ຕາມການລາຍງານຈາກສຳນັກຂ່າວ CRI ໃຫ້ຮູ້ວ່າ: ໃນວັນທີ 14 ກຸມພາ ຜ່ານມາ, ພິທີມອບ-ຮັບວັກຊິນໂຄວິດ-19 ແລະ ອຸປະກອນຕ້ານພະຍາດໃຫ້ລາວໄດ້ຈັດຂຶ້ນຢູ່ດ່ານບໍ່ໍຫານ ກິ່ງແຂວງສິບສອງພັ່ນນາແຂວງຢູນນານປະເທດຈີນ.
ຂ່າວແຈ້ງວ່າ, ເທື່ອນີ້ ຈີນໄດ້ມອບວັກຊິນໂຄວິດ-19 ເຊື້ອຕາຍໃຫ້ລາວ 177 ຫີບ ມີ 423.200 ຫຼອດ, ພ້ອມທັງສະແລັງສັກຢາ 133 ຫີບ ມີຈຳນວນທັງໝົດ 425,600 ອັນ, ເຄື່ອງດັ່ງກ່າວຈະຂົນສົ່ງອອກຈາກດ່ານພາສີບໍ່ຫານຂອງຈີນ ແລະ ຈະສົ່ງໄປຮອດ 3 ແຂວງພາກເໜືອຂອງລາວໃນໄວໆນີ້.
ໃນຕອນແລງຂອງວັນທີ14 ກຸມພາ ປີ2022 ອົງການກາແດງແຂວງອຸດົມໄຊໄດ້ລົງມອບເຄື່ອງຊ່ວຍເຫຼືອບັນເທົ່າທຸກສຸກເສີນໃຫ້ແກ່ຄອຍຄົວທີຖືກອັກຄີໄພ ໃນວັນທີ 11 ກຸມພາ 2022 ຜ່ານມາ, ຈຳນວນ 1 ຄອບຄົວ ຢູ່ບ້ານກູລົງ ເມືອງນາໝໍ້ ແຂວງອຸດົມໄຊ.
ການລົງມອບເຄື່ອງໃນຄັ້ງນີ້ໂດຍແມ່ນທ່ານ ນ.ບຸນທອນ ພິມມະວົງ ຫົວໜ້າອົງການກາແດງແຂວງອຸດົມໄຊ ແລະ ຮັບໂດຍຄອບຄົວທີຖຶກອັກຄີໄພໂດຍມີອົງການການປົກຄອງບ້ານເຂົ້າຮ່ວມ.ເຄື່ອງທີນຳມາມອບໃນຄັ້ງນີ້ມີເຄື່ອງຄົວເຮືອນ ແລະ ເຄື່ອງນຸງຈຳນວນໜຶງລ່ວມມູນຄ່າ 1.227.000 ກີບ.
ແຫຼ່ງຂ່າວ: ຂ່າວປະຈຳວັນ Daily News Oudomxay
ຕາມການລາຍງານຂອງ Khammouane News ໃຫ້ຮູ້ວ່າ: ໃນລະຫວ່າງວັນທີ 09 -10 ກຸມພາ 2022 ຜ່ານມານີ້ ພະແນກສະກັດກັ້ນ ແລະ ຕ້ານການຄ້າມະນຸດ ປກສ ແຂວງຄໍາມ່ວນ ໄດ້ ສົມທົບກັບ ປກສ ເມືອງເຊບັ້ງໄຟ ແລະ ພາກສ່ວນທີ່ກ່ຽວຂ້ອງລົງໂຄສະນາ ເຜີຍແຜຜົນຮ້າຍ ຂອງການຄ້າມະນຸດໃຫ້ອຳນາດການປົກຄອງ ພໍ່ແມ່ປະຊາຊົນ ພະນັກງານຄູອາຈານ ແລະ ນ້ອງນ້ອຍນັກຮຽນຢູ ສອງ ຈຸດຄື: ຢູ່ໂຮງຮຽນ ມສ ປົ້ງກີ່ວ-ຍາງໃຫຍ່ ແລະ ໂຮງຮຽນ ມສ ຍາງຄຳ ເມືອງເຊບັ້ງໄຟ ໂດຍການເຂົ້າຮ່ວມຂອງ ທ່ານ ລົດວິໄລ ຈັນທະນຸວົງ ຮອງເຈົ້າເມືອງໆເຊບັ້ງໄຟ ຜູ້ຊີ້ນຳວຽກງານວັດທະນະທຳ-ສັງຄົມ, ທ່ານ ພັຕ ລັດສະໝີ ໄຊຍະສອນ ຮອງພະແນກຕຳຫຼວດສະກັດກັ້້ນ ແລະ ຕ້ານການຄ້າມະນຸດ, ທ່ານ ພທ ບຸນທົງ ໄຊປັນຍາ ຮອງຫົວໜ້າກອງບັນຊາການ ປກສ ເມືອງໂດຍມີຄະນະກອງບັນຊາການ ປກສ ເມືອງ, ສະຫະພັນແມ່ຍິງແຂວງ, ເມືອງ , ອຳນາດການປົກຄອງບ້ານຕະຫຼອດຮອດ ພໍ່ແມ່ປະ ຊາຊົນ ແລະ ນ້ອງນ້ອຍນັກຮຽນພາຍໃນບ້ານດັ່ງກ່າວເຂົ້າຮວ່ມຢ່າງພ້ອມພຽງ.
ໃນພິທີ ທ່ານ ພັຕ ລັດສະໝີ ໄຊຍະສອນ ຮອງພະແນກຕຳຫຼວດສະກັດກັ້້ນ ແລະ ຕ້ານການຄ້າມະນຸດ ແຂວງ ເຜີຍແຜ່ຜົນຮ້າຍຂອງການຄ້າມະນຸດ, ທ່ານ ລໍາເງິນ ເພັດພູທອນ ຫົວໜ້າຂະແໜງສັງຄົມສົງເຄາະ ພະແນກແຮງງານສະຫວັດດີການ-ສັງຄົແຂວງ, ເຜີຍແຜ່ ການໄປອອກແຮງງານທີ່ຖືກຕ້ອງຕາມລະບຽບກົດໝາຍ, ທ່ານ ນາງ ມອນຕາ ສຸວັນດີ ຫົວໜ້າຂະ ແໜງປົກປ້ອງໃຫ້ຄຳປຶກສາຄວາມກ້າວໜ້າແມ່ຍິງແຂວງ ເຜີຍແຜ່ການປົກປ້ອງສິດທິເດັກ.
ໄດ້ຜັດປ່ຽນກັນ ຂຶ້ນເຜີຍແຜ່ໃນຄັ້ງນີ້ ຈຸດປະສົງກໍ່ເພື່ອສ້າງຄວາມຮັບຮູ້ ແລະ ເຂົ້າໃຈກ່ຽວກັບຜົນຮ້າຍຂອງການຄ້າມະນຸດໃຫ້ພໍ່ແມ່ປະຊາຊົນພະນັກງານ ຄູ-ອາຈານ ນ້ອງນ້ອຍນັກຮຽນ ໄດ້ຮັບຮູ້ຢ່າງທົ່ວເຖິງກ່ຽວກັບຜົນກະທົບຮູບແບບ ເລ່ລຽ່ມກົນອຸບາຍຕ່າງໆຂອງກຸ່ມຄົນບໍ່ດີ ທີ່ຫັວງມາຕົວະຍົວະແມ່ຍິງ ແລະ ເດັກນ້ອຍໃນຮູບແບບຕ່າງໆ.
ດັ່ງນັ້ນທຸກຄົນຕ້ອງໃຫ້ມີສະຕິຕື່ນຕົວເປັນເຈົ້າການ ນຳກັນ ໃນການປ້ອງກັນສະກັດກັ້ນ ແລະ ຕ້ານການຄ້າມະນຸດ ໃຫ້ຮູ້ທັນວິທີການ ເລ່ລຽມຂອງຜູ້ຄ້າມະນຸດ ເພື່ອປ້ອງກັນບໍ່ໃຫ້ຕົນເອງ ຫຼື ລູກຫຼານຕົກເປັນເຫຍື່ອ ຮູບແບບຂອງການຄ້າ, ນອກນັ້ນການລົງໂຄສະນາຄັ້ງນີ້ ຍັງຍົກໃຫ້ເຫັນບັນຫາຫຼັກໆທີ່ພາໃຫ້ເກີດມີການຄ້າມະ ນຸດເຊັ່ນ: ຍ້ອນສະພາບຄວາມທຸກຍາກ, ການສຶກສາຮ່ຳຮຽນຕ່ຳ, ຄົນຫວ່າງງານເປັນຈຳນວນຫຼວງຫຼາຍ,ບໍ່ມີຄວາມສະຫງົບໃນຄອບຄົວ, ຢາກປັບປຸງຊິວິດຂອງຕົນໃຫ້ດີຂຶ້ນ, ຢາກມີຄົນຮັກ ແລະ ແຕ່ງງານກັບຄົນທີ່ມີຖານະທີ່ດີ,ເຕັກໂນໂລຊີທີ່ທັນສະໄໝ ແລະ ການຈະເລີນກ້າວໜ້າຂອງບ້ານເມືອງ ຈຶ່ງເຮັດໃຫ້ຜູ້ຄົນເກີດມີຄວາມຢາກມີຢາກໄດ້ຈຶ່ງເກີດມີການແຂ່ງຂັນກັນ ເຮັດໃຫ້ບຸກຄົນດັ່ງກ່າວຕົກເປັນເຫຍື່ອຂອງການຄ້າມະນຸດເປັນຈຳນວນຫຼວງຫຼາຍ.
ອີງຕາມບົດຖະແຫຼງຂ່າວຈາກຄະນະສະເພາະກິດປະຈຳວັນທີີ 15 ກຸມພາ 2022 ເຊິ່ງຖະແຫຼງຂ່າວໂດຍ ດຣ. ຣັດຕະນະໄຊ ເພັດສຸວັນ ໃຫ້ຮູ້ວ່າ: ເລີ່ມຈາກຕົ້ນເດືອນມີນາ ຈະມີການຂະຫຍາຍການສັກວັກຊິນໃນກຸ່ມອາຍຸ 6 ຫາ 11ປີ.
ມາຮອດມື້ນີ້ ທົ່ວປະເທດລາວ ສັກວັກຊີນ ທັງໝົດ: ເຂັມທີ 1 ສັກໄດ້ 4.823.889 (ອັດຕາປົກຄຸມ 65,74 %) ແລະ ທຸກເຂັມທີ່ແນະນໍາ 4.245.954 (ອັດຕາປົກຄຸມ 57,86 %)
ເມື່ອບໍ່ດົນມານີ້, ດຣ ນາງ ຈັນໃສ ປະທໍາມະວົງ, ຮອງຫົວໜ້າໂຄງການສັກຢາແຫ່ງຊາດ ໃຫ້ສໍາພາດຕໍ່ສື່ມວນຊົນ ວ່າ: ການສັກວັກຊີນປ້ອງກັນພະຍາດໂຄວິດ-19 ໃຫ້ເດັກນ້ອຍໃນກຸ່ມອາຍຸລະຫວ່າງ 6-11 ປີ ໃນຄັ້ງນີ້ ແມ່ນໄດ້ຖອດຖອນບົດຮຽນຈາກຕ່າງປະເທດທີ່ສັກວັກຊີນດັ່ງກ່າວໃຫ້ເດັກນ້ອຍມາແລ້ວ, ລວມເຖີງຖອດຖອນບົດຮຽນຈາກການທົດລອງສັກວັກຊີນໃຫ້ເດັກນ້ອຍຢູ່ແຂວງຜົ້ງສາລີ ທີ່ດໍາເນີນມາກ່ອນໜ້ານີ້ເຊັ່ນດຽວກັນ.
ສໍາລັບເດັກໃນກຸ່ມເປົ້າໝາຍທີ່ຈະສັກໃນຄັ້ງນີ້ ທົ່ວປະເທດ ມີ 957.042 ຄົນ. ສ່ວນວັກຊີນທີ່ຈະນໍາມາສັກ ແມ່ນມີພຽງພໍກັບຄວາມຕ້ອງການ ເພາະມາຮອດປັດຈຸບັນ ສປປ ລາວ ໄດ້ຮັບການຊ່ວຍເຫລືອວັກຊີນປ້ອງກັນພະຍາດໂຄວິດ-19 ຫລາຍຊະນິດຈາກຕ່າງປະ ເທດ ແລະ ອົງການຈັດຕັ້ງສາກົນ ທັງຮູບແບບຊ່ວຍເຫລືອໂດຍກົງ ແລະ ການຊ່ວຍເຫລືອຜ່ານໂຄງການໂຄແວັກ ຫລາຍກວ່າ 18 ລ້ານໂດສ. ດຣ ນາງ ຈັນໃສ ປະທໍາມະວົງ ຍັງໄດ້ຮຽກຮ້ອງມາຍັງພໍ່ແມ່ ແລະ ຜູ້ປົກຄອງນໍາເອົາລູກຫລານທີ່ຢູ່ໃນເກນອາຍຸດັ່ງກ່າວ ໄປສັກວັກຊີນປ້ອງກັນພະຍາດໂຄວິດ-19 ຢູ່ຈຸດບໍລິການຕ່າງໆ ເມື່ອຄະນະສະເພາະກິດແຕ່ລະທ້ອງຖິ່ນທົ່ວປະເທດເປີດສັກຕົວຈິງພາຍໃນຕົ້ນ ເດືອນມີນາ ທີ່ຈະມາເຖີງນີ້ ເພື່ອສ້າງພູມຄຸ້ມກັນພະຍາດດັ່ງກ່າວໃຫ້ແກ່ເດັກນ້ອຍ, ທັງເປັນການປະກອບສ່ວນເຮັດໃຫ້ອັດຕາການສັກວັກຊີນຢູ່ລາວ ບັນລຸຫລາຍກວ່າ 80% ພາຍໃນປີ 2022.
ຕາມການລາຍນງານຂອງປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ເວລາ 13: 00 ໂມງ, ວັນທີ 9 ກຸມພາ 2022 ກອງບັນຊາການ ປກສ ເມືອງຈັນທະບູລີ ນະຄອນຫຼວງວຽງຈັນ ໄດ້ຮັບແຈ້ງວ່າ: ມີກຸ່ມຄົນເຄື່ອນໄຫວຄ້າຂາຍ ແລະ ມົ້ວສຸມຢາເສບຕິດ ຢູ່ບ້ານໂພນຕ້ອງຈອມມະນີ ເມືອງຈັນທະບູລີ ນວ, ຈາກນັ້ນ ກອງບັນຊາການ ປກສ ເມືອງຈັນ ທະບູລີ ສົມທົບກັບພາກສ່ວນກ່ຽວຂ້ອງແກ້ໄຂ ແລະ ເຂົ້າກັກຕົວ ທ້າວ ແສງແກ້ວ ອາຍຸ 43 ປີ ກຳມະກອນ ຢູ່ບ້ານໂພນຕ້ອງຈອມມະນີ, ທ້າວ ຊ້າງນ້ອຍ ອາຍຸ 23 ປີ ກຳມະກອນ ຢູ່ບ້ານຫ້ວຍຫົງ ເມືອງຈັນທະບູລີ ແລະ ພວກມົ້ວສຸມເສບອີກ 5 ຄົນ.
ພັທ ພົມມີ ແສນຈົ່ງຮັກ ຫົວໜ້າພະແນກຕຳຫຼວດ ກອງບັນຊາການ ປກສ ເມືອງຈັນທະບູລີ ນວ ໃຫ້ຮູ້ວ່າ: ກອງບັນຊາການ ປກສ ເມືອງຈັນທະບູລີ ນວ ສົບທົບກັບ ປກສ ກຸ່ມ 4 ແລະ ອຳນາດການປົກຄອງບ້ານໂພນຕ້ອງຈອມມະນີ ລົງແກ້ໄຂຈຸດຄ້າຂາຍ ແລະ ມົ້ວສຸມຢາເສບຕິດ ພາຍຫຼັງໄດ້ຮັບແຈ້ງ ຈິ່ງທຳການແກ້ໄຂ ສາມາດກັກຕົວ ທ້າວ ແສງແກ້ວ ກວດຄົ້ນ ພົບເຫັນ ຢາບ້າ 11,436 ເມັດ, ຢາໄອ້ 3,1 ກຼາມ ແລະ ທ້າວ ຊ້າງນ້ອຍ ພົບເຫັນ ຢາບ້າ 295 ເມັດ ມາດໍາເນີນຄະດີ.
ຜ່ານການສອບສວນເບື້ອງຕົ້ນ ທ້າວ ແສງແກ້ວ ແລະ ທ້າວ ຊ້າງນ້ອຍ ໃຫ້ການຕໍ່ເຈົ້າໜ້າທີ່ວ່າ ພວກຕົນ ໄດ້ເຄື່ອນໄຫວຄ້າຂາຍຢາບ້າ ແລະ ຢາໄອ້ ມາແຕ່ເດືອນກັນຍາ ປີ 2021 ຫຼາຍຄັ້ງ ແລະ ຂອງກາງ ທີ່ເຈົ້າໜ້າທີ່ກວດພົບໃນເວລາເຂົ້າກັກຕົວ ເປັນຂອງພວກກ່ຽວແທ້ ຊື້ນຳຊາຍຄົນໜຶ່ງບໍ່ຮູ້ຊື່ ແລະ ທີ່ຢູ່ແນ່ນອນ. ປັດຈຸບັນເຈົ້າໜ້າທີ່ ພວກສືບຄົ້ນຫາກຸ່ມແກ້ງຮ່ວມຂະບວນການຄ້າຂາຍຢາເສບຕິດ ເພື່ອນຳຕົວມາດຳເນີນຄະດີ ຕາມຂັ້ນຕອນຂອງກົດໝາຍ; ຕໍ່ກັບກຸ່ມມົ້ວສຸມທັງ 5 ຄົນເຈົ້າໜ້າທີ່ ໄດ້ສຶກສາອົບຮົມ ແລະ ມອບໃຫ້ຜູ້ປົກຄອງຄຸ້ມຄອງ ແລະ ຄວບຄຸມການປະພຶດຕໍ່ໄປ
ດັ່ງທີ່ເຮົາເຫັນປັດຈຸບັນ, ການຊື້ປີ້ລົດໄຟຍັງເປັນສິ່ງທ້າທາຍສຳລັບຜູ້ໂດຍສານທີ່ຕ້ອງການຊື້ປີ້ເພື່ອເດີນທາງໄປແຂວງທີ່ຕົນຕ້ອງການເດີນທາງໄປ ເພາະເມື່ອທຽບກັບເດີນທາງດ້ວຍລົດເມ ແລະ ລົດສ່ວນໂຕ ແມ່ນເຫັນໄດ້ວ່າການຂີ່ລົດໄຟແມ່ນປະຢັດເວລາຫຼາຍ.
ເມື່ອບໍ່ດົນມານີ້, ຕາມການລາຍງານຂອງໜັງສືພິມວຽງຈັນທາຍ ໃຫ້ຮູ້ວ່າ: ພົບເຫັນພະນັກງານປ້ອງກັນ, ເຈົ້າຫນ້າທີ່ຕໍາຫຼວດ, ພະນັກງານບໍລິສັດທ່ອງທ່ຽວ ລວມທັງພະນັກງານໂຮງແຮມຈໍານວນຫນຶ່ງທີ່ປະຈໍາຢູ່ສະຖານີລົດໄຟລາວ-ຈີນບາງແຫ່ງທີ່ຮັບແລ່ນຊື້ປີ້ລົດໄຟລ່ວງຫນ້າໃຫ້ຄົນຕົນເອງ ຫຼື ຜູ້ທີ່ີຮູ້ຈັກໂດຍບໍ່ຈໍາເປັນມາຊື້ດ້ວຍຕົວເອງ ເຊິ່ງມີການຮັບເອົາຄ່າບໍລິການ 30.000 – 50.000 ກີບ/ຄົນ.
ບັນຫາດັ່ງກ່າວແມ່ນໄດ້ມີຜູ້ ໂດຍສານຈໍານວນຫຼາຍໄດ້ລາຍງານມາຍັງຫນັງສືພິມວຽງຈັນທາຍ ເພື່ອໃຫ້ອອກຂ່າວ ແລະ ຕ້ອງການໃຫ້ບໍລິສັດທາງລົດໄຟລາວ-ຈີນ ເລັ່ງແກ້ໄຂບັນຫາປະກົດການຫຍໍ້ທໍ້ດັ່ງກ່າວດ່ວນ.
ສະເພາະກ່ອນທີ່ຂີ່ລົດໄຟ ລາວ-ຈີນ ຜູ້ໂດຍສານຕ້ອງໄດ້ຈອງປີ້ລ່ວງຫນ້າ 3 ວັນ ໂດຍໃຊ້ເວລາໃນການລຽນຄິວບໍ່ຕໍ່າກວ່າ 2-3 ຊົ່ວໂມງ ແຕ່ເມື່ອຮອດຄິວ ພະນັກງານຂາຍປີ້ພັດເວົ້າວ່າປີ້ໝົດແລ້ວ, ທັງທີ່ຜູ້ທີ່ມາລຽນຄິວຊື້ປີ້ນັ້ນກໍ່ມີໜ້ອຍກວ່າຈໍານວນປີ້ທີ່ໃຫ້ຈອງໃນແຕ່ລະວັນ.
ນອກນັ້ນ, ຍັງມີຜູ້ໂດຍສານຈໍານວນຫຼາຍທີ່ມາແຕ່ 6 ໂມງເຊົ້າ ກໍຍັງບໍ່ສາມາດຊື້ປີໄດ້ ຍ້ອນວ່າພະນັກງານດັ່ງກ່າວ ມີການຊື້ປີ້ລ່ວງຫນ້າໄວ້ໃຫ້ຄົນຂອງເຂົາເຈົ້າກ່ອນແລ້ວ.
ພິທີປະກາດການແຕ່ງຕັ້ງ, ຍົກຍ້າຍ ແລະ ມອບ-ຮັບໜ້າທີ່ ການນຳຂັ້ນສູງກະຊວງປ້ອງກັນປະເທດ ໄດ້ຈັດຂຶ້ນຢ່າງເປັນທາງການ ໃນວັນທີ 11 ກຸມພາ 2022, ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີ ກະຊວງປ້ອງກັນປະເທດ, ມີຄະນະພັກ-ຄະນະນຳກະຊວງ ເຂົ້າຮ່ວມ.
ສະຫາຍ ພົນຕີ ສອນທອງ ພົມລາວົງ ຄະນະປະຈຳພັກກະຊວງ, ຮອງຫົວໜ້າກົມໃຫຍ່ການ ເມືອງກອງທັບ ໄດ້ຜ່ານຄໍາສັ່ງ ຂອງນາຍົກລັດຖະມົນຕີ ວ່າດ້ວຍ ການຍົກຍ້າຍ ສະຫາຍ ພົນຕີ ຈັນທອງ ສອນຕະອາດ ວ່າການຫົວໜ້າກົມໃຫຍ່ເສນາທິການກອງທັບ ໄປຮັບໜ້າທີ່ໃໝ່ ເປັນຮອງລັດຖະມົນຕີກະ ຊວງປ້ອງກັນປະເທດ; ດຳລັດຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງ ສະຫາຍ ພົນຕີຄໍາລຽງ ອຸທະໄກສອນ ເປັນຮອງລັດຖະມົນຕີ ກະຊວງປ້ອງກັນປະເທດ ທັງເປັນຫົວໜ້າກົມໃຫຍ່ເສນາທິການກອງທັບ; ມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງ ສະຫາຍ ພົນຕີ ຄໍາລຽງ ອຸທະໄກສອນ ກຳມະການສູນກາງພັກ ເປັນກຳມະການຄະນະປະຈຳພັກກະຊວງປ້ອງກັນປະເທດ ແລະ ຄໍາສັ່ງ ຂອງນາຍົກລັດຖະມົນຕີ ວ່າດ້ວຍການຍົກຍ້າຍ ສະຫາຍ ພົນຕີ ວົງສອນ ອິນປານພິມ ຮອງຫົວໜ້າ ກົມໃຫຍ່ການເມືອງກອງທັບ ກະຊວງປ້ອງກັນປະເທດ ໄປຮັບໜ້າທີ່ໃໝ່ ເປັນຮອງເລຂາພັກແຂວງ ໄຊສົມບູນ.
ໃນພິທີມອບ-ຮັບໜ້າທີ່ໃໝ່ນີ້, ສະຫາຍ ພົນເອກ ຈັນສະໝອນ ຈັນຍາລາດ ໄດ້ສະແດງຄວາມ ຍ້ອງຍໍ ແລະ ຕີລາຄາສູງຕໍ່ຜົນສໍາເລັດ ໃນການປະຕິບັດໜ້າທີ່ວຽກງານໃນໄລຍະຜ່ານມາຂອງແຕ່ລະສະ ຫາຍ, ເຊິ່ງມີຜົນສຳເລັດຫລາຍດ້ານ ພ້ອມນັ້ນຍັງເນັ້ນໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງເອົາໃຈໃສ່ນຳພາ-ຊີ້ນຳການເມືອງແນວຄິດໃຫ້ແກ່ພະນັກງານ, ຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງ, ເອົາ ໃຈໃສ່ປັບປຸງແບບແຜນວີທີເຮັດວຽກ, ແບບແຜນວິທີນຳພາໃຫ້ໜັກແໜ້ນເຂັ້ມແຂງ, ເອົາໃຈໃສ່ເພີ່ມທະວີຄວາມສາມັກຄີພາຍໃນໃຫ້ແໜ້ນແຟ້ນ, ກຳແໜ້ນ ແລະ ປະຕິບັດຫລັກການລວມສູນປະຊາທິປະໄຕ ເຮັດວຽກເປັນໝູ່ຄະນະ, ສືບຕໍ່ຝຶກຝົນຫລໍ່ຫລອມຕົນເອງ ແລະ ເອົາໃຈໃສ່ປັບປຸງວຽກງານກໍ່ສ້າງພັກ-ກໍ່ສ້າງພະ ນັກງານໃຫ້ ມີຄວາມກ້າວໜ້າ ແລະ ບັນຫາອື່ນໆ.
ແຫຼ່ງຂ່າວ: ຂປລ
ປະຈຸບັນການແຜ່ລະບາດຂອງພະຍາດໂຄວິດ-19 ຢູ່ແຂວງຄຳມ່ວນ ຜ່ອນຄາຍລົງຫຼາຍແລ້ວ, ແຂວງ ຄຳມ່ວນຈຶ່ງໄດ້ກະກຽມຈັດງານບຸນນະມັດສະການພຣະທາດສີໂຄດຕະບອງ ປະຈຳປີ 2022 ເພື່ອເປັນການເສີມຂະຫຍາຍມູນເຊື້ອ ແລະ ອະນຸລັກຮັກສາຮີດຄອງປະເພນີອັນດີງາມຂອງຊາດ ເວົ້າລວມ ເວົ້າສະເພາະ ປະຊາຊົນລາວບັນດາເຜົ່າຊາວເມືອງທ່າແຂກ ທີ່ໄດ້ສືບທອດກັນມາແຕ່ບູຮານນະການໃຫ້ຄົງຢູ່ກັບສັງຄົມລາວຕະຫຼອດໄປ ແລະ ເພື່ອເປັນການຟື້ນຟູການທ່ອງທ່ຽວພາຍໃນແຂວງ, ກະກຽມໃສ່ເປີດການທ່ອງທ່ຽວສີຂຽວ ໄລຍະ 2 ຂອງລັດຖະບານ.
ທ່ານ ແກ້ວລັນດອນ ຈັນທະປານີ ເຈົ້າເມືອງທ່າແຂກ ຮອງປະທານຈັດງານບຸນນະມັດສະການພຣະທາດສີໂຄດຕະບອງ ປະຈຳປີ 2022 ໄດ້ໃຫ້ສຳພາດຕໍ່ສື່ມວນຊົນທ້ອງຖິ່ນວ່າ: ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍ ການແຕ່ງຕັ້ງຄະນະຮັບຜິດຊອບຈັດງານບຸນນະມັດສະການພຣະທາດສີໂຄດຕະບອງ ປະຈຳປີ 2022 ໂດຍໄດ້ປຶກສາຫາລືຮ່ວມກັນ ແລະ ແບ່ງຄວາມຮັບຜິດຊອບແຕ່ລະອະນຸກຳມະການ ຊຶ່ງມີຄວາມພ້ອມແລ້ວ ໂດຍສະເພາະພື້ນຖານໂຄງລ່າງກໍຄືສະຖານທີ່ພາຍໃນ ແລະ ພາຍນອກງານແມ່ນໄດ້ສົມທົບກັບພະແນກໂຍທາທິການ ແລະ ຂົນສົ່ງແຂວງໃນການປັບປຸງປົວແປງເສັ້ນທາງເລກທີ 11, ສ້ອມແປງບາງຈຸດ ແລະ ອະນາໄມເດີ່ນຢູ່ບໍລິເວນເດີ່ນພຣະທາດ.
ສຳລັບກິດຈະກຳລະອຽດຂອງການຈັດງານບຸນແມ່ນໃນລະຫວ່າງວັນທີ 14 – 16 ກຸມພາ 2022 ຊຶ່ງໃນວັນທີ 14 ກົງກັບມື້ຂຶ້ນ 13 ຄໍ່າ ມີພິທີຕັກບາດຖວາຍສັງຄະທານຢູ່ ຫໍພຣະຍາສີໂຄດຕະບອງ, ຕອນບ່າຍຈະໄດ້ມີການແຂ່ງຂັນກິລາປະເພດຕ່າງໆ, ການເສັງກອງແຕ້ – ກອງຈິງ ແລະ ຕອນກາງຄືນມີການສະແດງສິລະປະ – ວັນນະຄະດີ, ການປະກວດຂັບລຳມະຫາໄຊທີ່ມາຈາກບັນດາເມືອງ ແລະ ຄົບງັນຕາມຮີດຄອງປະເພນີ. ວັນທີ 15 ຂຶ້ນ 14 ຄໍ່າ ເລີ່ມແຕ່ເວລາ 13 ໂມງ ເຕົ້າໂຮມມວນຊົນເມືອງທ່າແຂກ ຢູ່ເດີ່ນຫ້ອງວ່າການເມືອງກະກຽມແຫ່ຜາສາດເຜິ້ງໄປຫາພຣະທາດສີໂຄດຕະບອງ ພ້ອມທັງດຳເນີນພິທີທາງສາສະໜາ ຕາມຮີດຄອງປະເພນີ, ຮັບຊົມການເສັງກອງແຕ້ – ກອງຈິງຮອບຊີງຊະນະເລີດ ແລະ ກິລາປະເພດຕ່າງໆ, ກາງຄືນມີການຄົບງັນຕາມຮີດຄອງປະເພນີ ແລະ ໃນວັນທີ 16 ຂຶ້ນ 15 ຄໍ່າ ແມ່ນຈະໄດ້ຕັກບາດຖວາຍສັງຄະທານແດ່ພະສົງສຳມະເນນ, ຕອນບ່າຍຮັບຊົມການແຂ່ງຂັນກິລາປະເພດຕ່າງໆ ຮອບຊີງສະນະເລີດ, ກາງຄືນມີການວຽນທຽນຄົບງັນຕາມຮີດຄອງປະເພນີ.
ພິເສດໃນປີນີ້, ທ່ານເຈົ້າແຂວງ ໄດ້ສົມທົບກັບການນຳແຂວງ – ເມືອງ ຕັ້ງກອງຜ້າປ່າສາມັກຄີເພື່ອທອດຖວາຍໃນງານບຸນນະມັດສະການພຣະທາດສີໂຄດຕະບອງ ເພື່ອເປັນການສົມທົບທຶນໃນການສ້າງສາລາໂຮງທຳໃນບໍລິເວນເດີ່ນພຣະທາດ.
ສ່ວນກິດຈະກຳວາງສະແດງ ແລະ ຂາຍສິນຄ້າແມ່ນຈະໄດ້ເຊື້ອເຊີນບັນດາເມືອງທີ່ເປັນຕົວແທນຂອງແຂວງຈຳນວນ 10 ເມືອງ ແລະ ຫົວໜ່ວຍບໍລິສັດຫ້າງຮ້ານມາວາງສະແດງ ແລະ ຂາຍສິນຄ້າທັງພາຍໃນ ແລະ ຕ່າງແຂວງ. ສຳລັບເຮືອນຊົງລາວຈະໄດ້ມອບໃຫ້ບັນດາ 10 ຕົວເມືອງນຳເອົາ ສິນຄ້າໜຶ່ງເມືອງໜຶ່ງຜະລິດຕະພັນເຂົ້າມາວາງຂາຍ.
ດັ່ງນັ້ນ, ຈຶ່ງຂໍເຊີນຊວນບັນດາພໍ່ແມ່ ພີ່ນ້ອງ ປະຊາຊົນລາວບັນດາເຜົ່າ ຮ່ວມເປັນເຈົ້າພາບ, ເຈົ້າສັດທາ ແລະ ຂໍຮຽກຮ້ອງມາຍັງພໍ່ແມ່ປະຊາຊົນລວມເຖິງຜູ້ທີ່ຈະເຂົ້າມາຮ່ວມໃນງານບຸນໃຫ້ເປັນເຈົ້າການໃນການປ້ອງກັນໂຕເອງ ປະຕິບັດມາດຕະການປ້ອງກັນພະຍາດໂຄວິດ-19, ດ້ວຍການໃສ່ຜ້າປິດປາກ – ດັງ, ການຮັກສາໄລຍະຫ່າງ ແລະ ເປັນເຈົ້າການປົກປັກຮັກສາຄວາມສະຫງົບຄວາມເປັນລະຽບຮຽບຮ້ອຍ ເພື່ອຮັບປະກັນການດຳເນີນງານບຸນປະເພນີຄັ້ງນີ້ໃຫ້ມີຜົນສຳເລັດຢ່າງຈົບງາມ.
ແຫຼ່ງຂໍ້ມູນ: ປະເທດລາວ
ຄະນະພັກ - ອົງການປົກຄອງແຂວງຈໍາປາສັກ ຮ່ວມກັບພາກສ່ວນຕ່າງໆທີ່ກ່ຽວຂ້ອງແຂວງ ໄດ້ຈັດງານບຸນນະມັດສະການຜາສາດຫີນວັດພູ ຈໍາປາສັກ ມໍລະດົກໂລກ ແຫ່ງທີ II ຂຶ້ນໃນວັນທີ 13 ກຸມພາ ຜ່ານມາ ຢູ່ບໍລິເວນເດີ່ນທາງຂຶ້ນຜາສາດຫີນວັດພູ ໂດຍການເຂົ້າຮ່ວມຂອງ ພະອາຈານ ສຸວັນ ຈັນທະຣາຊ ກໍາມະການສູນກາງ ອພສ ປະທານ ອພສ ແຂວງ, ທ່ານ ວິໄລວົງ ບຸດດາຄໍາ ເຈົ້າແຂວງຈໍາປາສັກ ປະທານຈັດງານ ພ້ອມພັນລະຍາ ແລະ ຄະນະ, ຕະຫຼອດຮອດພໍ່ແມ່ປະຊາຊົນຊາວແຂວງຈໍາປາສັກເຂົ້າຮ່ວມ.
ໃນພິທີ ທ່ານ ສະຫວາດ ແກ້ວບັນດິດ ເຈົ້າເມືອງຈໍາປາສັກ ໄດ້ກ່າວລາຍງານການຈັດງານບຸນນະມັດສະຜາສາດຫີນວັດພູ ປະຈໍາປີ 2022 ວ່າ: ການກະກຽມຈັດງານບຸນນະມັດສະການຜາສາດຫີນວັດພູຈຳປາສັກ ປີ 2022 ພວກເຮົາໄດ້ຈັດກິດຈະກໍາປູກຕົ້ນດອກຈຳປາ ເພື່ອເປັນສວນອຸດທິຍານປະດັບເອ້ສະຖານທີ່ປູສະນີຍະສະຖານແຫ່ງນີ້ ຕິດພັນກັບການຈັດງານພຸດທະສາສະນະກິດ ເພື່ອຮັກສາຮີດຄອງປະເພນີ, ວັດທະນະທໍາອັນດີງາມຂອງ ຊາດ ຂອງທ້ອງຖິ່ນ. ພິເສດ ປີນີ້, ໄດ້ມີການຈັດຕັ້ງພັກ – ລັດ ຂອງແຂວງ, ເມືອງ, ນະຄອນປາກເຊ ໄດ້ເປັນເຈົ້າພາບເຈົ້າສັດທາ ຮ່ວມກັນສ້າງກອງບຸນຂຶ້ນ ຈຳນວນ 11 ກອງ ເພື່ອອຸທິດເຖິງບັນພະບູລຸດ, ພໍ່ແມ່, ຄູບາ - ອາຈານ, ເຈົ້າຖິ່ນເຈົ້າຖານ, ເຈົ້າແມ່ທໍລະນີ, ເຈົ້າກຳນາຍເວນ ເພື່ອເປັນສິລິມຸງຄຸນ ແກ່ຄອບຄົວທຸກໆທ່ານດ້ວຍກັນ. ຈາກນັ້ນ, ທ່ານ ວິໄລວົງ ບຸດດາຄໍາ ໄດ້ກ່າວເປີດງານ ບາງຕອນທ່ານກ່າວວ່າ: ພວກເຮົາເຫັນໄດ້ຄຸນຄ່າອັນໂດດເດັ່ນຂອງສະຖານບູຮານວັດພູຈໍາປາສັກ, ລັດຖະບານ ແລະ ອົງການປົກຄອງແຂວງ ໄດ້ເອົາໃຈໃສ່ປົກປັກຮັກສາ, ບູລະນະ ແລະ ປະຕິສັງຂອນ ໃຫ້ເພີ່ມຄຸມຄ່າມໍລະດົກຍິ່ງຂຶ້ນຕະຫຼອດມາ ໂດຍດຶງດູດການຊ່ວຍເຫຼືອແຫຼ່ງທຶນທັງພາຍໃນ, ອົງການຈັດຕັ້ງສາກົນ ແລະ ບັນດາປະເທດເພື່ອນມິດໃນໂລກຢ່າງກວ້າງຂວາງ ຈຶ່ງມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາກາບໄຫວ້, ສຶກສາຄົ້ນຄວ້າ, ທ່ອງທ່ຽວນັບມື້ນັບເພີ່ມຂຶ້ນໃນແຕ່ລະປີ.
ໃນໂອກາດນີ້, ຂໍເຊີນຊວນບັນດາທ່ານທ່ຽວຊົມ ຫໍວາງສະແດງວັດຖຸບູຮານ, ປະຫວັດການກໍ່ສ້າງຜາສາດຫີນວັດພູ, ທ່ຽວງານຕະຫຼາດນັດວາງສະແດງ ແລະ ຈຳໜ່າຍສິນຄ້າ ທີ່ມີຫຼາຍຜະລິດຕະພັນ ທັງພາຍໃນ ແລະ ຕ່າງປະເທດ, ຊົມການແຂ່ງຂັນກິລາພື້ນເມືອງ, ຊົມສິລະປະດົນຕີ, ຮັບປະທານອາຫານທ້ອງຖິ່ນເອກະລັກເມືອງຈໍາປາສັກ ເຊັ່ນ: ເຂົ້າຫຼາມ, ປີ້ງໄກ່, ຕົ້ມໄກ່ໃສ່ໄຂ່ມົດແດງ, ນະມັດສະການກາບໄຫວ້, ບູຊາພະພຸດທະຮູບ.
ໃນຄ່ຳຄືນວັນທີ 15 ຈະມີພິທີທາງສາສະໜາ, ໄຫວ້ພະ, ຮັບສິນ, ຟັງທຳ ສູດປະລິຕະມຸງຄຸນ ແລະ ໃນຕອນເຊົ້າ ເລີ່ມແຕ່ເວລາ 6:30 ໂມງ ຈະມີພິທີທໍາບຸນໃສ່ບາດ ແລະ ຖວາຍສັງຄະທານ ແດ່ພະສົງ 100 ອົງ. ຕໍ່ມາ, ປະທານ, ຄະນະປະທານ ແລະ ແຂກຖືກເຊີນ ກໍໄດ້ເປັນກຽດຕີຄ້ອງໄຊ 9 ບາດ ເພື່ອເປີດງານ ຢ່າງເປັນທາງການ.
ແຫຼ່ງຂໍ້ມູນ: ປະຊາຊົນ
