ເວັບໄຊ້ Posttoday ໄດ້ລາຍງານວ່າ: ມີພະຍາບານຄົນໜຶ່ງໄດ້ລັກປ່ຽນວັກຊີນປ້ອງກັນໂຄວິດ-19 ເປັນນໍ້າເກືອແລ້ວນໍາມາສັກໃຫ້ກັບປະຊາຊົນປະມານ 8.600 ຄົນ ໂດຍລົງມືລັກປ່ຽນວັກຊີນໃນລະຫວ່າງເດືອນ ມີນາ-ເມສາ ທີ່ສູນສັກວັກຊີນ ຣອຟເຮົາເຊນ.

ທາງດ້ານເຈົ້າໜ້າທີ່ສາທາລະນະສຸກ ຂອງລັດນີເດີຊັກເຊິນ ໄດ້ເປີດເຜີຍວ່າ ພະຍາບານຄົນນີ້ສາມາດປ່ຽນວັກຊີນໄດ້ ເນື່ອງຈາກລາວມີໜ້າທີ່ໃນການກຽມວັກຊີນ ແລະ ກຽມເຂັມສັກຢາໃນລະຫວ່າງປະຕິບັດໜ້າທີ່ທີ່ສູນສັກວັກຊີນດັ່ງກ່າວ.

ໃນຂະນະນີ້ທາງການໄດ້ຂໍໃຫ້ປະຊາຊົນຊາວເຢຍລະມັນທຸກຄົນທີ່ໄດ້ຮັບວັກຊີນໃນສູນດັ່ງກ່າວ ໃນລະຫວ່າງວັນທີ 5 ມີນາ – 20 ເມສາ 2021 ໃຫ້ກັບມາສັກວັກຊີນອີກຄັ້ງໜຶ່ງ ເນື່ອງຈາກເປັນຫົນທາງດຽວທີ່ທຸກຄົນຈະໄດ້ຮັບວັກຊີນຢ່າງຄົບຖ້ວນ ເຖິງແມ່ນວ່າຈະມີບາງຄົນຈະໄດ້ຮັບວັກຊີນໂຕຈິງແລ້ວກໍຕາມ.

ໃນການສືບສວນໃນເບື້ອງຕົ້ນພົບວ່າພະຍາບານຄົນນີ້ມີແນວຄິດຕໍ່ການການສັກວັກຊີນ ແຕ່ຍັງບໍ່ທັນຮູ້ລາຍລະອຽດທີ່ຊັດເຈນຫຼາຍກວ່ານີ້ ເນື່ອງຈາກຜູ້ຕ້ອງສົງໄສຍັງບໍ່ຍອມໃຫ້ຂໍ້ມູນ.

ເມືອງ ໂຂງ ເລີ່ມເປີດສັກວັກຊີນປ້ອງກັນພະຍາດໂຄວິດ -19 ຮອບໃໝ່

ຕາມ Lao National Radio ໃຫ້ຮູ້ວ່າ: ເລີ່ມແຕ່ວັນທີ 13-20 `ສິງຫາ 2021 ນີ້ ປະຊາຊົນຊາວເມືອງ ໂຂງ ແຂວງ ຈຳປາສັກ ຈະໄດ້ຮັບການສັກວັກຊີນຮອບໃໝ່ ໂດຍນຳໃຊ້ຢາ ແອສຕຣາເຊເນກາ AstraZeneca ໃຫ້ກັບກຸ່ມເປົ້າໝາຍເຊັ່ນ: ຜູ້ສູງອາຍຸນັບແຕ່ 60 ຂຶ້ນໄປ, ອາຍຸ 19-59 ປີ ທີ່ມີພະຍາດປະຈຳໂຕ (ນຳໃບຢັ້ງຢືນການກວດສຸຂະພາບມາແຈ້ງ), ຜູ້ຍິງໃຫ້ນົມລູກ ແລະ ພະນັກງານລັດຜູ້ທີຍັງບໍ່ໄດ້ຮັບວັກຊີນໂຄວິດ -19 ມາກ່ອນ.

ດຣ ຄຳສວຍ ຊາພິຈິດ ຫົວໜ້າຫ້ອງການສາທາລະນະສຸກເມືອງ ໃຫ້ຮູ້ໃນວັນທີ 12 ສິງຫາ ນີ້ວ່າ:ສຳລັບຈຸດຮັບວັກຊີນພາຍໃນເມືອງກຳນົດເອົາ 14 ຈຸດຄື: ໂຮງໝໍຊຸມ ຊົນໂຂງ, ນາຝັ່ງ, ໂພນສະອາດ, ບຸ່ງ, ຂີ້ນາກ, ໂສດ, ນາກະສັງ, ດອນຄອນ, ດອນສົມ, ລົບປາກດີ, ດອນຖານ, ດອນຂະເໝົາ, ດອນຮີທາດ ແລະ ໂຮງໝໍນ້ອຍຈຸດຫົວໂຂງ.

ມາເຖິງປັດຈຸບັນ ໃນທ່ົວເມືອງໂຂງ ກຸ່ມເປົ້າໝາຍທີ່ໄດ້ຮັບວັກຊີນປ້ອງກັນພະຍາດໂຄວິດ -19 ກວມເອົາ 60% ແລະ ການເປີດສັກວັກຊີນຮອບນີ້ເປັນຮອບທີ 5 ໂດຍມີຈຳນວນທັງໝົດ 9.200 ໂດສ.

ຈາກຄໍາຖາມທີ່ສະມາຊິກສະພາແຫ່ງຊາດຫລາຍຄົນ ໄດ້ຂຶ້ນຢູ່ກອງປະຊຸມສະໄໝ ວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ຈັດຂຶ້ນເມື່ອບໍ່ດົນມານີ້ ວ່າ: ກະຊວງທີ່ກ່ຽວຂ້ອງຈະມີວິທີແກ້ໄຂແນວໃດຕໍ່ລັດວິສາຫະກິດ ເນື່ອງຈາກຜ່ານມາລັດຖະບານໄດ້ສຸມທຶນຮອນຈໍານວນຫລວງ ຫລາຍເຂົ້າໃສ່ລັດວິສາຫະກິດ ແຕ່ບໍ່ໄດ້ຮັບຜົນສໍາເລັດ ແລະ ມີບາງລັດວິສາຫະກິດຂາດທຶນທຸກປີ ເຮັດໃຫ້ບັນດາລັດວິສາ ຫະກິດຍັງບໍ່ສາມາດເປັນຫົວຈັກຫລັກເພື່ອແກ່ດຶງເສດຖະກິດຂອງປະເທດ.

ຕໍ່ຄໍາຖາມທີ່ຕັ້ງຂຶ້ນ ທ່ານ ບຸນໂຈມ ອຸບົນປະເສີດ, ລັດຖະ ມົນຕີກະຊວງ ການເງິນ ຊີ້ແຈງວ່າ: ຄະນະເລຂາທິການສູນກາງພັກ ໄດ້ໃຫ້ທິດຊີ້ນໍາໃນການປະຕິຮູບລັດວິສາຫະ ກິດ ໂດຍເລີ່ມຈາກການແກ້ໄຂຄວາມບໍ່ໂປ່ງໃສຂອງຜູ້ບໍລິ ຫານ, ແກ້ໄຂກົນໄກທີ່ພາໃຫ້ລັດຖະບານປະກອບທຶນໄປແລ້ວຂາດທຶນ ໂດຍຈະແຕ່ງຕັ້ງຄະນະປະຕິຮູບເພື່ອແກ້ໄຂແຕ່ລະລັດວິສາຫະກິດ. ຜ່ານມາບັນຫາທີ່ເຮັດໃຫ້ລັດວິສາຫະກິດຂາດທຶນແມ່ນຍ້ອນກົນໄກການຄຸ້ມຄອງ, ມີຫລາຍພາກສ່ວນຢາກຄຸ້ມຄອງແຕ່ເມື່ອຂາດທຶນມາບໍ່ມີໃຜຮັບ ຜິດຊອບ. ລັດຖະບານໄດ້ຕັດສິນໃຈແລ້ວວ່າ: ຕໍ່ໄປສໍາລັບລັດວິສາຫະ ກິດໃດທີ່ເປັນຍຸດທະສາດ ຜູ້ອໍານວຍການລັດວິສາຫະກິດນັ້ນຈະແມ່ນລັດຖະກອນ, ສ່ວນຜູ້ທີ່ຈະເປັນຮອງອໍານວຍການຈະຈ້າງຄົນທີ່ເປັນມືອາຊີບມາເຮັດ, ຖ້າເຮັດບໍ່ໄດ້ຈະໄລ່ອອກ. ນອກຈາກນີ້ ລັດວິສາຫະກິດໃດທີ່ບໍ່ແມ່ນຍຸດທະສາດທົ່ວໄປ ແມ່ນໃຫ້ປະທານສະພາກອງປະຊຸມສະພາລັດວິສາຫະກິດເປັນຜູ້ເລືອກ ແລະ ປົດຕໍາແໜ່ງເອງ, ບໍ່ແມ່ນໃຫ້ລັດຖະມົນຕີໄປເລືອກອີກຕໍ່ໄປ.

ລັດຖະມົນຕີກະຊວງການເງິນ ຊີ້ແຈງຕື່ມວ່າ: ສໍາລັບບັນຫາຕ່າງໆ ທີ່ເກີດຂຶ້ນກັບລັດວິສາຫະກິດໃນໄລຍະຜ່ານມາ ລັດຖະບານ ໄດ້ຊີ້ນໍາໃຫ້ກວດກາຄືນຄວາມຮັບຜິດ ຊອບທັງໝົດ ເນື່ອງຈາກຜ່ານມາ ລັດວິສາຫະກິດຂາດທຶນທຸກປີ, ແຕ່ກົງກັນຂ້າມ, ໃນລັດວິສາຫະກິດຍັງມີເງິນເດືອນ 13 ແລະ ມີນະໂຍບາຍຕ່າງໆ ຢ່າງສະດວກສະ ບາຍ. ຕໍ່ໄປຈະເຮັດແບບນີ້ບໍ່ໄດ້ອີກແລ້ວ ແລະ ຕ້ອງໄດ້ເລັ່ງແກ້ໄຂຢ່າງຮີບດ່ວນ. ນອກຈາກນີ້ ໃນຍຸດທະສາດປະຕິຮູບລັດວິສາ ຫະກິດ ລັດຖະບານ ຈະໄດ້ຄົ້ນຄວ້າວ່າໃນລັດວິສາຫະກິດອັນໃດຈະຮັກສາໄວ້ຮ້ອຍສ່ວນຮ້ອຍ, ອັນໃດຈະປະສົມຫຸ່ນສ່ວນ ຫລື ຂາຍອອກ ແລະ ຍຸບເລີກ ເຊີ່ງທັງໝົດນີ້ຈະເຮັດຢ່າງເປັນລະບົບ ແລະ ມີນັກວິຊາ ການຄົ້ນຄວ້າໃຫ້ຢ່າງລະອຽດຊັດເຈນ.

ຕາມການລາຍງານ ຂອງຄະນະສະເພາະກິດປະຈຳວັນທີ 12 ສິງຫາ ໃຫ້ຮູ້ວ່າ: ສປປ ລາວ ມີຜູ້ເສຍຊີວິດເພີ່ມ 1 ຄົນ ຈາກໂຄວິດ-19 ຢູ່ແຂວງຈຳປາສັກ ລວມແລ້ວປັດຈຸບັນມີຜູ້ເສຍຊີວິດ ສະສົມລວມ 9 ຄົນ

ລາຍລະອຽດຜູ້ເສຍຊີວິດ ຈາກແຂວງຈຳປາສັກ ຄືດັ່ງນີ້:

ເພດຍິງ, ອາຍຸ 28​ ປີ, ອາຊີບ: ກຳມະກອນ, ບ້ານສົ້ມໂຮງ, ເມືອງໂຂງ, ແຂວງຈຳປາສັກ ເຊິ່ງເປັນແຮງງານທີ່ກັບມາຈາກປະເທດໄທ. ຜູ້ກ່ຽວຖືພາ ອາຍຸຄັນ 5 ເດືອນ.

ປະຫວັດການເຄື່ອນໄຫວ:

• ວັນທີ 17 ກໍລະກົດ 2021 ຜູ້ກ່ຽວມາຮອດຊາຍແດນວັງເຕົ່າຊ່ອງເມັກ ແລະ ໄດ້ເກັບຕົວຢ່າງຢູ່ດ່ານ ແລະ ນຳສົ່ງໄປສູນຈຳກັດບໍລິເວນ
• ວັນທີ 19 ກໍລະກົດ 2021​ ຜົນກວດວິເຄາະພົບເຊື້ອ COVID-19 ຈຶ່ງນຳສົ່ງເຂົ້າສະຖານທີ່ປິ່ນປົວທີ່ກຳນົດໄວ້
• ວັນທີ 1 ສິງຫາ 2021 ເລິ່ມມີອາການໄຂ້, ໄອ ແລະ ຫາຍໃຈຝຶດ

• ອາການຂອງຜູ້ກ່ຽວ ຊຸດໂຊມລົງເລື້ອຍໆ ຈາກການສ່ອງລັງສີປອດ ເຫັນວ່າເນື້ອປອດ ຖືກທຳລາຍຢ່າງຮູນແຮງທັງສອງຂ້າງ, ໜ້າທີ່ການຂອງຕັບຖືກທຳລາຍ ບົ່ງບອກເຖິງການຕິດເຊື້ອຢ່າງຮຸນແຮງ.

• ແພດໝໍ, ພະຍາບານ ໄດ້ຕິດຕາມການປິ່ນປົວຢ່າງໃກ້ຊິດ ແຕ່ອາການຜູ້ກ່ຽວບໍ່ດີຂຶ້ນ ມີແຕ່ໜັກໄປໜ້າເລື້ອຍໆ.
• ໃນວັນທີ 8 ສິງຫາ 2021 ລູກໃນທ້ອງບໍ່ເໜັງຕິງ
• ວັນທີ 10​ ສິງຫາ 2021 ຜູ້ກ່ຽວອິດເມື່ອຍຫຼາຍ, ຄວາມດັນເລືອດຕ່ຳ ແພດໝໍ ແລະ ພະຍາບານ ໄດ້ສູມທຸກກຳລັງຊ່ວຍຜູ້ກ່ຽວຢ່າງສຸດຄວາມສາມາດ ຈົນຮອດເວລາ 6 ໂມງເຊົ້າຂອງວັນທີ 11 ສິງຫາ 2021 ຜູ້ກ່ຽວໄດ້ເສຍຊີວິດລົງ.

ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 9,363 ຄົນ, ຄົນເຈັບເສຍຊີວິດສະສົມ 9 ຄົນ (ໃໝ່ 1 ຈາກແຂວງຈຳປາສັກ) ແລະ ກໍາລັງປິ່ນປົວ ທັງໝົດ 4,087 ຄົນ.

• ມາຮອດວັນທີ 11 ສິງຫາ 2021:

ໄດ້ກວດວິເຄາະທັງໝົດ 2,413 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 202 ຄົນ ເຊິ່ງຕິດເຊື້ອ ໃນຊຸມຊົນ 12 ຄົນ ເປັນຜູ້ສຳຜັດໃກ້ຊິດນຳຜູ້ຕິດເຊື້ອທີ່ຜ່ານມາ ຄື:

• ນະຄອນຫຼວງ 1 ຄົນ
• ແຂວງວຽງຈັນ 2​ ຄົນ
• ສະຫວັນນະເຂດ 6 ຄົນ
• ຈຳປາສັກ 2 ຄົນ
• ເຊກອງ 1 ຄົນ (ມີປະຫວັດສຳຜັດໃກ້ຊິດນຳຜູ້ທີ່ຕິດເຊື້ອ ໃນໄລຍະໄປຮ່ວມການອົບຮົມວຽກງານພະຍາດໄຂ້ມາລາເຣຍ ຢູ່ແຂວງສະຫວັນນະເຂດ)

     ສ່ວນ ກໍລະນີນໍາເຂົ້າ ມີ 190 ຄົນ ຈາກ ຈຳປາສັກ 118 ຄົນ,​ ນະຄອນຫຼວງ 34 ຄົນ, ສະຫວັນນະເຂດ 27 ຄົນ​, ບໍລິຄຳໄຊ 3​ ຄົນ ແລະ ສາລະວັນ 8​ ຄົນ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ເຂົ້າຕາມຈຸດຜ່ານແດນສາກົນ.  

ຕາມການລາຍງານ ຂອງກູ້ໄພ ສະຫວັນນະເຂດ Savannakhet Rescue ໃຫ້ຮູ້ວ່າ: ວັນທີ 11/08/2021 ໜ່ວຍກູ້ໄພສະຫວັນນະເຂດ 1629 ໄດ້ຮັບແຈ້ງເຫດ ວ່າມີຜູ້ເສຍຊີວິດ ເຂດບ້ານ ສຸນັນທາ ນະຄອນໄກສອນພົມວິຫານ ແຂວງສະຫວັນນະເຂດ ເມື່ອທາງທີມງານເຖິງຈຸດເກີດເຫດພົບຜູ້ເສຍຊີວິດ 1 ຄົນເປັນຊາຍ.

ອາການລັກສະນະການເສຍຊີວິດ ແມ່ນຖືກຂອງແຂງມີຄົມ ກະທົບຫົວ ເພາະມີບາດແຜຈີກຂາດເສຍເລືອດຫລາຍ ເສຍຊີວິດຄາທີ່, ສ່ວນຂໍ້ມູນລາຍລະອຽດຜູ້ເສຍຊີວິດຍັງບໍ່ຮູ້ຂໍ້ມູນຊັດເຈນ ລໍຖ້າເຈົ້າໜ້າທີ່ກຳລັງສືບສວນສອບສວນຕໍ່ໄປ.

ສ່ວນສົບຜູ້ເສຍຊີວິດ ແມ່ນທາງອາສາພວກເຮົາໄປຝາກໄວທີ່ໂຮງເຢັນໂຮງຫມໍແຂວງ ສະຫວັນນະເຂດ ເພື່ອນຳຫາຍາດຕິພີ່ນ້ອງຜູ້ເສຍຊີວິດ.

ຊ່ວຍຜ່າຕັດເກີດລູກຜູ້ຍິງຖືພາ ທີ່ຕິດເຊື້ອໂຄວິດ-19 ແລະ ຜູ້ທີ່ມີຄວາມສ່ຽງຕິດໂຄວິດ-19 ຢ່າງປອດໄພ.

ຕາມການລາຍງານ ຂອງໂຮງໝໍແຂວງຈຳປາສັກ ໃຫ້ຮູ້ວ່າ: ໃນຕອນບ່າຍ ຂອງວັນທີ 11 ສິງຫາ 2021 ສູນຄຸ້ມຄອງກໍລະນີໂຮງໝໍໂພນທອງ ໄດ້ທຳການຊ່ວຍເກີດລູກແບບທຳມະຊາດ ໃຫ້ແກ່ແຮງງານນຳເຂົ້າມາຈາກປະເທດເພື່ອນບ້ານ ທີ່ຖືພາ ເຊິ່ງມີຄວາມສ່ຽງ ແລະ ມີຜົນກວດໂຄວິດເປັນລົບ ໃນຄັ້ງທຳອິດ ຜູ້ກ່ຽວຖືພາ 37 ອາທິດ, ລູກຜູ້ທີ 1, ທ່າສະເໜີຫົວ, ໄດ້ທຳຄອດ ຢູ່ໃນຫ້ອງຄົນເຈັບ (ເນື່ອງຈາກຫ້ອງຄອດບໍ່ພ້ອມຍັງຄາຜ່າຕັດ) ແມ່ປອດໄພດີ ແລະ ເດັກເກິດຂື້ນມາແຂງແຮງ ມີນ້ຳໜັກ 2200kg.

ຊົມເຊີຍທີມແພດປະສູດ ເຖິງດ້ານສະຖານທີຈະບໍ່ມີຄວາມພ້ອມ ແຕ່ຍັງສາມາດຊ່ວຍແລະແມ່ ປອດໄພທັງສອງ.

ໃນວັນທີ 11 ສິງຫາ 2021 ທີມງານແພດຜ່າຕັດສູນໂພນທອງ ສົມທົບກັບ ທີມຜ່າຕັດທີ່ປະຈຳການໂຮງໝໍພາກສະໝາມການເງີນພາກໃຕ້ ແຂວງຈຳປາສັກ, ໝໍທຳມືນຢາສະຫຼົບ ແລະ ໝໍເດັກ ໄດ້ທຳການຜ່າຕັດຊ່ວຍເກີດລູກ, ໃຫ້ແກ່ ແມ່ຍີງຖືພາ 34 ອາທິດ ລູກຜູ້ ທີ 2, ທ່າສະເໜີກົ້ນ, ຕິດເຊື້ອໂຄວີ-19 ເຊິ່ງແມ່ນແຮງງານນຳເຂົ້າ. ການຜ່າຕັດມີຜົນສຳເລັດໄປດ້ວຍດີ ທັງແມ່ ແລະ ເດັກແມ່ນປອດໄພ ເດັກເກີດນ້ຳໜັກ 2500 kg, ເດັກແຂງແຮງດີ.

ຜົນສຳເລັດຄັ້ງນີ້ ແມ່ນການຮ່ວມແຮງຮ່ວມໃຈ ຂອງຫລາຍພາກສ່ວນຈິ່ງສຳເລັດຜົນໄດ້ ແລະ ຜ່ານໄປດ້ວຍດີ ທີມແພດໝໍເກ່ັງຫຼາຍ.