ພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ (ອຄ.ນວ) ກວດຍຶດ ແລະ ທຳລາຍຖີ້ມປາໝຶກແຊ່ໂສດາໄຟ ແລະ ມີສານຟໍມາລີນປົນເປື້ອນ ນ້ຳໜັກ 560 ກິໂລກຼາມ ມູນຄ່າ 6 ລ້ານກວ່າກີບ ໂດຍພິທີທຳລາຍ ໄດ້ຈັດຂຶ້ນໃນວັນທີ 2 ຕຸລາ 2020 ທີ່ສະໜາມບໍາບັດຂີ້ເຫຍື້ອ ຫຼັກ 32 ບ້ານນາຜາສຸກ, ເມືອງໄຊທານີ ໂດຍການເຂົ້າຮ່ວມຂອງ ທ່ານ ນັນຕາ ສານຸວົງ ຮອງຫົວໜ້າພະແນກ ອຄ.ນວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ສິນຄ້າດັ່ງກ່າວ ພະແນກ ອຄ.ນວ ໄດ້ຮັບແຈ້ງເບາະແສຂອງພົນລະເມືອງດີ ໃນວັນທີ 30 ກັນຍາ 2020 ເຈົ້າໜ້າທີ່ກວດກາການຄ້າ ໄດ້ສົມທົບກັບ ຫ້ອງການອຸດສາຫະກໍາ ແລະ ການຄ້າເມືອງນາຊາຍທອງ ແລະ ອົງການປົກຄອງບ້ານນາງ່າ ໄດ້ລົງກວດກາສະຖານທີ່ປຸງແຕ່ງປາໝຶກແຊ່ ເຊິ່ງເປັນຂອງ ນາງ ກ (ນາມສົມມຸດ) ອາຊີບຄ້າຂາຍ, ປັດຈຸບັນຢູ່ ບ້ານນາງ່າ, ເມືອງນາຊາຍທອງ ຜ່ານການກວດກາພົບເຫັນປາໝັກແຊ່ໂສດາໄຟ ຈໍານວນ 560 ກິໂລ ຄິດເປັນມູນຄ່າ 6.900.000 ກີບ.
ຈາກການສອບຖາມຜູ້ກ່ຽວໄດ້ຍອມຮັບວ່າຕົນເອງແມ່ນໄດ້ຊື້ປາໝຶກມາຈາກປະເທດເພື່ອນບ້ານ ຂົນສົ່ງໃສ່ລົດເມ ມາລົງຄີວລົດ 13 ໃຕ້ ໂດຍບໍ່ມີເອກະສານຢັ້ງຢືນແຫຼ່ງທີ່ມາເປັນຕົ້ນ: ໃບແຈ້ງເສຍພາສີ ແລະ ໃບຢັ້ງຢືນສຸຂານາໄມສັດ ມາປຸງແຕ່ງເປັນປາໝັກແຊ່ໂຊດາໄຟ ເພື່ອນຳສົ່ງຂາຍໃຫ້ລູກຄ້າຢູ່ບັນດາຕະຫຼາດ, ສ່ວນສະຖານທີ່ປຸງແຕ່ງປາມຶກແຊ່ໂຊດາໄຟ ແມ່ນບໍ່ມີອະນຸຍາດຈາກພາກສ່ວນທີ່ກ່ຽວ. ສະນັ້ນ, ທາງເຈົ້າໜ້າທີ່ກວດກາການຄ້າ ພະແນກ ອຄ.ນວ ຈຶ່ງໄດ້ເຮັດບົດບັນທຶກ, ຍຶດເອົາປາໝັກແຊ່ໂຊດາໄຟມາມາເກັບຮັກສາໄວຢູ່ພະແນກ, ສຳລັບສະຖານທີ່ປຸງແຕ່ງແມ່ນໃຫ້ຢຸດເຊົາ ແລະ ໄດ້ນຳເອົາຕົວຢ່າງໄປກວດຫາສານຕົກຄ້າງຢູ່ພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ ຜົນການວິໄຈແມ່ນພົບເຫັນສານເຄມີຟໍມາລິນປົນເປື້ອນ ບໍ່ສາມາດບໍລິໂພກໄດ້. ດັ່ງນັ້ນ, ທາງພະແນກຈຶ່ງໄດ້ອອກຂໍ້ຕົກລົງຮິບເປັນຂອງລັດ ແລະ ຈັດພິທີທຳລາຍຖິ້ມ.
