ຕາມລາຍງານ ຂອງສຳນັກຂ່າວ ໃນປະເທດອີຣານ ລາຍງານວ່າ: ເຮືອທະຫານ Kharg ເກີດໄຟໃໝ້ ເມື່ອເວລາ 02: 25 ນາທີ ຂອງວັນອັງຄານທີ 1 ມິຖຸນາ ທີ່ຜ່ານມາ ພ້ອມທັງຈົມລົງທະເລ ທີ່ອາວໂອມານ ໃນວັນພຸດ ທີ 2 ມິຖຸນາ ເຊິ່ງນັກດັບເພີງໄດ້ໃຊ້ເວລາດັບໄຟເກືອບ 20 ຊົ່ວໂມງ ເພື່ອພະຍາຍາມຄວບຄຸມໄຟທີ່ລຸກໃໝ້ເຮືອຢ່າງຮຸງແຮງ ແຕ່ກໍ່ບໍ່ສາມາດຮັກສາເຮືອໄວ້ໄດ້.
ສ່ວນລູກເຮືອ ແລະ ນັກຮຽນທະຫານປະມານ 400 ຄົນ ເທິງເຮືອນັ້ນ ຖືກອົບພະຍົບລົງເຮືອໄດ້ທັນ ໂຊກດີບໍ່ມີໃຜເສຍຊີວິດ ມີແຕ່ໄດ້ຮັບບາດເຈັບເບົາບາງ ປະມານ 20 ຄົນ.
ເບື້ອງຕົ້ນຍັງບໍ່ຮູ້ສາເຫດຢ່າງຊັດເຈນ ຂອງເຫດການຄັ້ງນີ້ ເຊິ່ງໃນບໍລິເວນດັ່ງກ່າວ ກໍ່ຍັງເປັນບ່ອນທີ່ມີການໂຈມຕີ ຈາກຝ່າຍກົງກັນຂ້າມອີກດ້ວຍ.
