ງານບຸນແຫ່ທຸງປະຈຳຊາດ ຂອງບັນດາປະເທດໃນໂລກຄັ້ງທີ 17 ປະຈຳປີ 2022

ງານບຸນແຫ່ທຸງປະຈຳຊາດ ບັນດາປະເທດໃນໂລກຄັ້ງທີ 17 ປະຈຳປີ 2022 ງານບຸນແຫ່ທຸງປະຈຈຳຊາດບັນດາປະເທດໃນໂລກຄັ້ງທີ 17 ປະຈຳປີ 2022 ຫລືເອີ້ນເປັນພາສາຝຮັ່ງ ລາເຟດເຕີເດບານແຍກດູຍມົງເດີ (la Fête des bannières du monde ) ທີ່ ເມືອງລີຢົງ, ປະເທດຝຮັ່ງໄດ້ຈັດຂື້ນໃນວັນທີ 17 ກັນຍາ, ສຳລັບປີນີ້ມີ 29 ປະເທດເຂົ້າຮ່ວມຄື້: ເບຣຊີນ, ອາມາຊອນ, ກຸຍບາ, ເວເນຊູເອລາ, ໂບລີເວຍ, ເປລູ, ເມັກຊີກໂກ, ກົວເດີລຸກ, ໂປລີເນເນຊີ, ມາລີ, ມາດາກັດກາ, ຝຮັ່ງ, ອູ​ແກ​ຣນ, ສາທາລະນະລັດເບລາລຸດ, ຣູ​ມາ​ນີ, ໂມນດາວີ, ບຸນກາລີ, ໂປໂລຍ, ຊີລີ, ຍີ່ປຸ່ນ, ຟີລີບປີນ, ອິນໂດເນເຊຍ, ຫວຽດນາມ, ກຳປູເຈ້ຍ, ລາວ, ໄທ, ອີນເດຍ ແລະ ຈີນ.ໃນປີທີ່ຜ່ານມາໄດ້ມີການຈັດບຸນກົງສຸນແລກປະສົມກັບບຸນແຫ່ງທຸງປະຈຳຊາດ.

ແຕ່ສຳລັບປີນີ້ຈັດງານກົງສຸນແລກຕ່າງຫາກ, ສຳລັບງານບຸນແຫ່ທຸງປະຈຳຊາດບັນດາປະເທດໃນໂລກນີ້ ເພື່ອໃຫ້ແຕ່ລະປະເທດທີ່ເຂົ້າຮ່ວມໄດ້ສະແດງວັດທະນະທຳ, ຮີດຄອງປະເພນີຂອງແຕ່ລະປະເທດ ແລະ ເດີນຂະບວນແຫ່ທຸງຊາດພ້ອມດ້ວຍສຽງຮ້ອງເພງເຕັ້ນລຳເປັນເອກະລັກຂອງແຕ່ລະປະເທດ.ສຳລັບປີນີ້ຂະບວນແຫ່ທຸງຊາດຂອງປະເທດລາວນຳໂດຍ ທ່ານ ໂອສະກະ ລາດຊະພົນ, ທີ່ປືກສາທູດແຫ່ງ ສປປ ລາວປະຈຳປະເທດຝຮັ່ງ, ທ່ານ ຈູມຄຳ ຫລວງວັນ, ກຳມະການສູນກາງ ແນວລາວສ້າງຊາດທີ່ປະເທດຝຮັ່ງ ແລະ ປະທານຄົນລາວທີ່ປະເທດຝຮັ່ງ, ພ້ອມດ້ວຍຄົນລາວທີ່ອາໃສຢູ່ປະເທດຝຮັ່ງເປັນຈຳນວນຫຼວງຫຼາຍ.

ສຳລັບການແຫ່ທຸງຊາດລາວເຮົານີ້ແມ່ນຄວາມພາກພູມໃຈຂອງຄົນລາວທັງປະເທດທີ່ທຸງຊາດ​ລາວໂບກສະບັດປິວໄປທົ່ວເມືອງລີຢົງ ແລະ ເຜີຍແຜ່ຮີດຄອງປະເພນີວັດທະນະທຳອັນດີງາມຂອງຊາດເຊັ່ນ ຜູ້ຊາຍໃສ່ເສື້ອໄໝ, ຜູ່ຍິງໃສ່ສິ້ນໄໝ, ເກົ້າຜົມບ່ຽງແພ ແລະ ຂັບລຳຮ້ອງເພງລາວ, ຟ້ອນລຳວົງ ທີ່ເຕັມໄປດ້ວຍບັນຍາກາດທີ່ຄຶກຄື້ນມ່ວນຊື່ນ ແລະ ໄດ້ຮັບຄວາມສົນໃຈຈາກຊາວຕ່າງຊາດເປັນຈຳນວນຫລວງຫລາຍ.

ແຫຼ່ງຂ່າວ: ປະຊາຊົນ

ເຈົ້າໜ້າທີ່ຖະແຫຼງ ການດຳເນີນຄະດີ ນາງ ພອນທິບ ພ້ອມພັກພວກ ສໍ້ໂກງເງິນຫຼາຍພັນຕື້ກີບ

ວັນທີ 19 ກັນຍາ 2022, ກົມຕໍາຫຼວດເສດຖະກິດ ກົມໃຫຍ່ຕໍາຫຼວດ ກະຊວງ ປກສ ໄດ້ຖະແຫຼງຂ່າວຄວາມຄືບໜ້າ ຄະດີ ນາງ ພອນທິບ ພ້ອມພັກພວກ ລວມທັງໝົດ 7 ຄົນ ທີ່ມີການເຄື່ອນໄຫວສໍ້ໂກງເງິນ ປະຊາຊົນໃນຂອບທົ່ວປະເທດ ມີຜູ້ເສຍຫາຍຫຼາຍກວ່າ 1.600 ຄົນ ແລະ ມີຜົນເສຍຫາຍເປັນເງິນຫຼາຍພັນຕື້ກີບ. ພັອ ບຸນອ້ອມ ໄຊຍະວົງ ຫົວໜ້າກົມຕໍາຫຼວດເສດຖະກິດ ຖະແຫຼງວ່າ: ຜ່ານການ ສອບສວນ ນາງ ພອນທິບ ອາຍຸ 30 ປີ ແລະ ທ້າວ ອານຸສິດ ອາຍຸ 34 ປີ (ຜົວ-ເມຍ) ທັງສອງຢູ່ບ້ານ ຫົວຂົວ ເມືອງໄຊເສດຖາ ນະຄອນຫຼວງວຽງຈັນ ຮັບສາລະພາບວ່າ: ໄດ້ມີການໂຄສະນາ ແລະ ເຄື່ອນໄຫວສໍ້ໂກງຊັບແທ້; ປັດຈຸບັນມີຜູ້ເສຍຫາຍເຂົ້າມາແຈ້ງຄວາມຕໍ່ເຈົ້າໜ້າທີ່ທັງໝົດ 1.680 ຄົນ, ລວມມູນຄ່າເສຍຫາຍເປັນເງິນກີບທັງໝົດ 355.035.418 ຕື້ກີບ, ເງິນບາດ 305.106.537 ບາດ, ເງິນໂດລາ 7.811.665 ໂດລາ; ມາເຖິງປັດຈຸບັນ, ເຈົ້າໜ້າທີ່ຕໍາຫຼວດ ໄດ້ຢຶດ ແລະ ອາຍັດຊັບສິນທີ່ໄດ້ຈາກການກະທໍາຜິດ ເປັນຕົ້ນແມ່ນ: ເຮືອນ, ລົດ, ທີ່ດິນ ແລະ ເຄື່ອງປະດັບຄ້າຍຄືເພັດ ຈໍານວນຫຼາຍລາຍການ; ນອກຈາກນີ້, ເຈົ້າໜ້າທີ່ຍັງສາມາດຈັບພັກພວກຮ່ວມຂະບວນການດຽວກັນມາດໍາເນີນຄະດີໄດ້ເພີ່ມອີກ 5 ຄົນຄື: ນາງ ສຸພິນທາ ອາຍຸ 28 ປີ ຢູ່ບ້ານຫວຍຫົງ ເມືອງຈັນທະບູລີ, ນາງ ສຸພາວັນ ອາຍຸ 27 ປີ ຢູ່ບ້ານດົງໂພນເລົາ ເມືອງຫາດຊາຍຟອງ, ທ້າວ ສົມພິດ ອາຍຸ 26 ປີ ແລະ ນາງ ໄຂ່ມຸກ ທັງສອງພັກເຊົາຢູ່ບ້ານໂພນຕ້ອງສະຫວາດ ເມືອງຈັນທະບູລີ, ນາງ ມີນາ ອາຍຸ 33 ປີ ຢູ່ບ້ານໜອງດ້ວງທົ່ງ ເມືອງ ສີໂຄດຕະບອງ ນະຄອນຫຼວງວຽງຈັນ.

ທ່ານ ຫົວໜ້າກົມຕໍາຫຼວດເສດຖະກິດ ກ່າວຕື່ມວ່າ: ຄະດີດັ່ງກ່າວນີ້, ໃນເບື້ອງຕົ້ນ ກົມຕໍາຫຼວດເສດຖະກິດ ໄດ້ຮັບແຈ້ງຄວາມຈາກຜູ້ຖືກເສຍຫາຍຈໍານວນໜຶ່ງ ວ່າ ນາງ ພອນທິບ ໄດ້ສໍ້ໂກງຊັບຂອງພວກກ່ຽວ ແລ້ວເອົາຕົວລົບໜີອອກຈາກລາວໄປປະເທດໄທໃນວັນທີ 29 ມິຖຸນາ 2022; ຈາກນັ້ນ, ກົມຕໍາຫຼວດເສດຖະກິດ ໄດ້ປະສານສົມທົບກັບເຈົ້າໜ້າທີ່ຕໍາຫຼວດໄທ ຊ່ວຍຕິດຕາມ ແລະ ຈັບຕົວຜູ້ກ່ຽວ; ຈົນມາຮອດວັນທີ 29 ກໍລະກົດ ຈຶ່ງສາມາດຈັບຕົວ ນາງ ພອນທິບ ແລະ ທ້າວ ອານຸສິດ (ຜົວ) ໄດ້ ແລະ ມອບໃຫ້ເຈົ້າໜ້າທີ່ຕໍາຫຼວດລາວ ໃນວັນທີ 31 ກໍລະກົດມາດໍາເນີນຄະດີ. ໃນໄລຍະປີ 2021 ນາງ ພອນທິບ ໄດ້ມີການໂຄສະນາຜ່ານສື່ອອນລາຍ (ເຟດບຸກ ຊື່ວ່າ ເຈ້ທິບ ພຸດທະວົງ ດ້ວຍຮູບການແອບອ້າງເປັນແມ່ຫວຍ ດ້ວຍການລະດົມເງິນມາລົງທຶນນໍາຜູ້ກ່ຽວໂດຍໃຫ້ດອກສູງກວ່າທະນາຄານ 30% ຕໍ່ເດືອນ ແລະ ຝາກເບື້ອງຕົ້ນຂັ້ນຕໍ່າ 30 ລ້ານກີບຂຶ້ນໄປ, ຖ້າບຸກຄົນໄດສົນໃຈແມ່ນໃຫ້ໂອນເຂົ້າບັນຊີຂອງ ນາງ ພອນທິບ ມີທັງໝົດ 3 ບັນຊີເງິນຄື: ເງິນກີບ, ເງິນບາດ ແລະ ເງິນໂດລາ ໂດຍອອກຊື່ ລາຢາ ຂາຍເພັດພອຍວັດຖຸມີຄ່າ; ຫຼັງຈາກນັ້ນມີຄົນຈໍານວນຫຼາຍທີ່ເຂົ້າຫວຍ ແລະ ໂອນເງິນເຂົ້າບັນຊີ, ພາຍຫຼັງມີຄົນມາເຂົ້າຫວຍໃນເບື້ອງຕົ້ນນາງ ພອນທິບ ໄດ້ໂອນເງິນດອກໃຫ້ແກ່ລູກຫວຍໂດຍເອົາເງິນຕົ້ນທຶນທີ່ຜູ້ຄົນນໍາມາເຂົ້າຫວຍໂອນໃຫ້; ຕໍ່ມາບໍ່ມີຄົນມາເຂົ້າຫວຍ ຈິງບໍ່ສາມາດຈ່າຍດອກໃຫ້ລູກຫວຍໄດ້; ມາຮອດຊ່ວງເດືອນ ພຶດສະພາ ລູກຫວຍ ຈໍານວນໜຶ່ງໄດ້ໄປຂໍຖອນເງິນທຶນຄືນ ແຕ່ຜູ້ກ່ຽວບໍ່ສາມາດຈ່າຍເງິນໃຫ້ແກ່ລູກຫວຍ ພ້ອມທັງເອົາຕົວລົບໜີອກຈາກປະເທດ.

ແຫຼ່ງຂ່າວ: ໜັງສືພິມຄວາມສະຫງົບ

ເຈົ້າໜ້າທີ່ກອງບັນຊາການ ປກສ ແຂວງວຽງຈັນ ມອບລົດຈັກຄືນໃຫ້ເຈົ້າຂອງເດີມ.

ໃນວັນທີ 1-7 ກັນຍາ 2022 ຜ່ານມານີ້, ເຈົ້າໜ້າທີ່ກອງບັນຊາການ ປກສ ແຂວງວຽງຈັນ ​ໄດ້ມອບລົດຈັກທີ່ຄົນບໍ່ດີລັກໄປຄືນໃຫ້ເຈົ້າຂອງເດີມ ລົດທີ່ນຳມາມອບຄັ້ງນີ້ມີ ຈໍານວນ 6 ຄັນ ທີ່ຄົນບໍ່ດີລັກໄປໃນຕົ້ນປີ 2022 ຜ່ານມາ ເຈົ້າໜ້າທີ່ສາມາດຮິບໂຮມ ແລະ ເກັບກູ້ຄືນມາໄດ້ ແລ້ວໄດ້ມອບຄືນໃຫ້ເຈົ້າຂອງເດີມ.

ຕາງໜ້າມອບ​ໂດຍ​ແມ່ນເຈົ້າໜ້າທີ່ກອງບັນຊາການ ປກສ ແຂວງ ຕາງໜ້າຮັບ​ໂດຍ​ແມ່ນເຈົ້າຂອງຊັບ ໂດຍຊ່ອງ​ໜ້າ​ພະນັກງານ​ ແລະ ເຈົ້າຂອງຊັບເຂົ້າຮ່ວມເປັນສັກຂີພະຍານ.

ເຈົ້າໜ້າທີ່ວິຊາສະເພາະກອງບັນຊາການ ປກສ ແຂວງຍັງໄດ້ຮຽກຮ້ອງໃຫ້ປະຊາຊົນບັນດາເຜົ່າ, ທະຫານ, ຕຳຫຼວດ, ພໍ່ຄ້າແມ່ຄ້າ ແລະ ອຶ່ນໆ ຈົ່ງມີສະຕີຮັກສາເຄື່ອງຂອງມີຄ່າໄວ້ໃຫ້ດີເພື່ອບໍ່ໃຫ້ກຸ່ມຄົນບໍ່ດີສວຍໂອກາດລັກຊັບສິນຂອງພວກທ່ານ ແລະ ຊ່ວຍເປັນຫູເປັນຕາໃຫ້ເຈົ້າໜ້າທີ່ຕຳຫຼວດໃນການສະກັດກັ້ນ-ຕ້ານປະກົດການຫຍໍ້ທໍ້ທີ່ອາດຈະສ້າງຄວາມບໍ່ສະຫງົບໃນສັງຄົມ.

ພາບ-ຂ່າວ: ປກສ ແຂວງວຽງຈັນ

ເປີດໂຄງການລຶບລ້າງພະຍາດແກ່ນຕາຂຸ້ນໃນ ສປປ ລາວ

ໃນວັນທີ 16 ກັນຍາ 2022 ນີ້, ຢູ່ນະຄອນຫລວງວຽງຈັນ ໄດ້ມີພິທີເປີດໂຄງການລຶບລ້າງພະຍາດແກ່ນຕາຂຸ້ນໃນ ສປປ ລາວ ໂດຍການຊ່ວຍເຫຼືອ ຈາກມູນນິທິກອງທຶນຊ່ວຍເຫຼືອເຊິ່ງກັນ ແລະ ກັນ (GX FOUNDATION) ຂອງລັດຖະບານ ສປ ຈີນ ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ຫລຽງ ເຈິນ ຢິ່ງ (Leung Chun-ying) ຮອງປະທານສະພາທີ່ປຶກສາການເມືອງ ແຫ່ງ ສປ ຈີນ ປະທານ GX FOUNDATION, ທ່ານ ຈ່ຽງ ຈ່າຍຕົ່ງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປປ ລາວ, ມີພາກສ່ວນກ່ຽວຂ້ອງ ຝ່າຍຈີນ ແລະ ລາວ ເຂົ້າຮ່ວມ. ທ່ານ ສອນໄຊ ສີພັນດອນ ໄດ້ກ່າວວ່າ:

ໂຄງການລຶບລ້າງພະຍາດແກ່ນຕາຂຸ້ນ ໃນ ສປປ ລາວ ໂດຍການຊ່ວຍເຫຼືອຈາກ ມູນນິທິຊ່ວຍເຫຼືອເຊິ່ງກັນ ແລະ ກັນ ເພື່ອຊ່ວຍປະຊາຊົນລາວ ຜູ້ທີ່ເປັນພະຍາດແກ່ນຕາຂຸ້ນໃຫ້ໝົດໄປຈາກ ສປປ ລາວ ດ້ວຍທີມຊ່ວຍແພດຜູ້ຊ່ຽວຊານຈາກ ສປ ຈີນ, ພ້ອມດ້ວຍເຄື່ອງມື, ລົດຜ່າຕັດເຄື່ອນທີ່ ທີ່ທັນສະໄໝ ຊຶ່ງເປັນການຊ່ວຍເຫຼືອອັນລໍ້າຄ່າ ແລະ ຖືໄດ້ວ່າເປັນການໃຫ້ໂອກາດ ແລະ ອະນາຄົດອັນສົດໃສໃໝ່ ໃນການເບິ່ງເຫັນຂອງຜູ້ທີ່ມີບັນຫາດ້ານສາຍຕາ.

ພ້ອມນີ້, ທ່ານຍັງໄດ້ ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈເປັນຢ່າງສູງ ໄປຍັງພັກ, ລັດຖະບານ ແລະ ປະຊາຊົນ ສປ ຈີນ ໂດຍສະເພາະແມ່ນ ທ່ານປະທານ GX FOUNDATION ພ້ອມດ້ວຍຄະນະ, ທີ່ມີຄວາມເປັນຫ່ວງເປັນໃຍ ແລະ ໃຫ້ການຊ່ວຍເຫຼືອໃນຄັ້ງນີ້, ເປັນການສະແດງເຖິງນໍ້າໃຈເອື້ອເຝື້ອເຜື່ອແຜ່ ຂອງລັດຖະບານ ແລະ ປະຊາຊົນຈີນ ກໍຄື ອຳນາດການປົກຄອງເຂດປົກຄອງພິເສດຮົງກົງ ໂດຍສະເພາະແມ່ນ GX FOUNDATION ແລະ ທັງເປັນການສະແດງເຖິງ ການເປັນເພື່ອນມິດສະຫາຍ ອ້າຍນ້ອງ ທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4 ດີ ແລະ ເປັນຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ໃຫ້ນັບມື້ ນັບໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກ ໂດຍສະເພາະແມ່ນການເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ເຂດປົກຄອງພິເສດຮົງກົງ ໃຫ້ແໜ້ນແຟ້ນຍິ່ງໆຂຶ້ນໃນທຸກໆດ້ານ.

ປະຊາຊົນລາວ ຜູ້ທີ່ມີພະຍາດແກ່ນຕາຂຸ້ນທີ່ໄດ້ຮັບການຜ່າຕັດດີແລ້ວ ຈະມີຊີວິດທີ່ດີຂຶ້ນ, ຈະເປັນການປະກອບສ່ວນອັນສຳຄັນ ເຂົ້າໃນການລຶບລ້າງພະຍາດແກ່ນຕາຂຸ້ນ ກໍຄືວຽກງານສາທາລະນະສຸກຂອງ ສປປ ລາວ ເພື່ອບັນລຸເປົ້າໝາຍໃນການປັບປຸງຄຸນນະພາບຊີວິດຂອງປະຊາຊົນລາວອີກຂັ້ນໜຶ່ງ ແລະ ກໍເປັນເປົ້າໝາຍຂອງ ພັກ, ລັດຖະບານລາວໃນການສ້າງສາພັດທະນາປະເທດຊາດແບບຢືນຍົງ ແລະ ພ້ອມກັນຜ່ານຜ່າຄວາມຫຍຸ້ງຍາກທາງດ້ານເສດຖະກິດ, ການເງິນ, ພະລັງງານ, ສາທາລະນະສຸກ ແລະ ອື່ນໆ

ແຫຼ່ງຂ່າວ: ຂປລ

ທ່ານ ບຸນຍັງ ວໍລະຈິດ ຕ້ອນຮັບ ລັດຖະມົນຕີກະຊວງປ້ອງກັນປະເທດຫວຽດນາມເຂົ້າຢ້ຽມຢາມ.

ໃນວັນທີ 15 ກັນຍາ 2022 ນີ້, ທ່ານ ບຸນຍັງ ວໍລະຈິດ ອະດີດປະທານປະເທດ ແຫ່ງ ສປປ ລາວ ໄດ້ຕ້ອນຮັບ ສະຫາຍ ພົນເອກ ຟານວັນຢາງ ກຳມະການກົມການເມືອງສູນກາງພັກກອມມູນິດຫວຽດນາມ, ລັດຖະມົນຕີກະຊວງປ້ອງກັນປະເທດຫວຽດນາມ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຢ່າງເປັນທາງການ.

ໂອກາດດັ່ງກ່າວ, ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ສປປ ລາວ ຂອງທ່ານ ພົນເອກ ຟານວັນຢາງ ພ້ອມດ້ວຍຄະນະ ເຊິ່ງເປັນການປະກອບສ່ວນອັນສຳຄັນເຂົ້າໃນການ ເສີມຂະຫຍາຍສາຍພົວພັນມິດຕະພາບ, ເຊິ່ງໃນພາມກາງທີ່ສອງພັກ, ສອງລັດ ແລະ ປະຊາຊົນສອງຊາດພວມສະເຫຼີມສະຫຼອງ 60 ປີ ແຫ່ງວັນ ສ້າງຕັ້ງການພົວພັນທາງການ ທູດ (5 ກັນຍາ 1962 – 5 ກັນຍາ 2022) ຄົບຮອບ 45 ປີ ວັນສົນ ທິສັນຍາມິດຕະພາບ ແລະ ການ ຮ່ວມມື ລາວ-ຫວຽດນາມ (18 ກໍລະກົດ 1977 – 18 ກໍລະກົດ 2022) ຢ່າງເປັນຂະບວນການພົດຟື້ນ.

ເຊິ່ງການເດີນທາງມາເຮັດໃນຄັ້ງນີ້ມັນໄດ້ສະແດງໃຫ້ເຫັນເຖິງ ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາ ຊົນສອງຊາດ ລາວ-ຫວຽດນາມເວົ້າລວມ, ເວົ້າສະເພາະແມ່ນການຮ່ວມຂອງສອງກອງທັບປະຊາຊົນ ລາວ-ຫວຽດນາມ ໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນລະກັນໃນອະນາຄົດ ແລະ ຍາວນານ.

ທ່ານ ພົນເອກ ຟານວັນຢາງ ໄດ້ກ່າວສະແດງຄວາມຂອບໃຈຢ່າງຈິງໃຈຕໍ່ ສະຫາຍ ບຸນຍັງ ວໍລະຈິດ ທີ່ໄດ້ໃຫ້ການຕ້ອນຮັບອັນສະໜິດສະໜົມ, ອັນອົບອຸ່ນ ແລະ ເຕັມໄປດ້ວຍໄມຕິຈິດມິດຕະພາບແບບ ດູດດື່ມ ແລະ ມີມູນເຊື້ອແບບພິເສດ ລາວ- ຫວຽດນາມ. ພ້ອມດຽວກັນນີ້ກໍ້ໄດ້ອວຍພອນໄຊອັນປະເສີດໃຫ້ ອະດີດປະທານປະເທດຈົ່ງມີສຸຂະພາບແຂງແຮງ ມີພາລາໄມ້ສົມບູນ ແລະ ຂໍເຊື້ອເຊີນສະຫາຍ ໄປຢ້ຽມຢາມ ແລະ ທ່ຽວຊົມ ຄວາມສວຍງາມທາງດ້ານວັດທະນະທຳ ແລະ ທຳມະຊາດຂອງ ສສ ຫວຽດນາມ.

ຂ່າວຍັງໃຫ້ຮູ້ຕຶ່ມອີກວ່າ: ໂອກາດດຽວກັນນີ້,ສະຫາຍ ຟານວັນຢາງ ລັດຖະມົນຕີກະຊວງປ້ອງກັນປະເທດຫວຽດນາມພ້ອມຄະນະ ຍັງໄດ້ເດີນທາງໄປຕິດຕາມກວດກາໂຄງການກໍ່ສ້າງໂຮງຮຽນວັດທະນະທຳຊົນເຜົ່າ ກອງທັບປະຊາຊົນລາວ ທີ່ກະຊວງປ້ອງກັນປະເທດຫວຽດນາມ ໃຫ້ການຊ່ວຍເຫຼືອ,ພ້ອມນີ້ກໍໄດ້ເດີນທາງໄປຢ້ຽມຢາມ ບໍລິສັດລັດວິສາຫະກິດສະຕາໂທລາຄົມຕື່ມອີກ.

ແຫຼ່ງຂ່າວ ແລະ ຮູບພາບ: Lao people’s Army News

ພິທີເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາສໍາຫຼວດຄວາມເປັນໄປໄດ້ ໃນການພັດທະນາໂຄງການໄຟຟ້າພະລັງງງານລົມ ຢູ່ເຂດຈຸດສຸມລາໂກ ເມືອງເຊໂປນ ແຂວງສະຫວັນນະເຂດ ໄດ້ຈັດຂຶ້ນໃນວັນທີ 9 ກັນຍາ 2022 ທີ່ກະຊວງແຜນການ ແລະ ການລົງທຶນ ໂດຍເປັນກຽດເຂົ້າຮ່ວມຕາງໜ້າລັດຖະບານຂອງທ່ານ ປອ ສະຖາບັນດິດ ອິນສີຊຽງໃໝ ຮອງລັດຖະມົນຕີ ກະຊວງແຜນການ ແລະ ການລົງທຶນ ແລະ ຕງໜ້າຝ່າຍຜູ້ພັດທະນາ ໂຄງການຂອງທ່ານ ແສງສັກ ໄຊຍະລາດ ຜູ້ອໍານວຍການ ບໍລິສັດສະຫວັນວາຍຸ ພະລັງງານສະອາດ ຈໍາກັດ ຮ່ວມກັບບໍລິສັດ ເອວເອັມທີລາວ ຈໍາກັດ ເຊິ່ງມີເນື້ອທີ່ຂອບເຂດໂຄງການທັງໝົດ 28,513 ເຮັກຕາ ຢູ່ເມືອງເຊໂປນ ແຂວງສະຫວັນນະເຂດ ສປປ ລາວ (ລຽບຕາມຊາຍແດນ ລາວ – ຫວຽດນາມ ແຂວງກວາງຈິ).

ແຜນການຕິດຕັ້ງການຜະລິດໄຟຟ້າພະລັງງານລົມ ຢູ່ທີ 1,200 MW ແລະ ຄາດຄະເນມູນຄ່າການກໍ່ສ້າງໂຄງການ 2,159 ລ້ານໂດລາສະຫະລັດ, ຈະສໍາເລັດການກໍ່ສ້າງ ແລະ ດໍາເນີນການຜະລິດໃນທ້າຍປີ 2025 ໂດຍມີຈຸດປະສົງ ເພື່ອ ນໍາໃຊ້ຢູ່ພາຍໃນປະເທດ ແລະ ສົ່ງອອກໄປຕ່າງປະເທດ ໂດຍສະເພາະແມ່ນ ສສ.ຫວຽດນາມ. ສໍາລັບຄວາມເປັນມາຂອງໂຄງການດັ່ງກ່າວ ແມ່ນອີງຕາມການຈັດຕັ້ງປະຕິບັດ MOU ການຮ່ວມມືໃນຂະແໜງພະລັງງານ ກັບ ສສ ຫວຽດນາມ ທີ່ເຊັນໃນ ວັນທີ 5/10/2016 ວ່າດ້ວຍການຮ່ວມມືພັດທະນາໂຄງການໄຟຟ້າ ຢູ່ ສປປ ລາວ, ການເຊື່ອມຕໍ່ລະບົບສາຍສົ່ງ ແລະ ການຊື້ຂາຍພະລັງງານ ລະຫວ່າງສອງປະເທດ ນັບຕັ້ງແຕ່ປີ 2020 – 2030 ໂດຍຜູ້ພັດທະນາໂຄງການ ໄດ້ເລີ່ມສຶກສາຂໍ້ມູນເບື້ອງຕົ້ນກ່ຽວກັບໂຄງການໄຟຟ້າພະລັງງານລົມ ນັບຕັ້ງແຕ່ກາງປີ 2021 ເປັນຕົ້ນມາ ເຫັນວ່າມີທ່າແຮງສູງ ໃນການພັດທະນາທຸລະກິດພະລັງງານດັ່ງກ່າວ.

ສະນັ້ນ, ຈຶ່ງໄດ້ສະ ເໜີລັດຖະບານແຫ່ງ ສປປ ລາວ ເພື່ອດໍາເນີນການສຶກສາ, ສໍາຫຼວດຄວາມເປັນໄປໄດ້ ໃນການພັດທະນາໂຄງການ ໂດຍໄດ້ຄົ້ນຄວ້າແລະ ປຶກສາຫາລື ກັບກະຊວງທີ່ກ່ຽວຂ້ອງ ເລີ່ມຕັ້ງແຕ່ປີ 2022 ເປັນຕົ້ນມາ ພາຍຫລັງໄດ້ປຶກສາຫາລື ກັບພາກສ່ວນທີ່ກ່ຽວຂ້ອງແລ້ວ ລັດຖະບານ ແຫ່ງ ສປປ ລາວ ໄດ້ຕົກລົງເຫັນດີ ແລະ ອະນຸມັດ ໃຫ້ເຊັນບົດບັນທຶກຄວາມເຂົ້າໃນ (MOU) ເພື່ອສຶກສາສໍາຫຼວດຄວາມເປັນໄປໄດ້ ໃນຄັ້ງນີ້.

ແຫຼ່ງຂ່າວ: Media Laos