ພິທີປະກາດການນຳພັກການ-ເຂົ້າຮັບອຸດໜູນບຳນານ ແລະ ຍົກຍ້າຍຮັບໜ້າທີ່ໃໝ່ ໄດ້ຈັດຂຶ້ນ ເມື່ອບໍ່ດົນມານີ້ ທີ່ຫ້ອງວ່າການແຂວງຊຽງຂວາງ ໂດຍການເປັນປະທານຂອງທ່ານ ບຸນຈັນ ສີວົງພັນ ກຳມະການສູນກາງພັກ ເຈົ້າແຂວງຊຽງຂວາງ, ມີຄະນະປະຈຳພັກແຂວງ, ກຳມະການພັກແຂວງ, ຫົວ ໜ້າ-ຮອງຫົວໜ້າພະແນກການ, ກອງບັນຊາການ, ອົງການອ້ອມຂ້າງແຂວງເຂົ້າຮ່ວມ.

ໃນພິທີ ທ່ານ ສູນທອນ ພັນມີໄຊ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງສະບັບເລກທີ 289/ຄລສພ ລົງວັນທີ 18/12/2020 ວ່າດ້ວຍການອະນຸມັດໃຫ້ການ ນຳຂັ້ນສູງອອກພັກການ – ຮັບອຸດໜູນບຳນານ, ຕົກລົງໃຫ້ທ່ານ ບົວສອນ ສີນວນທອງ ຮອງເລຂາພັກ ແຂວງ ຮອງເຈົ້າແຂວງຊຽງຂວາງ ອອກພັກການ – ຮັບອຸດໜູນບຳນານ ໃນງວດ 1 ປີ 2021;

ມະຕິຕົກລົງ ສະບັບເລກທີ 292/ຄລສພ ລົງວັນທີ 18/12/2020 ວ່າດ້ວຍການອະນຸມັດໃຫ້ພະນັກງານ ອອກພັກການ-ຮັບອຸດໜູນບຳນານ, ຕົກລົງໃຫ້ ທ່ານ ຄຳພູ ຈັນທະວົງ ກຳມະການພັກແຂວງ ຫົວໜ້າຫ້ອງວ່າການແຂວງ ອອກພັກການ – ຮັບອຸດໜູນບຳນານ ໃນງວດ 1 ປີ 2021;

ຂໍ້ຕົກ ລົງສະບັບເລກທີ 47/ຈຂ.ຊຂ ລົງວັນທີ 20/1/2021 ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກການ – ຮັບອຸດໜູນບຳນານ, ອະນຸມັດໃຫ້ ທ່ານ ນາງ ຄຳໄສ ທິບດາລາ ວ່າການປະທານສະຫະພັນແມ່ຍິງແຂວງ ອອກພັກການ – ຮັບອຸດໜູນບຳນານ ໃນງວດ 1 ປີ 2021;

ຂໍ້ຕົກລົງສະບັບເລກທີ 670/ຈຂ.ຊຂ ລົງວັນທີ 15/12/2020 ວ່າດ້ວຍການອະນຸມັດໃຫ້ພະນັກງານ-ລັດຖະກອນ ອອກພັກການ – ຮັບອຸດໜູນບຳນານ, ອະນຸມັດໃຫ້ ທ່ານ ສີທອນ ສໍບົວລະພາ ຫົວໜ້າພະແນກພາຍໃນແຂວງ ອອກພັກການ – ຮັບອຸດໜູນບຳນານ ໃນງວດ 1 ປີ 2021;

ມະຕິຕົກລົງ ສະບັບເລກທີ 21/ຄປພຂ.ຊຂ ລົງວັນທີ 15/2/2021 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານ ບົວເງິນ ຫຸມໄຊຍະພົມ ຄະນະປະຈຳພັກແຂວງ ຫົວໜ້າພະແນກແຜນການ ແລະ ການລົງທຶນແຂວງ ໄປປະຕິບັດໜ້າທີ່ຢູ່ແຂວງ;

ມະຕິຕົກລົງ ສະບັບເລກທີ 19/ຄປພຂ.ຊຂ ລົງວັນທີ 11/2/2021 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານ ສີວິໄລ ແສງຈະເລີນ ກຳມະການພັກແຂວງ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ ໄປປະຕິບັດໜ້າທີ່ວຽກງານຢູ່ແຂວງ;

ມະຕິຕົກລົງສະບັບເລກທີ 20/ຄປພຂ.ຊຂ ລົງວັນທີ 11/2/2021 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານ ບຸນເລື່ອນ ວັນນາຮັກ ກຳມະການພັກແຂວງ ຮອງຫົວໜ້າຄະນະຈັດຕັ້ງແຂວງ ໄປປະຕິບັດໜ້າທີ່ວຽກງານຢູ່ພະແນກວິທະຍາສາດ ແລະ ເຕັກໂນໂລຊີແຂວງ;

ມະຕິຕົກລົງ ສະບັບເລກທີ 16/ຄປພຂ.ຊຂ ລົງວັນທີ 9/2/2021 ວ່າດ້ວຍການຍົກຍ້າຍພະນັກງານ ຍົກຍ້າຍ ທ່ານນາງ ຈັນທະສອນ ພູນສຸກ ກຳມະການພັກແຂວງ ຮອງຫົວໜ້າຫ້ອງວ່າການແຂວງ ໄປປະຕິບັດໜ້າທີ່ວຽກງານຢູ່ສະຫະພັນແມ່ຍິງແຂວງ;

ຂໍ້ຕົກລົງສະບັບ ເລກທີ 87/ຈຂ.ຊຂ ລົງວັນທີ 1/2/2021 ວ່າດ້ວຍການ ແຕ່ງຕັ້ງຮອງເຈົ້າແຂວງຊຽງຂວາງ ຕົກລົງແຕ່ງຕັ້ງບັນດາທ່ານຮອງເຈົ້າແຂວງຊຽງຂວາງດັ່ງນີ້:

1. ທ່ານ ບົວເງິນ ຫຸມໄຊຍະພົມ ເປັນຮອງເຈົ້າແຂວງ, 2. ທ່ານ ສີວິໄລ ແສງຈະເລີນ ເປັນຮອງເຈົ້າແຂວງ; ຂໍ້ຕົກລົງສະບັບເລກທີ 88/ຈຂ.ຊຂ ລົງວັນທີ 1/2/2021 ວ່າດ້ວຍການແຕ່ງຕັ້ງຫົວໜ້າຫ້ອງວ່າການແຂວງຊຽງຂວາງ ຕົກລົງແຕ່ງຕັ້ງ ທ່ານ ສົມພອນ ສີອາໄພ ກຳມະການພັກແຂວງ ເປັນຫົວໜ້າຫ້ອງວ່າການແຂວງ;

ຂໍ້ຕົກລົງສະບັບເລກທີ 101/ຈຂ.ຊຂ ລົງວັນທີ 11/2/2021 ວ່າດ້ວຍການແຕ່ງຕັ້ງຫົວໜ້າພະ ແນກວິທະຍາສາດ ແລະ ເຕັກໂນໂລຊີແຂວງແຕ່ງຕັ້ງ ທ່ານ ບຸນເລື່ອນ ວັນນາຮັກ ກຳມະການ ພັກແຂວງ ເປັນຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງ.

ໂອກາດດັ່ງກ່າວ, ທ່ານເຈົ້າແຂວງຊຽງຂວາງໄດ້ມີຄຳຄິດເຫັນແລກປ່ຽນ ຜູ້ທີ່ພັກການ ແລະ ຜູ້ຮັບໜ້າທີ່ໃໝ່ ໃຫ້ເອົາໃຈໃສ່ຮັກສາສຸຂະພາບ, ສຸມຫົວຄິດສະຕິປັນຍາ ເຂົ້າໃນການສ້າງສາພັດທະນາ ແຂວງຊຽງຂວາງໃຫ້ຈະເລີນຂຶ້ນເລື້ອຍໆ.

ຂ່າວ-ພາບ: ບຸນມີ ແສງທຸມມີ

ໃນວັນທີ 25 ກຸມພາ 2021, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສີສັດຕະນາກ ສົມທົບກັບ ປກສ ກຸ່ມຈອມແຈ້ງ ພ້ອມດ້ວຍອຳນາດການປົກຄອງບ້ານຈອມເພັດໃຕ້ ໄດ້ເຂົ້າກວດຄົ້ນຮ້ານອິນເຕີເນັດຄາເຟ່ຕັ້ງຢູ່ເຂດບໍລິເວນວົງວຽນຈີ່ນາຍໂມ້.

ຜ່ານການກວດກາພົບກຸ່ມໄວລຸ້ນ 15 ຄົນ ຍິງ 2 ຄົນ, ພ້ອມຢາເສບຕິດປະເພດຢາບ້າຈຳນວນ 61ເມັດ ແລະ ຢາໄອ້ 3 ຖົງນ້ອຍ ຈຶ່ງໄດ້ກັກຕົວ ແລະ ຢຶດຂອງກາງ ມາດຳເນີນການສືບສວນ-ສອບສວນຂະຫຍາຍຜົນຕໍ່ໄປ.

ການຊື້-ຂາຍ ແລະ ມົ້ວສຸມຢາເສບຕິດເປັນສາເຫດຕົ້ນຕໍພາໃຫ້ເກີດປະກົດການຫຍໍ້ທໍ້ ປຸ້ນຈີ້, ຊິງຊັບ, ລັກຊັບ, ອາລະວາດຕີກັນ, ຄອບຄົວບໍ່ສະ ຫງົບ ແລະອື່ນໆ. ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງບັນດາເຈົ້າຂອງຮ້ານອິນເຕີເນັດຄາເຟ່, ຮ້ານເກມ, ຮ້ານສະນຸກເກີ ຈົ່ງຄຸ້ມຄອງກິດຈະ ການຂອງຕົນໃຫ້ດີ, ບໍ່ສ້າງເງື່ອນໄຂໃຫ້ເກີດການຊື້-ຂາຍ ແລະ ມົ້ວສຸມຢາເສບຕິດໃນສະຖານທີ່ກິດຈະ ການຂອງທ່ານ.

ຖ້າຫາກທ່ານຮູ້ຂໍ້ມູນຂອງການຄ້າ-ຂາຍ, ມົ້ວສຸມຢາເສບຕິດ. ກະລຸນາແຈ້ງເຈົ້າໜ້າທີ່ໄດ້ທີ່ເບີ້ວອດແອັບ 020 ​28899774.

ປີ 2021 ນີ້, ທະນາຄານນະໂຍບາຍສາຂາແຂວງອັດຕະປື ມີແຜນຈະສະໜອງສິນເຊື່ອໃຫ້ໄດ້ 5,5 ຕື້ກວ່າກີບ ໂດຍຈະເລັ່ງໃສ່ເມືອງເປົ້າໝາຍຈຸດສຸມຂອງລັດຖະບານ ແລະ ບ້ານ 3 ສ້າງ ດ້ວຍອັດຕາດອກເບ້ຍຕໍ່າ ທີ່ລັດຖະບານກຳນົດອອກແຕ່ລະໄລຍະ ເພື່ອປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນ.

ທ່ານ ບຸນແຫຼມ ກິວົງສັກ ຮັກສາການຫົວໜ້າ ທະນາຄານນະໂຍບາຍ ສາຂາແຂວງອັດຕະປື ໄດ້ລາຍງານຕໍ່ກອງປະຊຸມສະຫຼຸບການເຄື່ອນໄຫວວຽກງານສິນເຊື່ອຂອງທະນາຄານນະໂຍບາຍສາຂາແຂວງອັດຕະປື ເມື່ອບໍ່ດົນນີ້ວ່າ: ປີ 2021 ທະນາຄານນະໂຍບາຍສາຂາ ແຂວງອັດຕະປື ໄດ້ຮັບອະນຸມັດແຫຼ່ງທຶນສິນເຊື່ອ ມີທັງໝົດ 5,5 ຕື້ກວ່າກີບ. ໃນນີ້, ທຶນໄລຍະສັ້ນມີ 23 ລ້ານກີບ, ທຶນໄລຍະກາງ ມີ 610 ລ້ານກີບ ແລະ ທຶນໄລຍະຍາວ ມີ 4,9 ຕື້ກວ່າກີບ, ເພື່ອໃຫ້ສະມາຊິກກຸ່ມກູ້ຢືມເງິນໄດ້ນຳໃຊ້ເງິນກູ້ເຂົ້າໃນການຜະລິດ ໄດ້ທ່ວງທັນກັບລະດູການ, ທາງທະນາຄານໄດ້ມີການແບ່ງທຶນອອກເປັນ 3 ແຫຼ່ງທຶນຄື: ແຫຼ່ງທຶນເປົ້າໝາຍມີ 3,3 ຕື້ກວ່າກີບ, ແຫຼ່ງທຶນຈຸດສຸມມີ 700 ລ້ານກວ່າກີບ ແລະ ແຫຼ່ງທຶນວຽກງານ 3 ສ້າງ ມີ 1,4 ຕື້ກວ່າກີບ.

ທ່ານ ບຸນແຫຼມ ກິວົງສັກ ໃຫ້ຮູ້ຕື່ມອີກວ່າ: ເພື່ອເຮັດໃຫ້ປະຊາຊົນໄດ້ເຂົ້າເຖິງແຫຼ່ງທຶນສິນເຊື່ອດັ່ງກ່າວ. ດັ່ງນັ້ນ, ທາງທະນາຄານນະໂຍບາຍ ສາຂາແຂວງອັດຕະປື ຈະໄດ້ແຕ່ງຕັ້ງພະນັກງານຂັ້ນສາຂາ, ຄະນະຂະ ແໜງລົງຊີ້ນຳ, ຊຸກຍູ້ບັນດາໜ່ວຍບໍລິການໃຫ້ເຄື່ອນໄຫວຫຼາຍຂຶ້ນ ເພື່ອໃຫ້ທຶນສິນເຊື່ອດັ່ງກ່າວນັ້ນ ເຂົ້າເຖິງປະ ຊາຊົນຜູ້ທຸກຍາກໃນບັນດາເມືອງ ແລະ ບ້ານເປົ້າໝາຍ ຢ່າງມີປະສິດທິຜົນຫຼາຍຂຶ້ນ .

ຂ່າວ-ພາບ: ສິດຕິພອນ | ປະຊາຊົນ

ກອງປະຊຸມລັດຖະບານ ຊຸດທີ VIII ທ້າຍສະໄໝ ໄດ້ຈັດຂຶ້ນໃນວັນທີ 25 ກຸມພາ 2021 ທີ່ ສຳນັກງານນາຍົກລັດຖະມົນຕີ, ພາຍໃຕ້ການເປັນປະທານ ຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ; ມີທ່ານ ພັນຄຳ ວິພາວັນ, ຮອງປະທານປະເທດ, ບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມ ຢ່າງພ້ອມພຽງ. ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າ, ປຶກສາຫາລື ແລະ ພິຈາລະນາ 4 ເອກະສານສໍາຄັນ ຄື:

1. ກອງປະຊຸມ ໄດ້ຮັບຟັງການລາຍງານ ກ່ຽວກັບຮ່າງແຜນງົບປະມານແຫ່ງຊາດ 5 ປີ (2021-2015) ທີ່ສະເໜີໂດຍທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຊຶ່ງແຜນງົບປະມານດັ່ງກ່າວ ແມ່ນການຜັນຂະ ຫຍາຍເນື້ອໃນຈິດໃຈ ມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໂດຍກຳນົດທິດທາງລວມ ຖືເອົາບັນຫາການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃນ 5 ປີຕໍ່ໜ້າ ເປັນວາລະແຫ່ງຊາດ ເພື່ອໃຫ້ທຸກການຈັດຕັັ້ງຂອງພັກ, ລັດ, ພະນັກງານ, ທະຫານ, ຕໍາຫຼວດ ແລະ ປະຊາຊົນທົ່ວສັງຄົມ ປະກອບສ່ວນ ເຂົ້າໃນການຈັດຕັັ້ງປະຕິບັດວາລະແຫ່ງຊາດ ຕາມພາລະບົດບາດຂອງຕົນ ແນໃສ່ແກ້ໄຂສະພາບເສດຖະກິດ-ການເງິນ ທີ່ມີຄວາມສ່ຽງສູງ ໃຫ້ສາມາດກ້າວເຂົ້າສູ່ສະພາບປົກກະຕິ. ຜ່ານການປຶກສາຫາລື, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ກຳນົດແຈ້ງຕື່ມ ກ່ຽວກັບວິທີການ ແລະ ມາດຕະການ ໃນການອັດຊ່ອງວ່າງການຮົ່ວໄຫຼ ຂອງງົບປະມານ, ມາດຕະການປະຢັດມັດທະຍັດ, ການປະຕິບັດວິໄນແຜນການ-ການເງິນ, ການກຳນົດຈຸດສຸມ ການນຳໃຊ້ງົບປະມານລົງທຶນຂອງລັດ, ການສ້າງຖານລາຍຮັບໃໝ່ ແລະ ອື່ນໆ, ລວມທັງ ຕົວເລກຄາດໝາຍຕ່າງໆ ໃຫ້ແທດເໝາະກັບສະພາບເງື່ອນໄຂ ແລະ ຄວາມສາມາດຕົວຈິງ, ຫຼັງຈາກນັ້ນ ສົ່ງໃຫ້ບັນດາທ່ານ ຮອງນາຍົກລັດຖະມົນຕີ ແລະ ທ່ານ ນາຍົກລັດຖະມົນຕີ ພິຈາລະນາ ເປັນຄັ້ງສຸດທ້າຍ ກ່ອນຈະນຳໄປສະເໜີຕໍ່ກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ເພື່ອພິຈາລະນາຮັບຮອງ .

2. ກອງປະຊຸມ ໄດ້ຮັບຟັງການລາຍງານ ກ່ຽວກັບການປັບປຸງຮ່າງດຳລັດ ວ່າດ້ວຍການຮັບຮອງເອົາບັນຊີກິດຈະ ການຄວບຄຸມ ແລະ ກິດຈະການສຳປະທານ ທີ່ສະເໜີໂດຍທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງແຜນ ການ ແລະ ການລົງທຶນ. ຜ່ານການປຶກສາຫາລື, ກອງປະຊຸມ ເຫັນດີດ້ານຫຼັກການຮັບຮອງຮ່າງດຳລັດສະບັບປັບປຸງ ດັ່ງກ່າວ ແລະ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ນໍາໄປປັບປຸງຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ການແບ່ງຄວາມຮັບຜິດຊອບ ລະຫວ່າງສູນການ ແລະ ທ້ອງຖິ່ນ, ກົນໄກການພິຈາລະນາອະນຸມັດກິດຈະການສຳປະທານ, ການອຳນວຍຄວາມສະດວກດ້ານຕ່າງໆ ໃນການຄຸ້ມຄອງການດຳເນີນກິດຈະການສຳປະທານ, ລວມທັງ ການກຳນົດບັນຊີກິດຈະການຄວບຄຸມ ແລະ ກິດຈະກຳສຳປະທານ ໃຫ້ມີຄວາມເໝາະສົມ, ລະອຽດຈະແຈ້ງ ແລະ ຄົບຖ້ວນ ກວ່າເກົ່າ.

3. ກອງປະຊຸມ ໄດ້ຮັບຟັງການລາຍງານ ກ່ຽວກັບຮ່າງດຳລັດ ວ່າດ້ວຍເຂດສະຫງວນແຮ່ທາດ ທີ່ສະເໜີໂດຍທ່ານຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ ແນໃສ່ຮັບປະກັນຄວາມສົມດຸນ ລະຫວ່າງ ການສະຫງວນ ແລະ ການນຳໃຊ້, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແຫ່ງຊາດ ຕາມທິດສີຂຽວ, ຍືນຍົງ ແລະ ເປັນເຈົ້າການ. ຜ່ານການປຶກສາຫາລື, ກອງປະຊຸມ ເຫັນດີດ້ານຫຼັກການຮັບຮອງເອົາຮ່າງດຳລັດ ດັ່ງກ່າວ ແລະ ຊີ້ນຳໃຫ້ກະຊວງພະລັງງານ ແລະ ບໍ່ແຮ່ ສົມທົບກັບຂະແໜງການທີ່ກ່ຽວຂ້ອງ ປັບປຸງເນື້ອໃນຮ່າງດຳລັດ ຕາມການປະກອບຄໍາເຫັນຂອງສະມາຊິກລັດຖະບານ ໂດຍສະເພາະ ການເສີມຂະຫຍາຍບົດຮຽນ ທີ່ຖອດຖອນໄດ້ ຈາກການຄຸ້ມຄອງແຮ່ທາດ ໃນໄລຍະຜ່ານມາ ເພື່ອກຳນົດ ແລະ ປັບປຸງຮ່າງດຳລັດສະບັບນີ້ ໃຫ້ມີຄວາມສົມບູນຍິ່ງຂຶ້ນ ເປັນຕົ້ນ ການກຳນົດຈຳນວນເຂດ ແລະ ເນື້ອທີ່ ໃຫ້ຊັດເຈນ, ການແຍກເຂດ ທີ່ມີອົງປະກອບ ແລະ ເງື່ອນໄຂແຕກຕ່າງກັນ; ບ່ອນອີງທາງດ້ານກົດໝາຍ ໃນການກຳນົດລະບຽບການ ແລະ ມາດຕະການ ໃນການຄຸ້ມຄອງ ໃຫ້ລະອຽດ ແລະ ແທດຕົວຈິງກັບແຕ່ລະເຂດ.

4. ກອງປະຊຸມ ໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດວຽກງານຂອງລັດຖະບານ ຊຸດທີ VIII ໄລຍະ 5 ປີ (2016-2020) ທີ່ສະເໜີໂດຍ ທ່ານ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ. ຜ່ານການພິຈາລະນາ, ກອງປະຊຸມ ໄດ້ຊີ້ນຳໃຫ້ຫ້ອງວ່າການສຳນັກງານນາຍົກລັດຖະມົນຕີ ປັບປຸງຮ່າງບົດລາຍງານ ຕາມການປະກອບຄໍາເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນຄົບຖ້ວນ ເປັນຕົ້ນ ວຽກງານພົ້ນເດ່ນໃນການແກ້ໄຂປະກົດການຫຍໍ້ທໍ້ໃນສັງຄົມ, ການບໍລິຫານລັດ ຕິດພັນກັບການແບ່ງຂັ້ນຄຸ້ມຄອງລະຫວ່າງສູນກາງ ແລະ ທ້ອງຖິ່ນ, ລວມທັງ ຂໍ້ຄົງຄ້າງຈຳນວນໜຶ່ງ ເພື່ອເປັນຂໍ້ມູນໃຫ້ລັດຖະບານ ຊຸດທີ IX ໃນການຈັດຕັ້ງປະຕິບັດວຽກງານຕໍ່ໄປ.

ສໍາລັບວຽກຈຸດສຸມ ປະຈໍາເດືອນ ມີນາ 2021, ກອງປະຊຸມ ໄດ້ຊີ້ນຳໃຫ້ບັນດາຂະແໜງການ ແລະ ທ້ອງຖິ່ນກ່ຽວຂ້ອງ ສຸມໃສ່ຈັດຕັ້ງປະຕິບັດ ດັ່ງນີ້:

1. ສືບຕໍ່ຮັກສາສະຖຽນລະພາບ ທາງດ້ານການເມືອງ ໃຫ້ມີຄວາມສະຫງົບ, ເປັນລະບຽບຮຽບຮ້ອຍ, ສະກັດກັ້ນບັນດາປະກົດການຫຍໍ້ທໍ້ຕ່າງໆໃນສັງຄົມ ໂດຍຈໍາກັດ ແລະ ຕີຖອຍ ສິ່ງທີ່ບໍ່ດີເຫຼົ່ານັ້ນ ເພື່ອສ້າງຄວາມເຊື່ອໝັ້ນ ແລະ ຄວາມປອດໄພໃຫ້ແກ່ປະຊາຊົນ. ພ້ອມກັນນັ້ນ, ກໍ່ໃຫ້ສືບຕໍ່ເອົາໃຈໃສ່ ຕິດຕາມສະພາບການນໍາໃຊ້ສື່ສັງຄົມອອນລາຍ ແລະ ອື່ນໆ ທີ່ມີການເຄື່ອນໄຫວໂຄສະນາໂຈມຕີບິດເບືອນແນວທາງ ແລະ ນະໂຍບາຍຂອງພັກ ແລະ ລັດ;

2. ສືບຕໍ່ຕິດຕາມຢ່າງໃກ້ຊິດ ສະພາບການພາກພື້ນ ແລະ ສາກົນ ໂດຍມີການວິເຄາະວິໃຈເລິກເຊິ່ງ ກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດ ແລະ ສັງຄົມ ຕໍ່ປະເທດເຮົາ ສືບຕໍ່ສ້າງສະພາບແວດລ້ອມອັນເອື້ອອໍານວຍໃຫ້ແກ່ການຮ່ວມມືກັບພາກພື້ນ ແລະ ສາກົນ ເພື່ອຍາດແຍ່ງເອົາການສະໜັບສະໜູນ, ການຊ່ວຍເຫຼືອ, ການຮ່ວມມືໃຫ້ແກ່ການສ້າງສາພັດທະນາປະເທດເຮົາ. ພ້ອມກັນນີ້ ກໍ່ໃຫ້ສືບຕໍ່ກະກຽມຮອບດ້ານແຜນການເຄື່ອນໄຫວຕ່າງປະເທດຂອງການນໍາພັກ-ລັດ ໃນປີ 2021 ໃຫ້ມີເນື້ອໃນ ແລະ ບັນຍາກາດທີ່ດີ.

3. ທຸກຂະແໜງການ ແລະ ທ້ອງຖິ່ນ ໃຫ້ສືບຕໍ່ຕິດຕາມການຈັດເກັບລາຍຮັບ ໃຫ້ໄດ້ຕາມແຜນການ ແລະ ທັນເວລາ ດ້ວຍມາດຕະການຕ່າງໆ ຢ່າງຄົບຊຸດ, ໂດຍສະເພາະ ແມ່ນເລັ່ງພັດທະນາ ແລະ ນໍາໃຊ້ເຄື່ອງມືທັນສະໄໝໃນການເກັບລາຍຮັບ ແລະ ຮີບຮ້ອນ ສືບຕໍ່ປັບປຸງບັນດາລັດວິສາຫະກິດໃຫ້ສໍາເລັດໂດຍໄວ;

4. ສືບຕໍ່ປຸກລະດົມຂົນຂວາຍການລົງທຶນດ້ວຍຫຼາຍຮູບການ, ປັບປຸງແກ້ໄຂບັນຫາສິ່ງກີດຂວາງຕ່າງໆ ເພື່ອສ້າງເງື່ອນ ໄຂສະດວກ ໃຫ້ແກ່ນັກລົງທຶນ ແລະ ຍົກສູງປະສິດທິພາບການບໍລິການປະຕູດຽວ. ພ້ອມນີ້, ກໍເລັ່ງລັດການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດໃຫ້ມີປະສິດທິຜົນ ເພື່ອກະຕຸກຊຸກຍູ້ການສ້າງຖານລາຍຮັບເພີ່ມຂຶ້ນ ພ້ອມທັງຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ປີ 2021 ໃຫ້ກ້າວເຂົ້າສູ່ລວງເລິກ ແລະ ນໍາໃຊ້ທຸກທ່າແຮງບົ່ມຊ້ອນທີ່ມີ;

5. ສືບຕໍ່ຄຸ້ມຄອງ ແລະ ຮັກສາສະຖຽນລະພາບດ້ານເງິນຕາ ໃຫ້ມີຄວາມໝັ້ນທ່ຽງ, ເໜັງຕີງໃນລະດັບທີ່ກໍານົດໄວ້; ຄຸ້ມຄອງການເຄື່ອນໄຫວຂອງທະນາຄານທຸລະກິດ ແລະ ເພີ່ມທະວີການຕິດຕາມ, ກວດກາສິນເຊື່ອ ຂອງບັນດາສະຖາບັນການເງິນ ໃຫ້ເຄື່ອນໄຫວຖືກຕ້ອງຕາມກົດໝາຍ ແລະ ລະບຽບການ; ຄົ້ນຄວ້າອັດຕາດອກເບ້ຍເງິນກູ້ ເພື່ອສົ່ງເສີມຊຸກຍູ້ການຜະລິດ, ການລົງທຶນ ແລະ ເພື່ອກະຕຸ້ນເສດຖະກິດ ໃຫ້ຂະຫຍາຍຕົວ;

6. ສືບຕໍ່ເອົາໃຈໃສ່ຕິດຕາມຄຸ້ມຄອງລາຄາສິນຄ້າ ເພື່ອບໍ່ໃຫ້ຜູ້ປະກອບການ, ພໍ່ຄ້າຊາວຂາຍ ສວຍໂອກາດຂຶ້ນລາຄາສິນຄ້າ, ພ້ອມທັງເອົາໃຈໃສ່ຕິດຕາມຊຸກຍູ້ ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ (SMEs); ຊຸກຍູ້ບັນດາໂຮງງານປຸງແຕ່ງຕ່າງໆໃຫ້ເຄື່ອນໄຫວປົກກະຕິ, ຖືກກົດໝາຍ, ມີປະສິດທິຜົນ ແລະ ການສົ່ງອອກຜະລິດຕະພັນໃຫ້ຫຼາຍຂຶ້ນ ເພື່ອທົດແທນການນໍາເຂົ້າສິນຄ້າ ແລະ ເປັນການສ້າງຖານການຜະລິດໃຫ້ເຂັ້ມແຂງ;

7. ຮີບຮ້ອນແກ້ໄຂບັນດາອຸປະສັກໃນການຂົນສົ່ງ-ຈໍລະຈອນສິນຄ້າ ຢູ່ພາຍໃນປະເທດ ແລະ ຢູ່ຕາມດ່ານຕ່າງໆ ໂດຍຄົ້ນຄວ້າຫຼາຍວິທີແກ້ໄຂແບບປະສົມປະສານກັນ ຕາມສະພາບຕົວຈິງ ຂອງແຕ່ລະບ່ອນ ເຮັດແນວໃດ ບໍ່ໃຫ້ສິນຄ້າອັ່ງອໍ ແລະ ເສຍຄຸນນະພາບ ຍ້ອນອຸປະສັກໃນການຂົນສົ່ງ. ຄຽງຄູ່ກັນນັ້ນ ກໍຕ້ອງຮັບປະກັນບໍ່ໃຫ້ມີຄວາມສ່ຽງໃນການຕິດເຊື້ອພະຍາດໂຄວິດ-19 ຢ່າງເດັດຂາດ.

8. ໃຫ້ຄະນະສະເພາະກິດເພື່ອປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ແລະ ກະຊວງສາທາລະນະສຸກ ເພີ່ມທະວີການຄຸ້ມຄອງ, ການຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດມາດຕະການປ້ອງກັນການແຜ່ເຊື້ອ ແລະ ຕິດເຊື້ອພະຍາດໂຄວິດ-19 ກໍຄືພະຍາດຕາມລະດູການຕ່າງໆ ແລະ ລາຍງານໃຫ້ຂັ້ນເທິງ ຮັບຊາບຢ່າງເປັນປົກກະຕິ ແລະ ທັນເວລາ;

9. ສືບຕໍ່ຕິດຕາມເຝົ້າລະວັງການປ່ຽນແປງດິນຟ້າອາກາດ ເພື່ອປະຊາສໍາພັນໃຫ້ປະຊາຊົນໄດ້ຮັບຮູ້ຂໍ້ມູນຂ່າວສານ ທັງກະກຽມຮັບມື ໃຫ້ທັນສະພາບການ ພ້ອມທັງຕິດຕາມເຝົ້າລະວັງ ແລະ ກະກຽມຄວາມພ້ອມໃນດ້ານຕ່າງໆ ເພື່ອຕ້ານແລ້ງ-ຕ້ານຖ້ວມ;

10. ໃຫ້ບັນດາກະຊວງ-ອົງການ ແລະ ອົງການປົກຄອງທ້ອງຖິ່ນ ເອົາໃຈໃສ່ປະຕິບັດ ຄໍາສັ່ງເລກທີ 09/ນຍ ວ່າດ້ວຍການປະຢັດລາຍຈ່າຍງົບປະມານຂອງລັດ ຢ່າງເອົາຈິງເອົາຈັງໃນສະພາບທີ່ລັດຖະບານມີຄວາມຫຍຸ້ງຍາກທາງດ້ານເສດຖະກິດ, ຊຶ່ງຈະເອົາການແກ້ໄຂວິກິດເສດຖະກິດ-ການເງິນ ເປັນວາລະແຫ່ງຊາດ ເພື່ອໃຫ້ທຸກພາກສ່ວນໃນສັງຄົມ ລວມເຖິງພໍ່ແມ່ພີ່ນ້ອງປະຊາຊົນ ພ້ອມກັນຈັດຕັ້ງປະຕິບັດໃຫ້ມີປະສິດທິຜົນ

11. ສືບຕໍ່ກະກຽມເນື້ອໃນເອກະສານ ທີ່ລັດຖະບານຈະໄດ້ລາຍງານຕໍ່ກອງປະ ຊຸມສະພາແຫ່ງຊາດ ຄັ້ງປະຖົມມະລຶກ ທີ່ຈະມາເຖິງ ໃຫ້ມີເນື້ອໃນຮັດກຸມ ເພື່ອໃຫ້ກອງປະຊຸມພິຈາລະນາຮັບຮອງໄດ້; ບັນດາສະມາຊິກລັດຖະບານ ເຂົ້າຮ່ວມກອງປະຊຸມຢ່າງພ້ອມພຽງ.
ໃນຕອນທ້າຍ, ກອງປະຊຸມ ໄດ້ສະແດງຄວາມຍ້ອງຍໍຊົມເຊີຍ ພະນັກງານ, ລັດຖະກອນ, ກຳມະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ປະຊາຊົນລາວບັນດາເຜົ່າ, ຊັ້ນຄົນ, ສາສະໜາດ ຄົນຕ່າງດ້າວ ແລະ ຜູ້ບໍ່ມີສັນຊາດທີ່ດຳລົງຊີວິດຢູ່ ສປປ ລາວ ກໍ່ຄືພີ່ນ້ອງເຊື້ອຊາດລາວ ຢູ່ຕ່າງປະເທດ ທີ່ໄດ້ສະໜັບສະໜູນ, ເປັນກຳລັງແຮງໃຫ້ລັດຖະບານ ຊຸດທີ VIII ຈັດຕັ້ງປະຕິບັດັ້າທີ່ວຽກງານ ຕະຫຼອດ 5 ປີ ຜ່ານມາ. ພ້ອມກັນນີ້ ສະແດງຄວາມຂອບໃຈຕໍ່ບັນດາປະເທດ ເພື່ອນມິດ, ປະເທດອາຊຽນ, ບັນດາປະເທດໃນໂລກ ແລະ ອົງການຈັດຕັ້ງສາກົນຕ່າງໆທີ່ໄດ້ໃຫ້ການຊ່ວຍເຫຼືອ, ຮ່ວມມື ແລະ ສະໜັບສະໜູນລັດຖະບານຊຸດທີ VIII ຕະຫຼອດມາ.

ເຈົ້າໜ້າທີ່ ປກສ ເມືອງຈັນທະບູລີ ນະຄອນຫຼວງວຽງຈັນ ໄດ້ລົງກວດກາຄວາມເປັນລະບຽບຮຽບຮ້ອຍເຂດບ້ານວັດຈັນ, ເມືອງຈັນທະບູລີ ນວ, ໄດ້ພົບເຫັນຜູ້ຍິງຄົນໜຶ່ງຢ່າງເລລ້ອນຕາມແຄມທາງ, ຜ່ານການກວດກາເຫັນວ່າໜັງສືຜ່ານແດນແມ່ນເກີນກຳນົດເວລາພັກເຊົາຫຼາຍກວ່າ 90 ວັນ, ດັ່ງນັ້ນ, ຈຶ່ງໄດ້ນຳສົ່ງໄປຝາກໄວ້ສູນກັກກັນ ແລະ ຕ້ານການແຜ່ລະບາດພະຍາດໂຄວິດ-19 ສູນກາງແນວລາວສ້າງຊາດ ພ້ອມທັງລາຍງານໄປໃຫ້ໜ່ວຍງານສະເພາະກິດແກ້ໄຂຄົນຕ່າງປະເທດ ປກສ ນະຄອນຫຼວງວຽງຈັນ ແລະ ຂະແໜງການທີ່ກ່ຽວຂ້ອງເພື່ອສືບຕໍ່ຊ່ວຍເຫຼືອ.

ຜ່ານການກວດກາຮູ້ໄດ້ວ່າ: ນາງ ມາຢຸ ກາຈາວະ ( MS MAYU KAGAWA ) ອາຍຸ 48ປີ, ເຊື້ອຊາດ-ສັນຊາດຍີ່ປຸ່ນ ໄດ້ເດີນທາງເຂົ້າມາ ສປປ ລາວ ຜ່ານດ່ານສາກົນວັງເຕົ່າ ແຂວງຈຳປາສັກ ເພື່ອມາທ່ອງທ່ຽວ ເມື່ອຮອດກຳນົດກັບຜູ້ກ່ຽວແມ່ນບໍ່ສາມາດກັບປະເທດຕາມໄລຍະເວລາທີ່ທາງການອະນຸຍາດ, ເນື່ອງຈາກການລະບາດຂອງພະຍາດໂຄວິດ-19 ແລະ ຜູ້ກ່ຽວກໍ່ບໍ່ມີຄ່າໃຊ້ຈ່າຍໃນການດຳລົງຊີວິດຈຶ່ງເລລ້ອນຕາມໝູ່ບ້ານຕ່າງໆ ພ້ອມກັນນັ້ນຜູ້ກ່ຽວກໍ່ບໍ່ສາມາດຕິດຕໍ່ຫາຍາດພີ່ນ້ອງໄດ້.

ສະນັ້ນ, ເຈົ້າໜ້າທີ່ສະເພາະກິດຈຶ່ງໄດ້ນຳຕົວມາເບິ່ງແຍງ ພ້ອມທັງປະສານໄປຍັງເຈົ້າໜ້າທີ່ຂອງສະຖານທູດຍີ່ປຸ່ນປະຈຳ ສປປ ລາວ ເພື່ອຂໍຄວາມຊ່ວຍເຫຼືອ ມາຮອດວັນທີ 24 ກຸມພາ 2021 ຈຶ່ງໄດ້ນຳສົ່ງຜູ້ກ່ຽວເດີນທາງກັບຄືນປະເທດ ນີ້ແມ່ນການປະຕິບັດນະໂຍບາຍຫຼັກການມະນຸດສະທຳຂອງ ສປປ ລາວ.

ກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດກອງປະຊຸມສ້າງຄວາມ ເຂັ້ມແຂງໃຫ້ແກ່ການຈັດຕັ້ງປະຕິບັດແຜນງານແຫ່ງຊາດ ເພື່ອປ້ອງກັນ ແລະ ລຶບລ້າງການນຳໃຊ້ແຮງງານເດັກ ແລະ ສົ່ງເສີມວຽກທີ່ມີຄຸນຄ່າສຳລັບໄວໜຸ່ມ ໃນ ສປປ ລາວ ໄລຍະ 2021-2025 ໄດ້ຈັດຂຶ້ນໃນວັນທີ 24 ກຸມພານີ້ ທີ່ນະຄອນຫຼວງວຽງຈັນ, ພາຍໃຕ້ການເປັນປະທານຂອງທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ ຊຶ່ງມີ ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງ ຮສສ, ທ່ານ ນາງ ບາລາລີ ພຣຸກ ຊ່ຽວຊານອາວຸໂສ ເພື່ຶອສົ່ງເສີມຫຼັກການພື້ນຖານ ແລະ ສິດທິໃນການອອກແຮງງານ ຂອງອົງການ ແຮງງານສາກົນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອພ້ອມກັນຄົ້ນຄວ້າປຶກສາຫາລືກ່ຽວກັບ ຄູ່ມືເພື່ອນຳໃຊ້ໃນການຈັດ ຕັ້ງປະຕິບັດ ຢູ່ ສປປ ລາວ ເປັນຕົ້ນແມ່ນແຜນບຸລິມະສິດ ຂອງປີ 2021 ຂອງຂະແໜງແຮງງານ ແລະ ສະຫວັດດີການສັງຄົມ ກ່ຽວກັບການລຶບລ້າງການນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງຂະແໜງກະສິກຳ ແລະ ປ່າໄມ້ ກ່ຽວກັບການລຶບລ້າງນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງຂະແໜງການທ່ອງທ່ຽວກ່ຽວກັບການລຶບລ້າງນຳໃຊ້ແຮງງານເດັກ; ແຜນບຸລິມະສິດ ຂອງປີ 2021 ຂອງສູນ ກາງກຳມະບານລາວກ່ຽວກັບການລຶບລ້າງນຳໃຊ້ແຮງງານເດັກ ແລະ ແຜນບຸລິມະສິດ ຂອງປີ 2021 ຂອງສະພາ ການຄ້າ ແລະ ອຸດສະຫະກຳແຫ່ງຊາດລາວ ກ່ຽວກັບການລຶບລ້າງນຳໃຊ້ແຮງງານເດັກ.

ຂ່າວ: ຕຸໄລເພັດ

ງານເທດສະການອາຫານລາວ ປະຈໍາປີ 2021 ເລີ່ມຂຶ້ນໃນວັນທີ 23 ກຸມພານີ້ ທີ່ສວນເຈົ້າອານຸວົງ ເມືອງຈັນທະບູລີ ນະຄອນຫລວງວຽງຈັນ ມີຫລາຍກວ່າ 100 ຮ້ານວາງສະແດງຂາຍສິນຄ້າ ໂດຍຈະດຳເນີນໄປຮອດວັນທີ 27 ກຸມພາ 2021 ນີ້ຈິ່ງຈະສໍາເລັດ.

ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງລາວ, ປະທານຄະນະກໍາມະການຈັດງານເທດສະການອາຫານລາວປະຈໍາປີ 2021 ໃຫ້ຮູ້ວ່າ: ຈຸດປະສົງການຈັດງານຄັ້ງນີ້ ເພື່ອໃຫ້ຮູ້ເຖິງແນວຄວາມຄິດ ແລະ ບັນຍາກາດອັນໃໝ່ໃນການອະນຸລັກອາຫານ, ການກິນຢູ່, ດໍາລົງຊີວິດໃຫ້ເປັນແບບວັດທະນະທໍາ, ຮີດຄອງປະເພນີດັ່ງເດີມ ແລະ ປັບໃຫ້ເຂົ້າກັບຍຸກສະໄໝຂອງຄົນລາວ, ເສີມສ້າງໃຫ້ເປັນບັນຍາກາດແບບສັງຄົມພື້ນ ເມືອງລາວທີ່ເຄີຍມີມາ, ສືບຕໍ່ຊຸກຍູ້ສົ່ງເສີມແມ່ຍິງຜູ້ຜະລິດ, ຜູ້ປູກຝັງ-ລ້ຽງ ສັດທີ່ປຸງແຕ່ງໃນຮ້ານອາຫານ, ໂຮງແຮມ, ຮ້ານຂາຍຍ່ອຍຈາກທ້ອງ ຖິ່ນຕ່າງໆ ລວມທັງປຸກລະດົມເຊີນຊວນຜູ້ປະກອບການແມ່ຍິງຜະລິດເປັນສິນ ຄ້າໃຫ້ສາມາດສ້າງເຄືອຂ່າຍການຄ້າຢ່າງກວ້າງຂວາງໃນຂອບເຂດທົ່ວປະເທດ ເພື່ອຊຸກຍູ້ນະໂຍບາຍລາວທ່ຽວລາວ ແລະ ສາມາດຕອບສະໜອງສິນຄ້າຢ່າງພຽງພໍໃຫ້ແກ່ຜູ້ມາທ່ຽວຊົມໄດ້ຈັບຈ່າຍຊື້-ຂາຍຢ່າງສະດວກສະ ບາຍ ພ້ອມນີ້ ຍັງເປັນການໂຄສະນາເຜີຍແຜ່ການຫລຸດຜ່ອນພາວະໃຊ້ຖົງຢາງພາສຕິກ, ຫັນມາຊົມໃຊ້ວັດຖຸທໍາມະຊາດ ແລະ ຫັນມາບໍລິໂພກອາຫານພື້ນເມືອງລາວທີ່ປອດສານເຄມີ.

ພາຍໃນງານຄັ້ງນີ້ ມີຫົວໜ່ວຍທຸລະກິດພາຍໃນປະເທດ ແລະ ຕາງ ໜ້າສະຖານທູດຈາກປະເທດສະມາຊິກອາຊຽນ ປະຈໍາລາວ ເຂົ້າຮ່ວມທັງ ໝົດ 120 ຮ້ານ. ໃນນີ້ ມີຮ້ານວາງສະແດງ ແລະ ຂາຍອາຫານຈໍານວນ 104 ຮ້ານ, ເຄື່ອງຫັດຖະກໍາ ແລະ ກະສິກໍາ 16 ຮ້ານ. ນອກຈາກນີ້ ພາຍໃນງານມີຫລາຍກິດຈະກໍາເປັນຕົ້ນ: ການຈັດຕັ້ງໂຄສະນາໃຫ້ຜູ້ມາຂາຍເຄື່ອງນຸ່ງຖືແບບລາວບູຮານ, ຂາຍອາຫານລາວ, ສາທິດປຸງແຕ່ງອາຫານພື້ນເມືອງລາວຈາກຮ້ານອາຫານຊື່ດັງ, ສາທິດການສານກະຕ່າໄມ້ ຫລື ຫວາຍໃສ່ອາ ຫານ ແລະ ເຄື່ອງຂອງໄດ້ຈາກຮ້ານ, ການປະກວດການຕົບແຕ່ງຮ້ານແບບລາວໆ ພ້ອມທັງກວດສຸຂະພາບ ລວມທັງຮັບຊົມເສບດົນຕີລາວເດີມ ແລະ ອື່ນໆ.%

Cr: ບຸນຍັງ ພຸດສະຫວັດ