ອີ​ຊູ​ຊຸ​ເປີດ​ໂຕ “All-New Isuzu MU-X” ລົດ​ອະ​ເນກ​ປະ​ສົງ​ລຸ້ນ​ໃໝ່​ລະ​ດັບຫຼູ    ພາຍ​ໃຕ້​ນິ​ຍາມ “ຜູ້​ນຳ​ແຫ່ງ​ຄວາມ​ສຳ​ເລັດ… ທີ່​ເໜືອກວ່າ​ໃຜ” ພິກ​ໂສມ​ໃໝ່​ທັງ​ພາຍ​ໃນ ແລະພາຍນອກ​ດ້​ວຍ​ການ​ອອກ​ແບບ​ທີ່ຫຼູຫຼາ ສະ​ດວກ​ສະ​ບາຍ ປາ​ນີດ​ໃນ​ທຸກ​ລາຍ​ລະ​ອຽດ ພ້ອມ​ເຕັກ​ໂນ​ໂລ​ຊີ​ເພື່ອ​ຄວາມ​ປອດ​ໄພ​ສຸດ​ລ້ຳ ເໜືອກວ່າ​ດ້ວຍ​ລະ​ບົບ​ຊ່ວຍ​ເຫຼືອ​ຜູ້​ຂັບ​ຂີ່ ADAS ທີ່​ມາ​ພ້ອມ​ກ້ອງ​ໜ້າ​ຄູ່​ອັດ​ສະ​ລິ​ຍະ ຄັ້ງ​ທຳ​ອິດ​ໃນ​ລົດ​ລະ​ດັບ​ດຽວ​ກັນ ລວມ​ທັງ​ພັດ​ທະ​ນາສະ​ມັດ​ຖະ​ນະ​ ການ​ຂັບ​ຂີ່ໃຫ້​ນຸ້ມນວນ ໝັ້ນ​ຄົງປອດ​ໄພ​ຍິ່ງ​ຂຶ້ນ ໂດຍ​ ສ​ປ​ປ ລາວ ​ເປັນ​ປະ​ເທດ​ທຳອິດ ທີ່​ໄດ້ນຳເຂົ້ມາຂາຍ. ໃນ​ລາ​ຄາ​ທີ່​ຄຸ້ມ​ຄ່າ​ກັບເຕັກ​ໂນ​ໂລ​ຊີ​ເພື່ອ​ຄວາມ​ປອດ​ໄພ​ທີ່​ດີ​ທີ່​ສຸດ ເພື່ອ​ຕອບ​ສະ​ໜອງ​ຄວາມ​ຕ້ອງ​ການ ແລະ ສະ​ທ້ອນ​ຕົວ​ຕົນ​ໃນ​ແບບ​ສະ​ບັບ​ຂອງ​ຜູ້​ນຳ ​ທີ່​ປະ​ສົບ​ຄວາມ​ສຳ​ເລັດ​ທີ່​ເໜືອກວ່າ​ໃຜ 

ກຸ່ມ​ຕ​ຣີ​ເພຊ ​ໂດຍ ມິ​ດ​ສ໌ເຕີ ​ໂທ​ຊິ​ອາ​ກິ ມາ​ເອ​ຄາ​ວະ (Toshiaki Maekawa)        ປະ​ທານ ບໍ​ລິ​ສັດ ຕຣີເພຊ໌ອີ​ຊູ​ຊຸ​ເຊ​ວຊ໌ ຈຳ​ກັດ ຜູ້​ຈຳ​ໜ່າຍ​ລົດອີຊູຊຸດີແມັກ ແລະ ​ລົດ​ອີ​ຊູ​ຊຸ       ມິວ-ເອັກ​ ໃນ​ ສ​ປ​ປ ລາວ​ ກ່າວ​ວ່າ “ຫຼັງ​ຈາ​ກ​ອີ​ຊູ​ຊຸ​ໄດ້​ເປີດ​ໂຕ​ລົດ​ກະ​ບະ​ລຸ້ນ​ໃໝ່! “All-New Isuzu D-Max… Infinite Potential” ເມື່​ອຊ່ວງ​ປາຍ​ເດືອນ​ກັນ​ຍາ​ປີ​ທີ່​ຜ່ານ​ມາເຊິ່ງໄດ້​ຮັບ​ກະ​ແສ​ຕອບ​ຮັບ​ເປັນ​ຢ່າງ​ດີ​​ ສາ​ມາດກວດຍອດ​ຈອງ​ໄປຫຼາຍກວ່າ 100 ຄັນພາຍ​ໃນ​ໄລ​ຍະ​ເວ​ລາ​ພຽງ 10ມື້ຫຼ້າ​ສຸດ​  ອີ​ຊູ​ຊຸ​ຂໍ​ແນະ​ນຳ​ລົດ​ອະ​ເນກ​ປະ​ສົງ​ລຸ້ນ​ໃໝ່ “All-New Isuzu MU-X” ລຸ້ນ​ປ່ຽນ​ໂສມ​ໃໝ່​ທັງ​ພາຍໃນແລະພາຍນອກລວມ​ທັງ​ການ​ພັດ​ທະ​ນາ ​​ດ້ານສະ​ມັດ​ຖະ​ນະ​ການ​ຂັບ​ຂີ່ແລະເຕັກ​ໂນ​ໂລ​ຊີ ADAS ລະ​ບົບ​ຊ່ວຍ​ເຫຼືອ​ຜູ້​ຂັບ​ຂີ່​ກ້ອງ​ໜ້າ​ຄູ່​ ທີ່​ມີ​ລະ​ບົບ​ຄວາມ​ປອດໄພຫຼາຍ​ທີ່​ສຸດ​ໃນ​ລົດ​ລະ​ດັບ​ດຽວ​ກັນສະ​ທ້ອນ​ຄວາມ​ເປັນ​ “ຜູ້​ນຳ​ແຫ່ງ​ຄວາມສຳ​ເລັດ…ທີ່​ເໜືອກວ່າ​ໃຜ” ໂດຍ​ເປັນ​ລົດ​ອີກ​ລຸ້ນ​ທີ່​ລູກ​ຄ້າ​ສອບ​ຖາມ​ ເຂົ້າ​ມາ​ຢ່າງຫຼວງຫຼາຍ​ມາ​ໂດຍ​ຕະຫຼອດໂດຍ​ສະ​ເພາະ​ຊ່ອງ​ທາງ​ສື່​ອອນ​ໄລຕັ້ງ​ແຕ່​ການ​ເປີດ​ໂຕ​ຢູ່​ໄທ​ ເມື່ອ​ຊ່ວງ​ປາຍ​ປີທີ່​ແລ້ວເຊິ່ງ​ລາວ​ເປັນ​ປະ​ເທດ​ທຳ​ອິດ​ຂອງ​ການ​ນຳເຂົ້າແລະ​ໄດ້​ສຳ​ຜັດ ​ລົດ​ອະ​ເນກ​ປະ​ສົງ​ລຸ້ນ​ໃໝ່ “All-New Isuzu MU-X” ກ່ອນ​ໃຜຫຼັງ​ຈາກ​ການ​ເປີດໂຕ​ຢູ່​ໄທ​​ເມື່ອ​ຊ່ວງ​ປາຍ​ປີ​ທີ່​ແລ້ວທີ່​ມາ​ພ້ອມ​ກັບ​ຄວາມ​ຄຸ້ມ​ຄ່າ​ທີ່ມອບ​ ເຕັກ​ໂນ​ໂລ​ຊີ​ເພື່ອ​ຄວາມ​ປອດ​ໄພ​ທີ່​ດີ​ທີ່​ສຸດ​  ໃນ​ລົດ​ລະ​ດັບ​ດຽວ​ກັນໃນ​  ລາ​ຄາ​ຂາຍ​ເລີ່ມ​ຕົ້ນ​ພຽງ 54,900 USD ອີ​ຊູ​ຊຸ​ເຊື່ອ​ໝັ້ນ​ວ່າ​ລົດ​ລຸ້ນ​ໃໝ່​ນີ້​ ຈະ​ໄດ້​ຮັບ​ການ​ຕອບ​ຮັບ​ເປັນ​ຢ່າງ​ດີ​ຈາກປະຊາຊົນລາວ ​ດັ່ງ​ທີ່​ຜ່ານ​ມາ”

ສຳ​ລັບ​ລູກ​ຄ້າ​ທີ່​ສົນ​ໃຈ​ສາ​ມາດ​ລອງ​ຂັບ​ລົດ​ອະ​ເນກ​ປະ​ສົງ​ລຸ້ນ​ໃໝ່ “All-New Isuzu MU-X” ຜູ້​ນຳ​ແຫ່ງ​ຄວາມ​ສຳ​ເລັດ…ທີ່​ເໜືອກວ່າ​ໃຜ ພ້ອມ​ເປັນ​ເຈົ້າ​ຂອງ​ກ່ອນ​ໃຜ ​ດ້ວຍ​ຂໍ້​ສະ​ເໜີ​ສຸດ​ພິ​ເສດ ໄດ້​ທີ່​ຫ້ອງ​ຂາຍລົດອີຊູຊຸທຸກສາຂາ ​ຕັ້ງ​ແຕ່ມື້ນີ້​ເປັນ​ຕົ້ນ​ໄປ ແລະ ສາມາດຕິດຕາມຂໍ້ມູນເພີ່ມເຕີມໄດ້ທີ່ https://isuzulaos.com / Facebook page: Isuzu Laos ແລະ Youtube Channel: Isuzu Laos

• ຜູ້​ນຳ​ແຫ່ງ​ຄວາມ​ໂດດ​ເດັ່ນ​…ທີ່ເໜືອກວ່າໃຜ

ດີ​ໄຊ​ນ໌​ສົມ​ບູນ​ແບບເພື່ອ​ຄວາມ​ໂດດ​ເດັ່ນ​ທີ່​ແຕກ​ຕ່າງ ອີກ​ລະ​ດັບ​ແຫ່ງ​ພາບ​ລັກ ຫຼູຫຼາ  ທີ່ລ້ຳສະໄໝ ປະ​ສານ​ຄວາມ​ໜັກ​ແໜ້ນ ​ແລະ​ ຄ່ອງ​ແຄ້ວ​ເຂົ້າ​ໄວ້​ດ້ວຍ​ກັນ​ຕະຫຼອດ​ທັງ​ຄັນ ດ້ວຍ​   ກະ​ຈັງ​ໜ້າ​ World Cross Flow ປະ​ສົມ​ປະ​ສານ​ພື້ນ​ຜິວ​ ສຳ​ຜັດ​ທີ່ຫຼາກຫຼາຍ​ຂອງວັດ​ສະ​ດຸ​         ພ​ຣີ​ມ້ຽມ​ທີ່​ງົດ​ງາມ​ໄດ້​ຢ່າງ​ລົງໂ​ຕ ໄຟ​ໜ້າ Bi-LED Projector ດີ​ໄຊ​ນ໌​ແບບ Arrow Signature ສອດ​ຮັບ​ກັບ​ເສັ້ນ​ສາຍ​ດ້ານ​ຂ້າງ​ອັນ​ໂດດ​ເດັ່ນ ເຕີມ​ອາ​ລົມ​ສະ​ປອດຫຼູ​ ລວມທັງໄຟ​ທ້າຍ LED ດີ​ໄຊ​ນ໌​ແບບ Winglet Signature ເພີ່ມ ​ມິ​ຕິ​ມຸມມອງ​ໃຫ້​ໂດດ​ເດັ່ນ​ດ້ວຍ​ໂຄມ​ໄຟ 3-Line LED            ລໍ້​ອັ​ນ​ລອຍ​ຂະ​ໜາດ​ໃຫຍ່ ໄດ​ນາ​ມິກ​ດີ​ໄຊນ໌​ຄົມ​ເຂັ້ມ ດຸ​ດັນ ຂະ​ໜາດ 20 ນິ້ວ ໃນ​ລຸ້ນ Ultimate ແລະ ​ຂະ​ໜາດ 18ນິ້ວ ໃນ​ລຸ້ນ Elegant

• ຜູ້​ນຳ​ແຫ່ງ​ຄວາມຫຼູ​ຫຼາ…ທີ່​ເໜືອກວ່າ​ໃຜ

​ ຫ້ອງ​ໂດຍ​ສານຫຼູຫຼາ ກວ້າງ​ຂວາງ ປາ​ນີດ​ໃນ​ທຸກ​ລາຍ​ລະ​ອຽດ ປະສົມປະສານ​ ຄວາມ​ສະ​ດວກ​ສະ​ບ​າຍ​ໃນ​ທຸກ​ຟັງ​ຊັ່ນ​ການ​ໃຊ້​ງານ​ໄດ້​ຄົບ​ຖ້ວນ​ເປັນ​ໜຶ່ງ​ດຽວ​ກັບ​ດີ​ໄຊ​ນ໌ ດ້ວຍ ​ວິ​ທີ​ການ​ອອກ​ແບບ Integrated Cockpit ຄອນ​ໂຊ​ນໜ້າ​ເຊື່ອມ​ຕໍ່​ເປັນ​ໜຶ່ງ​ດຽວ​ກັບ ​ຄອ​ນ​ໂຊ​ນກາງ ຈັດ​ວາງ​ລຽບຫຼູ ພ້ອມ​ເບຣກ​ມື​ໄຟ​ຟ້າ ແລະ ລະ​ບົບ Auto Brake Hold ລະ​ບົບ​ຊ່ວຍ​ຢຸດ​ຢູ່​ກັບ​ທີ່​ໂດຍບໍ່​ຕ້ອງ​ຢຽບ​ເບຣກ​ຄ້າງ​ໄວ້ ແລະ ປົດ​ເບຣກ​ອັດ​ຕະ​ໂນ​ມັດ​ເມື່ອ​ແຕະ​ຄັນ​ເລັ່ງ ເບາະ​ນັ່ງ​ດີ​ໄຊ​ນ໌ຫຼູ ​ສີ Saddle Brown ຕັດ​ຫຍິບ​ດ້ວຍ​ວັດ​ສະ​ດຸ​ພິ​ເສດ​ທີ່​ມາ​ພ້ອມ​ເຕັກ​ໂນ​ໂລ​ຊີ Cool Max ຊ່ວຍຫຼຸດ​ການ​ສະ​ສົມ​ຄວາມ​ຮ້ອນ ເດີນ​ດ້າຍ​ແບບ​ເຄື່ອງ​ໜັງ​ຊັ້ນຫຼູ ໂອບ​ກະ​ຊັບ​ຮັບ​ທຸກ​ສັດ​ສ່ວນ ພວງ​ມະ​ໄລ​ມັ​ລ​ຕິ​ຟັງ​ຊັນ  ພ້ອມ Sequential Paddle Shift ປ່ຽນ​ເກຍ​ໄດ້​ພຽງ​ປາຍນິ້ວ​ສຳ​ຜັດ ລະ​ບົບ​ເປີດ-ປິດ​ປະ​ຕູ​ທ້າຍ​ດ້ວຍ  ໄຟ​ຟ້າ Power Tailgate ປອດ​ໄພ​ດ້ວຍ​ລະ​ບົບ Jam Protection ພ້ອມ​ເຕັກ​ໂນ​ໂລ​ຊີ ​ເພື່ອ​ຄວາມ​ບັນ​ເທີງ ແລະ ຄວາມ​ສະ​ດວກ​ ສະ​ບາຍ​ຄົບ​ຖ້ວນ ໂດຍ​ມີ Ambient Light ແລະ Dome Light ຊ່ວຍ​ເຕີມ​ແຕ່ງ​ບັນ​ຍາ​ກາດຫຼູ​ມີ​ລະ​ດັບ

• ຜູ້​ນຳ​ແຫ່ງ​ຄວາ​ມສະ​ດວກ​ສະ​ບາຍ…ທີ່​ເໜືອ​ກວ່າ​ໃຜ

ຄວາມ​ສະ​ດວກ​ສະ​ບາຍ​ທີ່​ເຊື່ອມ​ຕໍ່​ທຸກ​ໄລ​ຟ໌​ສະ​ໄຕ​ລ໌​ໄດ້​ຢ່າງ​ລົງ​ໂຕ ຄົບ​ຖ້ວນ​ດ້ວຍ       ເຕັກ​ໂນ​ໂລຊີ ​ອຳ​ນວຍ​ຄວາມ​ສະ​ດວກ​ສຸດ​ລ້ຳ​ຕະຫຼອດ​ທັ້ງ​ຄັນ 

– ເບາະ​ນັ່ງ​ສາມ​ແຖວ ອອກ​ແບບ​ໃຫ້​ນັ່ງ​ສະ​ບາຍ​ທັງ 7 ທີ່​ນັ່ງ ພ້ອມ​ປັບ​ພັບ​ໄດ້ຫຼາກຫຼາຍ        ​ຮູບ​ແບບ​ຕາມ​ການ​ໃຊ້​ງານ

–  ເບາະ​ປັບ​ໄຟ​ຟ້າ ຝັ່ງ​ຄົນ​ຂັບ​ປັບ​ໄດ້ 8 ທິດ​ທາງ 

– ລະ​ບົບ​ຄວາມ​ບັນ​ເທີງ ISUZU Ultimate Entertainment ໜ້າ​ຈໍ Infotainment Display ຂະ​ໜາດ​ໃຫຍ່ 9ນິ້ວ ຮອງ​ຮັບ Apple CarPlay ແລະ Android Auto (ສະ​ເພາະ         ສະ​ມາດ​ໂຟນ​ລຸ້ນ​ທີ່​ຮອງ​ຮັບ​ການ​ໃຊ້​ງານ) ພ້ອມ​ລຳ​ໂພງ 8 ຈຸດ ໃຫ້​ມິ​ຕິ​ສຽງ​ຮອບ​ທິດ​ທາງ

–  ລະ​ບົບ​ປັບ​ອາ​ກາດ​ອັດ​ຕະ​ໂນ​ມັດແບບ Dual Zone ແຍກ​ອິດ​ສະຫຼະ​ຊ້າຍ-ຂວາ 

– Charging Station ຮອງ​ຮັບ​ການ​ໃຊ້​ງານ​ອຸ​ປະ​ກອນ​ໄຟ​ຟ້າຫຼາກຫຼາຍ ທັງ USB Fast Charger ຊ່ອງ​ຕໍ່ AC Power Socket 220V ແລະ​ຊ່ອງ​ຕໍ່ DC 12V

– Power Tailgate ລະ​ບົບ​ເປີດ-ປິດ​ປະ​ຕູ​ທ້າຍ​ດ້ວຍ​ໄຟ​ຟ້າພ້ອມ​ລະ​ບົບ Jam Protection 

– ກະ​ແຈ ISUZU Genius Entry ສະ​ຕາດ​ເຄື່ອງ​ຈັກ​ດ້ວຍ Remote Engine Start ແລະໃຊ້​ເປີດ-ປິດ​ປະ​ຕູ​ທ້າຍໄຟ​ຟ້າ

• ຜູ້​ນຳ​ແຫ່ງ​ສະ​ມັດ​ຖະ​ນະ​…ທີ່​ເໜືອກວ່າ​ໃຜ

ດຸນ​ຍະ​ພາບ​ແຫ່ງ​ຄວາມ​ເລົ້າ​ໃຈ ສະ​ຖຽນ​ລະ​ພາບ​ໃໝ່​ແຫ່ງ​ການ​ຂັບ​ຂີ່ ກັບ​ໂຄງ​ສ້າງ​ ແພ​ລດ​ຟອມ​ໃໝ່ ດ້ວຍ​ຊ່ວງ​ລ່າງ​ໃໝ່ ອອກ​ແບບ​ຕາມ​ແນວ​ຄິດ ISUZU Symmetric Mobility ໃຫ້​ໂຄງ​ສ້າງ​ໂຕ​ຖັງ ຄານຊີ ການ​ວາງ​ຕຳ​ແໜ່ງ​ເຄື່ອງ​ຈັກ  ແລະ ຊ່ວງ​ລ່າງ ທຳ​ງານ​ຮ່ວມ​ກັນ​ໄດ້​ຢ່າງ         ​ລົງ​ໂຕ ຊ່ວງ​ລ່າງ​ໜ້າ​ແບບ​ອິດ​ສະຫຼະ​ປີກ​ນົກ 2 ຊັ້ນ Double Wishbone ອອກ​ແບ​ບຈຸດ​ຍຶດ​ປີກ​ນົກ​ດ້ານ​ເທິງ​ໃໝ່ ພ້ອມ​ຄອຍ​ສະ​ປິງ ໂຊກ​ອັບ​ແກ​ສ ແລະເຫຼັກ​ກັນ​ໂຄງ​ຂະ​ໜາດ​ໃຫຍ່ ຊ່ວງ​ລ່າງ​ດ້ານຫຼັງ​ແບບ 5-Link Suspension ອັນ​ລື​ຊື່ ທີ່​ພັດ​ທະ​ນາ​ໄປ​ອີກ​ຂັ້ນ ອອກ​ແບບ​ຈຸດ​ຍຶດ​ຄານ​ໃໝ່ ແລະ ເຫຼັກ​ກັນ​ໂຄງ​ໃຫ້​ຍາວ​ຂຶ້ນ ພ້ອມ​ຄອຍ​ສະ​ປິງ ແລະ ໂຊກ​ອັບ​ແກ​ສ ເພື່​ອສ້າງ​ປະ​ສົບ​ການ ແລະ ສະ​ມັດ​ຖະ​ນະ​ການ​ຂັບ​ຂີ່​ທີ່​ດີ​ທີ່​ສຸດ​ແບບ 3S ໄດ້​ແກ່ ຄວາມ​ນິ້ງ ແລະ ໝັ້ນ​ຄົງ (Stability) ຄວາມ​ນຸ້ມນວນ​ນັ່ງ​ສະ​ບາຍ (Softness) ຄວາມ​ປອດ​ໄພ ແລະ ການ​ເກາະ​ຖະ​ໜົນ (Safety and Road Holding) ມອບ​ດຸນ​ຍະ​ພາບ​ແຫ່ງ​ຄວາມ​ນຸ້ມ​ສະ​ບາຍ ແລະ ຍຶດ​ເກາະ​ຖະ​ໜົນ​ໄດ້​ເຕັມ​       ປະ​ສິດ​ທິ​ພາບ ຄວບ​ຄູ່​ໄປ​ກັບ​ການ​ຂັບ​ຂີ່​ມ່ວນເລົ້າ​ໃຈ​ດ້ວຍ ເຄື່ອງ​ຈັກ​ອີ​ຊູ​ຊຸ 3.0 ດີ​ດີ​ໄອບລູພາວເວີ ກຳ​ລັງ​ສູງ​ສຸດ 190 ແຮງ​ມ້າ ແຮງ​ບິດ​ສູງສຸດ 450 ນິວ​ຕັ້ນ-ແມັດ ດ້ວຍ​ລະ​ບົບ​ເກຍ​ອັດ​ຕະ​ໂນ​ມັດ 6 ສະ​ປີດ ພ້ອມ​ໂໝດ Rev Tronic ແລະ Sequential Paddle Shift       ຖ່າຍທອດ​ຈັງ​ຫວະ​ປ່ຽນ​ເກຍ​ໄດ້​ໄວ ແລະ ​ຄ່ອງ​ແຄ້ວ ພ້ອມ​ລະ​ບົບ Terrain Command ສະ​ວິດ​ປ່ຽນລະ​ບົບ​ການ​ຂັບ​ເຄື່ອນ 2 ລໍ້ ເປັນ 4 ລໍ້ ຕອບ​ຮັບ​ທຸກ​ໄລ​ຟ໌​ສະ​ໄຕ​ລ໌​ແຫ່ງ​ການ​ຂັບ​ຂີ່ ແລະ ລະ​ບົບ Rough Terrain ເພີ່ມ​ສະ​ມັດ​ຖະ​ນະໃນ​ການ​ຂັບ​ຂີ່​ ໃນເສັ້ນ​ທາງວິ​ບາກ​ໄດ້​ດີ​ຍິ່ງ​ຂຶ້ນ ທຳ​ງານ​ໄດ້​ທັງ 2H, 4H ແລະ 4L 

• ຜູ້​ນຳ​ແຫ່ງ​ຄວາມ​ປອດ​ໄພ…ທີ່​ເໜືອກວ່າ​ໃຜ

ລົດ​​ອະ​ເນກ​ປະ​ສົງ​ລຸ້ນ​ໃໝ່ “All-New Isuzu MU-X” ມຸ່ງ​ໝັ້ນ​ພັດ​ທະ​ນາ​ເພື່ອ​ລວມ​ທຸກເຕັກ​ໂນ​ໂລ​ຊີດ້ານ​ຄວາມ​ປອດ​ໄພ​ເຂົ້າ​ໄວ້​ດ້ວຍ​ກັນ​ ໄດ້​ແກ່ ລະ​ບົບ​ຊ່ວຍ​ເຫຼືອ ຜູ້​ຂັບຂີ່ຂັ້ນ​ສູງ ADAS (Advanced Driver Assistance Systems) ຊ່ວຍ​ສອດ​ສ່ອງ ເຝົ້າ​ລະ​ວັງ ດ້ວຍ​ນະ​ວັດ​ຕະ​ກຳ​ກ້ອງ​ໜ້າ​ຄູ່​ອັດ​ສະ​ລິ​ຍະ 3D Imaging Stereo Camera ຊ່ວຍ​ກວດ​ຈັບ​ວັດ​ຖຸ​ຕ່າງໆ ດ້ວຍ​ການ​ສະ​ແກນ​ພາບ 3 ມິ​ຕິ ແບບ Real Time ແມ້ນ​ຍຳ​ກວ່າ​ກ້ອງ​ລະ​ບົບ Mono Camera ທົ່ວ​ໄປ ໂດຍ​ທຳ​ງານ​ຮ່ວມ​ກັບ​ເຣ​ດ້າ 2 ຈຸດ ແລະ ​ເຊັນ​ເຊີ້ 8 ຈຸດ​ອ້ອມ​ຄັນ ຄວບ​ຄູ່​ໄປ​ກັບ​ລະ​ບົບ​ຄວາມ​ປອດ​ໄພ​ພື້ນ​ຖານ​ຄົບ​ຖ້ວນ​ໃນ​ທຸກ​ລຸ້ນ ໄດ້​ແກ່​   ລະ​ບົບ ABS, EBD, BA, BOS, ESC, TCS, HSA, HDC ແລະ TSC ເພື່ອ​ສົ່ງ​ມອບ​ຄວາມ​ໝັ້ນ​ໃຈ ແລະ ອຸ່ນ​ໃຈ​ເໜືອ​ລະ​ດັບ​ຍາມ​ຂັບ​ຂີ່  

ເຕັກ​ໂນ​ໂລຊີ ADAS ທີ່​ລວມ​ໃວ້​ໃນ “All-New Isuzu MU-X” ມີ

• ACC (Full Speed Range Adaptive Cruise Control) ລະບົບຄວບຄຸມຄວາມໄວອັດຕະໂນມັດແບບ​ແປ​ຜັນ ພ້ອມຟັງຊັ່ນ Stop and Go
  
• FCW (Forward Collision Warning) ລະ​ບົບແຈ້ງເຕືອນກ່ອນການຕຳດ້ານ​ໜ້າ
  
• AEB (Autonomous Emergency Braking) ລະບົບເບຣກສຸກເສີນອັດຕະໂນມັດ
  
• LDW (Lane Departure Warning) ລະ​ບົບ​ແຈ້ງ​ເຕືອນ​ອອກນອກ​ເລນ
  
• AHB (Automatic High Beam) ລະ​ບົບ​ຄວບ​ຄຸມ​ໄຟ​ສູງ​ອັດ​ຕະ​ໂນ​
  
• PMM (Pedal Misapplication Mitigation) ລະ​ບົບ​ຕັດ​ກຳ​ລັງ​ເຄື່ອງ​ຈັກ​ເມື່ອ​ຢ         ຽບ​ຄັນ​ເລັ່ງ​ຜິດ​ພາດ
  
• MSL (Manual Speed Limiter) ລະ​ບົບ​ຕັ້ງ​ຄ່າ​ຈຳ​ກັດ​ຄວາມ​ໄວ​ສູງ​ສຸດ​ດ້​ວຍ​ຕົວ​ເອງ
  
• BSM (Blind Spot Monitoring) ລະ​ບົບ​ແຈ້ງ​ເຕືອນ​ຈຸດ​ອັບ​ສາຍ​ຕາ
  
• RCTA (Rear Cross Traffic Alert) ລະບົບຊ່ວຍເຕືອນຂະນະຖອຍລົດ
  
• Parking Aid System ລະ​ບົບ​ເຊັນ​ເຊີ້​ຊ່ວຍ​ຈອດ​ລົດ​
  
• MCB (Multi-Collision Brake) ລະບົບເບຣກອັດຕະໂນມັດຫຼັງການເກີດອຸບັດຕິເຫດ   ຊ້ຳ​ຊ້ອນ
• ບົ່ງ​ບອກ​ຕົວ​ທ່ານ…ທີ່​ເໜືອກວ່າ​ໃຜ

ລຸ້ນໃໝ່! “All-New Isuzu MU-X” ມີ​ໃຫ້​ເລືອກ​ຄົບ​ຊຸດ ​ດ້ວຍ​ສະ​ໄຕ​ລ໌​ທີ່ຫຼາກຫຼາຍ​ລວມ 2 ມີລຸ້ນ ຄື Ultimate ແລະ Elegant ເຄື່ອງ​ຈັກ​ອີ​ຊູ​ຊຸ 3.0 ດີ​ດີ​ໄອ ບລູພາວເວີ ໃຫ້​ແຮງ​ບິດ​ສູງ​ທຸກ​ລະດັບ​ຄວາມ​ໄວ ມີ​ໃຫ້​ເລືອກ​ທັງ​ລະ​ບົບ​ຂັບ​ເຄື່ອນ 2 ລໍ້ ແລະ 4 ລໍ້ ມີ​ໃຫ້​ເລືອກ​ເຖິງ 4 ສີ ຄື ນ້ຳ​ຕານ​ມາ​ຣາ​ເກ​ຊ (Marrakesh Brown) ຂາວ​ມຸກ​ໂດ​ໂລ​ໄມ​ທ໌ (Dolomite Pearl White)          ດຳ​ບາ​ວາຣ້ຽນ ໄມ​ກ້າ (Bavarian Black Mica) ແລະ ເງິນ​ໂບ​ຮີ​ມ້ຽນ  ເມ​ທັ​ລ​ລິກ (Bohemian Silver Metallic) ແຕກ​ຕ່າງ​ກັນ​ໄປ​ໃນ​ແຕ່​ລະ​ລຸ້ນ 

*****************************************************

ຝ່າຍປະຊາສຳພັນ 

ຫ້ອງການຜູ້ຕາງໜ້າປະຈຳປະເທດລາວ, ບໍລິສັດ ຕຣີເພຊອີຊູຊຸເຊວຊ໌ ຈຳກັດ 

ໂທ. 021 417 387 ແຟັກ: 021 417 386 

ໃນຕອນບ່າຍ ວັນທີ 28 ເມສາ 2021 ທີ່ສຳນັກງານນາຍົກລັດຖະມົນຕີ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19 ຂັ້ນສູນກາງ ໄດ້ປະຊຸມຮ່ວມກັບຄະນະສະເພາະກິດບັນດາແຂວງ ແລະ ນະຄອນຫຼວງວຽງຈັນ ແບບທາງໄກ (Video Conference), ໂດຍການເປັນປະທານ ຂອງທ່ານ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ, ຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດ ໂຄວິດ-19.

ຈຸດປະສົງ ຂອງກອງປະຊຸມໃນມື້ນີ້ ແມ່ນເພື່ອຮັບຟັງການລາຍງານສະພາບການລະບາດ ຂອງພະຍາດໂຄວິດ-19 ຢູ່ແຕ່ລະແຂວງ ແລະ ການຈັດຕັ້ງປະຕິບັດ ບັນດາມາດຕະການ ຕາມຄຳສັ່ງຂອງທ່ານ ນາຍົກລັດຖະມົນຕີ ສະບັບເລກທີ 15/ນຍ, ລົງວັນທີ 21 ເມສາ 2021 ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ຢູ່ນະຄອນຫຼວງວຽງຈັນ ແລະ ບັນດາແຂວງທົ່ວປະເທດ ໂດຍສະເພາະ ດ້ານຂໍ້ສະດວກ ແລະ ຫຍຸ້ງຍາກ ໃນການຈັດຕັ້ງປະຕິບັດຕົວຈິງ; ສະພາບການຕິດຕາມຜູ້ສຳຜັດ-ໃກ້ຊິດ ກັບຜູ້ຕິດເຊື້ອ ມາກວດຫາເຊື້ອ ແລະ ຈຳກັດບໍລິເວນ;

ການກະກຽມຄວາມພ້ອມຮັບມືກັບການລະບາດ (ດ້ານບຸກຄະລາກອນ, ໂຮງໝໍ, ອຸປະກອນ…); ການນຳເຂົ້າ-ສົ່ງອອກສິນຄ້າ, ຈໍລະຈອນສິນຄ້າຢູ່ພາຍໃນ ລະຫວ່າງ ແຂວງ ກັບ ແຂວງ; ການປະສານງານ ລະຫວ່າງ ຄະນະສະເພາະກິດ ຂັ້ນສູນກາງ ແລະ ຂັ້ນທ້ອງຖິ່ນ; ກົນໄກຕິດຕາມ-ຊຸກຍູ້ ກວດກາການຈັດຕັ້ງປະຕິບັດວຽກງານ, ລວມທັງ ຂໍ້ສະເໜີ ຕໍ່ຄະນະສະເພາະກິດຂັ້ນສູນກາງ ກໍຄື ລັດຖະບານ ໂດຍສະເພາະ ອັນທີ່ຈຳເປັນ ແລະ ຮີບດ່ວນທີ່ສຸດ ເພື່ອເຮັດໃຫ້ການຈັດຕັ້ງປະຕິບັດວຽກງານ ການສະກັດກັ້ນ, ຄວບຄຸມ ແລະ ແກ້ໄຂການລະບາດ ຂອງພະຍາດດັ່ງກ່າວ ມີຄວາມໂລ່ງລ່ຽນ, ວ່ອງໄວ, ທັນສະພາບການ ແລະ ມີປະສິດທິພາບ, ຕັດວົງຈອນການແຜ່ເຊື້ອ ໃຫ້ໄດ້ໄວທີ່ສຸດ.

ຜ່ານການປະຊຸມ, ທ່ານປະທານກອງປະຊຸມ ໄດ້ສະຫຼຸບສັງລວມ ເນື້ອໃນຂອງກອງປະຊຸມຄັ້ງນີ້, ພ້ອມທັງ ມີຄຳເຫັນເນັ້ນໜັກ ໃຫ້ຄະນະສະເພາະກິດ ນະຄອນຫຼວງວຽງຈັນ ແລະ ບັນດາແຂວງ ເອົາໃຈໃສ່ຕື່ມບາງດ້ານ ເປັນຕົ້ນ ອັນລວມ ແມ່ນໃຫ້ສືບຕໍ່ຈັດຕັ້ງປະຕິບັດ ບັນດາມາດຕະການ ທີ່ໄດ້ກຳນົດໄວ້ ໃນນິຕິກຳຕ່າງໆ ທີ່ລັດຖະບານ ກໍ່ຄືຄະນະສະເພາະກິດ ແຕ່ລະຂັ້ນວາງອອກ ຢ່າງເຂັ້ມງວດ, ເດັດຂາດ ແລະ ເປັນເອກະພາບກັນສູງ; ອັນສະເພາະ, ໃຫ້ສືບຕໍ່ໂຄສະນາ ເຮັດວຽກງານແນວຄິດໃຫ້ປະຊາຊົນ ກໍຄືສັງຄົມ ໃຫ້ການຮ່ວມມື ຈັດຕັ້ງປະຕິບັດ ບັນດາມາດຕະການ ທີ່ລັດຖະບານ ແລະ ຄະນະສະເພາະກິດວາງອອກ ໃຫ້ໄດ້ຮັບຜົນດີ; ໃຫ້ຄົ້ນຄວ້າກຳນົດມາດຕະການເພີ່ມເຕີມ (ຖ້າຈຳເປັນ) ໂດຍອີງໃສ່ຄຳສັ່ງ ສະບັບເລກທີ 15/ນຍ ແລະ ສະພາບການລະບາດຕົວຈິງ ຂອງທ້ອງຖິ່ນຕົນ, ພ້ອມທັງ ຖອດຖອນການຈັດຕັ້ງປະຕິບັດວຽກງານ ໃນແຕ່ລະໄລຍະ ເປັນບົດຮຽນ; ໃຫ້ຮີບຮ້ອນເກັບກຳຂໍ້ມູນ ປະຫວັດການເຄື່ອນໄຫວຂອງຜູ້ຕິດເຊື້ອ ເພື່ອຊອກຫາຜູ້ສຳຜັດໃກ້ຊິດ ມາກວດຫາເຊື້ອພະຍາດ ແລະ ສີດຢາຂ້າເຊື້ອຢູ່ສະຖານທີ່ນັ້ນໆ; ໃຫ້ສຸມໃສ່ເບິ່ງແຍງ ແລະ ປິ່ນປົວຜູ້ຕິດເຊື້ອ ໃຫ້ຫາຍດີເປັນປົກກະຕິ; ໃຫ້ສືບຕໍ່ກວດກາ ລາດຕະເວນ ຕາມຊາຍແດນ ຢ່າງເຂັ້ມງວດ,

ເດັດຂາດ ຕໍ່ກໍລະນີເຂົ້າເມືອງແບບຜິດກົດໝາຍ, ຖ້າມີຢູ່ທ້ອງຖິ່ນໃດ ໃຫ້ທ້ອງຖິ່ນນັ້ນຮັບຜິດຊອບດຳເນີນການແກ້ໄຂ; ໃຫ້ແຕ່ລະທ້ອງຖິ່ນ ລົງກວດກາສະຖານທີ່ ທີ່ຖືກສັ່ງປິດຊົ່ວຄາວ, ຊຶ່ງເດັດຂາດ ບໍ່ໃຫ້ມີການລັກລອບເປີດຈົນກວ່າຈະມີການອະນຸຍາດ; ໃຫ້ສືບຕໍ່ສັກວັກຊິນໃຫ້ກຸ່ມເປົ້າໝາຍ ແລະ ປະຊາຊົນທົ່ວໄປ ໃຫ້ໄດ້ຕາມແຜນ ຫຼື ລື່ນແຜນຍິ່ງດີ; ໃຫ້ສືບຕໍ່ກະກຽມຮອບດ້ານ ເປັນຕົ້ນ ສະຖານທີ່ແຍກປ່ຽວ ແລະ ປິ່ນປົວຜູ້ຕິດເຊື້ອ, ອຸປະກອນຮັບໃຊ້ຕ່າງໆ, ບຸກຄະລາກອນ ແລະ ອື່ນໆ, ຖ້າເຫັນວ່າ ຕ້ອງການຄວາມຊ່ວຍເຫຼືອດ້ານໃດ ກໍ່ໃຫ້ຮີບຮ້ອນປະສານກັບຄະນະສະເພາະກິດຂັ້ນສູນກາງ ເພື່ອແກ້ໄຂ ໄດ້ທັນການ; ໃຫ້ຮີບຮ້ອນຂຶ້ນແຜນງົບປະມານ ແລະ ອຸປະກອນຮັບໃຊ້ວຽກງານສະກັດກັ້ນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຂອງແຂວງຕົນ ແລ້ວສົ່ງໃຫ້ຄະນະສະເພາະ ກິດຂັ້ນສູນກາງ ເພື່ອສັງລວມ-ລາຍງານລັດຖະບານ ແລະ ແກ້ໄຂ ຢ່າງທັນການ; ສືບຕໍ່ໂຄສະນາເຜີຍແຜ່ໃຫ້ປະຊາຊົນ ເພີ່ມທະວີຄວາມເອົາໃຈ ໃສ່ປະຕິບັດມາດຕະການຕ່າງໆ ທີ່ຄະນະສະເພາະກິດວາງອອກ ໃນແຕ່ລະໄລຍະ;

ເພີ່ມທະວີການຕອບໂຕ້ຂ່າວ ທີ່ບໍ່ເປັນຄວາມຈິງ ທີ່ສ້າງຄວາມບໍ່ສະຫງົບ ໃນສັງຄົມ ໃຫ້ທັນການ ແລະ ການດໍາເນີນການຕໍ່ຜູ້ກະທຳຜິດ; ໃຫ້ປະຕິບັດມາດຕະການ ຕໍ່ຜູ້ລະເມີດຄຳສັ່ງ 15/ນຍ ກໍ່ຄືມາດຕະການອື່ນໆ ທີ່ຄະນະສະເພາະກິດວາງອອກ ຢ່າງເຄັ່ງຄັດ ແລະ ເດັດຂາດ ເພື່ອເຮັດໃຫ້ການແກ້ໄຂການແຜ່ລະບາດ ໃນຄັ້ງນີ້ ໄດ້ໄວທີ່ສຸດ; ລາຍງານສະພາບການ ຕໍ່ຄະນະສະເພາະກິດຂັ້ນສູນກາງ ເພື່ອມີທິດຊີ້ນຳໃນການແກ້ໄຂ ໃນຂອບເຂດສິດຂອງຕົນ ຫຼື ຄົ້ນຄວ້າສະເໜີຂໍທິດຊີ້ນຳ ຫຼື ການຕົກລົງຈາກລັດຖະບານ; ໃຫ້ມີຈຸດປະສານງານ ລະຫວ່າງ ຄະນະສະເພາະກິດ ຂັ້ນສູນກາງ ແລະ ຂັ້ນທ້ອງຖິ່ນ; ທຸກນິຕິກຳ ຫຼື ມາດຕະການ ທີ່ຄະນະສະເພາະກິດຂັ້ນແຂວງ ໄດ້ວາງອອກ ໃຫ້ສົ່ງໃຫ້ຄະນະສະເພາະກິດ ຂັ້ນສູນກາງ ເພື່ອຊາບ. ສຳລັບຂໍ້ສະເໜີຕ່າງໆ ຂອງບັນດາແຂວງ ແລະ ນະຄອນຫຼວງວຽງຈັນ, ລັດຖະບານ ກໍ່ຄືຄະນະສະເພາະກິດ ຈະນຳໄປພິຈາລະນາ ເພື່ອແກ້ໄຂ ແລະ ຊີ້ນຳ ໃນຂັ້ນຕໍ່ໄປ.

ພາບ-ຂ່າວ: ກົມປະຊາສຳພັນ ຫສນຍ.

ພິທີມອບ-ຮັບວັກຊີນປ້ອງກັນພະຍາດໂຄວິດ-19 ຈຳນວນ300.000ໂດສ ແລະ ເຂັມສັກຢາຈຳນວນໜຶ່ງໂດຍການຊ່ວຍເຫຼືອລ້າຈາກລັດຖະບານແຫ່ງ ສປ ຈີນ ໃຫ້ແກ່ ສປປລາວ,ໄດ້ຈັດຂຶ້ນໃນຕອນບ່າຍວັນທີ27 ເມສາ 2021,ທີ່ ກະຊວງສາທາລະນະສຸກ. ຕາງໜ້າລັດຖະບານຈີນມອບໂດຍສະຫາຍຈ່ຽງຈາຍຕຸ່ງ,ເອກອັກຄະລັດຖະທູດແຫ່ງ ສປຈີນ ປະຈຳ ສປປ ລາວແລະຕາງໜ້າລັດຖະບານລາວຮັບໂດຍສະຫາຍກິແກ້ວ ໄຂຄຳພິທູນ, ຮອງນາຍົກລັດຖະມົນຕີ ແຫ່ງ ສປປ ລາວ, ເຊິ່ງມີລັດຖະມົນຕີ, ຮອງລັດຖະມົນຕີແລະພະນັກງານຈາກພາກສ່ວນທີ່ກ່ຽວຂ້ອງສອງຝ່າຍລາວ-ຈີນເຂົ້າຮ່ວມ.

ໃນພິທີດັ່ງກ່າວ,ສະຫາຍກິແກ້ວ ໄຂຄຳພິທູນໄດ້ຕາງໜ້າໃຫ້ພັກ-ລັດຖະບານແລະປະຊາຊົນລາວກ່າວສະແດງຄວາມຂອບໃຈເປັນຢ່າງສູງຕໍ່ພັກ, ລັດຖະບານ ແລະ ປະຊາຊົນຈີນ ອ້າຍນ້ອງ, ໂດຍຜ່ານສະຫາຍ ຈ່ຽງ ຈາຍຕຸ່ງ, ເອກອັກຄະລັດຖະທູດ ສປ ຈີນ ປະຈຳ ສປປລາວ ທີ່ເວລາໃດກໍ່ໄດ້ສະແດງຄວາມເປັນຫ່ວງເປັນໃຍ ແລະ ໃຫ້ການຊ່ວຍເຫຼືອອັນລໍ້າຄ່າ ແກ່ລັດຖະບານ ກໍ່ຄື ປະຊາຊົນລາວ,ຊຶ່ງສະແດງໃຫ້ເຫັນເຖິງນໍ້າໃຈເອື້ອເຟື້ອເພື່ອແຜ່ ຂອງພັກ, ລັດຖະບານ ແລະ ປະຊາຊົນຈີນ ທີ່ມີຕໍ່ລັດຖະບານ ແລະ ປະຊາຊົນລາວ ແລະ ເປັນການຢືນຢັນເຖິງການເປັນເພື່ອນມິດສະຫາຍ ອ້າຍນ້ອງ ທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລາວ-ຈີນ, ຈີນ-ລາວ ທີ່ນັບມື້ນັບໄດ້ຮັບການເສີມຂະຫຍາຍ ແລະ ເຂົ້າສູ່ລວງເລິກ ຢ່າງບໍ່ຢຸດຢັ້ງ.

ນອກຈາກນີ້, ສະຫາຍກິແກ້ວ ໄຂຄຳພິທູນ ຍັງໄດ້ຕີລາຄາສູງຕໍ່ການຊ່ວຍເຫຼືອອັນສະເໝີຕົ້ນສະເໝີປາຍ ແລະ ທັນການ ບໍ່ວ່າຈະເປັນທາງດ້ານອຸປະກອນການເເພດ, ໜ້າກາກອະນາໄມ, ນໍ້າຢາກວດເຊື້ອພະຍາດ, ໂດຍສະເພາະ ຢາວັກຊິນເພື່ອປ້ອງກັນພະຍາດໂຄວິດ-19 ໄລຍະຜ່ານມາ ວັກຊີນທີ່ ສປ ຈີນ ໃຫ້ການຊ່ວຍເຫລືອ ສປປ ລາວ ແມ່ນມີປະສິດທິພາບ ແລະ ຄວາມປອດໄພສູງ, ຊຶ່ງລັດຖະບານ ສປປ ລາວ ໄດ້ນຳໄປສັກໃຫ້ແກ່ພະນັກງານປະຈຳດ່ານ, ແພດຫມໍ, ເຈົ້າໜ້າທີ່ຢູ່ດ່ານໜ້າ ແລະ ພໍ່ແມ່ປະຊາຊົນລາວ ລວມທັງທູຕານຸທູດຕ່າງປະເທດ ແລະ ຄົນຕ່າງປະເທດທີ່ດຳລົງຊີວິດຢູ່ ສປປ ລາວ. ການຊ່ວຍເຫຼືອເພີ່ມເຕີມໃໝ່ໃນຄັ້ງນີ້, ຈະເປັນການປະກອບສ່ວນອັນສຳຄັນ ໃຫ້ແກ່ລັດຖະບານລາວ ໃນການຕ້ານການແຜ່ລະບາດຂອງພະຍາດໂຄວິດ-19 ຮອບໃໝ່ທີ່ພວມຄຸກຄາມປະຊາຊົນລາວໃນຂອບເຂດທົ່ວປະເທດຢ່າງຮ້າຍແຮງ.

ໃນໂອກາດດຽວກັນ, ສະຫາຍ ຈ່ຽງ ຈາຍຕຸ່ງ ໄດ້ສະແດງຄວາມຍິນດີໃນການຊ່ວຍເຫຼືອຄັ້ງນີ້ຊຶ່ງບໍ່ພຽງແຕ່ໄດ້ສະແດງໃຫ້ເຫັນເຖິງຄວາມຮັບຜິດຊອບສູງຂອງສປຈີນແຕ່ຍັງໄດ້ສ່ອງແສງໃຫ້ເຫັນເຖິງທາດແທ້ຂອງຄູ່ຮ່ວມຊະຕາກໍາລາວ-ຈີນໃນການຊ່ວຍໜູນກັນອີກດ້ວຍ. ສປຈີນ ຍິນດີຄຽງຄູ່ກັບຝ່າຍ ສປປ ລາວເພື່ອປະກອບສ່ວນເຂົ້າໃນການສ້າງຄູ່ຮ່ວມຊະຕາກໍາທາງດ້ານສາທາລານະສຸກຂອງມວນມະນຸດເພື່ອນໍາເອົາຜົນປະໂຫຍດສູ່ປະຊາຊົນທົ່ວໂລກ. ສປຈີນໄດ້ໃຫ້ການຊ່ວຍເຫຼືອມອບວັກຊີນປ້ອງກັນພະຍາດໂຄວິດ-19 ໃຫ້ແກ່ ສປປ ລາວ ລວມ 4ຄັ້ງມີທັງໝົດ 1.700.000ໂດສ ເຊິ່ງຄັ້ງທີ1 ມອບໃນທ້າຍປີ2020 ຈໍານວນ 300.000ໂດສ, ຄັ້ງທີສອງ 300.000ໂດສ, ຄັ້ງທີສາມ 800.000ໂດສ ແລະ ຄັ້ງນີ້ແມ່ນ 300.000ໂດສ.

ໃນວັນທີ 25 ເມສາ 2021, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມດ້ວຍພາກສ່ວນທີ່ກ່ຽວຂ້ອງ ໄດ້ລົງຕິດຕາມກວດກາ ການປະຕິບັດວຽກງານຂອງ ຄະນະສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ແຂວງຈຳປາສັກ ຢູ່ຫລາຍຈຸດ ເຊັ່ນ:

ໜ່ວຍສະເພາະກິດ ຈຸດກວດກາການເຂົ້າ-ອອກ ລະຫວ່າງແຂວງ, ຈຸດກວດກາເຂົ້າ-ອອກ ນະຄອນປາກເຊ ຫາ ເມືອງໂພນທອງ ແລະ ຈຸດກວດກາ ດ່ານຊາຍແດນສາກົນວັງເຕົ່າ ທີ່ໄດ້ຈັດຕັ້ງ ແລະ ປະຕິບັດຄໍາສັ່ງເພີ້ມເຕີມ ຂອງທ່ານເຈົ້າແຂວງຈຳປາສັກ ສະບັບເລກທີ 04/ຈຂ.ຈສ, ລົງວັນທີ 23 ເມສາ 2021, ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດ COVID-19 ກໍ່ຄື ຫ້າມຄົນຢູ່ແຂວງຈໍາປາສັກ ເດີນທາງໄປຕ່າງແຂວງ, ຫ້າມຄົນຕ່າງແຂວງ ເດີນທາງເຂົ້າແຂວງ ຈໍາປາສັກ, ຍົກເວັ້ນຜູ້ທີ່ມີພູມລໍາເນົາ, ເຮັດວຽກປະຈໍາຢູ່ແຂວງຈໍາປາສັກ, ຜູ້ທີ່ໄດ້ຮັບອະນຸຍາດຈາກຄະນະສະເພາະກິດຂັ້ນແຂວງ; ໃຫ້ໂຈະການບໍລິການລົດຂົນສົ່ງສາທາລະນະ ລະຫວ່າງແຂວງ ແລະ ລະຫວ່າງເມືອງ. ສໍາລັບຜູ້ທີ່ມີຄວາມຈໍາເປັນ ຕ້ອງເດີນທາງໄປປະຕິບັດໜ້າທີ່ຢູ່ຕ່າງແຂວງ, ຕ່າງເມືອງ ແມ່ນໃຫ້ຂໍໜັງສື ອະນຸມັດການເດີນທາງນໍາຄະນະສະເພາະກິດຂັ້ນແຂວງ, ຂັ້ນເມືອງ ຊຶ່ງມີສໍານັກງານຕັ້ງຢູ່ພະແນກສາທາລະນະສຸກແຂວງ, ຫ້ອງການສາທາລະນະສຸກນະຄອນ, ເມືອງໃນເວລາລັດຖະການ.

ຈາກນັ້ນ, ໄດ້ລົງຢ້ຽມ ຢາມ ແລະ ໃຫ້ກຳລັງໃຈພະນັກງານ ເຈົ້າໜ້າທີ່ແພດໝໍ ທີ່ ສູນປິ່ນປົວ ໂພນທອງ ທີ່ມີສາມາດຮອງຮັບຜູ້ປ່ວຍອາການປານກາງ ຫາ ອາການໜັກ ໄດ້ທັງໝົດ 45 ຕຽງ ແລະມີແຜນທີ່ຈະຂະຫຍາຍ ແລະ ສ້າງໂຮງໝໍສະໜາມເພື່ອຮອງຮັບ ຖ້າຫາກວ່າມີການລະບາດພະຍາດ ຢ່າງຮ້າຍແຮງໃນທົ່ວສັງຄົມ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ຊີ້ນຳໃຫ້ກອງເລຂາ ຄະນະສະເພາະກິດປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດ COVID-19 ແຂວງຈໍາປາສັກ ຈະຕ້ອງໃຫ້ຄະນະພັກແຕ່ລະຂັ້ນ ຊີ້ນຳເອົາໃຈໃສ່ບັນຫາການໂຄສະນາ, ສຶກສາອົບຮົມ, ສ້າງຄວາມຮັບຮູ້ເຂົ້າໃຈ ແລະ ປະຕິບັດຖືກຕ້ອງ ວິທີການປ້ອງກັນພະຍາດ, ເຮັດເປັນປະຈຳ ແລະ ກາຍເປັນວັດທະນະທຳໃໝ່ ໃນການດຳລົງຊີວິດປະຈຳວັນໃສ່ຜ້າປິດປາກ-ດັງ ທົ່ວສັງຄົມໃຫ້ໄດ້ 100%, ລ້າງມື ແລະ ເວັນໄລຍະຫ່າງທາງສັງຄົມ ໜ່ວຍງານສະເພາະກິດຕ້ອງໄດ້ເພີ່ມທະວີຄວາມເຄື່ອນທີ່ລາດຕະເວນ, ຕິດຕາມ ແລະ ປ້ອງກັນເວນຍາມຢູ່ຈຸດຕ່າງໆ ໃນເທດສະບານນະຄອນປາກເຊ ແລະ 09 ເມືອງ ຢ່າງເຂັ້ມງວດ.

ຂ່າວ: ທັດຊະນະ

ມື້ນີ້ແມ່ນມື້ລະນຶກວັນສ້າງຕັ້ງສາຍພົວພັນທາງການທູດ ລາວ-ຈີນ ຄົບຮອບ 60 ປີ. ວັນທີ 25 ເມສາ 1961- 25 ເມສາ 2021, ລາວ ແລະ ຈີນ ໄດ້ສ້າງຕັ້ງສາຍພົວພັນທາງການທູດນຳກັນຢ່າງເປັນທາງການ ເຊິ່ງໄດ້ເປີດປະຫວັດສາດໜ້າໃໝ່ແຫ່ງການໄປມາຫາສູ່ກັນບົນຈິດໃຈມິດຕະພາບ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ.

ຜ່ານໄລຍະ 60 ປີມານີ້, ປະຊາຊົນສອງຊາດໄດ້ຊ່ວຍຊູຍູ້ໜູນກັນ ແລະ ຮັກແພງກັນ, ການຮ່ວມມືລະຫວ່າງສອງຝ່າຍໄດ້ປະສົບຜົນສຳເລັດຢ່າງຈົບງາມ, ມິດຕະພາບລະຫວ່າງສອງປະເທດໝັ້ນຄົງຂະໜົງແກ່ນ.ສອງປະເທດລາວ-ຈີນ ມີສາຍພູ ແລະ ແມ່ນ້ຳຕິດຈອດກັນ, ເປັນປະເທດບ້ານໃກ້ເຮືອນຄຽງທີ່ດີຕໍ່ກັນ. ຈີນ ໄດ້ຖືເອົາການພົວພັນ ຈີນ-ລາວ ເປັນວຽກງານຈຸດສຸມໃນວຽກງານທາງການທູດກັບປະເທດໃກ້ຄຽງ.

ເມື່ອກ້າວເຂົ້າສູ່ຍຸກໃໝ່, ພາຍໃຕ້ການຊີ້ນຳ ນຳພາທາງຍຸດທະສາດລະຫວ່າງການນຳຂັ້ນສູງຂອງສອງປະເທດ, ສອງຝ່າຍໄດ້ຕັ້ງໜ້າຈັດຕັ້ງປະຕິບັດແຜນແມ່ບົດໃນການສ້າງຄູ່ຮ່ວມຊາຕາກຳ ຈີນ-ລາວ, ປັບປຸງ ແລະ ເພີ່ມທະວີຄວາມສາມັກຄີ ແລະ ຄວາມໄວ້ເນື້ອເຊື່ອໃຈກັນ, ເພີ່ມທະວີການແລກປ່ຽນດ້ານການປົກຄອງປະເທດ, ກຳແໜ້ນທິດທາງສັງຄົມນິຍົມ ແລະ ປົກປ້ອງຜົນປະໂຫຍດຍຸດທະສາດຮ່ວມກັນ. ໃນຕົ້ນປີນີ້, ທ່ານ ສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ, ປະທານປະເທດແຫ່ງ ສປ ຈີນ ແລະ ທ່ານທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ໄດ້ສົນທະນາກັນທາງໂທລະສັບ ໂດຍໄດ້ຢືນຢັນອີກເທື່ອໜຶ່ງເຖິງຄວາມເຫັນທີ່ເປັນເອກະພາບກັນ ໃນການຊຸກຍູ້ການພົວພັນລະຫວ່າງສອງປະເທດ. ສອງຝ່າຍໄດ້ເພີ່ມທະວີການເຊື່ອມຕໍ່ທາງຍຸດທະສາດຢ່າງບໍ່ຢຸດຢັ້ງ, ຮ່ວມກັນຕ້ານກັບການແພ່ລະບາດຂອງພະຍາດໂຄວິດ-19, ຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ທີ່ມີຄຸນນະພາບສູງຢ່າງຕໍ່ເນື່ອງ, ຮ່ວມກັນຊຸກຍູ້ການສ້າງທາງລົດໄຟ ລາວ-ຈີນ ແລະ ເລັ່ງລັດການສ້າງແລວທາງເສດຖະກິດລະຫວ່າງສອງປະເທດ ເຊິ່ງເປັນການເພີ່ມເນື້ອໃນໃໝ່ທີ່ອຸດົມສົມບູນໃຫ້ແກ່ສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງສອງປະເທດ.

ຕາມປະເພນີ ຈີນ, 60 ປີຖືວ່າເປັນຮອບໝູນວຽນຮອບໜຶ່ງ, 60 ປີຜ່ານໄປ, ກໍຄືຮອບເກົ່າຜ່ານພົ້ນໄປ, ຮອບໃໝ່ໝູນວຽນເຂົ້າມາ. ໃນກາລະໂອກາດຂອງປະຫວັດສາດທີ່ສຳຄັນນີ້, ພວກເຮົາຈົ່ງຮ່ວມກັນສະເຫລີມສະຫລອງວັນສ້າງຕັ້ງສາຍພົວພັນທາງການທູດ ລາວ-ຈີນ ຄົບຮອບ 60 ປີ ແລະ ປີມິດຕະພາບ ລາວ-ຈີນ. ສືບຕໍ່ເຮັດໃຫ້ສອງປະເທດເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ, ສືບຕໍ່ໃຫ້ການສະໜັບສະໜູນໃນການປົກປັກຮັກສາຜົນປະໂຫຍດດ້ານອະທິປະໄຕ, ຄວາມໝັ້ນຄົງ ແລະການພັດທະນາເຊິ່ງກັນ ແລະກັນ, ຮ່ວມກັນປົກປັກຮັກສາລັດທິຫລາຍຝ່າຍດ້ວຍການກະທຳຕົວຈິງ, ເປັນແບບຢ່າງໃນການສົ່ງເສີມ ແລະຈັດຕັ້ງປະຕິບັດ 5 ຫລັກການຢູ່ຮ່ວມກັນໂດຍສັນຕິ, ຮ່ວມກັນສູ້ຊົນຢ່າງບໍ່ລົດລະ ເພື່ອຊຸກຍູ້ການຮ່ວມກັນສ້າງຄູ່ຮ່ວມຊາຕາກຳ ຈີນ-ລາວ ແລະຊຸກຍູ້ປະຊາຄົມໂລກໃຫ້ຮ່ວມກັນສ້າງປະຊາຄົມຮ່ວມຊາຕາກຳຂອງມວນມະນຸດ.

ມິດຕະພາບ ລາວ-ຈີນຈົ່ງໝັ້ນຍືນ!

ໂດຍ: CRI

ໃນຕອນເຊົ້າ ວັນທີ 24 ເມສາ 2021 ທ່ານ ພັນຄຳ ວິພາວັນ, ນາຍົກລັດຖະມົນຕີ ແລະ ຄະນະ ໄດ້ໄປຢ້ຽມ ຢາມ ໃຫ້ກຳລັງໃຈ ພະນັກງານແພດໝໍ ທີ່ປະຕິບັດໜ້າທີ່ ປິ່ນປົວຜູ້ຕິດເຊື້ອໂຄວິດ-19 ຢູ່ໂຮງໝໍມິດຕະພາບ 150 ຕຽງຫຼັງໃໝ່ ພ້ອມທັງ ກວດກາ-ຊີ້ນຳວຽກງານ ການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂ ການແຜ່ລະບາດ ຂອງພະ ຍາດໂຄວິດ-19, ໂດຍມີການນຳຂອງ ກະຊວງສາທາລະນະສຸກ, ນະຄອນຫຼວງວຽງຈັນ ແລະ ໂຮງໝໍມິດຕະພາບ 150 ຕຽງ ໃຫ້ການຕ້ອນຮັບ.

ໃນໂອກາດນີ້, ທ່ານນາຍົກລັດຖະມົນຕີ ແລະ ຄະນະ ໄດ້ຮັບຟັງການລາຍງານ ສະພາບການແຜ່ລະບາດ ຂອງພະ ຍາດໂຄວິດ-19 ຢູ່ປະເທດເຮົາ ໃນໄລຍະ 24 ຊົ່ວໂມງທີ່ຜ່ານມາ ແລະ ສະພາບການປິ່ນປົວຜູ້ຕິດເຊື້້ອໂຄວິດ-19 ທີ່ກຳ ລັງປິ່ນປົວຢູ່ໂຮງໝໍຕ່າງໆ; ໄດ້ຮັບຟັງການລາຍງານ ກ່ຽວກັບຄວາມພ້ອມດ້ານຕ່າງໆ ໃນການຮັບມືກັບການແຜ່ລະບາດ ຂອງພະຍາດໂຄວິດ-19 ໃນຕໍ່ໜ້າ ເປັນຕົ້ນ ດ້ານສະຖານທີ່ຮອງຮັບ, ຢາປິ່ນປົວ, ວັກຊິນປ້ອງກັນ, ນໍ້າຢາກວດເຊື້ອພະ ຍາດ, ອຸປະກອນການແພດຕ່າງໆ ລວມທັງ ແຜນການດ້ານວິຊາການ, ການປະຕິບັດນະໂຍບາຍ ຕໍ່ພະນັກງານແພດໝໍ, ຄວາມຫຍຸ້ງຍາກຕ່າງໆ ແລະ ອື່ນໆ.

ຫຼັງຈາກນັ້ນ, ທ່ານ ນາຍົກລັດຖະມົນ ໄດ້ມີຄຳເຫັນໂອ້ລົມ ໂດຍໄດ້ຍ້ອງ ຍໍຊົມເຊີຍພະນັກງານແພດໝໍ ແລະ ພາກສ່ວນຕ່າງໆ ທີ່ກ່ຽວຂ້ອງ ໃນການເອົາໃຈໃສ່ປະຕິບັດໜ້າທີ່ ແລະ ຄວາມຮັບ ຜິດຊອບຂອງຕົນ ດ້ວຍຄວາມດ້ວຍຄວາມອົດທົນພະຍາຍາມ, ເສຍສະຫຼະສູງ ແລະ ມີຜົນສຳເລັດດີສົມຄວນ.

ອັນສຳຄັນ, ທ່ານໄດ້ຊີ້ນຳໃຫ້ພາກສ່ວນ ແລະ ຂະແໜງການທີ່ກ່ຽວຂ້ອງ ເອົາໃຈໃສ່ຕໍ່ບາງວຽກງານ ເປັນຕົ້ນ ໃຫ້ນະຄອນຫຼວງວຽງຈັນ ເພີ່ມທະວີຄວາມເຂັ້ມງວດໃນການປະຕິບັດ ຄຳສັງເລກທີ 15/ນຍ, ລົງວັນທີ 21 ເມສາ 2021 ໂດຍສະເພາະ ວຽກງານກວດກາ ແລະ ຈຳກັດ ການເຄື່ອນໄຫວໄປມາ ຂອງຜູ້ຄົນ ໃນເຂດທີ່ມີຄວາມສ່ຽງສູງ ກໍ່ຄືບັນດາບ້ານ ທີ່ມີຜູ້ຕິດເຊື້ອພະຍາດ; ໃຫ້ພາກສ່ວນກ່ຽວຂ້ອງ ຄົ້ນຄວ້າສ້າງແຜນທົດລອງ ນຳຜູ້ຕິດເຊື້ອ ທີ່ມີອາການເບົາບາງ ໄປປິ່ນປົວຢູ່ນອກໂຮງໝໍ ກໍ່ຄືບ່ອນທີ່ມີເງື່ອນໄຂສະດວກ ຂອງຄອບຄົວຜູ້ຕິດເຊື້ອ ແຕ່ຢູ່ພາຍໃຕ້ການປິ່ນປົວ, ແນະນຳ, ຕິດຕາມ, ກວດກາ ແລະ ຄຸ້ມຄອງ ຂອງພະນັກງານແພດໝໍ ແລະ ເຈົ້າໜ້າທີ່ ທີ່ກ່ຽວຂ້ອງ ເພື່ອຫຼຸດຜ່ອນຄວາມແອອັດ ການປິ່ນປົວຢູ່ໂຮງໝໍ ໃນກໍລະນີມີການລະບາດຫຼາຍ ໃນຕໍ່ໜ້າ; ເອົາໃຈໃສ່ເບິ່ງແຍງການປະຕິບັດໜ້າທີ່ ແລະ ການດຳລົງຊີວິດ ຂອງພະນັກ ງານແພດໝໍໃຫ້ດີ, ໃຫ້ມີສຸຂະພາບແຂງແຮງ,

ຮັບປະກັນ ສາມາດປະຕິບັດໜ້າທີ່ໄດ້ດີຢ່າງຕໍ່ເນື່ອງ, ລວມທັງ ການປະຕິ ບັດນະໂຍບາຍຕໍ່ເຂົາເຈົ້າ ຕາມເງື່ອນໄຂ ແລະ ເວລາທີ່ເໝາະສົມ; ສືບຕໍ່ສີດຢາຂ້າເຊື້ອ ບັນດາບໍລິເວນ ທີ່ຜູ້ຕິດເຊື້ອ ໄດ້ໄປເຄື່ອນໄຫວ; ສືບຕໍ່ສັກວັກຊິນປ້ອງກັນພະຍາດໂຄວິດ-19 ໃຫ້ໄວ ໂດຍໃຫ້ມີລັກສະນະຍາດແຍ່ງ ແລະ ສູ້ຊົນຫຼາຍກວ່າເກົ່າ; ໃຫ້ສະໜອງ ແລະ ເປີດເຜີຍຂໍ້ມູນຜູ້ຕິດເຊື້ອທີ່ຈຳເປັນ ໃຫ້ແກ່ທ້ອງຖິ່ນຜູ້ຕິດເຊື້ອອາໄສຢູ່ ແລະ ສັງຄົມຮັບຊາບຢ່າງກວ້າງຂວາງ ເພື່ອສາມາດປະຕິບັດມາດຕະການປ້ອງກັນ ແລະ ແກ້ໄຂໄດ້ຢ່າງທັນການ ແລະ ຖືກຕ້ອງ; ໃຫ້ສະເໜີແຜນຕ່າງໆ ທີ່ເປັນທາງການໄວ ເປັນຕົ້ນ ແຜນຄວາມຕ້ອງການຕ່າງໆ, ແຜນການເຄື່ອນໄຫວວຽກງານຕ່າງໆ ທີ່ເປັນອັນໃໝ່; ດຳເນີນຂັ້ນຕອນຕ່າງໆ ໃນການແກ້ໄຂ ແລະ ຊ່ວຍເຫຼືອ ບັນດາພາກເອກະຊົນ ທີ່ມີເງື່ອນໄຂ ແລະ ສະເໜີເຈດຈຳນົງ ຢາກຊື້ວັກຊິນປ້ອງກັນພະຍາດ ມາສັກໃຫ້ພະນັກງານຂອງຕົນ ແລະ ຊ່ວຍເຫຼືອລັດຖະບານ ໃຫ້ໄວ ແລະ ທັນສະ ພາບການ; ເອົາໃຈໃສ່ ເຮັດວຽກໂຄສະນາເຜີຍແຜ່ ໃຫ້ແຂງແຮງກວ່າເກົ່າ ໃນນັ້ນ ດ້ານເນື້ອໃນ ໃຫ້ເພີ່ມຄວາມຮູ້ກ່ຽວກັບການປ້ອງກັນ, ການປິ່ນປົວຂັ້ນພື້ນຖານ, ລວມທັງ ການປຸກລະດົມປະຕິບັດພັນທະ ແລະ ການມີສ່ວນຮ່ວມຂອງສັງ ຄົມ ໃຫ້ສັງຄົມໄດ້ຮັບຮູ້-ເຂົ້າໃຈ ແລະ ເຂົ້າຮ່ວມຫຼາຍກວ່າເກົ່າ;

ໃນເວລາຕໍ່ມາ, ທ່ານ ພັນຄຳ ວິພາວັນ ແລະ ຄະນະ ໄດ້ສືບຕໍ່ໄປກວດກາເບິ່ງສະຖານທີ່ ເພື່ອກະກຽມຄວາມພ້ອມ ຮອງຮັບປິ່ນປົວຜູ້ຕິດເຊື້ອໂຄວິດ-19 ໃນກໍລະນີທີ່ມີການແຜ່ລະບາດຫຼາຍ ຢູ່ສະໜາມກິລາລ້ານຊ້າງ (ສະໜາມກິລາໃນຮົ່ມ) ທີ່ບ້ານດອນກອຍ, ເມືອງສີສັດຕະນາກ ຊຶ່ງເປັນໜຶ່ງສະຖານທີ່ ທີ່ມີຄວາມເໝາະສົມ.

Cr: Lao National Radio

ໃນວັນທີ 23 ເມສາ 2021 ທີ່ສໍານັກງານນາຍົກລັດຖະມົນຕີ, ທ່ານ ນາງ ທິບພະກອນ ຈັນທະວົງສາ ຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ໃນນາມຕາງໜ້າຫ້ອງວ່າການສຳນັກງານນາຍົກລັດຖະມົນຕີ ຂໍອະນຸຍາດຖະແຫລງຜົນກອງປະຊຸມສະໄໝສາມັນ ປະຈໍາເດືອນເມສາ ຂອງລັດຖະບານຊຸດທີ IX ທີ່ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 22 ແລະ ໄດ້ອັດລົງໃນຕອນແລງວັນທີ 23 ເມສາ 2021 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາທ່ານ ສະມາຊິກລັດຖະບານເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງ, ຄົ້ນຄວ້າປຶກສາຫາລື ແລະ ປະກອບຄຳເຫັນຢ່າງກົງໄປກົງມາດ້ວຍຄວາມຮັບຜິດຊອບສູງຕໍ່ 7 ເອກະສານທີ່ສຳຄັນ ຄື:

1. ໄດ້ຮັບຟັງບົດລາຍງານຮອບດ້ານ ການຈັດຕັ້ງປະຕິບັດວຽກງານ ຂອງລັດຖະບານ ປະຈໍາເດືອນເມສາ ແລະ ທິດທາງແຜນວຽກຈຸດສຸມ ເດືອນພຶດສະພາ 2021: ກອງປະຊຸມເຫັນວ່າການປະຕິບັດໜ້າທີ່ວຽກງານ ຂອງລັດຖະບານ ຊຸດທີ 9 ໃນເດືອນເມສານີ້ ເຖິງວ່າເປັນເວລາສັ້ນ ແຕ່ກໍໄດ້ສືບຕໍ່ເສີມຂະຫຍາຍມູນເຊື້ອອັນດີຂອງລັດຖະບານ ຊຸດທີ VIII ເຖິງແມ່ນວ່າຈະພົບກັບຄວາມຫຍຸ້ງຍາກຫລາຍດ້ານ ໃນນັ້ນ ມີສະພາບການແຜ່ລະບາດຂອງພະຍາດໂຄວິດ-19 ແຕ່ວຽກງານສ່ວນຫລາຍກໍໄດ້ສືບຕໍ່ດຳເນີນເປັນປົກກະຕິ ແລະ ມີຜົນສໍາເລັດໃນຫລາຍດ້ານ ເປັນຕົ້ນສາມາດຮັກສາສະຖຽນລະພາບທາງດ້ານການ ເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ໄດ້ໂດຍພື້ນຖານ, ການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ໄດ້ດຳເນີນໃນບາດກ້າວເບື້ອງຕົ້ນ ທີ່ມີລັກສະນະຕັ້ງໜ້າກວ່າເກົ່າ.

2. ໄດ້ພິຈາລະນາຮ່າງວິໃສທັດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕອນແຫ່ງຊາດ ໄລຍະ 10 ປີ (2021-2030) ແລະ ແຜນພັດທະນາເສດຖະກິດດີຈິຕອນ ແຫ່ງຊາດ ໄລຍະ 5 ປີ ຄັ້ງທີ I: ກອງປະຊຸມໄດ້ເຫັນດີດ້ານຫລັກການຮັບຮອງເອົາທັງ 3 ເອກະສານ ແລະ ມອບໃຫ້ພາກສ່ວນທີ່ກ່ຽວຂ້ອງ ນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະບານ ເພື່ອໃຫ້ມີເນື້ອໃນຄົບຖ້ວນສົມບູນ ເປັນຕົ້ນ ການຈັດລຽງໂຄງສ້າງ, ການອະທິບາຍຄໍາສັບ ແລະ ອື່ນໆ ໃຫ້ສອດຄ່ອງກັບສະພາບຕົວຈິງ ແລະ ສາມາດຈັດຕັ້ງປະຕິບັດໄດ້;ກໍານົດໜ້າວຽກຂອງຂະແໜງການໃນແຕ່ລະໄລຍະໃຫ້ຊັດເຈນ ແລະ ແທດເໝາະກັບຄວາມສາມາດໃນການຈັດຕັ້ງປະຕິບັດຕົວຈິງ.

3. ໄດ້ພິຈາລະນາຮ່າງເອກະສານກ່ຽວກັບການເພີ່ມທະວີການພັດທະນາຊັບພະຍາກອນມະນຸດ ໃຫ້ມີຄຸນນະພາບສູງ ແລະ ສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງການພັດທະນາ ໃນໄລຍະໃໝ່: ກອງປະຊຸມເຫັນດີດ້ານຫລັກການ ຮັບຮອງເອົາຮ່າງເອກະສານດັ່ງກ່າວ ມອບໃຫ້ພາກສ່ວນກ່ຽວຂ້ອງປັບປຸງເນື້ອໃນທີ່ຕິດພັນກັບກົນໄກ, ຫລັກສູດການຮຽນ-ການສອນ ຕາມການປະກອບຄຳເຫັນ ຂອງສະມາຊິກລັດຖະບານ ເພື່ອໃຫ້ມີຄວາມຈະແຈ້ງ, ສອດຄ່ອງກັບເງື່ອນໄຂຕົວຈິງ ແລະ ສາມາດປະຕິບັດໄດ້.

4. ໄດ້ພິຈາລະນາຮ່າງຍຸດທະສາດ ການພັດທະນາລະບົບສະຖາບັນການເງິນ-ເງິນຕາ 5 ປີ (2021-2025) ແລະ ວິໄສທັດຮອດປີ 2030 ສະບັບປັບປຸງ: ກອງປະຊຸມ ເຫັນດີດ້ານຫລັກການ ຮັບຮອງເອົາຮ່າງຍຸດທະສາດດັ່ງກ່າວ ໂດຍມອບໃຫ້ທະນາຄານ ແຫ່ງ ສປປ ລາວ ສົມທົບກັບພາກສ່ວນກ່ຽວຂ້ອງ ປັບປຸງບາງເນື້ອໃນໃຫ້ລະອຽດ, ຄົບຖ້ວນ, ຈະແຈ້ງ, ຮັດກຸມ, ສາມາດຈັດຕັ້ງປະຕິບັດ ແລະ ຄຸ້ມຄອງໄດ້ເປັນຕົ້ນ ມາດຕະການໃນການປ່ອຍກູ້, ການເຂົ້າເຖິງແຫລ່ງທຶນ, ມາດຕະການຄຸ້ມຄອງເງິນຕາ, ການປະຕິບັດນະໂຍ ບາຍອັດຕາແລກປ່ຽນ ຕາມກົນໄກຕະຫລາດ ທີ່ມີການຄຸ້ມຄອງຂອງລັດໃຫ້ຮັດກຸມຂຶ້ນຕື່ມ ແລະ ບັນຫາອື່ນໆ ຕາມການປະກອບຄໍາເຫັນຂອງສະມາຊິກລັດຖະບານ. ພ້ອມນັ້ນໄດ້ຊີ້ນໍາໃຫ້ທະນາຄານ ແຫ່ງ ສປປ ລາວ (1)ປັບປຸງກົງຈັກການຈັດຕັ້ງ ແລະ ກົນໄກການບໍລິຫານພາຍໃນ ຂອງສະຖາບັນການເງິນ, ການບໍລິການໃຫ້ມີຄວາມທັນສະໄໝ, ວ່ອງໄວ, ມີປະສິດທິຜົນສາມາດຊຸກຍູ້ສົ່ງເສີມໃຫ້ຜູ້ປະກອບການ ແລະ ຜູ້ຜະລິດພາຍໃນເຂົ້າເຖິງແຫລ່ງທຶນຢ່າງໂປ່ງໃສ ແລະ ສາມາດກວດສອບໄດ້; (2) ກຳນົດນະໂຍບາຍ ທາງດ້ານທຸລະກິດ ໃຫ້ສອດຄ່ອງກັບການຈັດຕັ້ງປະຕິບັດຕົວຈິງໃນແຕ່ລະໄລຍະ ໂດຍຫັນເປັນບາດກ້າວໃໝ່ ແລະ ມີລັກສະນະບຸກທະລຸຢ່າງແທ້ຈິງ.

5. ຮ່າງດໍາລັດ ວ່າດ້ວຍລົດບໍລິຫານລັດ (ສະບັບສ້າງໃໝ່) ແລະ ຮ່າງດໍາລັດວ່າດ້ວຍການປະ ກອບ ແລະ ຄຸ້ມຄອງລົດປະຈໍາຕໍາແໜ່ງພະນັກງານລະດັບສູງ (ສະບັບປັບປຸງ): ກອງປະຊຸມເຫັນດີດ້ານຫລັກການ ຮັບຮອງເອົາສອງຮ່າງດຳລັດດັ່ງກ່າວ ແຕ່ໃຫ້ຂະແໜງການທີ່ກ່ຽວຂ້ອງ ນຳໄປປັບປຸງຄືນ ຕາມຄຳເຫັນຂອງສະມາຊິກລັດຖະບານ ເປັນຕົ້ນ ການໃຫ້ນິຍາມຖືກຕ້ອງ-ຄົບຖ້ວນ, ການຈັດລຽງເນື້ອໃນ ໃຫ້ເປັນໝວດໝູ່, ຮັດກຸມ, ສັ້ນ-ກະທັດຮັດ, ອ່ານແລ້ວເຂົ້າໃຈງ່າຍ, ກຳນົດຂອບເຂດການນຳໃຊ້ ໃຫ້ຊັດເຈນ-ລະອຽດ-ຈະແຈ້ງ, ສອດຄ່ອງກັບສະພາບເງື່ອນໄຂຕົວຈິງໃນປັດຈຸບັນ ໂດຍສະເພາະ ທາງດ້ານເສດຖະ ກິດ-ສັງຄົມ, ການຈັດຕັ້ງ ແລະ ພື້ນທີ່ການນຳໃຊ້ລົດ ບົນພື້ນຖານແນໃສ່ເຮັດໃຫ້ການຄຸ້ມຄອງ-ນໍຳໃຊ້ລົດລັດ ແລະ ການປະຕິບັດນະໂຍບາຍ ມີຄວາມເປັນເອກະພາບລວມສູນ, ປະຢັດ-ຕ້ານການຟູມເຟືອຍ, ສາ ມາດເປັນບ່ອນອີງທີ່ໜັກແໜ້ນ ແລະ ຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນ.

6. ຮ່າງດໍາລັດ ວ່າດ້ວຍການແຕ່ງກາຍ:ເພື່ອເປັນການຊຸກຍູ້ສົ່ງເສີມ ແລະ ປົກປັກຮັກສາ ວັດທະ ນະທຳອັນດີງາມ ແລະ ເປັນເອກະລັກຂອງຊາດ, ຂອງເຜົ່າ ໃຫ້ມີຄວາມຍືນຍົງ, ທັງເປັນການສົ່ງເສີມພູມປັນຍາ ແລະ ຫົວຄິດປະດິດສ້າງຂອງຄົນລາວ ທາງດ້ານຫັດຖະກຳຢ່າງແທ້ຈິງ, ລັດຖະບານ ເຫັນສົມ ຄວນມີນິຕິກຳຄຸ້ມຄອງ, ຕິດຕາມ, ກວດກາ ແລະ ເປັນບ່ອນອີງ ເພື່ອຄວາມເປັນເອກະພາບ ໃນການກຳນົດເຄື່ອງນຸ່ງ ກໍ່ຄືຊຸດປະຈຳຊາດ ຂອງລາວເຮົາ ທັງເພດຍິງ ແລະ ເພດຊາຍ. ຜ່ານການພິຈາລະນາ, ກອງປະຊຸມເຫັນດີດ້ານຫລັກການ ຮັບຮອງເອົາການຄົ້ນຄວ້າດັ່ງກ່າວ ໂດຍໄດ້ຊີ້ນຳໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນຳໄປສົມທົບກັບພາກສ່ວນກ່ຽວຂ້ອງ ປັບປຸງຄືນ ຕາມຄຳເຫັນຂອງສະມາຊິກລັດຖະບານ ໂດຍປ່ຽນຊື່ເປັນດຳລັດວ່າດ້ວຍຊຸດແຕ່ງກາຍປະຈຳຊາດ, ນອກນັ້ນ ໃຫ້ກຳນົດຮູບແບບຂອງຊຸດ ເຊັ່ນ: ຄໍ, ຖົງ, ແຂນ, ກະດູມ, ຂາ, ປາຍເສື້ອ-ສິ້ນ ແລະ ອື່ນໆ.

ພ້ອມກັນນີ້, ກອງປະຊຸມຍັງໄດ້ຮັບຟັງການລາຍງານ ກ່ຽວກັບສະພາບການປ້ອງກັນ, ຄວບຄຸມ, ສະກັນກັ້ນ ແລະ ແກ້ໄຂ ການແຜ່ລະບາດ ຂອງພະຍາດ COVID-19 ຢູ່ ສປປ ລາວ, ຊຶ່ງກອງປະຊຸມ ໄດ້ຊີ້ນຳໃຫ້ຄະນະສະເພາະກິດ ປະເມີນຄືນສະພາບການຄວບຄຸມການແຜ່ລະບາດຂອງພະຍາດດັ່ງກ່າວ ແລ້ວລາຍງານຄືນຢ່າງທັນການສົມຄວນ ເພີ່ມມາດຕະການຄືແນວໃດ; ປະເມີນຄວາມພ້ອມດ້ານຕ່າງໆ ໃນການຮັບມືກັບການແຜ່ລະບາດຂອງພະຍາດ ເປັນຕົ້ນ ສະຖານທີ່ກັກກັນຜູ້ທີ່ມີຄວາມສ່ຽງຕິດເຊື້ອ ແລະ ປິ່ນປົວຄົນເຈັບ, ນໍ້າຢາກວດຫາເຊື້ອພະຍາດ, ຢາສັກປ້ອງກັນພະຍາດ, ອຸປະກອນການແພດ ແລະ ຄວາມຕ້ອງການດ້ານອື່ນໆ; ໃຫ້ຂະແໜງສາທາລະນະສຸກ ເລັ່ງສັກຢາກັນພະຍາດໃຫ້ໄວ; ໃຫ້ບັນດາຂະແໜງການ ຕິດຕາມ,ກວດກາການຈັດຕັ້ງປະຕິບັດຄຳສັ່ງ ເລກທີ 15/ນຍ ທີ່ຕິດພັນກັບໜ້າທີ່ ແລະ ຄວາມຮັບຜິດຊອບຂອງຂະແໜງການຕົນ ໂດຍມີການປະສານສົມທົບກັນ ຈັດຕັ້ງປະຕິບັດວຽກງານ ໃຫ້ມີປະສິດ ທິພາບ, ປະສິດທິຜົນ, ເຂັ້ມງວດ ແລະ ເດັດຂາດ.

ພ້ອມກັນນີ້, ທ່ານ ນາຍົກລັດຖະມົນຕີ, ບັນດາທ່ານ ຮອງນາຍົກລັດຖະມົນຕີ ແລະ ສະມາຊິກລັດຖະບານຈະລົງຕິດຕາມຊຸກຍູ້, ໃຫ້ກຳລັງໃຈພະນັກງານແພດ-ໝໍ, ກວດກາ ແລະ ຊີ້ນຳວຽກງານການຈັດຕັ້ງປະຕິບັດວຽກງານຕົວຈິງ ຢູ່ໂຮງໝໍ, ສະຖານທີ່ເກັບຕົວຢ່າງ ແລະ ສະຖານທີ່ຈຳກັດບໍລິເວນຕ່າງໆ.

ໃນການກ່າວປິດກອງປະຊຸມ ປະຈຳເດືອນເມສາ, ທ່ານນາຍົກລັດຖະມົນຕີ ໄດ້ຊີ້ນຳໃຫ້ສະມາຊິກລັດຖະບານ ນຳເອົາຜົນກອງປະຊຸມ ໄປຜັນຂະຫຍາຍເປັນແຜນລະອຽດ ແລະ ແຜນປະຕິບັດງານຂອງຂະແໜງການຕົນ. ພ້ອມກັນນີ້ ຍັງໄດ້ມີທິດຊີ້ນຳໃຫ້ເອົາໃຈໃສ່ວຽກງານຈຸດສຸມປະຈຳເດືອນພຶດສະພາ 2021 ດັ່ງນີ້:

1) ຂົງເຂດປ້ອງກັນຊາດປ້ອງກັນຄວາມສະຫງົບ:
ສືບຕໍ່ຮັກສາສະຖຽນລະພາບທາງດ້ານການເມືອງໃຫ້ໝັ້ນຄົງ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ. ພ້ອມກັນນັ້ນ, ກໍ່ສືບຕໍ່ເພີມທະວີການປະສານສົມທົບລະຫວ່າງຂະ ແໜງການກ່ຽວຂ້ອງ ແລະ ອົງການປົກຄອງທ້ອງຖິ່ນເພື່ອຮັບປະກັນຄວາມເຂັ້ມງວດການເຂົ້າອອກຢູ່ບັນດາດ່ານຊາຍແດນ ແລະ ສະກັດກັ້ນການລັກລອບເຂົ້າເມືອງແນໃສ່ປ້ອງກັນການລະບາດຂອງພະຍາດ ໂຄວິດ-19, ຄວາມບໍ່ສະຫງົບຕາມຊາຍແດນ ແລະ ບັນຫາອື່ນໆ;

2) ຂົງເຂດເສດຖະກິດ :

• – ສືບຕໍ່ລະດົມຂົນຂວາຍການລົງທຶນດ້ວຍຫຼາຍຮູບການ, ແກ້ໄຂບັນດາສິ່ງກີດຂວາງເພື່ອສ້າງເງື່ອນ ໄຂສະດວກໃຫ້ແກ່ນັກລົງທຶນ ແລະ ຍົກສູງປະສິດທິພາບການບໍລິການປະຕູດຽວ. ພ້ອມນີ້, ກໍເລັ່ງລັດການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດໃຫ້ມີປະສິດທິຜົນ ເພື່ອກະຕຸກຊຸກຍູ້ການສ້າງຖານລາຍຮັບເພີ່ມຂຶ້ນ.
• – ສືບຕໍ່ສຸມໃສ່ເກັບລາຍຮັບງົບປະມານ ໃຫ້ສໍາເລັດຕາມແຜນການ, ຮັບປະກັນການເບີກຈ່າຍເງິນ ເດືອນໃຫ້ເປັນປົກກະຕິ. ສຸມໃສ່ຊອກຫາແຫລ່ງດຸ່ນດ່ຽງ ເພື່ອຮັບປະກັນການຊຳລະໜີ້ສິນທັງພາຍໃນ ແລະ ຕ່າງປະເທດ, ສືບຕໍ່ປັບປຸງກົນໄກຫັນເປັນທັນສະໄໝການເກັບລາຍຮັບງົບປະມານໃຫ້ສໍາເລັດ ເພື່ອຮັບປະ ກັນການແກ້ໄຂບັນຫາຮົ່ວໄຫລຂອງງົບປະມານ; ກະກຽມລາຍງານສະຫລຸບຂາດຕົວງົບປະມານປີ 2020 ແລະ ການຈັດແບ່ງລາຍຮັບລາຍຈ່າຍງົບປະມານແຫ່ງລັດ 5 ປີ ຄັ້ງທີ 9 (2020-2025).
• – ສືບຕໍ່ຄຸ້ມຄອງອັດຕາເງິນເຟີ້ ແລະ ອັດຕາແລກປ່ຽນລະຫວ່າງທະນາຄານກັບຮ້ານແລກປ່ຽນເງິນຕາບໍ່ໃຫ້ມີຄວາມຫລຸດໂຕນກັນຫລາຍ ແລະ ໃຫ້ຢູ່ໃນລະດັບທີ່ສາມາດຄວບຄຸມໄດ້ ນັບທັງມີມາດຕະການຕິດ ຕາມການເຄື່ອນໄຫວຂອງທະນາຄານທຸລະກິດ, ສະຖາບັນການເງິນໃຫ້ເຄື່ອນໄຫວຖືກຕ້ອງຕາມກົດໝາຍແລະ ລະບຽບການພ້ອມທັງມີມາດຕະການສົ່ງເສີມການນໍາໃຊ້ເງິນກີບ ໃນການຊື້ຂາຍແລກປ່ຽນສິນຄ້າໃຫ້ຫລາຍຂຶ້ນກວ່າເກົ່າ.
• – ສືບຕໍ່ຕິດຕາມຊຸກຍູ້ ແລະ ສົ່ງເສີມການຜະລິດຂອງປະຊາຊົນ ໃນຂອບເຂດທົ່ວປະເທດ ໂດຍສະ ເພາະແມ່ນການຜະລິດ ເພື່ອສະໜອງໃຫ້ແກ່ສັງຄົມ ໃນໄລຍະການແຜ່ລະບາດຂອງພະຍາດໂຄວິດ ແລະ ເພື່ອສົ່ງອອກ.
• – ສືບຕໍ່ຄຸ້ມຄອງລາຄາສິນຄ້າອຸປະໂພກ ແລະ ບໍລິໂພກ, ການນໍາເຂົ້າສົ່ງອອກສິນຄ້າເພື່ອຊຸກຍູ້ການຜະລິດພາຍໃນ ແລະ ສົ່ງເສີມການຊົມໃຊ້ສິນຄ້າພາຍໃນຢ່າງກວ້າງຂວາງ ແລະ ເປັນຮູບປະທໍາ.
• – ສືບຕໍ່ສຸມໃສ່ປັບປຸງກົນໄກການອອກໃບຕາດິນ ໃຫ້ມີຄວາມສະດວກວ່ອງໄວ, ຮັບປະກັນຄຸນນະພາບ ແລະ ສຳເລັດຕາມແຜນການທີ່ກຳນົດໄວ້.
• – ຕິດຕາມປະລິມານນໍ້າ ແລະ ກວດກາບັນດາເຂື່ອນຕ່າງໆ ເພື່ອຮັບປະກັນຄວາມປອດໄພ ແລະ ການບໍລິຫານຈັດ ການນໍ້າບໍ່ໃຫ້ມີຜົນກະທົບຕໍ່ປະຊາຊົນ, ພ້ອມດຽວກັນນັ້ນກໍ່ໃຫ້ເອົາໃຈໃສ່ຕິດຕາມ ແລະຊຸກຍູ້ການຈັດຕັ້ງປະຕິບັດໂຄງການທີ່ໄດ້ອະນຸມັດໄປແລ້ວເຊັ່ນ: ໂຄງການໄຟຟ້າຖ່ານຫີນ, ໂຄງການສາຍສົ່ງ ແລະ ໂຄງການບໍ່ແຮ່ໃຫ້ມີປະສິດທິຜົນສູງສຸດ.
• – ກະກຽມຄວາມພ້ອມໃນການສ້ອມແປງເສັ້ນທາງ, ແກ້ໄຂບັນຫາດິນເຊາະເຈື່ອນຖົມທາງໃນຊ່ວງລະດູຝົນເພື່ອຮັບປະກັນການສັນຈອນໄປມາໃຫ້ມີຄວາມສະດວກ ແລະ ຮັບປະກັນຄວາມປອດໄພ. ພ້ອມໃຫ້ສືບຕໍ່ຊຸກຍູ້ໂຄງການທາງລົດໄຟລາວ-ຈີນ ແລະ ການກໍ່ສ້າງທາງດ່ວນໃຫ້ສາມາດປະຕິບັດໄດ້ຕາມແຜນ ການ.

3) ຂົງເຂດວັດທະນະທຳ-ສັງຄົມ

•  ສືບຕໍ່ເອົາໃຈໃສ່ກະກຽມການຮຽນການສອນ, ການສອບເສັງເລື່ອນຊັ້ນ ແລະ ການສອບເສັງຈົບຊັ້ນປໍ5, ມໍ4 ແລະ ມໍ 7 ໃຫ້ມີປະສິດທິຜົນ ແລະ ມີຄຸນນະພາບທັງໃຫ້ສອດຄ່ອງກັບເງື່ອນໄຂທີ່ມີການລະ ບາດຂອງພະຍາດໂຄວິດ 19.
•  ສືບຕໍ່ເພີ່ມທະວີການຄຸ້ມຄອງ, ຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດມາດຕະການປ້ອງກັນ, ຄວບຄຸມສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ທີ່ກໍານົດໄວ້ໃນຄໍາສັ່ງເລກທີ 15/ນຍ, ລົງວັນທີ 21 ເມສາ 2021 ພ້ອມດຽວກັນນັ້ນກໍ່ສືບຕໍ່ແຈກຢາຍ ແລະ ດໍາເນີນການສັກຢາວັກຊິນຕ້ານພະຍາດໂຄວິດ 19 ໃຫ້ບັນດາກຸ່ມເປົ້າໝາຍ ຢ່າງເປັນລະບົບ, ຫລີກເວັ້ນຄວາມສ່ຽງ ໃນການຕິດເຊື້ອ.
•  ສືບຕໍ່ຕິດຕາມຜົນກະທົບ ຈາກມາດຕະການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ 19 ຕໍ່ຜູ້ປະກອບການ ແລະ ແຮງງານ.
•  ສືບຕໍ່ຕິດຕາມສະພາບຫາງສຽງຂອງສັງຄົມ ທີ່ມີລັກສະນະສ້າງພາບພົດອັນບໍ່ດີຕໍ່ພັກ ແລະລັດຖະບານ, ເອົາໃຈໃສ່ໂຄສະນາເຜີຍແຜ່ຂໍ້ມູນຂ່າວສານ ໃນການປ້ອງກັນ, ຄວບຄຸມ, ສະກັດກັ້ນ ແລະແກ້ໄຂການແຜ່ລະບາດຂອງພະຍາດໂຄວິດ 19.
•  ສືບຕໍ່ຕິດຕາມເຝົ້າລະວັງການປ່ຽນແປງດິນຟ້າອາກາດ ເພື່ອສະໜອງຂໍ້ມູນຂ່າວສານໃຫ້ທັນສະ ພາບການເພື່ອໃຫ້ປະຊາຊົນ ໄດ້ກະກຽມຮັບມືກັບການປ່ຽນແປງດັ່ງກ່າວ. ພ້ອມທັງຕິດຕາມເຝົ້າລະວັງ ແລະ ກະກຽມຄວາມພ້ອມໃນດ້ານຕ່າງໆເພື່ອຕ້ານແລ້ງຕ້ານຖ້ວມ.

4) ຂົງເຂດການປົກຄອງແລະຍຸຕິທໍາ :

•  ສືບຕໍ່ປັບປຸງກົງຈັກ, ການມອບໂອນວຽກງານຂອງກະຊວງວິທະຍາສາດ ແລະ ເຕັກໂນໂລຊີໃຫ້ຂະແໜງການທີ່ກ່ຽວຂ້ອງໃຫ້ສຳເລັດໂດຍໄວ. ພ້ອມດຽວກັນກໍ່ສືບຕໍ່ເປັນໃຈກາງໃນການກວດກາ ແລະປັບປຸງຄືນພາລະບົດບາດຂອງຂະແໜງການຕ່າງໆ ໃຫ້ສອດຄ່ອງກັບລະບຽບແລະກົນໄກການເຮັດວຽກຂອງລັດຖະບານຊຸດທີ IX.
•  ສືບຕໍ່ປັບປຸງກົດໝາຍ, ບັນດານິຕິກຳຕ່າງໆຈຳນວນໜຶ່ງໃຫ້ມີຄວາມສອດຄ່ອງຕາມຄວາມຮຽກຮ້ອງຕ້ອງການໃໝ່ ໂດຍປະສານສົບທົບບັນດາກະຊວງ ແລະອົງການໃນການກະກຽມຮ່າງກົດໝາຍທີ່ມີແຜນນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX.

5) ຂົງເຂດວຽກງານການຕ່າງປະເທດ :

• ສືບຕໍ່ຕິດຕາມຢ່າງໃກ້ຊິດ ກ່ຽວກັບສະພາບການພາກພື້ນ ແລະ ສາກົນໂດຍມີການວິເຄາະວິໄຈເລິກເຊິ່ງກ່ຽວກັບຄວາມສ່ຽງ ແລະ ທ່າອ່ຽງຜົນກະທົບທາງດ້ານການເມືອງ, ເສດຖະກິດແລະສັງຄົມຕໍ່ປະເທດເຮົາທັງມີມາດຕະການຮັບມືທີ່ເປັນລະບົບຮັດກຸມ ເພື່ອສືບຕໍ່ສ້າງສະພາບແວດລ້ອມອັນເອື້ອອໍານວຍໃຫ້ແກ່ການຮ່ວມມືໃນພາກພື້ນ ແລະ ສາກົນ. ພ້ອມກັນນີ້ ກໍ່ໃຫ້ສືບຕໍ່ກະກຽມຮອບດ້ານແຜນການເຄື່ອນ ໄຫວວຽກງານຕ່າງປະເທດຂອງການນໍາຂັ້ນສູງຂອງພັກ ແລະ ລັດ ຕາມກົນໄກຜ່ານປະຕູດຽວຢູ່ກະຊວງການຕ່າງປະເທດ.

6) ກະຊວງ, ອົງການຂັ້ນສູນກາງ ແລະ ອົງການປົກຄອງທ້ອງຖິ່ນທຸກຂັ້ນ ຕ້ອງໄດ້ສືບຕໍ່ເພີ່ມທະວີການໂຄສະນາເຜີຍແຜ່, ສຶກສາອົບຮົມຢ່າງກວ້າງຂວາງ ແລະ ເລິກເຊິ່ງດ້ວຍຫລາຍຮູບແບບ ແລະ ວິທີການເພື່ອໃຫ້ພະນັກງານ, ນັກຮົບ ແລະ ປະຊາຊົນບັນດາເຜົ່າ ເພີ່ມຄວາມເປັນເຈົ້າໃນການປະຕິບັດຄຳສັ່ງຂອງທ່ານນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານເພື່ອຕ້ານພະຍາດໂຄວິດ 19, ສະບັບເລກທີ15/ນຍ, ລົງວັນທີ21 ເມສາ 2021.

ທັງໝົດນັ້ນແມ່ນຜົນຂອງກອງປະຊຸມລັດຖະບານ ສະໄໝສາມັນປະຈໍາເດືອນເມສາ 2021 ຂອງລັດຖະບານຊຸດທີ IX.

ໄລຍະນີ້ພວກເຮົາກຳລັງປະຕິບັດຄຳສັ່ງເລກທີ 15 ຂອງທ່ານນາຍົກລັດຖະມົນຕີ ກ່ຽວກັບການເພີ່ມທະວີມາດຕະການສະກັດກັ້ນ, ຄວບຄຸມ ແລະກຽມຄວາມພ້ອມຮອບດ້ານ ເພື່ອຕ້ານພະຍາດCOVID-19 . ສະນັ້ນ ຂໍຮຽກຮ້ອງໃຫ້ທຸກພາກສ່ວນໃນທົ່ວສັງຄົມ ຕື່ນຕົວ, ເປັນເຈົ້າການ, ໃຫ້ການຮ່ວມມື ແລະພ້ອມກັນປະຕິບັດປະຕິບັດມາດຕະການຕ່າງໆ ທີ່ກຳນົດໄວ້ຢ່າງເຂັ້ມງວດ.
ພາບ-ເນື້ອໃນ: ກົມປະຊາສຳພັນ ຫສນຍ