ພິທີເຊັນບົດບັນທຶກຂໍ້ຕົກລົງ ວ່າດ້ວຍການຮ່ວມມືທາງທຸລະກິດ ລະຫວ່າງ ທະນາຄານຄໍາ ລາວ ຈໍາກັດ ແລະ ທະນາຄານ ພົງສະຫວັນ ຈໍາກັດ ໄດ້ຈັດຂຶ້ນໃນວັນທີ 28 ມີນາ 2025 ທີ່ ຕຶກບໍລິສັດ ພີທີແອວ ໂຮນດິ້ງ, ນະຄອນຫລວງວຽງຈັນ.
ດ້ວຍຄວາມສໍາເລັດຈາກການຢັ້ງຢືນຮັບຮອງໃບຢັ້ງຢືນຖານະທາງການຄໍາ ຂອງກະຊວງການເງິນ ຢ່າງເປັນທາງການ ວ່າງມໍ່ໆມານີ້ ເຮັດໃຫ້ ທະນາຄານຄໍາ ລາວ ຈໍາກັດ ກ້າວສູ່ອີກບາດກ້າວໜຶ່ງທີ່ສໍາຄັນໃນການຜັນຂະຫຍາຍສູ່ພາກປະຕິບັດຕົວຈິງທາງດ້ານທຸລະກິດ.
ທ່ານ ຫນູໄຊ ແຫວນສະຫວັນ ຕາງຫນ້າຄະນະບໍລິຫານ ທະນາຄານຄໍາ ລາວ ຈໍາກັດ ໄດ້ກ່າວວ່າ: ຄວາມຮ່ວມມືທາງດ້ານທຸລະກິດ ໃນດ້ານການນໍາສະເໜີຜະລິດຕະພັນການບໍລິການໃບຢັ້ງຢືນຖານະທາງການຄໍາ ຈະເປັນການເພີ່ມອີກຊ່ອງທາງໜຶ່ງໃນການເຂົ້າເຖິງແຫຼ່ງທຶນ ຂອງຜູ້ທີ່ຕ້ອງການແຫຼ່ງທຶນ ເຂົ້າມາພັດທະນາອຸດສາຫະກໍາຄໍາ ໃນ ສປປ ລາວ ໃຫ້ນັບມື້ນັບຂະຫຍາຍຕົວ. ພ້ອມກັນນັ້ນ ຍັງຮ່ວມທາງດ້ານຜະລິດຕະພັນການເງິນ ເປັນຕົ້ນແມ່ນການອອກຫນັງສືຄໍ້າປະກັນ ເພື່ອການກູ້ຢືມຄໍາ ກັບທະນາຄານຄໍາ ລາວ ແລະ ຜະລິດຕະພັນທີ່ກ່ຽວຂ້ອງ
ທ່ານ ນາງດາລີ ພົນເສນາ ຮອງຜູ້ອໍານວຍໃຫຍ່ ທະນາຄານພົງສະຫວັນ ໄດ້ກ່າວວ່າ: ເປັນອີກບາດກ້າວທີ່ສໍາຄັນ ໃນການພັດທະນາຜະລິດຕະພັນໃຫມ່ໆ ແລະ ເພີ່ມຄວາມຫຼາກຫຼາຍໃນການນໍາໃຊ້ຫຼັກຊັບຄໍ້າປະກັນເງິນກູ້ ໃນ ສປປ ລາວ. ພ້ອມກັນນັ້ນ, ການນໍາສະເໜີຜະລິດຕະພັນການບໍລິການໃບຢັ້ງຢືນຖານະທາງການຄໍາຂອງທະນາຄານຄໍາລາວ ຈະເປັນການສະຫນັບສະຫນູນໃຫ້ປະຊາຊົນ ແລະ ສັງຄົມ ເຂົ້າເຖິງສິນເຊື່ອໄດ້ຢ່າງສະດວກສະບາຍ, ງ່າຍ ແລະ ວ່ອງໄວ ທັງມີຄວາມສ່ຽງຕໍ່າ ໃນການໃຫ້ສິນເຊື່ອ.
ທະນາຄານພົງສະຫວັນ ມີຄວາມພ້ອມຮອບດ້ານ ໃນການບໍລິການ ເພື່ອເພີ່ມຄວາມສະດວກສະບາຍ ແລະ ອໍານວຍຄວາມສະດວກໃຫ້ແກ່ບຸກຄົນ ແລະ ນິຕິບຸກຄົນໃນການເຂົ້າເຖິງສິນເຊື່ອ ເພື່ອການໝູນວຽນທຶນ ອັນເປັນການຊ່ວຍເສີມສະພາບຄ່ອງທາງດ້ານການເງິນ
ທະນາຄານຄໍາ ລາວ ຈໍາກັດ ແລະ ທະນາຄານ ພົງສະຫວັນ ຈໍາກັດ ມີຄວາມພ້ອມຮອບດ້ານໃນການບໍລິການສັງຄົມ ກໍຄືປະຊາຊົນລາວບັນດາເຜົ່າໃນທົ່ວປະເທດ ໃນການນໍາໃຊ້ ໃບຢັ້ງຢືນຖານະທາງການຄໍາ ເປັນຫຼັກຊັບຄໍ້າປະກັນ ຕາມກົດໝາຍ.
ທະນາຄານຄໍາ ລາວ ຈໍາກັດ ຊ່ວຍສະຫນັບສະຫນູນໃນການເພີ່ມຄວາມສະດວກສະບາຍ ແລະ ອໍານວຍຄວາມສະດວກໃຫ້ແກ່ບຸກຄົນ ແລະ ນິຕິບຸກຄົນໃນການເຂົ້າເຖິງສິນເຊື່ອ ເພື່ອການໝູນວຽນທຶນ ອັນເປັນການຊ່ວຍເສີມສະພາບຄ່ອງທາງດ້ານການເງິນ ກໍຄື ທຸລະກິດໃຫ້ມີຂີດຄວາມສາມາດຫລາຍຂຶ້ນ