ໃນວັນທີ25 ກຸມພາ2021, ໂຮງຮຽນນານາຊາດ ປັນຍາທິບໄດ້ປະກາດຢ່າງເປັນທາງການໃຫ້ຊຸມຊົນທົ່ວນະຄອນຫຼວງວຽງຈັນຮູ້ວ່າ: ໂຮງຮຽນນານາຊາດ ປັນຍາທິບຫາກໍໄດ້ຜ່ານການສະໝັກ ເຂົ້າເປັນໜຶ່ງໃນສະມະຊິກຂອງສະຫະພັນໂຮງຮຽນນານາຊາດອັງກິດໃນທະວີບອາຊີ(FOBISIA) ແລະສະມາຄົມໂຮງຮຽນນານາຊາດອັງກິດທົ່ວໂລກ(COBIS).
ເຊິ່ງໂຮງຮຽນນານາຊາດ ປັນຍາທິບ ມີຄວາມພະຍາຍາມໃນການເປັນຜູ້ນຳທາງດ້ານການສຶກສາອັງກິດໃນປະເທດລາວຢ່າງຕໍ່ເນື່ອງ, ປັນຍາທິບໄດ້ຜ່ານຂັ້ນຕອນການສະໝັກແລະກວດກາທີ່ເຂັ້ມງວດແລະຍາວນານຈາກທາງFOBISIA ແລະCOBIS ເພື່ອຮັບປະກັນວ່າໂຮງຮຽນຈະສາມາດຕອບສະໜອງມາດຕະຖານຂອງການເປັນໜຶ່ງໃນສະມາຊິກຂອງພວກເຂົາ.
ທ່ານChristopher FitzGerald ຜູ້ອໍານວຍການຝ່າຍບໍລິຫານຂອງໂຮງຮຽນນານາຊາດ ປັນຍາທິບຮັບປະກັນວ່າໂຮງຮຽນຂອງພວກເຮົາສາມາດຜ່ານການກວດກາມາດຕະຖານທີ່ເຂັ້ມງວດແລະໄດ້ກ່າວເຖິງລາຍລະອຽດຕ່າງໆຂອງຂະບວນການປົກປ້ອງທີ່ທາງໂຮງຮຽນໄດ້ສືບຕໍ່ພັດທະນາມາຕະຫຼອດ4ປີ.
ຈຸດທີ່ສຳຄັນທີ່ສຸດແມ່ນສິ່ງທີ່ທ່ານນາງປາດຖະນາປັນຍາທິບ, ຜູ້ກໍ່ຕັ້ງແລະຜູ້ອໍານວຍການໃຫຍ່ຂອງໂຮງຮຽນນານາຊາດປັນຍາທິບໄດ້ປຶກສາຫາລື- ເບື້ອງຫຼັງທີ່ສ້າງແຮງຈູງໃຈໃນການຕັດສິນໃຈຂອງເພິ່ນໃນການໃຫ້ຄວາມຮ່ວມມືກັບທາງFOBISIA ແລະCOBIS ວ່າ: “ປຽບຄືກັບຜູ້ປົກຄອງຜູ້ໜຶ່ງ, ແຮງບັນດານໃຈທັງໝົດທີ່ພັກດັນໃຫ້ຂ້າພະເຈົ້າຢາກຈະພັດທະນາສະພາບແວດລ້ອມທີ່ມີຄວາມປອດໄພແມ່ນຢາກໃຫ້ນັກຮຽນຂອງພວກເຮົາທຸກຄົນສາມາດຮຽນຮູ້ໄດ້ຢ່າງເຕັມປະສິດທິພາບ ແລະ ເພື່ອໃຫ້ພວກເຂົາເປັນໄດ້ ດັ່ງທີ່ພວກເຂົາຢາກເປັນ” ກ່າວໂດຍ ທ່ານ ນາງ ປາດຖະໜາ.
ທ່ານJohn Pearson ເອກອັກຄະລັດຖະທູດອັງກິດປະຈຳລາວໄດ້ເຂົ້າຮ່ວມງານແລະກ່າວເຖິງຄວາມສຳຄັນຂອງການເຂົ້າເປັນສະມາຊິກFOBISIA ແລະCOBIS ຂອງໂຮງຮຽນ ນານາຊາດ ປັນຍາທິບເຊິ່ງສອດຄ່ອງກັບປະໂຫຍກທີ່ວ່າEducation is Great (ການສຶກສາເປັນສິ່ງທີ່ດີຫຼາຍ) ແລະທາງສະຖານທູດອັງກິດກໍ່ໃຫ້ການສົ່ງເສີມການສຶກສາອັງກິດໃນປະເທດລາວ. “ແລະອີກໜຶ່ງຫົວຂໍ້ທີ່ຂ້າພະເຈົ້າຢາກຈະແບ່ງປັນໃນຄ່ຳຄືນນີ້ເຖິງແມ່ນວ່າໂຮງຮຽນປັນຍາທິບຈະເປີດສະຖາບັນການສຶກສາແຕ່ທາງໂຮງຮຽນກໍ່ພ້ອມຮັບຄຳຕິຊົມແລະຄຳຄິດເຫັນຈາກບຸກຄົນພາຍນອກເພື່ອນຳມາປັບປຸງແລະພັດທະນາໂຮງຮຽນຂອງພວກເຂົາເພີ່ມເຕີມເຊິ່ງຂ້າພະເຈົ້າສາມາດເວົ້າໄດ້ເລີຍວ່າສິ່ງເຫຼົ່ານີ້ເປັນວິໄສທັດຂອງໂຮງຮຽນຊັ້ນນຳ” ກ່າວໂດຍທ່ານເອກອັກຄະລັດຖະທູດອັງກິດປະຈຳລາວJohn Pearson
ອາຈານໃຫຍ່ປະຈຳວິທະຍາເຂດຂອງໂຮງຮຽນນານາຊາດ ປັນຍາທິບຍັງໄດ້ເວົ້າກ່ຽວກັບວິທີທີ່ນັກຮຽນ, ພໍ່ແມ່ແລະຄູອາຈານຂອງພວກເຂົາໄດ້ຮັບຜົນປະໂຫຍດຈາກການເຂົ້າຮ່ວມເປັນສະມາຊິກເຫຼົ່ານີ້ແລະໃນຕອນທ້າຍຂອງງານ, ທີມງານສື່ມວນຊົນຕ່າງໆກໍ່ໄດ້ມີໂອກາດໃນການເຂົ້າຮ່ວມແລະສອບຖາມ.
ເປັນຕອນແລງທີ່ເຕັມໄປດ້ວຍການໃຫ້ຂໍ້ມູນສຳລັບທຸກຄົນແທ້ໆແລະເປັນການຊົມເຊີຍຕໍ່ຜົນສໍາເລັດຂອງງານໃນມື້ນີ້ເຊິ່ງໂຮງຮຽນນານາຊາດ ປັນຍາທິບໄດ້ກ່າວຂອບໃຈທາງສື່ມວນຊົນພ້ອມທັງໝູ່ເພື່ອນແລະຜູ້ປົກຄອງທຸກທ່ານທີ່ໃຫ້ກຽດເຂົ້າຮ່ວມງານຂອງພວກເຂົາ. ພວກເຮົາເຊື່ອວ່ານີ້ເປັນພຽງຈຸດເລີ່ມຕົ້ນຂອງສິ່ງດີໆທີ່ຈະເກີດຂຶ້ນເນື່ອງຈາກວ່າໂຮງຮຽນນານາຊາດປັນຍາທິບຂອງພວກເຮົາແມ່ນຍັງຄົງສືບຕໍ່ເປັນສະຖາບັນການສຶກສາຊັ້ນນຳຂອງອັງກິດໃນປະເທດລາວ.ໃນຂະນະທີ່ປະເທດຂອງພວກເຮົາກຳລັງຈະພັດທະນາໂດຍສະເພາະແມ່ນດ້ານການສຶກສາ, ໂຮງຮຽນນານາຊາດ ປັນຍາທິບກໍ່ຈະສືບຕໍ່ເປັນຜູ້ນຳພາການສຶກສາໄປສູ່ມາດຕະຖານທີ່ສູງຂື້ນໃນບັນດາໂຮງຮຽນນານາຊາດຂອງປະເທດລາວເຊັ່ນດຽວກັນ.
