ຕາມການລາຍງານຂອງຄວາມສະຫງົບໃຫ້ຮູ້ວ່າ : ໃນວັນທີ 6 ມິຖຸນາ 2022 ເວລາປະມານ 21:30 ໂມງ, ເຈົ້າຫນ້າທີ່ຕໍາຫຼວດຈະລາຈອນ ຕັ້ງຈຸດກວດ ປ້ອມປາກສັງ ບ້ານທ່ານາສາ ເມືອງສັງທອງ ນະຄອນຫຼວງວຽງຈັນ ໄດ້ກວດກາລົດກະບະຣີໂວ້ສີຂາວ ເລກ. ທະບຽນ ຽວ 9994 ກໍາແພງນະຄອນ ທີ່ກໍາລັງຂັບຂີ່ມາທາງທິດເຫນືອ ມຸ່ງຫນ້າເຂົ້າພື້ນທີ່ເມືອງສັງທອງ ແລະ ເມື່ອກວດກາເອກະສານ ເຈົ້າຂອງລົດຕອບວ່າ: ລົດຕິດໄຟແນ້ນ ບໍ່ມີເອກະສານໃດໆ ແຕ່ເຈົ້າຫນ້າທີ່ເກີດ ຄວາມສົງໄສ ຈຶ່ງບອກໃຫ້ຜູ້ຂັບຂີ່ເອົາແວ່ນດ້ານຫຼັງລົງ ສັງເກດເຫັນເປົາສີດໍາ 1 ຫນ່ວຍ ມີຜ້າແພສີຜ້າປົກໄວ້ ຈຶ່ງຖາມຜູ້ຂັບຂີ່ ແຕ່ພວກກ່ຽວໄດ້ເລັ່ງຂັບລົດຫຼົບຫນີໄປ.
ຮອ ອານົງສັກ ພຸດທະວົງ ຫົວຫນ້າຫນ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສັງທອງ ໃຫ້ຮູ້ວ່າ:
ພາຍຫຼັງທີ່ໄດ້ຮັບຂໍ້ມູນຈຶ່ງລາຍງານຜູ້ບັນຊາ ແລະ ປະສານທຸກເລົ່າຮົບວິຊາສະເພາະ ກໍາລັງປ້ອງກັນ ຄວາມສະຫງົບເມືອງ ອອກສະກັດລັດ, ຮອດເວລາປະມານ 7:30 ໂມງຂອງມື້ຕໍ່ມາ ຈຶ່ງພົບເຫັນລົດກະບະ ຄັນດັ່ງກ່າວຈອດປະໄວ້ຢູ່ພື້ນທີ່ບ້ານນາຫອຍ ກ່ອນທໍາການກວດຄົ້ນພົບເຫັນກະແຈປະໄວ້ຢູ່ຕີນລົດ ພາຍໃນ ລົດມີເອກະສານຈໍານວນຫນຶ່ງ ແລະ ຢາບ້າຈໍານວນ 16 ເມັດ.
ຫຼັງຈາກນັ້ນ, ເວລາຕໍ່ມາປະມານ 17:00 ໂມງຂອງວັນດຽວກັນ ໄດ້ຮັບແຈ້ງຈາກພົນລະເມືອງດີ ຜ່ານ ທາງໂທລະສັບ ວ່າ: ພົບເຫັນ ທ້າວ ດາວເຮືອງ ອາຍຸ 40 ປີ ຢູ່ບ້ານໂຄກແຫ້ ເມືອງສັງທອງ ລາກເອົາເປົ້າສີດໍາ ທີ່ຢູ່ແຄມທາງເຂົ້າໄປໃນປ່າ ຫ່າງຈາກທາງປະມານ 4 ແມັດ.
ພາຍຫຼັງໄດ້ຮັບແຈ້ງຄວາມ ຈຶ່ງໄດ້ນໍາຕົວຜູ້ກ່ຽວໄປສອບສວນ ແລະ ຜ່ານການສອບສວນ ຜູ້ກ່ຽວ ສາລະພາບວ່າ:
ເປົາສີດໍາທີ່ພົບເຫັນ ແລ້ວລາກອອກຈາກແຄມທາງໄປຊຸກເຊື່ອງໄວ້ໃນປ່ານັ້ນ ເບື້ອງຕົ້ນຕົນໄດ້ເອົາມີດ ປາດເບິ່ງຈຶ່ງຮູ້ວ່າແມ່ນຢາບ້າ ລວມມີ 42 ແພັກ ຫຼື 126 ມັດ ຫຼື 252.000 ເມັດ, ຕົນຈຶ່ງໄດ້ແບ່ງອອກ ເປັນສາມພູດ ແລ້ວເອົາໄປຊຸກເຊື່ອງໄວ້ຢູ່ນາ ເຂດບ້ານອ່າງນ້ອຍ ແລະ ຊຸກເຊື່ອງໄວ້ແຄມທາງລະຫວ່າງ ບ້ານ ໂຄກແຫ້ ຫາ ບ້ານເພຍລາດ.
ຕໍ່ກັບຂອງກາງດັ່ງກ່າວ, ເຈົ້າຫນ້າທີ່ ກອງບັນຊາການ ປກສ ເມືອງສັງທອງ ໄດ້ເກັບກູ້ມາຮັກໄວ້ເປັນ ຂອງກາງໃນການດໍາເນີນຄະດີ.
