Home Blog Page 214

ສຸດຍອດ! ຍິງຊາວອັບຟຣິກາໃຕ້ ອາຍຸ 37 ປີ ໃຫ້ກຳເນີດລູກ 10 ຄົນ ໃນຄັ້ງດຽວ

By
ໂທລະໂຄ່ງ THOLAKHONG
-
0

ຍິງທ່ານໜຶ່ງ ຊື່ວ່າ Gosiame Thamara Sithole ອາຍຸ 37 ປີ ຊາວອັບຟຣິກາໃຕ້ ໃຫ້ກຳເນີດລູກ 10 ຄົນໃນຄັ້ງດຽວ ເຊິ່ງເປັນການຖືພາຄັ້ງທີ່ສອງຂອງລາວ. ຖືພາຄັ້ງທຳອິດກໍແມ່ນແຝດ 2 ຄົນ ປັດຈຸບັນອາຍຸ 6 ປີ ເຊິ່ງລາວມີລູກທັງໝົດຕອນນີ້ 12 ຄົນ.

ຂໍ້ມູນໄດ້ຖືກເປີດເຜີຍໃນວັນທີ 8 ມິຖຸນາ 2021 ວ່າ ແຝດທັງ 10 ຄົນປະກອບໄດ້ດ້ວຍ ຊາຍ 7 ຄົນ, ຍິງ 3 ຄົນ ລາວບອກວ່າ ເປັນການຖືພາທີ່ເກີດຂຶ້ນໂດຍທຳມະຊາດ ເຊິ່ງຕອນທຳອິດແພດວິໄຈວ່າລາວຖືພາແຝດ 6 ຄົນເຊິ່ງເປັນການເບິ່ງຈາກການສະແກນກວດທັງ 2 ຄັ້ງ ແຕ່ລາວກໍບໍ່ເຊື່ອ ແລະ ຄິດວ່າລູກແຝດໃນທ້ອງມີພຽງແຕ່ 2-3 ຄົນເທົ່ານັ້ນ.

ແຕ່ເມື່ອເວລາຜ່ານໄປທ້ອງຂອງລາວກໍໄດ້ໃຫຍ່ຂຶ້ນເລື້ອຍໆ ລາວກໍເລີຍເຊື່ອ ເຮັດໃຫ້ນອນບໍ່ຫຼັບ ແລະ ເປັນຫ່ວງລູກໆໃນທ້ອງ ແຕ່ເມື່ອຮອດມື້ເກີດລູກກໍພົບວ່າມີເຖິງ 10 ຄົນດ້ວຍກັນ ໂດຍເປັນການຜ່າເອົາລູກອອກ ເຊິ່ງລູກໆຕ້ອງຢູ່ໃນຄວາມດູແລຂອງແພດຢ່າງໜ້ອຍ 2 ເດືອນ.

ສໍາເລັດໂຄງການກໍ່ສ້າງ ຫໍພັກນັກຮຽນ ບ້ານທົ່ງແຄະ

By
ໂທລະໂຄ່ງ THOLAKHONG
-
0

ໃນຕອນເຊົ້າ ຂອງວັນທີ 4 ມິຖຸນາ 2021 ທີ່ຜ່ານມານີ້, ໄດ້ຈັດພິທີມອບ-ຮັບໂຄງການກໍ່ຫໍພັກນັກຮຽນ ບ້ານທົ່ງແຄະ ພາຍໃຕ້ການເປັນປະທານຂອງທ່ານ ເພັດສະໃໝ ໄຊຍະທິຈັກ ເລຂາພັກເມືອງ ເຈົ້າເມືອງຄໍາເກີດ ເປັນປະທານຮ່ວມໂດຍ ທ່ານ ພັນເອກ ສຸກນິລັນ ຄໍາພິລາວົງ ອໍານວຍການ ບໍລິສັດ ລັດ ພັດທະນາຊົນນະບົດ ມີຄະນະກໍາມະການມາຈາກ ພະແນກ ພະລັງງານ ແລະ ບໍ່ແຮ່ແຂວງ-ເມືອງ ຫົວໜ້າຫ້ອງວ່າການແຂວງ-ເມືອງ ແລະ ພະແນກການທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວໄດ້ຮັບຟັງຜົນການຈັດຕັ້ງປະຕິບັດສອງໂຄງການຈາກທ່ານ ພັນໂທ ຄໍາອ້ວນ ດວງບຸນມາ ຮອງອໍານວຍການບໍລິສັດ ລັດ ພັດທະນາຊົນນະບົດ ໃນນາມຜູ້ຮັບເໝົາກໍ່ສ້າງທ່ານໄດ້ກ່າວວ່າ: ໂຄງການກໍ່ສ້າງຫໍພັກນັກຮຽນໂຮງຮຽນມັດທະຍົມບ້ານທົ່ງແຄະ ແມ່ນມີມູນຄ່າການກໍ່ສ້າງທັງໝົດ 316 ລ້ານກວ່າກີບ, ເລີ່ມການກໍ່ສ້າງແຕ່ວັນທີ 22 ທັນວາ 2020 ແລະ ສໍາເລັດການກໍ່ສ້າງ ວັນທີ 22 ມີນາ 2021 ໄລຍະເວລາ 3 ເດືອນ; ຫໍພັກນັກຮຽນໂຮງຮຽນມັດທະຍົມບ້ານທົ່ງແຄະເປັນອາຄານຊັ້ນດຽວຂະໜາດ 9×24 ແມັດ, ມີ 6 ຫ້ອງນອນ 2 ຫ້ອງນໍ້າລວມຢູ່ດ້ານນອກອາຄານ, ພື້ນຄັດມັນ, ຝາກໍ່ດ້ວຍດິນບ໋ອກໂບກ 2 ໜ້າ, ຫຼັງຄາໂຄງເຫຼັກມຸງກະເບື້ອງ ແລະ ມີລະບຽງດ້ານໜ້າກວ້າງ 2 ແມັດພ້ອມຕັ່ງນັ່ງຍາວ.

ຈາກນັ້ນ ເຈົ້າຂອງໂຄງການກໍ່ໄດ້ເຊັນມອບໂຄງການໃຫ້ເມືອງ-ເມືອງມອບໃຫ້ບ້ານເພື່ອໃຫ້ບ້ານໄດ້ນໍາໃຊ້ ແລະ ບູລະນະຂັ້ນຕໍ່ໄປ.

ກໍລະນີທໍາອິດຂອງລາວ ທີ່ຖືກຕັດຂາ ຍ້ອນຕິດເຊື້ອພະຍາດ ໂຄວິດ-19

By
ໂທລະໂຄ່ງ THOLAKHONG
-
0

ໂອກາດທີ່ ທ່ານ ຮສ.ດຣ ນາງ ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກ ຮ່ວມຖະແຫຼງຂ່າວ ທີ່ກະຊວງສາທາລະນະສຸກ ໃນວັນທີ 8 ມິຖຸນາ 2021 ກໍລະນີຄົນເຈັບທີ່ຕິດເຊື້ອພະຍາດໂຄວິດ 19 ແລະຖືກຕັດຂາເປັນຜູ້ທໍາອິດຂອງລາວວ່າ: ຜູ້ຕິດເຊື້ອໂຄວິດ-19 ທີ່ຖືກຕັດຂາແມ່ນເພດຍິງ ອາຍຸ 65 ປີ, ມີພະຍາດປະຈຳໂຕເປັນເບົາຫວານ ແລະ ຄວາມດັນ, ຕໍ່ມາກວດພົບເປັນເສັ້ນເລືອດຕີບໃນສະໝອງ, ມີການອ່ອນແຮງຢູ່ແຂນ, ຂາ ເບື້ອງຊ້າຍ, ພ້ອມເກີດມີກ້ອນເລືອດກ້າມໄປອຸດຕັນຢູ່ລຸ່ມຫົວເຂົ່າເບື້ອງຊ້າຍ ຈົນມາຮອດວັນທີ 2 ມິຖຸນາ ທີມແພດໝໍຈຶ່ງກອບກູ້ເອົາຊີວິດຜູ້ກ່ຽວດ້ວຍການຕັດຂາເບື້ອງທີ່ມີບັນຫານັ້ນ.

ຮສ.ດຣ ນາງ ບົວເທບ ພູມິນ ໃຫ້ຮູ້ວ່າ: ພາຍຫຼັງທີ່ເກີດມີການລະບາດຂອງເຊື້ອພະຍາດໂຄວິດ-19 ມີຫຼາຍປະເທດໄດ້ຄົ້ນຄວ້າ ກ່ຽວກັບອາການສ່ຽງ ຫຼື ອາການສົນ ໂດຍມີ 65 ຫົວຂໍ້ ກ່ຽວພັນ ຫຼື ເກີດຂຶ້ນກັບຜູ້ຕິດເຊື້ອ ໂດຍຈະມີ 10 ລາຍການທີ່ພົບເລື້ອຍໆຄື: ໃນ 65 ຫົວຂໍ້ ມີ 31 ຫົວຂໍ້ແມ່ນກ່ຽວກັບການເສຍຫາຍຂອງປອດ; ໃນ 28 ຫົວຂໍ້ ແມ່ນເກີດເລືອດກ້າມເປັນກ້ອນຢູ່ໃນເສັ້ນເລືອດດໍາ, ເສັ້ນເລືອດນິ້ງ ແລະ ເສັ້ນເລືອດເຕັ້ນ; ແລະ ໃນ 26 ຫົວຂໍ້ ພົບວ່າມີບັນຫາທາງດ້ານຫົວໃຈ; ໃນ 23 ຫົວຂໍ້ແມ່ນອຸປະຕິເຫດເສັ້ນເລືອດໃນສະໝອງ; ໃນ 20 ຫົວຂໍ້ພົບວ່າມີບັນຫາທາງດ້ານລະບົບປະສາດ; ໃນ 9 ຫົວຂໍ້ພົບວ່າມີບັນຫາໝາກໄຂ່ຫຼັງ; ໃນ 4 ຫົວຂໍ້ພົບມີບັນຫາດ້ານຕັບ; ອີກ 4 ຫົວຂໍ້ແມ່ນມີບັນຫາດ້ານສຸຂະພາບຈິດ, ຈຸລັງສະໝອງ, ກ້ອນເລືອດນ້ອຍອຸດຕັນ.

ທີມແພດຕ່າງປະເທດໄດ້ຄົ້ນຄວ້າອີກວ່າ ກຸ່ມສ່ຽງທີ່ເປັນເສັ້ນເລືອດໃນສະໝອງຕີບ ມັກຈະເກີດມີອາການເລືອດກ້າມອຸດຕັນອະໄວຍະວະສ່ວນໃດໜຶ່ງໃນຮ່າງກາຍ ໂດຍສະເພາະເບື້ອງທີ່ບໍ່ຄ່ອຍເໜັງຕີງ ແລະ ຈະພົບເຫັນຫຼັງເກີດອາການເສັ້ນເລືອດໃນສະໝອງຕີບ ພາຍໃນ 2-7 ວັນ ແລະ ຈະເກີດຫຼາຍທີ່ສຸດແມ່ນບີແຂ່ງ ແລະ ກ້ອງຫົວເຄົ່າ ເຊິ່ງຄົນເຈັບຕິດເຊື້ອຂອງຄົນລາວທີ່ຖືກຕັດຂາກໍ່ຢູ່ໃນກໍລະນີນີ້.

ສະມາຄົມແພດຫົວໃຈໄດ້ຄົ້ນຄວ້າ ແຕ່ເດືອນ ຕຸລາ 2019 ຫາເດືອນ ມິນາ 2020 ພົບວ່າ 1ສ່ວນ3ຂອງຜູ້ມີອາການໜັກກໍລະນີກ້ອນເລືອດອຸດຕັນ ຢູ່ບ່ອນໃດບ່ອນໜຶ່ງ ແລ້ວເຮັດໃຫ້ອະໄວຍະວະຢູ່ລຸ່ມບ່ອນອຸດຕັນນັ້ນ ບໍ່ສາມາດມີເລືອດໄປລ້ຽງໄດ້ຄືເສຍຫາຍໄປ.

ກໍລະນີການຄົ້ນຄວ້າທີ່ຖືກພິມເຜີຍແຜ່ໃນເດືອນທັນວາ 2020 ໃຫ້ຮູ້ວ່າ ຜ່ານການຄົ້ນຄວ້າ ແຕ່ວັນທີ 25 ມັງກອນ ຮອດວັນທີ 4 ມິນາ 2020 ໂດຍເອົາຄົນເຈັບທັງໝົດ 1.419ຄົນ ທີ່ເປັນພະຍາດໂຄວິດ19ບວກ ແຕ່ບໍ່ມີອາການສະແດງອອກ ມາຕິດຕາມແຕ່ຮອບ1 ເຖິງຮອບ4 ໃນຈໍານວນທັງໝົດນີ້ ຈະເຫລືອ 121ຄົນ ທີ່ມີສ່ວນກ່ຽວຂ້ອງທີ່ມີກ້ອນເລືອດອຸດຕັນໃນເສັ້ນເລືອດ ອາຍຸສະເລ່ຍໃນກຸ່ມຄົນດັ່ງກ່າວແມ່ນ 53ປີ, ພົບວ່າເສັ້ນເລືອດມັກອຸດຕັນຫລາຍທີ່ສຸດ ອັນດັບໜຶ່ງແມ່ນຢູ່ບີແຂ່ງ, ຮອງລົງມາແມ່ນຮອຍພັບກ້ອງຫົວເຂົ່າ, ອັນດັບສາມແມ່ນຢູ່ເທິງຫົວເຂົ່າ ແລະກົກຂາ ອັນດັບສີ່ ແມ່ນຢູ່ເສັ້ນເລືອດໃຫ່ຍ ໃນນີ້ 58,8%ເປັນຢູ່ເບື້ອງດຽວ, 83,88% ເປັນຢູ່ສອງເບື້ອງ. ໃນການຄົ້ນຄວ້າຂອງເພິ່ນ ຈໍານວນຄົນເຈັບທີ່ຕິດເຊື້ອພະຍາດໂຄວິດ19 ຈໍານວນ 121ຄົນ ໃນນີ້ 48% ແມ່ນມີຄວາມສ່ຽງສູງທີ່ຈະເປັນກ້ອນເລືອດອຸດຕັນຢູ່ຈຸດໃດໜຶ່ງ. ທຽບໃສ່ຄົນເຈັບທີ່ນອນປິ່ນປົວຢູ່ຕຶກພາຍໃນທົ່ວໄປ ມີຄວາມສ່ຽງທີ່ຈະເປັນມີແຕ່9%ເທົ່ານັ້ນ. ສະນັ້ນຄົນເຈັບທີ່ຕິດເຊື້ອພະຍາດໂຄວິດ19 ເຖິງບໍ່ສະແດງອາການກໍຕາມ 48% ມີຄວາມສ່ຽງທີ່ຈະເປັນກ້ອນເລືອດອຸດຕັນຢູບ່ອນໃດໜຶ່ງ.
ຮສ.ດຣ ນາງ ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາລະນະສຸກກ່າວຢໍ້າວ່າ: ເຖິງຢ່າງໃດກໍ່ຕາມພາຍຫຼັງທີ່ຜູ້ກ່ຽວໄດ້ຕັດຂາໄປແລ້ວ ທາງທີມວິຊາສະເພາະເຮົາກໍ່ຈະເອົາໃຈໃສ່ແນະນຳ ແລະ ໃຫ້ຄູ່ມືກັບແພດໝໍ ພ້ອມກັບຜູ້ກ່ຽວເພື່ອຈະນຳໄປບໍາບັດພາຍຫຼັງຖືກຕັດຂາແລ້ວ ເພື່ອເຮັດແນວໃດຈະຊ່ວຍໃຫ້ຜູ້ກ່ຽວສາມາດໃສ່ຂາທຽມໄດ້.

ໂດຍ: ເຂີຍຫລ້າ. ວິທະຍຸກະຈາຍສຽງແຫ່ງຊາດລາວ

ເຈົ້າແຂວງ ໄຊຍະບູລີ ຊຸກຍູ້ການປູກເຂົ້ານາປີຢູ່ເມືອງ ຊຽງຮ່ອນ

By
ໂທລະໂຄ່ງ THOLAKHONG
-
0

ໃນວັນທີ 8 ມິຖຸນາ ປີນີ້ ທ່ານ ພົງ ສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມຄະນະ ໄດ້ລົງໄດ້ຕິດຕາມ ແລະ ຊຸກຍູ້ຂະບວນການຜະລິດລະດູຝົນ, ໂດຍສະເພາະແມ່ນການປູກເຂົ້ານາປີຂອງປະຊາຊົນເມືອງ ຊຽງຮ່ອນ, ໃຫ້ການຕ້ອນຮັບ ຂອງ ກຸ່ມຊາວນາ ເມືອງຊຽງຮ່ອນ.

ປະຈຸບັນຂະບວນການຜະລິດລະດູຝົນຢູ່ເມືອງ ຊຽງຮ່ອນ ແມ່ນສືບຕໍ່ເປັນຂະບວນຟົດຟື້ນ ເປັນຕົ້ນແມ່ນການປູກເຂົ້ານາປີ, ເຊິ່ງໃນປີນີ້ ມີເນື້ອທີ່ແຜນການຜະລິດລະດູຝົນລວມທັງໝົດ 10.900 ເຮັກຕາ, ເປັນເນື້ອທີ່ປູກເຂົ້າລວມມີ 4.158 ເຮັກຕາ, ໃນນັ້ນ: ເນື້ອທີ່ນາປີ 3.358 ຮຕ, ມາຮອດປັດຈຸບັນແມ່ນຕົກກ້າສຳເລັດ 100% , ກຽມດິນ ໄດ້ 80% ເທົ່າກັບ 2.686,56 ຮຕ, ປັກດຳໄດ້ 1.175,37 ຮຕ ເທົ່າກັບ 35% ແລະ ເນື້ອທີ່ເຂົ້າເນີນສູງແຜນການ 800 ຮຕ ມາຮອດປະຈຸບັນແມ່ນໄດ້ປູກສຳເລັດແລ້ວ 80%, ແນວພັນທີ່ປະຊາຊົນນໍາມາປູກສ່ວຍໃຫຍ່ແມ່ນພັນເຂົ້າປັບປຸງ ແລະ ພັນພື້ນເມືອງຈໍານວນໜຶ່ງ,

ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ຮຽກຮ້ອງໃຫ້ຊາວນາຈົ່ງ ເອົາໃຈໃສ່ໃນການປັກດໍາເຂົ້ານາປີໃຫ້ສໍາເລັດທ່ວງທັນກັບລະດູການ, ຂົງເຂດໃດທີ່ປັກດໍາແລ້ວກໍ່ເອົາໃຈໃສ່ເບິ່ງແຍງ, ບົວລະບັດຮັກສາດ້ວຍການໃສ່ຝຸ່ນ, ໃສ່ປຸຍ, ທັງນີ້ກໍ່ເພື່ອເຮັດໃຫ້ຜົນຂອງການຜະລິດໄດ້ຫຼາຍ, ນອກຈາກການປູກເຂົ້າແລ້ວກໍ່ຕ້ອງເອົາໃຈໃສ່ປູກພືດອື່ນໆອີກເຊັ່ນ: ໝາກເພັດ, ໝາກເຂືອ, ສາລີຫວານ, ເຜືອກ-ມັນ ພືດຜັກ ແລະ ອື່ນໆເພື່ອເປັນສະບຽງອາຫານແຮໄວ້ໃນຄອບຄົວ.

ຂ່າວ-ພາບ: ອຸ່ນເຮືອນ ໂພທິລັກ

ສປປ ລາວ ໄດ້ຮັບເລືອກຕັ້ງ ເປັນຮອງປະທານສະມັດຊາໃຫຍ່ ສປຊ ສະໄຫມທີ 76

By
ໂທລະໂຄ່ງ THOLAKHONG
-
0

ສປປລາວ ໄດ້ຮັບເລືອກຕັ້ງ ເປັນຮອງປະທານສະມັດຊາໃຫຍ່ ສປຊ ສະໄຫມທີ 76

ໃນຕອນເຊົ້າຂອງວັນທີ 7 ມີຖຸນາ 2021 ທີ່ ສຳນັກງານໃຫຍ່ ອົງການ ສປຊ ທີ່ນະຄອນນິວຢອກ, ສ. ອາເມລິກາ ໄດ້ມີກອງປະຊຸມແບບເປີດກວ້າງຂອງ ສະມັດຊາໃຫຍ່ ສປຊ ສະໄໝທີ 75 ຄັ້ງທີ 72, ພາຍໃຕ້ການເປັນປະທານຂອງທ່ານ ໂວນຄານ ບອສເກີ (Volkan Bozkir), ປະທານສະມັດຊາໃຫຍ່ ສປຊ ສະໄໝທີ 75. ໃນນັ້ນ, ກອງປະຊຸມໄດ້ມີການເລືອກຕັ້ງເອົາປະທານ-ຮອງປະທານສະມັດຊາໃຫຍ່ ສປຊ ສະໄໝທີ 76 ແລະ ເລືອກຕັ້ງເອົາປະທານຂອງ 6 ຄະນະກໍາມະການຫຼັກຂອງ ສະມັດຊາໃຫຍ່ ສປຊ ສະໄໝທີ 76.

ໃນການເລືອກຕັ້ງປະທານສະມັດຊາໃຫຍ່ ສປຊ ສະໄໝທີ 76 ໄດ້ມີຜູ້ລົງສະຫມັກສອງທ່ານຄື: ທ່ານ Zalmai Rassoul, ອະດີດລັດຖະມົນຕີການຕ່າງປະເທດ ອັຟການິສຖານ ແລະ ທ່ານ Abdulla Shahid (ລັດຖະມົນຕີກະຊວງການຕ່າງປະເທດ ຂອງ ມາວດິບ) ໂດຍຜ່ານການປ່ອນບັດແບບປິດລັບ. ຜົນການເລືອກຕັ້ງແມ່ນ ທ່ານ Abdulla Shahid ໄດ້ຮັບເລືອກຕັ້ງໃຫ້ເປັນປະທານສະມັດຊາໃຫຍ່ ສປຊ ສະໄຫມທີ 76. ພ້ອມກັນນັ້ນ, ກໍ່ໄດ້ມີການເລືອກຕັ້ງເອົາຮອງປະທານສະມັດຊາໃຫຍ່ ສປຊ ສະໄໝທີ 76 ຈໍານວນ 21 ປະເທດ ເຊິ່ງເປັນຕົວແທນຈາກແຕ່ລະພາກພື້ນ ບວກກັບສະມາຊິກຖາວອນຂອງສະພາຄວາມຫມັ້ນຄົງ ສປຊ, ໃນນັ້ນ ຈາກພາກພື້ນອາຊີ-ປາຊີຟິກ ມີ 4 ປະເທດໄດ້ຮັບເລືອກຄື: ບັງກະລາເດັດ, ກູເວດ; ສປປ ລາວ ແລະ ຟິລິບປິນ.

ການເຮັດຫນ້າທີ່ ຂອງ ປະທານ ແລະ ຮອງປະທານສະມັດຊາໃຫຍ່ ສປຊ ສະໄໝທີ 76 ແມ່ນຈະເລີ້ມຈາກ ເດືອນກັນຍາ 2021 ຫາ ເດືອນກັນຍາ 2022, ເຊິ່ງເປັນໄລຍະທີ່ມີຄວາມຫມາຍສໍາຄັນຍິ່ງ ໃນທ່າມກາງທີ່ສະພາບແວດລ້ອມສາກົນມີການຜັນແປຢ່າງໄວວາ ແລະ ຄາດຄະເນໄດ້ຍາກ, ໂດຍສະເພາະ ແມ່ນການຟື້ນຟູຈາກສະພາບວິກິດການອັນເກີດຈາກພະຍາດ ໂຄວິດ-19, ຂໍ້ຂັດແຍ່ງ ທີ່ຍັງເກີດຂຶ້ນຢູ່ບາງພາກພື້ນໃນໂລກ, ວິກິດການດ້ານເສດຖະກິດ, ສັງຄົມ ແລະ ສິ່ງແວດລ້ອມ ທີ່ຍັງສືບຕໍ່ເປັນໄພຂົ່ມຂູ່ ຕໍ່ປະຊາຄົມໂລກ. ການເຮັດຫນ້າທີ່ດັ່ງກ່າວ ຍັງເປັນການສືບຕໍ່ຍົກສູງບົດບາດ ຂອງ ສປປ ລາວ ໃນເວທີສາກົນ ໂດຍສະເພາະໃນເວທີ ສປຊ ໃຫ້ພົ້ນເດັ່ນຍິ່ງຂຶ້ນ ເຊິ່ງ ສປປ ລາວ ເຮົາຈະເຮັດໜ້າທີ່ເປັນປະທານບັນດາກອງປະຊຸມສາກົນຕ່າງໆ ໃນຂອບສະມັດຊາໃຫຍ່ ສປຊ, ກອງປະຊຸມລະດັບສູງຕ່າງໆ ເປັນຕົ້ນແມ່ນ ກອງປະຊຸມພາກອະພິປາຍທົ່ວໄປ ຂອງສະມັດຊາໃຫຍ່ ສປຊ ສະໄໝທີ 76 ທີ່ຈະໄຂຂຶ້ນ ໃນເດືອນ ກັນຍາ 2021 ຊຶ່ງຈະມີຜູ້ນຳຂັ້ນປະມຸກລັດ, ຫົວໜ້າລັດຖະບານ ແລະ ຜູ້ແທນຂັ້ນສູງຈາກ 193 ປະເທດສະມາຊິກເຂົ້າຮ່ວມ.

ການປະຕິບັດຫນ້າທີ່ດັ່ງກ່າວ ຍິ່ງຈະຕ້ອງໄດ້ເພີ້ມທະວີຄວາມເອົາໃຈໃສ່ຂຶ້ນກວ່າເກົ່າ ໂດຍສະເພາະ ແມ່ນໃນທ່າມກາງສະພາບທີ່ມີການຜັນແປຕະຫລອດເວລາ, ຮັບປະກັນການປະຕິບັດໜ້າທີ່ແບບເປັນກາງ, ໂປ່ງໄສ ແລະ ອີງຕາມກົດລະບຽບການດໍາເນີນຂອງ ສະມັດຊາໃຫຍ່ ສປຊ, ລວມທັງການປຶກສາຫາລືຮ່ວມກັບ ປະເທດສະມາຊິກ ສປຊ ກ່ຽວກັບ ບັນຫາສໍາຄັນຕ່າງໆ ທີ່ບໍ່ສາມາດຄາດຄະເນ ລ່ວງຫນ້າໄດ້ ເຊັ່ນ: ການລິເລີ້ມ ແລະ ດໍາເນີນການເຈລະຈາ ບັນດາຮ່າງຖະແຫຼງການ ແລະ ຮ່າງຍັດຕິຕ່າງໆ, ການປຶກສາຫາລື ແລະ ການຈາລະຈາລະຫວ່າງລັດຖະບານ ວ່າດ້ວຍການປະຕິຮູບສະພາຄວາມໝັ້ນຄົງ ສປຊ ປະຈໍາປີ 2022 ແລະ ກອງປະຊຸມຂອງຄະນະກໍາມະການສະເພາະກິດ ວ່າດ້ວຍການປະຕິຮູບສະມັດຊາໃຫຍ່ ສປຊ ປະຈໍາປີ 2022 ແລະ ການເຮັດໜ້າທີ່ສໍາຄັນອື່ນໆ ໂດຍອີງຕາມການມອບໝາຍຂອງ ປະທານສະມັດຊາໃຫຍ່ ສປຊ ສະໄຫມທີ 76.

ສະມັດຊາໃຫຍ່ ສປຊ ແມ່ນຫນຶ່ງໃນ 6 ອົງກອນຫລັກ ຂອງ ສປຊ ທີ່ໄດ້ຮັບການສ້າງຕັ້ງຂຶ້ນໂດຍພາຍໃຕ້ກົດບັດຂອງ ສປຊ ໃນປີ 1945, ມີບົດບາດຕັດສິນ ແລະ ຮັບຮອງເອົາບັນຫາສໍາຄັນຕ່າງໆຂອງໂລກ, ທັງເປັນເວທີໃນການຖະແຫລງດ້ານນະໂຍບາຍ ຂອງບັນດາ 193 ປະເທດສະມາຊິກ ສປຊ. ຜ່ານມາ ສປປ ລາວ ເຮົາເຄີຍໄດ້ຮັບເລືອກຕັ້ງ ໃຫ້ເປັນຮອງປະທານສະມັດຊາໃຫຍ່ ສປຊ ແລ້ວ 1 ຄັ້ງ ໃນໄລຍະກອງປະຊຸມສະມັດຊາໃຫຍ່ ສປຊ ສະໄຫມທີ 50, ໃນປີ 1995.

Cr: ກະຊວງການຕ່າງປະເທດ

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ລົງກວດກາຕະຫຼາດບຶງທາດຫຼວງ

By
ໂທລະໂຄ່ງ THOLAKHONG
-
0

ອີງຕາມການລາຍງານຂອງເພສ ຕະຫຼາດຂາຍສົ່ງຜະລິດຕະພັນກະສິກຳສາກົນບຶງທາດຫຼວງ ໃຫ້ຮູ້ວ່າ: ໃນຕອນເຊົ້າ ຂອງວັນທີ 08/06/2021 ທ່ານ ນາງວັນມະນີ ພິມມະສານ ຫົວໜ້າພະແນກ ອຸດສາຫະກຳ ແລະ ການຄ້າ ນະຄອນຫຼວງວຽງຈັນ ພ້ອມດ້ວຍທ່ານ ນັນຕາ ສານຸວົງ ຮອງພະແນກ ແລະ ຄະນະ ສົມທົບກັບຄະນະຄຸ້ມຄອງເຂດເສດຖະກິດພິເສດບຶງທາດຫຼວງ ໄດ້ລົງມາຢ້ຽມຢາມ ແລະ ກວດກາການຈັດສັນຕະຫຼາດບຶງທາດຫຼວງ ພາຍຫຼັງທີ່ມີກະແສຂ່າວ ແລະ ຫຼາຍພາກສ່ວນເປັນຫ່ວງເລື່ອງຄົນມາຫຼາຍ.

ທາງຜູ້ບໍລິຫານຕະຫຼາດບຶງທາດຫຼວງ ທ່ານ ບຸນທ່ຽງ ລັດຕະນະວົງ ໄດ້ລາຍງານຕໍ່ຫົວໜ້າພະແນກ ອຄ.ນວ ແລະ ຄະນະຊາບວ່າ ໃນໄລຍະວັນເສົາ ວັນທີ 5 ແລະ ວັນອາທິດ ວັນທີ6 ມິຖຸນາ ທີ່ຜ່ານມາ ມີຜູ້ຄົນເຂົ້າມາໃຊ້ບໍລິການຫຼາຍຜິດປົກກະຕິ ເຊິ່ງອາດຈະມີຜົນມາຈາກການປິດຕະຫຼາດສະພານທອງ ແລະ ຕະຫຼາດສີຂຽວດອນກອຍ ເພື່ອທຳການອະນາໄມ ຈຶ່ງເຮັດໃຫ້ຜູ້ຄົນຫັນມາໃຊ້ບໍລິການຕະຫຼາດບຶງທາດຫຼວງຫຼາຍຂຶ້ນກວ່າທຸກມື້ ເຊິ່ງມາມື້ວັນຈັນ ແລະ ມື້ນີ້ (ວັນອັງຄານ) ກໍ່ກັບເຂົ້າສູ່ສະພາບປົກກະຕິແລ້ວ.

ເຊິ່ງທ່ານ ຫົວໜ້າພະແນກ ອຄ.ນວ ພ້ອມດ້ວຍຄະນະ ໄດ້ກວດກາເບິ່ງສະພາບການຈັດສັນໃນຕະຫຼາດກໍ່ເຫັນໄດ້ວ່າມີການຮັກສາໄລຍະຫ່າງລະຫວ່າງພໍ່ຄ້າ-ແມ່ຄ້າໃນລະດັບບໍ່ຕ່ຳກວ່າ 2ແມັດແລ້ວ ແລະ ຜູ້ຄົນເຂົ້າມາຈັບຈ່າຍໃຊ້ສອຍກໍ່ຢູ່ໃນລະດັບທີ່ປົກກະຕິ ບໍ່ໃກ້ຊິດກັນເກີນໄປ.

ພ້ອມກັນນັ້ນ, ທ່ານຍັງໄດ້ໃຫ້ທິດຊີ້ນຳໃນການຈັດສັນບາງຈຸດ ໂດຍສະເພາະແມ່ນພໍ່ຄ້າແມ່ຄ້າທີ່ມາຈາກຊົນນະບົດ ທີ່ນຳເອົາຜົນຜະລິດຂອງຕົນເຂົ້າມາຂາຍ ທີ່ບໍ່ແມ່ນພໍ່ຄ້າ/ແມ່ຄ້າທີ່ມາຈັບຈອງສະຖານທີ່ (ທີ່ເຂົ້າມາໃໝ່ໃນແຕ່ລະມື້) ໃຫ້ຈັດສັນໃຫ້ເຂົາເຈົ້າໃຫ້ຮັບປະກັນໃຫ້ມີໄລຍະຫ່າງບໍ່ຕ່ຳກວ່າ 2ແມັດ ເພື່ອປ້ອງກັນການແຜ່ເຊື້ອພະຍາດ Covid 19.

ແນວໃດກໍ່ຕາມ ທ່ານຍັງໃຫ້ສືບຕໍ່ການປະຕິບັດມາດຕະການການປ້ອງກັນພະຍາດຢ່າງເຂັ້ມງວດ ສືບຕໍ່ອັນໃດທີ່ປະຕິບັດໄດ້ດີແລ້ວໃຫ້ເຮັດໃຫ້ດີສະເໝີຕົ້ນສະເໝີປາຍ ໂດຍສະເພາະແມ່ນການກຳນົດເສັ້ນທາງເຂົ້າອອກຊັດເຈນ, ການກວດວັດອຸນຫະພູມຮ່າງກາຍ, ການໃສ່ຜ້າອັດປາກອັດດັງ, ມີເຈວລ້າງມືຢູ່ຈຸດຕ່າງໆໃນຕະຫຼາດ, ການໃຫ້ພໍ່ຄ້າຊາວຂາຍມີສະເປຣຂ້າເຊື້ອປະຈຳໂຕ ແລະ ການສີດພົ່ນຢາຂ້າເຊື້ອທຸກມື້ພາຍຫຼັງປິດຕະຫຼາດ.

ເຊິ່ງທາງພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ພ້ອມດ້ວຍຄະນະຄຸ້ມຄອງເຂດເສດຖະກິດພິເສດບຶງທາດຫຼວງກໍ່ຈະມີການຕິດຕາມກວດກາການຈັດຕັ້ງປະຕິັບັດຢູ່ເປັນໄລຍະໆ.

ການກໍ່ສ້າງທາງຊອຍເບຕົງ ບ້ານ ຫ້ວຍນົກກົດ ເມືອງ ຄອບ ແຂວງ ໄຊຍະບູລີ

By
ໂທລະໂຄ່ງ THOLAKHONG
-
0

ອີງຕາມແຟນເພສ News.XBL ໃຫ້ຮູ້ວ່າ: ໃນຕອນບ່າຍ ຂອງວັນທີ 7 ມິຖຸນາ 2021 ນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ພ້ອມດ້ວຍຄະນະ ໄດ້ລົງຊຸກຍູ້ການກໍ່ສ້າງເສັ້ນທາງຊອຍເບຕົງ ບ້ານຫ້ອຍນົກກົດ ເມືອງ ຄອບ, ໂດຍມີ ທ່ານ ແພງຊ້ອຍ ແພງເມືອງ ເຈົ້າເມືອງ-ເມືອງ ຄອບ ພ້ອມດ້ວຍພະນັກງານທີ່ກ່ຽວຂ້ອງ ແລະ ອຳນາດການປົກຄອງບ້ານດັ່ງກ່າວໃຫ້ການຕ້ອນຮັບຢ່າງອົບອຸ່ນ, ການກໍ່ສ້າງເສັ້ນທາງຊອຍປູດ້ວຍເບຕົງ ບ້ານ ຫ້ວຍນົກກົດ ມີ 3 ເສັ້ນຄື: ເສັ້ນທີ1 ມີຄວາມຍາວ 100 ແມັດ, ລວງກວ້າງ 3,5 ແມັດ, ຄວາມໜາ 15 ຊັງຕີແມັດ, ເສັ້ນທີ2 ມີຄວາມຍາວ 85 ແມັດ, ລວງກວ້າງ 4 ແມັດ, ຄວາມໜາ 15 ຊັງຕີແມັດ ແລະ ເສັ້ນທີ3 ມີຄວາມຍາວ 360 ແມັດ, ລວງກວ້າງ 7 ແມັດ, ຄວາມໜາ 15 ຊັງຕີແມັດ, ຮອດປະຈຸບັນແມ່ນສ້າງສໍາເລັດແລ້ວ 1 ເສັ້ນຄືເສັ້ນທີ1, ການກໍ່ສ້າງທາງດັ່ງກ່າວແມ່ນທືນສົມທົບລະຫວ່າງລັດ ແລະ ປະຊາຊົນໂດຍແມ່ນລັດໄດ້ສະໜອງປູນຈຳນວນ 150 ກວ່າໂຕນ, ສ່ວນປະຊາຊົນ ແມ່ນປະກອບສ່ວນແຮ່, ຊາຍ ແລະ ແຮງງານໃນການກໍ່ສ້າງ, ຄາດວ່າການກໍ່ສ້າງທາງທັງ 3 ເສັ້ນຈະໃຫ້ສຳເລັດໃນທ້າຍປີ 2021ນີ້, ໂອກາດດັ່ງກ່າວ.

ທ່ານເຈົ້າແຂວງກໍ່ໄດ້ຍ້ອງຍໍຊົມເຊີຍຕໍ່ອໍານາດການປົກຄອງບ້ານທີ່ມີຄວາມສາມັກຄີເປັນຈິດໜຶ່ງໃຈດຽວ. ໃນການປຸ້ມລຸມສ້າງເສັ້ນທາງຊອຍເບຕົງພາຍໃນບ້ານຈົນສໍາເລັດແລ້ວ 1 ເສັ້ນ ແລະ ໄດ້ຮຽກຮ້ອງໃຫ້ອໍານາດການປົກຄອງບ້ານຈົ່ງສືບຕໍ່ກໍ່ສ້າງເສັ້ນທາງທີ່ຍັງບໍ່ທັນແລ້ວອີກ 2 ເສັ້ນໃຫ້ສໍາເລັດຕາມແຜນການ, ການປະສົມປູນກໍ່ຕ້ອງໃຫ້ຖືກຕາມມາດຕະຖານທີ່ກໍານົດ, ທັງນີ້ກໍ່ເພື່ອເຮັດໃຫ້ໄດ້ຄຸນນະພາບດີ, ນໍາໃຊ້ໄດ້ຍາວນານ.

ເດີນທາງໄປອາວະກາດ ດ້ວຍຈະຫຼວດ ຂອງ Blue Origin ໃນເດືອນກໍລະກົດ ນີ້

By
ໂທລະໂຄ່ງ THOLAKHONG
-
0

ຫຼາຍຄົນທຄົງຈະຮູ້ຈັກ Jeff Bezos ຫຼື ຜູ້ກໍຕັ້ງ Amazon ເວບໄຊ້ ແລະ ແອັບພິເຄຊັນ ຊື້-ຂາຍ ສິນຄ້າທີ່ໃຫຍ່ທີ່ສຸດ ໃນອາເມລິກາ ແລະ ເມື່ອບໍ່ດົນມານີ້ Jeff Bezos ໄດ້ເປີດເຜີຍວ່າ ຈະເດີນທາງໄປອາວະກາດກັບນ້ອງຊາຍ ໃນວັນທີ 20 ກໍລະກົດ ໃນທ່ຽວບິນ ຂອງ New Shepard ຊຶ່ງເປັນຈະຫຼວດ ຂອງບໍລິສັດ Blue Origin.

ສ່ວນສະມາຊິກຄົນທີ 3 3 ຈະໄດ້ຂຶ້ນດວງຈັນປນຳ ແມ່ນຈະຕ້ອງປະມູນທີ່ນັ່ງ ເຊິ່ງລາຄາຕອນນີ້ ແມ່ນ 2,8 ລ້ານ ໂດລາ, ທ່ຽວບິນດັ່ງກ່າວຈະໃຊ້ເວລາພຽງບໍ່ເທົ້າໃດນາທີ ຕັ້ງຕົ້ນຈົນຈົບ ແລະ ຈະລົງຈອດໂດຍອັດຕະໂນມັດໃນ 7 ນາທີ ຫຼັງຈາກຂຶ້ນເຄື່ອງຈະຫຼວດ ແລະ ແຄັບຊູນລູກເຮືອຈະລອຍອອກສູ່ພື້ນໂລກດ້ວຍຊູຊີບໃນອີກ 3 ນາທີ ຫຼັງຈາກນັ້ນ ໂດຍມີແຜນທີ່ຈະຈອດລົງໃນທະເລສາຍເວສເທັກຊັດ

ເຊິ່ງວັນທີ 20 ກໍລະກົດ ກໍຈະເປັນວັນຄົບຮອບ 52 ປີ ຂອງການລົງຈອດເທິງດວງຈັນ ຂອງ Apollo ໃນປີ 1969 ໂດຍ ນິວ ອາມສະຕອງ ແລະ ບັດ ອັດສະດິນ.

ທະນາຄານ ມາຣູຮານ ເຈແປນລາວ(MJBL) ໄດ້ເປີດຕົວ MJ Sabai ທະນາຄານຕົວແທນ ຢ່າງເປັນທາງການ.

By
ໂທລະໂຄ່ງ THOLAKHONG
-
0

ໃນວັນອັງຄານ, ວັນທີ 1 ມິຖຸນາ 2021, ທະນາຄານ ມາຣູຮານ ເຈແປນລາວ (MJBL) ໄດ້ເປີດຕົວ MJ Sabai ທະນາຄານຕົວແທນ ຢ່າງເປັນທາງການ, ເຊິ່ງເປັນການບໍລິການດ້ານການທະນາຄານ.  ເພື່ອໃຫ້ສອດຄ່ອງກັບຫຼັກການຂອງການເປັນທະນາຄານທີ່ໜ້າເຊື່ອຖື, ທະນາຄານທີ່ມອບປະສົບການໃນການບໍລິການລູກຄ້າດີທີ່ສຸດ ແລະ ການນຳໃຊ້ດີຈີຕອນເຂົ້າໃນການແກ້ໄຂບັນຫາຂອງລູກຄ້າໄດ້ເປັນຢ່າງດີ,  ທະນາຄານ ມາຣູຮານ ເຈແປນລາວ ໄດ້ເປີດຫນ່ວຍບໍລິການທະນາຄານທີ່ສະດວກ ແລະ ງ່າຍດາຍທີ່ເປັນລະບົບການທະນາຄານດິຈິຕອລ ແລະ ບໍ່ມີໃຊ້ເຈ້ຍໃນການເຮັດທຸລະກຳການເງິນຕ່າງໆຢ່າງເຕັມຮູບແບບ. 

ທະນາຄານ ມາຣູຮານ ເຈແປນລາວ(MJBL)ໄດ້ເປີດຕົວໜ່ວຍບໍລິການທະນາຄານດີຈິຕອລ ແລະ ບໍ່ໃຊ້ເຈ້ຍຢ່າງເຕັມຮູບແບບຄັ້ງທຳອິດໃນ ສປປລາວ ທີ່ສູນການຄ້າເວີເທຣດເຊັນເຕີ ເຊິ່ງເປັນນະວັດຕະກຳໃໝ່ຂອງການບໍລິການດ້ານທະນາຄານທີ່ໄດ້ຮັບລາງວັນຢ່າງຫຼວງຫຼາຍ ແລະ ຍັງສືບຕໍ່ຫັນເປັນຍຸດທະສາດ ແລະ ດິຈິຕອລໂດຍການເປີດຕົວ MJ Sabai ທະນາຄານຕົວແທນ. 

ທ່ານ ແອນໂທນີ່  ຊິນ,  ຜູ້ອຳນວຍການໃຫຍ່ ທະນາຄານ ມາຣູຮານ ເຈແປນລາວ ໄດ້ກ່າວວ່າ:“ 

ທີມງານຂອງຂ້າພະເຈົ້າ ແລະ ຂ້າພະເຈົ້າເປັນກຽດຢ່າງຍິ່ງທີ່ໄດ້ເປີດຕົວທຸລະກິດການທະນາຄານຕົວແທນທີ່ພວກເຮົາໄດ້ລໍຄ່ອຍກັນມາດົນນານ.  ຂ້າພະເຈົ້າມີຄວາມຍິນດີທີ່ໄດ້ປະກາດການຮ່ວມມືຢ່າງເປັນທາງການກັບ ບໍລິສັດ ຮຸ່ງອາລຸນ ຂົນສົ່ງດ່ວນ  (HAL) ເພື່ອເປີດຕົວ MJ Sabai ທະນາຄານຕົວແທນຂອງພວກເຮົາແຫ່ງທຳອິດ ທີ່ ບໍລິສັດ ຮຸ່ງອາລຸນ ຂົນສົ່ງດ່ວຍ ສາຂາ ດົງໂດກ.  ນີ້ແມ່ນສອດຄ່ອງກັບວິໄສທັດແລະ ຄວາມປາດຖະໜາຂອງພວກເຮົາທີ່ຈະເຮັດໃຫ້ການບໍລິການດ້ານການເງິນການທະນາຄານນັ້ນງ່າຍດາຍ, ສະດວກສະບາຍ ແລະ ເປັນດີຈິຕອລໃຫ້ທົ່ວເຖິງປະຊາຊົນ ແລະ ສັງຄົມລາວໃນທົ່ວປະເທດ ທັງ – ຜູ້ບໍລິໂພກ, ຜູ້ປະກອບການ ທຸລະກິດຂະໜາດນ້ອຍ ແລະ ບັນດາບໍລິສັດ.  ສິ່ງນີ້ເນັ້ນໜັກຕື່ມອີກເຖິງຄວາມມຸ່ງໝັ້ນຂອງທະນາຄານພວກເຮົາທີ່ຈະສະໜັບສະໜູນ ວາລະແຜນການການເງິນຂອງທະນາຄານແຫ່ງສປປລາວ ແລະ ລັດຖະບານ.  ພວກເຮົາໄດ້ເລືອກ ຮຸ່ງອາລຸນ ຂົນສົ່ງດ່ວນ ເປັນຄູ່ຮ່ວມທຸລະກິດທຳອິດຂອງພວກເຮົາເຊິ່ງທີ່ພວກເຮົາໄດ້ມີເປົ້າໝາຍທີ່ສຳຄັນຄືເພື່ອເຮັດໃຫ້ວິຖີການດຳລົງຊີວິດຂອງຊຸມຊົນທີ່ພວກເຮົາຮັບໃຊ້ນີ້ໄດ້ສະດວກສະບາຍແລະ ງ່າຍດາຍຂື້ນ.  ໃນວະລະສຳຄັນນີ້, ຂ້າພະເຈົ້າຂໍສະແດງຄວາມຍິນດີກັບທ່ານ ສີສະຫວັນ ມ່າຢົງເຊິນ ຜູ້ອຳນວຍການໃຫຍ່ ຂອງ ບໍລິສັດ ຮຸ່ງອາລຸນ ຂົນສົ່ງດ່ວນ ແລະ ຍິນດີໃຫ້ບໍລິສັດ ຮຸ່ງອາລຸນ ຂົນສົ່ງດ່ວນເປັນພາກສ່ວນທີ່ສຳຄັນ ແລະ ເປັນສ່ວນໜຶ່ງຂອງລະບົບເອເລັກໂຕຣນິກ ຂອງທະນາຄານ ມາຣູຮານ ເຈແປນລາວ (MJBL)ຂອງພວກເຮົາ;  ແລະ ພວກເຮົາທັງສອງຫວັງວ່າຈະໄດ້ມີການຮ່ວມມືທີ່ໜ້າຕື່ນເຕັ້ນຫຼາຍໃນໄວໆນີ້.  ຂ້າພະເຈົ້າຂໍສະແດງຄວາມຂອບໃຈມາຍັງທ່ານ ສຸລິສັກ ທຳນຸວົງ ຫົວໜ້າກົມຊຳລະສະສາງ ທະນາຄານ ແຫ່ງ ສປປລາວ ແລະ ທ່ານ ພົນປະສິດ ພິດສະໄໝ ຫົວຫນ້າກົມໄປສະນີ,ກະຊວງໄປສະນີ ໂທລະຄົມມະນາຄົມ ແລະ ການສື່ສານ ທີ່ໄດ້ເສຍສະຫຼະເວລາອັນມີຄ່າຂອງທ່ານເຂົ້າຮ່ວມເປັນປະທານງານເປີດຕົວ MJ Sabai ທະນາຄານຕົວແທນຂອງພວກເຮົາໃນຄັ້ງນີ້.  ນີ້ແມ່ນຂີດໝາຍທີ່ສຳຄັນຢ່າງຍິ່ງຂອງພວກເຮົາ”. 

ເຖິງວ່າແມ່ນວ່າທະນາຄານຕົວແທນດັ່ງກ່າວຈະຕັ້ງຢູ່ໃນເຂດບ້ານສີຂຽວ, ແຕ່ເພື່ອປະຕິບັດຕາມການແນະນຳຢ່າງເຄັ່ງຄັດຂອງ ທະນາຄານ ມາຣູຮານ ເຈແປນລາວ (MJBL), ຈະບໍ່ມີແຂກທີ່ຖືກເຊີນ ແລະ ບໍ່ໄດ້ມີການສ້າງສັນໃດໆ      ນອກເໜືອຈາກການເປີດງານໄລຍະສັ້ນເທົ່ານັ້ນ. 

MJ Sabai ທະນາຄານຕົວແທນ ແມ່ນໃຫ້ການບໍລິການທະນາຄານທີ່ງ່າຍດາຍ, ມີຄວາມປອດໄພ ແລະ ວ່ອງໄວລວມທັງການເປີດບັນຊີໃໝ່ທີ່ບໍ່ໃຊ້ເຈ້ຍ, ການເຮັດທຸລະກຳການເງິນຜ່ານທາງອີເລັກໂທຣນິກ, ການໂອນເງິນ, ການຊຳລະໃບບິນຕ່າງໆ, ການຝາກເງິນ ແລະ ການຖອນເງິນ.  ບໍລິການເຫຼົ່ານີ້ແມ່ນໃຫ້ບໍລິການຕັ້ງແຕ່ 8:30 ໂມງເຊົ້າ ເຖິງ 18:00ໂມງແລງທຸກໆວັນ (ຈັນ – ສູກ)  ແລະ ຕັ້ງແຕ່ 9:00 ໂມງເຊົ້າ ເຖິງ 17:00ໂມງແລງທຸກໆວັນ (ເສົາ – ອາທິດ)   ທີ່ ຮຸ່ງອາລຸນ ຂົນສົ່ງດ່ວນ ສາຂາ ດົງໂດກ ສະຖານທີ່ຕັ້ງຢູ່ ເສັ້ນທາງ ດົງໂດກ, ບ້ານ ຊ້າງຄູ່, ເມືອງ ໄຊທານີ ນະຄອນຫຼວງວຽງຈັນເຊິ່ງໃຫ້ບໍລິການທັງຜູ້ບໍລິໂພກ ແລະ ທຸລະກິດຂະໜາດນ້ອຍ.

ທະນາຄານຕົວແທນແມ່ນໄດ້ຮັບການຝຶກອົບຮົມ ແລະ ໄດ້ຮັບການຢັ້ງຢືນຢ່າງຖືກຕ້ອງຈາກ ທະນາຄານ ມາຣູຮານ ເຈແປນລາວ ຕາມມາດຕະຖານຢ່າງເຂັ້ມງວດໂດຍເນັ້ນເອົາການບໍລິການລູກຄ້າເປັນຈຸດສຳຄັນ ເພື່ອໃຫ້ໝັ້ນໃຈ ແລະ ຮັບປະກັນວ່າລູກຄ້າທຸກທ່ານທີ່ມາໃຊ້ບໍລິການຈະໄດ້ຮັບປະສົບການການບໍລິການທີ່ດີທີ່ສຸດ.

ຖ້າທ່ານໄດ້ມາເປັນລູກຄ້າຂອງ ທະນາຄານ ມາຣູຮານ ເຈແປນລາວ, ທ່ານຈະໄດ້ຮັບສິດທິພິເສດເຂົ້າເຖິງຫລາກຫລາຍການບໍລິການເຊັ່ນ:

– ເຂົ້າເຖິງ ເຄືອຂ່າຍທີ່ກວ້າງຂວາງຫລາຍກວ່າ 1,100 ຕູ້ ATM ທົ່ວປະເທດ ໃນງເຄື່ອຂ່າຍ ຂອງ LAPNet.

– ເຂົ້າເຖິງ  MJ Saduak, ແອບພິເຄຊັ່ນທະນາຄານເທິງມືຖື ແລະ ກະເປົາເງິນອີເລັກໂທຣນິກ ທີ່ໄດ້ຮັບລາງວັນຢ່າງຫຼວງຫຼາຍ, ລວມທັງແຊດບອດ, ເຄື່ອງມືຄຸ້ມຄອງບໍລິຫານການເງິນເຊິ່ງໃຫ້ບໍລິການຕະຫຼອດເວລາ 24/7, ຄວາມສາມາດໃນການຊຳລະເງິນແບບ peer to peer, ການຊຳລະສະສາງຜ່ານການສະແກນ QR ແລະ ອື່ນໆ.

– ນະວັດຕະກຳບັດສະເໜືອນຈິງ ບັດເວີຊົວ ເດບິດ ມັດເຕີຄາດ (Virtual Debit Mastercard ), ປະສົມປະສານເຂົ້າຢູ່ໃນ ແອບ MJ Saduak, ເຮັດໃຫ້ສາມາດເຮັດທຸລະກຳອອນລາຍທົ່ວໂລກໄດ້ຢ່າງປອດໄພດ້ວຍການກວດສອບ 3D, ມີລະບົບການຄຸ້ມຄອງຕົນເອງ ແລະ ສາມາດນຳໃຊ້ໄດ້ຫຼາຍສະກຸນເງິນ.

– ສາມາດໂອນເງີນເຂົ້າບັນຊີ u-money (Unitel) & m-money (Lao Telecom)

–  ສາມາດເຂົ້າເຖິງຮ້ານຄ້າຫຼາຍກວ່າ 1,700 ຮ້ານຄ້າທີ່ເຂົ້າເປັນສະມາຊິກຮັບຊຳລະຜ່ານ  MJ Saduak QR code ຂອງ ທະນາຄານ ມາຣູຮານ ເຈແປນລາວ

  ແລະ ມີອື່ນໆອີກຫຼາຍຫຼາຍ…

– ໄດ້ເຂົ້າເຖິງຫ້ອງ VIP Banking ສຳລັບລູກຄ້າວີໄອພີ

ທະນາຄານ ມາຣູຮານ ເຈແປນລາວ ມີແຜນທີ່ຈະຂະຫຍາຍ MJ Sabai ທະນາຄານຕົວແທນໃນນະຄອນຫຼວງວຽງຈັນ ແລະ ຈະຂະຫຍາຍໄປສູ່ຕ່າງແຂວງໃນທົ່ວປະເທດໃນໄວ້ໆນີ້. 

ທະນາຄານ ມາຣູຮານ ເຈແປນລາວ(MJBL) ແມ່ນທະນາຄານຊັ້ນນຳທາງດ້ານດິຈິຕອລ, ດ້ານນະວັດຕະກຳໃໝ່ ແລະ ດ້ານທຸລະກິດຂະຫນາດນ້ອຍ ແລະ ກາງ (SME) ໃນ ສປປລາວ, ໂດຍໄດ້ນຳເອົາຄວາມຊຽວຊານ, ຊັບພະຍາກອນ ແລະ ນະວັດຕະກຳໃໝ່ໆລະດັບໂລກທັງໝົດມາໃຫ້ບໍລິການແກ້ລູກຄ້າຂອງພວກເຂົາເພື່ອໃຫ້ລູກຄ້າຂອງພວກເຂົາໄດ້ຮັບປະສົບການ ການບໍລິການທີ່ດີທີ່ສຸດ.  ທະນາຄານ ມາຣູຮານ ເຈແປນລາວ ແມ່ນ ທະນາຄານສາກົນທີ່ສະໜອງຜະລິດຕະພັນ ແລະ ການບໍລິການດ້ານການເງິນຢ່າງເຕັມຮູບແບບ ນັບຕັ້ງແຕ່ໃຫ້ບໍລິການດ້ານທະນາຄານສຳລັບບຸກຄົນ ( Retail), ໃຫ້ບໍລິການດ້ານທະນາຄານສຳລັບທຸລະກິດຂະໜາດນ້ອຍ ແລະ ກາງ (SME),  ໃຫ້ບໍລິການດ້ານທະນາຄານສຳລັບທຸລະກິດຂະຫນາດໃຫຍ່, ໃຫ້ບໍລິການດ້ານທະນາຄານສຳລັບລູກຄ້າ VIP ແລະ ຍັງໄດ້ເປີດຕົວຢ່າງກວ້າງຂວາງໃນການນຳໃຊ້ດີຈີຕອລເຂົາໃນວຽກງານດ້ານການທະນາຄານ ແລະ ໄດ້ຮັບລາງວັນຢ່າງຫຼວງຫຼາຍເຊັ່ນ  – ແອບ MJ Saduak ທະນາຄານເທິງມືຖື & ກະເປົາເງິນອີເລັກໂທຣນິກ, ຜະລິດຕະພັນ Corporate online portal  , ລະລົບການແກ້ໄຂບັນຫາການຊຳລະສະສາງແບບລະອັດຕະໂນມັດ ຫລື ເອີ້ນວ່າ e-CASS, ທະນາຄານດິຈິຕອລ ແລະ ບໍ່ນຳໃຊ້ເຈ້ຍຢ່າງເຕັມຮູບແບບແຫ່ງທຳອິດໃນປະເທດລາວ ແລະ ອາຊີ,  ສາມາດໂອນເງິນລະຫວ່າງ ແອບ ຫາ ແອບໄດ້ແບບທັນທີ ຜ່ານ ແອັບ MJ Saduak ທະນາຄານເທິງມືຖື ແລະ ກະເປົາເງິນອີເລັກໂທນິກຊັ້ນນຳຂອງພວກເຂົາ ແລະ ອື່ນໆອີກຫຼາກຫຼາຍເພື່ອອຳນວຍຄວາມສະດວກສະບາຍໃຫ້ກັບລູກຄ້າ. 

ທະນາຄານ ມາຣູຮານ ເຈແປນລາວ ມີ ສຳນັກງານໃຫຍ່ຕັ້ງຢູ່ນະຄອນຫຼວງວຽງຈັນ, ແລະ ມີ 3 ຫນ່ວຍບໍລິການຄື: ໜ່ວຍບໍລິການ ຫຼວງພະບາງ,ຫນ່ວຍບໍລິການຈຳປາສັກ ແລະ ໜ່ວຍບໍລິການ  ເວີເທຣດເຊັນເຕີ. ໄດ້ເປັນສະມາຊິກຂອງເຄືອຂ່າຍ ຕູ້ ATM (LAP Net) ໃນທົ່ວປະເທດ. ສາມາດສອບຖາມຂໍ້ມູນເພີ່ມຕື່ມໄດ້ຜ່ານການໂທຫາສູນ Call-Center, ສົນທະນາກັບແຊດບອດ ແລະ ສອບຖາມຜ່ານຊ່ອງທາງດີຈີຕອລ ໄດ້ຕະຫລອດ 24 ຊົວໂມງ. 

ສອບຖາມຂໍ້ມູນເພີ່ມຕື່ມຂອງ MJ Sabai ທະນາຄານຕົວແທນ MJ Sabai, ໂທ: 030 5732748

ຖ້າທ່ານຕ້ອງການຂໍ້ມູນເພີ່ມເຕີມຂອງ ທະນາຄານມາຣູຮານ ເຈແປນລາວ ໂທສາຍດ່ວນທີ່ເບີ: 021 411 777

ຫຼື ເຂົ້າຢ້ຽມຊົມເວັບໄຊທ໌ຂອງທະນາຄານໄດ້ທີ່ລິ້ງຕໍ່ໄປນີ້: https://www.maruhanjapanbanklao.com 

ຫລື ຕິດຕາມເພຈຂອງ ທະນາຄານ ມາຣູຮານ ເຈແປນລາວ ໃນເຟສບຸກໄດ້ ໂດຍກົດລິ້ງຕໍ່ໄປນີ້: https://www.facebook.com/MaruhanJapanBankLao.

ໂຮງງານອຸດສາຫະກຳປຸງແຕ່ງ ແລະ ຫັດຖະກຳ ໃນນະຄອນຫຼວງວຽງຈັນ ເພີ່ມທະວີປະຕິບັດມາດຕະການປ້ອງກັນໂຄວິດ-19

By
ໂທລະໂຄ່ງ THOLAKHONG
-
0

ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ໄດ້ອອກແຈ້ງການແນະນຳ ກ່ຽວກັບການເພີ່ມທະວີ ແລະ ມາດຕະການສະກັດກັ້ນ, ຄວບຄຸມເພື່ອຕ້ານການລະບາດຂອງພະຍາດໂຄວິດ-19 ຢູ່ໃນໂຮງງານອຸດສາຫະກໍາປຸງແຕ່ງ ແລະ ຫັດຖະກໍາໃນນະຄອນຫຼວງວຽງຈັນ ໃນໄລຍະວັນທີ 5 – 19 ມິຖຸນາ 2021.

ພະແນກ ອຸດສາຫະກໍາ ແລະ ການຄ້າ ນະຄອນຫລວງວຽງຈັນ ແນະນໍາໃຫ້ປະຕິບັດ ດັ່ງນີ້:

1.ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ນອນຢູ່ໃນເຂດ/ບ້ານແດງ ບໍ່ສາມາດດໍາເນີນກິດຈະການໄດ້ (ໃຫ້ປິດ) ຍົກເວັ້ນໂຮງງານທີ່ມີຫໍພັກ ຂອງແຮງງານຢູ່ໃນບໍລິເວນໂຮງງານຂອງຕົນ, ໂຮງງານຜະລິດສິນຄ້າບໍລິໂພກ, ຢາປົວພະຍາດ, ເຄື່ອງປ້ອງກັນການລະບາດ ແລະ ອຸປະກອນການແພດ ແຕ່ໃຫ້ມີການຄຸ້ມຄອງການປະຕິບັດມາດຕະການປ້ອງກັນ ຂອງຄະນະສະເພາະກິດວາງອອກຢ່າງເຂັ້ມງວດ, ໃນໄລຍະພັກວຽກໃຫ້ແຈ້ງຕໍ່ພະນັກງານກໍາມະກອນ ຂອງຕົນໃຫ້ປະຕິບັດຕາມລະບຽບການບໍ່ໃຫ້ອອກຈາກທີ່ພັກເຊົາຂອງຕົນ ຖ້າມີຄວາມຈໍາເປັນຕ້ອງຂໍອະນຸຍາດ ຈາກອໍານາດການປົກຄອງບ້ານ;

2.ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ຕັ້ງຢູ່ນອກເຂດແດງ ຫລື ບ້ານແດງ ສາມາດດໍາເນີນກິດຈະການໄດ້ແຕ່ຕ້ອງປະຕິບັດຕາມມາດຕະການຄື:

  • ໃຫ້ສ້າງແຜນກໍານົດມາດຕະການສະກັດກັ້ນ, ຄວບຄຸມ ເພື່ອຕ້ານພະຍາດໂຄວິດ-19 ຢູ່ໃນໂຮງງານ, ຈັດຕັ້ງ ປະຕິບັດ ແລະ ລາຍງານຂະແໜງອຸດສາຫະກໍາ ແລະ ການຄ້າເປັນປະຈໍາ
  • ໃຫ້ສືບຕໍ່ປະຕິບັດມາດຕະການຮັກສາໄລຍະຫ່າງຂອງການເຮັດວຽກ ເພື່ອຫລຸດຄວາມແອອັດຢູ່ໃນສະຖານທີ່ ເຮັດວຽກ, ຫ້ອງອາຫານ ແລະ ບ່ອນພັກເຊົ້າຂອງໂຮງງານ, ໝາຍສັນຍາລັກເພື່ອກໍານົດຮັກສາໄລຍະຫ່າງ, ຖ້າບໍ່ສາມາດປະຕິບັດຮັກສາໄລຍະຫ່າງ 1 ແມັດໄດ້ ຕ້ອງມີແນວຂັ້ນລະຫວ່າງບຸກຄົນຕໍ່ບຸກຄົນ
  • ຕ້ອງກວດວັດແທກອຸນຫະພູມ, ກໍລະນີພົບເຫັນຜູ້ມີອາການໄຂ້ (ອຸນຫະພູມຮ່າງກາຍສູງກວ່າ 37,5 ອົງສາ), ໄອ, ຈາມ, ຫາຍໃຈຍາກ ຫລື ມີອາການສົງໄສວ່າເປັນພະຍາດໂຄວິດ-19 ຕ້ອງສົ່ງເຂົ້າຫ້ອງແຍກປ່ຽວຂອງໂຮງ ງານ ແລ້ວໂທປຶກສາສາຍດ່ວນ 165, 166 ແລະ ພົວພັນໃຫ້ແພດໝໍເຂົ້າກວດທັນທີ
  • ຕ້ອງກວດວັດແທກອຸນຫະພູມ, ກໍລະນີພົບເຫັນຜູ້ມີອາການໄຂ້ (ອຸນຫະພູມຮ່າງກາຍສູງກວ່າ 37,5 ອົງສາ), ໄອ, ຈາມ, ຫາຍໃຈຍາກ ຫລື ມີອາການສົງໄສວ່າເປັນພະຍາດໂຄວິດ-19 ຕ້ອງສົ່ງເຂົ້າຫ້ອງແຍກປ່ຽວຂອງໂຮງ ງານ ແລ້ວໂທປຶກສາສາຍດ່ວນ 165, 166 ແລະ ພົວພັນໃຫ້ແພດໝໍເຂົ້າກວດທັນທີ
  • ຕ້ອງໃສ່ຜ້າອັດປາກ-ດັງ ທຸກຄັ້ງ ໃນເວລາຢູ່ສະຖານທີ່ເຮັດວຽກ ແລະ ສະຖານທີ່ທີ່ມີຄົນຈໍານວນຫລາຍ; ຕ້ອງມີນໍ້າດື່ມສະອາດ, ມີບ່ອນລ້າງມືດ້ວຍນໍ້າສະອາດໃສ່ສະບູ ຫລື ເຈວລ້າງມືຖືກຕາມຫລັກການອະນາໄມ; ໃຫ້ອະນາໄມ ແລະ ຂ້າເຊື້ອ ອຸປະກອນ, ສິ່ງຂອງທີ່ມີການສໍາພັດເລື້ອຍໆ ແລະ ສະຖານທີ່ພາຍໃນໂຮງງານ
  • ໂຮງງານທີ່ມີຈໍານວນກໍາມະກອນຫລາຍ ຕ້ອງຈັດແບ່ງເວລາການກິນເຂົ້າເປັນຫລາຍຈຸ ແລະ ບ່ອນນັ່ງກິນເຂົ້າຕ້ອງ ມີແຜ່ນກັ້ນບັງ ເພື່ອຮັກສາໄລຍະຫ່າງ ແລະ ຫລຸດຜ່ອນຄວາມສ່ຽງໃນການແຜ່ລະບາດຂອງພະບາດໂຄວິດ-19
  • ຫ້າມເຮັດກິດຈະກໍາຊຸມແຊວ ຫລື ພົວພັນແບບໃກ້ຊິດທີ່ບໍ່ສາມາດຮັກສາໄລຍະຫ່າງ ຫລື ກິດຈະກໍາອື່ນໆ ທີ່ມີຄວາມສ່ຽງຕໍ່ການຕິດເຊື້ອ.

3.ພະນັກງານ ກໍາມະກອນຜູ້ໃດທີ່ພັກເຊົາຢູ່ບ້ານທີ່ມີຜູ້ຕິດເຊື້ອ(ເຂດແດງ) ແມ່ນໃຫ້ຢຸດການມາເຮັດວຽກ ແລະ ຈໍາກັດບໍລິເວນໃຫ້ຄົບ 14 ວັນ ຖ້າບໍ່ມີອາການຈຶ່ງສາມາດມາເຮັດວຽກໄດ້.

4.ສໍາລັບໂຮງງານທີ່ມີຜູ້ຕິດເຊື້ອຕ້ອງໄດ້ປິດຊົ່ວຄາວ 14 ວັນ ເພື່ອດໍາເນີນການອານາໄມ ແລະ ຂ້າເຊື້ອ ພ້ອມກັນນັ້ນ ພະນັກງານ-ກໍາມະກອນ ກໍຕ້ອງຈໍາກັດບໍລິເວນຕົນເອງຄົບ 14 ວັນເຊັ່ນດຽວກັນ

5.ລົດຮັບ-ສົ່ງພະນັກງານ ກໍາມະກອນ ຕ້ອງມີຄວາມຮັບປະ ກັນການນັ່ງໃນລົດຕ້ອງຮັກສາໄລຍະຫ່າງໃຫ້ໄດ້ 1 ແມັດຂຶ້ນໄປ ຫລື ມີແຜ່ນກັ້ນບັງລະຫວ່າງບ່ອນນັ່ງ

6.ໃຫ້ຊຸກຍູ້ພະນັກງານ ແລະ ກໍາມະກອນ ທີ່ເຮັດວຽກຢູ່ໃນໂຮງງານ ໄປສັກຢາວັກຊິນປ້ອງກັນພະຍາດໂດວິດ-19

7.ໃຫ້ຂະແໜງອຸດສາຫະກຳ ແລະ ຫັດຖະກຳ ຫ້ອງການອຸດສາຫະກຳ ແລະ ການຄ້າ ເມືອງ ເຜີຍແຜ່ ແລະ ຈັດຕັ້ງປະຕິບັດແຈ້ງການສະບັບນີ້ຢ່າງເຂັ້ມງວດພ້ອມທັງສະຫຼຸບລາຍງານໃຫ້ພະແນກອຸດສາຫະກຳ ແລະ ການຄ້າ ນະຄອນຫຼວງວຽງໃຈເປັນແຕ່ລະວັນ

8.ໃຫ້ໂຮງງານທີ່ດໍາເນີນການຜະລິດ ແລະ ບໍ່ດໍາເນີນການຜະລິດໃຫ້ແຈ້ງເປັນລາຍລັກອັກສອນ ໃຫ້ພະແນກອຸດສາຫະກໍາ ແລະ ການຄ້າ ນະຄອນຫລວງວຽງຈັນ ຕາມເບີປະສານງານໂທ ແລະ ວອດແອັບ: 020 55669694, 020 22226438

9.ການຈັດຕັ້ງປະຕິບັດ ແລະ ມາດຕະການປັບໃໝ: ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ທີ່ນອນຢູ່ໃນເຂດ/ບ້ານແດງ ມອບໃຫ້ຫ້ອງການອຸດສາຫະກໍາ-ການ ຄ້າເມືອງ ສົມທົບກັບຄະນະສະເພາະກິດຂັ້ນເມືອງ ແລະ ອໍານາດການປົກຄອງບ້ານ ເປັນເຈົ້າການໃນການໂຄສະນາ, ເຜີຍແຜ່ແຈ້ງການສະບັບນີ້ໃຫ້ແກ່ໂຮງງານອຸດສາຫະກໍາປຸງແຕ່ງ ແລະ ຫັດຖະກໍາ ໃນເມືອງຂອງຕົນຈັດຕັ້ງປະຕິບັດ ຢ່າງເຂັ້ມງວດ, ພ້ອມທັງກວດກາຕິດຕາມ ແລະ ປະຕິບັດມາດຕະການຕໍ່ຜູ້ລະເມີດ ຄື: ປັບໃໝ ແຕ່ 1.000.000 ກີບ – 5.000.000 ກີບ/ຄັ້ງ ຕາມແຕ່ລະກໍລະນີ.

1...213214215...261Page 214 of 261