ມาດຕະການປິດເມືອງຄັ້ງນີ້ ເລີ່ມເຊົ້າມື້ນີ້ ວັນສຸກ ທີ 9 ກໍລະກົດ 2021 ທີ່ປະຊາຊົນພາຍໃນເມືອງໃນນະຄອນໂຮ່ຈີມິນ ຈະຕ້ອງຢູ່ກັບບ້ານເປັນເວລາ 2 ອາທິດ ເນື່ອງຈາກເມືອງ ກາຍເປັນສູນກາງການລະບາດ ແລະ ມີຜູ້ປ່ວຍຕິດເຊື້ອໃໝ່ສະສົມເຖິງ 8000 ຄົນ ໃນລະຫວ່າງການລະບາດຄັ້ງລ່າສຸດ ເຊີ່ງເລີ່ມຂື້ນ ເມື່ອວັນທີ 27 ເມສາ ທີ່ຜ່ານມາ ຈາກທີ່ກ່ອນໜ້ານີ້, ທັງປະເທດມີຜູ້ປ່ວຍຕິດເຊື້ອສະສົມບໍ່ຮອດ 3000 ຄົນ.
ເຈົ້າຄອງນະຄອນໂຮ່ຈີມິນ ໄດ້ກ່າວໃນຊ່ວງປະກາດລັອກດາວ ວ່າ: ເມືອງກຳລັງພົບການລະບາດຂອງພະຍາດໂຄວິດ-19 ແລະ ຄວາມທ້າທາຍ ໃນການຄວບຄຸມການລະບາດ ຂອງໂຄວິດ -19 ຄັ້ງນີ້ ແລະ ກ່າວອີກວ່າ ເພື່ອຄວບຄຸມການລະບາດຢ່າງໂດຍໄວ ນະຄອນໂຮ່ຈີມິນ ຈິ່ງຕັດສິນໃຈ ໃນການໃຊ້ມາດຕະການຢ່າງເຂັ້ມງວດຂຶ້ນ, ດ້ານຮອງນາຍົກລັດຖະມົນຕີ ໄດ້ກ່າວກັບເຈົ້າໜ້າທີ່ ນະຄອນໂຮ່ຈິມິນວ່າ ເຖິງເວລາທີ່ຈະຕ້ອງຍອມຮັບການເສຍສະຫຼະ.
ສື່ມວນຊົນພາກລັດຖະບານລາຍງານວ່າ ຜູ້ອາໃສຢູ່ໃນເມືອງຈະໄດ້ຮັບການອານຸຍາດໃຫ້ອອກຈາກບ້ານ ເພື່ອຊື້ອາຫານ ແລະ ຢາ ເທົ່ານັ້ນ, ພ້ອມກັນັ້ນມີ 10 ເມືອງ ຕ້ອງໄດ້ລະງັບຖ້ຽວບິນ ທີ່ເຊື່ອມຕໍ່ກັບນະຄອນໂຮ່ຈິມິນ ແລະ ມີລາຍງານວ່າ ປະຊາຊົນ ພາກັນໄດ້ແຫ່ຊື້ສິນຄ້າກັກຕຸນຕຽມການລັອກດາວ ໃນຂະນະດຽວກັນຕະຫຼາດສິນຄ້າທີ່ໃຫຍ່ 3 ແຫ່ງ ກໍປິດ.
