ຂ່າວດີ ອີກແລ້ວ ເມືອງງອຍ ຫາຍດີ 67 ຄົນ ໂຊກດີເດີ້່ທຸກຄົນ
ຕາມການລາຍງານ ຂອງຂ່າວສານຫຼວງພະບາງ ໃຫ້ຮູ້ວ່າ: ວັນທີ 26 ຕຸລາ 2021 ທ່ານ ສອນເພັດ ທະສີນິພອນ ຮອງເຈົ້າເມືອງ ພ້ອມດ້ວຍທິມງານຄະນະສະເພາະກິດຂອງເມືອງ ໄດ້ຈັດພິທີມອບໃບຢັ້ງຢືນໃຫ້ຜູ້ຕິດເຊື້ອພະຍາດໂຄວິດ-19 ຢູ່ທີ່ສູນປິ່ນປົວໂຮງຮຽນ ມສ ເມືອງງອຍ 67 ຄົນ,ຍິງ 31 ຄົນ ພາຍຫຼັງໄດ້ກັກຕົວປິ່ນປົວຢູ່ໃນສູນຄົບກຳນົດ 21 ວັນ,ຕາມທີ່ຄະນະສະເພາະກິດຂອງເມືອງ ວາງໄວ້ ແລະໄດ້ກວດຫາເຊື້ອບໍ່ພົບ 2 ຄັ້ງຕິດຕໍ່ກັນ. ປັດຈຸບັນນີ້ເມືອງງອຍ ມີຜູ້ຕິດເຊື້ອໂຄວິດ-19 ທັງໝົດ 569 ຄົນ,ໄດ້ປິ່ນປົວດີ 441 ຄົນ, ສົ່ງຕໍ່ແຂວງ 16 ຄົນ,ບໍມີກໍລະນີເສຍຊີວິດ ແລະກໍາລັງສຶບຕໍ່ປີ່ນປົວ 126 ຄົນ ແລະນຳສົ່ງມາແຕ່ແຂວງ 3 ຄົນ, ລວມ 168 ຄົນ.
ໂອກາດດັ່ງກ່າວນີ້ທ່ານ ຈັນທີ ແກ້ວມະນີວົງ ຫົວໜ້າຫ້ອງການສາທາລະນະສຸກເມືອງ ກໍໄດ້ມີຄຳເຫັນ ສະແດງຄວາມເປັນຫ່ວງເປັນໄຍ ມາຍັງບັນດາຜູ້ຕິດເຊື້ອໂຄວິດທີ່ໄດ້ປິ່ນປົວຫາຍດີທີ່ຈະກັບໄປໃຊ້ຊີວິດຢູ່ໃນຄອບຄົວຂອງຕົນ ແລະ ໄດ້ຮຽກຮ້ອງໃຫ້ປະຕິບັດ ບັນດາມາດຕະການຕ່າງ ທີ່ທາງຄະນະສະເພາະກິດວາງອອກ ເປັນຕົ້ນວິທີການປ້ອງກັນຕົນເອງ,ຄອບຄົວ ແລະ ຊຸມຊົນຕ້ອງເອົາໃຈໃສ່ດ້ວຍການລ້າງມືໃສ່ສະບູ ແລະ ນໍ້າສະອາດ,ໃຊ້ເຈວລ້າງມືທີ່ມີທາດເຫຼົ້າ,ຄວນຮັກສາໄລຍະຫ່າງຢ່າງໜ້ອຍ 1 ແມັດ,ຈະເດີນທາງໄປໃສຕ້ອງໃສ່ຜ້າອັດປາກ-ດັງ,ເຮັດໃຫ້ອາກາດຖ່າຍເທ, ໜັ່ນອະນາໄມ ແລະຂ້າເຊື້ອເປັນປະຈໍາ,ຮັກສາສິ່ງແວດລ້ອມໃຫ້ເປັນລະບົບ,ລະບຽບ,ຮຽບຮ້ອຍ,ເອົາໃຈໃສ່ໃຫ້ຮັກສາເບິ່ງແຍງອະນາໄມ, ຮັກສາສຸຂະພາບຂອງຕົນເອງ ກັບການດູແລຊີວິດໃຫ້ດີ ເພື່ອສະກັດກັ້ນພະຍາດຕ່າງໆ ທີ່ຈະເກີດຂື້ນຕາມລະດູການ ເປັນຕົ້ນແມ່ນພະຍາດໄຂ້ເລືອດອອກ, ພະຍາດຖອກທ້ອງ ແລະພະຍາດອື່ນໆ. ພາບ ແລະ ຂ່າວ; ສາຍສະໝອນ ຈິດຕະປັນຍາ ຫ້ອງການຖວທ ເມືອງງອຍ.
