ເມື່ອບໍ່ດົນມານີ້, ບໍລິສັດ ກຸ່ມຄໍາໄພຊະນະ ຈໍາກັດຜູ້ດຽວຈະລົງທຶນຫຼາຍກວ່າ ທຸ້ມທຶນກວ່າ 47 ລ້ານ ໂດລາ ກຽມສ້າງພູເບ້ຍ ເປັນແຫຼ່ງທ່ອງທ່ຽວຄົບວົງຈອນ ໄລຍະສໍາປະທານ 50 ປີ.

ໃນໂຄງການສະຫວັນທະເລໝອກພູເບ້ຍຢູ່ເມືອງອານຸວົງ ແຂວງໄຊສົມບູນ ຊຶ່ງໂຄງການດັ່ງກ່າວມີເນື້ອທີ່ສໍາປະທານປະມານ 28,6 ເຮັກຕາ ໂດຍມີ ໄລຍະສໍາປະທານ 50 ປີ ນັບແຕ່ມື້ລົງລາຍເຊັນເປັນຕົ້ນໄປ.

ເນື້ອທີ່ສໍາປະທານດັ່ງກ່າວໄດ້ແບ່ງເປັນແຕ່ລະເຂດພັດທະນາຄື: ເຂດພັດທະນາ ເທິງຈອມພູເບ້ຍ 1 ເຮັກຕາ, ເຂດປ້ອມກາງສາລາຊົມວິວ 1 ເຮັກຕາ, ຈຸດຊົມວິວທ່ອງທ່ຽວປ່າຂົນ 0,5 ເຮັກຕາ, ຈຸດຊົມວິວປ້ອມປາກກ້ວຍ 2,3 ເຮັກຕາ, ຈຸດຕັ້ງເຂດກໍ່ສ້າງສໍານັກງານຫ້ອງການ, ລີສອດ, ຈຸດຕ້ອນຮັບ, ສະຖານທີ່ຈອດລົດ 14 ເຮັກຕາ ແລະ ຈຸດເຂດລຽບຕາມຜາຍອດນໍ້າຂຽວ ແລະ ສາມແຍກນໍ້າຈັ້ງ, ນໍ້າເບ້ຍ ຈໍານວນ 9,8 ເຮັກຕາ.

ແຫຼ່ງຂ່າວຈາກ ວຽງຈັນທາຍ

ວັນທີ 2 ພະຈິກຜ່ານມາ ຄະນະສະເພາະກິດຈັດສັນຄວາມບໍ່ເປັນລະບຽບຮຽບຮ້ອຍຕາມເສັ້ນທາງສາຍຫຼັກໃນຂອບເຂດເມືອງຫາດຊາຍຟອງ ນະຄອນຫຼວງວຽງຈັນ ໂດຍມີພາກສ່ວນກ່ຽວຂ້ອງຈາກຫ້ອງວ່າການເມືອງ ຫ້ອງການໂຍທາທິການ ແລະ ຂົນສົ່ງ ຫ້ອງການອຸດສາຫະກຳ ແລະ ການຄ້າ ຫ້ອງການຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ພະລັງງານບໍ່ແຮ່ ແລະ ໜ່ວຍຕໍາຫຼວດຈະລາຈອນ ເມືອງຫາດຊາຍຟອງ ໄດ້ຮ່ວມກັບອົງການປົກຄອງບ້ານຫາດຊາຍຂາວ ລົງຈັດຕັ້ງປະຕິບັດວຽກງານເພື່ອຈັດສັນຄືນຄວາມບໍ່ເປັນລະບຽບທາງດ້ານການປຸກສ້າງຕໍ່ເຕີມອາຄານຮ້ານຄ້າທີ່ຂາຍເຄື່ອງຍ່ອຍຕາມແຄມທາງ ແລະ ການຕິດຕັ້ງປ້າຍໂຄສະນາອື່ນໆທີ່ບໍ່ໄດ້ຢູ່ໃນລະບຽບວາງອອກ ບໍ່ໄດ້ຮັບອະນຸຍາດຈາກພາກສ່ວນກ່ຽວຂ້ອງ ພ້ອມທັງການນໍາເອົາເຄື່ອງຂອງມາວາງຂາຍຊະຊາຍຢູ່ຕາມແຄມທາງແບບບໍ່ຄົງທີ່ ເຊິ່ງໄດ້ສ້າງຄວາມບໍ່ເປັນລະບຽບທີ່ບໍ່ຈົບງາມ ເຮັດໃຫ້ກີດຂວາງການສັນຈອນ ແລະ ອາດສົ່ງຜົນກໍ່ໃຫ້ເກີດອຸບັດເຫດອີກດ້ວຍ ດັ່ງນັ້ນເພື່ອປະຕິບັດຕາມທິດຊີ້ນໍາຂອງເຈົ້າເມືອງຫາດຊາຍຟອງ ແລະ ຕາມຂໍ້ຕົກລົງແຕ່ງຕັ້ງດັ່ງກ່າວ ເພື່ອໃຫ້ຄະນະສະເພາະກິດ ໄດ້ລົງຈັດຕັ້ງປະຕິບັດຕົວຈິງຢູ່ພື້ນຖານ ແລະ ມີຜົນສໍາເລັດ.

ພ້ອມດຽວກັນ ຄະນະດັ່ງກ່າວກໍໄດ້ລົງວັດແທກພື້ນທີ່ຂອບເຂດຂອງທາງທີ່ກໍານົດໃຫ້ເປັນເຂດສະຫງວນ 5 ແມັດ ຈາກຂອບທາງອອກມາ ເຊີ່ງພົບເຫັນວ່າຍັງມີບັນດາຮ້ານຄ້າທີ່ຂາຍເຄື່ອງຍ່ອຍຕາມແຄມທາງໄດ້ລະເມີດ ລະບຽບການເປັນຈໍານວນຫຼາຍຮ້ານ ໂດຍສະເພາະແມ່ນຢູ່ໜ້າທາງເຂົ້າຕະຫຼາດສົມຫວັງຫຼັກ 8 ແລະ ນອກນັ້ນຍັງມີປ້າຍໂຄສະນາຈໍານວນໜຶ່ງທີ່ຕິດຕັ້ງຢູ່ໃນເຂດທີ່ຫ້າມເອົາໄວ້ ແລະ ກໍໃກ້ແຄມທາງເກີນໄປ ເພາະອາດຈະເຮັດໃຫ້ກີດຂວາງການສັນຈອນຂອງພາຫະນະ ທັງໝົດນັ້ນ ຄະນະສະເພາະກິດແມ່ນໄດ້ມີການຕັກເຕືອນໃຫ້ເຈົ້າຂອງຮ້ານຫຍັບຍ້າຍເຄື່ອງອອກ ພ້ອມທັງໝາຍເຂດແດນເອົາໄວ້ສໍາລັບເຂດສະຫງວນ ສ່ວນເທີບເງີບທີ່ຕໍ່ເຕີມກາຍອອກມາ ແມ່ນແນະນໍາໃຫ້ເຈົ້າຂອງຮ້ານມ້າງອອກ ແລະ ເຮັດບົດບັນທຶກກັບທີ່ ເພື່ອບໍ່ໃຫ້ຜູ້ກ່ຽວນໍາເອົາເຄື່ອງ ແລະ ສີ່ງກີດກັ້ນມາວາງໃສ່ອີກ ຖ້າຫາກວ່າໄດ້ຮັບການກ່າວເຕືອນແລ້ວ ແຕ່ຍັງມີການລະເມີດບໍ່ປະຕິບັດຕາມ ກໍຈະຖືກປັບໃໝຕາມລະບຽບຂອງກົດໝາຍວາງອອກ.

ແຫຼ່ງຂ່າວ: Vientiane Mai

ກອງບັນຊາການ ປກສ ເມືອງທ່າແຂກ ມ້າງກຸ່ມແກ້ງຄ້າ-ຂາຍຢາເສບຕິດ ປະເພດກັນຊາອັດແທ່ງໄດ້ ຈໍານວນ 722 ກິໂລກຼາມ, ຈັບຕົວຜູ້ຖືກ ຫາໄດ້ 5 ຄົນ.

ເຈົ້າຫນ້າທີ່ ໃຫ້ຮູ້ວ່າ: ໃນລະຫວ່າງ ວັນທີ 6-7 ສິງຫາ 2022 ຜ່ານມານີ້, ເຈົ້າຫນ້າທີ່ຕໍາຫຼວດ ປກສ ເມືອງທ່າແຂກ ໄດ້ສືບຮູ້ມີຜູ້ຖືກສົງໃສທີ່ພົວພັນຄ້າ-ຂາຍຢາເສບຕິດ ບ້ານດອນປາແດກ ແລະ ບ້ານນາມັນປາ ເມືອງຫນອງບົກ, ຈຶ່ງໄດ້ຈັດກໍາລັງລົງຕິດຕາມກວດກາເຂົ້າກວດຄົ້ນເຮືອນຂອງຜູ້ຖືກສົງໄສ. ໃນ ເບື້ອງຕົ້ນ, ສາມາດ ຈັບຕົວໄດ້ 2 ຄົນ.

ຜ່ານການສອບສວນຂອງເຈົ້າຫນ້າທີ່, ຜູ້ຖືກຫາຊື່ ທ້າວ ເພັດທະນຸສິນ ອາຍຸ 35 ປີ, ຢູ່ບ້ານດອນປາ |ແດກ ແລະ ທ້າວ ເຢັ້ງ ຫຼື ສີ ອາຍຸ 37 ປີ, ຢູ່ບ້ານນາມັນປາ ເມືອງຫນອງບົກ ແຂວງຄໍາມ່ວນ. ພວກກ່ຽວໄດ້ມີການພົວພັນ, ຊື້-ຂາຍ ແລະ ຂົນສົ່ງສິ່ງເສບຕິດ ປະເພດກັນຊາອັດແທ່ງ ເພື່ອສົ່ງຂາຍໄປປະເທດໃກ້ຄຽງ ແລະ ຜ່ານມາເຄີຍຊື້-ຂາຍຮ່ວມກັນມາແລ້ວຫຼາຍຄັ້ງ.

ນອກນັ້ນ, ພວກກ່ຽວໄດ້ຊັດທອດເຖິງຜູ້ຮ່ວມຂະບວນການເພີ່ມອີກ 3 ຄົນ; ຊື່ທ້າວ ເຊັ່ງຊົງ ອາຍຸ 33 ປີ, ຢູ່ບ້ານຫນອງຊົງ, ທ້າວ ເຊີນ ອາຍຸ 32 ປີ, ຢູ່ບ້ານໂພນແພງ ແລະ ທ້າວ ພູສິດ ຫຼື ຊຽງນາງ ອາຍຸ 35 ປີ, ຢູ່ບ້ານຫນອງປ່ອງ ທັງສາມບ້ານຂຶ້ນກັບ ເມືອງຄໍາເກີດ ແຂວງບໍລິຄໍາໄຊ.

– ຫຼັງຈາກເຈົ້າຫນ້າທີ່ໄດ້ຮູ້ຂໍ້ມູນດັ່ງກ່າວແລ້ວ ຈຶ່ງໄດ້ຈັດຕັ້ງກໍາລັງລົງຕິດຕາມການເຄື່ອນໄຫວຂອງພວກກ່ຽວທັງສາມ ແລະ ໄດ້ເຂົ້າກັກຕົວຜູ້ຖືກຫາທັງ 3 ຄົນ ທີ່ ກໍາລັງນັດສົ່ງສິ່ງເສບຕິດຢູ່ທີ່ເຂດບ້ານໂພນພິມ ເມືອງທ່າແຂກ ແຂວງຄໍາມ່ວນ ຢູ່ແຄມທາງ ເລກທີ 13 ໃຕ້ ສາມາດຢຶດຂອງກາງໄດ້ ປະເພດກັນຊາອັດ ແທ່ງ ຈໍານວນ 722 ກິໂລກຼາມ ແລະ ລົດກະບະຣີໂວ້ 2 ຄັນ, ໄປດໍາເນີນຄະດີຕາມລະບຽບກົດຫມາຍ.

ແຫຼ່ງຂ່າວ ແລະ ຮູບພາບ: ຄວາມສະຫງົບ

ເຈົ້າໜ້າທີ່ກວດກາການຄ້າ ແຂວງອຸດົມໄຊ ລົງກວດກາລາຄາ ແລະ ສິນຄ້າໝົດອາຍຸ ຢູ່ຕະຫຼາດເທດສະບານແຂວງ

ໃນວັນທີ່ 1 ພະຈິກ 2022 ນີ້ ເຈົ້າໜ້າທີ່ກວດກາການຄ້າ ພະແນກອຸດສະຫະກຳ ແລະ ການຄ້າແຂວງອຸດົມໄຊ ນຳໂດຍທ່ານນາງ ໄມພອນ ສີລິວົງ ຮອງຫົວໜ້າພະແນກ ອຸດສາຫະກຳ ແລະ ການຄ້າ ແຂວງອຸດົມໄຊ ພ້ອມດ້ວຍເຈົ້າໜ້າທີ່ກວດກາການຄ້າ ສົມທົບກັບພະນັກງານຄຸ້ມຄອງຕະຫຼາດ ໜອງແມງດາ ແລະ ຕະຫຼາດວັງໄຮ ເຂົ້າຮ່ວມນຳ.

ການລົງເຄື່ອນໄຫວກວດກາສິນຄ້າຂອງເຈົ້າໜ້າທີ່ຄັ້ງນີ້ ກໍ່ເພື່ອເຮັດໃຫ້ວຽກງານຄຸ້ມຄອງ ແລະ ນໍາເຂົ້າສິນຄ້າຈາກຕ່າງປະເທດໃຫ້ຢູ່ໃນລະບຽບກົດໝາຍທີ່ໄດ້ກຳນົດໄວ້, ທ່ານນາງ ໄມພອນ ສີລິວົງ ຮອງຫົວໜ້າພະແນກອຸດສາຫະກຳ ແລະ ການຄ້າ ແຂວງອຸດົມໄຊ ໄດ້ໃຫ້ສຳພາດວ່າ: ການລົງຄັ້ງນີ້ກໍ່ເພື່ອເກັບກຳຂໍ້ມູນສິນຄ້າທີ່ມີລາຄາແພງ ເພື່ອນຳເຂົ້າປຶກສາຫາລືຊອກຫາວີທີການແກ້ໄຂໃນຕໍ່ໜ້າ.

ນອກຈາກການລົງກວດກາລາຄາສິນຄ້າແລ້ວ ເຈົ້າໜ້າທີ່ກວດກາຍັງໄດ້ກວດກາເບິ່ງສິນຄ້ານຳເຂົ້າທີ່ບໍຖືກຕ້ອງ, ສິນຄ້າໝົດອາຍຸ, ເພື່ອບໍ່ໃຫ້ບັນດາພໍ່່ຄ້າ, ແມ່ຄ້າ ເອົາປຽບຜູ້ບໍລິໂພກ ດ້ວຍການນຳເອົາສິນຄ້າໝົດອາຍຸມາວາງຂາຍໃນທ້ອງຕະຫຼາດໃຫ້ກັບຜູ້ບໍລິໂພກ.

ການລົງກວດກາຂອງເຈົ້າໜ້າທີ່ຄັ້ງນີ້ ແມ່ນໄດ້ ລົງກວດກາຢູ່ສອງຕະຫຼາດເທດສະບານແຂວງ ຄື ຕະຫຼາດໜອງແມງດາ ແລະ ຕະຫຼາດວັງໄຮ ຈຳນວນ ທັງໝົດ 9 ຮ້ານ ສາມາດກວດພົບ ພ້ອມທັງຍຶດປະເພດອາຫານແຊ່ແຂງ ທີ່ໝົດອາຍຸ ຫຼາຍລາຍການຄື: ຮ໋ອດດອກ ຈຳນວນ 120 ຖົງ ສີນສ່ວນຊີ້ນໄກ່ ຈຳນວນ 28 ຖົງ, ເຄື່ອງໃນໄກ່ຈຳນວນ 25 ຖົງ, ຕີນໄກ່ ຈໍານວນ 1 ກິໂລ, ຕີນໝູ ຈໍານວນ 10,4 ກິໂລ, ຊີ້ນໝູຈຳນວນ 4 ຖົງ, ຊີ້ນສົມ ຈໍານວນ 18 ຖົງ, ລວມມູນຄ່າທັງໝົດ 7,371,000 ກີບ ເຊິ່ງອາຫານຈຳນວນດັ່ງກ່າວແມ່ນຈະໄດ້ນຳໄປທຳລາຍຖິມ. ສຳລັບວິທີການແກ້ໄຂໃນຕໍ່ໜ້າ ແມ່ນຈະໄດ້ສົມທົບກັບຂະແໜງການທີ່ກ່ຽວຂ້ອງເພື່ອຊອກຫາວິທີແກ້ໄຂໃຫ້ຖືກຕ້ອງ, ເໝາະສົມ ແລະ ຕ່າງມີຜົນປະໂຫຍດທັງສອງຝ່າຍ ຊຸກຍູ້ສົ່ງເສີມໃຫ້ມີການຜະລິດພາຍໃນໃຫ້ຫຼາຍຂຶ້ນ ໂດຍສະເພາະແມ່ນພຶດພັກ, ໄຂ່, ປາ ແລະ ອາຫານປະເພດອື່ນໆຕາມກໍາລັງ ແລະ ທ່າແຮງທີ່ເຮົາມີ ເພື່ອລຸດຜ່ອນການນຳເຂົ້າທີ່ມີຕົ້ນທຶນສູງ.

ນອກຈາກນີ້ ເຈົ້າໜ້າທີ່ກວດກາການຄ້າ ຍັງໄດ້ກວດບັນດາຕາຊີງຂອງແມ່ຄ້າໃນທ້ອງຕະຫຼາດ, ກວດກາບັນດາສິນຄ້າທີ່ນິຍົມບໍລິໂພກເຊັ່ນ ໄຂ່ໄກ່, ໝີ່, ຜັກບົ່ວ, ຜັກຫອມ, ເຂົ້າສານ, ແລະ ອື່ນໆ. ທັງນີ້ ກໍ່ເພື່ອເຮັດໃຫ້ການຄຸ້ມຄອງລາຄາສິນຄ້າໃນທ້ອງຕະຫຼາດບໍ່ໃຫ້ສູງເກີນໄປ ແລະ ທັງເປັນການເກັບກຳຂໍ້ມູນເພື່ອນຳໄປປຶກສາຫາລືກັບຂະ ແໜງການທີ່ກ່ຽວຂ້ອງ ເພື່ອຊອກໃຫ້ໄດ້ວິທີການແກ້ໄຂ ສະເພາະໜ້າ ແລະ ຍາວນານຕື່ມອີກ.

ແຫຼ່ງຂ່າວ: Lao National Radio

ລັດວິສາຫະກິດນ້ຳມັນເຊື້ອໄຟລາວ (ລນລ) ເຊັນສັນຍາ ກັບ ບໍລິສັດ Gaia Petro ຈາກ ສາ​ທາ​ລະ​ນະ​ລັດເກົາຫຼີ ເພື່ອສ້າງຕັ້ງບໍລິສັດ ຮ່ວມທຶນ (JVC) ໂດຍໃຊ້ທຶນທັງໝົດ 20 ລ້ານໂດລາ ສ້າງ​ຕັ້ງ​ໂຮງ​ງານ​ຜະ​ລິດ​ນ້ຳ​ມັນ​ແອັດ​​ຊັງຊີວະພາບ ຫຼື ເອ​ຕາ​ໂນນ ສະ​ໜອງໃນ ສ​ປ​ປ ລາວ ໂດຍ​ຈະເລີ່ມທ້າຍປີນີ້ ໂດຍ​ຄາດ​ວ່າ ປີ​ທຳ​ອິດ​ຈະ​ສາ​ມາດ​ສະ​ໜອງ​ນ້ຳ​ມັນ​ໄດ້​ປະ​ມານ 10 ລ້ານ​ລິດ​ຕໍ່​ເດືອນ, ກ່ອນ​ຈະ​ຜະ​ລິດ​ເພີ່ມ​ຂຶ້ນ 20% ​ຕໍ່​ປີ ນັບ​ແຕ່​ປີ​ທີ 2 ເປັນ​ຕົ້ນ​ໄປ.

ພິທີເຊັນສັນຍາການຮ່ວມທຶນເພື່ອດໍາເນີນໂຄງການຜະລິດນໍ້າມັນຊີວະພາບ ລະຫວ່າງ ລັດວິສາຫະກິດນໍ້າມັນເຊື້ອໄຟລາວ ແລະ ບໍລິສັດ Gaia Petro ສ ເກົາຫຼີ ໄດ້​ມີ​ຂຶ້ນ ໃນວັນທີ 1 ພະຈິກ 2022 ທີ່​ນະ​ຄອນຫຼວງວຽງ​ຈັນ ໂດຍການເຂົ້າຮ່ວມຂອງ ທ່ານ ບຸນປອນ ວັນນະຈິດ ຮອງລັດຖະມົນຕີ ກະຊວງການເງິນ, ທ່ານ ບຸນເຖິງ ດວງສະຫວັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ທ່ານ ສີນາວາ ສຸພານຸວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ມີພາກສ່ວນທີ່ກ່ຽວຂ້ອງ.ທ່ານ ສີສັງຄົມ ໂຄດໂຍທາ ຜູ້ອໍານວຍການ ລັດວິສາຫະກິດນໍ້າມັນເຊື້ອໄຟລາວ ໄດ້ກ່າວວ່າ: ເພື່ອປະຕິບັດຕາມນະໂຍບາຍທາງດ້ານຄວາມໝັ້ນຄົງທາງດ້ານພະລັງງານຂອງລັດຖະບານ, ລນລ ໄດ້ຈັດຫາແຫຼ່ງນໍ້າມັນທາງເລືອກອື່ນ ນອກຈາກການນຳເຂົ້າຈາກຕ່າງປະເທດ ຊຶ່ງການຈັດຫາພະລັງງານຈາກທັນຍະພືດ ທີ່ສາມາດປູກໄດ້ເອງ ແລະ ເປັນທ່າແຮງຂອງ ສປປ ລາວ ກໍເປັນທາງເລືອກໜຶ່ງທີ່ ລນລ ໄດ້ຮ່ວມກັບ ບໍລິສັດ Gaia Petro ຈາກ ສ ເກົາຫຼີ ໄດ້ສຶກສາຄວາມເປັນໄປໄດ້ດັ່ງກ່າວ.

ພາຍຫຼັງ ລນລ ແລະ ບໍລິສັດ Gaia Petro ໄດ້ມີການເຊັນບັນທຶກຄວາມເຂົ້າໃຈ ເພື່ອສຶກສາຄວາມເປັນໄປໄດ້ ໃນການສ້າງຕັ້ງ ໂຮງງານຜະລິດນ້ຳມັນເອຕາໂນນ ໃນ ສປປ ລາວ ໃນວັນທີ 5 ມິຖຸນາ 2022 ຈາກນັ້ນກໍໄດ້​ນຳເອົານໍ້າມັນຕົວແບບແອັດຊັງຊີວະພາບ​ສົ່ງໄປໃຫ້ 5 ຫ້ອງທົດລອງຂອງອົງ ການທີ່ກ່ຽວຂ້ອງ ແລະ ໄດ້ຮັບຜົນການທົດສອບແລ້ວ ວ່າເປັນນໍ້າມັນຊີວະພາບຊະນິດໃໝ່ ທີ່ບໍ່ເຄີຍນຳໃຊ້ໃນ ສປປ ລາວ ແລະ ສາມາດນຳໃຊ້ກັບເຄື່ອງຈັກທຸກຊະນິດທີ່ໃຊ້ນ້ຳມັນແອັດຊັງທີ່ນໍາໃຊ້ທົ່ວໄປໄດ້.ໃນວັນທີ 21 ຕຸລາ 2022 ລນລ ແລະ ບໍລິສັດ Gaia Petro ໄດ້ຈັດສຳມະນາສະເໜີຜະລິດ ຕະພັນດັ່ງກ່າວ ພ້ອມທັງສາທິດການຜະລິດແອັດຊັງເອຕາໂນນ ຂຶ້ນທີ່ຫ້ອງການເຕັກນິກ ຂອງ ລນລ ທີ່ບ້ານດົງຈອງ ໂດຍມີບັນດາກົມທີ່ກ່ຽວຂ້ອງ ຈາກກະຊວງອຸດສາຫະກຳ ແລະ ການຄ້າ, ກະຊວງການເງິນ, ກະຊວງພະລັງງານ ແລະ ບໍ່ແຮ່, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ແລະ ຜູ້ຕາງໜ້າຈາກບໍລິສັດ ນໍາເຂົ້າລົດຈຳນວນໜຶ່ງເຂົ້າຮວມ. ບໍລິສັດ Gaia Petro ໄດ້ສົມທົບກັບ ບໍລິສັດ ທີ່ປຶກສາ ເຂົ້າມາຊ່ວຍໃນການເກັບກໍາຂໍ້ມູນ ຂຽນບົດວິພາກຕ່າງໆ ໂດຍປະສານງານຕໍ່ເນື່ອງກັບ ລນລ ຊຶ່ງທາງດ້ານຫຼັກການ ແມ່ນທຸກຝ່າຍເຫັນດີນໍາບົດສຶກສາໂຄງການດັ່ງກ່າວ ເພາະເປັນໂຄງການໜຶ່ງ ທີ່ມີປະສິດທິຜົນ ແລະ ເປັນການຈັດຫາຜະລິດຕະພັນ ໃໝ່ ທີ່ເປັນມິດຕໍ່ສິ່ງແວດລ້ອມ ແລະ ມີຕົ້ນທຶນທີ່ຕໍ່າກວ່າ ການນໍາເຂົ້ານໍ້າມັນຈາກຕ່າງປະເທດ, ຫຼຸດຜ່ອນການນໍາໃຊ້ເງິນຕາ ແລະ ເປັນການສ້າງວຽກເຮັດງານທໍາໃຫ້ແກ່ ປະຊາຊົນລາວ ໃນຂະແໜງກະສິກໍາອີກດ້ວຍ.ທ່ານ ສີສັງຄົມ ໂຄດໂຍທາ ຍັງໃຫ້ຮູ້ວ່າ:

ໂຄງການ ແມ່ນຈະຕັ້ງຢູ່ທີ່ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ, ສ້າງຕັ້ງເປັນບໍ​ລິ​ສັດຮ່ວມທຶນ (JVC) ດ້ວຍໃຊ້ທຶນທັງໝົດ 20 ລ້ານໂດລາ, ໄລຍະໂຄງການ 12 ປີ; ໃນນັ້ນ ບໍລິສັດ Gaia Petro ຖືຮຸ້ນ 55 %; ລນລ ຖືຮຸ້ນ 22,5% ແລະ ນັກລົງທຶນພາຍໃນ ຖືຮຸ້ນ 22,5% ຄາດວ່າຜົນຜະລິດໃນປີທີ 1 ຈະ​ໄດ້​ປະ​ລິ​ມານ​ນ້ຳ​ມັນແອັດຊັງຊີວະພາບ 500.000 ລິດ/ວັນ ຫຼື 10 ລ້ານລິດ/ເດືອນ ແລະ ໃນປີທີ 2 ເປັນຕົ້ນໄປຈະເພີ່ມຂຶ້ນປີລະ 20% ໂດຍຜົນຜະລິດທັງໝົດ ລນລ ຈະເປັນຜູ້ຈຳໜ່າຍ.

ແຫຼ່ງ​ຂ່າວ: ເສດ​ຖະ​ກິດ​ການ​ຄ້າ

ພິທີ ຖະແຫຼງການງານເທດສະການ ແຫ່ງພະໄຕປິດົກ ສືບສານວັດທະນະທໍາ ລຳວົງສາລະວັນ ໄດ້ຈັດຂື້ນຢ່າງເປັນທາງການ ໃນວັນທີ 29 ຕຸລາ 2022 ທີ່ຜ່ານມາ ຢູ່ທີ່ພັດຕະຄານສິນສະໄໝ ໂດຍເປັນກຽດຖະແຫຼງການຂອງ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ປະທານຈັດງານ ເທດສະການແຫ່ພຣະໄຕປິດົກ, ສືບສານວັດທະນະທໍາ, ລຳວົງສາລະວັນ; ມີ ທ່ານ ມະໄລວອນ ສີປະເສີດ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ; ທ່ານ ສຸວິລັນ ສີອັກຄະສອນ ຮອງປະທານບໍລິສັດມໍເທັນອິນເຕີເນເຊິນນໍ, ມີບັນດາມວນຊົນ ແລະ ສື່ມວນຊົນພາຍໃນແຂວງເຂົ້າຮ່ວມ.

ໃນພິທີ ທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ໄດ້ຖະແຫຼງຂ່າວຕໍ່ສື່ມວນຊົນແຂວງສາລະວັນວ່າ: ງານເທດສະການແຫ່ພຣະໄຕປີດົກ, ສືບສານວັດທະນະທໍາ, ລຳວົງສາລະວັນ ແມ່ນ ເພື່ອເຫຼີມສະຫຼອງພິທີປະກາດຫໍໄຕຣປີດົກ ເປັນມໍລະດົກແຫ່ງຊາດ ລະດັບທ້ອງຖິ່ນຂອງແຂວງສາລະວັນ ແລະ ເພື່ອເປັນການອະນຸລັກ, ປົກປັກຮັກສາວັດທະນະທໍາຮີດຄອງປະເພນີອັນດີງາມຂອງຊາດ ແລະ ຂອງເຜົ່າ, ພ້ອມທັງເປັນການສົ່ງເສີມການທ່ອງທ່ຽວພາຍໃນປະເທດເວົ້າລວມ, ເວົ້າສະເພາະພາຍໃນແຂວງສາລະວັນກັບມາມີບັນຍາກາດຄຶກຄື້ນ ພາຍຫຼັງການແຜ່ລະບາດຂອງພະຍາດໂຄວິດ-19, ສປປ ລາວ ເຮົາໄດ້ມີນະໂຍບາຍຜ່ອນຜັນ, ຕາມນະໂຍບາຍຂອງລັດຖະບານໃນການທ່ອງທ່ຽວສີຂຽວ; ໃນນັ້ນພິທີສະເຫຼີມສະຫຼອງຄັ້ງນີ້ຍັງແນໃສ່ເສີມສ້າງສາຍພົວພັນຮ່ວມມືສາມັກຄີມິດຕະພາບ ແລະ ການຮ່ວມມືຮອບດ້ານ ລາວ-ຫວຽດນາມ ເພາະແມ່ນປີສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 45 ປີ ແລະ ວັນສ້າງຕັ້ງສາຍພົວພັນການທູດ ລາວ – ຫວຽດນາມ ຄົບຮອບ 60 ປີ ແລະ ເພື່ອຈັດຕັ້ງປະຕິບັດ ແລະ ຜັນຂະຫຍາຍ ວາລະແຫ່ງຊາດ, ໂດຍສະເພາະແມ່ນວາລະ ວ່າດ້ວຍ: ການແກ້ໄຂຄວາມຫຍຸ້ງຍາກທາງດ້ານເສດຖະກິດ ໃນງານຄັ້ງນີ້ຫວັງວ່າຈະສ້າງລາຍຮັບ, ການຈັບຈ່າຍໃຊ້ສອຍ ເຮັດໃຫ້ເສດຖະກິດຂອງແຂວງມີການຂະຫຍາຍຕົວຢ່າງແຂງແຮງ.ງານເທດສະການແຫ່ພຣະໄຕປິດົກ ສືບສານວັດທະນະທໍາ ລຳວົງສາລະວັນ ຈະໄດ້ຈັດຂຶ້ນໃນລະຫວ່າງວັນທີ 14-20 ພະຈິກ 2022 ນີ້, ເຊິ່ງພາຍໃນງານຈະໄດ້ມີການຈັດກິດຈະກຳຫຼາຍຢ່າງ ເປັນຕົ້ນ: ພິທີປະກາດຫໍໄຕຣປີດົກ ເປັນມໍລະດົກທາງດ້ານວັດທະນະທໍາແຫ່ງຊາດ ລະດັບທ້ອງຖິ່ນ ເຊິ່ງເປັນມໍລະດົກທາງດ້ານວັດທະນະທຳແຫ່ງຊາດ ແຫ່ງທຳອິດ ຂອງແຂວງສາລະວັນ, ງານປະກວດສະແດງສິລະປະ, ປະກວດນັກຮ້ອງ, ໝໍລໍາ, ນາງສາວບັນດາເຜົ່າ ແລະ ອາຫານພື້ນເມືອງ, ສະແດງກາຍະສິນ ແລະ ອື່ນໆ

ນອກນີ້ ພາຍໃນງານຍັງມີການວາງສະແດງຜະລິດຕະພັນສິນຄ້າ 2 ປະເທດ ລາວ-ຫວຽດນາມ ຈາກບັນດາເມືອງຕ່າງໆຂອງແຂວງສາລະວັນ ແລະ ບັນແຂວງພາກກາງ ຂອງ ສສ ຫວຽດນາມ, ຈັດງານສຳມະນາກ່ຽວກັບການຈັບຄູ່ທຸລະກິດດ້ານການທ່ອງທ່ຽວ, ຈັດງານກິລາແຂ່ງຂັນປະເພດຕ່າງໆ ທີ່ຈະໄປຊຽງຂວາງເກມ ແລະ ກິລາພື້ນເມືອງ. ນອກຈາກນີ້ພິທີແຫ່ພຣະໄຕປີດົກ ຈະມີການແຫ່ 15 ກ້ອນກໍາລັງ ຈາກບັນດາເມືອງຕ່າງໆ ແລະ ແຂວງ ເຊີ່ງໃນນັ້ນແຕ່ລະກ້ອນກໍາລັງແມ່ນໄດ້ແຕ່ງກາຍທີ່ເປັນເອກະລັກສະເພາະປະຈໍາທ້ອງຖິ່ນ ທີ່ເຮັດໃຫ້ແຂກເຂົ້າຮ່ວມງານໄດ້ເບີ່ງຄາດວ່າຈະມີມວນຊົນເຂົ້າຮ່ວມປະມານ 3 ພັນກວ່າຄົນ ພ້ອມນັ້ນຍັງມີພິທີທາງສາສະໜາ ໂດຍສະເພາະແຫ່ຜ້າປ່າສາມັກຄີ, ສົມໂພດພຣະພຸດທະຮູບ ແລະ ຕັກບາດຖວາຍສັງຄະທານ ຈັດຂຶ້ນທີ່ວັດກາງ (ວັດສີມຸງຄຸນ) ເມືອງ ແລະ ແຂວງສາລະວັນ.ໂອກາດດັ່ງກ່າວທ່ານ ກໍ່ໄດ້ເຊີນນຊວນມວນຊົນທັງພາຍໃນ, ຕ່າງແຂວງ ແລະ ຕ່າງປະເທດ ເຂົ້າຮ່ວມງານເທດສະການແຫ່ພຣະໄຕປີດົກ ສືບສານວັດທະນະທຳ ລຳວົງສາລະວັນ .

(ສພຊ) ໃນວັນທີ 31 ຕຸລາ 2022, ທີ່ທຳນຽບລັດຖະບານ, ກຸງເທບມະຫານະຄອນ, ຄະນະຜູ້ແທນຂັ້ນສູງສະພາແຫ່ງຊາດ ແຫ່ງ ສປປລາວ ນໍາໂດຍ ພະນະທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ເຂົ້າຢ້ຽມພົບປະ ພະນະທ່ານ ພົນເອກ ປຣະຢຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ ໃນໂອກາດເຂົ້າຮ່ວມກອງປະຊຸມໃຫຍ່ປະຈໍາປີເວທີປຶກສາຫາລືລັດຖະສະພາອາຊີ-ປາຊີຟິກ (APPF) ຄັ້ງທີ 30 ແລະ ສືບຕໍ່ຢ້ຽມຢາມຣາຊະອານາຈັກໄທ ຢ່າງເປັນທາງການ.

ໃນການຢ້ຽມພົບປະຄັ້ງນີ້, ພະນະທ່ານປະທານສະພາແຫ່ງຊາດລາວ ໄດ້ສະແດງຄວາມພາກພູມໃຈ ທີ່ໄດ້ພົບປະ ແລະ ປຶກສາຫາລື ກັບພະນະທ່ານນາຍົກລັດຖະມົນຕີໄທ ເພື່ອຊຸກຍູ້ການຮ່ວມມື ລະຫວ່າງສອງປະເທດລາວ ແລະ ໄທ ແນໃສ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຖານບ້ານໃກ້ເຮືອນຄຽງທີ່ມີແຕ່ດົນນານ ບົນພື້ນຖານການເປັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ໄທ ກໍຄື ລະຫວ່າງ ສອງອົງການນິຕິບັນຍັດ ໃຫ້ນັບມື້ນັບຈະເລີນງອກງາມຂຶ້ນ.

ໃນໂອກາດນີ້, ພະນະທ່ານປະທານສະພາແຫ່ງຊາດລາວ ໄດ້ສະແດງຄວາມຊົມເຊີຍ ຕໍ່ຜົນສໍາເລັດການເປັນເຈົ້າພາບຈັດກອງປະຊຸມ APPF ຄັ້ງທີ 30 ແລະ ຜົນສໍາເລັດເຂົ້າຮ່ວມພິທີວາງສີລາລືກກໍ່ສ້າງຂົວ ມິດຕະພາບລາວ-ໄທ ແຫ່ງທີ 5 ລະຫວ່າງແຂວງ ບໍລິຄໍາໄຊ-ບຶງການ ແລະ ໄດ້ແຈ້ງໃຫ້ຊາບຜົນການພົບປະກັບ ພະນະທ່ານ ຊວນ ຫຼີກໄພ ປະທານລັດຖະສະພາໄທ ແລະ ພະນະທ່ານ ພອນເພັດ ວິຊິດຊົນໄຊ ປະທານວຸດທິສະພາ ເຊິ່ງໄດ້ຮ່ວມກັນທົບທວນຄືນການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ລັດຖະສະພາໄທ ໃນໄລຍະຜ່ານມາ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ. ພ້ອມນີ້, ກໍໄດ້ແຈ້ງໃຫ້ຊາບກ່ຽວກັບການລົງນາມໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງສະພາແຫ່ງຊາດລາວ ແລະ ລັດຖະສະພາໄທ/ສະພາຜູ້ແທນຣາຊະດອນ ເຊິ່ງເປັນພື້ນຖານສໍາຄັນ ໃຫ້ແກ່ການພົວພັນຮ່ວມມື ຂອງສອງອົງການນິຕິບັນຍັດ.

ໃນຕອນທ້າຍ, ພະນະທ່ານນາຍົກລັດຖະມົນຕີໄທ ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງສອງອົງການນິຕິບັນຍັດ ແລະ ສອງຝ່າຍ ໄດ້ປຶກສາຫາລືການຊຸກຍູ້ການຮ່ວມມືໃນຫຼາຍດ້ານ ໂດຍສະເພາະແມ່ນການຮ່ວມມື ດ້ານຄວາມໝັ້ນຄົງ, ວຽກງານຊາຍແດນ, ການຮ່ວມມືດ້ານເສດຖະກິດ, ການຄ້າ, ການລົງທຶນ, ການເຊື່ອມໂຍງເຊື່ອມຈອດ, ດ້ານພະລັງງານ, ວຽກງານແຮງງານ ແລະ ບັນຫາ ອື່ນໆ.

ແຫຼ່ງຂ່າວ: ຂ່າວ “ຜູ້ແທນປະຊາຊົນ” Phouthen Pasaxon News