ຕາມການລາຍງານ ຂອງ CRI-FM93: ສະຖານີລົດໄຟຫຼວງພະບາງ ຂອງໂຄງການລົດໄຟລາວ-ຈີນ ໄດ້ສໍາເລັດການກໍ່ສ້າງພາກສ່ວນຫຼັງຄາ ແລະໄດ້ເປີດຜ້າຄຸມຮູບໂສມອອກ ເຊິ່ງໂຄງສ້າງຂອງຫຼັງຄາໄດ້ໃຊ້ຮູບແບບ “ສາມລວງຕັ້ງ ໜຶ່ງລວງຂວາງ” ຖືວ່າເປັນຮູບແບບ ທີ່ມີຄວາມສະຫຼັບຊັບຊ້ອນ ແລະເປັນອາຄານ ທີ່ມີຄວາມໂດດເດັ່ນທີ່ສຸດ ຂອງໂຄງການກໍ່ສ້າງເສັ້ນທາງລົດໄຟລາວ-ຈີນ.
ສະຖານີດັ່ງກ່າວໄດ້ຮັບເໝົາກໍ່ສ້າງໂດຍກຸ່ມບໍລິສັດກໍ່ສ້າງທາງລົດໄຟ ສປຈີນ, ມີເນື້ອທີ່ທັງໝົດ 7.970 ຕາແມັດ, ຕິດຕັ້ງ 2 ຊານສະຖານີ 4 ສາຍທາງ, ຮອງຮັບຜູ້ໂດຍສານໄດ້ຫຼາຍເຖິງ 1.200 ຄົນ, ການອອກແບບເປັນໂຄງສ້າງເຫຼັກ ແລະ ມີຫຼາຍຂັ້ນຕອນ ໃນການປະກອບ ແລະ ຕິດຕັ້ງ ພ້ອມທັງຕ້ອງມີຄວາມລະອຽດສູງ ແລະ ການກໍ່ສ້າງມີຄວາມຫຍຸ້ງຍາກທີ່ສຸດ. ເພື່ອໃຫ້ສໍາເລັດການກໍ່ສ້າງຫຼັງຄາ ທີ່ມີຄຸນນະພາບ ແລະ ມີມາດຕະຖານສູງ ທາງໂຄງການ ໄດ້ນໍາໃຊ້ເຕັກໂນໂລຊີ BIM (ສ້າງແບບຈໍາລອງຂໍ້ມູນອາຄານ) ເພື່ອຈໍາລອງ ສະແດງການຕິດຕັ້ງຕາໜ່າງໂຄງສ້າງເຫຼັກ ພ້ອມທັງໄດ້ສ້າງແຜນງານກໍ່ສ້າງພິເສດກັບຊ່ຽວຊານ ສປ ຈີນ.
ໃນໄລຍະທີ່ໄດ້ຮັບຜົນກະທົບຈາກພະຍາດ COVID-19 ທາງໂຄງການໄດ້ສ້າງຄວາມເຂັ້ມແຂງໃຫ້ແກ່ການຈັດຕັ້ງ, ການກໍ່ສ້າງ ພ້ອມທັງເສີມສ້າງການປະຕິບັດວຽກງານສົມທົບກັບການກວດກາດ້ານເຕັກນິກ ຂອງສະຫນາມກໍ່ສ້າງຢ່າງເຂັ້ມງວດ, ເຊິ່ງເປັນການຮັບປະກັນເຖິງຄວາມສຳເລັດ ແລະ ຄວາມປອດໄພ ໃຫ້ແກ່ຊັ້ນໂຄງສ້າງເຫຼັກ ຂອງຫຼັງຄາຢ່າງມີຄຸນນະພາບ.
ປັດຈຸບັນນີ້, ສະຖານີລົດໄຟຫຼວງພະບາງກໍາລັງດໍາເນີນວຽກງານດ້ານການຕົບແຕ່ງ ແລະ ຕິດຕັ້ງເຄື່ອງໄຟຟ້າ, ຄາດວ່າເດືອນສິງຫານີ້ຈະສໍາເລັດຮູບໂສມທັງຫມົດ ຂອງອາຄານສະຖານີດັ່ງກ່າວ.
