ໂຄງການກໍ່ສ້າງເສັ້ນທາງ ແຕ່ແຍກທາງ 1B ຫາ ສໍາພັນໄຊ ແລະ ໄປຫາ ປາກປອກ ສໍາເລັດແລ້ວ 100%
ຕາມການລາຍງານ ຂອງສະຖານນີວິທະຍຸໂທລະພາບແຂວງຜົ້ງສາລີ ໃຫ້ຮູ້ວ່າ: ໃນ ວັນທີ 19-21 ສິງຫາ ປີ 2021 ທີ່ຜ່ານມາ ພະແນກ ຍທຂ ແຂວງ ໄດ້ສົມທົບ ກັບ ອະນຸກໍາມະການຂັ້ນແຂວງ ໄດ້ລົງກວດກາ ໂຄງການກໍ່ສ້າງເສັ້ນທາງ ແຕ່ແຍກທາງ 1B ຫາ ສໍາພັນໄຊ ເມືອງບຸນໃຕ້ ແລະ ຫາ ປາກປອກ ເມືອງສຳພັນ, ການລົງຄັ້ງນີ້ ແມ່ນນໍາໂດຍ ທ່ານ ໄຊສົມເພັດ ສີພັນ ຮອງຫົວໜ້າພະແນກ ຍທຂ ແຂວງ , ມີອະນຸກຳມະການຂັ້ນແຂວງ, ພ້ອມດ້ວຍຜູ້ຕາງໜ້າບໍລິສັດ ສົມປະສົງ ແລະ ບໍລິສັດ ສີລະທຳ ເຂົ້າຮ່ວມ, ໂຄງການນີ້ແມ່ນມີ 2 ຊ່ວງທາງຄື:
– ຊ່ວງທີ1: ເລີ່ມແຕ່ ກມ 8+00 – 34+00 (ເຂດສຳພັນໄຊ ເມືອງບຸນໄຕ້) ເຊິ່ງມີຄວາມຍາວ 26 ກມ ມີມູນຄ່າ 12,395,880,922 ກີບ ໂດຍແມ່ນບໍລິສັດສົມປະສົງ ກໍ່ສ້າງ ແລະ ສ້ອມແປງຂົວທາງ ເປັນຜູ້ຮັບເໝົາກໍ່ສ້າງ, ເລີ່ມລົງມື ກໍ່ສ້າງ ມາແຕ່ ວັນທີ 5 ພຶດສະພາ 2021 ເປັນຕົ້ນມາ ເຊິ່ງເປັນວຽກ ສ້ອມແປງເປັນກຳນົດ ແລະ ສ້ອມແປງບາງຈຸດ ແລະ ປູຢາງເຂດບ້ານປະຊາຊົນ ແລະ ເຂດຄ້ອຍຊັນ ໂດຍແມ່ນ ທຶນ ຈາກ ທະນາຄານໂລກ ແລະ ສຳເລັດ ໃນວັນທີ 25 ກໍລະກົດ 2021.
-ຊ່ວງທີ2: ເລີ່ມແຕ່ ກມ 34+00 – 71 +00 ເລີ່ມຈາກ ສຳພັນໄຊ ຫາ ປາກປອກ ເມືອງສຳພັນ, ເຊິ່ງມີຄວາມຍາວ 37 ກມ ມີມູນຄ່າ 14,628,3559,710 ກີບ ໂດຍແມ່ນບໍລິສັດສີລະທຳ ກໍ່ສ້າງ ແລະ ສ້ອມແປງຂົວທາງ ເປັນຜູ້ຮັບເໝົາກໍ່ສ້າງ, ເລີ່ມລົງມື ກໍ່ສ້າງ ມາແຕ່ ວັນທີ 15 ພຶດສະພາ 2021 ເປັນຕົ້ນມາ ເຊິ່ງເປັນວຽກ ສ້ອມແປງເປັນກຳນົດ ແລະ ສ້ອມແປງບາງຈຸດ ແລະ ປູຢາງເຂດບ້ານປະຊາຊົນ ແລະ ເຂດຄ້ອຍຊັນ ໂດຍແມ່ນ ທຶນ ຈາກ ທະນາຄານໂລກ ແລະ ສຳເລັດ ໃນວັນທີ 25 ກໍລະກົດ 2021 ຜ່ານການລົງກວດກາຕົວຈິງເຫັນວ່າ ບໍລິສັດຮັບເໝົາກໍ່ສ້າງ ແມ່ນໄດ້ຈັດຕັ້ງປະຕິບັດ ຖືກຕ້ອງຕາມາດຖານເຕັກນິກ ທີ່ພະແນກ ຍທຂ ແຂວງ ແລະ ເຕັກນິກ ຂອງ ກະຊວງ ຍທຂ ວາງອອກທຸກປະການ.
