ຮອງປະທານປະເທດ ພົບປະຢ້ຽມຢາມ ຄະນະພັກຄະນະບັນຊາ ກອງພົນທະຫານ ຮາບທີ 5, ໂດຍໄດ້ຮັບການຕ້ອນຮັບຈາກ ສະຫາຍ ພັນເອກ ສີປະເສີດ ເຜີຍຄໍາສິງ ເລຂາຄະນະພັກ ຫົວໜ້າການເມືອງ ກອງພົນທີ 5 ພ້ອມລາຍງານໂດຍຫຍໍ້ສະພາບຈຸດພິເສດ, ທີ່ຕັ້ງ, ພາລະບົດບາດ ແລະ ໜ້າທີ່ການເມືອງຂອງກົມກອງ, ລວມທັງຜົນງານທີ່ຍາດມາໄດ້ຕະຫລອດໄລຍະຜ່ານມາ.
ກອງພົນທີ 5 ມີພາລະບົດບາດເປັນກຳລັງຫລວງເຄື່ອນທີ່, ພາຍໃຕ້ການຊີ້ນໍາ-ບັນຊາໂດຍກົງຮອບດ້ານຂອງກະຊວງປ້ອງກັນປະເທດ, ເປັນກຳລັງຫລັກແຫລ່ງ ໃນການຈັດຕັ້ງປະຕິບັດວຽກງານປ້ອງກັນຊາດ-ປ້ອງ ກັນຄວາມສະຫງົບຊ່ວຍໜູນ ໃຫ້ຂອບເຂດ 4 ແຂວງພາກໃຕ້, ຊີ້ນໍາອົງການ, ກົມກອງຈັດຕັ້ງກຳລັງລົງກໍ່ສ້າງຮາກຖານການເມືອງ ຕາມຂອບເຂດກົມກອງຕັ້ງທັບ, ແບບທາງກວ້າງ ແລະ ທາງເລິກ, ປະສານສົມທົບກັບກອງບັນຊາການທະຫານ 4 ແຂວງ ພາກໃຕ້ ປົກປັກຮັກສາຊາຍແດນ ໃນພື້ນທີ່ 4 ແຂວງພາກໃຕ້ ເຮັດໃຫ້ສະພາບມີຄວາມສະຫງົບໂດຍພື້ນຖານ.
ຈາກນັ້ນ, ສະຫາຍ ຮອງປະທານປະເທດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນຳແກ່ຄະນະພັກ, ຄະນະບັນຊາກອງພົນດັ່ງກ່າວ, ຈົ່ງເຊີດຊູສະຕິລະວັງຕົວ, ມີສະຕິໃນການປົກປັກຮັກສາແນວທາງນະໂຍ ບາຍຂອງພັກ-ລັດ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາລະບອບໃໝ່ປະຊາທິປະໄຕປະຊາຊົນໄວ້ໃຫ້ໝັ້ນຄົງ, ສົມທົບແໜ້ນວຽກງານການປ້ອງກັນຊາດ-ປ້ອງກັນຄວາມສະຫງົບ ກັບການສ້າງ ສາພັດທະນາເສດຖະກິດ-ສັງຄົມ, ກອງທັບ ກໍຄື ກົມກອງ ຕ້ອງເປັນຫລັກແຫລ່ງ, ເປັນພາຫານະອັນແຫລມຄົມຂອງພັກ ໃນການນໍາພາທົ່ວປວງຊົນ, ຍົກສູງຄວາມເປັນເຈົ້າການໃນວຽກງານປົກປ້ອງອະທິປະໄຕເຂດນໍ້າແດນດິນໃຫ້ໝັ້ນຄົງ, ຊອກວິທີການສະກັດກັ້ນ ບັນດາການເຄື່ອນໄຫວກໍ່ຄວາມບໍ່ສະຫງົບ ແລະຄວາມບໍ່ເປັນລະບຽບຮຽບຮ້ອຍບໍລິເວນຊາຍແດນທີ່ມີປະສິດທິຜົນກວ່າເກົ່າ, ສໍາລັບວຽກງານປົກປັກຮັກສາຊາຍແດນ, ໃຫ້ເອົາໃຈໃສ່ດ້ານຕາເວັນຕົກ ແລະ ທິດໃຕ້ ໂດຍສະເພາະບັນດາຈຸດໃດທີ່ຍັງຄົງຄ້າງ ໂດຍໃຫ້ມີຄວາມອົດທົນອົດກັ້ນນໍາກັນຫລາຍທີ່ສຸດ, ແຕ່ກໍຄ່ອງແຄ້ວນິ້ມນວນໃນການແກ້ໄຂບັນຫາ, ໃຫ້ມີການປະສານສົມທົບກັນແໜ້ນລະຫວ່າງສູນກາງ ແລະ ທ້ອງຖິ່ນ, ກໍາລັງອາວຸດຂອງພວກເຮົາ ແມ່ນກໍາລັງຂອງພັກ, ແມ່ນພັກປະຊາຊົນປະຕິວັດລາວ ເປັນຜູ້ສ້າງຂຶ້ນ ແລະ ກໍ່ເຕີບໃຫຍ່ເຂັ້ມແຂງຂຶ້ນ ຢູ່ໃນການອົບຮົມບົ່ມສອນຂອງພັກມາໂດຍຕະຫລອດ.
ດັ່ງນັ້ນ, ບໍ່ວ່າຈະຢູ່ໃນໄລຍະໃດ ກໍ່ຕ້ອງຮັບປະກັນຄວາມຈົ່ງຮັກພັກດີຕໍ່ພາລະກິດຂອງພັກ ແລະ ປະເທດຊາດ, ທົ່ວກອງທັບ ກໍຄື ກົມກອງ ຕ້ອງຢູ່ໃຕ້ການນໍາພາເດັດຂາດໂດຍກົງ ແລະ ຮອບດ້ານຂອງພັກ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກໍາລັງໃນທຸກດ້ານໃຫ້ໜັກແໜ້ນເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກໍາລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ ໃນນັ້ນຖືເອົາຄຸນນະພາບທາງດ້ານການເມືອງແນວຄິດເປັນກົກ, ເອົາຄວາມສາມາດດ້ານວິຊາສະເພາະ, ຫົວຄິດປະດິດສ້າງ ແລະ ການຈັດ ຕັ້ງບັນຊາ ເປັນສິ່ງສໍາຄັນ, ຕ້ອງສຸມທຸກເງື່ອນໄຂຄວາມສາມາດ ເພື່ອກ້າວໄປເຖິງການກຸ້ມຕົນເອງ ຢ່າງ ຮອບດ້ານ.
ໃຫ້ຖືເອົາວຽກງານຄຸ້ມຄອງ, ລ້ຽງດູກອງທັບ ດ້ວຍການສ້າງພະລາທິການກັບທີ່ເປັນວຽກງານຕົ້ນຕໍ ເພື່ອແກ້ໄຂຄວາມຫຍຸ້ງຍາກຝືດເຄືອງ ດ້ານຊີວິດການເປັນຢູ່ໂດຍສຸມໃສ່ດ້ານກະສິກໍາທີ່ເປັນທ່າແຮງ, ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ຮ່ວມມືກັບປະເທດຕ່າງໆ, ປັບປຸງ ແລະ ເພີ່ມທະວີການຮ່ວມມືຮອບດ້ານກັບກອງທັບ ເພື່ອນມິດຍຸດທະສາດ (ສສ ຫວຽດ ນາມ ແລະ ສປ ຈີນ) ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງ ກໍ່ຄື ເພື່ອນມິດທີ່ກ້າວໜ້າໃຫ້ດີ, ຍາດແຍ່ງການຊ່ວຍເຫລືອຈາກສາກົນ ປັບປຸງກໍ່ສ້າງກອງທັບພວກເຮົາໃຫ້ກ້າວໜ້າທັນສະໄໝສູ່ຄຸນນະພາບໃຫມ່, ເອົາໃຈໃສ່ວຽກງານການປ້ອງກັນ, ສະກັດກັ້ນ ແລະ ການຄວບຄຸມພະຍາດໂກ ວິດ-19 ພາຍໃນກົມກອງໃຫ້ມີປະສິດທິຜົນ.
ໃນນັ້ນ, ໃຫ້ສືບຕໍ່ຍົກສູງສະຕິໃນການປ້ອງກັນ, ສະກັດກັ້ນ ແລະ ຄວບຄຸມພະຍາດໂກວິດ-19 ຢ່າງເຂັ້ມງວດ, ໂດຍໃຫ້ປຸກລະດົມນາຍ ແລະ ພົນທະຫານທຸກກົມກອງເຂົ້າຮ່ວມຢ່າງຕັ້ງໜ້າ, ໂດຍຄະນະພັກ-ຄະນະບັນຊາແຕ່ລະຂັ້ນ ຕ້ອງໄດ້ປັບປຸງແບບແຜນວິທີເຮັດວຽກ ໃນສະພາບປັດຈຸບັນ ກໍ່ຄື ການໃຊ້ຊີວິດປົກກະຕິແບບໃໝ່ (New Normal) ເຂົ້າໃນທຸກການເຄື່ອນໄຫວວຽກງານ ໂດຍສະເພາະການຝຶກແອບ, ການປະຊຸມ ຫລື ການຈັດງານຕ່າງໆ ຕ້ອງໃຫ້ກະທັດຮັດ ແລະ ປະຢັດມັດທະຍັດທີ່ສຸດ.
ແຫຼ່ງຂ່າວ: ຂປລ
