ອົງການກາແດງແຂວງອັດຕະປື ມອບເຄື່ອງຊ່ວຍເຫຼືອບັນເທົາທຸກໃຫ້ ຄອບຄົວ ທີ່ໄດ້ຮັບຜົນກະທົບຈາກ ລົມພະຍຸໂນຣູ
ອົງການກາແດງແຂວງອັດຕະປື ໄດ້ລົງໄປມອບເຄື່ອງຊ່ວຍເຫຼືອບັນເທົາທຸກ ໃຫ້ປະຊາຊົນ ເຂດຈະເລີນໄຊ ເມືອງຊານໄຊ, ທີ່ໄດ້ຮັບຜົນກະທົບຈາກເຫດການນໍ້າຖ້ວມ ຍ້ອນລົມພາຍຸ ໂນຣູ ພັດເຂົ້າໃນຄໍ່າຄືນຂອງວັນທີ 27 ກັນຍາ 2022 ,ສະເພາະຢູ່ເຂດຈະເລີນໄຊ ເມືອງຊານໄຊ ແຂວງອັດຕະປື ໄດ້ຮັບຄວາມເສຍຫາຍໜັກ ມີ 1 ບ້ານຄືບ້ານຈະເລີນໄຊ,ມີ 100 ຄອບຄົວ, 98 ຫຼັງຄາເຮືອນ, ພົນລະເມືອງ 497 ຄົນ, ຍິງ 228 ຄົນ, ເຄື່ອງຊ່ວຍເຫຼືອບັນເທົາທຸກເບື້ອງຕົ້ນທີ່ອົງການກາແດງແຂວງ ນໍາໄປຊ່ວຍເຫຼືອຄັ້ງນີ້ ປະກອບມີ: ເຄື່ອງນຸ່ງຫົ່ມຈໍານວນ 1.000 ຜືນ, ແລະວັດຖຸຮັບໃຊ້ຊີວິດປະຈໍາວັນອື່ນໆ ,ລວມມູນຄ່າ 20 ລ້ານກວ່າກີບ.
ພິທີມອບ-ຮັບ ໄດ້ຈັດຂື້ນ ວັນທີ 28 ກັນຍາ 2022 ທີ່ຫ້ອງການເຂດຈະເລີນໄຊ, ກ່າວມອບໂດຍທ່ານນາງ ດາວວັງ ນາມເສນາ ຮອງຫົວໜ້າຫ້ອງການອົງການກາແດງແຂວງອັດຕະປື ແລະ ກ່າວຮັບໂດຍທ່ານ ພູເງິນ ຄະນະເຂດຈະເລີນໄຊ ພ້ອມດ້ວຍອຳນາດການປົກຄອງບ້ານຕະຫຼອດຮອດປະຊາຊົນ ພາຍໃນບ້ານເຂົ້າຮ່ວມ.
ທ່ານ ພູເງິນ ຄະນະເຂດຈະເລີນໄຊ ໄດ້ກ່າວສະແດງຄວາມຂອບອົກຂອບໃຈ ພັກ-ລັດ ກໍ່ຄືອົງການກາແດງແຂວງ ທີ່ມີຄວາມເປັນຫ່ວງເປັນໃຍຕໍ່ຊີວິດການເປັນຢູ່ຂອງປະຊາຊົນ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ແລະ ພ້ອມຈະນໍາເອົາເຄື່ອງຊ່ວຍເຫຼືອທີ່ໄດ້ຮັບຄັ້ງນີ້ ມອບຕໍ່ໃຫ້ພໍ່ແມ່ປະຊາຊົນຢູ່ເຂດຈະເລີນໄຊ ໃຫ້ໄດ້ຢ່າງທົ່ວເຖິງ .
ແຫຼ່ງຂ່າວ: Lao National Radio
