ໃນລະຫວ່າງວັນທີ 18-19 ມີນາ 2021, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການ ຕ່າງປະເທດ ໄດ້ລົງເຄື່ອນໄຫວເຮັດວຽກ ຢູ່ແຂວງ ຫົວພັນ ຊຶ່ງໄດ້ຮັບການຕ້ອນຮັບຈາກ ທ່ານ ວັນໄຊ ແພງຊຸມມາ ເຈົ້າແຂວງຫົວພັນ ດ້ວຍບັນຍາກາດໄມຕີຈິດມິດຕະພາບອັນອົບອຸ່ນ.

ໃນໂອກາດມາເຄື່ອນໄຫວເຮັດວຽກຄັ້ງນີ້, ທ່ານລັດຖະມົນຕີກະຊວງການຕ່າງປະເທດ ໄດ້ໃຫ້ກຽດເຜີຍແຜ່ສະພາບການທີ່ພົ້ນເດັ່ນພາກພື້ນ, ສາກົນ, ວຽກງານຊາຍແດນ ແລະ ວຽກງານຂະແໜງ ການຕ່າງປະເທດ ໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດ ອ້ອມຂ້າງແຂວງ.

ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນສະພາບສາກົນທີ່ພົ້ນເດັ່ນ, ທີ່ເກີດຂື້ນໃນປັດຈຸບັນຢູ່ ພາກ ພື້ນ ແລະ ສາກົນ ໂດຍສະເພາະສະພາບການລະບາດຂອງພະຍາດໂຄວິດ-19 ທີ່ຍັງສືບຕໍ່ແຜ່ ລະບາດ ແລະ ຂະຫຍາຍຫຼາຍໃນທົ່ວໂລກ, ພ້ອມກັນນີ້ກໍໄດ້ເຜີຍແຜ່ການຈັດຕັ້ງປະຕິບັດວຽກງານ ຊາຍແດນກັບບັນດາປະເທດທີ່ມີຊາຍແດນຕິດຈອດກັບ ສປປ ລາວ ໂດຍສະເພາະຜົນການສໍາຫຼວດ ແລະ ປັກຫຼັກໝາຍຊາຍແດນ ຊຶ່ງມາເຖິງປັດຈຸບັນແມ່ນໄດ້ສໍາເລັດການສໍາຫຼວດ ແລະປັກຫຼັກໝາຍຊາຍແດນກັບ 3 ປະເທດ ຄື: ສສ ຫວຽດນາມ, ສປ ຈີນ ແລະ ສສ ມຽນມາ. ຊຶ່ງຜົນສໍາເລັດດັ່ງກ່າວໄດ້ຖືກຮັບ ຮອງໂດຍສົນທິສັນຍາວ່າດ້ວຍການກໍານົດເສັ້ນຊາຍແດນປະເທດຮ່ວມກັນ ແລະ ມີສັນຍາວ່າດ້ວຍລະບຽບ ການ ຄຸ້ມຄອງ ຊາຍແດນ ແລະ ດ່ານຊາຍແດນຮ່ວມກັນ.

ສໍາລັບຊາຍແດນກັບ ຣາຊາອານາຈັກກໍາປູເຈຍ ມາເຖິງປັດຈຸບັນສາມາດສໍາຫຼວດພື້ນທີ່ຕົວຈິງ ຮ່ວມກັນແລ້ວ 86% ຂອງເສັ້ນຊາຍແດນທັງໝົດປະມານ 535 ກິໂລແມັດ ຊຶ່ງສາມາດປັກຫຼັກໝາຍຊາຍແດນຮ່ວມກັນໄດ້ທັງໝົດ 121 ຫຼັກໝາຍ ແລະ ຍັງມີຈຸດຄົງຄ້າງຈໍານວນໜຶ່ງທີ່ຈະສືບຕໍ່ຮ່ວມກັນແກ້ໄຂຕໍ່ໄປ. ສຳລັບຊາຍແດນ ກັບຣາຊາອານາຈັກໄທ ທັງສອງຝ່າຍສາມາດສຳຫຼວດ ແລະ ປັກຫຼັກໝາຍຊາຍແດນສໍາເລັດຈໍານວນ 211 ຫຼັກໝາຍ ໃນລວງຍາວຂອງເສັ້ນຊາຍແດນ 676 ກິໂລແມັດ ເທົ່າກັບ 93% ຂອງເສັ້ນຊາຍແດນທາງບົກ 735 ກິໂລແມັດ ແລະ ເທົ່າກັບ 37% ຂອງເສັ້ນຊາຍແດນທັງໝົດ (ທາງບົກ ແລະ ທາງນໍ້າ) 1.835 ກິໂລແມັດ. ສໍາລັບຊາຍ ແດນລາວ-ໄທ ທາງນໍ້າຂອງ ແມ່ນຍັງຢູ່ໃນຂັ້ນຕອນການຖ່າຍທອດເສັ້ນຊາຍແດນຈາກແຜນທີ່ຝຣັ່ງມາດຕາສ່ວນ 1:25.000 ປີ 1929-1931 ລົງໃສ່ແຜນທີ່ສ້າງຂຶ້ນໃໝ່ປີ 2008 ຕາມເຕັກນິກຂອງແຕ່ລະຝ່າຍ ຊຶ່ງທັງສອງຝ່າຍຈະສືບຕໍ່ປຶກສາຫາລື ເພື່ອປັກຫຼັກໝາຍຊາຍແດນໃຫ້ສຳເລັດໂດຍໄວ.

ຂ່າວ: ກະຊວງການຕ່າງປະເທດ

ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໄດ້ລົງເຄື່ອນໄຫວເຮັດວຽກຢູ່ ແຂວງຊຽງຂວາງ ໂດຍໄດ້ຮັບການຕ້ອນຮັບຈາກ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ ດ້ວຍ ບັນຍາກາດໄມຕີຈິດມິດຕະພາບອັນອົບອຸ່ນ.

ໃນໂອກາດມາເຄື່ອນໄຫວເຮັດວຽກຄັ້ງນີ້, ທ່ານລັດຖະມົນຕີກະຊວງການຕ່າງປະເທດໄດ້ໃຫ້ກຽດເຜີຍ ແຜ່ສະພາບການທີ່ພົ້ນເດັ່ນຂອງພາກພື້ນ, ສາກົນ, ວຽກງານຊາຍແດນ ແລະ ວຽກງານຂະແໜງການຕ່າງ ປະເທດໃຫ້ຄະນະພັກ-ຄະນະນໍາ, ພະນັກງານຫຼັກແຫຼ່ງ, ທະຫານ, ຕໍາຫຼວດອ້ອມຂ້າງແຂວງ.

ທ່ານລັດຖະມົນຕີກະຊວງການຕ່າງປະເທດ ໄດ້ຍົກໃຫ້ເຫັນສະພາບສາກົນທີ່ພົ້ນເດັ່ນ, ທີ່ເກີດຂຶ້ນໃນ ປັດຈຸບັນຢູ່ພາກພື້ນ ແລະ ສາກົນ ໂດຍສະເພາະສະພາບການລະບາດຂອງພະຍາດໂຄວິດ-19 ທີ່ຍັງສືບຕໍ່ ແຜ່ລະບາດທົ່ວໂລກ, ພ້ອມກັນນີ້ກໍໄດ້ເຜີຍແຜ່ການຈັດຕັ້ງປະຕິບັດວຽກງານຊາຍແດນກັບບັນດາປະເທດ ທີ່ມີຊາຍແດນຕິດຈອດກັບ ສປປ ລາວ ໂດຍສະເພາະຜົນການສໍາຫຼວດ ແລະ ປັກຫຼັກໝາຍຊາຍແດນ ຊຶ່ງມາເຖິງປັດຈຸບັນແມ່ນໄດ້ສໍາເລັດການສໍາຫຼວດ ແລະ ປັກຫຼັກໝາຍຊາຍແດນກັບ 3 ປະເທດ ຄື: ສສ ຫວຽດນາມ, ສປ ຈີນ ແລະ ສສ ມຽນມາ. ຊຶ່ງຜົນສໍາເລັດດັ່ງກ່າວໄດ້ຖືກຮັບຮອງ ໂດຍສົນທິສັນຍາວ່າ ດ້ວຍການກໍານົດເສັ້ນຊາຍແດນປະເທດຮ່ວມກັນ ແລະ ມີສັນຍາວ່າດ້ວຍລະບຽບການຄຸ້ມຄອງຊາຍແດນ ແລະ ດ່ານຊາຍແດນຮ່ວມກັນ.

ສຳລັບຊາຍແດນກັບ ຣາຊາອານາຈັກກໍາປູເຈຍ ມາເຖິງປັດຈຸບັນສາມາດສໍາຫຼວດພື້ນທີ່ຕົວຈິງຮ່ວມ ກັນແລ້ວ 86% ຂອງເສັ້ນຊາຍແດນທັງໝົດປະມານ 535 ກິໂລແມັດ ຊຶ່ງສາມາດປັກຫຼັກໝາຍ ຊາຍແດນຮ່ວມກັນໄດ້ທັງໝົດ 121 ຫຼັກໝາຍ ແລະ ຍັງມີຈຸດຄົງຄ້າງຈໍານວນໜຶ່ງທີ່ຈະສືບຕໍ່ຮ່ວມກັນແກ້ ໄຂຕໍ່ໄປ. ສຳລັບຊາຍແດນກັບຣາຊາອານາຈັກໄທ ທັງສອງຝ່າຍສາມາດສຳຫຼວດ ແລະ ປັກຫຼັກໝາຍຊາຍ ແດນສໍາເລັດຈໍານວນ 211 ຫຼັກໝາຍ ໃນລວງຍາວຂອງເສັ້ນຊາຍແດນ 676 ກິໂລແມັດ ເທົ່າກັບ 93% ຂອງເສັ້ນຊາຍແດນທາງບົກ 735 ກິໂລແມັດ ແລະ ເທົ່າກັບ 37% ຂອງເສັ້ນຊາຍແດນທັງໝົດ (ທາງບົກ ແລະ ທາງນໍ້າ) 1.835 ກິໂລແມັດ. ສໍາລັບຊາຍແດນລາວ-ໄທ ທາງນໍ້າຂອງແມ່ນຍັງຢູ່ໃນ ຂັ້ນຕອນການຖ່າຍທອດເສັ້ນຊາຍແດນຈາກແຜນທີ່ຝຣັ່ງມາດຕາສ່ວນ 1:25.000 ປີ 1929-1931 ລົງໃສ່ ແຜນທີ່ສ້າງຂຶ້ນໃໝ່ປີ 2008 ຕາມເຕັກນິກຂອງແຕ່ລະຝ່າຍ ຊຶ່ງທັງສອງຝ່າຍຈະສືບຕໍ່ປຶກສາຫາລືເພື່ອປັກ ຫຼັກໝາຍຊາຍແດນໃຫ້ສຳເລັດໂດຍໄວ.

ຂ່າວ: ກະຊວງການຕ່າງປະເທດ

ຄະນະສະເພາະກິດເພື່ອປ້ອງກັນ ຄວບຄຸມ ແລະແກ້ໄຂການລະບາດຂອງພະຍາດໂຄວິດ-19 ຢັ້ງຢືນກ່ຽວກັບກໍລະນີມີຂ່າວທາງສື່ສັງຄົມອອນລາຍວ່າມີຜູ້ແພ້ຢາວັກຊີນປ້ອງກັນພະຍາດໂຄວິດ-19 ທີ່ເປັນຜື່ນແດງທົ່ວຕົນໂຕນັ້ນ ແມ່ນບໍ່ມີຄວາມຈິງ ຜູ້ກ່ຽວແມ່ນມີອາການແພ້ຢາ ແຕ່ເປັນຢາປິ່ນປົວພະຍາດປະຈຳໂຕຂອງຜູ້ກ່ຽວເອງ ເຊິ່ງອາການທີ່ເກີດຂື້ນກັບຜູ້ກ່ຽວເປັນຜົນຂ້າງຄຽງຈາກການໃຊ້ຢາດັ່ງກ່າວ. ປະຈຸບັນຜູ້ກ່ຽວອາການດີຂຶ້ນ ແລະ ໄດ້ອອກໂຮງໝໍໃນວັນທີ 16 ມີນານີ້ ພ້ອມທັງຢັ້ງຢືນວ່າຜູ້ກ່ຽວບໍ່ເຄີຍໄດ້ຮັບການສັກຢາວັກຊີນປ້ອງກັນພະຍາດໂຄວິດ19 ເທື່ອ.

ດຣ ພອນປະເສີດ ໄຊຍະມຸງຄຸນ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ19 ແຈ້ງໃຫ້ຮູ້ວ່າ: ຜ່ານການໃຫ້ວັກຊີນປ້ອງກັນໂຄວິດ19ໃຫ້ກຸ່ມທີ່ມີຄວາມສ່ຽງເຫັນວ່າ ທຸກຄົນມີອາການຂ້າງຄຽງແບບເບົາບາງເທົ່ານັ້ນ ເປັນຕົ້ນເຈັບບ່ອນສັກວັກຊີນ, ມີອາການວິນເລັກນ້ອຍໄລຍະ 30 ນາທີ ນອກນັ້ນບໍ່ມີອາການຫຍັງ.

ສຳລັບກໍລະນີທີ່ມີຂ່າວທາງສື່ສັງຄົມອອນລາຍ ວ່າມີຜູ້ແພ້ຢາວັກຊີນປ້ອງກັນພະຍາດໂຄວິດ19 ນັ້ນແມ່ນບໍ່ມີຄວາມຈິງ.

ປະຈຸບັນຫຼາຍປະເທດໃນໂລກໄດ້ນຳໃຊ້ວັກຊິນປ້ອງກັນພະຍາດໂຄວີດ19 ຄຽງຄູ່ກັບການຈັດຕັ້ງປະຕິບັດມາດຕະການປ້ອງກັນຢ່າງເຂັ້ມງວດ, ສຳລັບລາວ ໄດ້ເລີ້ມສັກວັກຊິນປ້ອງກັນພະຍາດໂຄວີດ19 ໄລຍະທໍາອິດໃຫ້ບຸກຄົນຜູ້ທີ່ເປັນກຸ່ມສ່ຽງນັບແຕ່ຂັ້ນສູນກາງ ແລະ ຂັ້ນແຂວງຄື: ພະນັກງານແພດທີ່ເຮັດວຽກງານບໍລິການຢູ່ໂຮງໝໍ ແລະ ສະຖານທີ່ບໍລິການສາທາລະນະສຸກ, ພະນັກງານຜູ້ທີ່ເຮັດວຽກຈຸດຜ່ານແດນເຊິ່ງເປັນຈຸດທຳອິດທີ່ມີຜູ້ເດີນທາງຈາກຕ່າງປະເທດຜ່ານເຂົ້າມາລາວ, ຜູ້ທີ່ເຮັດວຽກຢູ່ທີ່ສະຖານທີ່ຈຳກັດບໍລິເວນລວມທັງບັນດາໂຮແຮມທີ່ນຳໃຊ້ເປັນບ່ອນຈຳກັດບໍລິເວນ. ນອກຈາກກຸ່ມຄົນທີ່ກ່າວມານັ້ນ ຖ້າມີຄວາມຈຳເປັນຕ້ອງໄດ້ຮັບວັກຊີນ ຈະຕ້ອງໄດ້ນຳສະເໜີຫາຄະນະສະເພາະກິດ ເພື່ອພິຈາລະນາແກ້ໄຂຕາມເງື່ອນໄຂຄວາມເປັນຈິງ. ປະຈຸບັນລັດຖະບານ ຍັງສືບຕໍ່ພົວພັນປະສານງານກັບພາກສ່ວນທີ່ສະໜອງຢາວັກຊິນດັ່ງກ່າວ ເພື່ອຈະນຳວັກຊິນເຂົ້າມາຕື່ມ ແລະ ຖ້າໄດ້ຮັບວັກຊີນເພີ້ມ ກໍຈະໄດ້ພິຈາລະນາໃຫ້ວັກຊີນກຸ່ມຄົນອື່ນໃນຂັ້ນຕໍ່ໄປ.

ປະຈຸບັນທົ່ວປະເທດໄດ້ຮັບການສັກວັກຊິນເຂັ້ມທໍາອິດແລ້ວ ທັງໝົດ 31.046 ຄົນ ໂດຍນໍາໃຊ້ວັກຊິນຈາກບໍລິສັດຊີໂນຟາມຂອງຈີນ ແລະສະປຸດນິກຟາຍຂອງຣັດເຊຍ ໃນນີ້ມີແພດໝໍໄດ້ຮັບວັກຊິນແລ້ວຫລາຍກວ່າ 10.000 ຄົນ, ພະນັກງານປະຈໍາດ່ານເກືອບ 17.000 ຄົນ, ຜູ້ເດີນທາງອອກໄປຕ່າງປະເທດ 430 ຄົນ, ອາຍຸ 60 ປີຂື້ນໄປ 122 ຄົນ, ຜູ້ທີ່ມີພະຍາດປະຈໍາຕົວ 23 ຄົນ ແລະກຸ່ມອື່ນໆ 2.550 ກວ່າຄົນ.

ໂດຍ: ຈັນທະສອນ ສີຫານາດ

ເຈົ້າໜ້າທີ່ໃຊ້ເວລາພຽງ 1 ວັນ ຈັບຜູ້ກໍເຫດລັກລົດວີໂກ້

ພັທ ອໍາພອນ ຄໍາອຸ່ນພອນ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ວັນທີ 5 ມີນາ 2021 ໄດ້ຮັບແຈ້ງຄວາມຈາກອໍານາດການປົກຄອງບ້ານແສງສະຫວ່າງ ວ່າ: ມີຄົນຮ້າຍລັກລົດໃຫຍ່ຍີ່ຫໍ້ວີໂກ້ ໝາຍເລກທະບຽນ (ກຜ 7269) ຢູ່ໜ່ວຍ 57 ບ້ານແສງສະຫວ່າງ ເມືອງໄຊເສດຖາ ຈາກນັ້ນຈິງໄດລົງ ສົມທົບກັບ ປກສ ກຸ່ມວັງຊາຍ ແລະ ພາກສ່ວນທີ່ກ່ຽວຂ້ອງ ລົງເກັບກຳຂໍ້ມູນຊັນນະສູດ ຮອດເວລາ 02:30 ໂມງ ຂອງວັນທີ 6 ມີນາ 2021 ຈິ່ງຈັບຜູ້ຕ້ອງສົງໃສໄດ້ ຜ່ານການສອບສວນ ຈິ່ງຮູ້ວ່າ ທ້າວ ພຸດທະວົງ ຫຼື ບ໋ອບບີ້ ອາຊີບຫວ່າງງານ ຢູ່ບ້ານຂາມງອຍ ເມືອງໄຊເສດຖາ ນວ ພ້ອມລົດຄັນດັ່ງກ່າວ.

ທ້າວ ພຸດທະວົງ ໄດ້ຍອມຮັບສາລະພາບວ່າ: ຕົນໄດ້ເສບຢາເສບຕິດມາແຕ່ປີ 2013 ເສບມື້ລະ 1-2 ເມັດ, ໃນວັນທີ 5 ມີນາ 2021 ເວລາປະມານ 12 ໂມງ ຕົນໄດ້ຂີ່ລົດຈັກຍີ່ຫຍໍ້ສະກຸບປີ້ ສີບົວ ເລກທະບຽນ ດທ 5979 ເລາະຕາມເສັ້ນທາງ ພໍມາຮອດໜ້າບໍລິສັດນໍ້າມັນເຊື້ອໄຟແຖວບ້ານແສງສະຫວ່າງ ໄດ້ເຫັນລົດເກັງສີຂາວ ຈອດຢູ່ແຄມທາງ ຕົນຈິ່ງເກີດມີແນວຄິດຢາກໄດ້ ຈຶ່ງຫາວິທີໄຂປະຕູລົດຄັນດັ່ງກ່າວ ແຕ່ເຈົ້າຂອງລົດເຫັນຈິ່ງຈັບຕົວ ສົ່ງໃຫ້ຫ້ອງການບ້ານແສງສະຫວ່າງ ແຕ່ຕົນໄດ້ເອົາຕົວລົບໜີໄປລີ້ຢູ່ຫຼັງເຮືອນຂອງປະຊາຊົນຫຼັງໜຶ່ງ.

ຈາກນັ້ນໄດ້ໃຊ້ມີດງັດເຂົ້າໄປໃນເຮືອນ ແລ້ວໄດ້ສັງເກດເຫັນກະແຈລົດໃຫຍ່ຫ້ອຍໄວ້ຢູ່ ຈິງໄດ້ລັກຂັບຂີ່ລົດວີໂກ້ ສີປອນ ເລກທະບຽນ ກຜ 7269 ກໍາແພງນະຄອນ ທີ່ຈອດໄວ້ຢູ່ໜ້າເຮືອນ ຫຼັງຈາກໄດ້ລົດແລ້ວໄດ້ຂັບຂີ່ລົດເລາະຕາມເສັ້ນທາງ 450 ປີ ມາຈອດໄວ້ເຮືອນຂອງຕົນ ມາຮອດເວລາ 02:30 ໂມງ ຂອງວັນທີ 6 ມີນາ 2021 ຈິ່ງຖືກເຈົ້າໜ້າທີ່ເຂົ້າກັກຕົວ, ພ້ອມຂອງກາງ.

ປັດຈຸບັນຄະດີດັ່ງກ່າວ ຍັງຢູ່ໃນຂັ້ນຕອນສືບສວນ-ສອບສວນ ຂອງເຈົ້າໜ້າທີ່ ເພື່ອຂະຫຍາຍຜົນຊອກຫາກຸ່ມແກ້ງທີ່ຮ່ວມຂະບວນການ ນຳມາລົງໂທດ ແລະ ເລັ່ງສະຫຼຸບສຳນວນ-ສຳເນົາຄະດີ ສົ່ງໃຫ້ອົງການໄອຍະການ ປະຊາຊົນເຂດ ນະຄອນຫຼວງວຽງຈັນ.

ສ່ວນລົດຄັນດັ່ງກ່າວ ພັທ ອໍາພອນ ຄໍາອຸ່ນພອນ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊເສດຖາ ໄດ້ມອບຄືນໃຫ້ເຈົ້າຂອງ ໜ້າຕາງຮັບໂດຍທ່ານ ວິໄລສອນ ແກ້ວພູທອນ ປະຊາຊົນບ້ານແສງສະຫວ່າງ ເມືອງໄຊເສດຖາ ນວ.

ແຫຼ່ງຂ່າວ ຂປລໃຫ້ຮູ້ວ່າ. ໂຄງການກໍ່ສ້າງຫໍສະພາແຫ່ງຊາດ (ຕຶກໃໝ່) ມາຮອດປັດຈຸບັນ ໜ້າວຽກໂດຍລວມແມ່ນ ສຳເລັດ ແລ້ວ 95%, ສະເພາະຫ້ອງປະຊຸມໃຫຍ່ ທີ່ຈະຮັບໃຊ້ກອງປະຊຸມຄັ້ງປະຖົມມະລຶກ ຂອງສະ ພາແຫ່ງຊາດ ຊຸດທີ IX ແມ່ນສຳເລັດແລ້ວ 100%, ສາມາດຮັບໃຊ້ກອງປະຊຸມໄດ້ຢ່າງສົມບູນ,ໂຄງການກໍ່ສ້າງດັ່ງກ່າວ ແມ່ນໄດ້ຮັບການຊ່ວຍເຫລືອຈາກລັດຖະບານຫວຽດນາມ, ໂດຍແມ່ນແມ່ທັບນ້ອຍ 11 ຫວຽດນາມ ເປັນຜູ້ຮັບເໝົາກໍ່ສ້າງ ແລະ ເລີ່ມລົງມືກໍ່ສ້າງມາແຕ່ຕົ້ນເດືອນກໍລະກົດ 2018 ແລະ ຄາດວ່າຈະໃຫ້ສຳເລັດທັງໝົດ 100% ແລະ ມອບ-ຮັບ ໃຫ້ລັດຖະບານລາວ ພາຍໃນເດືອນ ມິ ຖຸນາ 2021.

ທ່ານ ພົນຕີ ຫງວຽນ ກວກ ຢຸ້ງ ຜູ້ບັນຊາການໃຫຍ່ແມ່ທັບນ້ອຍ 11 ຫວຽດນາມ ໄດ້ໃຫ້ ສຳພາດໃນວັນທີ 16 ມີນາ 2021 ນີ້ວ່າ: ມາຮອດປັດຈຸບັນ ສະເພາະການກໍ່ສ້າງຫ້ອງປະຊຸມໃຫຍ່ ສະພາແຫ່ງຊາດ ແມ່ນສຳເລັດ 100%, ພາຍໃນຫ້ອງປະຊຸມແມ່ນມີຄວາມພ້ອມໃນທຸກດ້ານ ເພື່ອຮັບ ໃຊ້ກອງປະຊຸມ ຄັ້ງປະຖົມມະລືກຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນຢ່າງເປັນທາງການ ໃນລະຫວ່າງ ວັນທີ 22-26 ມີນາ 2021 ນີ້, ພາຍໃນຫ້ອງປະຊຸມ ມີອຸປະກອນ, ເຄື່ອງຮັບໃຊ້ຕ່າງໆ ທີ່ ທັນສະໄໝ ເປັນຕົ້ນ ເຄື່ອງເອເລັກໂຕຣນິກຕ່າງໆ, ມີລະບົບຮັກສາຄວາມປອດໄພຄົບຊຸດ, ມີສິ່ງ ອຳນວຍຄວາມສະດວກທຸກຢ່າງ. ນອກນັ້ນ, ຍັງ ມີ ຫ້ອງປະຊຸມຄະນະປະຈຳສະພາແຫ່ງຊາດ, ຫ້ອງ ຮັບແຂກ, ຫ້ອງຕ້ອນຮັບຜູ້ແທນ, ຫ້ອງສື່ມວນຊົນ, ຫ້ອງເຕັກນິກ ແລະ ຫ້ອງບໍລິການອື່ນໆ ແມ່ນມີ ຄວາມພ້ອມທຸກດ້ານເພື່ອຮອງຮັບເຮັດໃຫ້ກອງປະຊຸມດັ່ງກ່າວ, ດຳເນີນໄປດ້ວຍຜົນສຳເລັດຕາມເປົ້າ ໝາຍທີ່ວາງໄວ້.

ທ່ານ ພົນຕີ ຫງວຽນ ກວກ ຢຸ້ງ ຍັງໃຫ້ຮູ້ອີກວ່າ: ໂຄງການກໍ່ສ້າງ ຫໍສະພາແຫ່ງຊາດ ອອກ ແບບໃຫ້ມີຄວາມເປັນທັນສະໄໝ, ປະສົມປະສານກັບເອກະລັກຄວາມເປັນລາວ, ຮູບຊົງສວຍງາມ, ມີ ທັງໝົດ 5 ຊັ້ນ, 1 ຊັ້ນໃຕ້ດິນ, ມີ 400 ກວ່າຫ້ອງ, ພາຍໃນອາຄານຕົບແຕ່ງໃຫ້ມີຄວາມເປັນທັນສະ ໄໝ, ອຸປະກອນເຄື່ອງໃຊ້ຕ່າງໆ ແມ່ນນຳເຂົ້າຈາກຕ່າງປະເທດ, ລວມມູນຄ່າການກໍ່ສ້າງທັງໝົດ ເກືອບ 112 ລ້ານກວ່າໂດລາສະຫະລັດ. ການກໍ່ສ້າງຫໍສະພາແຫ່ງຊາດຫລັງໃໝ່ ພົບຄວາມຫຍຸ້ງຍາກສົມຄວນ ນັບແຕ່ເກີດການລະບາດຂອງພະຍາດໂຄວິດ-19 ເຮັດໃຫ້ແຮງງານຫວຽດນາມ ຕ້ອງເສຍເວ ລາຈຳກັດບໍລິເວນຈົນກວ່າຄົບກໍານົດ 14 ວັນ. ນອກຈາກນີ້, ຍັງເຮັດໃຫ້ການນໍາເຂົ້າວັດສະດຸກໍ່ສ້າງຈາກຕ່າງປະເທດ ກໍພົບຄວາມຫຍຸ້ງຍາກເຊັ່ນດຽວກັນ. ຢ່າງໃດກໍ່ຕາມ ຜູ້ຮັບເໝົາກໍ່ສ້າງຈະເອົາໃຈໃສ່ກໍ່ສ້າງຕະຫລອດ 24 ຊົ່ວໂມງ, ໂດຍບໍ່ມີມື້ພັກວັນເສົາ ແລະ ວັນອາທິດ ເພື່ອໃຫ້ທັນມອບ-ຮັບໂຄງ ການກໍ່ສ້າງຫໍສະພາແຫ່ງຊາດລາວຫລັງໃໝ່ ຢ່າງເປັນທາງການພາຍໃນເດືອນມິຖຸນາ ທີ່ຈະມາເຖິງນີ້.

ຂ່າວ: ກິດຕາ ພາບ: ໄອຄຳ

ແຂວງບໍລິຄຳໄຊ: ເມື່ອບໍ່ດົນມານີ້, ພະແນກກວດກາ ແລະ ຄວບຄຸມຢາເສບຕິດ ປກສ ແຂວງ ໄດ້ລົງໂຄສະນາເຜີຍແຜ່ຜົນຮ້າຍ ແລະ ໄພອັນຕະລາຍຂອງຢາເສບຕິດ ຢູ່ໂຮງຮຽນ ມສ ນາກຸນ ເມືອງບໍລິຄັນ, ມສ ວຽງທອງ ເມືອງວຽງທອງ ແລະ ມສ ຄໍາເກີດ ເມືອງຄໍາເກີດ ເຊິ່ງນຳໂດຍ ທ່ານ ພັນຕີ ພິລະພົງ ວິຊຸນດາລາ ຫົວໜ້າພະແນກກວດກາ ແລະ ຄວບຄຸມຢາເສບຕິດ ພ້ອມທີມງານ, ມີຄະນະອໍານວຍການ, ຄູ-ອາຈານ ແລະ ນັກຮຽນແຕ່ຊັ້ນ ມ3-ມ7 ເຂົ້າຮ່ວມ 2.000 ກວ່າຄົນ.

ເອກະສານທີ່ນຳມາເຜີຍແຜ່ຄັ້ງນີ້ປະກອບມີ: ຜົນຮ້າຍ ແລະ ໄພອັນຕະລາຍຂອງຢາເສບຕິດ, ປະມວນກົດໝາຍອາຍາການກະທໍາຜິດກ່ຽວກັບຢາເສບຕິດ ມາດຕາ 314 ຫາ ມາດຕາ 325 ເຊິ່ງໄດ້ຍົກໃຫ້ເຫັນໂທດຕໍ່ກັບ ຜູ້ຜະລິດ, ຜູ້ເສບ, ຂົນສົ່ງ ແລະ ຄ້າຂາຍ, ນອກນັ້ນ ຍັງໄດ້ຍົກໃຫ້ເຫັນປະເພດຂອງຢາເສບຕິດໃນແບບຕ່າງໆ ທີ່ມີຜົນທໍາຮ້າຍຕໍ່ຮ່າງກາຍໂດຍກົງທີ່ແຕກຕ່າງກັນ, ເມື່ອຕົກເປັນທາດຂອງຢາເສບຕິດແລ້ວ ຜູ້ເສບຈະມີຮ່າງກາຍຈ່ອຍຜ່ອມ, ຊຸດໂຊມ, ສຸຂະພາບອ່ອນແອ ແລະ ມີພະຍາດແຊກຊ້ອນໄດ້ງ່າຍ, ຍິ່ງໄປກວ່ານັ້ນຍັງເຮັດໃຫ້ລະບົບປະສາດເກີດອາການພາບຫລອນ, ຄວບຄຸມຕົນເອງບໍ່ໄດ້ ຈົນເຖິງຂັ້ນທຳຮ້າຍຕົນເອງ ແລະ ບຸກຄົນອື່ນທີ່ຢູ່ອ້ອມຂ້າງ. ທັງເປັນສາເຫດໜຶ່ງທີ່ເຮັດໃຫ້ຄອບຄົວ, ສັງຄົມບໍ່ມີຄວາມສະຫງົບ ແລະ ເປັນສາເຫດຕົ້ນຕໍ ທີ່ພາໃຫ້ເກີດປະກົດການຫຍໍ້ທໍ້ຢູ່ໃນສັງຄົມເຊັ່ນ: ການຂີ່ລັກງັດແງະ, ປຸ້ນຈີ້ຊິງຊັບ, ການກໍ່ອາລະວາດຕີກັນ, ຄາດຕະກໍາ ແລະ ກໍ່ເຫດອາຊະຍາກໍາໃນຮູບແບບຕ່າງໆ ເຊິ່ງບັນຫາດັ່ງກ່າວ ເປັນຜົນກະທົບໂດຍກົງຕໍ່ລະບອບການເມືອງ, ເສດຖະກິດ-ສັງຄົມ ແລະ ວັດທະນະທໍາ, ເປັນການກົດໜ່ວງຖ່ວງດຶງການສ້າງສາ ແລະ ພັດທະນາປະເທດຊາດ.

ພ້ອມນັ້ນ ກໍໄດ້ສາຍວີດີໂອສາລະຄະດີກ່ຽວກັບຜົນຮ້າຍ ແລະ ໄພອັນຕະລາຍຂອງຢາເສບຕິດ ທີ່ສະທ້ອນໄດ້ເຖິງໂທດທີ່ຕາມມາຕໍ່ກັບຜູ້ເສບ ແລະ ຜູ້ຂາຍ ເມື່ອມີການພົວພັນຫຍຸ້ງກ່ຽວກັບຢາເສບຕິດ ໃຫ້ນັກຮຽນ ໄດ້ຮັບຊົມ. ຈາກນັ້ນ ກໍໄດ້ມີການຈັດກິດຈະກໍາຖາມ-ຕອບ ເພື່ອເປັນການທົດສອບຄວາມຮັບຮູ້, ຄວາມເຂົ້າໃຈຂອງນ້ອງນັກຮຽນ ເພື່ອນໍາໄປຈັດຕັ້ງປະຕິບັດໃນຊີວິດຕົວຈິງໃຫ້ປອດໄພ ບໍ່ຕົກເປັນທາດຂອງຢາເສບຕິດ ແລະ ບໍ່ຫຍຸ້ງກ່ຽວພົວພັນກັບຢາເສບຕິດ ແລະ ຫ່າງໄກຈາກຢາເສບຕິດທຸກປະເພດດັ່ງຄຳຂວັນທີວ່າ: ຢາເສບຕິດເປັນຜິດຕໍ່ຮ່າງກາຍ ເປັນອັນຕະລາຍຕໍ່ສັ່ງຄົມ ຜູ້ເສບຕາຍ ຜູ້ຂາຍຕິດຄຸກ.

ຂ່າວ: ພອນສະຫວັນ

ກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ
ຊຸດທີ IX ຈະຈັດຂຶ້ນເປັນທາງການ 22-26 ມີນານີ້

ກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ຈະຈັດຂຶ້ນຢ່າງເປັນທາງການ ໃນລະຫວ່າງ ວັນທີ 22-26 ມີນາ 2021 ນີ້, ຢູ່ຫ້ອງປະຊຸມສະພາແຫ່ງຊາດ ຫລັງໃໝ່ (ທາດຫລວງ) ນະຄອນຫລວງວຽງຈັນ.

ທ່ານ ນາງ ສວນສະຫວັນ ວິຍະເກດ ກໍາມະການສູນກາງພັກ, ຄະນະປະຈໍາສະພາແຫ່ງຊາດ, ເລຂາທິການສະພາແຫ່ງຊາດ ຊຸດທີ VIII ໄດ້ລາຍງານໃຫ້ຮູ້ ໃນວັນທີ 16 ມີນາ 2021 ນີ້ວ່າ: ກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ຈະໄດ້ຮັບຟັງການລາຍງານ, ພິຈາລະນາ ແລະ ຮັບຮອງເອົາຫລາຍບັນຫາສຳຄັນພື້ນຖານຂອງຊາດ ເຊັ່ນ:

• ຮັບຟັງລາຍງານຂອງຄະນະກໍາມະການເລືອກຕັ້ງລະດັບຊາດ ກ່ຽວກັບຜົນສໍາເລັດຂອງການເລືອກຕັ້ງ ແລະ ຢັ້ງຢືນຄຸນລັກສະນະຂອງສະມາຊິກສະພາແຫ່ງຊາດ ຊຸດທີ IX;
• ພິຈາລະນາ ແລະ ຮັບຮອງໂຄງປະກອບກົງຈັກ ແລະ ບຸກຄະລາກອນຂອງສະ ພາແຫ່ງຊາດ ຊຸດທີ IX ເປັນຕົ້ນ:
• ເລືອກຕັ້ງປະທານສະພາແຫ່ງຊາດ ຊຸດທີ IX ຕາມການສະເໜີຂອງຄະ ນະປະຈໍາສະພາແຫ່ງຊາດ ຊຸດທີ VIII;
• ເລືອກຕັ້ງຮອງປະທານສະພາແຫ່ງຊາດ ແລະ ກໍາມະການຄະນະປະຈໍາສະພາແຫ່ງຊາດ ຕາມການສະເໜີ ຂອງປະທານສະພາແຫ່ງຊາດ ຊຸດທີ IX;
• ພິຈາລະນາ, ຮັບຮອງການແຕ່ງຕັ້ງປະທານກໍາມາທິການ, ເລຂາທິການສະພາແຫ່ງຊາດ, ຮອງປະທານກໍາມາທິການສະພາແຫ່ງຊາດ ຕາມການສະເໜີ ຂອງຄະນະປະຈໍາສະພາແຫ່ງຊາດ;
• ເລືອກຕັ້ງປະທານປະເທດ ແລະ ຮອງປະທານປະເທດ ຕາມການສະເໜີຂອງຄະນະປະຈໍາສະພາແຫ່ງຊາດ;
• ພິຈາລະນາ ແລະ ຮັບຮອງໂຄງປະກອບກົງຈັກ ແລະ ບຸກຄະລາກອນຂອງລັດຖະບານ ເປັນຕົ້ນ: ເລືອກຕັ້ງນາຍົກລັດຖະມົນຕີ ຕາມການສະເໜີຂອງປະທານປະ ເທດ; ພິຈາລະນາ, ຮັບຮອງການແຕ່ງຕັ້ງບັນດາຮອງນາຍົກລັດຖະມົນຕີ ແລະ ສະມາຊິກລັດຖະບານ ຕາມການສະເໜີຂອງນາຍົກລັດຖະມົນຕີ;
• ເລືອກຕັ້ງບຸກຄະລາກອນ ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ເລືອກຕັ້ງຫົວໜ້າອົງການໄອຍະການປະຊາຊົນສູງສຸດ ຕາມການສະເໜີຂອງປະທານປະເທດ;
• ເລືອກຕັ້ງປະທານສານປະຊາຊົນສູງສຸດ ຕາມການສະເໜີ ຂອງປະທານປະເທດ;
• ເລືອກຕັ້ງບຸກຄະລາກອນຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ; ເລືອກຕັ້ງປະທານອົງ ການກວດສອບແຫ່ງລັດ ຕາມການສະເໜີຂອງປະທານປະເທດ;
• ເລືອກຕັ້ງປະທານອົງການກວດກາແຫ່ງລັດ ຕາມການສະເໜີຂອງປະທານປະເທດ;
• ພິຈາລະນາ, ຮັບຮອງບົດລາຍງານຂອງ ທ່ານ ນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດແຜນພັັັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ( 2016-2020) ແລະ ການຈັດຕັ້ງປະຕິບັດແຜນງົບປະມານແຫ່ງລັດ 5 ປີ (2016-2020); ແຜນພັດທະນາເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ IX (2021-2025) ແລະ ແຜນງົບປະມານແຫ່ງລັດ 5 ປີ (2021-2025);
• ພິຈາລະນາ, ຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ແລະ ທິດທາງແຜນການເຄື່ອນໄຫວວຽກງານ 5 ປີ (2021-2025) ຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ;
• ພິຈາລະນາ, ຮັບຮອງບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ 5 ປີ (2016-2020) ແລະ ທິດທາງແຜນການເຄື່ອນໄຫວວຽກງານ 5 ປີ (2021-2025) ຂອງອົງການກວດສອບແຫ່ງລັດ ແລະ ອົງການກວດກາແຫ່ງລັດ;
• ພິຈາລະນາ, ຮັບຮອງບົດລາຍງານກ່ຽວກັບທິດທາງແຜນການເຄື່ອນໄຫວວຽກງານ 5 ປີ (2021-2025); ແຜນການສ້າງ ແລະ ປັບປຸງກົດໝາຍ 5 ປີ (2021-2025) ຂອງສະພາແຫ່ງຊາດ ຊຸດທີ IX.

ທ່ານ ນາງ ສວນສະຫວັນ ວິຍະເກດ ຍັງໄດ້ເຊີນຊວນບັນດາທ່ານ ພະນັກງານ, ລັດຖະກອນ, ທະຫານ, ຕຳຫລວດ, ນັກຮຽນ-ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ຈົ່ງຕິດຕາມກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ຄັ້ງນີ້.

ໃນໄລຍະດຳເນີນກອງປະຊຸມ ສະພາແຫ່ງຊາດ ຄະນະເລຂາທິການສະພາແຫ່ງຊາດ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ; ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີໄປຍັງກອງປະຊຸມໄດ້ ຜ່ານທາງໂທລະສັບບໍ່ເສຍຄ່າ ໝາຍເລກ: 156; ໂທລະສານໝາຍເລກ: 021 413528, ຫລື ສາມາດ ສົ່ງເປັນຈົດໝາຍທາງໄປສະນີ ຕູ້ ປນ. 662 ຫລື ສົ່ງອີເມວ: [email protected].

ຂ່າວ: ທະນູທອງ
ພາບ: ເກດສະໜາ

ເຮືອນພັກທູດຝຣັ່ງ ປະຈຳ ສປປ ລາວ ເປີດປະຕູຕ້ອນຮັບມວນຊົນເພື່ອເຂົ້າຊົມງານວາງສະແດງພິເສດແບບບໍ່ເຄີຍມີມາກ່ອນ ກ່ຽວກັບ ຜົນງານດ້ານສິນລະປະຕ່າງໆຂອງ ທ່ານ ສົມສະໜິດ ນັກສິນລະປະລາວ.

ໃນວັນທີ 13 ແລະ 14 ມີນາ ເຮືອນພັກທູດຝຣັ່ງ ໄດ້ເປີດປະຕູຕ້ອນຮັບມວນຊົມໃນໂອກາດພິເສດ ກໍ່ຄື ໃຫ້ເຂົ້າຊົມງານວາງສະແດງຜົນງານດ້ານສິນລະປະຂອງທ່ານ ສົມສະໜິດ ນັກສິນລະປະລາວ ຊື່ງມີມວນຊົນທັງລາວ ຝຣັ່ງ ແລະ ສາກົນ ເຂົ້າຮ່ວມງານທັງໝົດຫຼາຍກວ່າ 250 ຄົນເພື່ອຊື່ນຊົມຜົນງານສິນລະປະປັກດິ້ນໄໝຄຳ, ລາຍດອກພອກພຸດທະສາດສະໜາທີ່ໄດ້ຮັບການຟື້ນຟູບູລະນະຄືນໃໝ່ພາຍໃນວັດວາອາຮາມແຂວງຫຼວງພະບາງ ລວມທັງ ຜົນງານສິນລະປະການທັກແສ່ວ. ຜົນງານທັງໝົດທີ່ນຳມາວາງສະແດງໃນຄັ້ງນີ້ ມີບໍ່ຕໍ່າກວ່າ 30 ຜົນງານ.

ໃນວັນເສົາ ທີ 13 ມີນາ, ທ່ານເອກອັກຄະລັດຖະທູດຝຣັ່ງ ໄດ້ຈັດພິທີເປີດງານວາງສະແດງດັ່ງກ່າວຢ່າງເປັນທາງການ ໂດຍມີ ທ່ານ ນາງ ທິບພະກອນ ຈັນທະວົງສາ ລັດຖະມົນຕີປະຈຳສຳນັກງານນາຍົກລັດຖະມົນຕີ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ພະນັກງານຈາກພາກສ່ວນຕ່າງໆຂອງລາວ ແລະ ຄະນະນັກການທູດ ເຂົ້າຮ່ວມນຳ. ພາຍຫຼັງທີ່ທ່ານທູດຝຣັ່ງໄດ້ກ່າວເປີດພິທີແລ້ວ ບັນດາແຂກຖືກເຊີນໄດ້ສົນທະນາແລກປ່ຽນກັບທ່ານ ສົມສະໜິດ ພ້ອມທັງໄດ້ຮັບຟັງການອາທິບາຍ ແລະ ຄວາມຮູ້ດ້ານມໍລະດົກທາງປະຫວັດສາດ ແລະ ສິນລະປະຂອງແຂວຫຼວງພະບາງ.

ໃນບົດກ່າວຕ້ອນຮັບຂອງທ່ານນາງ ຟລໍຣັອງສ ຊັອງບລັອງ-ຣີສແລກ ເອກອັກຄະລັດຖະທູດຝຣັ່ງ ປະຈຳ ສປປ ລາວ, ທ່ານທູດໄດ້ກ່າວຍ້ອງຍໍ « ຄວາມຊຳນິຊຳນານທີ່ສູງທີ່ສຸດທາງດ້ານເຕັກນິກການສ້າງສັນຜົນງານສິນລະປະຂອງ ທ່ານ ສົມສະໜິດ », ຊື່ງບາງຄັ້ງກໍ່ເປັນຜົນງານທີ່ເຮັດຈາກວັດຖຸທີ່ໜ້າອັດສະຈັນ ເຊັ່ນ ໃບໄມ້ແຫ້ງ. ສຳລັບຜົນງານທີ່ນຳມາວາງສະແດງໃນຄັ້ງນີ້ ມີການປະສົມປະສານ ລະຫວ່າງ ສິນລະປະທີ່ສືບທອດມາແຕ່ບັນພະບູລຸດ ແລະ ສິນລະປະສະໄໝໃໝ່ ຊື່ງມີຈຸດປະສົງຢາກເຊີນຊວນໃຫ້ພວກເຮົາຄິດໄຕ່ຕອງເຖິງຄວາມບອບບາງຂອງຊີວິດ ແລະ ການປ່ຽນແປງໄປຕາມເວລາຂອງທຸກສິ່ງໃນໂລກນີ້.  

ນອກຈາກງານວາງສະແດງຢູ່ເຮືອນພັກທູດຝຣັ່ງ, ສະຖາບັນຝຣັ່ງ ປະຈຳ ລາວ ກໍ່ໄດ້ຈັດກິດຈະກຳກ່ຽວກັບຜົນງານສິນລະປະຂອງທ່ານ ສົມສະໜິດ ເຊັ່ນດຽວກັນ ລະຫວ່າງ ວັນທີ 11 – 13 ມີນາ ທີ່ຫ້ອງວາງສະແດງເຈົ້າອານຸ ຊື່ງປະສົບຜົນສຳເລັດເປັນຢ່າງດີ ມີມວນຊົນເຂົ້າຊົມຫຼາຍກວ່າ 150 ຄົນ. ຢູ່ທີ່ຫ້ອງວາງສະແດງດັ່ງກ່າວ, ທ່ານສົມສະໜິດໄດ້ສາທິດເຕັກນິກສິນລະປະລາຍດອກພອກ ຊື່ງສາມາດດຶງດູດພະສົງ, ນັກສຶກສາຈາກສະຖາບັນວິຈິດສິນແຫ່ງຊາດເຂົ້າຮ່ວມຊົມເປັນຈຳນວນຫຼວງຫຼາຍ. ນອກຈາກນີ້, ໃນວັນທີ 11 ມີນາ, ທ່ານ Francis Engelmann ຊ່ຽວຊານດ້ານມໍລະດົກຫຼວງພະບາງ ກໍ່ໄດ້ຈັດກອງປະຊຸມບັນຍາຍກ່ຽວກັບສິນລະປະພິເສດດັ່ງກ່າວເຊັ່ນດຽວກັນ    ຢູ່ສະຖາບັນຝຣັ່ງ ປະຈຳ ລາວ ໂດຍມີຜູ້ເຂົ້າຮ່ວມ ປະມານ 100 ຄົນ. 

ຜົນສຳເລັດອີກຢ່າງໜຶ່ງທີ່ຕິດພັນກັບຄວາມມຸ່ງໝັ່້ນຂອງທ່ານ ສົມສະໜິດ ນັ້ນກໍ່ຄືການຖ່າຍທອດ ຊື່ງເປັນສິ່ງໜື່ງທີ່ສຳຄັນຂອງວຽກງານດ້ານສິນລະປະຂອງເພິ່ນ. ເພິ່ນມີຄວາມມຸ່ງໝັ້ນໃນການຖ່າຍທອດສິນລະປະການສະແດງໃຫ້ແກ່ຄົນໜຸ່ມຮຸ້ນໃໝ່, ເພິ່ນເປັນບຸກຄົນໜຶ່ງທີ່ເຮັດປະເພ ນີຫຼວງພະບາງຍັງຍືນຍົງຄົງຢູ່ ໂດຍອີງຕາມປະເພນີຫຼວງພະບາງງແລ້ວ ການຜະລິດຜົນງານສິນລະປະຕ່າງໆຕ້ອງມີການເຊື່ອມໂຍງ ຫຼື ສື່ສານເຊິ່ງກັນ ແລະ ກັນ.

ໃນປີ 2019 ທ່ານ ສົມສະໜິດ ໄດ້ຮັບການປະດັບຫຼຽນໄຊແຮງງານສາຂາສິນລະປະ ແລະ ອັກສອນສາດ ຈາກກະຊວງວັດທະນະທຳຝຣັ່ງ. ຜົນງານສິນລະປະຂອງທ່ານຖືກນຳໄປວາງສະແດງຢູ່ຕ່າງປະເທດເປັນປະຈຳ. ປະຈຸບັນ ຜົນງານຂອງເພິ່ນຈຳນວນໜຶ່ງຖືກນຳໄປວາງສະແດງ ຢູ່ຫໍພິພິທະພັນ Quai Branly ທີ່ ປາຣີິ ເຊິ່ງເປັນຫໍພິພິທະພັນທີ່ສົ່ງເສີມສິນລະປະ ແລະ ອະລິຍະທຳຂອງອາຟຣິກກາ, ອາຊີ, ໂອເຊອານີ ແລະ ອາເມຣິກາ.

ປະເທດຝຣັ່ງໄດ້ສົ່ງເສີມຄຸນຄ່າມໍລະດົກທາງປະຫວັດສາດ ແລະ ການທ່ອງທ່ຽວຂອງລາວຢ່າງຕັ້ງໜ້າ ຜ່ານອົງການຝຣັ່ງເພື່ອການພັດທະນາ (AFD). ປະຈຸບັນ, ອົງການ AFD ໄດ້ໃຫ້ທຶນຊ່ວຍເຫຼືອມູນຄ່າ 6 ລ້ານ ເອີໂຣ ໃນການຈັດຕັ້ງປະຕິບັດໂຄງການ CHAMPA ເປົ້າໝາຍແນ ໃສ່ປົກປັກຮັກສາ ແລະ ສ້າງຊື່ສຽງໃຫ້ແກ່ມໍລະດົກທາງວັດທະນະທຳຢູ່ແຂວງຈຳປາສັກ ແລະ ສະຫວັນນະເຂດ. ພາຍຫຼັງ 20 ປີ ຂອງການຮ່ວມມືໃນການປົກປັກຮັກສາເມືອງມໍລະດົກໂລກຫຼວງພະບາງ, ອົງການ AFD ແລະ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຈະສືບຕໍ່ຈັດຕັ້ງປະຕິບັດໂຄງການຮ່ວມກັນທາງພາກໃຕ້ຂອງລາວ. ນອກຈາກການຈັດງານງານວາງສະແດງຜົນງານສິນລະປະຂອງທ່ານສົມສະໜິດແລ້ວ, ສະຖານທູດຝຣັ່ງ ແລະ ສະຖາບັນຝຣັ່ງ ປະຈຳ ລາວ ຍັງຈະສືບຕໍ່ຈັດກິດ ຈະກຳທາງດ້ານວັດທະນະທຳ ແລະ ວຽກງານຕ່າງໆທີ່ມີເປົ້າໝາຍແນໃສ່ຊາວໜຸ່ມ ຊື່ງຜ່ານມາກໍ່ໄດ້ມີການຈັດຕັ້ງກິດຈະມາແລ້ວເລີ່ມແຕ່ປີ 2020 ເປັນ ຕົ້ນມາ ເຊັ່ນ ຈັດການແຂ່ງຂັນຖ່າຍຮູບທີ່ເປີດກວ້າງສຳລັບທຸກຄົນ ແລະ ໃນໄວໆນີ້ ຈະມີການວາງສະແດງຮູບຖ່າຍທີ່ຊະນະການແຂ່ງຂັນ ຢູ່ອ້ອມກຳແພງຮົ້ວຂອງສະຖານທູດຝຣັ່ງ.

ໃນວັນທີ 15 ມີນາ 2021 ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອິມ ມູຮົງ (IM Moo hong), ໃນໂອກາດຖືກແຕ່ງຕັ້ງໃຫ້ດຳລົງຕໍາແໜ່ງ ເປັນເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສ.ເກົາຫລີ ປະຈໍາ ສປປ ລາວ ຄົນໃໝ່.

ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີ ແລະ ຊົມເຊີຍຕໍ່ ທ່ານ ອິມ ມູຮົງ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງ ເປັນເອກອັກຄະລັດຖະທູດ ແຫ່ງ ສ.ເກົາ ຫລີ ປະຈໍາ ສປປ ລາວ ແລະ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ຕະຫລອດໄລຍະ 25 ປີ ຜ່ານມາ ແລະ ຫວັງວ່າ ທ່ານເອກອັກຄະລັດຖະທູດຄົນໃໝ່ ຈະສືບຕໍ່ຊຸກຍູ້ ແລະ ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີປະສິດ ທິພາບລະຫວ່າງ ສປປ ລາວ ແລະ ສ.ເກົາຫລີ ໃຫ້ແຕກດອກອອກຜົນຍິ່ງຂຶ້ນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ.

ນອກນີ້, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຂອບໃຈ ແລະ ຮູ້ບຸນຄຸນ ໂດຍຜ່ານ ທ່ານເອກອັກຄະລັດຖະທູດ ໄປຍັງລັດຖະບານ ແລະ ປະຊາຊົນສ.ເກົາຫລີ ທີ່ໄດ້ໃຫ້ການຊ່ວຍເຫລືແກ່ ສປປ ລາວ ໃນຫລາຍຂະແໜງການ ເປັນຕົ້ນແມ່ນການພັດທະນາຊັບພະຍາກອນມະນຸດ, ສາທາລະນະສຸກ, ພື້ນຖານໂຄງລ່າງ, ການຄ້າ-ການລົງ ທຶນ, ກະສິກໍາ, ການພັດທະນາຊົນນະບົດ ແລະ ອື່ນໆ ເຊິ່ງຈັດຢູ່ໃນອັນດັບຕົ້ນໆ ຂອງປະເທດທີ່ໃຫ້ ການຊ່ວຍເຫລືອເພື່ອການພັດທະນາ (ODA) ໃຫ້ແກ່ ສປປ ລາວ, ລວມທັງການຊ່ວຍເຫລືອໃນການປ້ອງກັນ, ຄວບຄຸມ ແລະ ແກ້ໄຂຜົນກະທົບ ຂອງການລະບາດຂອງພະຍາດໂຄວິດ-19 ຢູ່ ສປປ ລາວ, ຊຶ່ງມີມູນຄ່າຫລາຍກວ່າ 2 ລ້ານໂດລາສະຫະລັດ.

ໃນໂອກາດດຽວກັນ, ທ່ານ ອິມ ມູຮົງ ກໍໄດ້ສະແດງຄວາມຂອບໃຈ ຕໍ່ ທ່ານ ສະເຫລີມໄຊ ກົມມະສິດ ທີ່ໄດ້ໃຫ້ກຽດຕ້ອນຮັບອັນອົບອຸ່ນ ແລະ ໃຫ້ຄໍາໝັ້ນສັນຍາວ່າ ໃນໄລຍະການປະຕິບັດໜ້າທີ່ການທູດ ຢູ່ ສປປ ລາວ ຈະສຸມທຸກຄວາມພະຍາຍາມທັງທາງດ້ານເຫື່ອແຮງ ແລະ ສະຕິປັນຍາຂອງຕົນ ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດໃຫ້ນັບມື້ນັບໄດ້ຮັບການພັດທະນາຍິ່ງໆຂຶ້ນ, ໂດຍສະເພາະ ຈະສືບຕໍ່ຊຸກຍູ້ບັນດາຂະແໜງ ການກ່ຽວຂ້ອງຂອງ ສ.ເກົາຫລີ ໃນການຮ່ວມມື ແລະ ລົງທຶນ ຢູ່ ສປປ ລາວ.

ສຶກສາອົບຮົມສາວຂາຍປະເວນີ ພ້ອມເຈົ້າຂອງຮ້ານ 9 ຮ້ານ

ໃນວັນທີ 12 ມີນາ 2021 ຢູ່ກອງບັນຊາການ ປກສ ເມືອງສີໂຄດຕະບອງ ນະຄອນຫຼວງວຽງຈັນ ພັທ ລໍາເນົາ ລັດຕະນະລັງສີ ຫົວໜ້າພະແນກຕໍາຫຼວດ ປກສ ເມືອງສີໂຄດຕະບອງ ນະຄອນຫຼວງວຽງຈັນ ພ້ອມຄະນະ ໄດ້ສຶກສາອົບຮົມສາວຂາຍປະເວນີ ພ້ອມເຈົ້າຂອງຮ້ານ 9 ຮ້ານ ພ້ອມດ້ວຍສາວຂາຍປະເວນີ ຈໍານວນ 61 ຄົນ ຊາຍ 1 ຄົນ ທີ່ເຈົ້າໜ້າທີ່ຕໍາຫຼວດ ປກສ ເມືອງສີໂຄດຕະບອງ ໄດ້ລົງກວດກາ ໃນວັນທີ 11 ມີນາ 2021 ແລ້ວນໍາຕົວພວກກ່ຽວມາທໍາການສອບສວນ.

ຜ່ານການສອບສວນຂອງເຈົ້າໜ້າທີ່ ພວກກ່ຽວໄດ້ຮັບສາລະພາບວ່າ: ຍິງສາວທີ່ມາຂາຍເບຍ ແລະ ຂາຍບໍລິການທາງເພດ ຢູ່ຮ້ານກິນດື່ມດັ່ງກ່າວ ສ່ວນຫຼາຍແມ່ນຍິງສາວມາຈາກຕ່າງແຂວງ ເພື່ອມາຫາເງິນລ້ຽງຊີບຕົນເອງ ແລະ ສົ່ງເງິນໃຫ້ຄອບຄົວ (ພໍ່ແມ່ທາງບ້ານ).

ຍິງສາວຈໍານວນນີ້ ແມ່ນໄດ້ອາໃສພັກເຊົາຢູ່ສະຖານທີ່ຂາຍເບຍ ເປັນບ່ອນພົວພັນຄ້າຂາຍປະເວນີ ເມື່ອມີຜູ້ຊາຍມາດື່ມເບຍຢູ່ຮ້ານແລ້ວກໍຕົກລົງດ້ວຍຄວາມພໍໃຈແລ້ວເອົາຍິງສາວໄປນອນນໍາຕາມເຮືອນພັກຕ່າງໆ ເຊິ່ງເຈົ້າຂອງຮ້ານຈະຫັກເອົາເງິນຈໍານວນ 50.000 ຫຼື 100.000 ກີບ ຕໍ່ຄັ້ງ. ເພາະເງິນທີ່ຫັກແຕ່ລະຄັ້ງ ເຈົ້າຂອງຮ້ານໄດ້ເອົາເງິນໃຊ້ຈ່າຍຊື້ອາຫານແຕ່ລະວັນ ແລະ ຄ່າພັກພາອາໃສ.

ພັທ ລໍາເນົາ ລັດຕະນະລັງສີ ໃຫ້ຮູ້ຕື່ມອີກວ່າ: ໃນການສຶກສາອົບຮົມໃນຄັ້ງນີ້ ເພື່ອໃຫ້ເຂົາເຈົ້າຮັບຮູ້ ແລະ ເຂົ້າໃຈ ວ່າ: ບຸກຄົນໃດຫາກຫາກິນດ້ວຍການຂາຍປະເວນີ ໃຫ້ຜູ້ອື່ນເສບສົມ ຈະຖືກລົງໂທດຕາມລະບຽບກົດໝາຍອາຍາມາດຕາ 254 ວ່າດ້ວຍການຂາຍປະເວນີຂອງບຸກຄົນອື່ນ ແລະ ກົດໝາຍອາຍາມາດຕາ 260 ວ່າດ້ວຍການຂາຍປະເວນີ; ພ້ອມທັງໃຫ້ ເຈົ້າຂອງຮ້ານ ແລະ ຍິງສາວຂາຍບໍລິການທາງເພດ ຢຸດເຊົາພຶດຕິກໍາດັ່ງກ່າວ ຫັນມາປະກອບອາຊີບທີ່ສຸຈະລິດ, ເປັນຄົນດີຂອງສັງຄົມ ແລະ ຮຽກຮ້ອງໃຫ້ໄວໜຸ່ມ ຍິງສາວທີ່ມາຈາກຕ່າງແຂວງ ໃຫ້ກັບບ້ານເມືອງຂອງຕົນ ຫຼື ໄປຊອກວຽກເຮັດງານທໍາ ໃຫ້ຖືກຕ້ອງຕາມກົດໝາຍ ກໍລະນີຖ້າຫາກພົບເຫັນຄັ້ງຕໍ່ໄປ ແມ່ນຈະໄດ້ດໍາເນີນຕາມລະບຽບກົດໝາຍ.

ປກສ ນະຄອນຫຼວງວຽງຈັນ