ອີງຕາມການລາຍງານ ຈາກສຳນັກຂ່າວ ປະຊາຊົນ ໃຫ້ຮູ້ວ່າ: ໃນວັນທີ 25 ມີຖຸນາ 2021 ນີ້ ທີ່ຜ່ານມາ, ນະຄອນຊົງຊິ້ງ ແຫ່ງ ສາທາລະນະລັດ ປະຊາຊົນ ຈີນ ໄດ້ມອບ ຜ້າອັດປາກ-ດັງ ຈຳນວນ 200.000 ອັນ ແລະ ຊຸດປ້ອງກັນການຕິດເຊື້ອ ຫຼື ຊຸດ PPE ຈໍານວນ 10.000 ຊຸດ ລວມມູນຄ່າການຊ່ວຍເຫຼືອ 2 ຕື້ກວ່າກີບ ໃຫ້ແກ່ແຂວງຈໍາປາສັກ ເພື່ອປະກອບສ່ວນເຂົ້າໃນການຕ້ານ ສະກັດກັ້ນ ການແຜ່ລະບາດພະຍາດໂຄວິດ-19.
ໂດຍຜ່ານ ສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ປັກກິ່ງ ສປ ຈີນ ແລະ ຄາດວ່າ ເຄື່ອງຊ່ວຍເຫຼືອດັ່ງກ່າວ ອົງການປົກຄອງ ແລະ ປະຊາຊົນ ຊາວ ແຂວງຈໍາປາສັກ ຈະໄດ້ຮັບ ໃນໄວໆນີ້.
ການຊ່ວຍເຫຼືອ ຂອງນະຄອນຊົງຊິ້ງຄັ້ງນີ້, ຖືວ່າມີຄວາມໝາຍ ຄວາມສຳຄັນຍິ່ງ ຕໍ່ກັບສາຍພົວພັນມິດຕິພາບ, ການຮ່ວມມື ແລະ ການຊຸກຍູ້ຊ່ວຍເຫຼືອໂດຍຕະຫຼອດມາ ຕໍ່ ສາທາລະນະລັດ ປະຊາທິປະໄຕ ປະຊາຊົນລາວ ເວົ້າລວມ, ເວົ້າສະເພາະ ຕໍ່ ແຂວງຈຳປາສັກ ທີ່ໄດ້ສືບຕໍ່ຮັດແໜ້ນ ແລະ ເພີ່ມພູນຄູນສ້າງສາຍພົວພັນດັ່ງກ່າວ ໄດ້ຂະຫຍາຍຕົວຢ່າງຕໍ່ເນື່ອງ ແລະ ຫວັງຢ່າງຍິ່ງວ່າສາຍພົວພັນ ແລະການຮ່ວມມືທີ່ມີມູນເຊື້ອອັນດີງາມ ດັ່ງກ່າວ ຈະສືບຕໍ່ໄດ້ຮັບການພັດທະນາ ໃຫ້ນັບມື້ແໜ້ນແຟ້ນ ຂຶ້ນເລື້ອຍໆ.
