ພິທີມອບ-ຮັບ ອາຄານຮຽນຫຼັງໃໝ່ ໃຫ້ແກ່ໂຮງຮຽນມັດທະຍົມຕົ້ນກີບມ້າ ເມືອງອຸທຸມພອນ ແຂວງສະຫວັນນະເຂດ ໂດຍການສະໜັບສະໜູນທຶນຈາກ ກອງທຶນຮ່ວມໃຈ ທະນາຄານຮ່ວມພັດທະນາ (JDB)
- ໃນວັນທີ28/3/2025 ໄດ້ມີພິທີມອບ-ຮັບ ອາຄານຮຽນຫຼັງໃໝ່ ໃຫ້ແກ່ໂຮງຮຽນມັດທະຍົມຕອນຕົ້ນ ກີບມ້າ ເມືອງອຸທຸມພອນ ແຂວງສະຫວັນນະເຂດ ຂຶ້ນຢ່າງເປັນທາງການ ໃຫ້ກຽດເປັນປະທານ ໂດຍທ່ານ ທອງໃສ ໄຊຍະວົງຄໍາດີ ເຈົ້າເມືອງອຸທຸມພອນ, ທ່ານ ອໍາພອນ ຂາວເພຍສຸພັນ ຮອງພະແນກສຶກສາທິການ ແລະ ກິລາແຂວງ, ທ່ານ ວິໄລ ສີພະພອນ ປະທານສະພາຜູ້ບໍລິຫານທະນາຄານຮ່ວມພັດທະນາ (JDB) ແລະ ບັນດາທ່ານ ກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຄະນະຫ້ອງການອ້ອມຂ້າງເມືອງ, ບັນດາທ່ານ ຜູ້ບໍລິຫານພ້ອມພະນັກງານ ຈາກທະນາຄານຮ່ວມພັດທະນາ (JDB), ບັນດາທ່ານ ຜອ, ຄູອາຈານ ຈາກໂຮງຮຽນ ມັດທະຍົມ ແລະ ປະຖົມໃນ 2 ກຸ່ມບ້ານຄື: ກຸ່ມບ້ານໜອງບົວທອງ ແລະ ກຸ່ມບ້ານນາ, ບັນດາທ່ານເລຂາພັກບ້ານ, ອໍານາດການປົກຄອງພໍ່ແມ່ປະຊາຊົນ ໃນກຸ່ມບ້ານໜອງບົວທອງກໍ່ເຂົ້າຮ່ວມຢ່າງພ້ອມພຽງ.
- ການກໍ່ສ້າງອາຄານຫຼັງນີ້ໄດ້ເລີ່ມຂຶ້ນໃນວັນທີ15 ມັງກອນ 2025 ແລະ ສໍາເລັດລົງໃນວັນທີ 21 ມີນາ 2025, ດ້ວຍໄລຍະເວລາການກໍ່ສ້າງທີ່ວ່ອງໄວ ແລະ ມີປະສິດທິພາບ, ໄລຍະການກໍ່ສ້າງແຕ່ລະຂັ້ນຕອນ, ຕັ້ງແຕ່ການຕັ້ງເສົາເທຄານ, ການເຮັດໂຄງຫຼັງຄາ, ການກໍ່ຝາ, ໄປຈົນເຖິງການຕົບແຕ່ງພາຍໃນ, ໄດ້ດຳເນີນໄປຢ່າງເປັນລະບຽບ ແລະ ໄດ້ມາດຕະຖານສູງສຸດ.
- ອາຄານຫຼັງນີ້ປະກອບດ້ວຍ5 ຫ້ອງ, ໂດຍມີ 4 ຫ້ອງຮຽນ ແລະ 1 ຫ້ອງການ, ພ້ອມດ້ວຍອຸປະກອນທີ່ທັນສະໄໝ ເຊັ່ນ: ໂຕະຕັ່ງນັກຮຽນ 60 ຊຸດ, ໂຕະຕັ່ງຄູ 7 ຊຸດ, ກະດານດຳ, ພັດລົມ 20 ຊຸດ ແລະ ໄຟຟ້າ 25 ດອກ. ທັງໝົດນີ້ແມ່ນເພື່ອສ້າງສະພາບແວດລ້ອມການຮຽນ-ການສອນທີ່ດີທີ່ສຸດໃຫ້ແກ່ນັກຮຽນ ແລະ ຄູອາຈານ.
- ການກໍ່ສ້າງອາຄານຫຼັງນີ້ ໄດ້ຮັບການສະໜັບສະໜູນທຶນຈາກກອງທຶນຮ່ວມໃຈ ທະນາຄານຮ່ວມພັດທະນາ (JDB)ລວມມູນຄ່າການກໍ່ສ້າງທັງໝົດ 1,200,000,000 ກີບ ເພື່ອເປັນການພັດທະນາອະນາຄົດອັນສົດໃສຂອງເຍົາວະຊົນໃນຊຸມຊົນ ພ້ອມທັງເປັນສັນຍາລັກແຫ່ງຄວາມຫວັງໃຫ້ແກ່ປະເທດຊາດບ້ານເມືອງ.