ບໍລິສັດ ລັດວິສາຫະກິດນໍ້າມັນເຊື້ອໄຟລາວ ສາຂາຊຽງຂວາງ ມອບເງິນປັນຜົນ 20% ໃຫ້ສຳນັກງານໃຫຍ່ ແລະ ມອບອາກອນກໍາໄລ ປີ 2024 ໃຫ້ອາກອນແຂວງຊຽງຂວາງ ຈໍານວນ: 1 ຕື້ກວ່າກີບ.
ໃນຕອນເຊົ້າວັນທີ 10 ມັງກອນ 2024 ນີ້, ຢູ່ທີ່ບໍລິສັດ ລັດວິສາຫະກິດນໍ້າມັນເຊື້ອໄຟລາວ ຈໍາໜ່າຍ ພາຍໃນສາຂາແຂວງຊຽງຂວາງ ໂດຍການບໍລິຫານຂອງບໍລິສັດ ຍອດງຶ່ມພາວເວີ ມະຫາຊົນ. ໄດ້ຈັດກອງ ປະຊຸມລາຍງານຜົນການດໍາເນີນທຸລະກິດຂອງລັດວິສາຫະກິດນໍ້າມັນເຊື້ອໄຟລາວ ຈຳໜ່າຍພາຍໃນສາຂາ ແຂວງຊຽງຂວາງ ປະຈຳປີ 2024 ແລະ ມອບພັນທະອາກອນໃຫ້ທາງອາກອນແຂວງ ແລະ ມອບເງິນປັນ ຜົນ 20% ໃຫ້ທາງລັດວິສາຫະກິດນ້ຳມັນເຊື້ອໄຟລາວສຳນັກງານໃຫຍ່ຂຶ້ນຢ່າງເປັນທາງການ.
ເປັນກຽດເຂົ້າຮ່ວມໃນພິທີຂອງ ທ່ານ ທອງສະຫວັດ ມັງໜໍ່ເມກ, ຫົວໜ້າພະແນກອຸດສາຫະກຳ ແລະ ການຄ້າແຂວງຊຽງຂວາງ; ມີທ່ານ ບຸນຍົກ ບຸດສະວົງ, ຮອງອຳນວຍການ ບໍລິສັດລັດວິສາຫະກິດນ້ຳມັນ ເຊື້ອໄພລາວ; ມີທ່ານ ອຸທັນ ໄຕລິດທິ, ຫົວໜ້າລັດວິສາຫະກິດນໍ້າມັນເຊື້ອໄຟລາວສາຂາແຂວງຊຽງຂວາງ; ມີທ່ານ ສົມຫວັງ ຄຸຣຸລັດ, ຜູ້ອຳນວຍການໃຫຍ່ ບໍລິສັດ ຍອດງື່ມພາວເວີ ມະຫາຊົນ; ມີຜູ້ຕາງໜ້າຈາກ ອາກອນແຂວງຕະຫຼອດຮອດວິຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຜົນການດໍາເນີນທຸລະກິດ ຂອງບໍລິສັດລັດວິສາຫະກິດນໍ້າມັນເຊື້ອໄຟລາວ ຈໍາໜ່າຍພາຍໃນສາຂາແຂວງ ຊຽງຂວາງປະຈໍາປີ 2024 ເລີ່ມແຕ່ວັນທີ 01 ມັງກອນ 2024 ເປັນຕົ້ນມາ, ເຊິ່ງການຈຳໜ່າຍນ້ຳມັນ ເຊື້ອໄຟໃຫ້ກັບແຂວງຊຽງຂວາງ ແລະ ແຂວງໃກ້ຄຽງ. ປັດຈຸບັນ, ມີທັງໝົດ 05 ໜ່ວຍງານ ຄື: ໜ່ວຍງານ ບໍລິຫານ, ບັນຊີ – ການເງິນ, ຝ່າຍຂາຍ-ການຕະຫຼາດ, ເຕັກນິກສ້ອມແປງ ແລະ ໜ່ວຍງານຈັດຊື້; ເຊິ່ງມີພະນັກງານທັງໝົດ 35 ຄົນ.
ຜົນການດຳເນີນທຸລະກິດໃນປີ 2024 ຂາຍນ້ຳມັນທັງໝົດ 25,264,600 ລິດ, ຄິດເປັນເງີນ 481,509,971,672.92 ກີບ; ກຳໄລ 6,147,313,749.90 ກີບ; ອາກອນກຳໄລ 20% 1,229,461,750 ກີບ; ກຳໄລສຸດທິ 4,917,850,999.60 ກີບ; ອາກອນເງິນປັນຜົນ 10% 491,785,100 ກີບ. ໃນນີ້, ກາຊວນ ຈໍານວນ 15,616,600 ລິດ, ເປັນເງີນ 280,748, 191,418.86 ກີບ; ແອັດຊັງ ຈຳນວນ 9,648,000 ລິດ, ເປັນເງີນ 200,761,726,253.19 ກີບ; ມີປໍ້ານໍ້າມັນຕົວແບບ 02 ປໍ້າ ແລະ ປໍ້ານໍ້າມັນຕົວແທນຈໍາໜ່າຍ 43 ປໍ້າ; ຈາກ 38 ປໍ້າ ກາຍເປັນ 45 ປໍ້າ. ເຊີ່ງແຜນໃນປີ 2025 ຈະມີແຜນຈໍາໜ່າຍນ້ຳມັນເຊື້ອໄຟໃຫ້ໄດ້ປະມານ 35 ລ້ານລິດ.
ໂອກາດດັ່ງກ່າວ ບໍລິສັດ ຍອດງື່ມພາວເວີ ມະຫາຊົນ ຍັງໄດ້ມອບເງິນປັນຜົນ 20% ຈາກການດຳເນີນ ທຸລະກິດ ປີ 2024 ໃຫ້ລັດວິສາຫະກິດນໍ້າມັນເຊື້ອໄຟລາວສໍານັກງານໃຫ່ຍ ຈໍານວນ: 885,213,180 ກີບ ( ບໍ່ລວມເງິນສຳປະທານ 1 ຕື້ກີບ/ປີ ) ແລະ ລັດວິສາຫະກິດ ນ້ຳມັນເຊື້ອໄຟລາວ ຈຳໜ່າຍພາຍໃນ ສາຂາແຂວງຊຽງຂວາງ ມອບອາກອນກຳໄລຈາກການດຳເນີນທຸລະກິດ ປີ 2024 ໃຫ້ອາກອນແຂວງຊຽງ ຂວາງ ຈໍານວນ: 1,229,462,750 ກີບ; ມອບອາກອນກຳໄລເງິນປັນຜົນຈາກການດໍາເນີນທຸລະກິດ ປີ 2024 ໃຫ້ອາກອນແຂວງຊຽງຂວາງຈຳນວນ: 491,785,100 ກີບຕື່ມອີກ.
