ໃນລະຫວ່າງວັນທີ 11-13 ພະຈິກ 2020 ນີ້ ອົງການກາແດງລາວໄດ້ເຝິກອົບຮົມວຽກງານສືບທາວຫາຍາດພີ່ນ້ອງທົ່ວປະເທດ ຂຶ້ນທີ່ເມືອງແກ້ວອຸດົມ ແຂວງວຽງຈັນ ໂດຍການເຂົ້າຮ່ວມຂອງທ່ານ ທອງພະຈັນ ສອນນະສິນ ຮອງປະທານອົງການກາແດງລາວ,ມີຫົວໜ້າກອງ, ແລະ ພະນັກງານຈາກກອງໂຄສະນາ ແລະ ຂົນຂວາຍການກຸສົນ ຜູ້ຕາງໜ້າຈາກຄະນະກຳມະການກາແດງສາກົນປະຈຳນະຄອນຫຼວງວຽງຈັນ, ຄະນະນຳກາແດງແຂວງ ແລະ ພະນັກງານສືບທາວຫາຍາດພີ່ນ້ອງກາແດງແຂວງ ໃນທົ່ວປະເທດເຂົ້າຮ່ວມ ທັງໝົດ 47 ຄົນ, ຍິງ11ຄົນ.
ວຽກງານສືບທາວຫາຍາດພີ່ນ້ອງເປັນວຽກງານຫນຶ່ງທີ່ສຳຄັນໃນການຊ່ວຍເຫລືອຍາດພີ່ນ້ອງທີ່ພັດພາກຈາກກັນ ແລະ ທັງເປັນການຫຼຸດຜ່ອນຄວາມກັງວົນໃຫ້ພີ່ນ້ອງ, ເປັນສື່ກາງໃນການສົ່ງຂ່າວໃຫ້ຄອບຄົວ ແລະ ຊ່ວຍໃຫ້ຄອບຄົວກັບມາຕິດຕໍ່ກັນໄດ້.
ຈຸດປະສົງຂອງການຈັດເຝິກອົບຮົມໃນຄັ້ງນີ້ກໍເພື່ອຮ່ວມກັນຖອດຖອນບົດຮຽນ, ຕີລາຄາດ້ານດີ, ດ້ານດີອ່ອນ ໃນໄລຍະຜ່ານມາ ແລະ ທິດທາງໃນການປັບປຸງ ແລະ ພັດທະນາວຽກງານສືບທາວຫາຍາດພີ່ນ້ອງໃນອະນາຄົດ; ເພື່ອແລກປ່ຽນປະສົບການປະຕິບັດງານຕົວຈິງຊຶ່ງກັນ ແລະ ກັນ, ແນໃສ່ສ້າງຄວາມເຂັ້ມແຂງໃຫ້ກັບພະນັກງານຮັບຜິດຊອບ ແລະ ຜູ້ຊີ້ນຳວຽກງານສືບທາວໃນຂັ້ນແຂວງ ແລະ ເປັນການເສີມສ້າງທັກສະດ້ານການລົງໂຄສະນາວຽກງານສືບທາວຫາຍາດຢູ່ທ້ອງຖິ່ນ.
ໃນໄລຍະຜ່ານມາອົງການກາແດງລາວໄດ້ ເປີດຄຳຮ້ອງສືບທາວຫາຍາດພີ່ນ້ອງໄດ້ ແລະ ສາມາດສືບທາວ ເຮັດໃຫ້ສະມາຊິກຄອບຄົວໄດ້ຮັບຮູ້ຂ່າວ ແລະ ກັບມາຢູ່ຮ່ວມກັນອີກຄັ້ງ. ນອກນັ້ນຍັງໄດ້ຊ່ວຍສົ່ງຈົດໝາຍກາແດງໃຫ້ພີ່ນ້ອງທີ່ພັດພາກກັນຢູ່ຕ່າງປະເທດໄດ້ຫຼາຍສະບັບ; ສ້າງພະນັກງານສືບທາວໃນທົ່ວປະເທດ; ຂະຫຍາຍການຊ່ວຍເຫຼືອຜ່ານການກະຈາຍຂໍ້ມູນໃຫ້ສັງຄົມທາງ ສື່ໂຄສະນາທາງວິທະຍຸ, ວີດີໂອ, ແຜ່ນໂຄສະນາ, ໃບໂຄສະນາ ແລະ ລົງໂຄສະນາໃຫ້ປະຊາຊົນໃນຂັ້ນບ້ານ ແລະໄດ້ພ້ອມກັນຜ່ານຮ່າງປື້ມຄູ່ມືວຽກງານນີ້ການເຝິກອົບຮົມໄດ້ຮັບການສະໜັບສະໜູນຈາກຄະນະກຳມະການກາແດງສາກົນ.
