ໃນວັນທີ 18 ມີນາ 2021 ທີ່ຫ້ອງປະຊຸມທະນາຄານແຫ່ງ ສປປ ລາວ ພາກກາງ ແຂວງ ສະຫວັນນະເຂດ ໄດ້ຈັດກອງ ປະຊຸມສະຫຼຸບການຈັດຕັ້ງປະ ບັດວຽກງານຄຸ້ມຄອງຮ້ານ ແລກປ່ຽນເງິນຕາປະຈຳປີ 2020 ແລະເຜີຍແຜ່ລະບຽບ ທຸລະກິດແລກປ່ຽນເງິນຕາໃຫ້ ບັນດາຮ້ານແລກປ່ຽນເງິນຕາ ເອກະຊົນ ເຊິ່ງກອງປະຊຸມຄັ້ງ ນີ້ໄດ້ຮັບກຽດເປັນປະທານ ໂດຍທ່ານ ວົງພະຈັນ ແສງສຸ ວັນ ຫົວຫນ້າທະນາຄານແຫ່ງ ສປປ ລາວ ພາກກາງທີ່ແຂວງ ສະຫວັນນະເຂດ ຜູ້ເຂົ້າຮ່ວມ ລວມມີຜູ້ອໍານວຍການບໍລິສັດ, ນັກທຸລະກິດ, ພະແນກການ, ລັດວິສາຫະກິດ, ສະຖາບັນ ການເງິນ, ຮ້ານແລກປ່ຽນເງິນ ຕາ, ບັນດາຕົວແທນຈາກທະ ນາຄານທັງພາກລັດ ແລະເອ ກະຊົນເຂົ້າຮ່ວມ.

ໃນກອງປະຊຸມໄດ້ລາຍ ງານ ແລະສະຫຼຸບການຈັດຕັ້ງ ປະຕິບັດວຽກງານຄຸ້ມຄອງ ຮ້ານແລກປ່ຽນເງິນຕາປະຈຳປີ 2020 ແລະທິດທາງແຜນການ ໃນຕໍ່ໜ້າ, ເຜີຍແຜ່ກົດໝາຍຄຸ້ມ ຄອງເງິນຕາຕ່າງປະເທດສະ ບັບເລກທີ 55/ສພຊ, ລົງວັນທີ 22 ທັນວາ 2014 ແລະເຜີຍແຜ່ຂໍ້ຕົກລົງວ່າດ້ວຍທຸລະກິດແລກປ່ຽນເງິນຕາສະບັບເລກທີ 393/ທຫລ, ລົງວັນທີ 02 ກໍລະກົດ 2020 ແລະບັນດາ ແຈ້ງການທີ່ຕິດພັນ ເຊິ່ງກຳນົດ ຫຼັກການ ແລະລະບຽບການ ກ່ຽວກັບການຂໍອະນຸຍາດ, ການເຄື່ອນໄຫວ, ການຄຸ້ມ ຄອງ, ການຕິດຕາມ ແລະກວດ ກາທຸລະກິດແລກປ່ຽນເງິນ ຕາເພື່ອໃຫ້ທຸລະກິດແລກປ່ຽນ ເງິນມີຄວາມໝັ້ນຄົງ, ປອດໄພ, ໜ້າເຊື່ອຖື ແລະມີປະສິດພາບ ແນໃສ່ເຮັດໃຫ້ການເຄື່ອນໄຫວ ທຸລະກິດແລກປ່ຽນເງິນຕາຖືກ ຕ້ອງຕາມກົດໝາຍ, ປະກອບ ສ່ວນເຂົ້າໃນການຄຸ້ມຄອງເງິນ ຕາຕ່າງປະເທດຢູ່ ສປປ ລາວ ໃຫ້ມີປະສິດທິຜົນ./.

ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ຈັດພິທີມອບ-ຮັບໜ້າທີ່ເລຂາຄະນະພັກ, ລັດຖະມົນຕີກະຊວງ ຮສສ ຜູ້ເກົ່າ ແລະ ຜູ້ໃໝ່ລະ ຫວ່າງ ທ່ານ ປອ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງ ຮສສ ຜູ້ເກົ່າ ແລະ ທ່ານນາງ ໃບຄຳ ຂັດທິຍະ ກຳມະການສູນກາງພັກ ຮອງເລຂາຄະນະພັກ, ຮອງລັດຖະມົນຕີກະຊວງ ຮສສ ເປັນລັດ ຖະມົນຕີກະຊວງ ຮສສ ຜູ້ໃໝ່ ໄດ້ຈັດຂຶ້ນໃນວັນທີ 24 ມີນາ 2021, ທີ່ເຮືອນຮັບແຂກກະຊວງ ຮສສ, ເປັນກຽດເຂົ້າຮ່ວມຂອງ ທ່ານ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍແຂກຖືກເຊີນ, ພະນັກງານຫຼັກແຫຼ່ງກ່ຽວຂ້ອງເຂົ້າຮ່ວມ.

ທ່ານ ວຽນທອງ ສິງຄຳພັນ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກໄດ້ຂຶ້ນຜ່ານເອກະສານຄຳສັ່ງຂອງກົມການເມືອງສູນກາງພັກວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ ສະບັບເລກທີ 06 ລົງວັນທີ 24 ມີນາ 2021, ອີງຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 031/ກມສພ, ລົງວັນທີ 20 ມັງກອນ 2018 ວ່າດ້ວຍວຽກງານຄຸ້ມຄອງພະນັກງານ, ອີງຕາມການຕົກລົງໃນກອງປະຊຸມຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກຄັ້ງທີວັນທີ 24-25 ກຸມພາ 2021, ອີງຕາມການເຫັນດີຮັບຮອງໃນກອງປະຊຸມຄົບຄະນະບໍລິຫານງານສູນກາງພັກຄັ້ງທີ II , ສະໃໝທີ XI , ອີງຕາມໜັງສືສະເໜີຂອງຄະນະຈັດຕັ້ງສູນກາງພັກ ສະບັບເລກທີ 87/ຄຈສພ, ລົງວັນທີ 23 ມີນາ 2021 ກົມການເມືອງສູນກາງພັກອອກຄຳສັ່ງຍົກຍ້າຍສະຫາຍ ຄຳແພງ ໄຊສົມແພງ ກຳມະການສູນກາງພັກ ເລຂາຄະນະພັກ, ລັດຖະມົນຕີກະຊວງ ຮສສ ໄປຮັບໜ້າທີ່ໃໝ່ຢູ່ກະຊວງອຸດສາຫະກຳ ແລະ ການຄ້າ, ຈາກນັ້ນກົມການເມືອງສູນກາງພັກຈຶ່ງໄດ້ຕົກລົງແຕ່ງຕັ້ງທ່ານນາງ ໃບຄຳ ຂັດທິຍະ ກຳມະການສູນກາງພັກ ເປັນເລຂາຄະນະບໍລິຫານງານພັກ ກະຊວງຮສສ ເປັນລັດຖະມົນຕີ ກະຊວງຮສສ.

ໃນພິທີ ທ່ານ ຄຳແພງ ໄຊສົມແພງ ລັດຖະມົນຕີກະຊວງ ຮສສ ຜູ້ເກົ່າ ໄດ້ຂຶ້ນກ່າວມອບໜ້າທີ່ໃຫ້ທ່ານນາງ ໃບຄຳ ຂັດທິຍະ ລັດຖະມົນຕີກະຊວງ ຮສສ ຜູ້ໃໝ່ ດັ່ງນັ້ນ, ໃນມື້ນີ້ຈຶ່ງໄດ້ຈັດພິທີເຊັນບົດບັນທຶກມອບ-ຮັບໜ້າທີ່ຢ່າງເປັນທາງການ, ໂດຍການເຂົ້າຮ່ວມເປັນສັກຂີພະຍານຂອງທ່ານ ນາງ ສີໃສ ລືເດດມູນສອນ ພ້ອມດ້ວຍແຂກຖຶກເຊີນເຂົ້າຮ່ວມ.

ທ່ານ ນາງ ສີໃສ ລືເດດມູນສອນ ກ່າວວ່າ: ການຈັດພິທີມອບ-ຮັບໜ້າທີ່ຄັ້ງນີ້ມີຄວາມໝາຍສຳຄັນທີ່ສຸດເພື່ອເປັນການຊັບຊ້ອນພະນັກງານການນຳຂັ້ນສູງໄປຮັບໜ້າທີ່ໃໝ່ເພື່ອໃຫ້ເໝາະສົມກັບສະພາບໃນປັດຈຸບັນເພື່ອເປັນການບັນຊາວຽກໃຫ້ມີ ໝາກຜົນດີກວ່າເກົ່າ, ດັ່ງນັ້ນຂ້າພະເຈົ້າເຊື່ອໝັ້ນວ່າການໄປຮັບໜ້າທີ່ໃໝ່ຂອງທ່ານ ຄຳແພງ ໄຊສົມແພງ ມີຄວາມເໝາະສົມເພື່ອເສີມຂະຫຍາຍບົດຮຽນໃນການບັນຊາວຽກງານໃນກະຊວງອຸດສາຫະກຳ ແລະ ການຄ້າມີຜົນສຳເລັດ, ສຳລັບທ່ານນາງ ໃບຄຳ ຂັດທິຍະ ທີ່ໄດ້ຖືກມອບໝາຍໃຫ້ມາຮັບໜ້າທີ່ໃໝ່ໃນມື້ນີ້ເຫັນວ່າມີຄວາມສອດຄ່ອງ ເປັນພະນັກງານທີ່ໜຸ່ມແໜ້ນ ເປັນຜູ້ທີ່ມີຄວາມຮູ້-ຄວາມສາມາດ, ມີບົດຮຽນ, ປະສົບການເຊື່ອໝັ້ນວ່າເໝາະສົມໃນການບັນຊາເຮັດວຽກຮ່ວມກັບໝູ່ຄະນະເພື່ອສືບຕໍ່ເສີມຂະຫຍາຍເຮັດໃຫ້ວຽກງານແຮງງານມີຜົນສຳເລັດເປັນກ້າວຯ.

ໃນວັນທີ 10 ມີນາ 2021 ເວລາ 10:53 ໂມງ ປກສ ກຸ່ມ 7 (ໜອງບຶກ) ເມືອງສີໂຄດຕະບອງ ນຳໂດຍ ພັທ ຄຳປ່ຽນ ອຸດົມວິໄລ ຮອງຫົວໜ້າ ປກສ ກຸ່ມ 7 ໜອງບຶກ ພ້ອມດ້ວຍພະນັກ ງານກໍ່ສ້າງຮາກຖານ ສົມທົບກັບອຳນາດການປົກຄອງບ້ານໜອງບຶກເໜືອ ແລະໜອງບຶກໃຕ້ ເຂົ້າກັກຕົວເປົ້າໝາຍຄ້າຂາຍຢາເສບຕິດ(ຢາບ້າ) ໄດ້ຈຳ ນວນ 4 ຄົນ, ຍິງ 1 ຄົນ ຢູ່ຫ້ອງແຖວເຂດບ້ານໜອງບຶກຄື: 1. ນາງ ແສງຈັນ ອາຍຸ 44 ປີ, ອາຊີບແມ່ບ້ານ, ພັກເຊົາຢູ່ບ້ານໜອງບຶກເໜືອ ໃນຂໍ້ຫາປິດບັງການຂາຍຢາເສບຕິດ (ຂອງກາງຢ້າບ້າ 3 ເມັດ), 2. ທ້າວ ເຊຍ ອາຍຸ 25 ປີ, ວ່າງງານ ພັກເຊົາຢູ່ບ້ານໜອງບຶກເໜືອ ຂໍ້ຫາຄ້າຂາຍຢາເສບຕິດມີຢາບ້າ 69ເມັດ, 3. ທ້າວ ລີ້ ອາຍຸ 28 ປີ, ວ່າງງານ ພັກເຊົາຢູ່ບ້ານໜອງບຶກໃຕ້ ຂໍ້ຫາຄ້າຂາຍຢາເສບຕິດມີຢາບ້າ 172 ເມັດ, 4. ທ້າວ ຫຼ້າ(ເລ້) ອາຍຸ 31 ປີ, ວ່າງງານ ຢູ່ບ້ານໜອງບຶກໃຕ້ ຂໍ້ຫາເສບຢາບ້າປິດບັງການກະທຳຜິດ.

ປັດຈຸບັນພວກກ່ຽວທັງ 4 ຄົນ ເຈົ້າໜ້າທີ່ ປກສ ກຸ່ມ 7 ໜອງບຶກ ໄດ້ນຳຕົວພ້ອມຂອງກາງດັ່ງກ່າວ ສົ່ງໃຫ້ພະແນກວິຊາສະເພາະ ປກສ ເມືອງສີໂຄດຕະບອງ ດຳເນີນຄະດີພວກກ່ຽວຕາມຂັ້ນຕອນຂອງກົດໝາຍ.

ບັນຫາຢາເສບຕິດເປັນບັນຫາໜຶ່ງທີ່ເປັນຕົວກົດໜ່ວງຖ່ວງດຶງການພັດທະນາຂອງປະເທດຊາດ ພ້ອມທັງເປັນສາເຫດທີ່ພາໃຫ້ເກີດປະກົດການຫຍໍ້ທໍ້ຕ່າງໆເຊັ່ນ: ປຸ້ນຈີ້ຊິງຊັບ, ລັກຊັບ, ອາລະວາດຕີກັນ, ອາລະວາດຄອບຄົວ ໜັກໄປກວ່ານັ້ນແມ່ນການຄາດຕະກຳຕ່າງໆ; ສະນັ້ນ ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງພໍ່ແມ່ປະຊາຊົນທຸກຊັ້ນຄົນຈົ່ງພ້ອມກັນສຶກສາອົບຮົມລູກຫຼານຂອງຕົນບໍ່ໃຫ້ໄປພົວພັນນຳຢາເສບຕິດ ພ້ອມທັງເປັນຫູເປັນຕາຊ່ວຍເຈົ້າໜ້າທີ່ພົບເຫັນການເຄື່ອນໄຫວທີ່ຜິດຕໍ່ກົດໝາຍບ້ານເມືອງອັນນຳໄປສູ່ຄວາມບໍ່ສະຫງົບໃຫ້ຮີບຮ້ອນລາຍງານເຈົ້າໜ້າທີ່ ທີ່ໃກ້ທ່ານເພື່ອເຈົ້າໜ້າທີ່ຈະໄດ້ລົງແກ້ໄຂໃຫ້ທັນສະພາບການ ແລະ ສາມາດລາຍງານມາຊ່ອງທາງ ເບີວອດແອັບ 02028899774 ແລະ ແຈ້ງຜ່ານທາງຊ່ອງທາງເຟສບຸກ ປ້ອງກັນຄວາມສະຫງົບ ນະຄອນຫຼວງວຽງຈັນ.

ໃນບ່າຍຂອງ ວັນທີ 22 ມີນາ 2021 ໃນວາລະດໍາເນີນກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ພາຍໃຕ້ການເປັນປະທານ ຂອງ ທ່ານ ໄຊສົມພອນ ພົມວິຫານ ປະ ທານສະພາແຫ່ງຊາດ, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານ ຮ່າງ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ແຜນງົບປະມານແຫ່ງລັດ 5 ປີ ແຜນງົບປະມານແຫ່ງລັດ 5 ປີ (2021-2025). ໃນນັ້ນ, ໄດ້ກຳນົດ ມີ 6 ເປົ້າໝາຍໃຫຍ່, 25 ແຜນວຽກຈຸດສຸມ ແລະ ໂຄງການບູລິມະສິດຕົ້ນຕໍຈໍານວນໜຶ່ງ.ສຳລັບ 6 ເປົ້າໝາຍໃຫຍ່ດັ່ງກ່າວ, ປະກອບມີ:

ເປົ້າໝາຍທີ 1: ເສດຖະກິດແຫ່ງຊາດຂະ ຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ ປະກອບມີ 5 ແຜນວຽກຈຸດສຸມ ໃນນັ້ນ, ຈະສູ້ຊົນເຮັດໃຫ້ເສດຖະກິດຂະຫຍາຍຕົວສະເລ່ຍຕໍ່ປີໃນລະດັບ 4% ຂຶ້ນໄປ, ລວມຍອດຜະ ລິດຕະພັນພາຍໃນ (GDP) ຕໍ່ຫົວຄົນ 2.880 ໂດລາສະຫາລັດ, ສະເລ່ຍລາຍຮັບ ຕໍ່ຫົວຄົນໃຫ້ໄດ້ 2.280 ໂດລາສະຫາລັດ ໃນປີ 2025 ໃນນີ້: ຂະແໜງກະສິກຳ ຂະຫຍາຍຕົວສະເລ່ຍໃນລະດັບ 2,5%; ຂະແໜງອຸດສາຫະກຳ ຂະຫຍາຍຕົວສະເລ່ຍໃນລະດັບ 4,1%; ຂະແໜງບໍລິການຂະຫຍາຍ ຕົວສະເລ່ຍໃນລະດັບ 6%; ພາສີ-ອາກອນ ຂະຫຍາຍຕົວສະເລ່ຍໃນລະດັບ 5,8%. ຮອດປີ 2025 ຈະສູ້ຊົນໂຄງປະກອບເສດຖະກິດ ຂະແໜງກະສິກຳ ກວມເອົາ 15,3%, ຂະແໜງອຸດສາຫະກຳ ກວມເອົາ 32,3%, ຂະແໜງບໍລິການ ກວມເອົາ 40,7% ແລະ ພາສີ-ອາກອນ ກວມເອົາ 1,7% ຂອງ GDP.

ເປົ້າໝາຍທີ 2: ຊັບພະຍາກອນມະນຸດມີຄຸນນະພາບສູງຂຶ້ນ, ສາມາດຕອບສະໜອງຄວາມຕ້ອງການຂອງການພັດທະນາ, ມີຄວາມສາມາດຄົ້ນຄວ້າ ແລະ ນໍາໃຊ້ວິທະຍາສາດ-ເຕັກໂນໂລຊີ ເພື່ອຍົກສູງປະສິດທິພາບ ແລະ ສ້າງມູນຄ່າເພີ່ມການຜະລິດ ແລະ ການບໍລິການ (ປະກອບມີ 4 ແຜນວຽກຈຸດສຸມ) ໂດຍຈະສູ້ຊົນເຮັດໃຫ້ອັດຕາສ່ວນເດັກນ້ອຍລຸ່ມ 5 ປີ ທີ່ມີນໍ້າໜັກຕໍ່າກວ່າມາດຕະ ຖານ ໃຫ້ຫລຸດລົງເຫລືອ 15%， ອັດຕາສ່ວນຂອງເດັກນ້ອຍລຸ່ມ 5 ປີ ທີ່ມີລວງສູງບໍ່ໄດ້ມາດຕະຖານໃຫ້ໄດ້ 27%， ອັດຕາການຕາຍຂອງເດັກນ້ອຍ ລຸ່ມ 1 ປີ ໃຫ້ຫລຸດລົງເຫລືອ 20/1.000 ຂອງເດັກເກີດມີຊີວິດ; ອັດຕາການຕາຍຂອງເດັກລຸ່ມ 5 ປີ ໃຫ້ຫລຸດລົງເຫລືອ 30/1.000 ຂອງເດັກເກີດມີຊີວິດ; ອັດຕາເຂົ້າຮຽນຂອງເດັກ 5 ປີ ໃນຂັ້ນສຶກສາກ່ອນໄວຮຽນ ໃຫ້ບັນລຸໄດ້ 86% ໃນປີ 2025; ອັດຕາການເຂົ້າຮຽນລວມຊັ້ນ ມ4 ໃຫ້ບັນລຸສູງກວ່າ 74%; ສູ້ຊົນໃຫ້ມີນັກຮຽນທີ່ຮຽນຈົບຈາກ ມຕົ້ນ ເຂົ້າຮຽນຕໍ່ອາຊີວະສຶກສາ ແລະ ຝຶກອົບຮົມວິຊາຊີບໃຫ້ບັນລຸສູງກວ່າ 5% ຂອງຈໍານວນນັກຮຽນມັດ ທະຍົມຕົ້ນ; ຄວບຄຸມອັດຕາຫວ່າງງານໃຫ້ຫລຸດລົງຈາກ 20% ໃນປີ 2020 ມາເປັນ 15% ສະເລ່ຍຫລຸດລົງ ປີລະ 1%; ລັດລົງທຶນໃສ່ການຄົ້ນຄວ້າ ແລະ ພັດທະນາວິທະຍາສາດ ແລະ ເຕັກໂນໂລຊີໃຫ້ໄດ້ 1% ຂອງງົບປະມານການລົງທຶນໃນແຕ່ລະປີ.

ເປົ້າໝາຍທີ 3: ຊີວິດການເປັນຢູ່ທາງດ້ານວັດຖຸ ແລະ ຈິດໃຈ ຂອງປະຊາຊົນໄດ້ຮັບການຍົກລະດັບຂຶ້ນເທື່ອລະກ້າວ, ໃນນັ້ນຈະສູ້ຊົນສ້າງຄອບຄົວພົ້ນທຸກໃຫ້ໄດ້ 204.360 ຄອບຄົວ, ສູ້ຊົນສ້າງບ້ານພົ້ນທຸກໃຫ້ໄດ້ 3.104 ບ້ານ, ສ້າງຄອບຄົວພັດທະນາໃຫ້ໄດ້ 245.754 ຄອບຄົວ, ສ້າງບ້ານພັດທະນາໃຫ້ໄດ້ 4.420 ບ້ານ, ຊຸກຍູ້ໃຫ້ການນຳທີ່ເປັນເພດຍິງທຸກຂັ້ນ ໃຫ້ໄດ້ ໂດຍສະເລ່ຍໃຫ້ກວມ 20% ຂຶ້ນໄປ.

ເປົ້າໝາຍທີ 4: ປົກປັກຮັກສາສິ່ງແວດລ້ອມ ໃຫ້ມີຄວາມສົມດູນ ແລະ ຫລຸດຜ່ອນຄວາມສ່ຽງຈາກໄພພິບັດຕ່າງໆ ໂດຍຈະສູ້ຊົນໃຫ້ເນື້ອທີ່ປົກຫຸ້ມປ່າໄມ້ ຫລາຍກວ່າ 70% ຂອງເນື້ອທີ່ທົ່ວປະເທດໃນປີ 2025, ຂຶ້ນທະບຽນອອກໃບຕາດິນໃຫ້ໄດ້ 1,6 ລ້ານຕອນໃນຂອບເຂດທົ່ວປະເທດ, ຫລຸດຜ່ອນທາດອາຍແກ້ວ ຈາກການທຳລາຍປ່າໄມ້ໃຫ້ໄດ້ປະມານ 30 ລ້ານໂຕນ, ຈະສ້າງຕັ້ງສະຖານີອຸຕຸນິຍົມ ໃໝ່ 45 ແຫ່ງ ແລະ ສະຖານີອຸທົກກະສາດໃໝ່ 25 ແຫ່ງ, ສູ້ຊົນສ້າງກອງທຶນຄຸ້ມຄອງໄພພິບັດຂັ້ນສູນກາງ ແລະ ສ້າງກອງທຶນຄຸ້ມຄອງໄພພິບັດໃຫ້ໄດ້ 17 ແຂວງ, ນະຄອນຫລວງ ແລະ 56 ເມືອງ.

ເປົ້າໝາຍທີ 5: ສ້າງໂຄງລ່າງພື້ນທີ່ມີຄວາມເຂັ້ມແຂງ, ນຳໃຊ້ທ່າແຮງ, ກາລະໂອກາດ ທີ່ຕັ້ງ, ເຂົ້າຮ່ວມຂະບວນການຮ່ວມມື ແລະ ການເຊື່ອມໂຍງພາກພື້ນ ແລະ ສາກົນຢ່າງເປັນເຈົ້າການ ໂດຍຈະສູ້ຊົນເຮັດໃຫ້ປະລິມານການຂົນສົ່ງຜູ້ໂດຍສານ ໃນຕາໜ່າງການເຊື່ອມໂຍງ ເຊື່ອມຈອດ ກັບບັນດາປະເທດໃນພາກພື້ນ ທຸກຮູບແບບການຂົນສົ່ງ ທາງບົກ ຂະຫຍາຍຕົວ 7% ຕໍ່ປີ, ທາງນ້ຳ 5%, ທາງອາກາດ 12% ແລະ ທາງລົດໄຟ 3-5%.

ເປົ້າໝາຍທີ 6: ການຄຸ້ມຄອງບໍລິຫານລັດມີປະສິດທິພາບ, ສັງຄົມມີຄວາມສະເໝີພາບ, ຍຸຕິທຳ ແລະ ໄດ້ຮັບການປົກປ້ອງຕາມທິດ ການປົກຄອງດ້ວຍກົດໝາຍທີ່ສັກສິດ ແລະ ເຂັ້ມງວດ ໂດຍຈະສູ້ຊົນການບໍລິຫານລັດເປັນທັນສະໄໝ ແລະ ການປັບປຸງບໍລິຫານລັດດ້ວຍຮູບແບບເອເລັກໂຕຣນິກ, ສູ້ຊົນສ້າງສູນບໍລິການຜ່ານປະຕູດຽວ ຢູ່ຂັ້ນເມືອງໃຫ້ໄດ້ຢ່າງໜ້ອຍ 50% ຂອງຈໍານວນເມືອງທັງໝົດ ແລະ ຂັ້ນແຂວງຈຳນວນໜຶ່ງຕາມເງື່ອນໄຂ, ຊຸກຍູ້ ແລະ ປະກອບເຄື່ອງມື, ອຸປະກອນທີ່ທັນສະໄໝທີ່ຈຳເປັນ ໃຫ້ອົງການສານປະຊາຊົນສູງສຸດ, ອົງການສືບສວນ-ສອບສວນ, ອົງການໄອຍະການປະຊາ ຊົນສູງສຸດ ແລະ ອົງການຈັດຕັ້ງປະຕິບັດຄຳຕັດສິນຂອງສານ ໃນຂອງເຂດທົ່ວປະເທດ, ອົງການໄອຍະການປະຊາຊົນສູງສຸດ ສູ້ຊົນອອກຄຳຖະແຫລງໃຫ້ໄດ້ 95%, ສູ້ຊົນຕັດສິນ-ພິພາກຄະດີ ໃຫ້ບັນລຸໄດ້ 85% ດ້ວຍຄຸນນະພາບທີ່ດີ, ຖືກຕ້ອງກັບກົດໝາຍ ແລະ ສອດຄ່ອງຄວາມເປັນຈິງ; ຈັດຕັ້ງປະຕິບັດຄຳຕັດສິນທີ່ຍັງຄ້າງ ແລະ ຄຳຕັດສິນເຂົ້າໃໝ່ໃຫ້ໄດ້ 80%, ໃນນັ້ນ 20% ແມ່ນໃຫ້ຈັດຕັ້ງປະຕິບັດສຳເລັດ ແລະ ປິດສຳນວນຄະດີ.ການສະເໜີຮ່າງແຜນພັດທະນາຄັ້ງນີ້, ເພື່ອໃຫ້ບັນດາຜູ້ແທນກອງປະຊຸມ ໄດ້ພິຈາລະນາປະ ກອບຄຳຄິດຄຳເຫັນ ແລະ ຮັບຮອງເອົາ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ແຜນງົບປະມານ ແຫ່ງລັດ 5 ປີ ແຜນງົບປະມານແຫ່ງລັດ 5 ປີ (2021-2025) ເພື່ອໃຫ້ສາມາດ ຈັດຕັ້ງປະຕິບັດໄດ້ຢ່າງມີຜົນສຳເລັດ.

ຂ່າວ ມະນີທອນ: ພາບ: ຂັນໄຊ, ອ່າຍຄຳ _ ຂ່າວສານປະເທດລາວ (ຂປລ)

ທ່ານ ຄຳພັນ ພົມມະທັດ ກໍາມະການກົມການເມືອງສູນ ກາງພັກ ໄດ້ຮັບການລົງຄະແນນສຽງຮັບຮອງຈາກສະມາ ຊິກສະພາແຫ່ງຊາດຢູ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ໃນວັນທີ 22 ມີນາ 2021 ໃຫ້ເປັນປະທານອົງການກວດກາແຫ່ງລັດ ທີ່ຂຶ້ນກັບການນໍາພາ-ຊີ້ນໍາໂດຍກົງຂອງປະທານປະເທດ, ຄຽງຄູ່ກັບການຊີ້ນໍາຂອງກົມການເມືອງສູນກາງພັກ, ສ່ວນກົງຈັກການຈັດ ຕັ້ງ ແມ່ນຍັງເປັນກົງຈັກການຈັກຕັງດຽວກັບຄະນະກວດກາສູນກາງພັກ.

ໃນໂອກາດກ່າວຮັບໜ້າທີ່ໃນຄັ້ງນີ້ ນອກຈາກໄດ້ໃຫ້ຄໍາໝັ້ນສັນຍາວ່າ: ພ້ອມແລ້ວຈະປະຕິບັດ ແລະ ແບກຫາບໜ້າທີ່ວຽກງານໃໝ່ດ້ວຍຄວາມຈົງຮັກພັກດີ, ຊື່ສັດ ແລະ ຈະທຸ່ມເທເຫື່ອແຮງສະຕິປັນຍາ ເພື່ອປະກອບສ່ວນສໍາຄັນເຂົ້າໃນການສ້າງການຫັນປ່ຽນໃໝ່ຕາມເນື້ອໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ນໍາເອົາບັນດາຈິດໃຈຊີ້ນໍາຂອງສູນກາງພັກ, ຂອງປະທານປະເທດ ໄປຄົ້ນຄ້ວາຜັນຂະ ຫຍາຍ ແລະ ໝູນໃຊ້ເຂົ້າໃນວຽກງານຕົວຈິງ, ຈະຮ່ວມກັບໝູ່ຄະນະເສີມຂະຫຍາຍຜົນສໍາເລັດ ແລະ ບົດຮຽນອັນລໍ້າຄ່າຂອງວຽກງານກວດກາໃນໄລຍະຜ່ານມາ, ກ້າຕັດສິນໃຈປັບປຸງແກ້ໄຂບັນຫາທີ່ຍັງຄ້າງຄາ ກໍ່ຄື ສູ້ຊົນຍົກລະດັບການຈັດຕັ້ງ ແລະ ການເຄື່ອນໄຫວໃຫ້ຕອບສະໜອງການເລັ່ງທວງຂອງສະພາບວຽກງານຕົວຈິງເທື່ອລະກ້າວ.

ທ່ານ ຄໍາພັນ ພົມມະທັດ ຍັງໄດ້ສະເໜີຕໍ່ທີ່ປະຊຸມວ່າ: “ພວກເຮົາຕ້ອງມີຄວາມເປັນເອກະພາບສູງ ແລະ ຕັດສິນໃຈແກ້ໄຂຢ່າງເດັດຂາດ ເພື່ອຕີຖອຍທັດສະນະຖືເບົາວຽກງານກວດກາ, ສ້າງຄວາມຮັບຮູ້-ເຂົ້າໃຈຢ່າງຖືກຕ້ອງ ໂດຍຖືເອົາການຕິດຕາມ, ກວດກາເປັນວາລະສໍາຄັນຂອງທົ່ວພັກ ແລະ ລະ ບົບການເມືອງ, ທັງເປັນເປົ້າໝາຍສໍາຄັນໃນການຊຸກຍູ້ການປະຕິບັດພາລະບົດບາດການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ, ທັງເປັນແບບ ແຜນວິທີເຮັດວຽກທີ່ຂາດບໍ່ໄດ້ຂອງພະນັກງານນໍາພາ-ຄຸ້ມຄອງທຸກຂັ້ນ.”

ສໍາລັບອົງການກວດກາແຫ່ງລັດ ໄດ້ຮັບການສ້າງຕັ້ງຂຶ້ນຕາມມະຕິຕົກລົງຂອງກົມການເມືອງສູນກາງພັກ ສະບັບເລກທີ 07/ກມສພ, ລົງວັນທີ 25 ກຸມພາ 2021 ວ່າດ້ວຍການປັບປຸງສັບຊ້ອນບາງວຽກງານຂອງລັດຖະບານ ໂດຍໄດ້ຕົກລົງສັບຊ້ອນອົງການກວດກາລັດຖະບານ ອອກຈາກໂຄງປະກອບກົງຈັກຂອງລັດຖະບານ ເປັນອົງການເອກະ ລາດໄປຂຶ້ນກັບປະທານປະເທດ ເອີ້ນວ່າ: ອົງການກວດກາແຫ່ງລັດ (ຄວບປະທານຄະນະກວດກາສູນກາງພັກ).

Cr: ບຸນຕຽງ ຈັນທະວົງ

ພາຍຫລັງໄດ້ຮັບເລືອກເປັນນາຍົກລັດຖະມົນຕີ ແຫ່ງ ສປປ ລາວ ຢູ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 22 ມີນາ 2021 ທີ່ຫໍສະພາແຫ່ງຊາດຫລັງໃໝ່ ທ່ານ ພັນຄໍາ ວິພາວັນ ໄດ້ຂຶ້ນສະເໜີກ່ຽວກັບໂຄງປະ ກອບກົງຈັກຂອງລັດຖະບານ, ເປົ້າໝາຍແຕ່ງຕັ້ງເປັນຮອງນາຍົກລັດຖະມົນຕີ ແລະ ສະມາຊິກລັດຖະບານ ໂດຍກົງຈັກການຈັດຕັ້ງຂອງລັດຖະບານ ຊຸດທີ IX ປະກອບມີ 17 ກະຊວງ ແລະ 2 ອົງການທຽບເທົ່າກະຊວງ.

ຜ່ານການພິຈາລະນາ ແລະ ປະກອບຄໍາເຫັນ ຢ່າງເລິກເຊີ່ງ ສະມາຊິກສະພາແຫ່ງ ຊາດ ໄດ້ພ້ອມກັນ ລົງຄະແນນສຽງເຫັນດີຮັບຮອງເອົາການແຕ່ງຕັ້ງສະມາຊິກລັດຖະ ບານຕາມການສະເໜີຂອງນາຍົກລັດຖະມົນຕີ ຈໍານວນ 20 ທ່ານ ດັ່ງນີ້:

• 1. ພົນເອກ ຈັນສະໝອນ ຈັນຍາລາດ ເປັນຮອງນາຍົກລັດຖະມົນຕີ ທັງເປັນລັດ ຖະມົນຕີກະຊວງປ້ອງກັນປະເທດ
• 2. ທ່ານ ສອນໄຊ ສີພັນດອນ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງແຜນການ ແລະ ການລົງທຶນ
• 3. ທ່ານ ກິແກ້ວ ໄຂຄໍາພິທູນ ເປັນຮອງນາຍົກລັດຖະມົນຕີ.
• 4. ທ່ານ ວິໄລ ຫຼ້າຄໍາຟອງ ເປັນລັດຖະມົນຕີກະຊວງປ້ອງກັນຄວາມສະຫງົບ
• 5. ທ່ານ ສະເຫຼີມໄຊ ກົມມະສິດ ເປັນລັດຖະມົນຕີກະຊວງການຕ່າງປະເທດ
• 6. ທ່ານ ຄໍາແພງ ໄຊສົມແພງ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ
• 7. ທ່ານ ຄຳເຈນ ວົງໂພສີ ເປັນລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ
• 8. ທ່ານ ບໍ່ວຽງຄຳ ວົງດາລາ ເປັນລັດຖະມົນຕີກະຊວງເຕັກໂນໂລຊີ ແລະ ການສື່ສານ
• 9. ທ່ານ ເພັດ ພົມພິທັກ ເປັນລັດຖະມົນຕີກະຊວງກະສິກໍາ ແລະ ປ່າໄມ້
• 10. ທ່ານ ນາງ ບຸນຄໍາ ວໍລະຈິດ ເປັນລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລອ້ມ
• 11. ທ່ານ ສອນໄຊ ສິດພະໄຊ ເປັນຜູ້ວ່າການທະນາຄານແຫ່ງ ສປປ ລາວ
• 12. ທ່ານ ນາງ ໃບຄໍາ ຂັດຕິຍະ ເປັນລັດຖະມົນຕີກະຊວງແຮງງານ ແລະ ສະຫວັດດີການສັງຄົມ
• 13. ທ່ານ ນາງ ສວນສະຫວັນ ວິຍາເກດ ເປັນລັດຖະມົນຕີກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ
• 14. ທ່ານ ບຸນໂຈມ ອຸບົນປະເສີດ ເປັນລັດຖະມົນຕີກະຊວງການເງິນ
• 15. ທ່ານ ວຽງສະຫວັດ ສີພັນດອນ ເປັນລັດຖະມົນຕີກະຊວງໂຍທາທິການ ແລະ ຂົນສົ່ງ
• 16. ທ່ານ ພຸດ ສິມມາລາວົງ ເປັນລັດຖະມົນຕີກະຊວງສຶກສາທິການ ແລະ ກິລາ
• 17. ທ່ານ ບຸນແຝງ ພູມມະໄລສິດ ເປັນລັດຖະມົນຕີກະຊວງສາທາລະນະສຸກ
• 18. ທ່ານ ໄພວີ ສີບົວລິພາ ເປັນລັດຖະມົນຕີກະຊວງຍຸຕິທໍາ
• 19. ທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນ
• 20. ທ່ານ ດາວວົງ ພອນແກ້ວ ເປັນລັດຖະມົນຕີກະຊວງພະລັງງານ ແລະ ບໍ່ແຮ່

ຂ່າວ: ບຸນຕຽງ ຈັນທະວົງ

ຄໍາເຫັນຂອງ
ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ

ເນື່ອງໃນໂອກາດ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ
(ນະຄອນຫລວງວຽງຈັນ, ວັນທີ 21 ມີນາ 2021)

ພີ່ນ້ອງຮ່ວມຊາດ, ບັນດາສະຫາຍສະມາຊິກພັກທີ່ຮັກແພງທັງຫລາຍ!

ວັນທີ 22 ມີນາ 2021 ທີ່ຈະເຖິງນີ້ ແມ່ນວັນສ້າງ¬ຕັ້ງພັກປະ¬ຊາ¬ຊົນປະ¬ຕິ¬ວັດລາວ ເຊິ່ງເປັນວັນທີ່ໄດ້ໃຫ້ກຳເນີດພັກຂອງຊົນຊັ້ນຜູ້ອອກແຮງງານ, ພັກທຳອິດຂອງປະເທດເຮົາ ແລະ ເປັນພັກທີ່ຖືໄດ້ວ່າເປັນຜູ້ຈັດຕັ້ງ, ນໍາພາ ພາລະກິດປະຕິວັດຊາດ-ປະຊາທິປະໄຕ ແລະ ການປົກປັກຮັກສາ ແລະພັດທະ ນາປະເທດຊາດ ຕະຫລອດໄລຍະ 66 ປີ ແລະ ວັນທີ 22 ມີນາ ຈະໝູນວຽນມາບັນຈົບຄົບຮອບອີກວາລະໜຶ່ງ.
ໃນໂອກາດອັນມີຄວາມໝາຍສຳຄັນທາງປະຫວັດສາດນີ້, ຂ້າພະເຈົ້າ ຕາງໜ້າຄະນະບໍລິຫານງານສູນກາງພັກ ຂໍສົ່ງຄວາມຢ້ຽມຢາມຖາມຂ່າວອັນອົບອຸ່ນ, ຄວາມສາມັກຄີຮັກແພງອັນສະໜິດສະໜົມແລະ ຄຳອວຍພອນໄຊອັນປະເສີດໄປຍັງບັນດາສະຫາຍອະດີດການນໍາ, ນັກປະຕິວັດອາວຸໂສ, ນັກຮົບແຂ່ງຂັນ, ວິລະຊົນແຫ່ງຊາດ, ສະມາຊິກພັກ-ພະນັກງານ, ທະຫານ, ຕຳຫລວດ ແລະ ປະຊາຊົນລາວບັນດາເຜົ່າ ຂໍຈົ່ງມີຄວາມເບີກບານມ່ວນຊື່ນ, ຫ້າວຫັນໝັ້ນຍືນ, ມີຜົນສໍາເລັດໃນການປະຕິບັດໜ້າທີ່ວຽກງານ ແລະ ຊີວິດສ່ວນຕົວຂອງຕົນ.

ທຸກໆຄັ້ງເມື່ອພວກເຮົາລະນຶກເຖິງວັນສຳຄັນອັນເປັນປະຫວັດສາດນີ້ ທົ່ວພັກເຮົາ ຍິ່ງຄິດຄະນຶງຫາ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ, ຜູ້ນຳພາກໍ່ຕັ້ງພັກເຮົາ, ນຳພາພາລະກິດປະຕິວັດ, ນຳພາສ້າງຕັ້ງລະບອບປະຊາທິປະໄຕປະຊາຊົນ ແລະ ນຳພາພາລະກິດປ່ຽນແປງໃໝ່ຮອບດ້ານມີຫລັກການຂອງພັກ; ພ້ອມນີ້ກໍສະແດງຄວາມຮູ້ບຸນຄຸນ ແລະ ຈົດຈໍາລໍ້າລຶກ ຕໍ່ວິລະກຳອັນລ້ຳເລີດ, ຄຸນງາມຄວາມດີ ແລະ ການເສຍສະຫລະອັນໃຫຍ່ຫລວງ ຂອງບັນດາຜູ້ນຳແຕ່ລະຮຸ່ນ, ນັກຮົບປະຕິວັດ, ຜູ້ຮັກຊາດ ແລະ ປະຊາຊົນລາວບັນດາເຜົ່າທີ່ໄດ້ອຸທິດຊີວິດ, ເລືອດເນື້ອ, ເຫື່ອແຮງ ແລະ ສະຕິປັນຍາເພື່ອພາລະກິດປະຕິວັດ ໃນເມື່ອກ່ອນ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ພີ່ນ້ອງຮ່ວມຊາດ, ບັນດາສະຫາຍສະມາຊິກພັກທີ່ຮັກແພງທັງຫລາຍ!

ການສ້າງຕັ້ງພັກປະຊາຊົນປະຕິວັດລາວ ຂຶ້ນໃນວັນທີ 22 ມີນາ 1955 ແມ່ນການສະໜອງຕອບຕໍ່ການເລັ່ງທວງອັນຮີບດ່ວນຂອງຊາດ ແລະ ສັງຄົມໃນເວລານັ້ນ ທີ່ຮຽກຮ້ອງໃຫ້ມີການນຳພາຊີ້ນຳລວມສູນເປັນເອກະພາບ ຂອງຂະບວນການຕໍ່ສູ້ຂອງປະຊາຊົນລາວບັນດາເຜົ່າ ທີ່ພວມແຜ່ຂະຫຍາຍໃນຂອບເຂດທົ່ວປະເທດ ຕ້ານຈັກກະພັດລ່າເມືອງຂຶ້ນ ແລະ ລະບອບການປົກຄອງທີ່ເປັນຕີນມືຂອງພວກເຂົາ; ມັນແມ່ນການເຕີບໃຫຍ່ຂະຫຍາຍຕົວຂອງຂະບວນການຕໍ່ສູ້ທາງການເມືອງ ທີ່ເປັນໄປຕາມທ່າອ່ຽງລວມແຫ່ງການຂະຫຍາຍຕົວຂອງຍຸກສະໄໝໃນເວລານັ້ນ, ເຊິ່ງແມ່ນເຫດການດ້ານການເມືອງ-ສັງຄົມ ທີ່ເປັນບາດລ້ຽວປະຫວັດສາດສຳຄັນຂອງຊາດ ແລະ ຂອງການປະຕິວັດລາວ, ການປະຕິວັດໄດ້ມີພັກການເມືອງ ທີ່ມີອຸດົມການ ແລະ ເປົ້າໝາຍຍຸດທະສາດອັນຈະແຈ້ງເປັນຜູ້ນຳພາ ເຊິ່ງສາມາດສົມທົບໄດ້ຢ່າງສອດ ຄ່ອງລະຫວ່າງຍຸດທະສາດ ແລະ ຍຸດໂທບາຍ, ການປະຕິວັດຊາດ-ປະຊາທິປະໄຕຂອງລາວເຮົາ ຕິດພັນ ແລະ ຕໍ່ເນື່ອງກັບການປະຕິວັດສັງຄົມນິຍົມ, ກາຍເປັນສ່ວນໜຶ່ງທີ່ຕິດແໜ້ນກັບການປະຕິວັດຢູ່ອິນດູຈີນ ແລະ ໃນໂລກ.

ພັກປະຊາຊົນປະຕິວັດລາວ ໄດ້ສືບທອດພາລະກິດອັນສະຫງ່າງາມຂອງພັກກອມມູນິດອິນດູຈີນແລະ ຢືດໝັ້ນໃນອຸດົມການກໍຄືທາດແທ້ຂອງພັກປະຕິວັດ ມາກ-ເລນິນ ຢ່າງໜັກແໜ້ນ, ທັງເປັນເຈົ້າການເສີມຂະຫຍາຍມູນເຊື້ອອັນສະຫງ່າລາສີ ແລະ ກໍາລັງແຮງສັງລວມພາຍໃນຊາດ ສົມທົບກັບກຳລັງແຮງຂອງຍຸກສະໄໝ ສາມາດເຮັດສຳເລັດພາລະກຳປະຫວັດສາດໄດ້ຢ່າງສົມກຽດ, ເປີດສັງກາດໃໝ່ແຫ່ງຄວາມເປັນເອກະລາດແຫ່ງຊາດ, ອິດສະຫລະພາບ ແລະ ຄວາມເປັນເຈົ້າຕົນເອງຂອງປະຊາຊົນລາວບັນ ດາເຜົ່າ.
ພາຍຫລັງສະຖາປະນາ ສປປ ລາວ, ພັກເຮົາໄດ້ກາຍເປັນແກນນໍາໃນລະບົບການເມືອງປະຊາທິ ປະໄຕປະຊາຊົນ ແລະ ນໍາພາທົ່ວສັງຄົມ ປະຕິບັດ 2 ໜ້າທີ່ຍຸດທະສາດ ໃນຕະຫລອດ 45 ປີຜ່ານມາ. ໂດຍກຳແໜ້ນສະພາວະຄວາມເປັນຈິງ ຂອງປະເທດຊາດ ແລະ ສະພາບການສາກົນ, ພັກເຮົາ ອັນມີປະທານ ໄກສອນ ພົມວິຫານ ເປັນຜູ້ນໍາໜ້າ ໄດ້ມີຄວາມສະດຸ້ງໄວ, ມີຄວາມກ້າຫານປະດິດສ້າງ ແລະ ມີຄວາມຮັບຜິດຊອບຢ່າງເຕັມປ່ຽມ ໃນການລິ່ເລີ່ມ ແລະ ນຳພາຈັດຕັ້ງປະຕິບັດພາລະກິດປ່ຽນແປງໃໝ່ຮອບດ້ານມີຫລັກການຂອງພັກ ໃຫ້ເກີດຜົນເປັນຈິງເປັນກ້າວໆມາ, ສ້າງປະຖົມປັດໄຈກ້າວຂຶ້ນສູ່ຈຸດໝາຍສັງຄົມນິຍົມ ເທື່ອລະກ້າວໆ.

ບັນດາສະຫາຍສະມາຊິກພັກ, ພີ່ນ້ອງປວງຊົນລາວ ທີ່ຮັກແພງທັງຫລາຍ !

ຕະຫລອດຍ່ານທາງ 66 ປີ, ພັກເຮົາໄດ້ຜ່ານການຝຶກຝົນຫລໍ່ຫລອມ, ທົດສອບນາໆປະການ ໃນແປວໄຟປະຕິວັດ ອັນລະອິດລະອ້ຽວ, ຫຍຸ້ງຍາກລໍາບາກ ແລະ ເຕັມໄປດ້ວຍການເສຍສະຫລະບໍ່ຈັກວ່າເທົ່າໃດ; ພາຍໃຕ້ການນໍາພາຂອງພັກ, ປະຊາຊົນລາວບັນດາເຜົ່າ ຍາມໃດກໍໃຫ້ຄວາມເຊື່ອໝັ້ນ, ສະໜັບສະໜູນ, ຊ່ວຍເຫລືອກໍ່ສ້າງອັນຈິງໃຈ, ບໍລິສຸດຕໍ່ພັກເຮົາ ແລະ ພວມຕັ້ງໜ້າເປັນເຈົ້າເຂົ້າຮ່ວມພາລະກິດແຫ່ງການປົກປັກຮັກສາ ແລະ ກໍ່ສ້າງປິຕິພູມອັນແສນຮັກຂອງຕົນຕາມເສັ້ນທາງສືບຕໍ່ບູລະນະລະບອບປະຊາທິປະໄຕປະຊາຊົນໃຫ້ສົມບູນຍິ່ງຂຶ້ນ, ເຮັດໃຫ້ຈຸດໝາຍປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີເປັນປຶກແຜ່ນ, ມີປະຊາທິປະໄຕ, ຍຸຕິທຳ ແລະ ສີວິໄລ ເຊິ່ງອັນນັ້ນແມ່ນພາລະກໍາປະຫວັດສາດອັນໃຫຍ່ຫລວງ, ຮອບດ້ານ, ໜັກໜ່ວງ ແລະ ທັງແມ່ນຈຸດໝາຍຍາວນານ ຂອງພັກເຮົາທີ່ຕ້ອງບັນລຸໃຫ້ປະກົດຜົນເປັນຈິງ.

ບັນດາສະຫາຍ ແລະ ເພື່ອນມິດທີ່ຮັກແພງທັງຫລາຍ !
ດ້ວຍເຫດໃດພັກເຮົາຈຶ່ງສາມາດດໍາລົງທີ່ຕັ້ງ, ບົດບາດນໍາພາໃນທົ່ວລະບົບການເມືອງ ແລະ ໃນທົ່ວສັງຄົມຢ່າງໜັກແໜ້ນມາໄກຈົນເຖິງທຸກວັນນີ້, ພວກເຮົາກໍ່ຄົງມີຄຳຕອບທີ່ຊັດເຈນແລ້ວວ່າ ພັກເຮົາ ຍາມໃດກໍຢຶດໝັ້ນຢ່າງສະເໝີຕົ້ນສະເໝີປາຍໃນທາດແທ້ປະຕິວັດ, ມູນເຊື້ອອັນສະຫງ່າງາມຂອງຕົນນັ້ນ ຄື:

• – ຢຶດໝັ້ນຢ່າງສະເໝີຕົ້ນສະເໝີປາຍ ອຸດົມການສັງຄົມນິຍົມ, ບັນດາຫລັກມູນພື້ນຖານຂອງການກໍ່ສ້າງພັກຕາມລັດທິມາກ-ເລນິນ, ແນວຄິດໄກສອນ ພົມວິຫານ ເປັນພື້ນຖານແນວຄິດ, ທິດສະດີ ຂອງພັກ; ບໍ່ຄຳພີຕາຍຕົວ ແຕ່ປະດິດສ້າງໃນການໝູນໃຊ້ທິດສະດີ ແລະ ບົດຮຽນດ້ານຕ່າງໆ ເຂົ້າກັບເງື່ອນໄຂຕົວຈິງ ແລະ ສະພາບຈຸດພິເສດຂອງປະເທດຊາດ; ມີການສະຫລຸບຖອດຖອນບົດຮຽນຈາກພຶດຕິກໍາ ແລະ ປັບປຸງບູລະນະແນວທາງການເມືອງຂອງພັກ ໃຫ້ສອດຄ່ອງກັບສະພາບການຕົວຈິງຂອງປະເທດຊາດໃນແຕ່ລະໄລຍະ;
• – ເວລາໃດກໍຢຶດໝັ້ນໃນທາດແທ້ຊົນຊັ້ນ, ຖືປະຊາຊົນເປັນກົກ, ຮັບໃຊ້ປະຊາຊົນ, ມີຄວາມຈົ່ງຮັກພັກດີ ຕໍ່ຜົນປະໂຫຍດລວມຂອງຊາດ-ຂອງປະຊາຊົນ; ເຄື່ອນໄຫວຕິດແທດກັບປະຊາຊົນ, ອີງໃສ່ມະຫາຊົນ ແລະ ຝຶກຝົນຫລໍ່ຫລອມຜ່ານຂະບວນການປະຕິວັດຂອງມະຫາຊົນ ເພື່ອກໍ່ສ້າງ ແລະ ຂະ ຫຍາຍພັກ;
• – ພັກໄດ້ຢຶດໝັ້ນ ແລະ ປະຕິບັດຫລັກການລວມສູນປະຊາທິປະໄຕ, ເວລາໃດກໍຖືສໍາຄັນການເສີມສ້າງຄວາມສາມັກຄີເປັນເອກະພາບບົນພື້ນຖານແນວທາງ, ແຜນນະໂຍບາຍ, ກົດລະບຽບຂອງພັກ;ຖືສໍາຄັນການເສີມຂະຫຍາຍປະຊາທິປະໄຕ ໄປຄຽງຄູ່ກັບການປະຕິບັດລະບຽບວິໄນຂອງພັກ ກໍຄືລະບອບດໍາເນີນຊີວິດການເມືອງ, ຕໍານິຕິຊົມກັນເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງພັກ;
• – ເຊີດຊູລັກສະນະນຳໜ້າຂອງພັກ ແລະ ຄວາມເປັນແບບຢ່າງຂອງສະມາຊິກພັກ ມີຄວາມເດັດຂາດ, ເຂັ້ມງວດໃນການກຳຈັດ ແລະ ແກ້ໄຂປະກົດການຫຍໍ້ທໍ້ທີ່ເຮັດໃຫ້ພັກເຊື່ອມເສຍອິດທິພົນບົດບາດ ແລະ ຂາດຄວາມເຊື່ອໝັ້ນຈາກປະຊາຊົນ, ພັກໄດ້ເປັນເຈົ້າການປັບປຸງປ່ຽນແປງຕົນເອງ,ເອົາໃຈໃສ່ບຳລຸງສ້າງຖັນແຖວສະມາຊິກພັກ ໃຫ້ມີຄວາມເປັນແບບຢ່າງນຳໜ້າ, ເປັນກໍາລັງແຮງສູ້ຮົບໃນທຸກຂົງເຂດວຽກງານ; ຕ້ານລັດທິອາດຍາສິດ, ລັດທິເອກະຊົນ, ເຈົ້າໂຄດ, ອະນາທິປະໄຕ, ລັດທິສວຍໂອກາດໃນທຸກຮູບແບບ.
• – ພັກເຮົາໄດ້ສົມທົບຢ່າງແໜ້ນແຟ້ນ ລະຫວ່າງລັດທິຮັກຊາດອັນແທ້ຈິງ ກັບລັດທິສາກົນອັນຜ່ອງໃສ; ໃນການເຄື່ອນໄຫວນໍາພາຂອງພັກເຮົາ, ເວລາໃດກໍຢຶດໝັ້ນຈິດໃຈຊາດເອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ເສີມຂະຫຍາຍກໍາລັງແຮງສັງລວມພາຍໃນຊາດສົມທົບກັບການຍາດແຍ່ງເອົາການສະໜັບສະໜູນຊ່ວຍເຫລືອ ຈາກພາຍນອກຢ່າງມີຫລັກການ; ພົວພັນຮ່ວມມືກັບພັກປະເທດເພື່ອນມິດຍຸດທະສາດຢ່າງສະເໝີຕົ້ນສະເໝີປາຍ.

ໝາກຜົນແຫ່ງການນໍາພາ ຂອງພັກເຮົາໃນ 66 ປີ ແມ່ນໃຫຍ່ຫລວງ ແລະ ສົມຄວນໃຫ້ແກ່ຄວາມເອກອ້າງ ແລະ ພາກພູມໃຈ, ແຕ່ພວກເຮົາກໍຕ້ອງຮັບຮູ້ນຳກັນຢ່າງຈະແຈ້ງວ່າບົນເສັ້ນທາງແຫ່ງການກ້າວຂຶ້ນໃນຕໍ່ໜ້ານັ້ນ ແມ່ນເຕັມໄປດ້ວຍສິ່ງທ້າທາຍທົດສອບຢ່າງຂຽວຂາດ ແລະ ໃຫຍ່ຫລວງ. ສະນັ້ນເວລານີ້ຍິ່ງກວ່າເວລາໃດໝົດ, ມູນເຊື້ອ, ບົດຮຽນໃນການນໍາພາຂອງພັກເຮົາຕະຫລອດໄລຍະທີ່ຜ່ານມາຕ້ອງໄດ້ຮັບການເສີມຂະຫຍາຍຢ່າງແຂງແຮງ, ທົ່ວພັກ, ທົ່ວລັດ, ທົ່ວປວງຊົນເຮົາຕ້ອງເພີ່ມທະວີຄວາມສາມັກຄີເປັນປຶກແຜ່ນແໜ້ນໜາ, ພ້ອມທັງເສີມຂະຫຍາຍຈິດໃຈຮັກຊາດ, ຮັກລະບອບປະຊາທິປະໄຕປະຊາຊົນ, ເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໃຫ້ຫລາຍຂຶ້ນເທົ່າທີ່ຈະຫລາຍໄດ້, ກ່ອນອື່ນພວກເຮົາຕ້ອງຕັ້ງໜ້າສູ້ຊົນ ເຂົ້າຮ່ວມຂະບວນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ໃຫ້ປະກົດຜົນເປັນຈິງ.

ບັນດາສະຫາຍ ທີ່ຮັກແພງ!

ຢືນຕໍ່ໜ້າສະພາບການໃໝ່, ພັກເຮົາ ມີໜ້າທີ່ນໍາພາແບກຫາບພາລະກິດປະຕິວັດ, ສ້າງການຫັນປ່ຽນທີ່ແຂງແຮງ,ເລິກເຊິ່ງ ແລະ ຮອບດ້ານທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ ເຊິ່ງເນື້ອແທ້ ແມ່ນການສືບຕໍ່ຢຶດໝັ້ນ ແລະ ຜັນຂະຫຍາຍແນວທາງປ່ຽນແປງໃໝ່ຮອບດ້ານ ມີຫລັກການຂອງພັກ ເຂົ້າສູ່ລວງເລິກບົນພື້ນຖານເງື່ອນໄຂໃຫ້ແທດເໝາະກັບສະພາວະຄວາມເປັນຈິງ ຂອງປະເທດຊາດ ແລະ ສະພາບແວດລ້ອມສາກົນ ໃນເງື່ອນໄຂໃໝ່. ປີນີ້ ຖືເປັນປີທີ 35 ແຫ່ງການນໍາພາຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານ ມີຫລັກການຂອງພັກ, ສູນກາງພັກ ຈະໄດ້ທົບທວນ, ຕີລາຄາ ໝາກຜົນດັ່ງກ່າວ ຢ່າງພາວະວິໄສ ເພື່ອສືບຕໍ່ນໍາພາ ພາລະກິດປະຕິວັດ ປະເທດເຮົາກ້າວຂຶ້ນຢ່າງໜັກແໜ້ນ ຕໍ່ໄປ.

ເພື່ອສືບຕໍ່ປະຕິບັດແນວທາງປ່ຽນແປງໃໝ່ ໂດຍສະເພາະ ແມ່ນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ໃຫ້ເຂົ້າສູ່ຂະບວນການວຽກງານຕົວຈິງນັ້ນ ແມ່ນຄວາມຮັບຜິດຊອບໂດຍກົງ ຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ ເພື່ອນໍາພາຊີ້ນໍາຈັດຕັ້ງປະຕິບັດ ຢູ່ແຕ່ລະຂົງເຂດ, ຂະແໜງການ ແລະ ທ້ອງຖິ່ນ-ຮາກຖານ ໃຫ້ເກີດເປັນຈິງ, ຂ້າພະເຈົ້າຮຽກຮ້ອງມາຍັງທົ່ວພັກໃຫ້ເອົາໃຈໃສ່ ດັ່ງນີ້:

• ໜຶ່ງ: ຊີ້ນໍາການຈັດຕັ້ງເຊື່ອມຊຶມ, ສ້າງຄວາມຮັບຮູ້ເຂົ້າໃຈ, ກໍາແໜ້ນ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ໃຫ້ເລິກເຊິ່ງ, ຟົດຟື້ນ, ກວ້າງຂວາງ ທົ່ວເຖິງ ແລະ ຕໍ່ເນື່ອງ, ກາຍເປັນຂະບວນການທີ່ແຂງແຮງ ຂອງໝົດທົ່ວພັກ, ທົ່ວລັດ ແລະ ທົ່ວສັງຄົມ. ຄະນະພັກແຕ່ລະຂັ້ນ ເປັນເຈົ້າການ ແລະ ມີຄວາມຮັບຜິດຊອບໂດຍກົງໃນການນຳພາຊີ້ນຳເຊື່ອມຊຶມ ແລະ ຜັນຂະ ຫຍາຍມະຕິ XI ຂອງພັກ, ໃຫ້ຖືເປັນຂະບວນການວຽກງານສໍາຄັນບຸລິມະສິດຂອງຕົນໂດຍສະເພາະການຫັນເປັນແຜນງານ, ໂຄງການ, ແຜນປະຕິບັດງານທີ່ລະອຽດຈະແຈ້ງໃນແຕ່ລະຂະແໜງການ ແລະທ້ອງຖິ່ນໃຫ້ສອດຄ່ອງກັບສະພາວະຕົວຈິງຢູ່ແຕ່ລະບ່ອນ ແລະ ເຂົ້າສູ່ຊີວິດຕົວຈິງ, ອັນສໍາຄັນ ຕ້ອງສ້າງຄວາມເປັນເອກະພາບ ທາງດ້ານທັດສະນະ ແລະ ການກະທໍາຕົວຈິງ, ທັງສ້າງຄວາມຕັດສິນໃຈ ເພື່ອແກ້ໄຂບັນຫາຢ່າງຈິງຈັງ ແລະ ເດັດຂາດ, ສ້າງໃຫ້ໄດ້ພື້ນຖານອັນໜັກແໜ້ນໃນການແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ, ອຸປະສັກອັດຕັນການພັດທະນາ ແລະ ສິ່ງຫຍໍ້ທໍ້ຕ່າງໆ ແນໃສ່ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານໃນທົ່ວສັງຄົມ;
• ສອງ: ສືບຕໍ່ປັບປຸງລະບອບນໍາພາແບບແຜນເຮັດວຽກ ຂອງຄະນະພັກ, ອົງການປົກຄອງທຸກຂັ້ນ ເຂົ້າສູ່ລະບອບແບບແຜນຢ່າງເຂັ້ມງວດ ແລະ ຖືກຕ້ອງ ຕາມພາລະບົດບາດ, ສິດ, ໜ້າທີ່ ທີ່ໄດ້ກໍານົດໄວ້ໃນກົດລະບຽບພັກ ແລະ ກົດໝາຍ ແລະ ລະບຽບການ ຂອງລັດ, ທັງມີຫລັກວິທະຍາສາດ, ແທດຕົວຈິງ, ຈໍາກັດ ແລະ ແກ້ໄຂໃຫ້ໄດ້ແບບແຜນວິທີເຮັດວຽກແບບອາດຍາສິດ, ອຸ້ມວຽກ, ເຮັດວຽກບໍ່ມີແຜນການ, ຂາດຈຸດສຸມ, ບໍ່ມີການຕິດຕາມ, ກວດກາ, ສະຫລຸບຖອດຖອນບົດຮຽນ, ການຖອດຖອນບົດຮຽນຕ້ອງດຳເນີນເປັນແຕ່ລະວຽກ, ແຕ່ລະໄລຍະເວລາທີ່ແນ່ນອນ;
• ສາມ: ຄະນະພັກ, ສະມາຊິກພັກແຕ່ລະຂັ້ນ ຕ້ອງຍົກສູງຄວາມເປັນແບບຢ່າງນໍາໜ້າ ດ້ານມານະຈິດປະຕິວັດ, ຄຸນທາດການເມືອງ, ສ້າງຕົນເອງໃຫ້ເປັນຄົນມີລະບຽບວິໄນເຂັ້ມງວດ, ບຸກບືນສູ້ຊົນຜ່ານຜ່າຄວາມຫຍຸ້ງຍາກຕ່າງໆ, ມີຄວາມຮັບຜິດຊອບໃນການແກ້ໄຂພະຍາດຕ່າງໆພາຍໃນພັກ ເປັນຕົ້ນແມ່ນ ການເຊື່ອມຖອຍທາງດ້ານແບບແຜນດຳລົງຊີວິດ, ຕິດແສດແບບແຜນຫລີ້ນກິນຟຸມເຟືອຍ, ຊ່ວງເສັງກັນໄປໃນທາງທີ່ບໍ່ຖືກ, ສໍ້ລາດບັງຫລວງ, ສວຍໃຊ້ໜ້າທີ່ຕຳແໜ່ງ ເພື່ອຫາຜົນປະໂຫຍດສ່ວນຕົວ ທີ່ບໍ່ຖືກຕ້ອງ; ຕ້ອງປັບປຸງຕົນເອງ ໃຫ້ເປັນຜູ້ປອດໃສຂາວສະອາດ, ໃຊ້ຈ່າຍຢ່າງປະຢັດ, ສັດຊື່ບໍລິສຸດ, ຮັບໃຊ້ປະຊາຊົນ ແລະ ປະເທດຊາດ; ເຄື່ອນໄຫວນຳພາ ໃຫ້ຖືກຕາມກົດລະບຽບພັກ, ກົດໝາຍ ແລະ ລະບຽບການຂອງລັດຢ່າງເຂັ້ມງວດ; ອັນໃດກີດຂວາງ, ບໍ່ສອດຄ່ອງກັບຜົນປະໂຫຍດຂອງປະຊາຊົນ ຕ້ອງໄດ້ຕ້ານ-ສະກັດກັ້ນ, ກຳຈັດປັດເປົ່າອອກຈາກການເຄື່ອນໄຫວນຳພາຂອງພັກ ແລະ ການຄຸ້ມຄອງ ຂອງລັດເຮົາ, ພະນັກງານຂອງພັກ, ສະມາຊິກພັກຕ້ອງໃຫ້ເປັນຜູ້ຮັບໃຊ້ປະຊາຊົນຢ່າງບໍລິສຸດພຸດຜ່ອງແທ້;
• ສີ່: ເຄົາລົບສິດ, ຜົນປະໂຫຍດອັນຊອບທໍາ ຂອງປະຊາຊົນ, ຄວາມມຸ່ງມາດປາຖະໜາ ຂອງປະຊາຊົນບັນດາເຜົ່າ; ພັກເຮົາບໍໍ່ມີຜົນປະໂຫຍດອັນໃດ ນອກເໜືອຈາກຜົນປະໂຫຍດຂອງປະເທດຊາດ ແລະ ຂອງປະຊາຊົນ. ດັ່ງນັ້ນ, ຄະນະພັກແຕ່ລະຂັ້ນ, ສະມາຊິກພັກທຸກສະຫາຍ ຕ້ອງເສີມຂະຫຍາຍມູນເຊື້ອຂອງພັກເຮົາ, ຢຶດໝັ້ນການເດີນຕາມແນວທາງມະຫາຊົນ, ເອົາປະຊາຊົນເປັນກົກ“ເອົາຊົນນະບົດເປັນເປົ້າໝາຍໃນການພັດທະນາເພື່ອແກ້ໄຂຄວາມທຸກຍາກຂອງປະຊາຊົນ”.
• ຫ້າ: ເດັດດ່ຽວແກ້ໄຂຈຸດອ່ອນ, ຂໍ້ຄົງຄ້າງ ພາຍໃນພັກ, ຮັບປະກັນບົດບາດການເຄື່ອນໄຫວນຳພາຕົວຈິງ ທີ່ເຂັ້ມແຂງຂອງການຈັດຕັ້ງທຸກຂັ້ນ; ສືບຕໍ່ປັບປຸງ, ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ; ຮັບປະກັນລັກສະນະຊົນຊັ້ນ ຂອງກໍາມະກອນ, ຊາວຜູ້ອອກແຮງງານ, ລັກສະນະນໍາໜ້າ ແລະ ລັກສະນະຕໍ່ສູ້ ແນໃສ່ຍົກສູງຄວາມສາມາດນໍາພາຂອງຄະນະພັກ ໃຫ້ສົມຖານະເປັນແກນນໍາໃນລະບົບການເມືອງ ຢູ່ແຕ່ລະຂັ້ນ, ກ່ອນອື່ນໝົດ ແມ່ນຕ້ອງຍົກສູງຄວາມສາມາດໃນການນໍາພາຊີ້ນໍາຈັດຕັ້ງປະຕິບັດ ມະຕິກອງປະຊຸມໃຫຍ່ຄັ້ງທີ XI ຂອງພັກໃຫ້ປະກົດຜົນຕົວຈິງ;
• ຫົກ: ໃຫ້ຄະນະພັກແຕ່ລະຂັ້ນ ສືບຕໍ່ເອົາໃຈໃສ່ນໍາພາຊີ້ນໍາ ແລະ ດໍາເນີນມາດຕະການທີ່ຮັດກຸມກວ່າເກົ່າ, ເຂັ້ມງວດກວ່າເກົ່າ ໃນການສະກັດກັ້ນ, ຕ້ານ, ປ້ອງກັນ ແລະ ແກ້ໄຂບັນຫາພະຍາດໂຄວິດ-19; ພ້ອມນັ້ນ ໃນເງື່ອນໄຂໂຄວິດ-19 ຕ້ອງເພີ່ມທະວີສ້າງການຫັນປ່ຽນໃໝ່ຍິ່ງກວ່າເວລາໃດໝົດ ຕາມວິຖີດໍາລົງຊີວິດແບບໃໝ່, ນໍາພາສ້າງຄ່ານິຍົມທີ່ຖືກຕ້ອງໃນສັງຄົມລາວ, ສົ່ງເສີມຜູ້ມີຫົວຄິດປະດິດສ້າງໃໝ່, ສະດຸ້ງໄວ ແລະ ກ້າຫານໃນການສ້າງສາພັດທະນາ ເພື່ອແກ້ໄຂບັນຫາຢ່າງຖືກຕ້ອງ, ສອດ ຄ່ອງ ແລະ ກ້າວຂຶ້ນຢ່າງບໍ່ຢຸດຢັ້ງ.

ພີ່ນ້ອງຮ່ວມຊາດທີ່ຮັກແພງ ແລະ ບັນດາສະຫາຍສະມາຊິກພັກທຸກຖ້ວນໜ້າ !

ວັນທີ 22 ມີນາ2021 ພໍດີກັບວັນສ້າງຕັ້ງພັກປະຊາຊົນປະຕິວັດລາວເຮົານັ້ນ, ກອງປະຊຸມຄັ້ງປະຖົມມະເລິິກຂອງສະພາແຫ່ງຊາດຊຸດທີ IX ກໍ່ຈະໄຂຂຶ້ນພໍດີ ຊິ່ງເປັນເຫດການທີ່ສຳຄັນອີກຄັ້ງໜຶ່ງຂອງປະຫວັດສາດຂອງລັດປະຊາທິປະໄຕ ຂອງພວກເຮົາທັງເປັນເຫດການສຳຄັນໜຶ່ງ ເພື່ອຫັນເອົາມະຕິ XI ຂອງພັກເຮົາໃຫ້ເຂົ້າສູ່ການປະຕິບັດຕົວຈິງ, ຂ້າພະເຈົ້າຂໍອວຍພອນໄຊອັນປະເສີດໃຫ້ແກ່ກອງປະຊຸມຄັ້ງປະຖົມມະເລິກຂອງສະພາແຫ່ງຊາດ ຈົ່ງດຳເນີນໄປດ້ວຍຄວາມສຳເລັດ ຢ່າງສະຫງ່າງາມ, ພ້ອມກັນນັ້ນຂໍຮຽກຮ້ອງມາຍັງປະຊາຊົນລາວບັນດາເຜົ່າ ຈົ່ງອອກແຮງເສີມຂະຫຍາຍມູນເຊື້ອຮັກຊາດ, ຮັກລະບອບປະຊາທິປະໄຕປະຊາຊົນ, ປະຕິບັດສິດເປັນເຈົ້າປະເທດຊາດຢ່າງແຂງແຮງ, ເປັນເຈົ້າການຕິດຕາມ, ກວດກາການເຄື່ອນໄຫວຂອງການຈັດຕັ້ງພັກ, ຂອງສະມາຊິກພັກ, ພະນັກງານຢ່າງເປັນປົກກະຕິ; ຊ່ວຍເຫລືອປັບປຸງ, ກໍ່ສ້າງພັກເສີມຂະຫຍາຍຈຸດດີ, ແກ້ໄຂຈຸດອ່ອນແລະຂໍ້ຂາດຕົກບົກພ່ອງຕ່າງໆ ເພື່ອສ້າງການຫັນປ່ຽນທີ່ຈະແຈ້ງ, ແຂງແຮງ, ເລິກເຊິ່ງ ແລະ ຮອບດ້ານໃນທົ່ວສັງຄົມເຮົາ.

ພີ່ນ້ອງຮ່ວມຊາດ, ບັນດາສະຫາຍສະມາຊິກພັກທີ່ຮັກແພງທັງຫລາຍ!

ພວກເຮົາມີຄວາມເຊື່ອໝັ້ນຢ່າງໜັກແໜ້ນວ່າ ໜ້າປະຫວັດສາດຍຸກໃໝ່ຂອງຊາດລາວທີ່ຖືກສ້າງຂຶ້ນດ້ວຍການເສຍສະຫລະອັນໃຫຍ່ຫລວງ ແລະ ເຕັມໄປດ້ວຍວິລະກໍາອັນອົງອາດກ້າແກ່ນເຊິ່ງປະຊາ ຊົນລາວທັງຊາດ ມີຄວາມເອກອ້າງທະນົງໃຈນັ້ນ ຈະໄດ້ຮັບການສືບຕໍ່ເສີມຂະຫຍາຍ ແລະ ຍົກລະດັບຢ່າງບໍ່ຢຸດຢັ້ງ ດ້ວຍຄວາມຈົ່ງຮັກພັກດີຂອງສະມາຊິກພັກ, ພະນັກງານແລະປວງຊົນທັງຊາດ.

ທົ່ວພັກ, ທົ່ວລັດ ແລະ ທົ່ວປວງຊົນລາວ ຈົ່ງໄດ້ເສີມຂະຫຍາຍມູນເຊື້ອອັນສະຫງ່າອົງອາດ ຂອງພັກ ເຂົ້າສູ່ລວງເລິກ, ຮ່ວມແຮງຮ່ວມໃຈກັນ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XIຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ໃນປີເລີ່ມຕົ້ນນີ້ ໃຫ້ໄດ້ຕາມລະດັບຄາດໝາຍທີ່ວາງໄວ້, ປະກອບສ່ວນສໍາຄັນໃນການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລຂຶ້ນໄປເລື້ອຍໆ.

ພັກປະຊາຊົນປະຕິວັດລາວທີ່ມີກຽດສະຫງ່າໝັ້ນຍືນ!

ໃນວັນທີ 18 ມີນາ 2021, ທີ່ໂຮງຮຽນສິລະປະແຫ່ງຊາດ ນະຄອນຫລວງວຽງຈັນ ກົມສິລະປະການສະແດງ ຖະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ(ຖວທ) ໄດ້ຈັດກອງປະຊຸມວິຊາການ ເພື່ອຄວາມເປັນເອກະພາບຮັບຮອງເອົາທ່າຟ້ອນລຳວົງລາວ ເຂົ້າເປັນມໍລະດົກໂລກ ຊຶ່ງບົດຟ້ອນທີ່ນຳມາປຶກສາຫາລືຄັ້ງນີ້ ປະກອບມີລາຍການເພງ ແລະ ຂັບ-ລຳ ປະກອບທ່າຟ້ອນລຳວົງລາວ ມີທັງໝົດ 18 ລາຍການ. ໂດຍການເຂົ້າຮ່ວມຂອງທ່ານ ບົວເງິນ ຊາພູວົງ ສິລະປິນແຫ່ງຊາດ, ຮອງລັດຖະມົນຕີ ກະຊວງ ຖວທ ທັງເປັນຜູ້ຊີ້ນຳວຽກງານວັດທະນະທຳ, ມີບັນດາສິລະປິນດີເດັ່ນ, ສິລະປິນແຫ່ງຊາດ, ຄູ-ອາຈານ, ພະນັກງານ-ວິຊາການອ້ອມຂ້າງສິລະປະການສະແດງ, ຈາກກອງສິລະປະກອນກອງທັບ-ປກສ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານ ຄຳພັນ ໂພທອງສີ ວ່າການຫົວໜ້າກົມ ສິລະປະການສະແດງ ໄດ້ກ່າວວ່າ: ຈຸດປະສົງພວກເຮົາມາເຕົ້າໂຮມກັນຄັ້ງນີ້ ເພື່ອມາເປັນການປຶກສາຫາລື ແລະ ເປັນເອກະພາບກັນ ກ່ຽວກັບທ່າຟ້ອນລໍາວົງລາວ ທີ່ເປັນທ່າຟ້ອນ ມີລັກສະນະຊາດ, ລັກສະນະກ້າວໜ້າ ແລະ ລັກສະນະມະຫາຊົນ ຊຶ່ງປະຊາຊົນລາວທັງຊາດພວກເຮົາ ໄດ້ນໍາມາໃຊ້ໃນການຄົບງັນ ລື້ນເລີງ ມ່ວນຊື່ນໃນງານບຸນຕ່າງໆ ທີ່ໄດ້ສືບທອດກັນມາແຕ່ດົນນານ.

ໃນກອງປະຊຸມ ຍັງໄດ້ປຶກສາຫາລືເປັນເອກະພາບ ຮັບຮອງເອົາທ່າຟ້ອນລໍາວົງລາວ ເພື່ອສະເໜີໃຫ້ອົງການ ອຸຍເນັສໂກ (UNESCO) ຮັບຮອງເຂົ້າເປັນມໍລະດົກໂລກ ແລະ ພ້ອມດຽວກັນນີ້ ພວກເຮົາກໍຍັງຈະໄດ້ນໍາເອົາທ່າຟ້ອນລໍາວົງລາວ ທີ່ພວກເຮົາຈະໄດ້ເປັນ ເອກະພາບກັນໃນກອງປະຊຸມຄັ້ງນີ້ ໄປຜັນຂະຫຍາຍ ແລະ ຮັບໃຊ້ສັງຄົມ ບໍ່ວ່າຢູ່ທາງພາກລັດ ກໍຄືພາກເອກະຊົນ ທັງພາຍໃນ ແລະ ຕ່າງປະເທດ ຢູ່ໃນບັນດາຫ້າງຮ້ານ ແລະ ສະຖານທີ່ບັນເທີງຕ່າງໆ ໃຫ້ມີຄວາມເບີກ ບານມ່ວນຊື່ນ ທາງດ້ານການສະແດງສິລະປະວັນນະຄະດີ.

ໃນກອງປະຊຸມ ບັນດາຄູອາຈານ ກໍຄືນັກວິຊາການທີ່ເຂົ້າຮ່ວມ ໄດ້ສຸມໃສ່ປະກອບຄໍາຄິດຄໍາເຫັນເຂົ້າ ໃສ່ທ່າບົດຟ້ອນ ແຕ່ລະບົດໃຫ້ມີປະສິດຕິພາບປະສິດຕິຜົນຢ່າງແທ້ຈິງ ຊຶ່ງລາຍການເພງ ແລະ ຂັບ-ລຳ ທັງ 18 ລາຍການ(ແບບຟ້ອນ) ມີຄື: ຟ້ອນລຳວົງທ່າເຊີນຊວນ, ລໍາຄອນສະຫວັນ, ລໍາສີພັນດອນ, ລໍາມະຫາໄຊ, ລໍາຕັ່ງຫວາຍ, ລໍາສາລະວັນ, ລໍາຜູ້ໄທ, ຂັບທຸ້ມຫລວງພະບາງ, ຂັບຊໍາເໜືອ, ຂັບເມີ້ຍ, ຂັບງື່ມ, ຂັບຊຽງຂວາງ, ຈັງຫວະສະຫລົບ, ຈັງຫວະສະລັບຟັນປາ, ຈັງຫວະຣິມໂບຣ໋ອກ, ຈັງຫວະເພງສາວຊຽງຂວາງທັງງາມທັງເກັ່ງ, ຈັງຫວະສ້ອນກຸ້ງ ແລະ ຈັງຫວະຟ້ອນໃສ່ເພງປາຄໍ່ໃຫຍ່.

ຂ່າວ ສົມຫວັງ
ພາບ ອ່າຍຄໍ່າ