັ້ນໃຈໃຫ້ກັບຜູ້ຊົມໄຊ້ໄຟຟ້າ.

ທ່ານ ວິຈິດ ຊິນດາວົງ , ປະທານສະພາບໍລິຫານ ບໍ​ລິ​ສັດ ສີ​ສ​ເມ​ຕິກ ໄອ​ທີ ໂຊ​ລູ​ຊັ່ນ ຈຳ​ກັດ ໄດ້ກ່າວວ່າ: “ພິທີເປີດການນໍາໃຊ້ສາຍດ່ວນລັດວິສາຫະກິດ ໄຟຟ້າລາວ 1199 ແລະ EDL Mobile application ໃນມື້ນີ້ ເປັນນິມິດໝາຍອັນດີ ແລະ ຂີດໝາຍອັນສຳຄັນຂອງການຮ່ວມມື ລະຫວ່າງ ບໍລິສັດ ສີສເມຕິກ ໄອທີ ໂຊລູຊັ່ນ ຈໍາກັດ ແລະ ລັດວິສາຫະກິດ ໄຟຟ້າລາວ ກໍ່ຄືລັດຖະບານເພື່ອ ຮ່ວມກັນພັດທະນາ ລະບົບສາຍດ່ວນ ຂອງລັດວິສາຫະກິດໄຟຟ້າລາວ ໃຫ້ທັນສະໄໝ

ບໍລິສັດ ສິສເມຕິກ ໄອທີ ໂຊລູຊັ່ນ ຈໍາກັດ ເປັນບໍລິສັດໜຶ່ງຢູ່ພາຍໃຕ້ກຸ່ມ ບໍລິສັດ ເອໄອເອັຟ ໄດ້ດໍາເນີນທຸລະກິດ ໃນຂົງເຂດການບໍລິການດ້ານເຕັກໂນໂລຊີຂໍ້ມູນຂ່າວສານ ນັບແຕ່ປີ 2013 ເປັນຕົ້ນມາ ໂດຍມີຈຸດປະສົງ ເພື່ອສະໜອງການບໍລິການ  ພັດທະນາລະບົບໄອທີຮອບດ້ານ, ລະບົບພື້ນຖານໂຄງລ່າງໄອທີ ລວມໄປເຖິງ ລະບົບຊໍາລະສະສາງອອນລາຍ(Payment gateway). ໃນໄລຍະຜ່ານມາ ບໍລິສັດ ສິສເມຕິກ ໄດ້ມີຜົນງານທີ່ພົ້ນເດັ່ນ ຈຳນວນໜຶ່ງ ເຊັ່ນ ອອກແບບລະບົບເຕັກໂນໂລຊີ່ພື້ນຖານໂຄງລ່າງຂອງທະນາຄານແຫ່ງ ສປປ ລາວ,  ການບໍລິການລະ ບົບຊໍາລະສະສາງອອນລາຍ(Payment gateway) ໃຫ້ແກ່ ລັດວິສາຫະກິດ ການບິນລາວແລະ ສະໜອງອຸປະກອນໄອທີໃຫ້ແກ່ ບັນດາທະນາຄານ ເປັນຕົ້ນແມ່ນ BCEL ແລະ ອື່ນໆ.

ໃນທ້າຍເດືອນ ທັນວາ 2020 ຜ່ານມານີ້, ຢູ່ທີ່ວັດບ້ານ ກາງປາເມືອງໄຊບູລີ ແຂວງສະຫວັນນະເຂດ ໄດ້ຈັດພິທີປິດໂຄງການສົ່ງເສີມການອະນຸລັກປ່າໄມ້ ແລະບຶງທໍາມະຊາດ ບຶງຂາເປຍ ແບບມີສ່ວນຮ່ວມຂອງປະຊາຊົນຊາວບ້ານກ້າງປາ ໂດຍການໃຫ້ກຽດເຂົ້າຮ່ວມເປັນປະທານ ຂອງທ່ານ ອ່ອນລໍາພັນ ບົວສີແກ້ວ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໄຊບູລີ, ທ່ານ ນາງ ສົມເດັດແພງວົງສັກ ກໍາມະການພັກເມືອງ ປະທານ ສະຫະພັນແມ່ຍິງເມືອງ, ທ່ານ ຄໍາໝັ້ນ ສຸພິຫາລາດ ກໍາມະການພັກເມືຶອງ ຫົວໜ້າຫ້ອງວ່າການປົກຄອງເມືອງ, ມີພະນັກງານ, ວິຊາການກ່ຽວຂ້ອງ,ຜູ້ຊີ້ໂຄງການ, ອໍານາດການປົກຄອງບ້ານ, ຕະຫຼອດຮອດປະຊາຊົນຊາວບ້ານກ້າງປາເຂົ້າຮ່ວມ

ໃນພິທີຍັງໄດ້ຜ່ານການລາຍງານການຈັດຕັ້ງປະຕິບັດວຽກງານຂອງໂຄງການ, ເຊິ່ງໂຄງການສົ່ງເສີມອະນຸລັກປ່າໄມ້ ແລະບຶງທໍາມະຊາດ ບຶງຂາເປຍແບບມີສ່ວນຮ່ວມຂອງປະຊາຊົນ ບ້ານກ້າງປາ ຜູ້ໃຫ້ທຶນແມ່ນ ກອງທຶນສິ່ງແວດລ້ອມໂລກ(GEF) ແຜນງານໂຄງການຂະໜາດນ້ອຍ ( SGP)ໂດຍຜ່ານອົງການສະຫະປະຊາຊາດເພື່ອການພັດທະນາ (UNDP)ໂດຍຜູ້ຮັບທຶນ ສະຫະພັນແມ່ຍິງ ມູນຄ່າຂອງໂຄງການທັງໝົດ 25.950 ໂດລາສະຫາລັດ ໂຄງການໄດ້ເຊັນສັນຍາເດືອນ ມີນາ 2019 ແລະໄດ້ເປີດໂຄງການຊ່ວງເດືອນ ມິຖຸນາ 2019 ຈົນມາເຖິງທ້າຍປີ 2020 ,

ໂຄງການດັ່ງກ່າວນີ້ ເປັນໂຄງການສົ່ງເສີມດ້ານການອະນຸລັກທໍາມະຊາດຂອງຊຸມຊົນ ມີຈຸດປະສົງ ເພື່ອສະໜອງຄວາມຮູ້,ຄວາມເຂົ້າໃຈຕໍ່ການອະນຸລັກທໍາມະຊາດແກ່ປະຊາຊົນ ແລະຫາແນວທາງໃນການອະນຸລັກຮ່ວມກັບປະຊາຊົນ ແລະອໍານາດການປົກຄອງທ້ອງຖິ່ນ, ທີ່ຜ່ານມາກໍ່ໄດ້ມີ ຫຼາຍໆ ກິດຈະກໍາທີ່ໄດ້ຈັດຕັ້ງປະຕິບັດຄື: ປູກຕົ້ນໄມ້ ໃນຂອບເຂດປ່າໄມ້ຂອງບ້ານ ເພື່ອຊ່ວຍຟື້ນຟູປ່າໄມ້ທີ່ຊຸດໂຊມ, ມີການສໍາຫຼວດ, ເກັບກໍາຂໍ້ມູນພາກສະໜາມ ເພື່ອເປັນຖານຂໍ້ມູນພື້ນຖານລວມທັງຄວາມເຂົ້າໃຈຂອງຊຸມຊົນຕໍ່ການອະນຸລັກທໍາມະຊາດ ແລະອື່ນໆ, ໄດ້ກໍານົດທີ່ຕັ້ງຂອບເຂດວັງສະຫງວນ ມີການສ້າງກົດລະບຽບຄຸ້ມຄອງ ແລະບວດວັງສະຫງວນໃນ 5 ເຮັກຕາ ເພື່ອຊ່ວຍໃຫ້ຊຸມຊົນເຫັນຄວາມສໍາຄັນໃນກິດຈະກໍາດັ່ງກ່າວຫຼາຍຂຶ້ນ, ປ່ອຍປາໃສ່ວັງສະຫງວນ, ກິດຈະກໍາປູກຈິດສໍານຶກກ່ຽວກັບການອະນຸລັກທໍາມະຊາດ ໃຫ້ແກ່ນ້ອງນັກຮຽນ ແລະປະຊາຊົນ, ກໍານົດເຂດແດນໂດຍມີການປັກຫຼັກອ້ອມບຶງຂາເປຍ ແລະສ້າງກົດລະບຽບເພື່ອຫ້າມບໍ່ໃຫ້ປະຊາຊົນບຸກລຸກເກີນເນື້ອທີ່ຕົນເອງໃນການເຮັດກະສິກໍາ ເຊິ່ງເປັນການທໍາລາຍລະບົບນິເວດເຂດບຶງຂາເປຍ,

ສ້າງກອງທຶນຊຸມຊົນ ເປັນການແບ່ງສັນປັນສ່ວນຈາກກິດຈະກໍາໂຄງການ ເພື່ອມອບໃຫ້ຊຸມຊົນສ້າງເປັນກອງທຶນໝູນວຽນຂອງບ້ານພາຍຫຼັງໂຄງການສິນສຸດລົງ, ສົ່ງເສີມຄວາມຮູ້ໃຫ້ປະຊາຊົນມີລາຍຮັບເສີມໂດຍສະເພາວຽກງານດ້ານການຕໍ່າແຜ່ນແພ ແລະສາດຜືຂອງກຸ່ມແມ່ຍິງບ້ານ ແລະວຽກງານອື່ນໆ ເຊິ່ງໃຫ້ເປັນບູລິມະສິດຄອບຄົວທຸກຍາກ ແລະດ້ອຍໂອກາດ ໃນໂອກາດດຽວກັນນີ້ ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ຍັງໃຫ້ກຽດໂອ້ລົມຕໍ່ກອງປະຊຸມ ທ່ານໄດ້ສະແດງຄວາມຂອບໃຈ ແລະຊົມເຊີຍໂຄງການດັ່ງກ່າວ, ອໍານາດການປົກຄອງບ້ານ, ປະຊາຊົນ ທີ່ເປັນສ່ວນໜຶ່ງໃນການຊ່ວຍກັນປັກຮັກສາ ແລະອະນຸລັກ ຊັບພະຍາກອນທໍາມະຊາດ ເປັນຕົ້ນກໍ່ແມ່ນການກໍານົດຫວັງສະຫງວນບຶງຂາເປຍ ໃຫ້ເປັນຫວັງສະຫງວນຂອງ ບ້ານ, ເມືອງ ແລະຮຽກຮ້ອງໃຫ້ອໍານາດການປົກຄອງບ້ານ ສືບຕໍ່ປະບັດລະບຽບຫຼັກການທີ່ວ່າງອອກ ເພື່ອປົກປັກຮັກສາແຫຼ່ງນໍ້າທໍາມະຊາດຊິວະນາໆພັນໃຫ້ຍືນຍົງຄົງຕົວຕະຫຼອດໄປ ເພື່ອລູກຫຼານໃນອະນາຄົດ,

ຈາກນັ້ນກໍ່ໄດ້ມີການ ເຊັນ ມອບ-ຮັບໂຄງການດັ່ງກ່າວ ໂດຍແມ່ນ ທ່ານ ນາງ ສົມເດັດ ແພງວົງສັກ ປະທານສະຫະພັນແມ່ຍິງເມືອງ ແລະຮັບໂດຍ ທ່ານ ສົມຈິດ ນາຍບ້ານໆ ກ້າງປາ ໂດຍການຊ່ອງໜ້າຂອງທ່ານເຈົ້າເມືອງ ແລະໜ່ວຍງານກ່ຽວຂ້ອງ ເພື່ອເປັນສັກຂີພິຍານນໍາ

ພາບແລະຂ່າວ ຄໍາກອນ ພອນມາລາ

ໃນລະຫວ່າງວັນທີ 4-5 ມັງກອນ 2021 ນີ້, ກອງປະ ຊຸມທາບທາມເນື້ອໃນກອງປະຊຸມໃຫຍ່ຄັ້ງທີ XI ຂອງພັກ ແລະ ຕິດພັນກັບການທາບທາມບຸກຄະລາກອນ ເຂົ້າໃນໂຄງປະກອບຂອງຄະນະບໍລິຫານງານສູນກາງພັກ ສະໄໝ XI (ຮອບທີ 3) ໄດ້ໄຂຂຶ້ນຢ່າງເປັນທາງການ ພ້ອມກັນ ຢູ່ 7 ຈຸດໃນຂອບເຂດທົ່ວປະເທດ. ສະເພາະຢູ່ສູນ ກາງແມ່ນຈັດຂຶ້ນ ໂດຍພາຍໃຕ້ການເປັນປະທານຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳ ການຄະນະເລຂາທິການສູນກາງພັກ, ຮອງປະທານປະ ເທດ, ມີບັນດາສະຫາຍກຳມະການກົມການເມືອງ ແລະ ຄະນະເລຂາທິການສູນກາງພັກ, ບັນດາສະຫາຍຜູ້ແທນສົມບູນ ທີ່ຕາງໜ້າໃຫ້ ກະຊວງ-ອົງການ, ທ້ອງຖິ່ນ ແລະ ນະຄອນຫລວງວຽງຈັນ ເຂົ້າຮ່ວມຢ່ ເພື່ອພ້ອມກັນຄົ້ນຄວ້າ ແລະ ປະກອບຄວາມເຫັນ ໃສ່ເອກະສານສຳຄັນຕົ້ນຕໍ ຄື: ຮ່າງລາຍງານການເມືອງຕໍ່ກອງປະຊຸມໃຫຍ່ຄັ້ງທີ XI ຂອງພັກ; ຮ່າງແຜນພັດທະນາເສດຖະ ກິດ-ສັງຄົມແຫ່ງ ຊາດ 5 ປີ ຄັ້ງທີ IX; ຮ່າງກົດລະບຽບຂອງພັກປະຊາຊົນປະ ຕິວັດລາວ ສະໄໝທີ XI; ຮ່າງບົດສຳຫລວດການນຳພາລວມຂອງຄະນະບໍລິຫານງານສູນກາງພັກ ສະໄໝທີ X. ພ້ອມດຽວກັນກອງປະຊຸມຍັງຈະໄດ້ຈັດຕັ້ງການທາບທາມບຸກຄະລາກອນ ເຂົ້າໃນໂຄງປະກອບຄະນະບໍລິຫານງານສູນກາງພັກຊຸດໃໝ່ (ສະໄໝທີ XI) ຕື່ມອີກ.

ກອງປະຊຸມໄດ້ຮັບຟັງການປະກອບຄວາມເຫັນ ຢ່າງກົງ ໄປກົງມາ ແລະ ເປັນເອກະພາບສູງ ດ້ານທັດສະນະ, ຫລັກ ການ, ທິດນຳ ແລະ ແຜນນະໂຍບາຍ ທີ່ຈະກຳ ນົດອອກໃນແນວທາງການເມືອງ ແລະ ແນວທາງການຈັດຕັ້ງຂອງພັກເຮົາໃນຊຸມປີຕໍ່ໜ້າ, ອັນໄດ້ປະກອບສ່ວນຢ່າງໜັກແໜ້ນ ເປັນພື້ນຖານໃຫ້ອານຸກຳມະການກ່ຽວ ຂ້ອງນຳໄປສືບຕໍ່ປັບ ປຸງເນື້ອໃນໃຫ້ຈະແຈ້ງ, ເລິກເຊິ່ງ, ຄົບຖ້ວນສົມບູນ ແລະ ມີຄວາມສາມາດຈັດຕັ້ງປະຕິບັດໃຫ້ປະກົດຜົນເປັນຈິງໄດ້.

Cr: ຂປລ

ອັດຕະປື: ເມື່ອຕອນບ່າຍວັນທີ 28 ທັນວາ 2020. ເຈົ້າໜ້າທີ່ຕຳຫຼວດ ພະແນກສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງອັດຕະປື ໄດ້ນຳຕົວຜູ້ຖືກຫາ ຈຳນວນ 4 ຄົນ, ຍິງ 2 ຄົນ ມາດໍາເນີນການກວດຄົ້ນລົດ ໂຕໂຢຕາ ປຣາໂດ ປ້າຍທະບຽນ ຈໍາປາສັກ ກຄ 2928 ທີ່ພວກກ່ຽວໄດ້ນໍາໃຊ້ ເຂົ້າໃນການລັກລອບຂົນສົ່ງ-ຄ້າຂາຍຢາເສບຕິດ.

ຜ່ານການກວດຄົ້ນພົບວ່າ: ພວກກ່ຽວໄດ້ຊຸກ ເຊື່່ອງ ຢາເສບຕິດ ປະເພດຢາໄອສ໌ ຈຳນວນ 25 ຫໍ່ ນໍ້າໜັກ 43 ກິໂລກຼາມ ແລະ ຜົງຂາວເຮໂຣອິນ 1 ຖົງ ນ້ຳໜັກ 1 ກິໂລກຣາມ ໄວ້ຢູ່ບໍລິເວນຖັງນໍ້າມັນຂອງລົດຄັນດັ່ງກ່າວ.

ໂດຍອີງຕາມການເປີດເຜີຍຂອງເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງອັດຕະປື ໃຫ້ຮູ້ວ່າ: ໃນຄັ້ງວັນທີ 24 ທັນວາ 2020 ທີ່ຜ່ານມາ ໄດ້ສົມທົບກັບເຈົ້າ ໜ້າທີ່ດ່ານ ເຊປຽນ,ທະ ຫານກອງຮ້ອຍຊາຍແດນ 543, ປກສ ກຸ່ມບ້ານສົ້ມປ່ອຍ ແລະ ອໍານາດການປົກຄອງບ້ານຫາດໃຫຍ່ ເມືອງສະໜາມໄຊ ແຂວງອັດຕະປື ກັກຕົວເປົ້າໝາຍລັກລອບຂົງສົ່ງ-ຄ້າຂາຍຢາເສບຕິດ ຈໍານວນ 4 ຄົນ, ຍິງ 2 ຄົນ ຄື:

ທ້າວ ສົມວິດ ອາຍຸ 45 ປີ ປະຊາຊົນບ້ານອີ່ໄລໃຕ້ ເມືອງໄຊເສດຖາ ນະຄອນຫຼວງວຽງຈັນ, ທ້າວ ຂັນທອງ ອາຍຸ 24 ປີ ປະຊາຊົນບ້ານຂັນໝາກ ເມືອງວັງວຽງ ແຂວງວຽງຈັນ, ນາງ ແກ້ວວິໄລ ອາຍຸ 30 ປີ ປະຊາຊົນບ້ານໂພນໄຊ ນະຄອນປາກເຊ ແຂວງຈໍາປາສັກ ແລະ ນາງ ແປັບຊີ ອາຍຸ 24 ປີ ປະຊາຊົນບ້ານນໍ້າພ້າວ ເມືອງວັງວຽງ ແຂວງວຽງຈັນ ພ້ອມຂອງກາງຢາໄອສ໌ ຈໍານວນ 25 ຫໍ່ ນ້ຳໜັກ 43 ກິໂລກຣາມ, ຜົງຂາວເຮໂຣອິນ 1 ຖົງ ນໍ່າໜັກ 1 ກິໂລກຣາມ, ໂທລະສັບ 5 ເຄື່ອງ, ເງິນກີບ 4 ລ້ານກວ່າກີບ, ເງິນບາດ 6.300 ບາດ, ເງິນໂດລາ 7.000 ໂດລາ ແລະ ລົດໃຫຍ່ 1 ຄັນ.

ຜ່ານການສືບສວນ – ສອບສວນຂັ້ນເບື້ອງຕົ້ນຂອງເຈົ້າໜ້າທີ່ຕໍາຫຼວດ ພວກກ່ຽວໃຫ້ການ ສາລະພາບ ວ່າ: ຢາເສບຕິດຈໍານວນດັ່ງກ່າວ ແມ່ນຢາເສບຕິດຂອງພວກກ່ຽວແທ້ ເຊິ່ງໄດ້ຕິດຕໍ່ພົວພັນຫາ ທ້າວ ບຸນ (ຄົນນະຄອນຫຼວງວຽງຈັນ) ກ່ຽວກັບການຂົນສົ່ງຢາເສບຕິດ ໃຫ້ເຖົ້າແກ່ຄົນກໍາປູເຈຍ ຢູ່ເຂດດ່ານເຊປຽນ.

ພາຍຫຼັງໄດ້ລົງມາເບິ່ງເສັ້ນທາງຂົນສົ່ງຢາເສບຕິດ ແລະ ພົບປະກັບທີມງານຂົນສົ່ງເມືອກໍາປູເຈຍແລ້ວ ກໍໄດ້ພາກັນລົງມາເມືອງສະໜາມໄຊ ແຂວງອັດຕະປື ເພື່ອຂົນສົ່ງຢາເສບຕິດດັ່ງກ່າວ ໃນວັນທີ 24 ທັນວາ 2020 ຈຶ່ງຖືກເຈົ້າໜ້າທີ່ທະຫານຊາຍແດນ ແລະ ປກສ ກຸ່ມບ້ານ ເຂົ້າມາກັກຕົວທັງ 4 ຄົນ ພ້ອມຂອງກາງຈໍານວນດັ່ງກ່າວ.

ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ອັດຕະປື ໃຫ້ຮູ້ຕື່ມອີກວ່າ: ປັດຈຸບັນ, ຄະດີດັ່ງກ່າວ ພວມຢູ່ໃນຂັ້ນຕອນດໍາເນີນການສືບສວນ-ສອບສວນ ເພື່ອຂະຫຍາຍຜົນຫາຜູ້ຮ່ວມຂະບວນການກະທໍາຜິດ ມາດໍາເນີນຄະດີຕາມລະບຽບກົດໝາຍ.

ພາບ-ຂ່າວ: ປກສ ແຂວງອັດຕະປື, ເສົາດາລົງ ເພັດສົງຄາມ

ນະຄອນຫຼວງວຽງຈັນ: ສູນປິ່ນປົວ ແລະ ຮັກສາສຸຂະພາບຕາ ຮ່ວມກັບມູນນິທິເຟຣດໂຮໂລ ປະຈຳລາວ ໄດ້ຈັດກອງປະຊຸມສຸດທ້າຍ ໂຄງການເປີດກວ້າງຮັກສາສຸຂະພາບຕາແບບຍືນຍົງ ແລະ ກອງປະຊຸມປຶກສາຫາລື ຮ່າງແຜນຍຸດທະສາດວຽກງານສຸຂະພາບຕາ 2021-2025 ຂຶ້ນໃນວັນທີ 16-17 ທັນວາ 2020 ທີ່ນະຄອນຫລວງວຽງຈັນ.

ທ່ານ ຄຳຄູນ ໂຫລານຸພາບ ຫົວໜ້າສູນປິ່ນປົວ ແລະ ຮັກສາສຸຂະພາບຕາ ກ່າວວ່າ: ກອງປະຊຸມໃນຄັ້ງນີ້, ໄດ້ຜ່ານແຜນຍຸດທະສາດ ການຮັກສາສຸຂະພາບຕາແຫ່ງຊາດໃນ 5 ປີ (2021-2025) ເພື່ອຫລຸດຜ່ອນພາວະຕາບອດ ຈາກພະຍາດທີ່ເປັນສາເຫດຕາບອດທີ່ສາມາດຫລີກລ່ຽງໄດ້ ເຊັ່ນ: ພະຍາດແກ່ນຕາຂຸ້ນ, ພະຍາດຕາກະດັນ, ອຸປະຕິເຫດທາງຕາ ແລະ ພະຍາດເບົາຫວານຂຶ້ນຕາ, ພະຍາດຕາເດັກ, ສາຍຕາຜິດປົກກະຕິ, ສາຍຕາບົກຜ່ອງ ແລະ ອື່ນໆ ສຳລັບຮ່າງແຜນຍຸດທະສາດ ກ່ຽວກັບການຮັກສາສຸຂະພາບຕາ ທີ່ເປັນມາດຕະຖານ ໃນການຈັດຕັ້ງປະຕິບັດແຜນການ 5 ປີ ແຕ່ປີ 2021-2025 ພາຍໃຕ້ ການຊີ້ນຳຂອງກະຊວງສາທາລະນະສຸກ ລວມສູນກາງ ແລະ ບັນດາແຂວງຕ່າງໆ ຄາດໝາຍຕົ້ນຕໍ ແມ່ນໃຫ້ມີຕາໜ່າງການບໍລິການປິ່ນປົວສຸຂະພາບຕາ ແລະ ຕອບສະໜອງຄວາມຮຽກຮ້ອງຕ້ອງການອັນຮີບດ່ວນ ໃຫ້ກັບພໍ່ແມ່ປະຊາຊົນບັນດາເຜົ່າ ເວົ້າລວມ, ເວົ້າສະເພາະ ກໍເພື່ອຫລຸດຜ່ອນພະຍາດຕາບອດ ທີ່ສາມາດຫລີກລ່ຽງໄດ້ ເຊັ່ນ: ພະຍາດແກ່ນຕາຂຸ້ນ, ຕາກະດັນ, ພະຍາດເບົາຫວານຂຶ້ນຕາ ແລະ ການສູນເສຍການເບິ່ງເຫັນ ຂອງປະຊາຊົນທີ່ເປັນກຳລັງຫລັກ ໃນການສ້າງເສດຖະກິດຄອບຄົວ ກໍຄື ສັງຄົມກ່ອນໄວອັນຄວນ ເພື່ອບັນລຸເປົ້າໝາຍ ຂອງການມີສຸຂະພາບຕາດີທຸກທົ່ວໜ້າ ຮອດປີ 2030.

ໃນໂອກາດນີ້, ທ່ານ ນາງ ສຸພອນສາ ໄຊປັນຍາຫົວໜ້າ ມູນນິທິເຟຣດໂຮໂລປະຈຳລາວ ໄດ້ກ່າວວ່າ: ໂຄງການເປີດກວ້າງຮັກສາສຸຂະພາບຕາຢູ່ ສປປ ລາວ ໄດ້ລິເລີ່ມດຳເນີນການໂດຍມູນນິທິເຟຣດໂຮໂລ ແລະ ທຶນຊ່ວຍເຫລືອຈາກລັດຖະບານ ແລະ ປະຊາຊົນອົສຕຣາລີ ກໍຄື ແຜນງານຮ່ວມມືລະຫວ່າງອົງການຈັດຕັ້ງສາກົນທີ່ບໍ່ສັງກັດລັດ ຂອງປະເທດອົສຕຣາລີ ໄດ້ດຳເນີນໂຄງການໃນ 10 ແຂວງ ຄື:ແຂວງຜົ້ງສາລີ, ບໍ່ແກ້ວ, ຫລວງນໍ້າທາ, ອຸດົມໄຊ, ຫລວງພະບາງ, ໄຊຍະບູລີ, ວຽງຈັນ, ບໍລິຄຳໄຊ, ຄຳມ່ວນ ແລະ ແຂວງ ສະຫວັນນະເຂດ ລວມ 90 ເມືອງ 4.700 ກວ່າບ້ານ ໄດ້ເລີ່ມຈັດຕັ້ງປະຕິບັດໃນປີ 2014 ແລະ ຮອດປີ 2020 ເປັນປີມວນທ້າຍໂຄງການ, ໃຊ້ງົບປະມານ 33 ຕື້ກວ່າກີບ. ພ້ອມນັ້ນ,ຍັງໄດ້ນຳໃຊ້ບ້ວງທຶນອື່ນໆ ອີກຈຳນວນໜຶ່ງ.

ໂດຍ: ຂປລ

ບໍລິສັດເບຍລາວ ຈໍາກັດ ສືບຕໍ່ ມອບທຶນການສຶກສາ ແກ່ນັກສຶກສາ ທີ່ຮຽນດີ ຮຽນເກັ່ງ 330 ຄົນຕໍ່ປີ.

ເພື່ອປະກອບສ່ວນໃນການສະໜັບສະໜູນ ແຜນພັດທະນາບຸກຄະລາກອນຂອງຊາດ ທີ່ສອດຄ່ອງກັບແນວທາງ ຂອງພັກ ແລະ ລັດຖະບານ ພ້ອມທັງເປັນການໃຫ້ໂອກາດ ແກ່ນັກສຶກສາ ລະດັບມະຫາວິທະຍາໄລ ແລະ ວິທະຍາໄລຄູ, ບໍລິສັດເບຍລາວຈໍາກັດ ໄດ້ສືບຕໍ່ ໂຄງການ ສານຝັນໃຫ້ແກ່ ນັກສຶກສາ ທີ່ຮຽນດີ ຮຽນເກັ່ງ ແຕ່ມີຄວາມຂາດເຂີນທາງດ້ານ ທຶນຮອນ ປະຈໍາປີ 2020-2021 ຈໍານວນທັງໝົດ 330 ທຶນ

ຈາກ 7 ສະຖາບັນການສຶກສາ ໃນທົ່ວປະເທດ ປະກອບມີ ມະຫາວິທະຍາໄລແຫ່ງຊາດ (120 ທຶນ), ມະຫາວິທະຍາໄລ ສຸພານຸວົງ (55 ທຶນ), ມະຫາວິທະຍາໄລ ສະຫວັນນະເຂດ (45 ທຶນ), ມະຫາວິທະຍາໄລ ຈໍາປາສັກ (40 ທຶນ), ວິທະຍາໄລ ຄູ ສະຫວັນນະເຂດ (20 ທຶນ) ແລະ ວິທະຍາໄລຄູປາກເຊ (20 ທຶນ), ສະຖາບັນວິຈິດສິນ (30 ທຶນ).

ໂຄງການ ສານຝັນ ມອບທຶນການສຶກສາ ແກ່ນັກສຶກສາທີ່ຂາດເຂີນ ຂອງບໍລິສັດ ເບຍລາວ ເລີ່ມຕົ້ນມາ ຕັ້ງແຕ່ປີ 2010 ເປັນຕົ້ນມາ. ໃນປະຈຸບັນ ມີນັກສຶກສາ ທີ່ໄດ້ຮັບທຶນການສຶກສາ ດັ່ງກ່າວ ທັງໝົດ 3.054 ຄົນ ໃນທົ່ວປະເທດ, ລວມເປັນງົບປະມານທັງໝົດ 8.7 ຕື້ກີບ. ທ່ານ ສິດທິໄຊ ເກດຕະວົງ ຜູ້ອໍານວຍການຝ່າຍກິດຈະກໍາເພື່ອສັງຄົມ ແລະ ບໍລິຫານ ຂອງບໍລິສັດເບຍລາວ ໄດ້ກ່າວວ່າ: ການສຶກສາ ເປັນພື້ນຖານແຫ່ງການດໍາລົງຊີວິດ, ຖ້ານັກຮຽນໄດ້ຮັບ ການສຶກສາທີ່ດີ ກໍ່ຈະມີໂອກາດ ປະສົບຜົນສໍາເລັດໃນອະນາຄົດ,

ນອກຈາກຈະເປັນຜົນປະໂຫຍດໃຫ້ກັບຕົນເອງແລ້ວ ຍັງສາມາດນໍາຄວາມຮູ້ ໄປພັດທະນາສ້າງສາປະເທດໄດ້. ເຫັນໄດ້ຄວາມສໍາຄັນ ແລະ ຄວາມຈໍາເປັນດັ່ງກ່າວ ບໍລິສັດເບຍລາວ ຈໍາກັດ ຈຶ່ງໄດ້ສືບຕໍ່ ຈັດກິດຈະກໍາ ມອບທຶນການສຶກສາ ໃຫ້ແກ່ນັກສຶກສາ ໃນຫຼາຍພື້ນທີ່ ທົ່ວປະເທດຕໍ່ເນື່ອງກັນມາ ເປັນປີທີ 11.

ຂ້າພະເຈົ້າ ມີຄວາມຮູ້ສຶກ ພາກພູມໃຈຫຼາຍ ທີ່ໄດ້ຮັບທຶນການສຶກສາ ຈາກບໍລິສັດເບຍລາວ ຈໍາກັດ ຕະຫຼອດໄລຍະ 3 ປີ ຜ່ານມາ, ໂດຍໄດ້ນໍາໃຊ້ ທຶນການສຶກສາດັ່ງກ່າວ ເຂົ້າໃນການຊື້ອຸປະກອນການຮຽນ ແລະ ຫຼຸດຜ່ອນຄ່າໃຊ້ຈ່າຍຈາກຄອບຄົວ, ກ່າວໂດຍ ທ້າວ ທອງ ມະນີວົງ, ນັກສຶກສາ ຄະນະສຶກສາສາດ ສາຂາ ຄູເຄມີສາດ, ຊັ້ນປີ ທີ່ 4 ມະຫາວິທະຍາໄລ ສຸພານຸວົງ.

ນັກສຶກສາ ແຕ່ລະຄົນທີ່ໄດ້ຮັບທຶນການສຶກສາ ຈາກບໍລິສັດເບຍລາວຈໍາກັດ ລ້ວນແລ້ວແຕ່ແມ່ນນັກສຶກສາ ທີ່ຕັ້ງໜ້າໃນການຄົ້ນຄວ້າຮໍ່າຮຽນ ຊຶ່ງມັນໄດ້ສະແດງອອກທາງດ້ານການປະພຶດ, ຄຸນສົມບັດ, ການເຄົາລົບນັບຖື ຄູບາອາຈານ ແລະ ໝູ່ຄູ່, ນອກຈາກນັ້ນ ນັກສຶກສາ ແຕ່ລະຄົນ ຍັງມີຜົນງານທີ່ໂດດເດັ່ນ ທາງດ້ານກິລາ, ສິນລະປະ ວັນນະຄະດີ, ມີຜົນການຮຽນ ບໍ່ຫຼຸດຄາດໜາຍຄະແນນເກຣດສະເລ່ຍຕໍ່າສຸດ GPA 2.4 ເຖິງ 4.0.

ບໍລິສັດເບຍລາວຈໍາກັດ ເປັນບໍລິສັດ ທີ່ໄດ້ມອບພັນທະເຂົ້າງົບປະມານແຫ່ງຊາດ ເປັນອັນດັບ #1 ໃນແຕ່ລະປີ ຫຼາຍກ່ວາ 2.000 ຕື້ກ່ວາກີບ, ພ້ອມທັງໄດ້ສ້າງ ວຽກເຮັດງານທໍາ ທັງທາງກົງ ແລະ ທາງອ້ອມ ໃຫ້ກັບສັງຄົມ ຫຼາຍພັນຕໍາແໜ່ງ.

ຕະຫຼອດໄລຍະທີ່ຜ່ານມາ ບໍລິສັດເບຍລາວຈໍາກັດ ໄດ້ໃຫ້ຄວາມສໍາຄັນ ແລະ ມີຄວາມຮັບຜິດຊອບສູງຕໍ່ສັງຄົມ ໂດຍສະເພາະ ໃນວຽກງານ ການມີສ່ວນຮ່ວມ ໃນການສົ່ງເສີມ ຮັກສາຮີດຄອງປະເພນີ, ການປົກປັກຮັກສາສິ່