ຄວນເອົາເປັນແບບຢ່າງສອງຜົວເມຍທີ່ລັກຂ້າມມາແຕ່ປະເທດໄທແລ້ວ ຮີບຮ້ອນເຂົ້າແຈ້ງເຈົ້າໜ້າທີ່ທັນທີ ເພື່ອນຳຕົວໄປກັກກັນ ແລະ ກວດກາເຊື້ອຢູ່ສູນທີ່ທາງການກຳນົດ
ໃນວັນທີ 11 ມີນາ 2021 ເວລາ 20:00ໂມງ ທ້າວ ໄມແສດພັນ ອາຍຸ 35ປີ ແລະນາງ ພອນແກ້ວ ອາຍຸ 32ປີ ສອງຜົວເມຍປະຊາຊົນບ້ານຊຽງແລທ່າ ແມ່ນໄດ້ຈ້າງເຮືອຈັກໄທຂີ່ຂ້າມມາສົ່ງຢູ່ທ່າບ້ານໜອງຂຽດ ເມືອງປາກງື່ມ ນວ ເມື່ອຂ້າມມາຮອດແລ້ວ ທັງສອງແມ່ນໄດ້ເຂົ້າມາແຈ້ງອຳນາດການປົກຄອງບ້ານໜອງຂຽດ ແລະ ເຈົ້າໜ້າທີ່ທັນທີ ເພື່ອນຳຕົວໄປກັກກັນ ແລະ ກວດກາເຊື້ອຢູ່ສູນທີ່ທາງການກຳນົດ.
ຕໍ່ກໍລະນີນີ້ ກອງບັນຊາການ ປກສ ນະຄອນຫຼວງວຽງຈັນ ຂໍຊົມເຊີຍສະຕິຕື່ນຕົວຂອງທັງສອງ ຜົວເມຍ ທີ່ຈິງໃຈເຂົ້າລາຍງານ ແລະ ເອົາໃຈໃສ່ປະຕິບັດມາດຕະການຄວບຄຸມການແຜ່ລະບາດພະຍາດໂຄວິດ-19 ທີ່ທາງລັດຖະບານລາວໄດ້ວາງອອກ, ຮຽກຮ້ອງມາຍັງພໍ່ແມ່ປະຊາຊົນທຸກຊັ້ນຄົນ, ແຮງງານລາວທີ່ໄປເຮັດວຽກຢູ່ປະເທດເພື່ອນບ້ານທີ່ບໍ່ມີເອກະສານເດີນທາງ ຫຼື ເອກະສານໝົດອາຍຸ ຖ້າຂ້າມມາແລ້ວ ໃຫ້ຈິງໃຈເຂົ້າລາຍງານເຈົ້າໜ້າທີ່ ພວກເຮົາຈະບໍ່ເອົາຜິດໃນການລັກລອບຂ້າມໄປມາແບບບໍ່ມີເອກະສານ ແລະ ຈະໃຫ້ການຊ່ວຍເຫຼືອຢ່າງເຕັມທີ່ ແຕ່ຖ້າເຂົ້າເມືອງມາແລ້ວຫາກລົບໜີການກວດກາແລະ ການໄປກັກກັນຕົວ ເມື່ອເຈົ້າໜ້າທີ່ກວດພົບຈະໄດ້ດຳເນີນມາດຕະການປັບໃໝຢ່າງເຂັ້ມງວດ.
