ຕາມການລາຍງານຂອງຫ້ອງການອຸດສາຫະກໍາ ແລະ ການຄ້າ ເມືອງແກ່ນທ້າວ ແຂວງໄຊຍະບູລີ ໃຫ້ຮູ້ວ່າ: ໃນ 9 ເດືອນ ຂອງປີ 2021 ໄດ້ສົ່ງສິນຄ້າອອກໄປຕ່າງປະເທດ ມູນຄ່າ 25.000.000 ກວ່າໂດລາ ທຽບໃສ່ແຜນການປີ ປະຕິບັດໄດ້ 133,5%.

ໃນນີ້, ຫຼາຍກວ່າໝູ່ແມ່ນມັນຕົ້ນແຫ້ງ 199,850 ໂຕນ ມູນຄ່າ 21.983.500 ໂດລາ, ສາລີ 14.000 ກວ່າໂຕນ ມູນຄ່າ 1.688.400 ໂດລາ, ໝາກເດືອຍ 3.000 ໂຕນ ມູນຄ່າ 753.000 ກວ່າໂດລາ, ຖົ່ວດິນຝັກ 100 ກວ່າໂຕນ ມູນຄ່າ 34.000 ກວ່າໂດລາ, ຖົ່ວແດງ 800 ກວ່າໂຕນ ມູນຄ່າ 367.000 ກວ່າໂດລາ, ໝາກງາຂາວ 300 ກວ່າໂຕນ ມູນຄ່າ 228.000 ກວ່າໂດລາ, ຫຍ້າລູຊີ 9 ໂຕນ ມູນຄ່າ 9.000 ໂດລາ, ແກນສາລີ 1.700 ໂຕນ ມູນຄ່າ 17.000 ໂດລາ ແລະ ໝາກແຕງດອງ 140 ກວ່າໂຕນ 8.600 ກວ່າໂດລາ. ພ້ອມດຽວກັນນີ້, ຍັງໄດ້ນໍາເຂົ້າສິນຄ້າຈາກຕ່າງປະເທດ ມູນຄ່າ 43.499.000 ກວ່າໂດລາ ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 4,97 %.

ໃນນີ້, ສິນຄ້າທີ່ນໍາເຂົ້າຫຼາຍແມ່ນເຄື່ອງອຸປະໂພກ 3.924.000 ກວ່າໂຕນ ມູນຄ່າ 2.093.000 ກວ່າໂດລາ, ອຸປະກອນກໍ່ສ້າງ 5.980.000 ກວ່າໂຕນ ມູນຄ່າ 1.600.000 ກວ່າໂດລາ, ເຄື່ອງໄຟຟ້າ 1.800 ກວ່າໂຕນ ມູນຄ່າ 200.000 ກວ່ໂດລາ, ພາຫະນະ 10 ກວ່າໂຕນ ມູນຄ່າ 518.000 ໂດລາ, ພາຫະນະ ແລະ ອະໄລ່ 23.000 ກວ່າໂຕນ ມູນຄ່າ 189.000 ກວ່າໂດລາ ແລະ ນໍ້າມັນເຊື້ອໄຟ 77.300.000 ໂຕນ ມູນຄ່າ 38.800.000 ກວ່າໂດລາ.

ຕາມການລາຍງານ ຂອງຄະນະສະເພາະກິດ ລາຍງານວັນທີ 1 ຕຸລາ 2021 ກ່ຽວກັບຂໍ້ມູນກໍລະນີຜູ້ເສຍຊີວິດໃໝ່ 1 ກໍລະນີ ແຂວງສະຫວັນນະເຂດ ມີຄືດັ່ງນີ້້:

ເພດຊາຍ, ອາຍຸ 48 ປີ, ບ້ານໂພນສະຫວ່າງໃຕ້, ນະຄອນໄກສອນ ແລະ ນອນປີ່ນປົວ ຢູ່ມໍລະສຸມຂອງໂຮງໝໍແຂວງ ໃນວັນທີ 29 ກັນຍາ 2021 ໃນມື້ດຽວກັນ ໄດ້ເກັບຕົວຢ່າງກວດຫາເຊື້ອ.

ມາຮອດ ເວລາ 08:00 ໂມງເຊົ້າ ຂອງວັນທີ 30 ກັນຍາ 2021 ຄອບຄົວຂໍກັບບ້ານ, ຕໍ່ມາຜູ້ກ່ຽວ ໄດ້ເສຍຊີວິດລົງ ໃນເວລາ 09:00 ໂມງຂອງມື້ດຽວກັນ ແລະ ໃນເວລາ 23:00 ໂມງ ຜົນກວດຕົວຢ່າງມາວ່າ ພົບເຊື້ອ ໂຄວິດ-19.​

ປະຈຸບັນ ຜູ້ຕິດເຊື້ອໃໝ່ທັງໝົດ ໄດ້ເຂົ້ານອນແຍກປ່ຽວ ແລະ ຮັບການປິ່ນປົວຢູ່ສະຖານທີ່ປິ່ນປົວທີ່ຖືກກຳນົດໄວ້.
ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 24,310 ຄົນ, ເສຍຊີວິດສະສົມ 20 ຄົນ (ໃໝ່ 1 ຄົນ ແລະ ເສຍຊີວິດໃໝ່ 1 ຄົນ ຢູ່ທີ່ຈໍາປາສັກເຊິ່ງຍັງບໍ່ໄດ້ລາຍງານລາຍລະອຽດເທື່ອ), ຄົນເຈັບຫາຍດີອອກໂຮງໝໍມື້ວານນີ້ມີ 135 ຄົນ ແລະ ຄົນເຈັບກໍາລັງປິ່ນປົວ ທັງໝົດ 5,691 ຄົນ.

ພາບແຮງຄວາມປະທັບໃຈ ຄົນລາວເຮົາຊ່ວຍເຫຼືອກັນ ບໍ່ວ່າຈະຮູ້ຈັກກັນ ແຕ່ເມື່ອເຫັນຜູ້ອື່ນກຳລັງລຳບາກ ແລະ ຕ້ອງການຄວາມຊ່ວຍເຫຼືອ ເມື່ອເຮົາເຫັນ ກໍຕ້ອງຮີບຮ້ອນລົງໄປຊ່ວຍເຫຼືອ.

ຄືກັບເລື່ອງໜ້າປະທັບໃຈ ເລື່ອງນີ້: ເຊິ່ງທາງຜູ້ໃຊ້ເພສບຸກທ່ານໜຶ່ງ ກໍໄດ້ໂພສເລົ່າເຫດການເລື່ອງທີ່ພົບເຫັນລະຫວ່າງເດີນທາງ, ເຊິ່ງເນື້ອໃນມີດັ່ງນີ້:

” ຂ້ອຍ ອາດຊິບໍ່ແມ່ນຄົນດີ ແຕ່ຂ້ອຍເຄີຍຜ່ານຈຸດນີ້ມາ ນ້ຳໃຈອ້າຍນ້ອງທີ່ຊ່ວຍກັນ ເດີ້ໜົດທຸກຄົນ ຂ້ອຍກາບໍ່ໄດ້ລວຍດອກ ແຕ່ຂໍຊ່ວຍເຮືອແຮງ ແລະ ຊື້ຂອງທີ່ຈະເອົາໄປຂາຍ ທັ້ງໜົດເລີຍ ຂອບໃຈອ້າຍນ້ອງ ທີ່ຮ່ວມມືຈອດລົດຊ່ວຍກັນ ຂໍມອບໃຫ້ແມ່ຕູ້ 2000฿ ເພືອໃຫ້ກຳລັງໃຈ ເພາະໂຕເອງກໍເຄີຍຜ່ານຈຸດນີ້ມາ ນ້ຳໃຈພວກເຮົາ ມ້ຽນທາງອານາໄມ້ ເສັດຊັບຮຽບຮ້ອຍລູກຊ່ວຍໄດ້ຊ້ຳນີ້ເດີ້ ”

ເຊິ່ງໂພສດັ່ງກ່າວກໍເຮັດໃຫ້ຫຼາຍຄົນປະທັບໃຈ ແລະ ເຂົ້າມາຊົມເຊີຍເປັນຈຳນວນຫຼາຍ.

ພຣະ​ສົງ​ສາມະເນນ​ ຕິດ​ເຊື້ອ​ໂຄວິດ​19​ ລວມ​ ເປັນ​32​ ອົງ​ສະເພາະ​ພາຍໃນ​ ນະຄອນ​ໄກສອນ​ພົມວິຫານ​ ແຂວງ​ສະຫວັນ​ນະ​ເຂດ

ຕາມຄະນະສະເພາະກິດແຈ້ງຂ່າວ “ວັນນີ້ 30 ກັນຍາ 2021, ຈຳນວນຜູ້ຕິດເຊື້ອພາຍໃນວັດໂພໄຊຍະຣາມ ບ້ານສະໜາມໄຊ ນະຄອນໄກສອນ ມີ (24) ກໍລະນີ ແລະ ທັງໝົດເປັນຄູບາ ແລະ ສາມະເນນ ທີ່ພົວພັນໃກ້ຊິດກັບກໍລະນີ ຕິດເຊື້ອລາຍງານໃນວັນທີ 27 ກັນຍາ 2021.”

ພາຍໃນວັດດັ່ງກ່າວ ມີພະສົງສາມະເນນທັງໜົດ 64 ອົງ ແລະ ຮອດປະຈຸບັນນີ້ ມີພະສົງສາມະເນນໃນວັດດັ່ງກ່າວຕິດເຊື້ອທັງໝົດ (+ 32) ກໍລະນີ,

2. ຄະນະດັ່ງກ່າວ, ໄດ້ຍ້າຍຍ້າຍຈາກສູນປິ່ນປົວຫຼັກ 09 ມາຢູ່ສູນປິ່ນປົວພາຍໃນຈຸດໂຮງງານອັບເກນເດີ ທາງຂຶ້ນປ່າຊ້າຫຼວງ ທາງຂຶ້ນມະຫາວິທະຍາໄລສະຫວັນນະເຂດ

ພະແນກ ສັນຕິບານ ປກສ ເມືອງສີສັດຕະນາກ ລົງແກ້ໄຂຄົນສັນຊາດຫວຽດນາມຊຸມແຊວເຫຼົ້າເບຍ

ຕາມປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ໃນເວລາ 20 ໂມງ 15 ນາທີ ພະແນກສັນຕິບານ ເມືອງສີສັດຕະນາກ ລົງກວດກາແກ້ໄຂກຸ່ມຄົນຕັ້ງວົງຊຸມແຊວເຫຼົ້າເບຍຢູ່ຫ້ອງແຖວເຂດບ້ານດົງປ່າລານທົ່ງ ເມືອງສີສັດຕະນາກ ນວ ພົບເຫັນສັນຊາດຫວຽດນາມຈຳນວນ 3 ຄົນທີ່ກຳລັງຕັ້ງວົງຊຸມແຊວເຫຼົ້າເບຍລະເມີດຄຳສັ່ງເລກທີ 016/ຈນວ ເຈົ້າໜ້າທີ່ຈຶ່ງໄດ້ສຶກສາອົບຮົມໃຫ້ພວກກ່ຽວຮັບຮູ້-ເຂົ້າໃຈ ພ້ອມທັງນຳໃຊ້ມາດຕະການປັບໃໝຕາມລະບຽບການ.

ກອງບັນຊາການ ປກສ ນະຄອນຫຼວງວຽງຈັນ ຮຽກຮ້ອງມາຍັງເຈົ້າຂອງກິດຈະການໃຫ້ເປັນເຈົ້າການໃນການປ້ອງກັນ, ສະກັດກັ້້ນການແຜ່ລະບາດພະຍາດໂຄວິດ-19 ຖ້າເມີນເສີຍປ່ອຍໃຫເຄຫາສະຖານທີ່ຕົນເອງຮັບຜິດຊອບເປັນບ່ອນຕັ້ງວົງຊຸມແຊວເຫຼົ້າເບຍທີ່ເປັນສາເຫດເຮັດໃຫ້ການແຜ່ລະບາດພະຍາດໂຄວິດ-19 ຂະຫຍາຍອອກສູ່ວົງກວ້າງ ຖ້າລະເມີດເຈົ້າໜ້າທີ່ກວດພົບຈະດຳເນີນຕາມກົດໝາຍຢ່າງບໍ່ມີຂໍ້ຍົກເວັນ ຮຽກຮ້ອງສັງຄົມຖ້າພົບເຫັນການລະເມີດລາຍງານມາເບີວອດແອັບ ປກສ ນວ 020 28899774.

“ນົມແມ່ ເປັນແຫຼ່ງອາຫານທີ່ສໍາຄັນຕໍ່ສຸຂະພາບທີ່ດີຂອງຊາດ”

ນາງ ອ່ຽນ ເປັນຄົນຊົນເຜົ່າພູນ້ອຍ ອາຍຸ 21 ປີ ອາໄສຢູ່ນໍາຄອບຄົວສາມີກັບລູກສອງຄົນ ລວມກັນທັງໝົດເປັນຫ້າຄົນທີ່ບ້ານ ຢາປຸງ, ເມືອງຜົ້ງສາລີ. ກິດຈະກໍາຫຼັກສຳລັບການດໍາລົງຊີວິດພວກຂອງເຂົາແມ່ນການເກັບກ່ຽວ ແລະ ຂາຍໃບຊາຂຽວ. “ເນື່ອງຈາກການເກັບໃບຊາຂຽວຕ້ອງໄດ້ໃຊ້ເວລາດົນ, ຂ້ອຍເລີຍເອົາເຂົ້າກັບນົມຜົງໃຫ້ລູກຄົນທໍາອິດກິນຕອນລາວມີອາຍຸໄດ້ສາມເດືອນ. ແຕ່ເມື່ອອາສາສະໝັກໃຫ້ຄຳປຶກສາ ໂຄງການຮ່ວມມືປັບປຸງດ້ານໂພຊະນາການ SCALING ທີ່ສະໜັບສະໜູນໂດຍ ສະຫະພາບ ເອີຣົບ ໄດ້ມາອະທິບາຍສູ່ຟັງກ່ຽວກັບວິທີການ ແມ່ຄວນປະຕິບັດ ໃນເວລາຖືພາ ແລະ ເວລາມີລູກນ້ອຍ. ດຽວນີ້ຂ້ອຍມີລູກນ້ອຍເປັນຜູ້ທີສອງ ລາວມີອາຍຸໄດ້ເກົ້າເດືອນແລ້ວ ແລະ ຂ້ອຍໄດ້ສືບຕໍ່ລູກກີນນົມແມ່ ແລະ ເອົາອາຫານເສີມໃຫ້ລາວກີນຄຽງຄູ່ກັນໄປ. ຂ້ອຍສັງເກດເຫັນວ່າລາວມີການເຕີບໂຕໄວ ແລະ ມີສຸຂະພາບແຂງແຮງດີ”.

ໂຄງການຮ່ວມມືປັບປຸງດ້ານໂພຊະນາການ (SCALING) ແມ່ນເລັງໃສ່ການປັບປຸງຄວາມໝັ້ນຄົງດ້ານສະບຽງອາຫານ ແລະ ໂພຊະນາການຂອງ 420 ບ້ານໃນ 14 ເມືອງ ຂອງແຂວງຫົວພັນ, ຫຼວງນໍ້າທາ, ຫຼວງພະບາງ ແລະ ແຂວງຜົ້ງສາລີ ໃນພາກເໜືອຂອງປະເທດລາວ ໂດຍເນັ້ນໜັກໃສ່ເດັກຍິງ, ແມ່ຍິງຖືພາ ແມ່ຍິງທີ່ພວມໃຫ້ນົມລູກ ແລະ ເດັກນ້ອຍອາຍຸ 5 ປີ ລົງມາ.

ທ່ານຮູ້ບໍ່ວ່າການໃຫ້ນົມລູກໃນໄລຍະໜຶ່ງຊົ່ວໂມງຫຼັງເກີດ (ນໍ້ານົມເຫຼືອງ) ຈະຊ່ວຍປ້ອງກັນເດັກເກີດໃໝ່ຈາກການຕິດເຊື້ອ ແລະ ສາມາດຊ່ວຍຊີວິດໄດ້?

ການລ້ຽງລູກດ້ວຍນົມແມ່ ເປັນເຄື່ອງມືປ້ອງກັນທາງທຳມະຊາດ ແລະ ເປັນຕົວຊ່ວຍຕ້ານກັບບັນດາພະຍາດຕິດຕໍ່ ແລະ ພະຍາດທີ່ຕິດຕໍ່ບໍ່ໄດ້ ຫຼາຍຊະນິດໃຫ້ແກ່ແມ່ ແລະ ເດັກອ່ອນ. ນໍ້ານົມແມ່ຈະຊ່ວຍຫຼຸດຄວາມສ່ຽງຂອງພະຍາດຖອກທ້ອງ, ພະຍາດທາງລະບົບຫາຍໃຈ, ການຕິດເຊື້ອຫູກາງ, ມະເຮັງເມັດເລືອດຂາວ ແລະ ພະຍາດຫືດໃນເດັກນ້ອຍ ພ້ອມທັງປະກອບສ່ວນສ້າງຄວາມເຂັ້ມແຂງໃຫ້ລະບົບພູມຄຸ້ມກັນ ໂດຍຜ່ານສານພູມຕ້ານທານທີ່ໄດ້ຈາກນໍ້ານົມແມ່. ນອກນີ້, ການລ້ຽງລູກດ້ວຍນົມແມ່ຍັງຊ່ວຍຫຼຸດຄວາມສ່ຽງໃນການເປັນມະເຮັງເຕົ້ານົມໃຫ້ຜູ້ເປັນແມ່.

ການລ້ຽງລູກດ້ວຍນົມແມ່ ມີຄວາມສໍາຄັນຕໍ່ສຸຂະພາບໃນທຸກຊ່ວງຊີວິດຂອງເດັກ ແລະ ຊ່ວຍຫຼຸດຄ່າໃຊ້ຈ່າຍໃຫ້ແກ່ລະບົບສາທາລະນະສຸກ ແລະ ຄອບຄົວ. ການລ້ຽງລູກດ້ວຍນົມແມ່ ຍັງມີສ່ວນຊ່ວຍປັບປຸງການພັດທະນາສະໝອງ ແລະ ການເຂົ້າໂຮງຮຽນ ເຊິ່ງຕິດພັນໄປເຖິງການສາມາດມີລາຍຮັບທີ່ສູງຂຶ້ນເມື່ອເດັກເຕີບໂຕເປັນຜູ້ໃຫຍ່.

ການຕະຫຼາດທີ່ຊັກຈູງໃຫ້ນໍາໃຊ້ຜະລິດຕະພັນແທນນໍ້ານົມແມ່ ເປັນໄພຂົ່ມຂູ່ຕໍ່ກັບຫຼັກການປະຕິບັດທາງທໍາມະຊາດ ທີ່ມີຄວາມສໍາຄັນນີ້. ເປົ້າໝາຍຫຼັກຂອງບັນດາບໍລິສັດຜະລິດອາຫານຂະໜາດໃຫຍ່ແມ່ນເຮັດການຕະຫຼາດສຳລັບຜະລິດຕະພັນຂອງຕົນເທົ່ານັ້ນ ໂດຍບໍ່ໄດ້ໃສ່ໃຈ ແລະ ຄຳນືງເຖີງຜົນຕາມມາພາຍຫຼັງ. ເວົ້າອີກຢ່າງໜຶ່ງຄື ຜູ້ຜະລິດນົມຜົງສໍາລັບເດັກນ້ອຍມີໜ້າທີ່ເພີ່ມຍອດຂາຍນົມຜົງ ແລະ ຊັກຈູງໃຫ້ແມ່ທີ່ເກີດລູກໃໝ່ເຂົ້າໃຈວ່າຜົນປະໂຫຍດຂອງຜະລິດຕະພັນທາງໂພຊະນາການຂອງພວກເຂົາທຽບເທົ່າໄດ້ກັບການລ້ຽງລູກດ້ວຍນົມແມ່. ແຜນການຫາກຳໄລເພີ່ມຂອງບໍລິສັດເຫຼົ່ານີ້ໄດ້ສົ່ງຜົນກະທົບດ້ານລົບຕໍ່ສຸຂະພາບ ຍ້ອນການໂຄສະນາຊວນເຊື່ອທີ່ຊັກຈູງໄປທາງທີ່ຜິດ ແລະ ບໍ່ຖືກຕ້ອງ.

ລັດຖະບານແຫ່ງ ສປປ ລາວ ໄດ້ບັນລຸຈຸດໝາຍສໍາຄັນໃນການຄວບຄຸມຄວາມເສຍຫາຍດັ່ງກ່າວ ດ້ວຍການຮັບຮອງເອົາກົດລະບຽບສາກົນໃນການເຮັດການຕະຫຼາດສິນຄ້າທົດແທນນໍ້ານົມແມ່ ໃນເດືອນທັນວາ 2019 ກໍ່ຄື “ດຳລັດວ່າດ້ວຍຜະລິດຕະພັນອາຫານ ແລະ ອຸປະກອນກ່ຽວກັບອາຫານສຳລັບເດັກອ່ອນ ແລະ ເດັກນ້ອຍ”.

ດຳລັດສະບັບດັ່ງກ່າວແມ່ນເພື່ອປົກປ້ອງ ແລະ ສົ່ງເສີມການລ້ຽງລູກດ້ວຍນົມແມ່ ໂດຍຫ້າມບໍ່ໃຫ້ມີກິດຈະກໍາເຄື່ອນໄຫວທາງການຕະຫຼາດທີ່ຊັກຈູງການປ່ຽນແທນນໍ້ານົມແມ່. ຜ່ານການປະຕິບັດນຳໃຊ້ກົດລະບຽບລະດັບສາກົນ ແລະ ລະດັບຊາດ, ຜົນກະທົບທີ່ເກີດຈາກການຊັກຈູງໃຫ້ໃຊ້ນົມຜົງ ທີ່ເປັນອັນຕະລາຍຕໍ່ຄວາມສໍາເລັດໃນການລ້ຽງລູກດ້ວຍນົມແມ່ຈະຖືກຫຼຸດຜ່ອນຈໍາກັດລົງ, ຊ່ວຍສະກັດກັ້ນການສ້າງຄວາມເຂົ້າໃຈທີ່ຜິດໆແກ່ຜູ້ເປັນແມ່ກ່ຽວກັບຜົນປະໂຫຍດຂອງການໃຊ້ນົມຜົງ.

ແນວໃດກໍ່ຕາມ, ເຖິງແມ່ນວ່າມີກົດໝາຍຫຼາຍສະບັບ ແລະ ລະບຽບການສາກົນທີ່ຊ່ວຍປົກປ້ອງຄວາມສໍາຄັນຂອງການລ້ຽງລູກດ້ວຍນົມແມ່, ແຕ່ການປະຕິບັດນໍາໃຊ້ກົດລະບຽບເຫຼົ່ານີ້ຍັງເຮັດບໍ່ທັນໄດ້ດີເທົ່າທີ່ຄວນ. ສະນັ້ນ, ການຈັດຕັ້ງປະຕິບັດ ແລະ ຊຸກຍູ້ໃຫ້ລ້ຽງລູກດ້ວຍນົມແມ່ໃນທົ່ວປະເທດຈະສາມາດປະກອບສ່ວນຢ່າງສໍາຄັນເຂົ້າໃນການປັບປຸງສຸຂະພາບຂອງແມ່ ແລະ ເດັກ ແລະ ຫຼຸດຜ່ອນພາລະຂອງການເຈັບເປັນ ແລະ ອັດຕາການເສຍຊີວິດທີ່ເກີດຂຶ້ນໃນສອງກຸ່ມປະຊາກອນນີ້.

ໃນໄລຍະ 10 ປີທີ່ຜ່ານມາ ສະພາບໂພຊະນາການຂອງເດັກອາຍຸຕໍ່າກວ່າ 5 ປີ ຢູ່ ສປປ ລາວ ໄດ້ຮັບການປັບປຸງໃຫ້ດີຂຶ້ນໃນຫຼາຍດ້ານ. ເຖິງຢ່າງໃດກໍ່ຕາມ, ອັດຕາການລ້ຽງລູກດ້ວຍນົມແມ່ຍັງຕໍ່າ; ມີພຽງ 45% ຂອງເດັກນ້ອຍລຸ່ມ 6 ເດືອນທີ່ໄດ້ກິນນົມແມ່ພຽງຢ່າງດຽວ (ສູນສະຖິຕິແຫ່ງຊາດ ແລະ ກະຊວງສາທາລະນະສຸກ, 2016).

ການຮ່ວມມືຂອງ ສະຫະພາບ ເອີຣົບ ຢູ່ ສປປ ລາວ ໄດ້ເອົາໃຈໃສ່ເປັນພິເສດຕໍ່ວຽກງານໂພຊະນາການ ໂດຍສະເພາະການໃຫ້ຄວາມສໍາຄັນຕໍ່ 1,000 ວັນທໍາອິດຂອງເດັກ. ຜ່ານການສະໜອງການຊ່ວຍເຫຼືອແບບຫຼາຍມິຕິ, ບັນດາໂຄງການໃນ ສປປ ລາວ ທີ່ໄດ້ຮັບການສະໜັບສະໜູນຈາກ ສະຫະພາບ ເອີຣົບ ໄດ້ຊ່ວຍຈັດຕັ້ງປະຕິບັດ ຍຸດທະສາດ ແຫ່ງຊາດ ດ້ານໂພຊະນາການ (2016-2025) ນັບແຕ່ຂັ້ນສູນກາງລົງໄປເຖິງຂັ້ນບ້ານ ແລະ ແກ້ໄຂບັນຫາວຽກງານໂພຊະນາການ ຜ່ານການປ່ຽນແປງທາງພຶດຕິກໍາ, ການສ້າງຄວາມເຂັ້ມແຂງໃຫ້ລະບົບສາທາລະນະສຸກ, ຄວາມສະເໝີພາບທາງດ້ານບົດບາດຍິງ-ຊາຍ, ສິ່ງອໍານວຍຄວາມສະດວກດ້ານສຸຂາພິບານ ແລະ ນໍ້າສະອາດ, ການກະສິກໍາເພື່ອໂພຊະນາການ ແລະ ການປະສານງານໃນແຕ່ລະກະຊວງ.

ການສະໜັບສະໜູນດ້ານງົບປະມານ ແມ່ນເປັນປັດໄຈສໍາຄັນຂອງການຮ່ວມມືສາກົນຂອງ ສະຫະພາບ ເອີຣົບ; ການຊ່ວຍເຫຼືອດັ່ງກ່າວຕິດພັນກັບການໂອນທຶນຊ່ວຍເຫຼືອໄປທີ່ຄັງເງິນແຫ່ງຊາດເພື່ອຊ່ວຍປະຕິຮູບການພັດທະນາແບບຍືນຍົງ. ໃນ ສປປ ລາວ, ການຮ່ວມມືຂອງ ສະຫະພາບ ເອີຣົບ ໄດ້ຊ່ວຍສະໜັບສະໜູນງົບປະມານຂອງລັດແບບໂດຍກົງເພື່ອບັນລຸເປົ້າໝາຍຂອງວຽກງານໂພຊະນາການເຖິງປີ 2022, ລວມທັງດໍາລັດວ່າດ້ວຍ “ການຄວບຄຸມຜະລິດຕະພັນຂອງເດັກອ່ອນ ແລະ ເດັກນ້ອຍ” ແລະ ອື່ນໆ (ດໍາລັດວ່າດ້ວຍຜະລິດຕະພັນອາຫານ ແລະ ອຸປະກອນກ່ຽວກັບອາຫານສຳລັບເດັກອ່ອນ ແລະ ເດັກນ້ອຍ).

ການຮ່ວມມືຂອງສະຫະພາບ ເອີຣົບ ຈະສືບຕໍ່ສະໜັບສະໜູນວຽກງານໂພຊະນາການຂອງຊຸມຊົນຜ່ານການເຜີຍແຜ່ ແລະ ຕິດຕາມກວດກາ ດຳລັດວ່າດ້ວຍຜະລິດຕະພັນອາຫານ ແລະ ອຸປະກອນກ່ຽວກັບອາຫານສຳລັບເດັກອ່ອນ ແລະ ເດັກນ້ອຍໃນທົ່ວປະເທດໃນແຕ່ລະຂັ້ນການປົກຄອງ ເພື່ອປົກປ້ອງການລ້ຽງລູກດ້ວຍນົມແມ່ ແລະ ສົ່ງເສີມໂພຊະນາການ ແລະ ຊີວິດການເປັນຢູ່ທີ່ດີຂອງປວງຊົນລາວທຸກທົ່ວໜ້າ.