ໃນວັນທີ 17 ມັງກອນ 2023, ທ່ານນາງ ປານີ ຢາທໍ່ຕູ້ ຮອງປະທານປະເທດ ແຫ່ງ ສປປ ລາວ ພ້ອມຄະນະ ໄດ້ເຄື່ອນໄຫວຢ້ຽມຢາມ ເມືອງມຸນລະປາໂມກ ແຂວງຈຳປາສັກ, ໂດຍມີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະນຳຂອງແຂວງ, ພະແນກການກ່ຽວຂ້ອງ ຮ່ວມຕິດຕາມ ແລະ ມີ ທ່ານ ພິດສະຫົງ ພົມມະວົງສາ ເຈົ້າເມືອງມຸນລະປາໂມກ ໃຫ້ການຕ້ອນຮັບ.
ໃນການຢ້ຽມຢາມ ເມືອງມຸນລະປາໂມກນີ້, ທ່ານຮອງປະທານປະເທດ ໄດ້ຢ້ຽມຢາມເຂດການຜະລິດເຂົ້າບ້ານປ່າໂມກ ຂອງ ບໍລິສັດ ລັດວິສາຫະກິດ ກໍ່ສ້າງຂົວ-ທາງເເລະຕິດຕັ້ງໄຟຟ້າຄົບວົງຈອນໄຊສົມບູນ ແລະຮັບຟັງການລາຍງານຈາກ ທ່ານ ພັນເອກ ສີສະຫງວນ ອິນທະຈັກ ຜູ້ອຳນວຍການບໍລິສັດ ດັ່ງກ່າວ, ເຂດການຜະລິດເຂົ້າຂອງບໍລິສັດ ມີເນື້ອທີ່ປູກເຂົ້າທັງໝົດ 350 ເຮັກຕາ, ສາມາດປູກເຂົ້າໄດ້ 2 ລະດູການ/ປີ ຄືນາປີ ເເລະ ນາເເຊງ; ດ້ວຍກຳມະວິທີການປູກເເບບ ຢອດເມັດ, ສ່ວນໃຫຍ່ເເມ່ນນໍາໃຊ້ກົນຈັກທີ່ທັນສະໄຫມເຂົ້າໃນການຜະລິດ ເນື່ອງຈາກວ່າໃຊ້ຕົ້ນທຶນທີ່ຕໍ່າ ເເລະ ຫລຸດຜ່ອນກໍາ ລັງເເຮງງານຄົນໄດ້ດີ ສາມາດຄືນທຶນໄດ້ໄວ. ສວ່ນວ່າຕົ້ນທຶນໃນການບຸກເບີກເນື້ອທີ່ນາເເມ່ນ ປະມານ 15 ລ້ານກີບ/ເຮັກຕາ, ຜົນຜະລິດທີ່ໄດ້ຮັບສະເລ່ຍ 2.5ໂຕນ/ເຮັກຕາ ສຳລັບການຜະລິດປີຜ່ານມາ ເເລະ ຕົ້ນປີ2023 ໄດ້ມີການປັບປຸງເນື້ອທີ່ນາໃໝ່, ເເກ້ໄຂລະບົບລະບາຍນໍ້າເພື່ອໃຫ້ທ່ວງທັນເຂົ້າໃນການຜະລິດ ເເລະ ຄາດຄະເນ ຜົນຜະລິດທີ່ຈະໄດ້ຮັບເເມ່ນ4ໂຕນ/ເຮັກຕາ.
ນອກນັ້ນ ກໍມີໂຮງສີເຂົ້າທັນສະໄຫມ, ສະມັດຕະພາບ ສາມາດຄັດເມັດເເຍກເມັດເຂົ້າໄດ້ລະອຽດເເລະ ສາມາດສີເຂົ້າໄດ້ 2 ໂຕນ/1 ຊົ່ວໂມງ, ສະເລ່ຍໃນມື້ໝຶ່ງໄດ້16ໂຕນ; ສ່ວນໃຫຍ່ເຂົ້າທີ່ສີໄປເເມ່ນສົ່ງໃຫ້ກຳລັງປ້ອງກັນຊາດ-ປ້ອງກັນຄວາມສະຫງົບ ຢູ່ໃນຂົງເຂດພາກໃຕ້ເເລະພາກກາງ ທັງນີ້ກໍ່ເພື່ອຮັບປະກັນທາງດ້ານສະບຽງອາຫານໃຫ້ເເກ່ກອງທັບປະຊາຊົນລາວ ແລະ ຍັງຈັດຈຳຫນ່າຍຕາມທ້ອງຕະຫລາດພາຍໃນປະເທດອີກດ້ວຍ.
ຈາກນັ້ນ, ທ່ານຮອງປະທານປະເທດ ພ້ອມຄະນະ ຍັງໄດ້ລົງເບິ່ງຈຸດທີ່ຈະກໍ່ສ້າງຂົວເຊລຳເພົາ ຕັ້ງຢູ່ບ້ານເວີນຍາງ, ເມືອງມູນລະປາໂມກ, ຕາມການອອກແບບຂົວ ແມ່ນກຳນົດຈຸດຫ່າງຈາກເສັ້ນທາງໄປ ປະມານ 500 ແມັດ, ເປັນຂົວເບຕົງອັດແຮງ, ມີ ຄວາມຍາວ 150 ແມັດ, ກວ້າງ ໜ້າຂົວ 8 ແມັດ, ໂຄງການນີ້ໄດ້ເລີ່ມດຳເນີນການແຕ່ ປີ 2013 ເປັນຕົ້ນມາ. ແລະໃນໂອກາດດັ່ງກ່າວ, ທ່ານນາງ ປານີ ຢາທໍ່ຕູ້ ຮອງປະທານປະເທດ ຍັງໄດ້ມອບ ນ້ຳດື່ມ, ປັດໃຈການບໍລິໂພກ ໃຫ້ ກຳລັງປກຊ-ປກສ ໃນເຂດຈຸດດັ່ງກ່າວ ນຳອີກ.
ແຫຼ່ງຂ່າວຈາກ:
