ຕາມການລາຍງານ ຂອງ Khammouane News ໃຫ້ຮູ້ວ່າ: ໃນວັນທີ 25 ສິງຫາ 2021 ກອງເລຂາຄະນະສະເພາະກິດເພື່ອປ້ອງກັນ, ຄວບຄຸມການແຜ່ລະບາດຂອງພະຍາດໂຄວິດ-19 ແຂວງຄຳມ່ວນ ຮ່ວມ ກັບກອງບັນຊາການທະຫານແຂວງ, ລັດວິສາຫະກິດໄຟຟ້າລາວສາຂາແຂວງຄຳມ່ວນ ແລະ ພາກສ່ວນຕ່າງໆ ໄດ້ພ້ອມກັນປັບປຸງປົວແປງສູນປິ່ນປົວຕໍ່ເຕີມເພີ່ມຂອງໂຮງຮຽນມໍປາຍທ່າແຂກ ທິດເໜືອດ້ານຕາເວັນອອກ.
ໂດຍການນຳພາຂອງ ທ່ານ ດຣ ແກ່ນຈັນ ທອງສະຫວັດ ຫົວໜ້າພະແນກສາທາລະນະສຸກແຂວງ ພ້ອມຄະນະກອງເລຂາສະເພາະກິດຂັ້ນແຂວງ ເພື່ອເປັນການຮອງຮັບ ແລະ ຮັບມືກັບສະພາບການເນື່ອງຈາກສູນປິ່ນປົວຜູ້ຕິດເຊື້ອພະຍາດໂຄວິດ-19 ໃນແຂວງຄຳມ່ວນປະຈຸບັນບໍ່ພຽງພໍກັບການເພີ່ມຂື້ນຈາກການຕິດເຊື້ອພະຍາດໂຄວິດ-19 ຂອງຈໍານວນແຮງງານລາວທີ່ກັບຈາກປະເທດເພື່ອນບ້ານ.
ເຊິ່ງແຂວງຄໍາມ່ວນມາເຖິງປະຈຸບັນມີສູນໃຫຍ່ກັກບໍລິເວນ 2 ສູນຄື : ສູນກັກບໍລິເວນສະໜາມກິລາແຂວງ, ສູນກັກບໍລິເວນຕະຫລາດພະນົມພອນ ( ບ້ານເລົ່າໂພຄຳ ) ແລະ 3 ສູນປິ່ນປົວຄື : ສູນປິ່ນປົວທີ່ ພະແນກ ຖວທ ແຂວງຫລັງເກົ່າ ( ແຄມຂອງ ), ສູນປິ່ນປົວໂຮງໝໍທະຫານແຂວງ ແລະ ສູນປິ່ນປົວໂຮງຮຽນມໍປາຍທ່າແຂກ. ສໍາລັບຕົວເລກຜູ້ຕິດເຊື້ອພະຍາດດັ່ງກ່າວໃນວັນທີ 24 ສິງຫາ ຜ່ານມາມີຍອດຕິດເຊຶ້ອສະສົມຈຳນວນ 838 ຄົນໃນນີ້ປິ່ນປົວດີ 212 ຄົນ, ສ່ວນຕົວເລກຜູ້ຕິດເຊື້ອໃນວັນທີ 25 ສິງຫາ ມີ 112 ຄົນ ( ນຳເຂົ້າ ).
