ພິທີວາງສີລາລືກ ໂຄງການກໍ່ສ້າງໂຮງໝໍໄຊຍະເວດ ຈໍາກັດຜູ້ດຽວ ໄດ້ຈັດຂຶ້ນໃນວັນທີ 2 ກຸມພາ ນີ້ ທີ່ບ້ານສີເມືອງ ເມືອງໄຊຍະບູລີ ແຂວງໄຊຍະບູລີ ໂດຍເປັນກຽດເຂົ້າຮ່ວມຂອງ ທ່ານ ບຸນແຝງ ພູມມະໄລສິດ ກໍາມະການສູນກາງພັກ ລັດຖະມົນຕີກະຊວງສາທາລະນະສຸກ, ທ່ານ ເພັງນິລັນ ຄໍາພັນເພັງ ຮອງເລຂາພັກແຂວງ ປະທານປະຊາຊົນ ແຂວງໄຊຍະບູລີ, ທ່ານ ດວງຕາ ໄຊວຸດ ຮອງເລຂາພັກແຂວງໄຊຍະບູລີ, ມີຮອງເຈົ້າແຂວງ ພ້ອມດ້ວຍພະນັກງານກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ທ່ານ ສຸກຄໍາພີ ບຸນຍາວົງ ຜູ້ລົງທຶນ ແລະ ອໍານວຍການໂຮງໝໍໄຊຍະເວດ ຈໍາກັດຜູ້ດຽວ ຂຶ້ນລາຍງານການກະກຽມການກໍ່ສ້າງ ແລະ ແຜນການດໍາເນີນງານກໍ່ສ້າງໂຮງໝໍໄຊຍະເວດ ຈໍາກັດຜູ້ດຽວ ວ່າ: ໂຮງໝໍໄຊຍະເວດ ແມ່ນການລົງທຶນພາກໂຮງໝໍເອກະຊົນແຫ່ງທໍາອິດ ຂອງແຂວງໄຊຍະບູລີ ມູນຄ່າການລົງທຶນທັງໝົດ 15 ຕື້ກີບ ເປັນໂຮງໝໍຂະໜາດ 45 ຕຽງນອນ (ລວມທັງຕຽງໄອຊີຢູ) ຕັ້ງຢູ່ໃຈກາງເມືອງໄຊຍະບູລີ ໃນເນື້ອທີ່ທັງໝົດ 5 ພັນຕາເມັດ ເປັນການລົງທຶນຂອງເອກະຊົນພາຍໃນ ໂດຍ ທ່ານ ສຸກຄໍາພີ ບຸນຍາວົງ ເປັນຜູ້ລົງທຶນ ແລະ ຖືຮຸ້ນ 100% ແບ່ງເປັນມູນຄ່າການກໍ່ສ້າງອາຄານ ຢ່າງເປັນລະບົບຄົບຊຸດ 6,4 ຕື້ກີບ ຊຶ່ງປະກອບມີ 4 ຕຶກຄື: ຕຶກສອງຊັ້ນສໍາລັບບໍລິການຄົນເຈັບ 1 ຕຶກ, ຕຶກຊັ້ນດຽວ ເປັນຮ້ານອາຫານ – ຮ້ານກາເຟ ແລະ ຊຸບເປີມາເກັດ 1 ຕຶກ ແລະ ຊັ້ນດຽວເປັນສາງເກັບຢາ, ຫ້ອງຊັກລີດ ແລະ ຫ້ອງເຢັນ ໂດຍປະກອບມີ 9 ຂະແໜງຄື:

ຂະແໜງສຸກເສີນ, ຂະແໜງກວດເຂດນອກ, ຂະ ແໜງໄອຊີຢູຟື້ນຟູຊີບ ແລະ ວາງຢາສະຫຼົບ, ຂະແໜງພາຍນອກຜ່າຕັດ, ຂະແໜງພາຍໃນ, ຂະແໜງອອກລູກ – ພະຍາດຍິງ, ຂະແໜງເດັກນ້ອຍ, ຂະແໜງການຢາ ແລະ ຂະແໜງເອໂກ້ – ຮູບພາບລັງສີ, ກໍານົດເວລາການກໍ່ສ້າງອາຄານ 18 ເດືອນໃຫ້ສໍາເລັດ. ຈາກນັ້ນ, ທ່ານ ເພັງນິລັນ ຄໍາພັນເພັງ ໄດ້ມີຄໍາເຫັນຕໍ່​ກັບການວາງສີລາລືກ ໂຄງການກໍ່ສ້າງ ໂຮງໝໍໄຊຍະເວດ ຈໍາກັດຜູ້ດຽວ ແລະ ຊ້ວນຊາຍວາງສີລາລືກ ລັ່ນຄ້ອງ 9 ບາດ ພ້ອມທັງຕັດແຖບຜ້າ ປ່ອຍໝາກປູ່ມເປົ້າ ຢ່າງເປັນທາງການ.

ຈຸດປະສົງໃນການກໍ່ສ້າງໂຮງໝໍແຫ່ງນີ້ ກໍເພື່ອຕອບສະໜອງໃຫ້ແກ່ການບໍລິການດ້ານການປິ່ນປົວທີ່ທັນສະໄໝ ແລະ ຊັດເຈນ ຫຼຸດຜ່ອນອັດຕາການແອອັດ, ຫຼຸດຜ່ອນຄວາມສ່ຽງໃນການປິ່ນປົ່ວຕາມຂັ້ນຕອນມາດຕະຖານ ແລະ ທັນເວລາໃຫ້ກັບພໍ່ – ແມ່ປະຊາຊົນພາຍໃນ ແຂວງໄຊຍະບູລີ ແລະ ແຂວງອ້ອມຂ້າງ, ເປັນທາງເລືອກໃນການເຂົ້າໃຊ້ບໍລິການຂອງຄົນເຈັບ ດ້ວຍມາດຕະຖານການແພດທີ່ທັນສະໄໝ ມີຄວາມວ່ອງ ໄວ-ຊັດເຈນ ດ້ວຍທີມແພດທີ່ມີປະສົບການສູງ ເປັນແພດຊ່ຽວຊານ ສະເພາະດ້ານ ແລະ ໃຫ້ການບໍລິການທີ່ດີ ຢູ່ໃນລາຄາທີ່ສົມເຫດສົມຜົນ.

ໃນຕອນເຊົ້າຂອງວັນທີ 1 ກຸມພາ 2022 ນີ້, ຢູ່ທີ່ສະໂມສອນ ປກສ ນະຄອນ ໄກສອນ ພົມວິຫານ ໄດ້ຈັດຝຶກອົບຮົມໃຫ້ແກ່ນັກຂັບຂີ່ລົດບັນທຸກທີ່ແກ່ແຮ່-ແກ່ຊາຍໃນເທດສະບານນະຄອນຂື້ນ ໂດຍການເປັນປະທານ ຂອງທ່ານ ພັຕ ໜອນ ຄຳຫານຊະນະ ຮອງຫົວໜ້າກອງບັນຊາ ການ ປກສ ນະຄອນ ໄກສອນ ພົມວິຫານ ທັງເປັນຜູ້ຊີ້ນຳໃນຂົງເຂດວຽກງານຕຳຫຼວດຈາລະຈອນ, ມີຫົວໜ້າພະແນກຕຳຫຼວດກອງຕຳຫຼວດຈາລະຈອນ ນະຄອນ,ມີຫ້ອງການ ຍທຂນະຄອນ,ຫ້ອງການ ຄພບຕ ນະຄອນ,ມີພະນັກງານພະແນກຕຳຫຼວດກອງຕຳຫຼວດຈາລະຈອນ ແລະ ເຈົ້າຂອງລົດບັນທຸກທີ່ແກ່ແຮ່-ແກ່ຊາຍ ເຂົ້າຮ່ວມ.

ເຊີ່ງຈຸດປະສົງໃນການຝຶກອົບຮົມໃນຄັ້ງນີ້,ເພື່ອຈັດຕັ້ງຜັນ ຂະຫຍາຍບັນດານິຕິກຳຕ່າງ ທີພົວພັນເຖິງຄວາມບໍ່ເປັນລະບຽບຮຽບຮ້ອຍທາງດ້ານການສັນຈອນຕາມເສັ້ນທາງບົກ,ດຳລັດເຊັ່ນກົດໜາຍຈະຈອນທາງບົກ,ກົດໜາຍຂົນສົ່ງທາງບົກ,ລະບຽບ 107/ປສລ ດຳລັດ 568/ນຍ,ຄຳສັ່ງເລກທີ 27/ນຍ ແລະ ຄຳສັ່ງເລກທີ່ 1470/ລມຕ ແລະ ບັນດາແຈ້ງການຂອງເຈົ້ານະຄອນ ໃຫ້ເປັນຮູບປະທຳຢ່າງແຂງແຮງ ເພື່ອຄຸ້ມຄອງປົກປັກຮັກສາຄວາມສະອາດຈົບງາມ ແລະ ຄວາມເປັນລະບຽບຮຽບຮ້ອຍພາຍໃນນະຄອນ,ໃຫ້ມີຄວາມສະອາດງາມຕາ,ມີຄວາມເປັນລະບຽບປອດໄພ ຕາມທິດ 06 ສໍຂອງການສ້າງນະຄອນ ໃຫ້ໄດ້ຮັບການຈັດຕັ້ງປະຕິບັດຄື:ສໍສະຫງົບ, ສໍສະອາດ, ສໍສີຂຽວ,ສໍສະຫວ່າງ,ສໍສະເໜ່ ແລະ ສໍສີວີໄລ ໃຫ້ປະກົດຜົນເປັນຈິງ.

ເຊີ່ງເພື່ອແນ່ໃສ່ເຮັດໃຫ້ສະພາບການສັນຈອນ ການໃຊ້ລົດຖະໜົນ ຢູ່ຕາມເສັ້ນທາງບົກ,ມີຄວາມສະຫງົບ, ມີຄວາມເປັນລະບຽບຮຽບຮ້ອຍຫຼຸດຜ່ອນການລະເມີດກົດລະບຽບຈະລາຈອນ ເພື່ອຫຼຸດຜ່ອນການເກີດອຸປະຕິເຫດ,ແນໃສ່ຜູ້ປະກອບການຜູ້ໃຊ້ລົດໃຊ້ຖະໜົນເວົ້າລວມ ແລະ ເວົ້າສະເພາະບັນດາບໍລິສັດດູດແຮ່-ດູດຊາຍ ແລະ ຜູ້ຂົນສົ່ງເຄື່ອນຍ້າຍ,ແຮ່-ຊາຍ ມີຄວາມຮັບຮູ້ ແລະ ເຂົ້າໃຈຈະແຈ້ງຕໍ່ລະບຽບກົດໜາຍ ແລະ ນິຕິກຳຕ່າງໆທີ່ພົວພັນເຖິງຄວາມບໍ່ສະຫງົບ ໃນຂົງເຂດວຽກງານຈະລາຈອນ.

ຈາກນັ້ນ,ທ່ານ ຮັອຍ ເອກ ນິກສັນ ຄຳມະຫາ ຫົວໜ້າຈຸງງານໂຄສະນາກອງຈະລາຈອນ ນະຄອນ ກໍ່ໄດ້ໃຫ້ສຳພາດຜູ້ສີ່ຂ່າວຂອງນະຄອນ ໄກສອນ ພົມວິຫານ ເຊີ່ງກໍໄດ້ໃຫ້ຮູ້ວ່າ ຊື່ງຜ່ານການຝຶກອົບຮົບໃຫ້ນັກຂັບຂີ່ລົດບັນທຸກທີ່ແກ່ແຮ່-ແກ່ຊາຍນີ້ແມ່ນໄດ້ນຳພາລົງສາທິດຕົວຈິງຢູ່ບໍລິສັດທ່າອຸດົມແຮ່ຊາຍໃຫ້ກັບເຈົ້າຂອງລົດບັນທຸກທີ່ແກ່ແຮ່-ແກ່ຊາຍໃນການໃສ່ແຮ່-ຊາຍເພື່ອບໍ່ໃຫ້ມັນຕົກເຮ່ຍໃສ່ຖະໜົນ ແລະ ເສັ້ນທາງຢູ່ໃນເທດສະບານນະຄອນ ໄກສອນ ພົມວີຫານ ແລະ ເພື່ອໃຫ້ຄວາມເປັນລະບຽບຮ້ອຍພາຍໃນນະຄອນ ແລະ ໃຫ້ມີຄວາມສະອາດງາມຕາມຂື້ນຕື່ມອີກ.

ແຫຼ່ງຂ່າວ: ຫ້ອງການ ຖະແຫລ່ງຂ່າວ,ວັດທະນະທຳ ແລະ ທ່ອງທ່ຽວ ນະຄອນ ໄກສອນ ພົມວິຫານ

ໃນວັນທີ 02/02/2022 ທີ່ຜ່ານມາ ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ສົມທົບກັບ ປກສ ເມືອງປາກອູ ແລະ ຄະນະປົກຄອງບ້ານຊ່າງໄຫ ລົງກວດກາໝໍ້ນັບໄຟລູກຄ້າ ຈາກກໍລະນີກວດພົບ ການລັກໃຊ້ໄຟຟ້າ ແລະ ດັດແປງໝໍ້ນັບໄຟ ຂອງລູກຄ້າປະເພດໄຟທຸລະກິດແຫ່ງໜຶ່ງ ທີ່ບ້ານຊ່າງໄຫ ເມືອງປາກອູ, ແຂວງຫຼວງພະບາງ.

ໃນເບື້ອງຕົ້ນທາງ ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ໄດ້ທໍາການຕັດໄຟ ແລະ ປົດໝໍ້ນັບໄຟດັ່ງກ່າວມອບໃຫ້ກັບເຈົ້າໜ້າທີ່ ເພື່ືື່ອດຳເນີນຄະດີ ຕາມລະບຽບກົດໝາຍ ພ້ອມທັງຄິດໄລຄ່າປັບໄໝຕໍ່ຜູ້ກະທຳຜິດດັ່ງກ່າວ ຕາມທີ່ໄດ້ລະບຸໄວ້ໃນ ຂໍ້ກໍານົດ ວ່າດ້ວຍການປະຕິບັດ ມາດຕະການຕໍ່ຜູ້ທີ່ ລັກກະແສໄຟຟ້າ ແລະ ດັດແປງໝໍ້ນັບໄຟ ເລກທີ 2162/ຟຟລ.ຝລຈ.

“ ການລັກໃຊ້ ກະແສໄຟຟ້າ ແລະ ດັດແປງໝໍ້ນັບໄຟ” ເປັນການກະທໍາຜິດທີ່ລະເມີດຕໍ່ ກົດໝາຍ ທັງທາງແພ່ງ, ທາງອາຍາ, ເຮັດໃຫ້ ລັດວິສາຫະກິດໄຟຟ້າລາວ ໄດ້ຮັບຄວາມເສຍຫາຍທາງດ້ານຊັບສິນ, ສູນເສຍລາຍຮັບອັນມະຫາສານ ຈາກການ ຖືກລັກໃຊ້ກະແສໄຟຟ້າ; ສໍາຄັນກ່ວານັ້ນ ການກະທໍາດັ່ງກ່າວເປັນການກະທໍາທີ່ອັບປະໂຫຍດ ເພາະອາດຈະເກີດຄວາມ ເສຍຫາຍ ຕໍ່ຊີວິດ ແລະ ຊັບສິນ ຕໍ່ຜູ້ທີ່ລັກໃຊ້ ກະແສໄຟຟ້າ ແລະ ຕໍ່ສັງຄົມອີກດ້ວຍ.

ເພື່ອຄວາມປອດໄພໃນການໃຊ້ໄຟຟ້າ ແລະ ຫລຸດຜ່ອນຜົນກະທົບທີ່ອາດຈະເກີດຂື້ນ, ຖ້າທ່ານພົບເຫັນ ການລັກໃຊ້ກະ ແສໄຟຟ້າ ແລະ ດັດແປງໝໍ້ນັບໄຟ ກະລຸນາໂທສາຍດ່ວນ ຟຟລ 0711199 ຂໍ້ມູນຂອງທ່ານຈະຖືກເກັບໄວ້ເປັນຄວາມລັບ.

ໂຄງການກໍ່ສ້າງບ້ານຈັດສັນ ທີ່ຖືກຜົນກະທົບຈາກ ໂຄງການລົດໄຟ ລາວ-ຈີນ ສຳເລັດເກືອບ 100%

ໂຄງການຊ່ວຍເຫລືອລ້າໃນການກໍ່ສ້າງບ້ານຈັດສັນ ທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ມາເຖິງທ້າຍເດືອນມັງກອນ 2022 ນີ້ ໂຄງການດັ່ງກ່າວ ໄດ້ສຳເລັດການກໍ່ສ້າງອາ ຄານເຮືອນທັງໝົດ 159 ຫລັງ ສຳເລັດ 100%, ເສັ້ນທາງພາຍນອກ 90%, ເສັ້ນທາງພາຍໃນ 100%, ຫ້ອງການບ້ານ, ສຸກສາລາ, ໂຮງຮຽນອານຸບານ, ໂຮງຮຽນປະຖົມ, ໄຟ ຟ້າ, ນ້ຳປະປາແມ່ນ 100% ລວມສະພາບຄວາມຄືບໜ້າທີ່ສຳເລັດແມ່ນ 96%.

ໃນໂອກາດ ທ່ານ ພົນຕີ ວົງສັກ ພັນທະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 3, ຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ ສະພາແຫ່ງຊາດ ພ້ອມຄະນະ ລົງຊຸກຍູ້, ຕິດຕາມກວດກາ ແລະ ເປີດກອງປະຊຸມຮ່ວມ ໂຄງ ການຊ່ວຍເຫລືອລ້າ ກໍ່ສ້າງບ້ານຈັດສັນທີ່ຖືກຜົນກະທົບຈາກ ໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ດ່ານບໍ່ເຕ່ນແດນງາມ ໃນວັນທີ 29 ມັງກອນ ຜ່ານມານ ໂດຍທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ກັບການຈັດຕັ້ງປະຕິບັດວຽກງານ ເຫັນວ່າໄດ້ຮັບຜົນສຳເລັດຫລາຍດ້ານ ໂດຍສະເພາະໂຄງການກໍ່ສ້າງບ້ານຈັດສັນ ສຳເລັດເກືອບ 100%.

ສ່ວນບັນຫາທີ່ພົບຄວາມຫຍຸ້ງຍາກ ຂໍຮຽກຮ້ອງໃຫ້ທຸກພາກສ່ວນ ພ້ອມກັນຈັດຕັ້ງປະຕິບັດໃຫ້ລຸລ່ວງຕາມເປົ້າໝາຍທີ່ວາງໄວ້ ແລະ ຄຳສະເໜີຕ່າງໆທາງແຂວງ ກໍຄື ສູນກາງຈະນຳໄປສະເໜີ, ປຶກສາຫາລືຂັ້ນເທິງຊອກທິດທາງແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານຕໍ່ໜ້າ ໃຫ້ມີຄວາມຖືກຕ້ອງສອດຄ່ອງກັບສະພາບວຽກງານຕົວຈິງ.

ແຫຼ່ງຂ່າວ: ຂປລ

ຕາມການລາຍງານຈາກ ແຟນເພຈ ຂອງລັດວິສາຫະກິດໄຟຟ້າລາວ ສາຂາແຂວງຫຼວງພະບາງໃຫ້ຮູ້ວ່າ: ໃນຕອນທ່ຽງຂອງວັນທີ 01 ກຸມພາ 2022 ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ສົມທົບກັບ ປກສ ກຸ່ມມະໂນ ແລະ ປກສ ບ້ານນາຫຼວງ ລົງກວດກາໝໍ້ນັບໄຟລູກຄ້າ ຈາກກໍລະນີກວດພົບ ການລັກໃຊ້ໄຟຟ້າ ແລະດັດແປງໝໍ້ນັບໄຟ ຂອງ ຜູ້ຊົມໃຊ້ໄຟຟ້າ ປະເພດທີ່ຢູ່ອາໄສ ຢູ່ບ້ານນາຫຼວງ ນະຄອນຫຼວງພະບາງ ແຂວງຫຼວງພະບາງ.

ໃນເບື້ອງຕົ້ນທາງ ລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ໄດ້ທໍາການຕັດໄຟ ແລະປົດໝໍ້ນັບໄຟໜ່ວຍດັ່ງກ່າວ ແລະ ມອບໃຫ້ກັບເຈົ້າໜ້າທີ່ ເພື່ືື່ອດຳເນີນຄະດີ ຕາມລະບຽບກົດໝາຍ ພ້ອມທັງຄິດໄລຄ່າປັບໄໝຕໍ່ຜູ້ກະທຳຜິດດັ່ງກ່າວ ຕາມທີ່ໄດ້ລະບຸໄວ້ໃນ ຂໍ້ກໍານົດ ວ່າດ້ວຍການປະຕິບັດ ມາດຕະການຕໍ່ຜູ້ທີ່ ລັກກະແສໄຟຟ້າ ແລະ ດັດແປງໝໍ້ນັບໄຟ ເລກທີ 2162/ຟຟລ.ຝລຈ.

“ ການລັກໃຊ້ ກະແສໄຟຟ້າ ແລະດັດແປງໝໍ້ນັບໄຟ” ເປັນການກະທໍາຜິດທີ່ລະເມີດຕໍ່ ກົດໝາຍ ທັງທາງແພ່ງ, ທາງອາຍາ, ເຮັດໃຫ້ ລັດວິສາຫະກິດໄຟຟ້າລາວ ໄດ້ຮັບຄວາມເສຍຫາຍທາງດ້ານຊັບສິນ, ສູນເສຍລາຍຮັບອັນມະຫາສານ ຈາກການ ຖືກລັກໃຊ້ກະແສໄຟຟ້າ; ສໍາຄັນກ່ວານັ້ນ ການກະທໍາດັ່ງກ່າວເປັນການກະທໍາທີ່ອັບປະໂຫຍດ ເພາະອາດຈະເກີດຄວາມ ເສຍຫາຍ ຕໍ່ຊີວິດ ແລະ ຊັບສິນ ຕໍ່ຜູ້ທີ່ລັກໃຊ້ ກະແສໄຟຟ້າ ແລະ ສັງຄົມອີກດ້ວຍ.

ເພື່ອຄວາມປອດໄພໃນການໃຊ້ໄຟຟ້າ ແລະຫລຸດຜ່ອນຜົນກະທົບທີ່ອາດຈະເກີດຂື້ນ, ຖ້າທ່ານພົບເຫັນ ການລັກໃຊ້ກະແສໄຟຟ້າ ແລະດັດແປງໝໍ້ນັບໄຟ ກະລຸນາໂທສາຍດ່ວນ ຟຟລ 0711199 ຂໍ້ມູນຂອງທ່ານຈະຖືກເກັບໄວ້ເປັນຄວາມລັບ, ພ້ອມດຽວກັນນັ້ນ ທ່ານຍັງຈະໄດ້ຮັບການສົມມະນາບຸນຄຸນ ຕາມທີ່ໄດ້ລະບຸໄວ້ໃນ ໝວດທີ III ມາດຕາ 6 ການປະຕິບັດ ນະໂຍບາຍຕໍ່ຜູ້ທີ່ມີຜົນງານ ຂອງ “ ຂໍ້ກໍານົດ ວ່າດ້ວຍການປະຕິບັດ ມາດຕະການຕໍ່ຜູ້ທີ່ ລັກກະແສໄຟຟ້າ ແລະ ດັດແປງ ໝໍ້ນັບໄຟ”

ທ່ານ ທອງສີ ມະນີລັດ ຮອງຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງພຽງ ແຂວງໄຊຍະບູລີ ໄດ້ລົງຕິດຕາມຊຸກຍູ້ໂຄງການກໍ່ສ້າງເສັ້ນທາງຮ່ອມເບຕົງເຂົ້າໂຮງຮຽນປະຖົມບ້ານແສງຈະເລີນ ຫວ່າງບໍ່ດົນມານີ້ ໂດຍມີຄະນະພັກ, ອົງການປົກຄອງບ້ານ ພ້ອມດ້ວຍປະຊາຊົນພາຍໃນບ້ານດັ່ງກ່າວເຂົ້າຮ່ວມ.

ໂຄງການກໍ່ສ້າງເສັ້ນທາງຮ່ອມເບຕົງ ເຂົ້າໂຮງຮຽນປະຖົມ ບ້ານແສງຈະເລີນ ໄດ້ເລີມລົງມືກໍ່ສ້າງມາແຕ່ວັນທີ 23 ມັງກອນ 2021 ເປັນຕົ້ນມາ, ມາຮອດປັດຈຸບັນແມ່ນສຳເລັດແລ້ວຮ້ອຍສ່ວນຮ້ອຍ ຊຶ່ງເປັນເສັ້ນທາງຊອຍເບຕົງທີ 3 ຂອງບ້ານ ລວມມູນຄ່າໃນການກໍ່ສ້າງທັງໝົດ 45 ລ້ານກີບ ໂດຍໃຊ້ທຶນຂອງປະຊາຊົນພາຍໃນບ້ານ 30 ລ້ານກວ່າກີບ, ທຶນສົມທົບຂອງເມືອງ 5 ລ້ານກີບ, ກອງທຶນພັດທະນາບ້ານ 9 ລ້ານກີບ ແລະ ທຶນສົມທົບຂອງພໍ່ແມ່ຜູ້ປົກຄອງເດັກ ແລະ ສິດເກົ່າ 9 ແສນກີບ ຊຶ່ງມີຄວາມຍາວທັງໝົດ 50 ກວ່າແມັດ, ກວ້າງ 4,5 ແມັດ ສຳລັບແຮງງານໃນການກໍ່ສ້າງແມ່ນແຮງງານຂອງປະຊາຊົນພາຍໃນບ້ານ ຊຶ່ງໄດ້ແບ່ງເປັນ 3 ໜ່ວຍຄອບຄົວຕໍ່ມື້ ເພື່ອເຮັດໃຫ້ປະຊາຊົນພາຍໃນບ້ານກໍຄືນັກຮຽນມີຄວາມສະດວກສະບາຍໃນການສັນຈອນໄປມາ ແລະ ເຮັດໃຫ້ແຜນພັດທະນາພື້ນຖານໂຄງລ່າງຂອງບ້ານບັນລຸຕາມຄາດໝາຍທີ່ໄດ້ວາງໄວ້.

ແຫຼ່ງຂ່າວ: ປະຊາຊົນ