ວິທະຍຸກະຈາຍສຽງແຫ່ງຊາດລາວ ລາຍງານ: ວັນທີ 13 ກໍລະກົດ 2021, ຫ້ອງການກະສິກຳ-ປ່າໄມ້ ເມືອງຊະນະຄາມ ແຂວງວຽງຈັນ ໄດ້ຈັດພິທີປ່ອຍປາ ຢູ່ຝາຍ ບ້ານໂນນນາແກບ ເມືອງຊະນະຄາມ ໂດຍການເປັນກຽດເຂົ້າຮ່ວມ ຂອງທ່ານ ສະໝານ ວິເສດຍະພົງ ກຳມະການພັກແຂວງ ເລຂາພັກເມືອງ ເຈົ້າເມືອງຊະນະຄາມ, ມີທ່ານຄຳມີ ທອງປານສີ ວ່າການຫົວໜ້າຫ້ອງ ການກະສິກຳ-ປ້າໄມ້ ເມືອງ, ພະ ນັກງານຫ້ອງການທີ່ກ່ຽວຂ້ອງ ແລະ ປະຊາຊົນພາຍໃນບ້ານກໍ່ເປັນກຽດເຂົ້າ ຮ່ວມເປັນຈຳນວນຫຼວງຫຼາຍ. ໃນພິທີ ທ່ານ ສະໝານ ວິເສດຍະພົງ ໄດ້ຂຶ້ນກ່າວຕໍ່ພິທີວ່າ: ການປ່ອຍປາມື້ນີ້ ແມ່ນການປ່ອຍປາຄືນສູ່ທຳມະຊາດ ເພື່ອໃຫ້ລະບົບນິເວດ ມີຄວາມສົມດຸນກັນ, ພ້ອມທັງ ຫ້າມພໍ່ແມ່ປະຊາຊົນບໍ່ໃຫ້ຫາປາ ແບບຜິດກົດໝາຍ ເຊັ່ນ: ການນຳໃຊ້ໜໍ້ຊ໋ອດ,ໝໍ້ດູດ,ທາດເບື່ອ, ຖິ້ມລະເບີດ ອັນເຮັດໃຫ້ ປາບໍ່ມີການຂະຫຍາຍພັນ, ເຮັດໃຫ້ປາມີຈຳນວນ ນັບມື້ນັບຫຼຸດຈຳນວນ ລົງ ແລະດັບສູນໄປ.
ຫຼັງຈາກນັ້ນ ການນຳ ຂອງເມືອງ ກໍ່ໄດ້ນຳພາພໍ່ ແມ່ປະຊາຊົນ ເຂົ້າສູ່ການປ່ອຍປາ ຢ່າງເປັນທາງການ ເຊິ່ງປາທີ່ນຳມາປ່ອຍໃນຄັ້ງນີ້ມີຈຳນວນ 100 ຖົງ, ມີປາ 10 000ໂຕ ປະກອບມີປາເລັ່ງ, ປານິນ, ປາໄນ, ປາປາກ, ພາຍຫຼັງສຳເລັດການປ່ອຍປາແລ້ວ ທາງຫ້ອງການພາກສ່ວນທີ່ກ່ຽວ ຂ້ອງຊີ້ນຳ-ນຳພາອຳນາດການປົກຄອງບ້ານ ແລະປະຊາຊົນ ຈົ່ງພ້ອມກັນ ອານຸລັກປົກປັກຮັກສາປາ ໃຫ້ມີການຈະເລີນເຕີບໂຕ ແລະພີ້ມຈຳນວນຂື້ນເລື້ອຍໆ.
