ກອງປະຊຸມຮ່ວມມືສອງຝ່າຍ ກ່ຽວກັບ ວຽກງານຕ້ານ ແລະ ສະກັດກັ້ນການລັກລອບ ຄ້າຂາຍສັດປ່າ ທີ່ຜິດກົດຫມາຍ ລະຫວ່າງ ສປປ ລາວ ແລະ ຣາຊາອານາຈັກໄທ.

ໃນລະຫວ່າງວັນທີ 14-15 ກັນຍາ 2022 ຈັງຫວັດຊຽງລາຍ ຂອງຣາຊາອານາຈັກໄທ ແລະ ແຂວງບໍ່ແກ້ວ ຂອງ ສປປລາວ ໄດ້ຮ່ວມກັນຈັດກອງປະຊຸມ ປຶກສາຫາລື ແລກປ່ຽນບົດຮຽນ ກ່ຽວກັບ ວຽກງານຕ້ານ ແລະ ສະກັດກັ້ນ ການລັກລອບຄ້າຂາຍສັດປ່າ ລະຫວ່າງຊາດ ໂດຍສະເພາະ ຕາມແນວຊາຍແດນ ຂອງແຂວງ ບໍ່ແກ້ວ ແລະ ຈັງຫວັດຊຽງລາຍ ໂດຍການເປັນປະທານຮ່ວມ ຂອງທ່ານ ສຸນັນທາ ຈຸນລະມະນີ ຮອງຫົວຫນ້າກົມກວດກາປ່າໄມ້, ກະຊວງ ກະສິກຳ ແລະ ປ່າໄມ້, ສປປລາວ ແລະ ທ່ານ ວາຣະດິສອນ ອ່ອນນຸດ ຮອງຜູ້ວ່າລາດຊະການ ຈັງຫວັດຊຽງລາຍ, ຣາຊາອານາຈັກໄທ, ຊຶ່ງກອງປະຊຸມ ໄດ້ຈັດຂື້ນທີ່ ໂຮງແຮມ ຊຽງຂອງ ທີກກາເດັນ ລິເວີຟອນ, ເມືອງຊຽງຂອງ, ຈັງຫວັດຊຽງລາຍ, ໂດຍການສະຫນັບສະຫນູນ ຂອງອົງການ WWF, ຊຶ່ງມີຄະນະຜູ້ແທນຝ່າຍລາວ ຈາກກົມກວດກາປ່າໄມ້, ກົມປ່າໄມ້, ກົມແຜນການ ແລະ ການເງີນ, ອົງການອະນຸລັກທຳມະຊາດ, ພະແນກ ກະສິກຳ ແລະ ໄມ້, ພາສີ, ຕຳຫລວດ, ທະຫານ, ສານ, ໄອຍະການ, ຫ້ອງການ ກະສິກຳ ແລະ ປ່າໄມ້ເມືອງ, ຄະນະ P-WEN ຂອງ ແຂວງ ບໍ່ແກ້ວ, ຫລວງນ້ຳທາ ແລະ ແຂວງ ອຸດົມໄຊ ລວມທັງບັນດາເຈົ້າທີ່ ແລະ ພາກສ່ວນກ່ຽວຂ້ອງ ຝ່າຍໄທ ເຂົ້າຮ່ວມ ທັງຫມົດ 100 ທ່ານ.

ຈຸດປະສົງ ຂອງກອງປະຊຸມ ແມ່ນເພື່ອຄົ້ນຄວ້າ ປຶກສາຫາລື, ລະດົມແນວຄວາມຄິດ, ແລກປ່ຽນບົດຮຽນ, ແລກປ່ຽນຂໍ້ມູນຂ່າວສານ ແລະ ສ້າງກົນໄກ ການຮ່ວມມື, ການປະສານກັນ ກ່ຽວກັບ ວຽກງານ ຕ້ານ ແລະ ສະກັດກັ້ນ ການລັກລອບຄ້າຂາຍສັດປ່າ ລະຫວ່າງຊາດ ໂດຍສະເພາະ ຕາມຊາຍແດນເມືອງຕໍ່ເມືອງ ແຂວງຕໍ່ແຂວງ ຄື: ເມືອງ ຕົ້ນເຜິ້ງ, ຫ້ວຍຊາຍ ແລະ ເມືອງ ປາກທາ ຂອງແຂວງ ບໍ່ແກ້ວ, ສປປ ລາວ ແລະ ເມືອງ ຊຽງແສນ, ຊຽງຂອງ ແລະ ເມືອງ ວຽງແກ່ນ ຂອງ ຈັງຫວັດ ຊຽງລາຍ, ຣາຊາອານາຈັກໄທ.

ແຫຼ່ງຂ່າວ: ຂ່າວສານກະສິກຳ,ປ່າໄມ້ ແລະ ພັດທະນາ ຊົນນະບົດ

ຊົມເຊີຍ! ເຈົ້າໜ້າທີ່ພາສີ ປະຈຳແຂວງໄຊຍະບູລີ ໂດຍສະເພາະເຈົ້າໜ້າທີ່ພາສີຂະແໜງ ພສປ ປະຈຳຈຸດແກ້ງສາວ ເມືອງປາກລາຍ ແຂວງໄຊຍະບູລີ, ໄດ້ອອກກວດກາເຄື່ອນໄຫວວຽກງານຕາມພາລະບົດບາດ, ຄວາມຮັບຜິດຊອບ, ພ້ອມທັງຕິດຕາມແຫຼ່ງຂ່າວຕາມເສັ້ນທາງເມືອງປາກລາຍ ຫາ ເມືອງທົ່ງມີໄຊ ແຂວງໄຊຍະບູລີ, ພາຍຫຼັງໄດ້ຮັບແຫຼ່ງຂ່າວຈາກພົນລະເມືອງດີວ່າຈະມີການລັກລອບນໍາເຂົ້າພາຫະນະ ເຂດຊາຍແດນປະເທດໃກ້ຄຽງ, ພົບເຫັນລົດ TOYOTA FOTUNER ຊຸກເຊື່ອງໄວ້ໃນສາງໂຮງງານໝາກເດືອຍເກົ່າຢູ່ເຂດບ້ານໃໝ່ ເມືອງທົ່ງມີໄຊ ແຂວງໄຊຍະບູລີ.

ຕາມການລາຍງານເບື້ອງຕົ້ນຂອງພາສີ ປະຈຳແຂວງໄຊຍະບູລີ ໃຫ້ຮູ້ວ່າ: ໃນວັນທີ 8 ກັນຍາ 2022 ຜ່ານມານີ້, ເວລາ 20:30 ໂມງ, ພາສີ ປະຈໍາແຂວງໄຊຍະບູລີ, ໄດ້ຮັບແຫຼ່ງຂ່າວຈາກພົນລະເມືອງດີວ່າຈະມີການລັກລອບນໍາເຂົ້າພາຫະນະ ເຂດຊາຍແດນປະເທດໃກ້ຄຽງບໍລິເວນເມືອງທົ່ງມີໄຊ ແຂວງໄຊຍະບູລີ.

ດັ່ງນັ້ນ, ຈຶ່ງໄດ້ອອກສົມທົບກັບເຈົ້າໜ້າທີ່ພາສີຂະແໜງ ພສປ ປະຈຳຈຸດແກ້ງສາວ ເມືອງປາກລາຍ ແຂວງໄຊຍະບູລີ, ໄດ້ອອກກວດກາເຄື່ອນໄຫວວຽກງານຕາມພາລະບົດບາດ, ຄວາມຮັບຜິດຊອບ, ພ້ອມທັງຕິດຕາມແຫຼ່ງຂ່າວຕາມ ເສັ້ນທາງເມືອງ ປາກລາຍ ຫາ ເມືອງທົ່ງມີໄຊ ແຂວງ ໄຊຍະບູລີ, ໄດ້ພົບເຫັນພາຫະນະ 1 ຄັນ (ປະເພດລົດຈິບ, ຫຍີ່ຫໍ້ TOYO TA FOTUNER, ສີຂາວ, ປີຜະລິດ 2020, ຄວາມແຮງ 2400cc, ເລກຈັກ 2GDC791120, ເລກຖັງ MROAB3GS30558681) ຊຶ່ງກໍາລັງມີການປ່ຽນພວງມະໄລຈາກຂວາ ຫາ ຊ້າຍ.

ໃນການປະຕິບັດໜ້າທີ່ວິຊາສະເພາະຄັ້ງນີ້, ເຈົ້າໜ້າທີ່ພາສີໄດ້ສົມທົບກັບກອງຮ້ອຍທະຫານຊາຍແດນ 156 ແລະ ອຳນາດການປົກຄອງເມືອງທົ່ງມີໄຊ, ເຂົ້າທຳການກວດກາ, ພົບເຫັນພາຫະນະດັ່ງກ່າວ, ຈຶ່ງໄດ້ຂໍອະນຸຍາດກວດກາເອກະ ສານຂອງພາຫະນະບໍ່ພົບເອກະສານຫຼັກຖານອ້າງອີງ. ດັ່ງນັ້ນ,ຈຶ່ງໄດ້ຢຶດພາຫະນະຄັນດັ່ງກ່າວໄວ້ເປັນຂອງກາງ, ເພື່ອດຳເນີນການສືບສວນ-ສອບສວນ ແລະ ດຳເນີນຄະດີຕາມລະບຽບກົດໝາຍ. ສ່ວນລາຍລະອຽດກ່ຽວກັບການຢຶດພາຫະນະດັ່ງກ່າວທາງທີມຂ່າວສານການເງິນຈະໄດ້ລາຍງານນໍາສະເໜີເພີ່ມເຕີມຕາມພາຍຫຼັງ.

ແຫຼ່ງຂ່າວ: ກະຊວງການເງິນ

ຄະນະຜູ້ແທນສະພາແຫ່ງຊາດ ຣາຊະອານາຈັກກຳປູເຈຍ ຢ້ຽມຢາມ ສປປ ລາວ ຢ່າງເປັນທາງການ

ໂດຍຕອບສະໜອງຕາມການເຊື້ອເຊີນຂອງ ທ່ານ ໄຊສົມພອນ ພົມວິຫານປະທານສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສົມເດັດອັກຄະມະຫາໂປເຢຍ ຈັກກຣີເຮັງຊໍາຣິນ ປະທານສະພາແຫ່ງຊາດ ແຫ່ງຣາຊະອານາຈັກກໍາປູເຈຍ ແລະ ຄະນະຜູ້ແທນຂັ້ນສູງ ມາຢ້ຽມຢາມ ສາທາລະນະລັດ ປະຊາທິ ປະໄຕ ປະຊາຊົນລາວ ຢ່າງເປັນທາງການ ໃນລະຫວ່າງ ວັນທີ 14-16 ກັນຍາ 2022.

ໃນຕອນເຊົ້າວັນທີ 14 ກັນຍາ 2022, ພາຍຫລັງທີ່ຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ ໄດ້ເຂົ້າຮ່ວມພິທີຕ້ອນຮັບຢ່າງເປັນທາງການ ຢູ່ຕໍ່ໜ້າຫໍສະພາແຫ່ງຊາດລາວ ຢ່າງສົມກຽດ, ຈາກທ່ານ ໄຊສົມພອນ ພົມ ວິຫານ ພ້ອມດ້ວຍຮອງປະທານສະພາແຫ່ງຊາດ, ຄະນະປະຈໍາສະພາແຫ່ງຊາດ, ປະ ທານ-ຮອງປະທານກໍາມາທິການ, ຄະນະເລຂາທິການ ແລະ ພະນັກງານ-ລັດຖະກອນ ທີ່ກ່ຽວຂ້ອງເຂົ້າຮ່ວມພິທີຕ້ອນຮັບຢ່າງພ້ອມພຽງ ແລະ ສົມກຽດແລ້ວ, ຄະນະຜູ້ແທນຂັ້ນສູງ ຂອງສະພາແຫ່ງຊາດລາວ ແລະ ກຳປູເຈຍ ໄດ້ດໍາເນີນການພົບປະສອງຝ່າຍຢ່າງເປັນທາງການ ໂດຍສອງຝ່າຍ ໄດ້ພ້ອມກັນປຶກສາຫາລືຫລາຍບັນຫາສໍາຄັນ ເປັນຕົ້ນ ຮ່ວມກັນຕີລາຄາຄືນກ່ຽວກັບສະພາບ ການພົວພັນຮ່ວມມື ລະຫວ່າງ ສອງປະເທດລາວ-ກຳປູເຈຍ ກໍຄື ການພົວພັນຮ່ວມມື ລະຫວ່າງ ສອງສະພາແຫ່ງຊາດ ໃນໄລຍະຜ່ານມາ ແລະ ເປັນເອກະພາບກັນ ຕໍ່ກັບທິດທາງແຜນການໃນຕໍ່ໜ້າ, ຊຶ່ງສອງຝ່າຍ ຈະໄດ້ສືບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ທີ່ສອງປະທານສະພາແຫ່ງຊາດ ໄດ້ລົງນາມຮ່ວມກັນ ໃນປີ 2019 ໃຫ້ມີປະສິດທິຜົນຍິ່ງກວ່າເກົ່າ, ສືບຕໍ່ການແລກປ່ຽນຄະນະຜູ້ແທນນຳກັນໃນທຸກລະດັບ, ແລກປ່ຽນຂໍ້ມູນຂ່າວສານ ກ່ຽວກັບການ ຈັດຕັ້ງປະຕິບັດພາລະບົດບາດ ຂອງອົງການນິຕິບັນຍັດ, ການສະໜັບສະໜູນກັນ ໃນເວທີລັດຖະສະພາພາກພື້ນ ແລະ ສາກົນ. ໃນເວລາພົບປະ, ສອງຝ່າຍ ໄດ້ເປັນເອກະພາບທີ່ຈະຮ່ວມມືກັນຊຸກຍູ້ ແລະ ສົ່ງເສີມ ໃຫ້ຂະແໜງການທີ່ກ່ຽວຂ້ອງຂອງລັດຖະບານ ຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆ ທີ່ໄດ້ລົງນາມຮ່ວມກັນ ໃຫ້ໄດ້ຮັບປະສິດຜົນສູງ ໂດຍສະເພາະ ແມ່ນການຊຸກຍູ້ລັດຖະ ບານ ທັງສອງປະເທດ ມີການບັນລຸການເຊັນສົນທິສັນຍາ ວ່າດ້ວຍເສັ້ນຊາຍແດນທີ່ໄດ້ປັກຫລັກໝາຍສຳເລັດ 86% ແລະ ສືບຕໍ່ເຮັດໃຫ້ເສັ້ນຊາຍແດນ ສອງປະເທດ ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາຢ່າງຍືນຍົງ, ຕອບສະໜອງຜົນປະໂຫຍດທີ່ແທ້ຈິງຂອງປະຊາຊົນສອງຊາດ.

ໂອກາດນີ້, ທ່ານປະທານສະພາແຫ່ງຊາດລາວ ໄດ້ສະແດງຄວາມເຊື້ອໝັ້ນວ່າ ດ້ວຍບົດຮຽນອັນອຸດົມສົມບູນ ຂອງປະທານສະພາແຫ່ງຊາດ ແຫ່ງ ຣາຊະອານາຈັກກຳປູເຈຍ, ຝ່າຍກຳປູເຈຍ ຈະແລກປ່ຽນບົດຮຽນໃນການເປັນປະທານໄອປາ (AIPA) ຄັ້ງທີ 43 ຊຶ່ງຈະຈັດຂຶ້ນ ຢູ່ນະຄອນຫລວງພະນົມເປັນ ໃນເດືອນພະຈິກ 2022. ພ້ອມກັນນີ້, ສະພາແຫ່ງຊາດລາວ ມີຄວາມຍິນດີທີ່ຈະເຂົ້າຮ່ວມ ແລະ ສະໜັບສະໜູນ ສະ ພາແຫ່ງຊາດກໍາປູເຈຍ ເປັນເຈົ້າພາບກອງປະຊຸມ AIPA ຄັ້ງທີ 43 ແລະ ກອງປະຊຸມປິ່ນອ້ອມອື່ນໆ.ຫລັງຈາກພົບປະສອງຝ່າຍສຳເລັດແລ້ວ, ສອງປະທານສະພາແຫ່ງຊາດ ລາວ ແລະ ກຳປູເຈຍ ໄດ້ຮ່ວມກັນປູກຕົ້ນໄມ້ທີ່ລະນຶກ ຢູ່ສວນຂ້າງຫໍສະພາແຫ່ງຊາດ.ໃນໂອກາດດຽວກັນນີ້, ທ່ານປະທານກໍາມາທິການການຕ່າງປະເທດສະພາແຫ່ງຊາດລາວ ກໍໄດ້ພົບປະກັນຄູ່ຮ່ວມຕໍາແໜ່ງ ຂອງສະພາແຫ່ງຊາດກຳປູເຈຍ ແລະ ສອງປະທານຄະນະມິດຕະພາບລັດຖະສະພາ ລາວ-ກໍາປູເຈຍ ແລະ ກຳປູເຈຍ-ລາວ ກໍໄດ້ພົບປະສອງຝ່າຍນຳກັນ ເພື່ອເສີມຂະຫຍາຍການຮ່ວມມືກັນ ໃຫ້ມີຄວາມເລິກເຊິ່ງກວ່າເກົ່າ.

ຂ່າວ-ພາບ: ຂັນໄຊ, ຂປລ

ໃນຕອນເຊົ້າຂອງວັນທີ 13 ກັນຍາ 2022 ທີ່ ສູນການຮ່ວມມືສາກົນ ແລະ ການຝືກອົບຮົມ, ຄະນະກຳມະການຄຸ້ມຄອງອົງ ການຈັດຕັ້ງສາກົນ ທີ່ບໍ່ສັງກັດລັດຖະບານ (ອສບລ) ໄດ້ຈັດກອງປະຊຸມທົບທວນຄືນການຮ່ວມມື ລະຫວ່າງ ລັດຖະບານ ສປປ ລາວ ກັບ ອົງການຈັດຕັ້ງສາກົນ ທີ່ບໍ່ສັງກັດລັດຖະບານ ຄັ້ງທີ IV ຢ່າງເປັນທາງ ການ ພາຍໃຕ້ການເປັນປະທານຂອງ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໂດຍການເຂົ້າຮ່ວມຂອງທ່ານເຈົ້າແຂວງ, ຮອງເຈົ້າແຂວງໃນຂອບເຂດທົ່ວປະເທດ ແລະ ບັນດາທ່ານຮອງລັດຖະມົນຕີ ອ້ອມຂ້າງສູນກາງພ້ອມຄະນະ ທັງໝົດຫຼາຍກ່ວາ 230 ທ່ານ.

ກອງປະຊຸມດັ່ງກ່າວ ໄດ້ຮັບຟັງລາຍງານການສະຫຼຸບຕີລາຄາສະພາບການຮ່ວມມື ລະຫວ່າງ ລັດຖະບານ ກັບ ອົງການຈັດຕັ້ງສາກົນທີ່ບໍ່ສັງກັດລັດຖະບານ ໃນໄລຍະ 04 ປີຜ່ານມາ (2018-2021).

ໂດຍ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໃນນາມປະທານຄະນະກຳມະການຄຸ້ມຄອງ ອົງການຈັດຕັ້ງສາກົນ ທີ່ບໍ່ສັງກັດລັດຖະບານ ຫຼື INGOs ຢູ່ ສປປ ລາວ, ໄດ້ລາຍງານໝາກຜົນຂອງການຮ່ວມມືລະຫວ່າງ ລັດຖະບານ ແລະ ອສບລ ໂດຍໃຫ້ເຫັນຈຸດດີຂອງບັນດາໂຄງການຊ່ວຍເຫຼືອ ຂອງ ອສບລ ໃນໄລຍະຜ່ານມາ ເຊິ່ງສາມາດປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ພໍສົມຄວນ, ບັນດາໂຄງການຊ່ວຍເຫຼືອສ່ວນໃຫຍ່ແມ່ນຕິດພັນກັບທ້ອງຖິ່ນ ແລະ ຂະແໜງການທີ່ກ່ຽວຂ້ອງ, ມີຊ່ຽວຊານທີ່ມີບົດຮຽນໃນວຽກງານການພັດທະນາ ກໍ່ຄື ການຊ່ວຍ ເຫຼືອດ້ານມະນຸດສະທຳ ແລະ ການເຮັດວຽກກັບຊຸມຊົມໂດຍກົງ, ມີວິທີການຊຸກຍູ້ໃຫ້ປະຊາຊົນມີສ່ວນຮ່ວມໃນການພັດ ທະນາຊຸມຊົນ ກໍ່ຄື ການສ້າງຄວາມເຂັ້ມແຂງດ້ວຍຕົນເອງໃຫ້ແກ່ຊຸມຊົນ ແລະ ອື່ນໆ. ນອກຈາກນັ້ນ, ອສບລ ສ່ວນໃຫຍ່ແມ່ນສາມາດນຳໃຊ້ທຶນບໍ່ຫຼາຍ ແຕ່ໄດ້ປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ.

ໂດຍເຫັນໄດ້ບົດບາດດັ່ງກ່າວຂອງ ອສບລ, ລັດຖະບານ ແຫ່ງ ສປປ ລາວ ຈຶ່ງໄດ້ເປີດໂອກາດໃຫ້ ອສບລ ເຂົ້າມາມີສ່ວນຮ່ວມ ແລະ ປະກອບສ່ວນເຂົ້າໃນວຽກງານການພັດທະນາເສດຖະ ກິດ- ສັງຄົມ ຢູ່ ສປປ ລາວ ນັບມື້ນັບເພີ່ມຂຶ້ນ, ມາເຖິງປັດຈຸບັນມີ 151 ອົງການ ທີ່ພວມຈັດຕັ້ງປະຕິບັດບັນດາໂຄງການ ຢູ່ເກືອບທຸກແຂວງໃນຂອບເຂດທົ່ວປະເທດ ແລະ ກວມເອົາຫຼາຍຂະແໜງການເຊັ່ນ: ຂະແໜງສາທາລະນະສຸກ, ສຶກສາທິການ ແລະ ກິລາ, ແຮງງານ ແລະ ສະຫວັດດີການສັງຄົມ (ກວມເອົາວຽກງານສີມືແຮງງານ, ເກັບກູ້ລະເບີດ, ຄົນພິການ, ໄພພິບັດ ແລະ ວຽກງານສຸກເສີນ), ກະສິກຳ ແລະ ປ່າໄມ້ ແລະ ອື່ນໆ. ຄຽງຄູ່ກັນນັ້ນ, ທ່ານຍັງໄດ້ຍົກໃຫ້ເຫັນ ຂໍ້ຄົງຄ້າງ ແລະ ສິ່ງທ້າທາຍ ໃນການຮ່ວມມື ແລະ ຈັດຕັ້ງປະຕິບັດໂຄງການໄລຍະຜ່ານມາ ໂດຍສະເພາະ ແມ່ນຂອດຂອງການປະສານງານ ລະຫວ່າງ ພາກລັດ ກັບ ອົງການ ຍັງບໍ່ໂລ່ງລ່ຽນ, ການດຳເນີນເອກະສານບາງໂຄງການໃຊ້ເວລາດົນ ຍັງບໍ່ທັນປະຕິບັດຕາມລະບຽບຂັ້ນຕອນເຊັ່ນ: ການປຶກສາຫາລື ກ່ອນຂຽນບົດສະເໜີໂຄງການຍັງບໍ່ທັນເຮັດໄດ້ດີ, ບາງໂຄງການກໍ່ບໍ່ໄປຕາມບູລິມະສິດຂອງຂະແໜງການ ແລະ ທ້ອງຖິ່ນເທົ່າທີ່ຄວນ.

ໃນກອງປະຊຸມດັ່ງກ່າວ ຍັງໄດ້ຮັບຟັງການປະກອບຄຳຄິດຄຳເຫັນຈາກ ການນຳຂອງຂະແໜງການ ແລະ ທ້ອງຖິ່ນຢ່າງກົງໄປກົງມາ ເພື່ອເຮັດໃຫ້ການຄຸ້ມຄອງ ອສບລ ແລະ ການຈັດຕັ້ງປະຕິບັດໂຄງການຊ່ວຍເຫຼືອຂອງ ອສບລ ມີປະສິດທິພາບ ແລະ ປະສິດທິຜົນກ່ວາເກົ່າ. ພ້ອມກັນນັ້ນ, ຍັງໄດ້ປຶກສາຫາລື ກ່ຽວກັບ ບັນຫາຕ່າງໆເພື່ອກະກຽມໃຫ້ແກ່ກອງປະຊຸມຮ່ວມກັບສາກົນ ໃນວັນທີ 14 ກັນຍາ ນີ້.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ ຢ້ຽມຢາມ ແລະ ເຮັດວຽກຢູ່ ສປປ ລາວ

ສະຫາຍ ພົນເອກ ຟານ ວັນຢາງ ກໍາມະການກົມການເມືອງສູນກາງພັກກອມ ມູນິດຫວຽດນາມ ລັດຖະມົນຕີກະຊວງປ້ອງ ກັນປະເທດ ແຫ່ງ ສສ ຫວຽດນາມ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 13-17 ກັນ ຍາ 2022 ນີ້. ເຊິ່ງພິທີຕ້ອນຮັບທາງການໄດ້ຈັດຂື້ນໃນຕອນບ່າຍຂອງໃນວັນທີ 13 ກັນຍາ 2022 ນີ້, ຢູ່ທີກະຊວງປ້ອງກັນປະເທດ ໂດຍການຕ້ອນຮັບຂອງ ສະຫາຍ ພົນເອກ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ຮອງນາ ຍົກລັດຖະມົນຕີ, ລັດຖະມົນຕີກະ ຊວງປ້ອງກັນປະເທດ ແຫ່ງ ສປປ ລາວ ພ້ອມດ້ວຍຄະນະ.

ພາຍຫຼັງສໍາເລັດພິທີຕ້ອນຮັບ ຢ່າງເປັນທາງການ, ທັງສອງຝ່າຍ ກໍໄດ້ພົບປະແລກປ່ຽນຕີລາຄາຄືນ ສະພາບວຽກງານດ້ານຕ່າງໆ ທີ່ໄດ້ຮ່ວມມືກັນຈັດຕັ້ງປະຕິ ບັດ ໃນໄລຍະຜ່ານມາ ບົນພື້ນຖານທີ່ມີ ມູນເຊື້ອສາຍພົວພັນອັນດີ ແລະ ຄວາມສາມັກຄີແບບພິເສດ ລະຫວ່າງ ສອງຊາດ, ສອງພັກ ກໍຄື ສອງ ກອງທັບ ລາວ – ຫວຽດນາມ, ໃນໄລຍະຜ່ານມາການປະ ຕິບັດອະນຸສັນຍາຮ່ວມມືລະຫວ່າງ ສອງກະຊວງ ປ້ອງກັນປະເທດລາວ-ຫວຽດ ນາມ ພວກເຮົາແມ່ນໄດ້ບັນລຸໝາກຜົນຫຼາຍດ້ານ ຢ່າງໜ້າພາກພູມໃຈ, ກົນໄກການຈັດຕັ້ງ ປະຕິບັດອານຸສັນຍາໄດ້ມີຄວາມກົມກຽວກັນ, ມີການປະສານສົມ ທົບນຳກັນຢ່າງແໜ້ນແຟ້ນ ແລະ ມີປະສິດທິຜົນດີ, ບົນຈິດໃຈ ຄວາມສາມັກຄີພິເສດ ແລະ ການຮ່ວມມືຮອບດ້ານລະ ຫວ່າງ ສອງຊາດ, ສອງກອງທັບລາວ- ຫວຽດນາມ ອ້າຍນ້ອງຢ່າງແທ້ຈິງ. ພ້ອມດຽວກັນນີ້ທັງສອງຝ່າຍກໍໄດ້ເຫັນດີເປັນເອກະພາບບົນພື້ນຖານແມ່ນປະຕິບັດຕາມການຕົກລົງຂອງກົມການເມືອງສູນ ກາງພັກທັງສອງ ຝ່າຍ ແລະ ອະນຸສັນຍາວ່າດ້ວຍການຮ່ວມືຊ່ວຍເຫຼືອເຊິ່ງ ແລະ ກັນລະຫວ່າງ 2 ກະຊວງປ້ອງກັນປະເທດ ລາວ-ຫວຽດນາມ ແຕ່ 2020-2024 ແລະ ແຜນການຮ່ວມມືໃນປີ 2022.

ຮັກສາການພົບປະສ້າງສັນຊາຍແດນຂັ້ນລັດ ຖະມົນຕີ ທ້າຍປີ 2022 ນີ້ ເຊິ່ງລາວຈະເປັນເຈົ້າພາບຈັດ, ການຮ່ວມມືທາງດ້ານວຽກ ງານພັກ-ວຽກງານການເມືອງ, ການກໍ່ສ້າງກໍາລັງ, ວຽກງານແລກປ່ຽນ ຄະນະຜູ້ ແທນ, ແລກປ່ຽນຂໍ້ມູນຂ່າວສານ ແລະ ສືບຕໍ່ຈັດຕັ້ງປະຕິບັດວຽກງານກໍ່ສ້າງບ້ານ ແລະ ກຸ່ມບ້ານພັດທະນາຕາມບໍລິເວນຊາຍແດນໂດຍສະເພາະ 2 ກຸ່ມບ້ານ ຢູ່ ແຂວງຜົ້ງສາລີ ແລະ ແຂວງຫົວພັນ ເຊິ່ງສອງຝ່າຍ ໄດ້ເປິດໂຄງການຢ່າງເປັນທາງການ. ສືບຕໍ່ວຽກງານຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍ ສະຫຼະຊີວິດຢູ່ລາວໃນສະໄໝສົງຄາມກັບຄືນປະເທດ. ສືບຕໍ່ຊຸກຍູ້ວຽກງານເຕັກນິກ ແລະ ອຸດສາຫະກໍາປ້ອງກັນຊາດສອງຝ່າຍ ເປັນຕົ້ນແມ່ນ : ການຊ່ວຍເຫຼືອລ້າ ການຈັດຫາທາງດ້ານສາວຸດຍຸດໂທປະກອນການແບກຫາບທີ່ຝ່າຍຫວຽດນາມສາມາດຜະລິດ ແລະ ຈໍາໜ່າຍໃຫ້ຝ່າຍລາວໄດ້, ສືບຕໍ່ຊຸກຍູ້ວຽກ ງານຮ່ວມມື ແລະ ອໍານວຍຄວາມສະ ດວກໃນການຂົນສົ່ງອຸປະກອນເຕັກນິກການທະຫານຜ່ານດິນແດນຂອງຫວຽດ ນາມ ມາຍັງ ສປປ ລາວ, ເອົາໃຈໃສ່ຍົກສູງຄຸນນະພາບຂອງວຽກງານກໍ່ສ້າງພະນັກ ງານທະຫານໜຸ່ມລາວ ຢູ່ ສສ ຫວຽດນາມ ໃຫ້ໄດ້ທັງດ້ານປະລິມານ ແລະ ຄຸນນະ ພາບ, ພິເສດແມ່ນສະເໜີເພີ່ມຈໍານວນນັກຮຽນຮຸ່ນສືບທອດ ເຈີນກັວກຕ່ວນ ໃນປີສາມະຄີມິດຕະພາບ ລາວ-ຫວຽດ ນາມ 2022 ນີ້, ສະເໜີໃຫ້ສອງກະຊວງປ້ອງກັນປະເທດເຮົາສືບຕໍ່ສ້າງບັນດາກິດຈະກໍາພົບປະ ສ້າງສັນ ເຊັ່ນ: ແລກປ່ຽນທາງດ້ານສິລະປະການສະແດງ, ວັດທະ ນະທຳ ແລະ ແລກປ່ຽນນາຍທະຫານໜຸ່ມເຊິ່ງກັນ ແລະ ກັນ.

ສືບຕໍ່ຍ້ອງຍໍກົມກອງລວມໝູ່ ແລະ ບຸກຄົນ ໃນປີສາມະຄີມິດຕະ ພາບ ລາວ-ຫວຽດນາມ 2022 ຂອງທັງສອງກອງທັບໃຫ້ມີບັນຍາກາດເບີກ ບານມ່ວນຊື່ນ ລວມໄປເຖິງບັນຫາອື່ນໆທີ່ທັງສອງຝ່າຍໄດ້ຕົກລົງ ແລະ ເຫັນດີຮ່ວມ ກັນ.ໂອກາດນີ້ ສະຫາຍ ພົນເອກ ຟານ ວັນຢາງ ກໍໄດ້ຕີລາຄາສູງຕໍ່ການຕ້ອນຮັບອັນອົບອຸ່ນ ແລະ ໄດ້ລາຍງານກ່ຽວກັບການເດີທາງມາຢ້ຽມຢາມໃນຄັ້ງນີ້ ກໍ່ເພື່ອເປັນການເພີ່ມພູນຄູນສ້າງຄວາມສາມັກຄີແບບພິເສດ, ຄວາມປອງດອງອັນແໜ້ນແຟ້ນ, ສະໜິດສະໜົມ ລະຫວ່າງປະຊາຊົນສອງຊາດ ລາວ-ຫວຽດນາມ, ຫວຽດນາມ- ລາວ ທັງເປັນການປະກອບສ່ວນເຂົ້າໃນການຮັດແໜ້ນ ການພົວພັນຮ່ວມມືໃນທຸກຂົງເຂດວຽກງານໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການສະ ໜັບສະໜູນຊ່ວຍເຫຼືອເຊິ່ງກັນ ແລະ ກັນຕະຫຼອດໄປ, ພ້ອມທັງເປັນ ການເສີມຂະຫຍາຍສາຍພົວພັນ ມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ, ສອງກອງທັບປະຊາຊົນ ລາວ-ຫວຽດນາມ ໃຫ້ໄດ້ຮັບການເສີມ ຂະຫຍາຍ ແລະ ແຕກດອກອອກ ຜົນກ້າວຂຶ້ນຢ່າງບໍ່ຢຸດຢັ້ງ.

ໂດຍ: ອາວຸ້ນ