ກະກຽມສະຖານທີ່ ເພື່ອປິ່ນປົວຜູ້ຕິດເຊື້ອພະຍາດໂຄວິດ-19
ຕາມການລາຍງານ ຂອງປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ກຳລັງ ຊາວໝຸ່ມ ປກຊ-ປກສ ເມືອງໄຊທານີ ນວ ຈຳນວນ 35 ສະຫາຍ ໄດ້ພ້ອມກັນ ກາງຕຽງນອນ ຈຳນວນ 400 ຊຸດ ໂດຍຮັກສາໄລຍະຫ່າງ, ຢູ່ສູນກັກກັນສະໜາມກິລາແຫ່ງຊາດ ຫຼັກ 16 ນວຕຶກ A ແລະ ຕຶກ B. ເພື່ອກະກຽມເປີດເປັນໂຮງໝໍ ພາກສະໜາມປິ່ນປົວຜູ້ຕິດເຊື້ອພະຍາດໂຄວິດ-19.ພັທ ຈັນເພັງ ແກ້ວປະເສີດ ຮອງຫົວໜ້າກອງບັນຊາການ ປກສ ເມືອງໄຊທານີ ໃຫ້ຮູ້ວ່າ:
ພາຍຫຼັງທີ່ ກອງບັນຊາການ ປກສ ເມືອງໄຊທານີ ນວ ໄດ້ຮັບການຊີ້ນຳ ຈາກຄະນະສະເພາະກິດ ໃນວັນທີ 6 ຕຸລາ 2021 ກຳລັງຊາວໝຸ່ມ ປກຊ-ປກສ ໄດ້ກະກຽມສະຖານທີ່ຮອງຮັບຢູ່ຫລັກ 16 ມີ 2 ຕຶກຄື: ຕຶກ A ມີ 230 ໜ່ວຍ ແລະ ຕຶກ B ມີ 170 ໜ່ວຍ ແລະ ຄາດກະວ່າຈະໄດ້ນໍາໄຊ້ໃນໄວໆນີ້ ຖ້າຫາກມີຜູ້ຕິດເຊື້ອພະຍາດເພີ່ມຂຶ້ນ.
ກອງບັນຊາການ ປກສ ນວ ສະແດງຄວາມຍ້ອງຍໍຊົມເຊີຍຕໍ່ ກຳລັງຊາວໜຸ່ມ ປກຊ-ປກສ ຂອງ ເມືອງໄຊທານີ ນວ ທີ່ມີຄວາມຮັບຜິດຊອບສູງໃນການກະກຽມສະຖານທີ່ ຮອງຮັບປິ່ນປົວຜູ້ຕິດເຊື້ອພະຍາດໂຄວິດ-19 ແລະ ຮຽກຮ້ອງມາຍັງປະຊາຊົນ ຊາວນະຄອນຫຼວງວຽງຈັນ ໃຫ້ພ້ອມກັນເປັນເຈົ້າການ ມີສະຕິປ້ອງກັນໂຕເອງ ຕາມແຈ້ງການຂອງຄະນະສະເພາະກິດວາງອອກຢ່າງເຂັ້ມງວດ. ເພື່ອບໍ່ໃຫ້ເຊື້ອພະຍາດດັ່ງກ່າວແຜ່ລາມອອກເປັນວົງກວ້າງ.
