ລັດຖະບານສະເໜີວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໂດຍຫຍໍ້ຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ໂດຍມີຈຸດປະສົງເພື່ອສຸມໃສ່ແກ້ໄຂ 2 ບັນຫາດັ່ງກ່າວໃຫ້ຜ່ອນຄາຍລົງຢ່າງຈະແຈ້ງ ດ້ວຍການປັບປຸງນະໂຍບາຍກໍຄືກົນໄກຄຸ້ມຄອງໃນບາງດ້ານທີ່ມີລັກສະນະບຸກທະລຸ ແນໃສ່ສ້າງຄວາມເຂັ້ມແຂງໃນດ້ານເສດຖະກິດ-ການເງິນ ແລະ ຄວາມສະຫງົບໃນສັງຄົມ ຊຶ່ງການຈັດຕັ້ງປະຕິບັດນອກຈາກຈະຢຶດໝັ້ນຕາມຫຼັກການນຳພາຂອງພັກ ແລະ ການຄຸ້ມຄອງດ້ວຍລະບຽບກົດໝາຍແລ້ວຍັງຕ້ອງເນັ້ນຕໍ່ຫຼັກການສະເພາະເຊັ່ນ: “ເດັດຂາດ, ໂປ່ງໃສ ແລະ ມືອາຊີບ”.
ກອງປະຊຸມວິສາມັນເທື່ອທີ 1 ຂອງສະພາແຫ່ງຊາດຊຸດທີ IX ໃນວັນທີ 5 ສິງຫາ 2021 ທ່ານພັນຄຳ ວິພາວັນ ນາຍົກລັດຖະມົນຕີໄດ້ສະເໜີວາລະແຫ່ງຊາດ 2 ສະບັບໂດຍຫຍໍ້ໃຫ້ສະມາຊິກສະພາແຫ່ງຊາດ (ສສຊ) ພິຈາລະນາ.ທ່ານນາຍົກລັດຖະມົນຕີກ່າວວ່າ: ຈຸດປະສົງລວມຂອງວາລະແຫ່ງຊາດ ແມ່ນສຸມໃສ່ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດຂອງປະເທດ ໃຫ້ຜ່ອນຄາຍລົງຢ່າງຈະແຈ້ງ ດ້ວຍການປັບປຸງນະໂຍບາຍ ກໍຄືກົນໄກການຄຸ້ມຄອງໃນບາງດ້ານ ທີ່ມີລັກສະນະບຸກທະລຸ ແນໃສ່ສ້າງຄວາມເຂັ້ມແຂງໃນດ້ານເສດຖະກິດ-ການເງິນ ແລະ ຄວາມສະຫງົບຂອງສັງຄົມ ເປັນກ້າວໆໂດຍໄດ້ກໍານົດເວລາເປັນ 2 ປີ ເຄິ່ງ (ແຕ່ປີກາງປີ 2021 ຫາ 2023). ຫຼັງຈາກນັ້ນ ຈະໄດ້ປະເມີນຄືນຜົນການຈັດຕັ້ງປະຕິບັດຕົວຈິງຜ່ານມາ ບົນພື້ນຖານນັ້ນເພື່ອກໍານົດທິດທາງໃນຕໍ່ໜ້າຕາມເຫັນສົມຄວນ.
ທ່ານນາຍົກລັດຖະມົນຕີກ່າວອີກວ່າ: ຫຼັກການລວມ ຂອງການຈັດຕັ້ງປະຕິບັດວາລະແຫ່ງຊາດ ນອກຈາກຕ້ອງຢຶດໝັ້ນຕາມຫຼັກການນໍາພາຂອງພັກ ແລະ ການຄຸ້ມຄອງດ້ວຍລະບຽບກົດໝາຍແລ້ວ ຍັງຕ້ອງເອົາໃຈໃສ່ ເນັ້ນໜັກຕື່ມຕໍ່ຫຼັກການສະເພາະ ເຊັ່ນ: “ເດັດຂາດ, ໂປ່ງໃສ ແລະ ມືອາຊີບ (ຫຼັກວິຊາການ)”.ເດັດຂາດ: ໝາຍເຖິງຕ້ອງມີຄວາມຕັດສິນໃຈສູງສຸດ ທັງໃນອົງການຂອງພັກ ແລະ ລັດ ແຕ່ເທິງລົງລຸ່ມ ບົນພື້ນຖານສ້າງຄວາມເຂົ້າໃຈຢ່າງຖືກຕ້ອງທີ່ເປັນເອກະພາບ ກ່ຽວກັບຄວາມຮຸນແຮງຂອງບັນຫາ ແລະ ຄວາມຈໍາເປັນຕ້ອງນໍາໃຊ້ມາດຕະການເດັດຂາດໃນການແກ້ໄຂບັນຫາ ເພື່ອໃຫ້ມີໝາກຜົນຕົວຈິງ.
ໂປ່ງໃສ: ຫຼັກການນີ້ສໍາຄັນຫຼາຍ, ໃນຂະບວນການແກ້ໄຂບັນຫາ ບັນດາມາດຕະການທີ່ຮັບຮອງເອົານັ້ນຕ້ອງໂປ່ງໃສ ປະຊາຊົນສາມາດມີສ່ວນຮ່ວມທັງຂອດຈັດຕັ້ງປະຕິບັດຕົວຈິງ ແລະ ຂອດການຕິດຕາມ, ກວດກາຄວາມຄືບໜ້າຕ່າງໆໄດ້. ຄວາມໂປ່ງໃສ ຍັງສະແດງເຖິງຄວາມຊື່ສັດ, ຈິງໃຈຂອງລັດຖະບານ ກໍຄືພາກສ່ວນກ່ຽວຂ້ອງ ຊຶ່ງຈະເປັນແນວປ້ອງກັນທີ່ດີທີ່ສຸດໃຫ້ແກ່ຜູ້ທີ່ຕັດສິນໃຈປັບປຸງປ່ຽນແປງ ທັງເປັນເຄື່ອງມືທີ່ດີທີ່ສຸດໃນການສ້າງຄວາມເຊື່ອໝັ້ນ, ເຫຼື້ອມໃສສັດທາຈາກພາຍໃນ ແລະ ສາກົນ ຕໍ່ລັດຖະບານທີ່ມີຄວາມຕັ້ງໃຈແກ້ໄຂບັນຫາຂອງຕົນເອງ ແລະ ຈະເປັນແຮງຈູງໃຈດຶງດູດການສະໜັບສະໜູນຂອງກໍາລັງແຮງຈາກທຸກພາກສ່ວນພາຍໃນຊາດ ໃນການຈັດຕັ້ງປະຕິບັດ. ມືອາຊີບ (ຫຼັກວິຊາການ): ການແກ້ໄຂບັນຫາເສດຖະກິດ-ການເງິນ ກໍຄືບັນຫາຢາເສບຕິດ ຈໍາເປັນຕ້ອງນໍາໃຊ້ຄວາມຮູ້ ຄວາມຊໍານານ ໃນລະດັບທີ່ແນ່ນອນ ທາງດ້ານຫຼັກວິຊາການ ແລະ ວິຊາສະເພາະຂອງພາກສ່ວນກ່ຽວຂ້ອງ ຊຶ່ງບໍ່ອາດສາມາດເຮັດຕາມລໍາພັງໃຈ ຫຼື ຄວາມຮູ້ສຶກອັດຕະວິໄສຂອງຜູ້ໃດຜູ້ໜຶ່ງໄດ້; ການແກ້ໄຂບັນຫາຈໍາເປັນຕ້ອງໄດ້ນໍາໃຊ້ຄວາມຊ່ຽວຊານສະເພາະດ້ານເຊັ່ນ: ດ້ານການເງິນ, ທະນາຄານ, ກົດໝາຍ ແລະ ອື່ນໆ ເຂົ້າມາຊ່ວຍວິເຄາະ, ສັງເຄາະການວາງແຜນ ແລະ ໃຫ້ຄໍາແນະນໍາແກ່ລັດຖະບານຜູ້ມີອໍານາດຕັດສິນບັນຫາຕ່າງໆ ໝາຍຄວາມວ່າການແກ້ໄຂບັນຫາທັງໝົດນັ້ນ ຕ້ອງເປັນໄປຕາມຫຼັກວິຊາການ ບົນພື້ນຖານຄວາມເຂົ້າໃຈຢ່າງເລິກເຊິ່ງເຖິງກົກຮາກທີ່ແທ້ຈິງຂອງບັນຫາ ຕະຫຼອດຮອດວັດທະນະທໍາ, ການເຄື່ອນເໜັງຂອງກົນໄກທາງດ້ານການເງິນ, ການບໍລິຫານຂອງອົງການລັດຂັ້ນຕ່າງໆທີ່ເກີດຂຶ້ນທຸກຂັ້ນ ເພື່ອສາມາດວິເຄາະໃຫ້ໄດ້ ເຖິງແກ່ນແທ້ຂອງບັນຫາ ແລ້ວຫາວິທີແກ້ໄຂແບບຍືນຍົງ ເພື່ອຮັບມືກັບສະພາບທີ່ເປັນຢູ່ໃນປັດຈຸບັນ ແລະ ໃນອະນາຄົດ. ທາງດ້ານ ໂຄງປະກອບລວມ ຂອງວາລະແຫ່ງຊາດ ທັງ 2 ສະບັບ ປະກອບມີ 4 ພາກໃຫຍ່ ຄື: ພາກທີ 1: ຄວາມຈໍາເປັນ ແລະ ຮີບດ່ວນ ຂອງວາລະແຫ່ງຊາດ, ພາກທີ 2: ທັດສະນະ-ແນວຄິດຊີ້ນໍາ, ຫຼັກການ, ຈຸດປະສົງ ແລະ ລະດັບຄາດໝາຍ; ພາກທີ 3: ທິດທາງແກ້ໄຂ ແລະ ມາດຕະການ ແລະ ພາກທີ 4: ກົນໄກໃນການຈັດຕັ້ງປະຕິບັດ ແລະ ການແບ່ງຄວາມຮັບຜິດຊອບ.
ສຳລັບວຽກຈຸດສຸມ ຂອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໂດຍສັງລວມແລ້ວແມ່ນ: (ໜຶ່ງ) ສົ່ງເສີມການຜະລິດເພື່ອທົດແທນການນຳເຂົ້າ ແລະ ຜະລິດເປັນສິນຄ້າສົ່ງອອກ ເພື່ອສ້າງຖານລາຍຮັບທີ່ເຂັ້ມແຂງ (ຫັນປ່ຽນຈາກສັງຄົມຊົມໃຊ້ ຫຼາຍກວ່າໄປສູ່ສັງຄົມການຜະລິດຫຼາຍຂຶ້ນ). (ສອງ) ສ້າງຄວາມເຂັ້ມແຂງດ້ານການເກັບລາຍຮັບງົບປະມານ. (ສາມ) ສົ່ງເສີມການປະຢັດ, ຕ້ານການຟຸ່ມເຟືອຍ ແລະ ຍົກສູງປະສິດທິຜົນ ການລົງທຶນ-ລາຍຈ່າຍງົບປະມານ ແລະ ການແກ້ໄຂໜີ້ສິນພາຍໃນ ແລະ ຕ່າງປະເທດ. ສໍາລັບດ້ານການປະຢັດແມ່ນຈະປັບປຸງນິຕິກໍາ ໃນການນໍາໃຊ້ລົດປະຈໍາຕໍາແໜ່ງ ແລະ ລົດບໍລິຫານລັດ, ການໃຊ້ຈ່າຍງົບປະມານບໍລິຫານລັດ, ການຮັບແຂກ, ການເຄື່ອນໄຫວວຽກງານ ແລະ ການຈັດງານບຸນຕ່າງໆ ໃນການຈັດຕັ້ງພັກ-ລັດ ແຕ່ລະຂັ້ນ ທີ່ນໍາໃຊ້ງົບປະມານຂອງລັດ ໃຫ້ມີຄວາມເປັນເອກະພາບກັນ. ສໍາລັບການລົງທຶນ ແມ່ນຈະປັບປຸງນະໂຍບາຍການລົງທຶນຂອງລັດໃຫ້ສອດຄ່ອງ, ມີຈຸດສຸມ ແລະ ຮັບປະກັນທາງດ້ານປະສິດທິຜົນ. (ສີ່) ສ້າງສະຖຽນລະພາບດ້ານການເງິນ. (ຫ້າ) ຍົກສູງປະສິດທິພາບການຄຸ້ມຄອງລັດດ້ວຍກົດໝາຍ ໂດຍຈະປັບປຸງຮ່າງກົດໝາຍ, ນະໂຍບາຍ ແລະ ກົນໄກຕ່າງໆ ໃຫ້ຄ່ອງຕົວກວ່າເກົ່າ.ສໍາລັບວຽກຈຸດສຸມໃຫຍ່ ຂອງວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍສັງ ລວມແລ້ວແມ່ນ: (ໜຶ່ງ) ສ້າງຄວາມຮັບຮູ້ເຂົ້າໃຈຜົນຮ້າຍຂອງຢາເສບຕິດໃຫ້ແກ່ສັງຄົມ ທັງສຶກສາອົບຮົມ, ໂຄສະນາເຜີຍແຜ່ ແນວທາງນະໂຍບາຍຕ່າງໆຂອງພັກ-ລັດ ເຮົາ; (ສອງ) ສ້າງ, ປັບປຸງກົດໝາຍ ແລະ ນິຕິກໍາໃຕ້ກົດໝາຍ ທີ່ກ່ຽວຂ້ອງກັບບັນຫາຢາເສບຕິດ. (ສາມ) ປັບປຸງ ກົງຈັກການຈັດຕັ້ງ ແລະ ຍົກລະດັບຄວາມສາມາດຂອງອົງການປົກປ້ອງກົດໝາຍ, ອົງການຕຸລາການ ແລະ ພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ. (ສີ່) ຍົກສູງປະສິດທິພາບ ດ້ານການຄຸ້ມຄອງ ແລະ ຊີ້ນໍາການຈັດຕັ້ງປະຕິບັດຮອບດ້ານ. (ຫ້າ) ປັບປຸງຂີດຄວາມສາມາດ ໃນການແກ້ໄຂບັນຫາຢາເສບຕິດ ທີ່ເກີດຂຶ້ນຢູ່ໃນຄວາມຮັບຜິດຊອບຂອງຕົນຂອງການຈັດຕັ້ງຕ່າງໆກ່ຽວຂ້ອງ (ຫົກ) ເພີ່ມທະວີວຽກງານການຮ່ວມມືສາກົນ.
ນອກຈາກນີ້ ລັດຖະບານຍັງສະເໜີປັບປຸງກົດໝາຍກົດໝາຍຈຳນວນ 5 ສະບັບທີ່ພົວພັນກັບວາລະແຫ່ງຊາດທັງສອງສະບັບເພື່ອໃຫ້ບັນດາທ່ານສະມາຊິກສະພາແຫ່ງຊາດ ເພື່ອພິຈາລະນາຮັບຮອງ ຄື: (1) ຮ່າງກົດ ໝາຍວ່າດ້ວຍ ການຄຸ້ມຄອງສ່ວຍສາອາກອນ; (2) ຮ່າງກົດໝາຍ ວ່າດ້ວຍ ອາກອນມູນຄ່າເພີ່ມ; (3) ຮ່າງກົດໝາຍວ່າດ້ວຍອາກອນຊົມໃຊ້; (4) ຮ່າງກົດໝາຍວ່າດ້ວຍ ອາກອນລາຍໄດ້ ແລະ (5) ຮ່າງກົດໝາຍວ່າດ້ວຍຢາເສບຕິດ. ນອກຈາກນັ້ນ, ຍັງມີຮ່າງດໍາລັດ 2 ສະບັບ ແລະ ຄໍາສັ່ງ 1 ສະບັບ ປະກອບດ້ວຍ: (1) ຮ່າງດໍາລັດວ່າດ້ວຍການປະຢັດ ແລະ ຕ້ານການຟຸ່ມເຟືອຍ; (2) ຮ່າງດໍາລັດວ່າດ້ວຍລົດຂອງລັດ ຕິດພັນກັບລົດປະຈໍາຕໍາແໜ່ງ ແລະ (3) ຮ່າງຄໍາສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ.
ຂໍ້ມູນ: ປະຊາຊົນ
