ຄຳແນະນຳ ຈັດຕັ້ງປະຕິບັດ ກົດໝາຍ ວ່າດ້ວຍອາກອນລາຍໄດ້ ສະບັບເລກທີ 0819/ກງ, ລົງວັນທີ 10 ກຸມພາ 2021

ວັນທີ 15 ກຸມພາ 2021 ໄດ້ມີພິທີເປີດການນຳໃຊ້ເສັ້ນທາງຄອນກຣີດອ້ອມດອນໂຂງ ມີຄວາມຍາວທັງໝົດ 43,5 ກິໂລແມັດ ຢູ່ເມືອງໂຂງ ແຂວງຈຳປາສັກ ພາຍຫລັງສໍາເລັດການກໍ່ສ້າງ ໂດຍໄດ້ຮັບການຊ່ວຍເຫລືອລ້າ ຈາກໂຄງການພັດທະນາເຂດເສດຖະກິດໃໝ່ສີທັນດອນ ມູນຄ່າ 12 ລ້ານກວ່າໂດລາສະຫະລັດ ໂດຍໃຫ້ກຽດເຂົ້າຮ່ວມພິທີ ຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະ ມົນຕີກະຊວງແຜນການ ແລະ ການລົງທຶນ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ນາງ ຄໍາພູ ລິດທິສັກ ເຈົ້າເມືອງໂຂງ, ພ້ອມດ້ວຍບັນດາຂະແໜງການທີ່ກ່ຽວຂ້ອງຈາກ ສູນກາງ ແລະ ທ້ອງຖິ່ນ.

ໂອກາດນີ້, ທ່ານ ລາຕີ ສີສຸພັນນະວົງ ຮອງປະທານບໍລິສັດຮ່ວມພັດທະນາສີທັນດອນ ຈຳກັດ ລາຍງານໃຫ້ຮູ້ວ່າ: ເສັ້ນທາງຄອນກຣີດອ້ອມດອນໂຂງແຫ່ງນີ້ ໄດ້ເລີ່ມລົງມືກໍ່ສ້າງໃນວັນທີ 6 ຕຸລາ 2018 ໂດຍໃຊ້ເວລາໃນການກໍ່ສ້າງທັງໝົດ 2 ປີ 4 ເດືອນ, ເປົ້າໝາຍຂອງບໍລິສັດໃນການກໍ່ສ້າງເສັ້ນທາງນີ້ ບໍ່ພຽງແຕ່ເປັນຂອງຂວັນໃຫ້ປະຊາຊົນຊາວເມືອງໂຂງເທົ່ານັ້ນ ແຕ່ຍັງເປັນພັນທະຂອງບໍລິສັດເພື່ອປະກອບ ສ່ວນເຂົ້າໃນການພັດທະນາເສດຖະກິດ-ສັງຄົມຂອງເມືອງໂຂງ ເຊິ່ງເປັນການສະແດງອອກເຖິງຄວາມຕັ້ງ ໃຈອັນເດັດດ່ຽວຂອງບໍລິສັດ ເພື່ອປະກອບສ່ວນເຂົ້າໃນການພັດທະນາຢູ່ #ແຂວງຈຳປາສັກ ແລະໂຄງການນີ້, ແມ່ນເປັນພຽງການເລີ່ມຕົ້ົ້ນລົງມືຂອງໂຄງການພັດທະນາເຂດເສດຖະກິດໃໝ່ສີທັນດອນ, ເຊິ່ງໃນແຕ່ລະໄລຍະການກໍ່ສ້າງພື້ນຖານໂຄງລ່າງ ແລະ ສິ່ງອຳນວຍຄວາມສະດວກນັ້ນ ແມ່ນຈະສາມາດຊ່ວຍຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ ໂດຍສະເພາະແມ່ນຈະສ້າງໂອກາດອັນດີໃຫ້ແກ່ການພັດທະນາເສດຖະກິດ-ສັງຄົມ ແລະ ການທ່ອງທ່ຽວຂອງແຂວງຈຳປາສັກ.

ໂອກາດສຳຄັນດັ່ງກ່າວ, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ມີຄຳເຫັນ ບາງຕອນສຳຄັນວ່າ: ຕາງໜ້າໃຫ້ອົງຄະນະພັກ, ອົງການປົກຄອງ ແລະ ປະຊາຊົນ ແຂວງຈຳປາສັກ, ຂໍສະແດງຄວາມຂອບອົກຂອບໃຈ ແລະ ຊົມເຊີຍຕໍ່ ບໍລິສັດ ຮ່ວມ ພັດທະນາສີທັນດອນ ຈຳກັດ ໃນນາມຜູ້ຈັດຕັ້ງປະຕິບັດໂຄງການເສັ້ນທາງເບຕົງອອ້ມ ດອນໂຂງ, ມີຄວາມຍາວ 43,5 ກິໂລແມັດ ທີ່ໄດ້ສຳເລັດການກໍ່ສ້າງຢ່າງເປັນທາງການ, ຊື່ງເປັນການສ້າງເງື່ອນໄຂ ທີ່ສະດວກໃນການໄປມາຫາສູ່ ຂອງພໍ່ແມ່ປະຊາຊົນຊາວ ແຂວງຈຳປາສັກເວົ້າລວມ, ເວົ້າສະເພາະແມ່ນຊາວ ເມືອງໂຂງ ໃຫ້ມີຄວາມສະດວກ ສະບາຍທັງສະເພາະໜ້າ ແລະ ໄລຍະຍາວ, ທີ່ມີລັກສະນະຍຸດທະສາດ ແລະ ທັງເປັນການປະກອບສ່ວນທີ່ສຳຄັນເຂົ້າໃນການຈັດຕັ້ງປະຕິບັດການພັດທະນາພື້ນຖານ ໂຄງລ່າງ, ພ້ອມທັງຮັບປະກັນຄວາມມີສະຖຽນລະພາບ ແລະ ໝັ້ນຄົງທາງດ້ານການຄົມມະນາຄົມ ຂົນສົ່ງ ຂອງຊາວເມືອງໂຂງ ທັງເພື່ອຮັບປະກັນໃຫ້ແກ່ການນໍາໃຊ້ເສັ້ນທາງເບຕົງອອ້ມດອນໂຂງ ໃຫ້ເກີດປະໂຫຍດສູງສຸດ.

ຂ່າວ: ທັດຊະນະ

ທ້າຍເດືອນມັງກອນ 2021 ທີ່ຜ່ານມາ, ເຈົ້າໜ້າທີ່ ປກສ ແຂວງຫົວພັນ ສາມາດຈັບເປົ້າໝາຍຢາເສບຕິດໄດ້ພ້ອມຂອງກາງ ເຮໂຣອິນ ຈໍານວນ 32 ແທ່ງ ໄປດຳເນີນຄະດີຕາມກົດໝາຍ.

ເຈົ້າໜ້າທີ່ ປກສ ແຂວງຫົວພັນ ໃຫ້ຮູ້ວ່າ: ວັນທີ 21 ມັງກອນ 2021, ໄດ້ຮັບລາຍງານ ຈະມີການຊື້ຂາຍຢາເສບຕິດ ຢູ່ຕາມເສັ້ນທາງຊໍາເໜືອ-ວຽງໄຊ ຢູ່ເຂດພູມະຕ່ອມ ຈຶ່ງໄດ້ແຕ່ງຕັ້ງພະນັກງານລົງຕິດຕາມຢູ່ຈຸດດັ່ງກ່າວ, ຮອດເວລາປະມານ 12:00 ໂມງຂອງມື້ຕໍ່ມາ, ກໍພົບເຫັນເປົ້າໝາຍ ຈຶ່ງໄດ້ເຂົ້າກັກຕົວເປົ້າໝາຍ ຊື່ນາງ ຊົງມີມົວ ອາຍຸ 33 ປີ ບ້ານ ຫົວຄັງ ເມືອງຊຳເໜືອ,ພ້ອມເຮໂຣອິນ ຈໍານວນ 32 ແທ່ງ.

ຜ່ານການສອບສວນໃນເບື້ອງຕົ້ນ, ຜູ້ກ່ຽວຮັບສາລະພາບວ່າ: ເຮໂຣອິນຈຳນວນດັ່ງກ່າວແມ່ນຂອງຜູ້ກ່ຽວແທ້. ປັດຈຸບັນ, ເຈົ້າໜ້າທີ່ພວມສອບສວນຂະຫຍາຍຜົນ ທີ່ມາຂອງເຮໂຣອິນຈຳນວນດັ່ງກ່າວ ເພື່ອຕິດຕາມນຳຕົວຜູ້ທີ່ຖືກຊັດທອດມາດຳເນີນຄະດີຕາມກົດໝາຍ.

ຂປລ. ໃນວັນທີ 12 ກຸມພາ 2021 ທີ່ສະຖານີຂົນສົ່ງຄິວລົດສາຍໃຕ້ ນະຄອນຫລວງວຽງຈັນ, ສະມາຄົມຜູ້ຕິດເຊື້ອເຮສ ໄອວີ/ເອດ (APL+) ຮ່ວມກັບໂຄງການ AHE ປະຈໍາລາວ ແລະ ພະແນກສາທາລະນະສຸກ ນະຄອນຫລວງວຽງຈັນ ໄດ້ຈັດກິດຈະກໍາສະເຫລີມ ສະຫລອງວັນຖົງຢາງອະນາໄມສາກົນ ພາຍໃຕ້ຫົວຂໍ້ “ເປັນຄົນສະໄໝໃໝ່ຕ້ອງໃສ່ໃຈສຸຂະພາບ” ແລະ “ການຮູ້ຈັກປ້ອງກັນ ແມ່ນເປັນຄົນທີ່ມີສະເໜ່”, ເຊິ່ງເປັນກິດຈະກໍາ ສົ່ງເສີມໃຫ້ມີການເຂົ້າເຖິງຖົງຢາງອະນາໄມ ໃນທຸກປະເທດທົ່ວໂລກ, ເພື່ອປ້ອງກັນເຮສໄອວີ ແລະ ພະຍາດຕິດຕໍ່ທາງເພດສໍາພັນ ແລະ ເພື່ອເປັນການສົ່ງເສີມການດໍາລົງຊີວິດທີ່ມີສຸຂະພາບ ແຂງແຮງປາສະຈາກພະຍາດ.

ໃນໂອກາດນີ້, ທ່ານ ນາງ ຈິນຕະນາ ຄົມສະເນ ຜູ້ຈັດການໂຄງການ AHE ປະຈໍາລາວ ແຈ້ງໃຫ້ຮູ້ວ່າ: ເນື່ອງຈາກພະຍາດ COVID-19 ໄດ້ສົ່ງຜົນກະທົບຕໍ່ຫລາຍໆດ້ານ ໃນຊີວິດຂອງພວກເຮົາ ແລະ ລວມທັງການເຂົ້າເຖິງຖົງຢາງອະນາໄມ ກໍບໍ່ໄດ້ຮັບການຍົກເວັ້ນ ຈາກຜົນກະທົບຂອງການ ລະບາດພະຍາດ ດັ່ງກ່າວ, AIDS Healthcare Foundation (AHF), ເຊິ່ງເປັນອົງກອນກ່ຽວກັບພະຍາດເອດ ທີ່ໃຫຍ່ທີ່ສຸດລະດັບໂລກ, ໄດ້ຮ່ວມກັນສະເຫລີມ ສະຫລອງວັນຖົງຢາງອະນາໄມສາກົນ ໂດຍໄດ້ລິເລີ່ມໃນປີ 2008 ເປັນຕົ້ນມາ ເພື່ອໂຄສະນາຖົງຢາງອະນາໄມແບບຄວາມຄິດສ້າງສັນ ແລະ ການນໍາໃຊ້ຖົງຢາງອະນາໄມ, ເນື່ອງຈາກວ່າຖົງຢາງອະນາໄມເປັນວິທີທີ່ຄຸ້ມຄ່າທີ່ສຸດ ໃນການປ້ອງກັນ ພະຍາດຕິດຕໍ່ທາງເພດສໍາພັນ ແລະ ການຖືພາ ໂດຍບໍ່ໄດ້ວາງແຜນ.

ການສະເຫລີມສະຫລອງປະຈໍາປີ ແມ່ນຈະຈັດຂຶ້ນໃນທົ່ວໂລກ ໂດຍຖືເອົາໄລຍະເທດສະການວັນແຫ່ງຄວາມຮັກ ແລະ ບັນດາທີມງານ AHF ໃນແຕ່ລະປະເທດທົ່ວໂລກ ແມ່ນຈະມີກິດຈະກໍາຜ່ານສື່ ແລະ ການປະເຊີນໜ້າໂດຍກົງ ກັບທີມງານທີ່ໜ້າຕື່ນເຕັ້ນໃນຫົວຂໍ້ “ເປັນຄົນສະໄໝໃໝ່ຕ້ອງໃສ່ໃຈ ສຸຂະພາບ” ແລະ “ການຮູ້ຈັກປ້ອງກັນ ແມ່ນເປັນຄົນທີ່ມີສະເຫນ່” ທີ່ວາງແຜນໄວ້ສໍາລັບປີ 2021. ສໍາລັບກິດຈະກໍາພາຍໃນງານ ໄດ້ມີການແຈກຢາຍຖົງຢາງອະນາໄມ, ການກວດ HIV ບໍ່ເສຍຄ່າ ແລະ ກິດຈະກໍາຖາມຕອບອື່ນໆ.

ຂ່າວ ສົມຫວັງ – ຂປລ

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດທີ່ເກີດຈາກເຊື້ອຈຸລະໂຣກສາຍພັນໃໝ່ COVID-19 ໄດ້ລາຍງານກ່ຽວກັບ ສະພາບການລະບາດຂອງພະຍາດ COVID-19 ໃນວັນທີ 15 ກຸມພາ ປີ 2021 ທີ່ກະຊວງສາທາລະນະສຸກ ໂດຍການລາຍງານຂອງ ທ່ານ ລັດສະໝີ ວົງຄຳຊາວ ຮອງຫົວໜ້າກົມ ຄວບຄຸມພະຍາດຕິດຕໍ່ ກະຊວງສາທາລະນະສຸກ ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19.

ທ່ານໄດ້ໃຫ້ຮູ້ວ່າ: ສະພາບການລະບາດຂອງພະຍາດ COVID-19 ໃນໂລກປັດຈຸບັນ ທົ່ວໂລກມີການລາຍງານ ການລະບາດຂອງພະຍາດ COVID-19 ທັງໝົດ 219 (ປະເທດ/ເຂດ), ຜູ້ຕິດເຊື້ອສະສົມ 109.369.945 ຄົນ, ເສຍຊີວິດສະສົມ 2.410.604 ຄົນ ແລະ ປິ່ນປົວຫາຍດີ 81.598.045 ຄົນ; ສໍາລັບການເຝົ້າລະວັງ COVID-19 ຢູ່ ສປປ ລາວ ຂອງວັນທີ 14 ກຸມພາ 2021 ການຕິດຕາມຜູ້ເດີນທາງ ຈາກຈຸດຜ່ານແດນຕ່າງໆທົ່ວປະເທດມີຜູ້ ເດີນທາງເຂົ້າມາ ມີທັງໝົດ 699 ຄົນ.

ການຕິດຕາມຜູ້ຖືກຈຳກັດບໍລິເວນຢູ່ໃນສະຖານທີ່ ທີ່ກຳນົດໄວ້ໃນຂອບເຂດທົ່ວປະເທດ, ປັດຈຸບັນ ທົ່ວປະເທດ ມີສູນຈໍາກັດບໍລິເວນທີ່ຍັງເປີດນຳໃຊ້ຢູ່ ທັງໝົດ 35 ສູນ, ມີຜູ້ຖືກຈຳກັດ ບໍລິເວນຢູ່ສູນ 2.701 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອ COVID-19.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດໃນວັນທີ 14 ກຸມພາ 2021 ໄດ້ເກັບຕົວ ຢ່າງມາກວດວິເຄາະທັງໝົດ 108 ຄົນ; ຜົນກວດວິເຄາະທັງໝົດ ແມ່ນບໍ່ພົບເຊື້ອ ໝາຍຄວາມວ່າ ວັນທີ 14 ກຸມພາ 2021 ບໍ່ພົບຜູ້ຕິດເຊື້ອໃໝ່; ສັງລວມການກວດວິເຄາະນັບແຕ່ເດືອນມັງກອນ 2020 ຮອດປັດຈຸບັນ ໄດ້ເກັບຕົວຢ່າງມາ ກວດທັງໝົດ 108.010 ຕົວຢ່າງ, ກວດພົບເຊື້ອສະສົມ 45 ຄົນ. ການຕິດຕາມປິ່ນປົວຄົນ ເຈັບຢູ່ໂຮງໝໍ, ປັດຈຸບັນ ຄົນເຈັບຕິດເຊື້ອພະຍາດ COVID-19 ຈຳນວນ 4 ຄົນ ແມ່ນສືບຕໍ່ນອນຕິດຕາມອາການ ແລະ ປິ່ນປົວຢູ່ໂຮງໝໍທີ່ ຖືກກຳນົດໄວ້.
ພ້ອມນີ້ທ່ານຍັງໄດ້ລາຍງານກ່ຽວກັບ ສະພາບຂອງພະຍາດໄຂ້ຍຸງລາຍ ຢູ່ໃນປະເທດເຮົາ; ໃນວັນທີ 14 ກຸມພາ 2021 ສປປ ລາວ ແມ່ນ ມີຜູ້ຕິດເຊື້ອທັງໝົດ 0 ກໍລະນີ ແລະ ບໍ່ມີຜູ້ເສຍຊີວິດ; ນັບແຕ່ວັນທີ 26/12/2020 -14/02/2021 ມີຜູ້ຕິດເຊື້ອກໍລະນີສະສົມທັງໝົດ 117 ຄົນ (ມີລາຍງານກໍລະນີໃນ 12 ແຂວງ, ແຂວງທີ່ມີການ ລາຍງານຫຼາຍກວ່າໝູ່ແມ່ນ ນະຄອນຫຼວງວຽງຈັນ 31 ຄົນ, ອັດຕະປຶ 30 ຄົນ, ຖັດລົງມາແມ່ນ, ຫຼວງພະບາງ 15 ຄົນ), ບໍ່ມີຜູ້ເສຍຊີວິດ ຍ້ອນພະຍາດໄຂ້ຍຸງລາຍ;

ບັນດາທ່ານສາມາດຕິດຕາມຂໍ້ມູນ ທີ່ເປັນ ທາງການໄດ້ຈາກ: ເວັບໄຊຂອງຄະນະສະເພາະກິດ www.covid19.gov.la ; ເຟດບຸກຂອງສູນຂ່າວສານການແພດ ແລະ ສຸຂະ ສຶກສາ, ກະຊວງສາທາລະນະສຸກສອບຖາມ ສາຍດ່ວນ 165, 166.

ງານມະຫະກໍາບຸນຊ້າງ ແຂວງໄຊຍະບູລີ ໄດ້ຈັດຂຶ້ນໃນວັນທີ 13 ກຸມພາ 2021 ນີ້ທີ່ສະໜາມຫຼວງຂອງແຂວງໄຊຍະບູລີ. ເຂົ້າຮ່ວມໃນງານຄັ້ງນີ້ມີ ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໄຊຍະບູລີ ພ້ອມດ້ວຍພັນລະຍາ, ມີການນໍາຂອງແຂວງ, ຂອງເມືອງ, ແຂກທັງພາຍໃນ ແລະຕ່າງປະເທດ ພ້ອມດ້ວຍພໍ່ແມ່ປະຊາຊົນບັນດາເຜົ່າພາຍໃນແຂວງເຂົ້າຮ່ວມ.

ສໍາລັບການຈັດງານມະຫະກໍາບຸນຊ້າງໃນປີ 2021 ນີ້ ຖືວ່າເປັນຄັ້ງທີ 15 ຈັດຂຶ້ນຕາມຮີດຄອງປະເພນີ, ມີຊ້າງເຂົ້າຮ່ວມ 21 ເຊືອກ ເພາະວ່າປີນີ້ເປັນປີທີ່ມີຄວາມສ່ຽງສູງ ໂດຍສະເພາະສະພາບການລະບາດຂອງພະຍາດໂຄວິດ-19 ແມ່ນຍັງສືບຕໍ່ຂະຫຍາຍຕົວເປັນວົງກວ້າງ ແລະ ກາຍພັນ ເຊິ່ງມັນເປັນມະຫັນຕະໄພຕໍ່ມວນມະນຸດໃນທົ່ວໂລກ ແລະ ຍາກທີ່ຈະຢັບຢັ້ງບັນຫາເຊື້ອພະຍາດດັ່ງກ່າວ. ສະນັ້ນ ການຈັດງານມະຫະກໍາບຸນຊ້າງປີ 2021 ນີ້ຈຶ່ງຈັດຂຶ້ນພຽງ 1 ວັນເທົ່ານັ້ນເພື່ອເປັນການຄອບເລົ່າ, ຈະບໍ່ໄດ້ຈັດໃຫຍ່ຄືທຸກໆປີຜ່ານມາ ເພື່ອຮັບປະກັນມາດຕະການປ້ອງກັນການລະບາດເຊື້ອພະຍາດໂຄວິດ-19.

ຄະນະຮັບຜິດຊອບຈັດງານ ຈຶ່ງໄດ້ກໍານົດເອົາແຕ່ກິດຈະກໍາທີ່ສໍາຄັນ ແລະ ຈໍາເປັນ ເຊັ່ນ: ຕັກບາດພຣະ 13 ອົງ ເພື່ອອຸທິດບຸນກຸສົນໃຫ້ຊ້າງ, ບາສີສູ່ຂວັນຊ້າງ, ແຮ່ຂະບວນຊ້າງ, ຈັດອາຫານບຸບເຟຊ້າງ ເພື່ອສ້າງເງື່ອນໄຂໃຫ້ຊ້າງມີໂອກາດພົບປະກັນ ແລະ ຂີ່ຊ້າງອ້ອມເມືອງ. ແຂວງໄຊຍະບູລີ ເປັນແຂວງດຽວທີ່ມີປະຊາກອນຊ້າງຫຼາຍກວ່າໝູ່ ຖ້າທຽບໃສ່ແຂວງອື່ນໃນ ສປປ ລາວ ດ້ວຍເຫດນັ້ນເພື່ອເປັນການອານຸລັກຮັກສາຊ້າງບໍ່ໃຫ້ສູນພັນ ແລະ ທັງເປັນການສືບຕໍ່ປົກປັກຮັກສາວັດທະນະທໍາ ຮີດຄອງປະເພນີອັນດີງາມ ແລະ ວິຖີການດໍາລົງຊີວິດ ຂອງປະຊາຊົນລາວບັນດາເຜົ່າທີ່ຕິດພັນກັບຊ້າງມາແຕ່ອະດີດຕະການໃຫ້ຍືນຍົງຄົງຕົວ ແລະ ຢູ່ກັບປະຊາຊົນລາວເຮົາ, ເວົ້າລວມເວົ້າສະເພາະ ປະຊາຊົນຊາວແຂວງໄຊຍະບູລີຈຶ່ງໄດ້ພ້ອມພຽງກັນຈັດງານມະຫະກໍາບຸນຊ້າງນີ້ຂຶ້ນໃນແຕ່ລະປີ.

ຂ່າວ: ບຸນທີ.

ວັນທີ 21 ກຸມພາ 2021 ເປັນມື້ທີ່ປະຊາຊົນລາວທົ່ວປະເທດ ທີ່ມີເງື່ອນໄຂຄົບຖ້ວນ ຕ້ອງອອກມາໃຊ້ສິດ ເພື່ອປ່ອນບັດເລືອກເອົາຜູ່ແທນຂອງຕົນ ໄປນັ່ງຢູ່ ສະພາແຫ່ງຊາດ ເພື່ອເປັນຕົວແທນ ຊ່ວຍໃນການສະເໜີ ແລະ ແກ້ໄຂບັນຫາຕ່າງໆ ໃນທ້ອງຖິ່ນເຂດແຂວງຂອງຕົນ.

ຈົ່ງເລືອກຄົນດີ, ມີຄວາມຮູ້, ສັດຊື່ສຸດຈະລິດ ແລະ ເຫັນຜົນປະໂຫຍດຂອງປະຊາຊົນໂດຍລວມ.

ທ່ານສາມາດອ່ານປະຫວັດຂອງຜູ່ສະໝັກເລືອກຕັ້ງແຕ່ລະເຂດດັ່ງນີ້.

1. ນະຄອນຫຼວງວຽງຈັນ
2. ແຂວງຜົ້ງສາລີ
3. ແຂວງຫຼວງນໍ້າທາ
4. ແຂວງອຸດົມໄຊ
5. ແຂວງບໍ່ແກ້ວ
6. ແຂວງຫຼວງພະບາງ
7. ແຂວງໄຊຍະບູລີ
8. ແຂວງຫົວພັນ
9. ແຂວງຊຽງຂວາງ
10. ແຂວງວຽງຈັນ
11. ແຂວງບໍລິຄຳໄຊ
12. ແຂວງຄໍາມ່ວນ
13. ແຂວງສະຫວັນນະເຂດ
14. ແຂວງສາລະວັນ
15. ແຂວງຈໍາປາສັກ
16. ແຂວງເຊກອງ
17. ແຂວງອັດຕະປື
18. ແຂວງໄຊສົມບູນ

ລາຍງານຈາກ MAF UXO Laos ໃຫ້ຮູ້ວ່າ ໃນວັນທີ 11 ກຸມພາ 2021, ໜຶ່ງໃນທີມກວດກູ້ຂອງອົງການເກັບກູ້ລະເບີດ ແມັກ ທີ່ໄດ້ຮັບທຶນສະໜັບສະໜູນຈາກ ລັດຖະບານນໍເວໄດ້ກວດພົບລະເບີດໃຫຍ່ຂະໜາດ 500 ປອນ ຫຼື 227 ກິໂລ ຢູ່ບ້ານ ນາຮ້ອມ, ແຂວງ ຄໍາມ່ວນ.

ລະເບີດໃຫຍ່ລູກດັ່ງກ່າວໄດ້ຖືກກວດສອບ ແລະ ເຮັດໃຫ້ປອດໄພກ່ອນ ທີ່ຈະຖືກເຄື່ອນຍ້າຍໄປຍັງສະຖານທີ່ທໍາລາຍ ເພື່ອທໍາການທໍາລາຍຢ່າງປອດໄພ.
Mag Uxo Centre Laos.

ບັນຫາລະເບີດ ທີ່ບໍ່ທັນແຕກ ຍັງຕ້ອງໄດ້ໃຊ້ເວລາ ແລະ ທືນຮອນໃນການເກັບກູ້ ເພາະຍັງຫຼາຍຂົງເຂດ ທີ່ບໍ່ທັນສາມາດເກັບກູ້ໄດ້ໝົດ.

.

ກະຊວງການຕ່າງປະເທດ ໄດ້ຈັດຕັ້ງກອງປະຊຸມເຜີຍແຜ່ກົດໝາຍວ່າດ້ວຍການຕ້ານການຄ້າມະນຸດ ແລະ ຂັ້ນຕອນການຊ່ວຍເຫຼືອແກ່ຜູ້ຖືກເຄາະຮ້າຍຈາກການຄ້າມະນຸດ ຂຶ້ນເມື່ອວັນທີ 12 ກຸມພາ ຜ່ານມານີ້ ທີ່ກະຊວງດັ່ງກ່າວ ໂດຍການເປັນປະທານ ຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ຮອງປະທານຄະນະກຳມະການຕ້ານການຄ້າມະນຸດ ໂດຍມີພະນັກງານລັດຖະກອນທຸກຂັ້ນ ຈາກບັນດາກົມ, ສະຖາບັນ ແລະ ບັນດາຫ້ອງການທຽບເທົ່າກົມອ້ອມຂ້າງກະຊວງ ເຂົ້າຮ່ວມ

ການເຜີຍແຜ່ດັ່ງກ່າວບັນດາຜູ້ເຂົ້າຮ່ວມໄດ້ຮັບຟັງການບັນຍາຍຈາກນັກວິທະຍາກອນ ຈາກສູນກາງສະຫະພັນແມ່ຍິງ ແລະ ກອງເລຂາຄະນະກຳມະການຕ້ານການຄ້າມະນຸດລະດັບຊາດ ກ່ຽວກັບສະພາບການຄ້າມະນຸດປັດຈຸບັນ, ບາງມາດຕາທີ່ກ່ຽວຂ້ອງຂອງກົດໝາຍວ່າດ້ວຍການຕ້ານການຄ້າມະນຸດ ແລະ ຂັ້ນຕອນການໃຫ້ການຊ່ວຍເຫຼືອແກ່ຜູ້ຖືກເຄາະຮ້າຍ.

ກອງປະຊຸມເຜີຍແຜ່ດັ່ງກ່າວ ແມ່ນໄດ້ຈັດເຜີຍແຜ່ຂຶ້ນເປັນຄັ້ງທຳອິດ ໃຫ້ແກ່ພະນັກງານກະຊວງການຕ່າງປະເທດ ຊຶ່ງຜູ້ເຂົ້າຮ່ວມໄດ້ຮັບຟັງ ແລະ ຮຽນຮູ້ກ່ຽວກັບສະພາບລວມບັນຫາການຄ້າມະນຸດ ທີ່ເກີດຂຶ້ນໃນພາກພື້ນ ກໍຄື ໃນ ສປປ ລາວ; ກໍາໄດ້ນິຕິກຳສຳຄັນ ກໍຄືກົດໝາຍວ່າດ້ວຍການຕ້ານການຄ້າມະນຸດ ປີ 2015 ຊຶ່ງເປັນເອກະສານອ້າງອີງໃຫ້ແກ່ການຈັດຕັ້ງປະຕິບັດ ແລະ ເຄື່ອນໄຫວເພື່ອສະກັດກັ້ນບັນຫາການຄ້າມະນຸດ ໃນ ສປປ ລາວ ໃຫ້ມີປະສິດທິພາບຫຼາຍຂຶ້ນກວ່າເກົ່າ ແລະ ໄດ້ເຂົ້າໃຈເຖິງບັນດາຂັ້ນຕອນຕ່າງໆ, ກົນໄກປະສານງານ, ວິທີການດຳເນີນການຊ່ວຍເຫຼືອ, ການສົ່ງຕໍ່ຜູ້ຖືກເຄາະຮ້າຍຈາກການຄ້າມະນຸດ ຢູ່ໃນ ສປປ ລາວ ຕະຫຼອດທັງບົດບາດຂອງບັນດາຂະແໜງການ ທີ່ຮັບຜິດຊອບວຽກງານດັ່ງກ່າວ. ພ້ອມດຽວກັນ, ຜູ້ເຂົ້າຮ່ວມກໍໄດ້ສົນທະນາ, ແລກປ່ຽນຄຳຄິດເຫັນ ໃນກອງປະຊຸມຢ່າງສ້າງສັນ ແລະ ກົງໄປກົງມາ.

ໂອກາດດັ່ງກ່າວ ທ່ານ ຮອງລັດຖະມົນຕີ ໄດ້ຍົກໃຫ້ເຫັນຄວາມສຳຄັນວຽກງານໂຄສະນາເຜີຍແຜ່ກົດ ໝາຍວ່າດ້ວຍການຕ້ານການຄ້າມະນຸດ ແລະ ການປົກປ້ອງຊ່ວຍເຫຼືອຜູ້ຖືກເຄາະຮ້າຍຈາກການຄ້າມະນຸດ ຊຶ່ງເປັນປະໂຫຍດຕໍ່ກັບທຸກພາກສ່ວນ ແລະ ຂະແໜງການ, ເວົ້າສະເພາະຕໍ່ກັບພະນັກງານກະຊວງການຕ່າງປະເທດ ໃນຖານະທີ່ເປັນນັກການທູດໃຫ້ສາມາດກຳໄດ້ບັນຫາດັ່ງກ່າວໄດ້ແລ້ວ ໃນເວລາທີ່ໄປເຄື່ອນໄຫວວຽກງານທ້ອງຖິ່ນ ຫຼື ປະຈຳການຢູ່ຕ່າງປະເທດ ແມ່ນຈະເປັນປະໂຫຍດໃນການປົກປ້ອງຊ່ວຍເຫຼືອ ແລະ ສົ່ງຕໍ່ຂໍ້ມູນ ໄດ້ທັນຕາມສະພາບການ, ການເຄື່ອນໄຫວວຽກງານຕ້ານການຄ້າມະນຸດ ແມ່ນເພື່ອສົ່ງເສີມ ແລະ ປະກອບສ່ວນ ໃນວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ ພາຍໃນປະເທດ ໂດຍແນໃສ່ການຈັດຕັ້ງປະຕິບັດບັນດາກິດຈະກໍາຕ່າງໆທີ່ຢູ່ໃນແຜນງານແຫ່ງຊາດ ເພື່ອສະກັດກັ້ນ ແລະ ຕ້ານການຄ້າມະນຸດ ໃຫ້ໄດ້ຕາມຄາດໝາຍ, ແລະ ມີປະສິດທິຜົນສູງ.

ຂ່າວ:ກະຊວງການຕ່າງປະເທດ,ພາບ:ສຳນານ

ວັນທີ 09 ກຸມພາ 2021ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວໄດ້ສົ່ງໂທລະເລກອວຍພອນ ເນື່ອງໃນໂອກາດບຸນປີໃໝ່ປະຈໍາຊາດ ຂອງ ສປ ຈີນ ປີ 2021 ເຖິງສະຫາຍ ສີ ຈິ້ນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງສາທາລະນະລັດ ປະຊາຊົນຈີນທີ່ ນະຄອນຫລວງປັກກິ່ງ.

ເນື້ອໃນໂທລະເລກຂຽນວ່າ:ສະຫາຍທີ່ຮັກແພງ,ເນື່ອງໃນໂອກາດບຸນປີໃໝ່ປະຈໍາຊາດ ຂອງ ສປ ຈີນ ປີ 2021, ຕາງໜ້າ ຄະນະບໍລິຫານງານສູນກາງພັກປະຊາຊົນປະຕິວັດລາວ ແລະ ປະຊາຊົນລາວບັນດາເຜົ່າ ກໍ່ຄືໃນນາມສ່ວນຕົວ, ຂ້າພະເຈົ້າ ຂໍສົ່ງຄໍາອວຍພອນອັນອົບອຸ່ນ ແລະ ພອນໄຊອັນປະເສີດມາຍັງສະຫາຍ ແລະ ໂດຍຜ່ານສະຫາຍໄປຍັງ ຄະນະກໍາມະການສູນກາງພັກກອມມູນິດຈີນ, ສະມາຊິກພັກ ແລະ ປະຊາຊົນຈີນອ້າຍນ້ອງທຸກຖ້ວນໜ້າ.

ຂ້າພະເຈົ້າມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າ ພາຍໃຕ້ການນໍາພາອັນສະຫຼາດສ່ອງໃສ, ປະດິດສ້າງຂອງພັກກອມມູນິດຈີນ, ປະຊາຊົນຈີນອ້າຍນ້ອງ ໄດ້ຜ່ານຜ່າການທົດສອບນາໆປະການ ແລະ ສາມາດຍາດໄດ້ຜົນສໍາເລັດອັນສໍາຄັນ, ຮອບດ້ານ ແລະ ໜັກແໜ້ນ ໃນການສ້າງສັງຄົມນິຍົມທີ່ມີສີສັນພິເສດຂອງຈີນ, ສ້າງສໍາເລັດສັງຄົມນິຍົມທີ່ອີ່ມໜໍາສໍາລານຮອບດ້ານໂດຍພື້ນຖານ, ມີຜົນສໍາເລັດອັນພົ້ນເດັ່ນໃນການແກ້ໄຂຄວາມທຸກຍາກຂອງປະຊາຊົນ ກໍຄື ການສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19. ຂ້າພະເຈົ້າ ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນຖືກຕ້ອງ ຂອງ ພັກກອມມູນິດຈີນ ທີ່ຖື ສະຫາຍເລຂາທິການໃຫຍ່ ສີ ຈິ້ນຜິງ ເປັນແກນກາງ, ປະຊາຊົນຈີນອ້າຍນ້ອງ ຈະສືບຕໍ່ບັນລຸເປົ້າໝາຍໃນການສ້າງສັງຄົມນິຍົມທີ່ທັນສະໄໝຮອບດ້ານ ກໍ່ຄື ບັນລຸຄວາມໄຝ່ຝັນໃນການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ ໃນຕໍ່ໜ້າຢ່າງແນ່ນອນ.

ເນື່ອງໃນໂອກາດອັນເບີກບານມ່ວນຊື່ນຕ້ອນຮັບປີໃໝ່ນີ້ ຂໍອວຍພອນໄຊອັນປະເສີດມາຍັງ ສະຫາຍເລຂາທິການໃຫຍ່ ສີ ຈິ້ນຜິງ ພ້ອມດ້ວຍຄອບຄົວ ແລະ ບັນດາສະຫາຍການນໍາຂັ້ນສູງ ພັກ, ລັດ ແລະ ປະຊາຊົນຈີນອ້າຍນ້ອງ ທຸກຖ້ວນໜ້າ ຈົ່ງມີແຕ່ຄວາມຜາສຸກ, ມີພະລານາໄມສົມບູນ ແລະ ປະສົບຜົນສໍາເລັດອັນໃໝ່ໃຫຍ່ຫຼວງກວ່າເກົ່າ ໃນໜ້າທີ່ອັນມີກຽດສະຫງ່າຂອງຕົນ ຕະຫຼອດປີໃໝ່ນີ້.

ຂໍອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງຍາວນານຕາມທິດ4ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຈົ່ງແຕກດອກອອກຜົນຍິ່ງໆຂຶ້ນ.

ໃນໂອກາດດຽວກັນນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ,ນາຍົກລັດຖະມົນຕີແຫ່ງສປປລາວກໍ່ໄດ້ສົ່ງໂທລະເລກອວຍພອນ ເນື່ອງໃນໂອກາດບຸນປີໃໝ່ປະຈໍາຊາດ ຂອງ ສປ ຈີນ ປີ 2021ເຖິງສະຫາຍ ຫຼີ ເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນເຊ່ນດຽວກັນ,ຊຶ່ງມີເນື້ອໃນໂທລະເລກດັ່ງນີ້:ເນື່ອງໃນໂອກາດປີໃໝ່ຈີນ ຫລື ບຸນກຸດຈີນ ປີ 2021 (ປີສະຫຼຸ) ທີ່ຈະມາເຖິງນີ້ ໃນນາມພັກ, ລັດຖະບານ ແລະ ປະຊາຊົນລາວ ບັນດາເຜົ່າ ກໍຄືໃນນາມສ່ວນຕົວ, ຂ້າພະເຈົ້າ ຂໍສົ່ງຄຳອວຍພອນອັນອົບອຸ່ນ ແລະ ພອນໄຊອັນປະເສີດ ມາຍັງສະຫາຍ ໂດຍຜ່ານສະຫາຍ ໄຍຍັງການນຳພັກ, ລັດຖະບານ ແລະ ປະຊາຊົນຈີນ ອ້າຍນ້ອງທຸກຖ້ວນໜ້າ.

ຂ້າພະເຈົ້າ ຮູ້ສຶກດີໃຈ ເປັນຢ່າງຍິ່ງ ທີ່ເຫັນວ່າ ປະຈຸບັນ ການພົວພັນຮ່ວມມື ລະຫວ່າງ ສອງປະເທດພວກເຮົາ ນັບມື່້ ນັບໄດ້ຮັບການເສີມຂະຫຍາຍເຂົ້າສູ່ລວງເລິກໃນຫລາຍດ້ານ ອັນໄດ້ປະກອບສ່ວນເຮັດໃຫ້ສາຍພົວພັນຮ່ວມມືຍຸດທະສາດ ຮອບດ້ານ ຫມັ້ນຄົງ ຍາວນານ ຕາມທິດ 4 ດີ ກໍ່ຄື ຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ໄດ້ຮັບການເພີ່ມພູນຄູນສ້າງ ໃຫ້ເຕີບໃຫຍ່ຂະຫຍາຍຕົວ ແລະ ເກີດດອກອອກຜົນເປັນກ້າວໆ ເພື່ອຜົນປະໂຫຍດລວມຂອງປະຊາຊົນສອງຊາດພວກເຮົາ ແລະ ປີນີ້ກໍ່ເປັນປີຄົບຮອບວັນສ້າງຕັ້ງສາຍພົວພັນການທູດ ລາວ-ຈີນ ຄົບຮອບ60 ປີ ແລະ ປີມິດຕະພາບລາວ-ຈີນ, ຈີນ-ລາວ ອີກດ້ວຍ.ໃນໂອກາດອັນສະຫງ່າລາສີແຫ່ງວັນຂຶ້ນປີໃໝ່ ອັນເປັນສິລິມຸງຄຸນນີ້, ຂ້າພະເຈົ້າ ຂໍຕາງຫນ້າໃຫ້ແກ່ ການນຳພັກ, ລັດຖະບານ ແລະ ປະຊາຊົນລາວ ບັນດາເຜົ່າ ຂໍອວຍພອນຢ່າງຈິງໃຈ ມາຍັງການນຳພັກ, ລັດຖະບານ ແລະ ປະຊາຊົນຈີນ ອ້າຍນ້ອງທຸກທົ່ວໜ້າ ຈົ່ງມີພາລານາໄມສົມບູນ, ມີຄວາມຜາສຸກທຸກປະການ ແລະ ປະສົບຜົນສຳເລັດອັນໃຫມ່ທີ່ໃຫຍ່ຫລວງກວ່າເກົ່າ ໃນຫນ້າທີ່ອັນມີກຽດ ແລະ ສະຫງ່າງາມຂອງຕົນ ໃນການສືບຕໍ່ນຳພາປະເທດຈີນ ກ້າວຂຶ້ນຢາງໜັກແໜ້ນ ຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ, ບັນລຸເປົ້າໝາຍ 100 ປີ ສອງເຫດການ ອັນຍິ່ງໃຫຍ່ ຢ່າງສະຫງ່າງາມ.

ອວຍພອນໃຫ້ ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີ ແລະ ການເປັນຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ ຈົ່ງໝັ້ນຄົງຂະໜົງແກ່ນ ແລະ ສວຍສົດງົດງາມຕະຫລອດໄປ.

ຂໍ້ມູນ: ສຫນຍ